52 TOGÓ BEL GE NÒ
Sĩ́deè Ge Láá Beemá Ọ́ọ́-ọọ̀ Ló
“Tú dénè nu ea gé tãagéni gbẹẹ́ bá Jìhóvà, mè àé sẹlẹ́ni.” —PS. 55:22.
SỌ́L EA GÃ́BUG DÚ 33 Tú O Nyèè Tò Gbẹẹ́ Bá Jìhóva
GE TENÍ BOO NÚ EÉ NÓ *
1. Éé ní e ọ́ọ́-ọọ̀ ló é láá naaí ló é?
BUÙ deeí, è ólò kpee sĩ́ ló tã̀àgã̀ vaá pììgà inmá kiẽ́e bẹẹ kpóó sim tùlà ge láá ĩ̀ìmà. Sõò à ólò tàvàlàí ló gè láá ĩ̀ìmà gbò tã̀àgã̀í tṍó e di kè bá ọ́ọ́-ọọ̀ ló. Boo béè vó, èé láá tú ọ́ọ́-ọọ̀ ló doolé ló neǹ zib ea náa kọ é gá ié dĩ̀ìnè ló, agẹ ló, nè ẹ́ẹ́-ẹẹ̀ nyíe. Kpá Próvẹẹ̀b 24:10 nè émì nu ea di kè kẽ kọ́ọ̀: “Beè lóó ni ọọ mm̀ tṍó tã̀àgã̀, nóo é íe kói gè naamá nu.” Ẽei, ọ́ọ́-ọọ̀ ló é láá naa kọ é gá ié kói ge ĩ̀ìmà gbò tã̀àgã̀ e gé téní bá mm̀ dùm.
2. Éé ní ea é láá naa kọọ̀ lóói á ọọ ẹ́, vaá éé ní eé ló sọ́l boo mm̀ nakà togó belí é?
2 Gã́bug nu e monmà dẽe nè ní e bè née monmà dẽe é láá ọọvẹ́i ló. Sìgà gbò nuí ólò dú boo béè bẹẹ náa gbõoma, nu e bè née láà naa, nè zọ̀ ló. Àé láá du nágé boo béè kọọ̀ née íè dọ̀ tóm ea taníi gè ié mm̀ bõ̀ònatõ̀ò Jìhóvà àbèè kọọ̀ è gé kọ́ kpẹ̀a kiẽ́e e gbò nen náa gbĩ́ gè dã́ lé kpẹ̀aí. Mm̀ togó belí, èé ló sọ́l boo sìgà gbò nú eé láá naa ge beemá ọ́ọ́-ọọ̀ ló èlbá.
TṌÓ E DI KÈ BÁ NÁA GBÕOMA NÈ TṌÓ E BÈ NÉE LÁÀ NAA SÌGÀ NU
3. Éé ní ea é láá nvèè bá nèi kọ é tú lé bá ẹ̀bmà bẹẹ náa gbõoma ẽ́?
3 À ólò valíí ló gè láá tú pọ́lọ́ bá ẹ̀bmà bẹẹ náa gbõoma nè gbò nú e bè née láà naa. Níí ólò gbóó láá náa kọ é bugi togó kọọ̀, boo béè bẹẹ pọ́lọ́, Jìhóvà náa é zigà kọ é bã mm̀ ãa bàlà booá. Íb nakà bug togó dú pọ́lọ́. Mó bá ní ea bọ́ló kọ é ẹ̀bmà bẹẹ náa gbõoma ẽ́? Kpá Káí tẹ́lẹ bàlà kọọ̀ “dénè nen beè sí pọ́lọ́” daalá lọl ló áá Jíízọ̀s. (Róm̀ 3:23) Sõò Jìhóvà náa ólò ká dẽe gbẹẹ́ boo bẹẹ pọ́lọ́ àbèè ge ẹ̀bmà dẽe kọ é gbõoma. Tãa vó, à dú Tẹ̀ ea vulèi vaá gbĩ́ gè nvèè bá nèi. À ié nagé ĩ̀ìmà. À nyímá kọọ̀ à ólò tàvala ló gã́bug bẹ̀ì ge naa nú ea lelà nè ge ẹ̀b bẹẹ bá mm̀ sĩ́deè ea bọ́ló, vaá à di kpènà ló gè nvèè bá nèi.—Róm̀ 7:18, 19.
