1. Sɛ hɛn abaw mu bu a, ɔbɛka hɛn dɛn?

DA BIARA yehyia ɔhaw ahorow na yɛyer hɛnho dɛ yebedzi ho dwuma dɛ mbrɛ hɛn ahoɔdzen botum. Naaso, ana enngye nnto mu dɛ, sɛ hɛn abaw mu mmbui na yehyia ɔhaw ahorow a, yetum dzi ho dwuma yie kyɛn ber a hɛn abaw mu ebu no? Dɛm ntsi, sɛ hɛn abaw mu bu a, ɔsɛ dɛ yehu dɛm atsenka no dɛ ewi bi a orubowia hɛn ahotodo, hɛn akokodur nye hɛn enyigye. Mbɛbusɛm 24:10 no kã dɛ: “Sɛ etɔ bahaw wɔ ahohia da mu a, w’ahoɔdzen suar.” Ntsi, sɛ hɛn abaw mu bu a, yɛbɛtse nka dɛ yɛayɛ mberɛw, na ɔno bɛma wɔayɛ dzen ama hɛn dɛ yebegyina hɛn haw ahorow ano.

2. Ebɛn ndzɛmba na obotum ama hɛn abaw mu eebu, na ebɛnadze na yebosusu ho wɔ adzesua yi mu?

² Ndzɛmba pii na obotum ama hɛn abaw mu eebu. Bi wɔ hɔ a ɔwɔ hɛn ho, bi so wɔ hɔ a, tsebea bi na ɔdze ba. Dɛm ndzɛmba no bi botum ayɛ hɛn sintɔ, hɛn mberɛwyɛ nye yarba. Bi so botum ayɛ dwumadzi bi a yɛrohwɛ kwan wɔ Jehovah no som mu a hɛn nsa nnka, anaa asɛnka edwuma no a ɔsɛ dɛ yɛyɛ wɔ asaasesin bi a nyimpa pii nntsie asɛm no mu. Adzesua yi mu no, yɛbɔhwɛ ndzɛmba a sɛ hɛn abaw mu bu a yebotum ayɛ dze egyina ano.

3. Ebɛnadze na obotum aboa hɛn ma yeenya hɛn sintɔ ho adwen pa?

³ Ɔnnyɛ dzen koraa dɛ yɛbɛma hɛn sintɔ nye hɛn mberɛwyɛ ama yaatse nka dɛ yɛmmfata. Iyi ntsi, bi a yebotum enya adwen dɛ Jehovah renngye hɛn nnkɔ no wiadze fofor no mu da. Adwen a ɔtse dɛm no botum ayɛ hũ papaapa. Ɔsɛ dɛ yebu hɛn  sintɔ dɛn? Bible no ma yehu dɛ, sɛ yeyi Jesus Christ si nkyɛn a, nyimpa nyina “ayɛ bɔn.” (Rom. 3:23) Naaso, Jehovah mmfa n’adwen nnsi hɛn mfom do na ɔnnhwɛ kwan dɛ yɛbɛyɛ nyimpa a yedzi mũ. Mbom no, ɔyɛ Egya a ɔwɔ ɔdɔ a ɔpɛ dɛ ɔboa hɛn na ɔwɔ hɛnho abotar so. Mbɔdzen a yɛrobɔ dɛ yebedzi hɛn mberɛwyɛ do na yeenya adwen a ɔfata wɔ hɛnho no ohu, na ɔayɛ krado dɛ ɔbɔboa hɛn.​—Rom. 7:18, 19.

4-5. Ebɛn asɛm na ɔwɔ 1 John 3:19, 20 a ɔboaa hɛn nkyerɛbaa beenu bi ber a hɔn abaw mu bui no?

⁴ Hom mma yensusu dza ɔtoo Deborah na Maria * no ho nhwɛ. Aber a Deborah yɛ abofra no, wɔnye no enndzi no yie na iyi maa ɔtsee nka dɛ ɔmmfata. Nna wɔnntaa nnkamfo no. Ntsi, aber a onyinii no, nna ommbu noho bi. Sɛ nna odzi mfom ketseketse bi mpo a, ɔtse nka dɛ orunntum nnyɛ biribi papa biara da. Nna Maria so wɔ tsebea a ɔtse dɛmara mu. Nna n’ebusuafo hyɛ no enyiwu. Iyi ntsi nna ɔtse nka dɛ ɔnnsɛ hwee. Ntsi aber a obohun nokwar no ekyir no, nna ɔtse nka mpo dɛ ɔmmfata dɛ Nyankopɔn ne dzin da no do!

