1. Kouman dékourajman-an pouvé aji asou nou ?

CHAK jou, nou ka jwenn problèm é nou ka fè sa nou pouvé pou fè ké yé. Mé sa rèd pou nou briga ké nou problèm lò nou dékourajé. Dékourajman-an a kou roun volèr ki ka vòlò konfyans nou gen annan sa nou pouvé fè, nou kouraj ké nou lajwa. Labib-a ka di : « Si to dékourajé jou-a to annan traka, to pa ké gen bokou fòrs » (Prov. 24:10, nòt). A sa menm, dékourajman-an pouvé sousé tout fòrs nou bézwen pou briga ké problèm lavi-a.

2. Kisa ki pouvé dékourajé nou, é kisa nou ké wè annan sa artik-a ?

² Bokou bagaj pouvé dékourajé nou. Parèkzanp, lò nou ka di ouben fè mové bagaj, lò nou pa ka rivé fè sèrten bagaj ouben maladi-a. Nou pouvé dékourajé osi paské yé pa ka bay nou rèsponsabilité annan òrganizasyon Jéova-a, ouben paské nou ka préché annan roun téritwar koté près tout moun pa ka kouté sa nou ka di. Annan sa artik-a, nou ké wè sa nou pouvé fè annan sa sitiasyon-yan.

3. Kisa ki pouvé idé nou lò nou ka krè ki nou pa bon akoz di fot nou fè ouben paské nou ka fè bagaj ki pa bon ?

³ Lò nou ka wè ki i toujou gen roun bagaj ki pa k’alé koté nou ouben ki nou toujou ka fè roun bagaj ki pa bon, nou pouvé pansé ki nou pa bon menm. É nou pouvé menm pansé ki paské nou ka fè bagaj ki pa bon, Jéova pa ké lé nou antré annan paradi-a. Sa kalité lidé-a mové menm. Kou nou gen tandans fè sa ki pa bon, kouman nou divèt wè sa ? Labib-a ka di ki apar Jézi, tout moun  « péché » (Rom. 3:23). Mé Sa-la ki fè Labib-a pa ka doumandé nou pou nou parfè. I pa la pou véyé tout ti bagaj nou ka fè ki pa bon. Jéova sa roun Papa plen ké lanmou ki lé idé nou. Épi osi i gen pasyans. I byen savé ki nou ka fè tousa nou pouvé pou arété fè sa ki mové é ki bokou annan nou divèt briga pou yé pa pansé ki yé pa gen pyès valò (Rom. 7:18, 19).

4-5. Dapré 1 Jean 3:19, 20, kisa ki idé dé sò pa néyé anba dékourajman ?

⁴ Annou palé di Déborah ké Maria *. Lò Déborah té piti, so fanmi té méchan ké li, i té ka santi kousidiré i té pi bas ki lapousyè. Yé pa té ka félisité l’ souvan. A konsa i vin krè ki i pa té ka vo anyen. Lò i té ka fè roun ti fot, i té ka di ki i pa té janmen ka fè anyen ki bon. Maria jwenn menm kalité problèm-an. So fanmi toujou té ka fè l’ konprann ki i pa té gen pyès valò. Akoz di sa, i té ka pansé ki i té initil. Menm apré i té batizé, i té ka pansé ki i pa té asé byen pou poté non Bondjé !

⁵ Mé sa dé sò-ya pa arété sèrvi Jéova. Kisa ki idé yé ? Pou koumansé, yé jité yé fardo asou li ; yé priyè l’ é yé di li tousa yé té gen asou yé tchò (Ps. 55:22). Épi yé anprann ki nou bon Papa ki annan syèl-a savé ki, mové bagaj ki rivé nou, pouvé fè nou santi ki nou pa ka vo anyen. Jéova ka wè sa ki bon koté nou, menm si nou ka pansé nou pa gen pyès bèl kalité (li 1 Jean 3:19, 20).