Jìhóvà nyímá gbò lé nu e beè naa tṍó ea kil nvéeá nè gbò lé nu e gé náa kátogóí (Ẹ̀b 5 kpò) *
4-5. Dẹ̀ẹ̀a boo nú ea di mm̀ 1 Jọ́ọ̀n 3:19, 20, éé ní ea beè nvèè bá nè bàà kà vígà pábiaá kọ bàá bé ọ́ọ́-ọọ̀ ló èlbá bá ẹ́?
4 Bugi togó boo nu dòòmà bá ea kil ló Deborah nè Maria. * Tṍó e Deborah beè di ńkem, pá ba tọ beè tú pọ́lọ́ bá sẹ̀ẹ̀màe naa ní e ẹlẹ náa beè láá ẹ̀b a lóó boo bá ea bọ́ ná ló. Bà náa ólò bọọgẹ̀ õáe zaa. Vóà naa, tṍó ea ni dú kànen, a beè tú pọ́lọ́ bá ẹ̀bmà a bá. Tṍó ea náa ńkem̀ nú e bè náa lelà, à ólò ié bùlà kọọ̀ náa é láá naanìè tọ́ọ̀ nu ea lelà. Maria beè kpee nagé sĩ́ ló íb gbò tã̀àgã̀á. Pá a dúà ló beè nvèèmàe lẹ́. Vó beè naa kọọ̀ á ié bùlà kọọ̀ á géè ló tọ́ọ̀ nu. Bã̀àna tṍó ea diìa múú lọ̀l, a beè ié bùlà kọọ̀ náa bọ́ẹ̀ ló gè kọ̀là Neǹ Ditõ̀ò Jìhóvà!
5 Sõò, bàà kà vígà pábiaí náa beè òòà aa ló gè fã̀ Jìhóvà. Ló éé? Boo béè kọọ̀ ba beè tã̀àgã ló Jìhóvà vaá kọ́ nèe bé e nu tọ́a vá ló naa. (Ps. 55:22) Ba beè gbóó nyimá kọọ̀ bẹẹ Tẹ̀ ea di káála dã́tẽ́ ló kọọ̀ gbò pọ́lọ́ nu ea náaí ló é láá naa kọ é tú pọ́lọ́ bá ẹ̀bmà bẹẹ lóó. Sõò à ólò mòn nàgé gbò lé kpãa ea dìí m, kọbèè à gá náa vaá è ié bùlà kọọ̀ née íè tọ́ọ̀ kà lé kpãa.—Bugi 1 Jọ́ọ̀n 3:19, 20.
6. Nen é láá labví láb naa vàẹ beè à sí áá kà pọ́lọ́ ea beè sìe?
6 Sìgà nen é láá dì ea gé piigà ge aa ló gè naa nú ea dú pọ́lọ́, sõò àé láá kpáá si nágé áá kà pọ́lọ́á vaá à ọọvẹ́ẹ ló. À dú kà kà kọọ̀ nyíéi ólò bẽgẽ̀i bel tṍó e síì pọ́lọ́. (2 Kọ́r. 7:10) Sõò, náa bọ́ló kọ é bẽgẽ̀ bel bẹẹ bá zelmá kẽ, ge bugi togó kọọ̀: ‘Tọ́ọ̀ nú e nda é láá naa á gé ná. Àé náàà vaá Jìhóvà ia ló nèm ẽ́?’ Íb gbò bug togóá náa dú kà kà vaá àé láá naa kọ é òòà aa ló ge fã̀ Jìhóvà. Kẽ̀èa boo nú e beè bugi mm̀ kpá Próvẹẹ̀b 24:10—née é íe kói gè naamá nu tṍó e di kè bá ọ́ọ́-ọọ̀ ló. Tãa vó, zọ̀ Jìhóvà “noo nu lele” tení dú ló gè tã̀àgã ló Bàrì vaá bànie kọ á iàẹ̀ ló neè ni. (Àìz. 1:18) Tṍó e Jìhóvà mon kọọ̀ ò ọ́gà vaá pììgà ge nyaaá, àé ia ló nè ni. Nagé, sí ló gbò kànen mm̀ bõ̀ònatõ̀ò. Bàé palàge nvèè bá nè ni kọ ó láá kpáá ié lé gbaa ló kilma ló Bàrì.—Jém̀z 5:14, 15.
