1. Nɛ̌ awakanmɛkúmɛ ka sixu wà nǔ dó mǐ wu gbɔn?

GBÈ bǐ gbè wɛ mǐ nɔ mɔ tagba lɛ, bo nɔ wà nǔ e wu mǐ kpé é bǐ bá dɛ ɖò ye nu. Amɔ̌, é nɔ vɛwǔ tawun ɖɔ è ni ɖí xwi xá tagba lɛ hwenu e awakanmɛ kú mɛ é. Enɛ wu ɔ, mǐ ɖó na flín ɖɔ awakanmɛkúmɛ sixu zɔ́n bɔ mǐ na nɔ mɔ ɖɔ mǐ kún hwɛ́n nǔɖe ó, bɔ mǐ na lɛ́ ba awǎjijɛ kpò. Nǔnywɛxó 24:10 ɖɔ: “Enyi kanmɛ gbɔjɔ we adǎngbomɛzángbe hǔn, hlɔnhlɔn hwedó we tawun nɛ.” Ɛɛn, awakanmɛkúmɛ sixu xò hlɔnhlɔn e sín hudo mǐ ɖó, bo na ɖí xwi xá tagba lɛ b’ɛ na kpa mǐ é yí sín mǐ sí.

2. Etɛ lɛ ka sixu zɔ́n bɔ awakanmɛ kú mǐ? Etɛ mǐ ka na gbéjé kpɔ́n ɖò xóta elɔ mɛ?

² Nǔ gegě sixu dó awakanmɛ kú mǐ; è nɔ mɔ ɖé lɛ, bo ka nɔ mɔ ɖevo lɛ ǎ. Hwɛhutɔ́ e mǐ nyí é, gǎnmaɖó mǐtɔn lɛ, kpo azɔn e mǐ nɔ jɛ lɛ é kpo ɖò nǔ e nɔ zɔ́n lɛ é mɛ. Awakanmɛ sixu lɛ́ kú mǐ ɖó è sɔ́ azɔ̌ e mǐ jló na wà ɖò sinsɛnzɔ́ Jehovah tɔn mɛ é ɖé d’así nú mǐ ǎ, alǒ mǐ ɖò wɛnɖagbe ɔ jlá wɛ ɖò fí e mɛ gegě ma nɔ ba na ɖótó wɛn mǐtɔn ɖè ǎ é ɖé wu. Ðò xóta elɔ mɛ ɔ, mǐ na gbéjé nǔ e mǐ sixu wà dó ɖí xwi xá awakanmɛ kú mɛ é ɖé lɛ kpɔ́n.

3. Etɛ ka sixu d’alɔ mǐ bɔ mǐ na ɖó linlin e ɖò jlɛ̌ jí é dó hwɛhuhu gbaza mǐtɔn wu?

³ É bɔwǔ tawun ɖɔ mǐ ni jɛ linlin e ma ɖò jlɛ̌ jí ǎ é ɖó dó hwɛhuhu gbaza mǐtɔn kpo gǎnmaɖó mǐtɔn lɛ kpo wu jí. Wǎgbɔ tɔn ɔ, mǐ sixu lin ɖɔ ɖó mǐ nɔ wà nǔ nyi dò wutu ɔ, Jehovah kún na hun gbɛ̀ yɔyɔ̌ ɔ sín ali nú mǐ gbeɖé ó. Linlin mɔ̌hun ɖiɖó nyla tawun. Bɔ linlin tɛ mǐ ɖó na nɔ ɖó dó nǔwanyido mǐtɔn lɛ wu lo? Biblu ɖɔ ɖɔ gbɛtɔ́ lɛ bǐ wɛ “hu hwɛ,” Jezu kɛɖɛ jɛn ma ɖ’emɛ ǎ. (Hlɔ. 3:23) Amɔ̌, Jehovah  nɔ sɔ́ ayi ɖó nǔwanyido mǐtɔn lɛ jí, alǒ nɔ ɖó nukún ɖɔ mǐ ni nyí mɛ maɖóblɔ̌ ǎ. É nyɔ́ wà ɔ, Tɔ́ wanyiyinɔ e jló na d’alɔ mǐ é ɖé wɛ n’i. É nɔ lɛ́ ɖó suúlu. É nɔ lɛ́ mɔ gǎn e dó wɛ mǐ mɛ gegě ɖè, bo na ɖí xwi xá gǎnmaɖó mǐtɔn lɛ, bo lɛ́ ɖó linlin e ɖò jlɛ̌ jí é dó mǐɖée wu é, bo ɖò gbesisɔmɛ bo na d’alɔ mǐ.—Hlɔ. 7:18, 19.