⁵ Naaso dɛm nkyerɛbaa beenu yi enngyaa dɛ wɔrosom Jehovah. Ebɛnadze ntsi a? Adze kor nye dɛ, wofii hɔn akoma mu kãa mbrɛ wosi tse nka no ho asɛm kyerɛɛ Jehovah, na wɔtoow hɔn adzesoa kyeen no do. (Ndw. 55:22) Wobohun dɛ hɛn sor Egya a ɔwɔ ɔdɔ no nyim dɛ ndzɛmba bɔn a woesisi wɔ hɛn asetsena mu no botum ama yaatse nka dɛ yɛmmfata. Sɛ mpo yɛtse nka dɛ yennyi suban papa biara a, Jehovah dze ohu dɛ yɛwɔ bi.​—Kenkan 1 John 3:19, 20.

6. Sɛ obi pɛ dɛ ogyaa ndzeyɛbɔn bi na ɔkɛyɛ bio a, bi a ɔbɛtse nka dɛn?

⁶ Obi a ɔrobɔ mbɔdzen dɛ obegyaa ndzeyɛbɔn bi a wɔagye ndwow wɔ no mu no, obotum aba dɛ ɔbɛyɛ ndzeyɛɛ a ɔtse dɛmara bio na iyi botum ama n’abaw mu eebu. Ɔwɔ mu, ɔnnyɛ nwanwa dɛ hɛn tsibowa bobu hɛn fɔ ber a yɛayɛ bɔn no. (2 Cor. 7:10) Naaso, ɔnnsɛ dɛ yedzi bɔn a yɛayɛ no ho awerɛhow dodoodow na yenya adwen dɛ: ‘Biribi papa biara nnyi hɔ a mubotum ayɛ. Jehovah besi dɛn dze mo bɔn akyɛ me?’ Adwen a ɔtse dɛm no nnyɛ na obotum ama yeegyaa dɛ yɛrosom Jehovah. Kaa asɛm a yɛkenkanee wɔ Mbɛbusɛm 24:10 no, sɛ hɛn abaw mu bu a, hɛn ahoɔdzen do bɛtsew. Mbom, enye Jehovah nsiesie hom ntamu dze nam mpaa a ebɔbɔ na aserɛ no hɔ bɔnfakyɛ no do. (Isa. 1:18) Sɛ ohu dɛ enu woho ampa a, ɔdze wo bɔn bɛkyɛ wo. Bio so, kɔ asafo mu mpanyimfo no hɔ, na wobenya woho abotar na wɔaaboa wo ma aasan nye Jehovah enya ebusuabɔ pa.​—Jas. 5:14, 15.

7. Sɛ ɔyɛ dzen ma hɛn dɛ yɛbɛyɛ dza ɔtsen a, ebɛnadze ntsi na ɔnnsɛ dɛ yɛma hɛn abaw mu bu?

⁷ Asafo mu panyin bi a ɔwɔ France a wɔfrɛ no  Jean-Luc kã kyerɛ hɔn a ɔyɛ dzen ma hɔn dɛ wobedzi mberɛwyɛ bi do no dɛ: “Jehovah n’enyi do no, nnyɛ ɔtseneneenyi nye obi a onndzi mfomdo da, mbom ɔtseneneenyi nye obi a odzi mfomdo a onu noho na ɔbɔ mbɔdzen dɛ ɔbɛyɛ nsesa aber biara.” (Rom. 7:21-25) Ntsi sɛ ɔyɛ dzen ma wo dɛ ibedzi mberɛwyɛ bi do a, mma nntse nka dɛ ennsɛ hwee. Kaa dɛ, wɔ Nyankopɔn n’enyi do no, hɛn mu biara runntum mmbu noho ɔtseneneenyi. Hɛn nyinara, yehia Nyankopɔn n’adom a ɔnam werdam no do dze ma no.​—Eph. 1:7; 1 John 4:10.