7. Éé ní ea náa vaá lóói náa é ọọ be è gé piigà ge naa nú ea lelà ẹ?
7 Jean-Luc, ea dú enè neǹ kànen ea di France, kọ́ kilma ló gbò e bà gé téní bá ọ́ọ́-ọọ̀ ló kọọ̀: “Nen e Jìhóvà bugíe naamá neǹ lé lab dògò níì nen ea gáà si pọ́lọ́ nì, sõò nen ea ọ́gá tṍó ea sí pọ́lọ́ vaá olòó pììgà ge nyaaá.” (Róm̀ 7:21-25) Boo béè vó, ó gá ẹ̀b o bá tẹlẹ kẽ be à íe ọ́ọ́-ọọ eo gé bé. Boo béè kọọ̀ dénè bẹ̀ì ólò sí pọ́lọ́, è íè bíi ló sàn nyíe ea aa bá Bàrì ea néi tení dú ló nu ààaá.—Ẹ́fẹ. 1:7; 1 Jọ́ọ̀n 4:10.
8. Tṍó e lóói ọọ, bà mée ní eé láá bĩiná nvèè bá lọl bá ẹ́?
8 Pá bẹẹ vígà mm̀ bõ̀ònatõ̀ò é láá sièi kpóó ló! Bàé láá pãanéi tṍ ló tṍó e gé ló bel vaá ló gbò bel ea é síèi kpóó ló nèi. (Pró. 12:25; 1 Tẹ̀s. 5:14) Ene kà vígà pábia ea kọlà Joy, ea dú Nigeria ea géè mòn tã̀àgã̀ bá ọ́ọ́-ọọ̀ ló kọ́ọ̀: “Náa gáẹ̀ beè valím ló gè láá ĩ̀ìmà be níì pá vígà nì. Sìà kpóó ló ea aà vá bá zógè kọọ̀ Jìhóvà áálá nà tã̀àgã ló. Níí nóòmà nda ge láá siè kpóó ló dõòna gbò e bà íe tã̀àgã̀ bùlà.” À bọ́ló kọ é kẽ̀èa boo kọọ̀ pá bẹẹ gbò vígà mm̀ bõ̀ònatõ̀ò náa é nyímá dénè tṍó e íè bíi ló sìà kpóó ló. Boo béè vó, àé bọ́ló kọ é gyàsĩ́ bã ló neǹ vígà e togóe ni tulà nu vaá bĩiná nvèè bá.
TṌÓ E DI KÈ BÁ ZỌ̀ LÓ
9. Mósĩ́ deè ní e kpá Psalm 41:3 nè 94:19 síèi kpóó ló é?
9 Gbĩ́ nvèè bá lọl bá Jìhóvà. Tṍó e di kè bá zọ̀ ló, bọọ èlmà tõ̀ò, tṍó e ni tú gã́bug tṍó dììma bá zọ̀ ló, àé láá tàvàlàí ló gè bugi lé bug togó. Náa kal ló béè kọọ̀ Jìhóvà náa ólò bói tení dú ló tóm dũ̀ùnè deè nieí, à ólò nvèè bá nèi vaá nèi kói ea é náa kọ é láá ĩ̀ìmà. (Bugi Psalm 41:3; 94:19.) Dì belí nu dòòmà bá, àé láá naa kọọ̀ neǹ vígà á dù gé nvèè bá sí sìgà tóm tọ àbèè ge zalí nu nèi. Àé láá naa kọọ̀ pá bẹẹ vígà á zọ̀i tã̀àgã ló Bàrì. Àbèè kọọ̀ à náa kọ é kẽ̀èa boo gbò moǹ bel nvèè nyíé gbàà ea di mm̀ Kpá Káí, dì belí ní ea kil ló bẹẹ lé ból dẽe sĩ́ ge dé kpéè ló dùm mm̀ ãa bàlà boo, e zọ̀ ló nè nyaa ló náa é diá.—Róm̀ 15:4.