4-5. Etɛ 1 Jaan 3:19, 20 ka ɖɔ b’ɛ d’alɔ nɔví nyɔnu we bɔ ye ɖí xwi xá awakanmɛkúmɛ?

⁴ Ð’ayi kpɔ́ndéwú Deborah kpo Maria * kpo tɔn wu. Hwenu e Deborah kpò ɖò vǔ é ɔ, hwɛhwɛ wɛ è nɔ wà nǔ xá ɛ alɔkpa ɖé, b’ɛ nɔ mɔ ɖɔ è ɖè emi kpò. Vlafo wɛ è nɔ dókú n’i. Enɛ zɔ́n bɔ é jɛ linlin masɔgbe ɖó dó éɖée wu jí. Nú é wà nǔ klewun ɖé nyi dò ɔ, é nɔ mɔ ɖɔ nǔjlɔjlɔwiwa gló emi. Nǔ ɖokpo ɔ wɛ ɖò Maria lɔ wà wɛ. Hɛ̌nnumɔ tɔn lɛ nɔ ɖè è kpò. Wǎgbɔ tɔn ɔ, é nɔ mɔ ɖɔ emi kún sɔ́ hwɛ́n nǔtí ó. É tlɛ ko bló baptɛm gudo có, é nɔ mɔ ɖɔ emi kún jɛxa bo na nyí Kúnnuɖetɔ́ Jehovah tɔn ó.

⁵ É ɖò mɔ̌ có, nɔví nyɔnu we enɛ lɛ ɖó Jehovah sinsɛn te ǎ. Tɛwu? Nukɔntɔn ɔ, ye zlɔ́n nǔ e ɖò linkpɔ́n nyí nú ye wɛ lɛ é sín agban ɖó Jehovah jí, gbɔn ɖɛ vívɛ́ xixo gblamɛ. (Ðɛh. 55:23) Ye wá mɔ ɖɔ Tɔ́ mǐtɔn jixwé tɔn wanyiyinɔ ɔ tuùn lě dò nǔ e gbò mǐ wá yì lɛ é kpo linlin masɔgbe mǐtɔn lɛ kpo sixu wà nǔ dó mǐ wu sɔ é. Amɔ̌, é nɔ lɛ́ mɔ jijɔ ɖagbe ɖěɖee mǐ ɖó lɛ é, enyi mǐ na bo tlɛ lin ɖɔ mǐ kún ɖó ɖě ó ɔ nɛ.—Xà 1 Jaan 3:19, 20.

