1. San e pasa anga u te wi e fii booko-saka?

WI E meke moiti fu pasa den polobelema di e miti wi ala dei. Ma te wi e fii booko-saka, ai moo taanga gi u fu losi den polobelema fu u, yu á si so noh? Te wi e fii booko-saka, u nai poi denki bun moo, u nai piisii tu. Odo 24:10 e taki: ‘Efu yu e fii booko-saka te nowtu miti i, yu o swaki.’ A tekisi ya e soi taki te wi e fii booko-saka, ai moo taanga gi u fu losi den polobelema fu u.

2. San a wantu sani di e meke u fii booko-saka? San wi o luku aini a artikel ya?

² Son leisi a te sani e miti u da wi e fii booko-saka. Wi e fii booko-saka tu te sani e miti wan famii efuso mati fu u. Wi e fii booko-saka fu di wi abi wan swakifasi, fu di u siki efuso fu di wi á poi du son sani. Son leisi wi e fii booko-saka fu di wi á fende wan gaandi aini a olikanisâsi. Taawan e fii booko-saka fu di den e peleiki a peesi pe sama nai wani aliki. Wi o luku aini a artikel ya san u sa du te wi e fii booko-saka.

3. San o yeepi u fu wi á kuutu useefi tumisi?

³ Son leisi te wi e pakisei den fowtu di wi e meke, da wi e fii enke wi á bun. Kande wi e fii enke Yehofa ná o meke u go aini a nyun goontapu fu di wi abi swakifasi. Ma a denki de sa meke u gwe fika Yehofa. Fa u mu si den fowtu di wi e meke? Beibel taki boiti Yesesi, nawan taa libisama de di ná abi sondu (Rom. 3:23). Ma Yehofa nai sidon teli ala den fowtu di wi e meke. A de enke wan Dda di lobi u, a wani yeepi u, ai pasensi anga u tu. Ai si a moiti di wi  e meke fu libi enke fa a wani. Ai si fa wi e fii tu te u meke wan fowtu, neen meke a de kabakaba fu yeepi u.​—Rom. 7:18, 19.

4-5. Enke fa 1 Yohanisi 3:19, 20 e soi, da san yeepi tu sisa fu holidoo, winsi fa den e fii booko-saka son yuu?

⁴ Meke u luku a toli fu Debora anga Maliya. * Di Debora be yonkuu, den sama fi en á be e libi bun anga en. Noiti den be e gafa en te a be du wan sani bun. Neen meke di a kon bigi, a be e fii enke a á bun. Te a be meke wan pikin fowtu seefi, a be e fii enke a á be poi du nawan sani bun. Ná aseefi sani ya be miti Maliya tu. Den famii fi en be lobi gi en sen. Neen meke di a kon bigi, ala yuu a be e fii enke a soso. Di a kon a waaleiti seefi a be e fii enke a á bun sai fu de wan Kotoigi fu Yehofa.

⁵ Winsi fa den sisa ya e fii so, toku den á gwe fika Yehofa. San yeepi den fu holidoo? Den begi Yehofa, neen den puu taigi en san be e moo den (Ps. 55:22). Den sabi taki Yehofa e fusutan den. Yehofa sabi taki son sani di miti u di u be yonkuu sa meke wi e fii enke wi á bun te u toon gaan sama. Ma winsi wi e fii enke wi á bun, Yehofa sabi ala den bun manii fu u, winsi useefi nai kaba biibi taki wi abi den manii ya.​—Leisi 1 Yohanisi 3:19, 20.

6. Fa son sama e fii te den meke aseefi fowtu omen leisi?

⁶ Son baala anga sisa e meke moiti fu fika wan takuu gwenti, ma a omen leisi den e meke aseefi fowtu baka. A sani ya e meke den fii booko-saka. A tuu taki u kosensi e fon u te u meke wan fowtu (2 Kor. 7:10). Ma wi á mu e kuutu useefi tumisi. Yu á mu e taki: ‘Mi á bun. Yehofa ná o gi mi paadon.’ A sani de a ná tuu. Efu wi e denki so, wi o gwe fika Yehofa. Ná feegete, Odo 24:10 taki te wi e fii booko-saka, u nai abi kaakiti. Pe fu u sidon e kusumi, a moo bun fu ‘meke en bun’ anga Yehofa baka. Begi en da yu akisi en fu a gi i paadon (Yes. 1:18). Efi i soi taki ai hati i tuutuu taki i du wan sani di Yehofa á lobi, neen yu e meke moiti fu kengi, a o gi i paadon. Taki anga den owluman tu, da den o yeepi yu anga ala pasensi fu toon Yehofa mati baka.​—Yak. 5:14, 15.