10. Éé ní ea beè naa vaá Isang náa beè kilsĩ́ gè ié tã̀àgã̀ bùlà tṍó e bù ló nu náaé ló é?
10 Isang, ea dú Nigeria, beè ié kà agẹ bá bù ló nu ea beè naáé ló. A neǹ dóm biè beè kọ́ nèe kọọ̀ náa é láá kyã̀àna boo bàà kpóó tọ. Isang beè kọọ̀: “M beè ié tã̀àgã̀ bùlà vaá nyíém à pè.” Sõò é kọọ̀ a beè gbẹá naa vó? Ẽ́èe! Éé ní ea beè nvèè bá nèe ẽ́? Isang kọ́ọ̀: “Ńdáà va nè m̀m̀ gáà òòà aa ló gè tã̀àgã ló Jìhóvà nè ge nó Kpá Káí. E beè beeláfùl ge zaava ló gbò lé nu e íè, bii nagé ló bẹẹ lé ẹ̀b dẽe sĩ́ mm̀ ãa bàlà boò Bàrìa.”
Kọbèè gbò e ba dìtõ̀ò náa né va deè, bàé láá gbĩ́ sĩ́deè ge kọọmá kpẹ̀a (Ẹ̀b 11-13 kpò)
11. Mósĩ́ deè ní e Cindy beè láá kilsĩ́ gè ié ẹ́ẹ́-ẹẹ̀ nyíe tṍó ea beè di kè bá zọ̀ ló é?
11 Neǹ dóm biè beè kọ́ nè Cindy, ea dú Mexico, kọ à íe kom ea é láá fẹ́ẹ ea dìé ló. Éé ní ea beè naa kọbé à láá ĩ̀ìmà ẽ? Tṍó ea beè di ketõ̀ò bóa, a beè beeláfùl ge tú buù dee kọọmá kpẹ̀a. A beè emí kọọ̀: “Ge naa vó beè nvèè bá nèm kọ ḿ ká bùlà gbẹẹ́ boo gè nvèè bá nè dõòna gbò, e bè níì boo nà kom̀ bààà, nyaa ló, àbèè bé e kpá lóm gé zọ naa nì. Nee bé em ólò naa naaí: Tṍó em gé zọ̀ nà gbò dóm biè loa bel, m̀ ólò bĩiná va nú ea kil ló pá ba tọ. Tṍóá m̀ gbóó bĩiná va nú ea náa bà sà ge sí íb gbò tómá. Ge naa vó ólò naa kọ ḿ sà lé togó bel ea é léémá va gè pãane tṍ ló. Gã́bug gbò dóm bièí ólò kọọ̀ gbò e bà gé gbĩ́ bóa náa ólò bọọgẹ̀ bĩinàè va kọọ̀, ‘É kpá ló ni à?’ Vaá gã́bug ọ̀và beè õám zaa ló gè bùlà nú ea kilìè vá ló. Sìgà ọ̀và beè nèm ba nómbà fóòn nè kiẽ́e bà ólò tõo. Nda béè nyimá kọọ̀ Jìhóvà é nveè bá nèm kọ ḿ láá ĩ̀ìmà nakà agẹ bá tã̀àgã̀í, sõò bé ea náa kọ ḿ láá ié dĩ̀ìnè ló bùlà nè zààva naa beè bọọ́ ḿ ló!”—Pró. 15:15.
12-13. Mósĩ́ deè ní e sìgà gbò e bà di kè bá zọ̀ ló àbèè kọọ̀ bo dì vá ló ni kọọmá kpẹ̀a ẹ́, vaá éé ní ea silà aa ló é?