6. Enyi mɛɖé nɔ fɔ́n bo nɔ ɖò nǔ ɖokpo ɔ wà nyi dò wɛ ɔ, etɛ é ka sixu wà?

⁶ Mɛɖé sixu ɖò gǎn dó wɛ syɛnsyɛn bá ɖó nǔnyanyawiwa te, amɔ̌ é sixu lɛ́ vɔ́ nǔ ɖokpo ɔ lɛ wà nyi dò, bɔ awakanmɛ na kú i. Nǔgbo ɔ, é nyla ɖɔ mǐ ni jɛ aluwɛ mɛ, hwenu e mǐ wà nǔ nyi dò é ǎ. (2 Kɔ. 7:10) Amɔ̌, mǐ ɖó na nɔ aluwɛ mɛ zɛ xwé wu, bo na nɔ lin nǔ gbɔn lě ǎ: ‘Un hwɛ́n nǔtí ǎ, Jehovah sixu sɔ́ hwɛ ce lɛ kɛ mì gbeɖé ǎ.’ Linlin masɔgbe mɔ̌hun lɛ xwè ali ǎ, bɔ ye sixu zɔ́n bɔ mǐ na ɖó Jehovah sinsɛn te. Flín nǔ e mǐ xà ɖò Nǔnywɛxó 24:10 mɛ é: Hlɔnhlɔn na hwedó mǐ, enyi awakanmɛ kú mǐ ɖò adǎngbomɛzángbe ɔ nɛ. É nyɔ́ wà hǔn, sɛ̀ jɛ Jehovah gɔ́n bonu mi ni “sè nǔ jɛ miɖée gbè mɛ,” gbɔn ɖɛ xixo kpo hwɛsɔ́kɛ byɔbyɔ kpo gblamɛ. (Eza. 1:18) Enyi Jehovah mɔ ɖɔ a lɛkɔ sín hwɛ towe lɛ gudo nǔgbo nǔgbo ɔ, é na sɔ́ kɛ we. Gɔ́ na ɔ, yì mɛxo agun tɔn lɛ gɔ́n. Ye na d’alɔ we kpo suúlu kpo, bɔ a na lɛ́ mɔ hwiɖée mɛ ɖò gbigbɔ lixo.—Jak 5:14, 15.

7. Enyi mǐ ɖò gǎn dó wɛ bo na wà nǔ e sɔgbe é ɔ, etɛwu awakanmɛ ma ka ɖó na kú mǐ ǎ?

⁷ Jean-Luc e nyí mɛxo agun tɔn ɖé ɖò France é, ɖɔ nú mɛ ɖěɖee ɖò xwi ɖí xá  gǎnmaɖó ɖé wɛ lɛ é ɖɔ: “Ðò Jehovah nukɔn ɔ, enyi mɛ e ma nɔ wà nǔ nyi dò gbeɖé ǎ é wɛ nyí nǔjlɔjlɔwatɔ́ ǎ, loɔ, mɛ e hwɛ tɔn lɛ nɔ vɛ́ n’i, b’ɛ nɔ lɛkɔ sín gudo hwebǐnu é wɛ.” (Hlɔ. 7:21-25) Enyi a ɖò xwi ɖí xá nǔwanyido ɖé wɛ hǔn, ma nɔ ɖò hwɛ dó hwiɖée wɛ ó. Flín ɖɔ mǐ ɖě kún sixu nyí hwɛjijɔnɔ ɖò Mawu nukɔn ó. Mǐ bǐ wɛ ɖó hudo fɛ́nú Mawu tɔn tɔn, gbɔn vɔsisa gbɛxɔnúmɛ tɔn ɔ gblamɛ.—Efɛ. 1:7; 1 Jaan 4:10.

8. Enyi mǐ mɔ ɖɔ kanmɛ gbɔjɔ mǐ ɔ, mɛ̌ mɛ̌ e gɔ́n mǐ ka sixu yì ba alɔdó ɖè?

⁸ Nɔví sunnu kpo nɔví nyɔnu kpo mǐtɔn e ɖò agun ɔ mɛ lɛ é na dó wusyɛn lanmɛ nú mǐ! Enyi mǐ ɖó hudo mɛ e mǐ na ɖɔ xó na é, kpo mɛ e na dó wusyɛn lanmɛ nú mǐ é kpo tɔn ɔ, ye na sixu ɖótó mǐ. (Nǔx. 12:25; 1 Tɛ. 5:14) Joy e nyí nɔví nyɔnu ɖé ɖò Nigéria bo ɖí xwi xá awakanmɛkúmɛ é ɖɔ: “Fitɛ un ka sixu yì bo ma na mɔ kplékplé nɔví lɛ tɔn ǎ. Nɔví lɛ nɔ xlɛ́ ɖɔ Jehovah nɔ sè ɖɛ ce lɛ. Un tlɛ kplɔ́n nǔ gegě ɖò ye gɔ̌n, dó lee un sixu dó wusyɛn lanmɛ nú mɛ e awakanmɛ gbɔjɔ na lɛ é gbɔn é wu.” Amɔ̌, mǐ ɖó na hɛn dó ayi mɛ ɖɔ nɔví mǐtɔn lɛ kún sixu tuùn nǔ e na dó wusyɛn lanmɛ nú mǐ é hwebǐnu ó. Enɛ wu ɔ, mǐɖesu sixu yì nǔɖitɔ́ hatɔ́ mǐtɔn e ko zin é ɖé gɔ́n, bo ɖɔ n’i ɖɔ mǐ ɖó hudo alɔdó tɔn.