7. Saide wi á mu fii booko-saka te wi e feti anga den swakifasi fu u?

⁷ Jean-Luc, wan owluman a Faansikondee taki: ‘Te Yehofa taki wan sama e libi a wan letifasi, dati á wani taki a sama nai meke fowtu. Ma a wani taki ala yuu te a  sama meke wan fowtu ai soi taki a sani di a du e hati en, da ai meke moiti baka fu du sani enke fa Yehofa wani’ (Rom. 7:21-25). Neen meke efi yu e feti anga wan swakifasi, yu á mu fii enke yu á bun. Nawan fu u di de ya e libi a wan letifasi tuutuu. A di Yehofa abi bun ati meke ai tapu den sondu fu u anga a buulu fi en Manpikin.​—Efe. 1:7; 1 Yoh. 4:10.

8. Sama i sa taigi te yu e fii booko-saka?

⁸ Te wi e fii booko-saka, u sa taki anga den baala anga sisa fu u. Den o aliki u te u wani taki puu koko a wi ati. Den sa gi u taanga-sikin tu (Odo 12:25; 1 Tes. 5:14). Joy, wan sisa a Nigeliya di e fii booko-saka son yuu taki: ‘Mi á sabi fa mi be o du efu mi á be abi den baala anga sisa. A fasi fa den e gi mi taanga-sikin e soi mi kiin taki Yehofa e aliki den begi fu mi. Den leli mi tu fa miseefi sa gi taawan taanga-sikin te den nai fii bun.’ Ma a ná ala yuu den baala anga sisa e sabi taki wi e fii booko-saka, neen meke u mu e taigi den te u nai fii bun. Kande i sa taigi wan baala efuso sisa di yu e fitoow fa yu e fii, da a o gi i taanga-sikin.

9. Fa Psalm 41:3 anga 94:19 e toosutu u?

⁹ Begi Yehofa fu a yeepi i. Te u siki, moomoo efu a wan siki di dataa á poi deesi, ai taanga gi u fu denki bun. Ma u mu holi a pakisei taki winsi fa Yehofa ná o du wan wonduu fu deesi u nownow, tokuso ai toosutu u te u siki. Ai gi wi a kaakiti di wi abi fanowdu tu fu holidoo. (Leisi Psalm 41:3; 94:19.) A sa meke baala anga sisa yeepi u te wi abi sama fanowdu fu bai sani gi u, efuso fu seeka sani a osu. Den sa begi makandaa anga u tu. Den baala anga sisa sa leisi wan tekisi anga u di e gi u taanga-sikin, kande wan tekisi di o membee u fa Yehofa o puu siki anga pen aini a nyun goontapu.​—Rom. 15:4.

10. San yeepi Isang fu kisi enseefi baka di wan ongooku miti en?

¹⁰ Luku a toli fu wan baala den e kai Isang di e tan a Nigeliya. Baka di wan ongooku miti en, dataa taigi en taki a ná o poi waka moo. A so sani waka tu. Isang taki: ‘Mi be booko-saka tuutuu.’ San yeepi en fu a kisi enseefi baka? A taki: ‘Mi anga mi uman be e begi Yehofa naamo. U be e sutudeli a Wowtu fi en. U be e gi Yehofa daa tu fu den bun di a be e du gi u. Wan fu den sani ya na a howpu di a gi u fu libi aini wan nyun goontapu.’