8. Sɛ hɛn abaw mu bu a, woananom hɔ na yebotum akɔhwehwɛ mboa?

⁸ Hɛn nuanom Christianfo botum ahyɛ hɛn nkuran! Sɛ no ho hia dɛ yɛnye hɔn kasa a, wɔbɛyɛ aso etsie hɛn na wɔaakã nsɛm a obotum ahyɛ hɛn nkuran. (Mbɛ. 12:25; 1 Thess. 5:14) Hɛn akyerɛbaa bi a ɔwɔ Nigeria a wɔfrɛ no Joy n’abaw mu bui. Ɔkãa dɛ: “Sɛ enuanom nnyi hɔ a nkyɛ mebɛyɛ dɛn? Nkuranhyɛ a minya fi enuanom hɔ no ma muhu dɛ Jehovah tsie me mpaabɔ. Mesũa mbrɛ mo so mibesi akyekye hɔn a hɔn abaw mu ebu no werɛ efi hɔn nkyɛn.” Ɔsɛ dɛ yɛma ɔtsena hɛn adwen mu dɛ ɔnnyɛ aber biara na sɛ yehia nkuranhyɛ a bi a hɛn nuanom bohu. Ntsi bi a no ho behia dɛ yɛkɔ hɛn nua Christiannyi bi a noho akokwaa hɔ na yɛkɔhwehwɛ no hɔ mboa.

9. Ebɛn kwan do na Ndwom 41:3 nye 94:19 hyɛ hɛn nkuran?

⁹ Hwehwɛ Jehovah no hɔ mboa. Sɛ yɛnntse apɔw anaa mpo ɔsɛ dɛ yegyina yarba koannkɔ bi ano a, bi a ɔbɛyɛ dzen dɛ yebenya adwen pa ama hɛnho. Ɔwɔ mu dɛ, Jehovah nnsa hɛn yarba wɔ anwanwa kwan do ndɛ dze, naaso ɔkyekye hɛn werɛ na ɔma hɛn ahoɔdzen a yehia no ama yeetum egyina ano. (Kenkan Ndwom 41:3; 94:19.) Dɛ nhwɛdo no, bi a ɔbɛka hɛn nuanom Christianfo bi ma wɔaabɔboa hɛn wɔ hɛn fie ndwuma mu anaa woeekedzi gua abrɛ hɛn. Bi a obotum aka hɛn nuanom ma wɔnye hɛn aabɔ mpaa. Anaa bi a ɔbɛma yɛakaakaa awerɛkyekyensɛm a ɔwɔ n’Asɛm no mu. Dɛm awerɛkyekyensɛm no bi nye enyidado a yɛwɔ dɛ wɔ wiadze fofor a ɔreba no mu no, yebenya asetsena a odzi mũ a yarba na yaw biara nnyi mu.​—Rom. 15:4.

10. Isang n’akwanhyia ekyir no, ebɛnadze ntsi na ɔamma n’abaw mu annkɔ do emmbu?

¹⁰ Onua bi a wɔfrɛ no Isang a ɔwɔ Nigeria nyaa akwanhyia ma obubui. No dɔkta kãa kyerɛɛ no dɛ onnkotum anantsew bio. Isang kãa dɛ: “M’abaw mu bui na mo sunsum botowee.” Naaso n’abaw mu kɔr do bui anaa? Oho! Ebɛnadze na ɔboaa no? Ɔkyerɛɛ mu dɛ: “Menye me yer enngyaa da dɛ yɛbɔbɔ Jehovah mpaa na yeesũa n’Asɛm no. Afei so, yesii hɛn bo dɛ yɛbɛma hɛn enyiwa asɔ ndzɛmba pa a yɛwɔ no. Bi nye enyidado a yɛwɔ dɛ yebenya asetsena pa wɔ Nyankopɔn no wiadze fofor no mu no.”