9. Nɛ̌ Ðɛhan 41:4 kpo 94:19 kpo ka dó wusyɛn lanmɛ nú mǐ gbɔn?

⁹ Ba alɔdó ɖò Jehovah gɔ́n. Nú mǐ ma ɖò ganji ǎ, b’ɛ nyí ɖɔ azɔn jɛmagbɔ ɖé jɛ wɛ mǐ ɖè ɔ, é sixu vɛwǔ nú mǐ tawun bɔ mǐ na ɖó linlin ɖagbe. Jehovah sixu gbɔ azɔn nú mǐ ɖò nǔjiwǔ linu dìn ǎ có, é ka nɔ dó gbɔ nú mǐ, bo nɔ na mǐ hlɔnhlɔn e sín hudo mǐ ɖó bá dɛ é. (Xà Ðɛhan 41:4; 94:19.) Ði kpɔ́ndéwú ɔ, enyi mǐ ɖó hudo mɛ e na d’alɔ mǐ bɔ mǐ na wà xwégbezɔ́ lɛ é tɔn, alǒ, mɛ e na xwlé axi nú mǐ é tɔn ɔ, é sixu sísɛ́ nǔɖitɔ́ hatɔ́ ɖé b’ɛ na d’alɔ mǐ. É sixu sísɛ́ nɔví mǐtɔn lɛ, bɔ ye na xoɖɛ ɖó kpɔ́ xá mǐ. Alǒ, é sixu d’alɔ mǐ, bɔ mǐ na flín linlin gbɔdónúmɛ tɔn e ɖò Xó tɔn mɛ lɛ é, ɖi nukúnɖiɖó jiwǔ gbɛ̀ maɖóblɔ̌ e mɛ azɔn kpo wuvɛ̌ mimɔ kpo ma sɔ́ na ɖè ǎ é tɔn.—Hlɔ. 15:4.

10. Isang bló alitawoví gudo é ɔ, é flú bǐ, amɔ̌ é nɔ mɔ̌ ǎ, etɛwu?

¹⁰ Isang e nɔ nɔ Nigéria é bló alitawoví ɖé b’ɛ zɔ́n bɔ é cɛ́ kplíbɔ́. Dotóo tɔn ɖɔ n’i ɖɔ é kún sɔ́ na ɖi zɔnlin gbeɖé ó. É ɖɔ: “Ayi ce gbadó, bɔ awakanmɛ kú mì bǐ.” Amɔ̌, awakanmɛ kú i mɔ̌ kaka sɔyi wɛ à? Eǒ! Etɛ ka d’alɔ ɛ? É ɖɔ: “Nyi kpo asì ce kpo nɔ gɔn ɖɛ xò sɛ́dó Jehovah gbeɖé ǎ, mǐ ka nɔ gɔn Xó tɔn kplɔ́n ǎ. Mǐ lɛ́ wá gbeta ɔ kɔn bɔ nǔ ɖagbe e mǐ ɖó lɛ é na nɔ sù nukún mǐtɔn mɛ, kaka jɛ gbɛ̀ yɔyɔ̌ Mawu tɔn e ɖó nukún wɛ mǐ ɖè é jí.”