12 Nen ea di kè bá zọ̀ ló àbèè nen e bo dìé ló é láá ié ọ́ọ́-ọọ̀ ló boo béè kọọ̀ bà náa é láá kọ́ kpẹ̀a belí bé e ba beè olòó naa. Náa kal ló béè vó, gã́bug ọ̀và ólò gbĩ́ gbò sĩ́deè ge kọọmá kpẹ̀a. Gbẹá United State, ba beè tú ńzì ea é nveè bá naa kọọ̀ vígà pábia ea kọlà Laurel á láá sẹẹgẹ séi nvèèé ló mm̀ 37 gbáá! A beè ié kom cancer, baa baáẹ gã́bug tṍó, vaá à íe gbò kom ea úúaẹ́ kpá ló. Sõò, gbò agẹbá tã̀àgã̀ ea bélí vóí, náa beè òòmàe lọl ló gè kọ́ kpẹ̀a. À ólò kọ́ kpẹ̀a nè gbò dóm biè nè dõòna gbò e bà ólò sí tóm tọọ̀ biè e bà dú tọ lóóe. Éé ní ea beè sìlà aa m-mé? A beè láá nvèè bá nè nú ea é dú 17 nen kọ bàá nó nu ea kil ló Jìhóvà! *
13 Richard, ea dú enè neǹ kànen ea dú France, íe lé lọ̀ọ̀gà bug ea kil ló nu e gbò e bà gbẹ́á tọ àbèè tọọ̀ biè é láá naa. “M beè nè lọ̀ọ̀gà bùlà kọ bàá tú kpá lẹ́ mm̀ nu naa ní e gbò nen é mon. Tṍó e gbò nen é téní, bàé mon vaá gbĩ́ gè tù. Níí é láá siè kpóó ló pá bẹẹ gbò vígà e bà náa ólò láá kọ ná kpẹ̀a aa tọ dọ tọ.” Gbò e bà náa é láá aa ba tọ é láá kọ́ kpẹ̀a tení dú ló kpá lẹ̀ẹ̀là tóm àbèè fóòn.
TṌÓ E BÈ NÉE ÍÈ DỌ̀ TÓM EA TANÍI GÈ IÉ MM̀ BÕ̀ÒNATÕ̀Ò
14. Mókà lé nu dòòmà bá ní e Méné Dévìd beè zogè e?
14 À íe gã́bug bug ea é láá naa kọọ̀ é gá ié dọ̀ tóm ea taníi gè ié mm̀ bõ̀ònatõ̀ò Jìhóvà. Dì belí nu dòòmà bá, èé láá sigá ló gbáá ea bĩ́íná àbèè kọọ̀ e di kè bá zọ̀ ló àbèè boo béè dõòna kà gbò dìtõ̀ò. Be è di kè bá íb gbò dìtõ̀òí, èé láá nó nu dòòmà bá Méné Dévìd. À géè palàge tàn Dévìd ge tìb tọọ̀ káí Bàrì, sõò Jìhóvà beè sà dõòna nèn kọ á tìb. Dévìd beè palàge nvèè sãa kúm nen e ba beè nè tómá kọ á sì, mm̀ ge tú gã́bug nóò kpé nè ẹ́ẹ́ kpé nvèèmà bá. Dévìd dú kà lé dòòmà bá eé nò!—2 Sám. 7:12, 13; 1 Kró. 29:1, 3-5.
15. Mósĩ́ deè ní e Hugues beè bé ọ́ọ́-ọọ̀ ló èlbá ẹ́?
15 Boo béè zọ̀ ló, Hugues, ea dú ene kà vígà págbálà ea dú France, náa beè láá siná tóm dì belí neǹ kànen mm̀ bõ̀ònatõ̀ò kọbèè gbò tóm tọ ea válí bá. A beè emí kọọ̀: “Túá ból, m beè ẹ̀b nà bá tẹlẹ kẽ naa ní ea beè palàge ọọvẹ́m ló. Sõò tṍó e tṍó téní, m beè gbóó mòn kọ náa bọ́ló kọ ḿ biile nyíé boo gbò nú e bè ním é láá naa na. Vó beè naa kọ nyíém á ẹẹ ló gbò nú em é láá na-náa nè Jìhóvà. M beè beeláfùl kọ lóóm náa é ọọ. Dì belí Gídiòn nè taà gbò nen e lóó va beè ọọá—nda é kilsĩ́ gè bé béí!”—Jọ́j. 8:4.
16. Éé ní eé láá nó lọl ló nu dòòmà bá gbò nyómá tóm ẽ́?