11. Ebɛn kwan do na Cindy nyaa enyigye ber a nna ɔyar no?

¹¹ Cindy yɛ hɛn akyerɛbaa bi a ɔwɔ Mexico. Dɔkta bi kãa kyerɛɛ no dɛ oenya yarba bi a obotum dze no akɔ owu mu. Osii dɛn gyinaa ano? Aber a ɔregye ayarsa no, ɔdze yɛɛ no botae dɛ da biara obedzi dase. Ɔkyerɛɛw dɛ: “Dɛm a meyɛe no boaa me ma medze m’adwen sii afofor do kyɛn dɛ medze besi oprehyɛn no, yaw a nna merefa mu nye mbrɛ nna metse nka no do. Dza nna meyɛ nye yi: Sɛ nna menye adɔktafo anaa anɛɛsfo robɔ nkɔmbɔ a, nna mibisa hɔn mbrɛ hɔn ebusuafo ho tse. Muwie a nna mebisa hɔn siantsir a wɔpaaw dɛ wɔbɛyɛ edwuma a ɔyɛ dzen dɛm yi. Ɔba no dɛm a, ɔnnyɛ dzen dɛ mebɛpaw asɛntsir bi a sɛ menye hɔn bɔ ho nkɔmbɔ a, ɔbɛka hɔn akoma. Hɔn mu piinara kãa dɛ ɔnntaa nnsi dɛ obi a ɔregye  ayarsa bebisa hɔn dɛ hɔnho tse dɛn. Hɔn mu piinara daa me ase dɛ modwen hɔnho. Hɔn mu bi mpo dze hɔn address anaa hɔn fon nɔmba maa me. Ntsi wɔ dɛm aber a nna no mu yɛ dzen wɔ m’asetsena mu mpo no, Jehovah maa minyaa enyigye kɛse ma ɔyɛɛ me nwanwa!”​—Mbɛ. 15:15.

12-13. Ebɛn kwan do na binom a wɔyar anaa wonnyi apɔwmudzen papa no etum dze hɔnho ahyɛ asɛnka edwuma no mu, na ebɛnadze na efi iyi mu aba?

¹² Osiandɛ hɔn a wɔyar nye hɔn a wonnyi apɔwmudzen no nntum nnyɛ pii wɔ asɛnka edwuma no mu ntsi, bi a hɔn abaw mu bobu. Naaso, hɔn mu piinara tum fa akwan ahorow do dzi dase. Wɔ United States no, wɔdze akyerɛbaa bi a wɔfrɛ no Laurel hyɛɛ efir bi a ɔboa no ma otum gye ahom mu mfe 37! Onyaa kokoram, wɔyɛɛ no oprehyɛn ahorow na afei onyaa honam enyi yarba ahorow bi so. Nna ne tsebea no mu yɛ dzen papaapa, naaso iyi amma oeenngyaa dɛ ɔbɛkã asɛmpa no. Nna odzi anɛɛsfo nye afofor a wɔhwɛ no a wɔba ne fie no dase. Ebɛnadze na ofii mu bae? Annyɛ yie koraa no, otumii boaa nkorɔfo 17 ma wobenyaa Bible mu nokwar nyimdzee! *

¹³ Asafo mu panyin bi a ɔwɔ France a wɔfrɛ no Richard, wɔ nyansahyɛ bi ma hɔn a mpanyinyɛ anaa yarba ntsi wɔaka fie, nye hɔn a wɔwɔ mbea a wɔhwɛ hɔn a hɔn mfe akɔ enyim nye hɔn a wonnyi apɔwmudzen no. Ɔkãa dɛ: “Mehyɛ hɔn nkuran dɛ wɔmfa hɛn nwoma ahorow no bi ngu mbea a nkorɔfo bohu. Sɛ afofor hu a, wobebisa ho asɛm na iyi bɛma wɔahyɛ nkɔmbɔ ase. Nkɔmbɔ a ɔtse dɛm no bɛhyɛ hɛn nuanom a wonntum nnyɛ efiefi asɛnka edwuma no bio no nkuran.” Hɔn a mpanyinyɛ anaa yarba ntsi wɔaka fie no botum so afa krataakyerɛw anaa tɛlefon do edzi dase.

14. Ebɛn nhwɛdo pa na Ɔhen David yɛe?

¹⁴ Osian mpanyinyɛ, hɛn apɔwmudzen anaa tsebea fofor bi ntsi, bi a ho kwan anaa dwumadzi bi a yɛrohwehwɛ wɔ asafo no anaa ɔmansin no mu no, hɛn nsa rennka. Sɛ yɛwɔ tsebea a ɔtse dɛm mu a, yebotum esũa biribi efi Ɔhen David no nhwɛdo no mu. Nna ɔda David n’akoma do dɛ obesi Nyankopɔn n’asɔrfi no. Naaso, aber a wɔkãa kyerɛɛ no dɛ nnyɛ ɔno na Nyankopɔn apaw no dɛ obesi no, ɔdze n’ahoɔdzen nyinara taa nyia nna obedzi dɛm dwuma no ekyir. David fii n’akoma mu yii sika na dwetɛ dze boaa edwuma no mpo. Hwɛ nhwɛdo pa a ɔtse dɛm a yebotum esũa!​—2 Sam. 7:12, 13; 1 Mber. 29:1, 3-5.