11. Nɛ̌ Cindy ka mɔ awǎjijɛ hwenu e é ɖò azɔn syɛnsyɛn ɖé jɛ wɛ é gbɔn?

¹¹ Dotóo ɖé ɖɔ nú Cindy e nɔ nɔ Mexique é ɖɔ è mɔ azɔn e sixu hu i é ɖé n’i. Nɛ̌ é ka dɛ ɖ’enu gbɔn? É nɔ tɛ́n kpɔ́n bo nɔ ɖekúnnu nú mɛ e nɔ wá kpé nukún dó wǔ tɔn lɛ é ayihɔngbe ayihɔngbe. É ɖɔ: “Enɛ zɔ́n bɔ un kpéwú bo nɔ sɔ́ ayi ɖó mɛ ɖevo lɛ jí, bɔ é sɔ́ nɔ nyí ɖó azɔ̌ e è wà nú mì é, wuvɛ̌ lɛ, kpo azinzɔnnɔ e un nyí é kpo jí ǎ. Nǔ e un nɔ wà é ɖíe: Nú un ɖò xó ɖɔ ɖó kpɔ́ xá dotóo lɛ wɛ ɔ, un nɔ kan lee xwédo yetɔn ɖè gbɔn é byɔ. Enɛ gudo ɔ, un nɔ kan nǔ e wu ye ɖò azɔ̌ syɛnsyɛn enɛ wà wɛ é byɔ. Enɛ nɔ zɔ́n bɔ un nɔ kpéwú bo nɔ mɔ xóta e na dɔn ye é ɖé. Ye mɛ gegě nɔ ɖɔ ɖɔ é kún yá bonu azinzɔnnɔ ɖé ni kanbyɔ ye ɖɔ, ‘Nɛ̌ a fɔ́n gbɔn?’ ó. Bɔ mɛ gegě nɔ dókú nú mì, ɖó nǔ yetɔn e ɖu ayi mɛ nú mì é wu. Ye mɛ ɖé lɛ tlɛ nɔ na mì adlɛsi yetɔn alǒ animɛlóo  yetɔn. Enɛ wu ɔ, ɖò hwenu vɛwǔ enɛ mɛ ɔ, Jehovah na mì awǎjijɛ ayi mɛ tɔn e gɔ́ngɔ́n é ɖé, b’ɛ nɛ jiwǔ nú mì tawun.”—Nǔx. 15:15, nwt.

12-13. Nɛ̌ mɛ ɖěɖee ɖò azɔn jɛ wɛ, alǒ ɖó wɔ̌n ɖò wǔ lɛ é ka sixu kpéwú bo ɖ’alɔ ɖò sinsɛnzɔ́ ɔ mɛ gbɔn? Bɔ etɛ mɛ é ka nɔ tɔ́n kɔ dó?

¹² Awakanmɛ sixu kú mɛ e ɖò azɔn jɛ wɛ, alǒ wɔ̌n ɖò wǔ na é ɖé, ɖó é sɔ́ sixu kpéwú bo wà nǔ gegě ɖò sinsɛnzɔ́ ɔ mɛ ǎ. Nǔ ɖò mɔ̌ có, mɛ gegě ko kpéwú bo ɖekúnnu ɖò ali gegě nu. Ðò États-Unis ɔ, nɔví nyɔnu ɖé nɔ nyí Laurel, bɔ è sɔ́ ɛ ɖó macinu e na d’alɔ ɛ b’ɛ na nɔ gbɔjɛ ganji é ɖé mɛ nú xwè 37. É lɛ́ ɖó kansɛ́ɛ, bɔ è w’azɔ̌ n’i azɔn mɔ̌kpan, bɔ azɔn ɖé lɛ́ ɖò tagba dó n’i wɛ ɖò agbaza tɔn wǔ. Amɔ̌, é ɖò wuvɛ̌ syɛnsyɛn enɛ lɛ sè wɛ có, é ka gɔn wɛnɖagbe ɔ jlá ǎ. É nɔ ɖekúnnu nú dotóo lɛ kpo mɛ ɖevo e nɔ w’azɔ̌ ɖò finɛ bo nɔ wá xwé tɔn gbè lɛ é kpo. Tɛ mɛ é ka tɔ́n kɔ dó? É hwe bǐ ɔ, é d’alɔ mɛ 17 bɔ ye huzu Kúnnuɖetɔ́ Jehovah tɔn lɛ! *