11. San yeepi Cindy fu piisii winsi fa sani be e moo en?

¹¹ Dataa be taigi Cindy, wan sisa di e tan a Mekisikow taki a abi wan siki di sa kii en. San yeepi en fu holidoo? Ala dei te a be e go a dataa, a be e meke moiti fu peleiki gi wan sama. A sikiifi taki: ‘A sani ya yeepi mi fu mi á poti pakisei tumisi na a siki fu mi anga a pen di mi be e fii. Winsi fa dataa koti mi, mi á be e booko mi ede tumisi, fu di mi be e poti pakisei a taawan. Mi be e akisi den dataa anga den sesite fa ai go anga den famii fu den, baka dati mi be e akisi den saide na a taanga wooko ya den leli fu du. A so mi be e sabi sowtu toli mi sa taki anga den fu man doo den ati. A omen fu den e foondoo te mi akisi den fa ai go anga den, bika gaanse leisi sama di siki nai akisi den a sani de. A omen fu den e gi mi daa taki mi e booko mi ede anga den. Taawan e gi mi den telefon nombuu, den e taigi mi pe den e tan seefi. Mi be sabi taki Yehofa be o yeepi mi pasa a tesi ya, ma noiti mi be denki taki na a fasi de a be o yeepi mi. Mi  á be sabi taki a so mi be o piisii winsi fa sani be e moo mi.’​—Odo 15:15.

12-13. Fa son baala anga sisa di siki efuso malengii e paati a bun nyunsu? Sowtu wini den fende?

¹² Sama di siki efuso malengii e fii booko-saka son leisi fu di den á poi wooko enke fa den wani gi Yehofa. Ma toku a omen fu den baala anga sisa ya e paati a bun nyunsu. Aini Ameekankondee, wan sisa den e kai Laurel be siki te anga masini a be e boo 37 yali langa. A omen leisi dataa koti en tu fu di a be abi kanker anga taa sowtu siki. Ma den sani ya á be poi tapu en fu a peleiki. A be e peleiki gi den sesite di be e yeepi en anga taa sama di be e kon neen a osu. A fende wini bika a yeepi 17 sama fu kon sabi Yehofa! *

¹³ Richard, a wan owluman fu Faansikondee. A taki san baala anga sisa sa du te den á poi komoto a osu efuso te den e tan a peesi pe dataa e luku sama di siki efuso malengii. A taki: ‘Den sa poti den buku fu wi a wan peesi pe sama sa si den. Te sama o si den, te den poti akisi gi den, da a so den o fende a okasi fu peleiki. A sani ya o meke den baala anga sisa di á poi go osu fu osu fende taanga-sikin, bika den o fende a okasi fu taki anga sama fu a howpu fu den.’ Den baala anga sisa ya sa peleiki anga telefon tu efuso sikiifi biifi gi sama.

14. Saide u sa waka a Kownu David baka?

¹⁴ Son leisi siki, gaandi efuso taa sani e meke wi á poi du son wooko aini a kemeente efuso a kelen pe u de. Efu a sani ya e miti i, i sa leli wan sani fu David. David be wani meke a tempel fu Gadu, ma Gadu taigi en taki a wan taa sama a be abi a pakisei fu meke a osu ya. Pe fu David sidon kusumi, a holibaka gi a sama di Yehofa be poti fu meke a tempel. A gi tyaipi gowtu anga solufu tu, fu holibaka gi a wooko. U sa waka a David baka.​—2 Sam. 7:12, 13; 1 Kolon. 29:1, 3-5.

15. San be yeepi Hugues fu kisi enseefi baka?

¹⁵ Wan baala a Faansikondee á be poi du a owluman wooko moo fu di a be siki. Pikinpikin wooko a osu seefi a á be e poi du moo. A sikiifi taki: ‘Mi be e fii booko-saka. Ma bakaten, mi be kon fusutan taki mi á be mu e booko mi ede tumisi anga sani di mi á poi du moo. Mi be bigin poti pakisei a san mi poi du gi Yehofa. A dati yeepi mi fu piisii baka. Winsi fa mi á de enke fosi moo toku mi ná o gi abaa. Leti  enke fa Gidiyon anga den dii ondoo man fi en be tan feti winsi fa den be weli, a so mi o tan du san mi poi gi Yehofa.’​—Kuut. 8:4.