6. Kouman nou pouvé réyaji si nou ka viré tonbé annan roun vyé labitid nou té gen ?

⁶ Si nou ka briga ké roun vyé labitid nou gen dipi lontan, nou pouvé viré tonbé annan l’ é sa pouvé dékourajé nou. Lò a konsa, sa nòrmal ki nou konsyans ka bat nou (2 Cor. 7:10). Mé, nou pa divèt tro rèd ké nou menm épi di : « Mo sa roun bonnaryen, Jéova pa ké janmen pardonnen mo ! » A pa vré é sa pouvé fè nou arété sèrvi Jéova. Annou sonjé sa ki marké annan Proverbes 24:10 : si nou ka dékourajé, nou pa ké gen bokou fòrs. Annou priyè Jéova pou doumandé l’ pardonnen nou é pou nou réglé tout bagaj ké li (Is. 1:18). I ké pardonnen nou, lò i ké wè ki nou ka rigrété sa nou fè é ki nou ka fè tout bagaj pou nou chanjé. Anplis di sa, nou divèt alé wè ansyen-yan. A ké pasyans yé ké idé nou pou nou géri annan domenn èspirityèl (Jacq. 5:14, 15).

7. Poukisa nou pa divèt dékourajé si nou divèt briga pou fè sa ki bon ?

⁷ Men sa Jean-Luc, roun ansyen ki ka  rété Lafrans, ka di bay tout sa ki ka briga ké roun défo : « Pou Jéova, roun moun ki jis, a pa roun moun ki pa jen ka fè mové bagaj, mé a roun moun ki toujou ka répanti lò i ka fè roun mové bagaj » (Rom. 7:21-25). Donk si to ka briga ké roun défo, a pa pou to pansé ki to pa vo anyen. Sonjé ki a pa sa nou ka fè ki ka fè nou ganyen favèr Bondjé. Nou tout bézwen favèr nou pa mérité Bondjé ka bay nou gras a ranson-an (Éph. 1:7 ; 1 Jean 4:10).

8. Kimoun ki pouvé idé nou lò nou dékourajé ?

⁸ Nou frè ké sò-ya annan asanblé-a ké ankourajé nou. Nou pa divèt pè, yé paré pou kouté nou lò nou bézwen palé é yé ké ankourajé nou (Prov. 12:25 ; 1 Thess. 5:14). Joy, roun sò ki ka rété Nijérya é ki ka briga ké dékourajman-an, ka di : « Ki koté mo té ké fika si mo pa té gen mo frè ké mo sò-ya ? Gras a yé, mo ka wè ki Jéova ka réponn mo lapriyè. Yé jis anprann mo kouman mo pouvé ankourajé sa-ya ki déprimé. » Mé a pou nou sonjé ki a pa tout tan nou frè ké nou sò-ya savé ki nou bézwen ankourajman. Détan, nou ké bézwen alé wè roun frè ouben roun sò nou ka fè konfyans pou fè li savé ki nou bézwen i idé nou.

9. Kouman Psaume 41:3 ké 94:19 ka ankourajé nou ?

⁹ Annou doumandé Jéova fè nou tchenbé. Si nou malad é si nou malad dipi lontan, sa pouvé rèd pou nou kontinyé gen èspwar. Sa vré, Jéova pa ké fè roun mirak épi géri nou jòdla. Mé i pouvé konsolé nou é bay nou fòrs pou nou tchenbé (li Psaume 41:3 ; 94:19). I pouvé pousé nou frè ké nou sò annan asanblé-a idé nou. Parèkzanp, yé ké fè ménaj ouben yé ké alé fè komisyon pou nou. I pouvé osi fè yé priyè ké nou. Ouben i pouvé fè nou sonjé bèl lidé annan so Paròl, ki ka konsolé nou, parèkzanp, bèl èspwar viv annan monn nouvo-a koté i pa ké gen ni soufrans ni maladi ankò (Rom. 15:4).

10. Poukisa Isang pa rété dékourajé apré so aksidan ?

¹⁰ Isang, ki ka rété Nijéryia, fè roun aksidan é apré sa i rété paralizé. So dòktèr di li ki i pa té ké janmen maché ankò. I ka di : « Mo tchò té krazé. » Mé ès i rété dékourajé ? Non ! Kisa ki idé l’ ? I ka réponn : « Mo ké mo madanm, nou pa janmen arété priyè Jéova ké étidyé so Paròl. É osi nou té désidé toujou sonjé bénédiksyon nou té gen, parèkzanp, nou èspwar viv annan monn nouvo-a. »