¹³ Richard e nyí mɛxo agun tɔn ɖé ɖò France é ɖè wě ɖagbe ɖé xá mɛ ɖěɖee è glɔ́n dó xwégbe alǒ dotóoxwé lɛ é. “Un byɔ ye ɖɔ ye ni ɖó wema jinjɔn Biblu jí mǐtɔn ɖé lɛ bo nɔ sɔ́ ɖó fí e mɛ lɛ sixu mɔ ɖè é. Enyi mɛ lɛ ɖò wiwáyi wɛ ɔ, ye na mɔ bo na kan nǔ byɔ d’ewu. Enɛ sixu dó wusyɛn lanmɛ nú nɔví mǐtɔn e ma sixu nɔ ɖ’alɔ ɖò Mawuxóɖiɖɔ xwé ɖé gbè jɛ xwé ɖé gbè tɔn ɔ mɛ ǎ lɛ é.” Mɛ enɛ lɛ e è glɔ́n dó xwégbe é sixu nɔ ɖ’alɔ ɖò sinsɛnzɔ́ ɔ mɛ, gbɔn wema winwlán sɛ́dó mɛ, alǒ kúnnuɖiɖe ɖò alokan jí gblamɛ.

14. Kpɔ́ndéwú nukúnɖeji tɛ Axɔ́su Davidi ka zé ɖ’ayǐ nú mǐ?

¹⁴ Hwɛjijɔ gegě wu wɛ mǐ ma nɔ mɔ wǔjɔmɛ e ba wɛ mǐ ɖè ɖò sinsɛnzɔ́ Jehovah tɔn mɛ ǎ é. Ði kpɔ́ndéwú ɔ, mǐ sixu ko kpò alǒ ɖò azɔn jɛ wɛ, abǐ nǔ ɖevo lɛ sixu ɖò finɛ. Ðò ninɔmɛ mɔ̌hun lɛ mɛ ɔ, kpɔ́ndéwú Axɔ́su Davidi tɔn sixu kplɔ́n nǔ mǐ. Davidi ɖò nukún ɖó wɛ vɛ́návɛ́ná bo na gbá tɛmpli ɔ, amɔ̌, mɛ ɖevo wɛ Jehovah sɔ́ b’ɛ na gbá. É ɖò mɔ̌ có, Davidi nɔ gudo nú mɛ e è sɔ́ azɔ̌ enɛ d’así na é, bo na siká kpo kpatagan kpo gegě dó azɔ̌ enɛ takúnmɛ. Kpɔ́ndéwú nukúnɖeji ɖé wɛ Davidi nyí nú mǐ!—2 Sam. 7:12, 13; 1 Tan. 29:1, 3-5.

15. Nɛ̌ Hugues ka ɖu ɖò awakanmɛkúmɛ jí gbɔn?

¹⁵ Hugues nyí nɔví sunnu ɖé bo ɖò France, bɔ ɖó azɔnwuvɛ́ e sè wɛ é ɖè é wu ɔ, é ɖó mɛxo agun tɔn sín azɔ̌ e wà wɛ é ɖè é te, bo tlɛ sɔ́ sixu nɔ wà xwégbezɔ́  klewun klewun lɛ yayǎnɔ ǎ. É wlán ɖɔ: “Ðò bǐbɛ̌mɛ ɔ, un mɔ ɖɔ un kún hwɛ́n nǔtí ó, bɔ awakanmɛ kú mì tawun. Amɔ̌, hwenu ɖò yiyi wɛ é ɔ, un mɔ ɖɔ é ɖò taji ɖɔ ma yí gbè nú gǎnmaɖó ce lɛ, bɔ gǎnmaɖó ce lɛ ɖò finɛ có, un mɔ awǎjijɛ ɖò Jehovah sinsɛn ce mɛ. Un kánɖeji ɖɔ un kún na jó gbè ó. Jedenyɔ́ɔ kpo mɛ tɔn afɔɖé kanweko e nǔ ko cikɔ na tawun lɛ é kpo ɖɔhun ɔ, un na kpò ɖò gǎn ɔ dó wɛ.”—Hwɛ. 8:4.