16. San u sa leli fu den engel?

¹⁶ U sa leli wan sani fu den engel tu. A ten di Akab be e tii, Yehofa be kai wantu engel kon, neen a akisi den fa den denki na a moo bun fasi fu koli a ogii kownu ya. A omen engel taki fa den be e denki den sa koli a kownu, ma a wan fu den namo Yehofa sende fu du san a be abi a pakisei (1 Kow. 22:19-22). Den taa engel á be fii booko-saka di Yehofa á wooko anga san den taki. Den á be e pakisei taki: ‘A sosokaali mi lasi mi ten taki fa mi e denki.’ Nono, den be abi sakafasi. Den be teke en fu bigi taki den be fende a okasi fu taigi Yehofa fa den e denki.​—Kuut. 13:16-18; Openb. 19:10.

17. San u mu du te wi e fii booko-saka fu di u ná abi son gaandi aini a kemeente?

¹⁷ Holi a pakisei taki a moo pelensipali gaandi di wi abi, a fu tyai a nen fu Yehofa anga fu paati a bun nyunsu fu a Kownukondee fi en. U sa lasi son gaandi di u be abi aini a olikanisâsi, neen meke u mu holi a pakisei taki a ná te wi abi gaandi namo da Yehofa o lobi u. A sani di e meke Yehofa anga den baala anga sisa lobi u, a te wi abi sakafasi. Neen meke i mu e begi Yehofa fu a yeepi i fu abi sakafasi. Sidon pakisei a libi fu sama aini Beibel di be abi sakafasi, da i meke moiti waka a den baka. Yeepi den baala anga sisa tu enke fa i poi.​—Ps. 138:6; 1 Peit. 5:5.

18-19. San o yeepi u fu e piisii te wi e peleiki winsi den sama nai aliki?

¹⁸ Yu e fii booko-saka son leisi fu di den sama nai wani aliki na a pisi pe yu e peleiki? San o yeepi u fu piisii, winsi den sama nai wani aliki? Wantu sani kai aini a faki ‘ San o yeepi i fu moo piisii aini a peleikiwooko?’ I sa puubei den luku. I mu meke moiti tu fu si a peleikiwooko enke fa Yehofa e si en. Saide wi e du a wooko ya?

¹⁹ Ná feegete taki a moo pelensipali wooko fu u, a fu meke sama sabi a nen fu Gadu anga a Kownukondee fi en. Yesesi be taki a wantu sama namo be o waka neen baka (Mat. 7:13, 14). Te wi e peleiki, wi abi  a gaandi fu wooko makandaa anga Yehofa, Yesesi anga den engel (Mat. 28:19, 20; 1 Kor. 3:9; Openb. 14:6, 7). A Yehofa seefi e hali den sama di wani dini en kon neen (Yoh. 6:44). Neen meke winsi wan sama ná aliki u wan leisi, u mu tan puubei, bika kande a sa aliki wan taa leisi.

20. Enke fa Yelemiya 20:8, 9 e soi, da san u mu du te wi e fii booko-saka?

²⁰ A omen sani u sa leli fu polofeiti Yelemiya. Sama á be e aliki en na a pisi pe a be e peleiki. Den sama be e kosi en hii dei. (Leisi Yelemiya 20:8, 9.) A be booko-saka te neen a á be wani peleiki moo. Ma toku a á gi abaa. San yeepi en? A wowtu fu Yehofa be de enke wan faya aini en sikin, a á be poi tapu en mofu. Neen meke u mu e leisi a Wowtu fu Gadu, da u sidon pakisei san u leli. Da leti enke Yelemiya u ná o poi tan wi á taigi sama san u leli. A sani ya o meke u moo piisii te wi e peleiki, kande moo sama o aliki u tu te den si fa wi e piisii.​—Yel. 15:16.

21. San o yeepi u fu piisii baka, te wi e fii booko-saka?

²¹ Debora taki: ‘Saatan e piisii te wi e fii booko-saka, bika a so a abi a okasi fu puu wi a Yehofa se.’ Ma Yehofa taanga omen toon moo Saatan. Neen meke te yu e fii booko-saka, begi Yehofa fu a yeepi i. A poi yeepi yu anga den swakifasi fi i. Efi i siki, a o holibaka gi i. A poi yeepi i fu yu á booko yu ede tumisi te i lasi wan gaandi efuso te yu á fende wan gaandi di i be sa wani. A o yeepi i tu fu piisii te yu e peleiki, winsi sama nai aliki. Te yu e begi, taigi Yehofa fa yu e fii tuutuu. Efi yu e fii booko-saka, a o yeepi i fu piisii baka.