15. Ber a Hugues n’abaw mu bui no, ebɛnadze na ɔboaa no ma ogyinaa ano?

¹⁵ Osian yarba ntsi, onua bi a ɔwɔ France a wɔfrɛ no Hugues dze ho kwan a nna ɔwɔ dɛ  asafo mu panyin no too hɔ. Afei so, nna ne fie ndwuma nketsenketse mpo onntum nnyɛ. Ɔkyerɛɛw dɛ: “Ahyɛse no, metsee nka dɛ mfaso biara nnyi mo do na m’abaw mu buu ankasa. Naaso ber kɔr do no, mubohun hia a ohia dɛ megye to mu dɛ nnyɛ biribiara na mubotum ayɛ, na kakra a nna mutum yɛ wɔ Jehovah no som mu no maa m’enyi gyee. Mesi mo bo dɛ meremmpa abaw da. Tse dɛ Gideon na ne mbarimba ahaasa a nna wɔaberɛ naaso wogyinaa mu kesii ase no, dɛmara na mo so mebɛyɛ!”​—Atsɛ. 8:4.

16. Ebɛnadze na yebotum esũa efi abɔfo no hɔn nhwɛdo no mu?

¹⁶ Abɔfo anokwafo no yɛ nhwɛdo pa a yebotum esũasua. Wɔ Ɔhen Ahab n’ahendzi mu no, Jehovah maa abɔfo no kwan dɛ wɔnkyerɛ hɔn adwen wɔ mbrɛ wobesi adaadaa dɛm ɔhen bɔn yi ho. Abɔfo no mu bi kyerɛɛ hɔn adwen. Naaso Nyankopɔn faa ɔbɔfo kor n’adwenkyerɛ na ɔkãa dɛ ɔno na wɔdze bɛyɛ edwuma. (1 Ahe. 22:19-22) Ana abɔfo anokwafo nkaa no hɔn abaw mu bui, ma bi a wonyaa adwen dɛ, ebɛnadze koraa ntsi na wɔhaaw hɔnho kyerɛɛ hɔn adwen anaa? Biribiara nnyi hɔ a yebotum egyina do akã dɛ dɛm na wɔyɛe. Abɔfo no brɛ hɔnho adze ankasa, na wɔpɛ dɛ enyidzi nyinara kɔ Jehovah hɔ.​—Atsɛ. 13:16-18; Nyi. 19:10.

17. Sɛ hɛn abaw mu bu osian ɔsom ho kwan bi a yennyi ntsi a, ebɛnadze na ɔsɛ dɛ yɛyɛ?

¹⁷ Fa w’adwen si ho kwan a yɛwɔ dɛ Nyankopɔn ne dzin da hɛn do na yɛkã n’Ahendzi no ho asɛm no do. Bi a wɔdze dwumadzi bi bɛhyɛ hɛn nsa wɔ Jehovah no som mu, anaadɛ dwumadzi a ɔhyɛ hɛn nsa no botum efi hɛn nsa, naaso ɔnnyɛ ɔno na ɔma yɛsom bo wɔ Nyankopɔn n’enyi do. Mbom no, dza ɔma yɛsom bo wɔ Jehovah nye hɛn nuanom enyi do nye dɛ yɛbɛbrɛ hɛnho adze na yaagye ato mu dɛ nnyɛ biribiara na yebotum ayɛ. Dɛm ntsi, serɛ Jehovah ma ɔmboa wo ma aakɔ do abrɛ woho adze. Dwendwen ahobrɛadze ho nhwɛdo pa a wɔayɛ ho kyerɛwtohɔ wɔ n’Asɛm mu no ho. Fi wo pɛ mu yɛ dza ibotum biara fa som wo nuanom.​—Ndw. 138:6; 1 Pet. 5:5.

18-19. Ibesi dɛn enya enyigye ber mpo a nkorɔfo a wɔwɔ w’asaasesin mu no nntsie asɛmpa no?