16. Etɛ kpɔ́ndéwú wɛnsagun lɛ tɔn ka sixu kplɔ́n mǐ?

¹⁶ Wɛnsagun gbejinɔtɔ́ lɛ lɔ nyí kpɔ́ndéwú ɖagbe ɖé. Hwenu e Axɔ́su Akabu ɖò acɛ kpa wɛ é ɔ, Jehovah byɔ wɛnsagun lɛ ɖɔ ye ni ɖɔ lee è sixu blɛ́ Axɔ́su nyanya enɛ gbɔn é. Wɛnsagun gegě ɖɔ nǔ e ye lin dó xó ɔ wu é. Amɔ̌, Mawu sɔ́ wɛnsagun ɖokpo bo ɖɔ n’i ɖɔ wlɛnwín ɖagbe wɛ é mɔ. (1 Axɔ́. 22:19-22) Awakanmɛ ka kú wɛnsagun gbejinɔtɔ́ ee kpò lɛ é bɔ ye lin vlafo ɖɔ, ‘Tɛwu un ka gú hwenu ce bo ɖɔ nǔ e un lin é’ wɛ à? É ɖò wɛn ɖɔ ye kú lin mɔ̌ ó. Wɛnsagun lɛ nɔ sɔ́ yeɖée hwe tawun, bo nɔ ba ɖɔ susu lɛ bǐ ni nyí Jehovah tɔn.—Hwɛ. 13:16-18; Nǔɖe. 19:10.

17. Enyi awakanmɛ kú mǐ ɖó mǐ ma ko mɔ wǔjɔmɛ sinsɛnzɔ́ tɔn e ɖó nukún wɛ mǐ ɖè é ɖé ǎ ɔ, etɛ mǐ ka ɖó na wà?

¹⁷ Flín ɖɔ Kúnnuɖetɔ́ Jehovah tɔn e mǐ nyí é kpo wɛnɖagbe Axɔ́suɖuto ɔ tɔn e mǐ nɔ jlá é kpo ɔ, wǔ ɖaxó ɖé wɛ ye nyí bɔ è jɔ mǐ. Wǔjɔmɛzɔ́ lɛ sixu wá bo lɛ́ yì, amɔ̌ ye wɛ nɔ zɔ́n bɔ mǐ nɔ xɔ akwɛ nú Mawu ǎ. Enyi mǐ nɔ sɔ́ mǐɖée hwe ɔ jɛn mǐ na xɔ akwɛ ɖò nukún Jehovah kpo nɔví lɛ kpo tɔn mɛ. Enɛ wu ɔ, byɔ Jehovah ɖɔ é ni d’alɔ we bonu a na nɔ sɔ́ hwiɖée hwe. Lin tamɛ dó kpɔ́ndéwú mɛsɛntɔ́ Jehovah tɔn gegě e xó Biblu ɖɔ bɔ ye nɔ sɔ́ yeɖée hwe lɛ é tɔn jí. Ðò gbesisɔmɛ bá wà devízɔ́ nú nɔví lɛ lee a kpéwú gbɔn é bǐ.—Ðɛh. 138:6; 1 Pi. 5:5.

18-19. Nú mɛ lɛ na bo ma tlɛ nɔ yí wɛn ɔ ɖò fí e a nɔ ɖekúnnu ɖè é ǎ ɔ, nɛ̌ a ka sixu ɖó awǎjijɛ gbɔn?

¹⁸ É ko jɛ kpɔ́n bɔ awakanmɛ kú we ɖó mɛ lɛ nɔ yí wɛn ɔ ɖò fí e a nɔ ɖekúnnu ɖè é ǎ alǒ mɛ kpɛɖé jɛn è nɔ mɔ ɖò xwégbe é wu à? Ðò ninɔmɛ mɔ̌hun mɛ ɔ, etɛ è ka sixu wà bo na kpò ɖò awǎjijɛ ɖó wɛ? Alixlɛ́mɛ e nyɔ́ zán é ɖé lɛ ɖò gbǎví elɔ mɛ: “ Nǔ E A Sixu Wà Bɔ Sinsɛnzɔ́ Towe Na Kpa We lɛ É.” É lɛ́ ɖò taji ɖɔ è ni ɖó linlin e sɔgbe é dó sinsɛnzɔ́ ɔ wu. Etɛ enɛ ka byɔ?