11. Kouman Cindy rivé gen tchò kontan menm si i té gen roun maladi grav ?

¹¹ Cindy, ki ka rété Mèksik, anprann roun jou ki i té gen roun maladi grav. Kouman i rivé tchenbé annan sa sitiasyon-an ? I désidé ki i té ké préché touléjou pannan tout tan yé té ké swanyé l’. I ékri : « Sa pèrmèt mo anprann konnèt ròt-ya pi byen, pasé mo rété kalkilé asou opérasyon-an, doulèr-a ouben maladi-a. Parèkzanp lò mo té ka palé ké roun dòktèr ouben roun enfirmyèr, mo té ka pran nouvèl yé fanmi. Épi mo té ka doumandé yé poukisa yé té chwazi fè sa travay ki té rèd. Apré sa, sa té fasil pou mo té savé kisa ki té ké entérésé yé. Bokou di mo mèrsi paské mo chaché konnèt yé. I gen sa ki menm bay mo yé niméro téléfonn ouben yé adrès. Pannan sa tan ki té rèd-a, Jéova bay mo roun lajwa ki mo pa té pansé mo té pouvé gen » (Prov. 15:15).

12-13. Kouman sèrten frè ké sò ki malad ouben andikapé ka fè pou yé préché, é ki rézilta yé ka trapé ?

 ¹² Détan sa-ya ki malad ouben andikapé ka dékourajé paské yé pa pouvé préché kou yé té ké lé. Mé magré sa, bokou annan yé ka rivé bay roun bèl témwanyaj. Ozétazini, roun sò yé ka aplé Laurel fè 37 lannen kouché annan roun machin ki té ka idé l’ rèspiré ! I trapé roun kansèr, yé fè gro opérasyon asou li é i soufri ké problèm ké so lapo. Mé menm sa gro problèm-yan pa anpéché l’ palé di so lafwa. I té ka palé pou enfirmyèr-ya ké ròt moun-yan ki té ka vin swanyé l’ an so kaz. A konsa i idé omwen 17 moun konnèt lavérité asou Jéova * !

¹³ Richard, roun ansyen ki ka rété Lafrans, ka bay roun konsèy pou sa-ya ki divèt rété an yé kaz ouben roun koté yé ka swanyé yé : « Mo ka pansé sa byen di gen roun ti prézantwar annan to kaz koté to ka mété plizyèr piblikasyon. Lò moun-yan ka pasé yé ka wè l’ é yé ka pozé to késyon asou l’. A konsa nou frè ké sò ki pa pouvé alé di kaz an kaz ankò pouvé kontinyé préché. » Sa-ya ki divèt rété an yé kaz pouvé préché ké lèt ouben ké téléfonn osi.

14. Ki bèl èkzanp David bay nou ?

¹⁴ Akoz di nou laj, di nou santé ouben di ròt bagaj ankò, pitèt yé pa ka bay nou rèsponsabilité annan asanblé-a ouben annan sèrvis sirkonskripsyon-an. Annan sa sitiasyon-an, èkzanp David pouvé anprann nou bokou bagaj. A ké tout so tchò i té lé fè roun tanp pou Jéova. Mé lò i anprann ki a pa té li ki té ké fè l’, kouman i réyaji ? A ké tout so tchò i idé sa-la Bondjé té chwazi pou sa projè-a. I jis bay roun patché lò ké arjan. Men roun bèl èkzanp pou nou ! (2 Sam. 7:12, 13 ; 1 Chron. 29:1, 3-5).

15. Kouman Hugues rivé pa rété dékourajé ?

¹⁵ Kou i té malad, Hugues, roun frè ki ka rété Lafrans, pa té pouvé rété ansyen ankò. I pa menm té ka rivé fè ti travay annan so kaz. I ékri : « O koumansman, mo té dékourajé menm, é mo té ka santi mo té kou roun initil. Mé piti piti, mo konprann ki mo té divèt asèpté ki i té gen bagaj mo pa té pouvé fè ankò. A konsa mo viré gen lajwa annan mo sèrvis pou Jéova. Mo byen désidé pa lagé. Kou Jédéon ké so 300 sòlda ki té las, mo ké kontinyé briga ! » (Juges 8:4).

16. Kisa èkzanp zanj-ya ka anprann nou ?

¹⁶ Zanj-ya ka bay nou roun bèl èkzanp.  Pannan Akab té rwa, Jéova doumandé yé kouman yé té ké bloublou sa méchan rwa-a. Plizyèr annan yé bay yépa lidé. Mé Bondjé chwazi rounsèl zanj é i di li ki so lidé té ké maché (1 Rois 22:19-22). Ès ròt zanj-ya té dékourajé ? Ès yé di : « A pa té lapenn mo té pédi mo tan ! » ? Mé non, yé pa di sa. Zanj-ya pa ka krè yé kò, sa ki pi enpòrtan pou yé, a bay Jéova lònò (Juges 13:16-18 ; Rév. 19:10).

