1. Bichi byakarhuhikira nka rhuvunikire omurhima?

RHUNAHURANA ebibazo buli lusiku n’okujira okwerhu koshi yi rhubilwisa. Aliko byakarhukomerera okulwisa ebibazo byerhu amango rhuvunikire omurhima. Che chirhumire rhukwanene kubona ehali y’okuvunika omurhima nka chishambo chakarhunyega obwizere, obushiru, n’obusime bwerhu. Olwandiko lwa Mezali 24:10 n’amahugulo m’eshishi biderhere ntya: “Nka wamavunika omurhima amango m’ebibazo, emisi yawe yaba migeke bwenene.” Kweri okuvunika omurhima kwakarhumala emisi rhwalikenere yi rhugala kulwisa ebibazo by’akalamo bwinja.

2. Bichi byakarhuvuna omurhima, na bichi rhwaganirako mu gunola mwazi?

² Hali bintu binene byakarhuvuna omurhima; biguma byakaba eyi byakabonekanako n’amasu, n’ebindi nanga. Ebyola bintu byakaba bili m’okurhashinganana, obuzamba, n’obulwala. Changwa rhwakavunika omurhima bulala rhurhapatire ngabane ndebe rhwalinihire omu kasi ka Yehova, changwa bulala rhuli rhwahubiri omu eneo abantu barhali barhuyunviriza. Mu gunola mwazi, rhwabona bintu biguma rhwakajira yi rhuhima ehali y’okuvunika omurhima.

3. Bichi byakarhurhabala amango rhwamavunika omurhima eju y’okurhashinganana kwerhu?

³ Rhwakaba juba-juba kuvunika omurhima eju y’okurhashinganana kwerhu, n’eju y’amagosa merhu. Echola chakarhuma rhwahwanza kuwaza oku bulala rhunagoma, Yehova arhakarhuyemerera rhwaja omu gulu lihyahya. Okuwaza ntyo kwakalerha obuhanya. Nka gurhe rhukwanene kubona ehali yerhu y’okurhashinganana? Ebiblia ederhere ok’olekere Yesu Kristu yenyine, abantu boshi “bajirire echaha.” (Ro. 3:23) Aliko Owayandikisaga  Ebiblia arhali wa kuchiyenza changwa wa kulonzeza abantu k’obushinganyanya. S’ahubwe ali Darha w’obuzigire olonzeze kurhurhabala. Anali wa kulindira. Ali abona kangana gurhe rhuli rhwachihangana kulwisa obuzamba bwerhu n’okuhima amawazo mabi rhuchigwerheko m’okuchibona nka ntacho rhumalire, anali tayari kurhurhabala.​—Ro. 7:18, 19.

4-5. Nka gurhe ebinwa bili omu 1 Yohana 3:19, 20, byalirhabere bali-berhu babiri bahime ehali y’okuvunika omurhima?

⁴ Rhushambale oku mufano gwa Deborah na Maria. * Amango Deborah alichili mwana, abantu b’omulala gwage bakazaga zigana kumukolera omu njira yaliri yarhuma achibona nk’ali wa busha. Barhakazaga zigana kumubwira koko oku by’akolere. Ahwanza kuchiyunva nka ntacho amalire. Amango aliri ajira gosa ligeke, aliri achibona wa busha loshi. Maria naye aligwerhe echibazo chili nk’echola. Abantu b’omulala gwage baliri bamubonerera. Echola charhuma ahwanza kuchibona wa busha. Chiro n’enyuma y’okubatizwa, Maria aligenderere kuwaza oku arhakwanene kuba Muhamirizi wa Yehova!

⁵ Aliko abola bali-berhu babiri barhalekaga kukolera Yehova. Bulagurhe? Eju ya chintu chiguma, balisalirire Yehova n’okumubwira okuntu baliri bachiyunva n’omurhima goshi. (Zb. 55:22) Baluha bayemera oku Darha w’embingu w’obuzigire ab’amenyere bwinja ebi rhwagereremo omu kalamo embere, n’ebyola byakarhuma rhwachigwarha kw’amawazo mabi. Aliko anashuba kubona ebinja bili omu mirhima yerhu, k’okuderha engeso zinja rhugwerhe, ezi rhwabo rhurhakagala kubona.​—Osome 1 Yohana 3:19, 20.