 ¹⁹ Sɔ́ ayi towe ɖó nyikɔ Mawu tɔn kpo Axɔ́suɖuto ɔ kpo jijlá jí. Jezu ɖɔ nyi wɛn ɖɔ mɛ kpɛɖé kpowun wɛ na mɔ gbɛ̀ li ɔ. (Mat. 7:13, 14) Nú mǐ ɖò sinsɛnzɔ́ ɔ mɛ ɔ, è jɔwǔ mǐ bɔ mǐ nɔ w’azɔ̌ ɖó kpɔ́ xá Jehovah, Jezu kpo wɛnsagun lɛ kpo. (Mat. 28:19, 20; 1 Kɔ. 3:9; Nǔɖe. 14:6, 7) Jehovah nɔ dɔn mɛ ɖěɖee jló na sɛn ɛ lɛ é. (Jaan 6:44) Enɛ wu ɔ, enyi mɛɖé ma yí wɛn mǐtɔn ganji hweɖenu ǎ ɔ, é sixu yí hweɖevonu.

20. Etɛ Jelemíi 20:8, 9 ka kplɔ́n mǐ dó xwi ɖíɖí xá awakanmɛ kú mɛ wu?

²⁰ Kpɔ́ndéwú gbeyiɖɔ Jelemíi tɔn sixu kplɔ́n nǔ gegě mǐ. Fí e è sɛ́ ɛ dó b’ɛ na yì jlá wɛn ɔ ɖè é syɛn tawun. Mɛ lɛ nɔ cá ɛ ko, bo nɔ lɛ́ bɔ zun ɖó n’i “ayihɔngbe ayihɔngbe.” (Xà Jelemíi 20:8, 9.) Awakanmɛ kú i kaka b’ɛ wá jɛ hweɖenu b’ɛ jló na ɖó azɔ̌ ɔ te. Amɔ̌, é wà mɔ̌ ǎ. Etɛwu? ‘Xó Jehovah tɔn’ cí myɔ ɖé ɖɔhun ɖò Jelemíi xomɛ, b’ɛ sixu hɛn bo gɔn ɖiɖe tɔ́n ǎ. Enyi mǐ nɔ kplɔ́n Biblu gbè bǐ gbè bo nɔ lin tamɛ dó nǔ e mǐ kplɔ́n lɛ é jí ganji ɔ, mǐ sixu cí Jelemíi ɖɔhun. Wǎgbɔ tɔn ɔ, awǎjijɛ mǐtɔn na jɛji, bɔ sinsɛnzɔ́ mǐtɔn na lɛ́ ɖè sínsɛ́n tɔ́n d’eji.—Jel. 15:16.

21. Nú é na bo tlɛ sín hwɛjijɔ ɖebǔ wu bonu awakanmɛ kú we ɔ, nɛ̌ a ka sixu ɖuɖeji gbɔn?

²¹ Deborah e xó mǐ ɖɔ ɖò aga é ɖɔ ɖɔ, “Awakanmɛ kú mɛ nyí alyannú agbɔ̌nnɔ e Satáan sixu zán é ɖé.” Amɔ̌, Jehovah ɖ’agbɔ̌n tawun hú Satáan kpo alyannú tɔn lɛ bǐ kpo. Enɛ wu ɔ, nú é na bo tlɛ sín hwɛjijɔ ɖebǔ wu bonu awakanmɛ kú we hǔn, savo nú Jehovah ɖɔ é ni d’alɔ we. É na d’alɔ we bɔ a na ɖí xwi xá hwɛhuhu gbaza towe kpo gǎnmaɖó towe lɛ kpo. É na hɛn sɔ we ɖò azɔn hwenu. É na d’alɔ we bɔ a na ɖó linlin e ɖò jlɛ̌ jí é dó wǔjɔmɛzɔ́ lɛ wu. É na d’alɔ we bɔ a na ɖó linlin ɖagbe dó sinsɛnzɔ́ towe wu. Hú bǐ ɔ, xoɖɛ sɛ́dó Jehovah bo ɖɔ lee nǔ cí nú we é pɛ́ɛ n’i. Kpo alɔdó tɔn kpo ɔ, a sixu ɖu ɖò xwi e ɖí xá awakanmɛkúmɛ wɛ a ɖè é jí.