¹⁸ Ɔtɔ da a, ana w’abaw mu bu osiandɛ nkorɔfo a wɔwɔ w’asaasesin no mu no nntsie asɛmpa no anaa ennto nkorɔfo wɔ fie ntsi? Wɔ tsebea a ɔtse dɛm mu no, ebɛnadze na yebotum  ayɛ ama yaakɔ do enya enyigye anaa hɛn enyigye no aayɛ kɛse? Wɔama hɛn nyansahyɛ ahorow a yebotum dze ayɛ edwuma wɔ adakaba a wɔato dzin “Mbrɛ Ibesi Enya Enyigye Kɛse Wɔ Asɛnka Edwuma No Mu.” Afei so, no ho hia dɛ yenya asɛnka edwuma no ho adwen pa. Ɔno kyerɛ dɛn?

¹⁹ Kɔ do fa w’adwen si Nyankopɔn ne dzin nye n’Ahendzi no a ebɔbɔ ho dawur no do. Jesus maa no mu daa hɔ dɛ, nyimpa kakraabi na wobohu nkwa kwan no. (Matt. 7:13, 14) Sɛ yɛreyɛ asɛnka edwuma no a, yenya ho kwan dɛ yɛnye Jehovah, Jesus, nye abɔfo no bɔ mu yɛ edwuma. (Matt. 28:19, 20; 1 Cor. 3:9; Nyi. 14:6, 7) Jehovah twe hɔn a wɔpɛ dɛ wɔsom no no ba ne nkyɛn. (John 6:44) Dɛm ntsi sɛ ndɛ obi enntsie asɛm a yɛdze nam no a, bi a ɔkyena obetsie.

20. Sɛ hɛn abaw mu bu a, ebɛn kwan do na Jeremiah 20:8, 9 botum aboa hɛn ma yeegyina ano?

²⁰ Yebotum esũa pii efi nkɔnhyɛnyi Jeremiah hɔ. Nna nkorɔfo a wɔwɔ n’asaasesin mu no mmpɛ etsie asɛm a ɔkã no. Nkorɔfo no hyehyɛɛ no ahorba na wosii no atwetwe “adzekyee nyina.” (Kenkan Jeremiah 20:8, 9.) Ber bi, n’abaw mu buu araa ma ɔkãa dɛ ɔrennkã asɛm no bio. Naaso ɔannka n’ano annto mu. Ebɛnadze ntsi a? Osiandɛ nna “[Jehovah] n’asɛm” no tse dɛ ogya a ɔredzɛw wɔ Jeremiah no mu, na oenntum annka annhyɛ! Sɛ yɛkenkan Nyankopɔn n’Asɛm no da biara na yɛdwendwen ho ma ɔka hɛn akoma a, yɛbɛtse nka dɛ mbrɛ Jeremiah tsee nka no. Sɛ yɛyɛ dɛm a, yɛbɔkɔ do enya enyigye kɛse, na bi a nkorɔfo so betsie asɛmpa no.​—Jer. 15:16.

21. Ɔmmfa ho tsebea biara a ɔbɛma hɛn abaw mu ebu no, ebɛnadze na ɔbɔboa hɛn ma yeetum egyina ano?

²¹ Deborah a yeedzi kan akã no ho asɛm no kãa dɛ: “Sɛ hɛn abaw mu bu a, obotum ayɛ akodze a n’ano yɛ dzen a Satan dze kõ tsia hɛn.” Naaso, Jehovah Nyankopɔn wɔ tum koraa kyɛn akodze biara a Satan wɔ. Dɛm ntsi, sɛ w’abaw mu bu osian tsebea bi ntsi a, serɛ Jehovah dɛ ɔmboa wo. Ɔbɔboa wo ma eegyina wo sintɔ nye wo mberɛwyɛ ano. Ɔbɔboa wo ma eegyina wo yarba ano. Ɔbɔboa wo ma eenya ɔsom ho kwan ho adwen pa. Afei so, ɔbɔboa wo ma eenya asɛnka edwuma no ho adwen pa. Dza ɔkyɛn ne nyinara no, bɔ wo sor Egya no mpaa, na kã mbrɛ etse nka no ho asɛm kyerɛ no. Dze nam Jehovah no mboa do no, sɛ w’abaw mu bu a, ibotum egyina ano.