6. Gurhe omuntu akajira nk’amagalukira egosa ajiraga mira?

⁶ Bantu baguma bali bachihangana kulekana na gosa lilebe, aliko amango bamaligalukira, banavunika omurhima bwenene. Kweri kurhali kubi okuchibona banya-magosa amango rhwamajira echaha. (2 Ko. 7:10) Aliko rhurhakwanene kuchibona banya-magosa kurhalusa olugero n’okuchigaya omu kuwaza ntya: ‘Ntacho malire. Yehova akambabalira si?’ Kurhali kwinja okuwaza ntyo, n’amawazo mali ntyo makarhuma rhwaleka kukolera Yehova. Oyibuke ebinwa bili omu Mezali 24:10, biderhere ntya: emisi yerhu yakeha amango rhwamavunika omurhima. Ahali h’okuchibona wa busha, “ohebe ebintu oku mustari” haguma na Yehova omu kumusalira n’okulonza obubabale bwage. (Isa. 1:18) Amango Yehova amabona oku wahungamire n’omurhima goshi, anakubabalira. Oku bwindi, oje kubona abashamuka b’echibaga. Bakurhabala oshube kugwarha ehali nyinja y’ekiroho.​—Yak. 5:14, 15.

7. Bulagurhe rhurhakwanene kuyunva rhuvunikire omurhima amango rhuli rhwachihangana kujira ebintu binja?

 ⁷ Jean-Luc, mushamuka w’echibaga omu France, abwirire abali balwisa obuzamba ntya: “Omuntu w’okunali emalanga-mbere ma Yehova, arhali olala muntu orhajira gosa, aliko ali olala onachiyunva kubi eju y’amagosa mage n’okuhungama buli mango.” (Ro. 7:21-25) Bobola orhachibonaga wa busha akaba oli walwisa obuzamba. Oyibuke oku ntaye mu rhwewe wakaba mushinganyanya emalanga-mbere ma Mungu. Rhweshi rhukenere olukogo lurhakwanenwe lwa Mungu kugerera enchungu.​—Efe. 1:7; 1 Yo. 4:10.

8. Bande rhukwanene kulibirhira amango rhwavunikire omurhima?

⁸ Bene-berhu na bali-berhu b’omu chibaga barhuheba omurhima! Bakarhuyunviriza bwinja amango rhuli rhwababwira okuntu rhuchiyunvirhe, n’okurhubwira ebinwa by’okurhuheba omurhima. (Mez. 12:25; 1 Te. 5:14) Mwali-werhu muguma w’omu Nijeriya oyirikirwe Joy, wahuranaga echibazo ch’okuvunika omurhima, aderhere ntya: “Nakabere wa nde nka harhaliri bene-berhu na bali-berhu? Echirhulirizo bene-berhu na bali-berhu bampere, chiyerekene oku Yehova ashubize oku masala mani. Nashubire kuyiga okuntu nakarhuliriza abandi bavunikire omurhima, kugerera omufano gwabo.” Rhukwanene rhumenye oku bene-berhu na bali-berhu barhakamenya buli mango akasanzi rhukenere mw’echirhulirizo. Bobola rhukwanene kuyegera mwene-werhu changwa mwali-werhu okulire ekiroho n’okumuhema oburhabale.

9. Nka gurhe olwandiko lwa Zaburi 41:3; 94:19 lurhuhebere omurhima?

⁹ Oheme Yehova oburhabale. Amango rhurhali rhwachiyunva bwinja, ahanene nka rhugwerhe obulwala bwamalegama, byakarhukomerera okugwarha amawazo menja. Chiro akaba oku Yehova arhakarhufumya zene oku njira y’echisomerene, akarhurhuliriza n’okurhuha emisi rhukenere yi rhulembera obola bulwala. (Osome Zaburi 41:3; 94:19.) Omufano, akakolesa aberhu Bakristu barhurhabale amango rhukenere omuntu wakarhurhabala kujira amakasi m’omu nju changwa kujirhugulira ebintu omu soko. Akashunika bene-berhu basalire haguma nerhu. Changwa akarhuyibusa amawazo m’okuheba omurhima mali omu Chinwa chage, nk’obulangalire bwinja b’okupata akalamo kashinganene karhali mu malwala n’amalumwa omu gulu lihyahya lyayinjire.​—Ro. 15:4.

10. Bulagurhe Isang arhaligenderere kuvunika omurhima enyuma we aksida yage?

¹⁰ Mwene-werhu Isang olamire omu Nijeriya, alijirire aksida yamulemazaga. Doktere amubwira oku arhakachifa alambagire. Isang aderhere ntya: “Nalivunikire omurhima n’okuchika enungwe.” Aligenderere kuchika enungwe si? Nanga! Bichi byamurhabalaga? Afasiriye ntya: “Nta lusiku nyono na mukani rhwalekere okusalira Yehova n’okuyiga Echinwa change. Rhwalishubire kuhigirira kugwarha eshukurani oku bintu binja rhwaligwerhe, nk’obulangalire bw’akalamo k’esiku n’amango omu gulu lihyahya.”