17. Si nou dékourajé paské yé pa ka bay nou rèsponsabilité annan òrganizasyon Jéova-a, kisa nou divèt fè ?

¹⁷ Sonjé ki, pi gran lònò nou pouvé gen, a poté non Bondjé é préché so rwayonm. Nou pouvé rousouvwè ouben pédi rèsponsabilité annan òrganizasyon Jéova-a, mé a pa sa rèsponsabilité-ya ka fè si nou gen valò pou li. A paské nou gen imilité ki nou frè ké nou sò ké Jéova kontan nou. A pou sa nou divèt priyè Jéova pou li idé nou kontinyé gen imilité. Annou li so Paròl pou réfléchi asou èkzanp patché moun ki té gen imilité. Annou fè tousa nou pouvé pou idé nou frè ké nou sò-ya (Ps. 138:6 ; 1 Pierre 5:5).

18-19. Kouman nou pouvé kontinyé gen tchò kontan menm si, annan nou téritwar, près tout moun pa ka kouté sa nou ka di ?

¹⁸ Ès détan to dékourajé paské annan to téritwar près tout moun pa ka kouté sa to ka di ouben to pa ka rivé trouvé moun-yan annan yé kaz ? Si a sa, kisa to pouvé fè pou to kontinyé gen tchò kontan ouben menm gen plis tchò kontan ? To ké trouvé déztrwa konsèy annan ankadré «  Kouman to pouvé gen plis tchò kontan annan prédikasyon-an ? ». Sa enpòrtan osi pou nou wè prédikasyon-an kou Jéova ka wè l’. Kisa sa lé di ?

¹⁹ Annou sonjé poukisa an prémyé nou ka préché : nou lé fè moun-yan konnèt non Bondjé ké so rwayonm. Jézi té byen di ki a pa tout moun ki té ké trouvé chimen lavi-a (Mat. 7:13, 14). Mé lò nou ka préché, nou gen lònò travay ansanm ké Jéova, Jézi ké zanj-ya (Mat. 28:19, 20 ; 1 Cor. 3:9 ; Rév. 14:6, 7). Anplis di sa, a Jéova ki ka fè moun-yan ki lé sèrvi l’ vini òbò li (Jean 6:44). Donk si roun moun pa lé kouté nou, a pa pou nou dékourajé. Pitèt i ké kouté nou prochen kou-a.

20. Dapré Jérémie 20:8, 9, kisa ki ké idé nou briga ké dékourajman-an ?

 ²⁰ Èkzanp profèt Jérémi pouvé anprann nou bokou bagaj. Moun annan so téritwar té ka jouré l’ é té ka ari di so tèt « tout lajournen » (li Jérémie 20:8, 9). Sitiasyon-an té rèd menm. Tèlman i té dékourajé i sonjé arété préché. Mé i pa lagé. Poukisa ? Paské « paròl Jéova-a » té kou roun difé annan so tchò é i pa té pouvé tchenbé l’ ankò. A ké menm bagaj-a pou nou si nou ka plen nou tchò ké Paròl Bondjé-a. A pou sa nou divèt étidyé ké réfléchi asou Labib-a chak jou. A konsa nou ké gen plis tchò kontan annan nou prédikasyon é pitèt plis moun ké kouté nou (Jér. 15:16).

21. Kouman nou pouvé jité dékourajman-an atè ?

²¹ « Satan ka sèrvi dékourajman-an kou roun zarm pwisan », a sa Déborah, sò nou ja palé-a ka di. Mé Jéova lontan pi fò pasé Satan ké tout so zarm. Alòr annan tout sitiasyon lò to ka santi to dékourajé, priyè Jéova pou i soutni to. I ké idé to pou to pa pansé ki to pa bon paské i toujou gen roun bagaj ki pa k’alé koté to ouben paské to toujou ka fè roun bagaj ki pa bon. Si to malad, i ké konsolé to é i ké randé to pi fò. Si to pa gen rèsponsabilité annan so òrganizasyon, i ké idé to wè bagaj-ya kou li menm ka wè yé. É i ké idé to wè prédikasyon-an kou li menm ka wè l’. Atò, priyè to Papa ki annan syèl-a toulong é di li tousa ki annan to tchò. Paské i ké idé to, to ké pouvé jité dékourajman-an atè !