16 Gbò nyómá tóm e ba beè bọ́ló dẹ̀lẹ̀ nyíé booá dú kà lé nu dòòmà bá. Tṍó e Méné Éhàb géè bẹ̀l, Jìhóvà beè bĩiná lọ̀ọ̀gà bùlà ea aa bá gbò nyómá tóm ea kil ló gè dàgẹ̀ pọ́lọ́ ménéí. Gã́bug gbò nyómá tóm beè nè ba lọ̀ọ̀gà bùlà. Sõò Bàrì beè tú níí ene kà nyómá tóm vaá kọọ̀ ńlẹ́ẹ̀ lọ̀ọ̀gà bùlà ní ea é síá tómé. (1 Kíǹg 22:19-22) É kọọ̀ na gbò nyómá tómá beè nvèè súng, be à sẹlẹ ge bugi togó kọọ̀, ‘Éé ní ea náa vaá m̀ pee tṍó kọ m̀ gé neè lọ̀ọ̀gà bùlà ẹ́?’ Náa íe tọ́ọ̀ nú ea zógè kọọ̀ ba beè ié bùlà naa vó. Gbò nyómá tómá beè kìlmà kpá ló kẽ vaá gbĩ́ kọọ̀ dénè ka á kuu Jìhóvà.—Jọ́j. 13:16-18; Kùùà 19:10.
17. Éé ní ea bọ́ló kọ é naa tṍó e lóói ọọ boo béè kọọ̀ née íè dọ̀ tóm ea taníi gè ié mm̀ bõ̀ònatõ̀ò Bàrì e?
17 Ká bùlà gbẹẹ́ boo bẹẹ nèà deè ge kọ̀là Gbò Neǹ Ditõ̀ò Jìhóvà nè ge vee lé kpẹ̀a ea kil ló Boǹ Méné Bàrì. Èé láá ié dọ̀ tóm àbèè kọọ̀ dọ̀ tóm aàí bá, sõò níì vó ní ea náa kọ é bọọ́ ló Bàrì e nì. Tṍó e kilmà kpá ló kẽ ní ea é náa kọọ̀ Jìhóvà nè pá bẹẹ gbò vígà á palàge vùlèi é. Boo béè vó, bàn Jìhóvà kọ á nveenìè bá neè ni kọ ó kilmàè kpá ló kẽ. Bugi togó boo dénè gbò lé nu dòòmà bá gbò gyóòlo Jìhóvà ea di mm̀ Kpá Káí. Tú táàa ló bùlà siimá tóm nè pá vígà inmá kiẽ́e eo kpóó sim tùlà.—Ps. 138:6; 1 Pít. 5:5.
TṌÓ E GBÒ E BÀ DI KIẼ́E E ÓLÒ KỌ́ KPẸ̀A NÁA GBANÍI TṌ LÓ
18-19. Mósĩ́ deè ní eo é láá ié zààvà mm̀ o sìtóm kọ̀ kpẹ̀a kọbèè gbò nen náa pãané ni tṍ ló é?
18 É kọọ̀ à íe tṍó e lóó ni beè ọọ boo béè kọọ̀ ò gé kọ́ kpẹ̀a kiẽ́e e náa léémá gbò nen gè dã́ lé kpẹ̀aí, àbèè kọọ̀ gbò nen á gé? Tṍó e di kè bá íb dìtõ̀òá, éé ní eé láá naa kọbé è íe zààva àbèè ge bọ̀ọ̀vẹ̀ bẹẹ zààvà ẹ? Sìgà gbò lọ̀ọ̀gà bùlà ea kil ló nú eo é náa di mm̀ ńkpó ea kọ́ọ̀ “ Sĩ́deè Ge Bọ̀ọ̀vẹ̀ O Zààva Tṍó Eo Gé Kọ́ Kpẹ̀a.” À dú nágé bíi kọ é ẹ̀b bẹẹ sìtóm kọ̀ kpẹ̀a boo bá ea bọ́ló. Éé ní e níá bãàa m-mé?
19 Ká bùlà gbẹẹ́ boo gè vee nú ea kil ló béè Bàrì nè a Boǹ Méné. Jíízọ̀s beè kọọ̀ pọ́ì ńkem̀ gbò nen ní e bàé nyoonìèe nvée ẽ́. (Máát. 7:13, 14) Tṍó e gé kọ́ kpẹ̀a, è íè nèà deè ge zọ̀ Jìhóvà, Jíízọ̀s, nè gbò nyómá tóm siá tóm. (Máát. 28:19, 20; 1 Kọ́r. 3:9; Kùùà 14:6, 7) Jìhóvà gé gbĩ́ gbò e bà íe tàn ge fã̀e. (Jọ́ọ̀n 6:44) Boo béè vó, beè nen náa pãanéi tṍ ló tṍó e kọ́ọ̀ kpẹ̀a nèe, be à sẹlẹ àé pãanéi tṍ ló dõòna dè.