11. Nka gurhe Cindy apataga obusime amango alilwere bwenene?

¹¹ Munganga alibwirire Cindy olamire omu chihugo che Megzike oku agwerhe obulwala bw’akamuyirhire. Bichi akajirire y’agenderera kulembera obola bulwala? Amango baliri bamubuka, ahigirira okuyinj’ahubiri buli lusiku. Ayandikire ntya: “Okujira ntyo kwalintabere ingale kuchiseza oku bandi, ahali h’okuchiseza oku bihulu byani by’okuberwa, amalumwa naliri nayunva, n’okuntu naliri mulwala bwenene. Hala echi nakazaga kujira: Buli kuganira na badoktere changwa abanganga, nakazaga kubabaza  eju y’emilala yabo. Kandi nakazaga kubabaza bulagurhe bachishogere akasi kakomere ntyo. Buzinda bw’ahola, byalinyorohere okumenya echintu nakaganira nabo chakabaheba omurhima. Banene mu bo baliri baderha oku abalwala barhazigana kubabaza chiro, ‘Myazi michi?’ Na banene baliri bambwira koko okubalagako. Chiro na baguma baliri bambwira ahabalamire, changwa banampa enimero zabo z’etelefone. Nalimenyere oku Yehova akantabere kulembera echola chibazo naligwerhe, aliko ntalimenyere oku nakapatire obusime bungana n’obw’ampaga!”​—Mez. 15:15.

12-13. Nka gurhe balwala baguma na bilema biguma bagalire kuhubiri, na malehe machi bapatire?

¹² Abalwala changwa ebilema bakayunva bavunikire omurhima bulala barhakachigala kuhubiri nk’oku basimire. Aliko banene bali babona gurhe bakahubiri bwinja. Omu États-Unis, mwali-werhu muguma oyirikirwe Laurel, amalaga myaka 37 omu mashini m’okumurhabala kuyisa! Alilwere n’akansere, balimuberere kanene, analilwere obulwala b’oluhu l’omubiri. Aliko chiro akaba oku aligwerhe bibazo bingana ahola, arhalekaga kuhubiri. Aliri ahubiri abanganga n’abantu baliri bayinja kumurhangula ahamwage. Byaba gurhe? Arhabala bantu 17 bamenye okuli kw’Ebiblia! *

¹³ Richard, mushamuka w’omu France, abwirire balala barhachirhenga ahambuga changwa abashaja emyazi minja. “Imbahanwire barhabulaga akaprezantware kageke k’okuheba kw’ebitabu. Hanola abantu bageraho, babibona n’okubaza eju yabyo. Okujira ntyo kwakarhabala bene-berhu na bali-berhu barhachigala kuja oku mahubiri ma nju oku nju.” Balala barhachirhenga ahambuga bakashuba kuhubiri kugerera amaruba changwa etelefone.

14. Mufano guhe gwinja Omwami Daudi arhulekere?

¹⁴ Hali mpanvu zinene zakarhuma rhurhapata engabane rhwalisimire omu kasi ka Yehova. Omufano, rhwakaba eyi rhushajire, rhugwerhe ebibazo by’amalwala, changwa ebindi-bindi bibazo. Akaba rhuli omu hali eli nk’eyola, omufano g’Omwami Daudi gwakarhuyigiriza. Amango bamubwiraga oku arhali yewayumbaka ehekalu lya Mungu, n’obola aliri alingiriza akola kasi na nyorha nene, arhabala bwenene omuntu Mungu achishogaga kuyumbaka eyola hekalu. Daudi analisholwere binene eju y’ogola mupango g’okuyumbaka ehekalu. Okuntu Daudi ajiraga, guli mufano gwinja rhukwanene kuyiga!​—2 Sa. 7:12, 13; 1 Ny. 29:1, 3-5.

15. Nka gurhe Hugues alihimire ehali y’okuvunika omurhima?

¹⁵ Eju y’ebibazo binene by’amagala,  mwene-werhu Hugues w’omu France, arhachigendereraga kuba mushamuka w’echibaga, arhakanachigalire kuyumangira makasi malebe mayorohere m’ahambuga. Ayandikire ntya: “Burhanzi naliyunvirhe nvunikire omurhima n’okuchibona wa busha. Aliko hayinja gera amango nahwanza kubona ok’okuleka kugayira ebintu ntakagala kukola kumperhere akamaro. Nahigirira okurhagenderera kuvunika omurhima. Nagenderera okulwisa, nk’oku Gideoni na balume 300 aliri nabo bajiraga, chiro akaba oku babaga baluhire!”—Amu. 8:4.