20. Éé ní e kpá Jèrèmáíà 20:8, 9 é láá noòmài ea kil ló gè bé ọ́ọ́-ọọ̀ ló é?
20 Èé láá nó gã́bug nu lọl ló neǹ kọ́ọ̀ bùlà Bàrì Jèrèmáíà. Gbò e ba beè di kiẽ́e ea géè kọ́ kpẹ̀a náa beè pãanée tṍ ló. Gbòa géè màngã̀e vaá nvèèmàe lẹ́ “kọ̀láá dee.” (Bugi Jèrèmáíà 20:8, 9.) À íe tṍó e lóóe beè ọọ vaá a beè gbĩ́ gè òòà aa ló gè kọ́ kpẹ̀a. Sõò náa beè naa vó. Ló éé? “Moǹ bel Jìhóvà” beè belí sã́ ea di mm̀ Jèrèmáíà, vaá náa beè láá uu bá boo! Àé láá mèà nagé naa vó ló beele be à gá náa vaá è nó Moǹ Bel Bàrì buù dee vaá palàge bugi togó boo. Dee deè nvée, àé bọ̀ọ̀vè bẹẹ zààvà vaá gã́bug gbò nen é pãanéi tṍ ló.—Jèr. 15:16.
21. Mósĩ́ deè ní eé láá beemá ọ́ọ́-ọọ̀ ló èlbá ẹ́?
21 Deborah e beè kolí béeá kọ́ọ̀: “Sétàn tú ọ́ọ́-ọọ̀ ló naamá kà pọ̀b kà nuù bé ea gé béémái.” Sõò Jìhóvà palàge ié kpóó èlmà Sétàn nè gbò a nuù bé. Boo béè vó, kọ̀láá tṍó e lóó ni ọọ, bàn Jìhóvà kọ á nveenìè bá neè ni. Àé nveè bá nè ni kọ ó ĩ̀ìmà kè bá náa gbõoma nè tṍó e bè nóò láà naa sìgà nu. Àé nveè bá nè ni kè bá zọ̀ ló. Àé nveè bá nè ni kọ ó ẹ̀b o dọ̀ tóm ge sí mm̀ a bõ̀ònatõ̀ò boo bá ea bọ́ló. Vaá àé nveè bá nè ni kọ ó ẹ̀b o sìtóm kọ̀ kpẹ̀a boo bá ea dú lé. Ge kpáá tẹlẹ ló, tã̀àgã ló o Tẹ̀ ea di káála vaá ò kọ́ gbõ̀ònà bé e nu tọ́a ní ló naa nèe. Tení dú ló a nvèè bá, òó láá bé ọ́ọ́-ọọ̀ ló èlbá.
SỌ́L EA GÃ́BUG DÚ 41 Sóo Sóo Dã́ Nà Tã̀àgã Ló
^ par. 5 Lóó dénè bẹ̀ì ólò ọọ́ sìgà tṍó. Mm̀ nakà togó bel gè nòí, èé ló sọ́l boo sìgà gbò nú eé láá naa tṍó e lóói ọọ. Vaá dì belí bé eé mon naa, tení dú ló nvèè bá Jìhóvà, eé láá bé ọ́ọ́-ọọ̀ ló èlbá.
^ par. 4 Bà nyááná sìgà bée.
^ par. 12 Bugi nòòtẽ́ ea kil ló dùm Laurel Nisbet mm̀ Awake! níí January 22, 1993.
^ par. 69 BÀÀTẼ́ EA KIL LÓ FÙTÓ: Ene kà vígà pábia ea íe tṍó e lóóe beè ọọ, sõò à gé bugi togó boo gbò tóm ea beè sí nè Jìhóvà vaá tã̀àgã ló Bàrì. À agàla boo kọọ̀ Jìhóvà kẽèa boo gbò tóm ea beè sì nè ní ea gé sí kátogóí.