16. Bichi omufano gwa bamalayika gwakarhuyigiriza?

¹⁶ Bamalayika bimana bali mufano gwinja. Omufano, Yehova alirhangire kubaza ba malayika amawazo mabo oku bilolere okuntu bakarhebeka Omwami mubi Ahabu. Bamalaika banene balerha amawazo mabo aliko Mungu achishoga malayika muguma n’okumubwira oku amawazo mage magala kurhebeka oyola mwami. (1 Fa. 22:19-22) K’abandi bamalayika balivunikire omurhima nkabaga omu kuwaza ntya, ‘Bichi nachiyirhako okushuba derha amawazo mani?’ Ntacho chakarhuma rhwawaza ntyo. Kweri bamalayika baba berhohye na boshi banasima obukuze boshi bugendere Yehova.​—Amu. 13:16-18; Ufu. 19:10.

17. Bichi rhukwanene kujira nka rhwamavunika omurhima bulala rhurhagwerhe ngabane zilebe omu kasi ka Yehova?

¹⁷ Oyibuke ok’olukengo lukulu rhugwerhe kuli kubona oku rhuli bahamirizi ba Yehova n’oku rhunahubiri Obwami bwage. Rhwakahabwa engabane rhunashube rhuziheze, aliko arhali zezirhujira b’akamaro embere za Mungu. S’amango rhugwerhe olugero rhunali berhohye yi rhuba b’akamaro embere za Yehova n’embere za bene-berhu na bali-berhu. Bobola oheme Yehova akurhabale y’ogenderera kuba munya-lugero na mwirhohye. Owaze oku mifano ya bantu banene baliyerekene olugero n’obwirhohye eli omu Chinwa chage. Obe tayari kukolera bene-benyu mu buli njira yoshi wakagala.​—Zb. 138:6; 1 Pe. 5:5.

18-19. Gurhe wakapata obusime omu kasi kawe k’okuhubiri chiro n’amango abantu barhasimisizwe n’emyazi minja omu eneo yawe?

¹⁸ Wachigerere kuvunika omurhima bulala abantu barhali basimiswa n’emyazi minja omu eneo yawe changwa bulala bantu bageke bababonekana ahambuga si? Omu hali eli nk’eyola, bichi byakarhurhabala rhugenderere kugwarha obusime? Bintu biguma byakarhurhabala biyerekenwe omu chisanduku “Okuntu Wakakola Binene omu Kasi Kawe k’Okuhubiri.” Kandi  kuli kw’akamaro bwenene okugwarha amawazo menja eju y’akasi k’okuhubiri. K’okuderha gurhe okola?

¹⁹ Ogenderere kuchiseza omu kuhubiri ezino lya Mungu n’Obwami bwage. Yesu alifasiriye wazi oku bageke babakapatire enjira eyereze ewa kalamo. (Mt. 7:13, 14) Amango rhuli omu mahubiri, rhubarhugwerhe olukengo l’okukola haguma na Yehova, Yesu, na bamalayika. (Mt. 28:19, 20; 1 Ko. 3:9; Ufu. 14:6, 7) Yehova ali alonza abantu basimire kumukolera. (Yoh. 6:44) Bobola nk’omuntu arhasimisizwe n’oburhumwa bwerhu mu manola mango, hali oku nj’akayunviriza amango rhwashuba kumulambagirira.

20. Bichi olwandiko lwa Yeremia 20:8, 9 lurhuyigirize oku bilolere ehali y’okuvunika omurhima?

²⁰ Omufano g’omulebi Yeremia gwakarhuyigiriza binene. Alihabirwe engabane y’okukolera omu eneo abantu barhaliri bamuyunva. Abantu baliri bamudukanga n’okumukwama “olusiku loshi.” (Osome Yeremia 20:8, 9.) Av’avunika omurhima kuhika n’ahawazaga oku arhachigenderera kuhubiri. Aliko arhalekaga. Bulagurhe? “Echinwa cha Yehova” chaliri nka muliro guli gwakolera omu murhima gwa Yeremia, arhakanagalire kuguzimya! Nerhu rhwakachiyunva ntyo amango Echinwa cha Mungu chiyunjwire omu bwenge bwerhu n’omu murhima gwerhu. Rhwakaba kuguma na Yeremia amango rhuli rhwayiga Ebiblia buli lusiku n’okuwaza bwenene oku birhuli rhwayiga. Echola charhuma obusime bwerhu bwagenderera kuyushuka, rhwanagenderera kupata amalehe omu kasi kerhu k’okuhubiri.​—Yer. 15:16.

21. Bichi byarhurhabala rhugale kulwisa buli hali yoshi y’okuvuna omurhima?

²¹ Deborah rhwabaga rhwaganirireko embere, ashubire kuderha ntya: “Okuvunika omurhima eli ntwaro ekomere Shetani anakolesa.” Aliko Yehova Mungu ali munya-misi bwenene kulusha Shetani n’entwaro zage. Bobola olakirire Yehova akurhabale amango hali echintu chikuvunire omurhima. Akurhabala ogale kulwisa ehali yawe y’okurhashinganana n’obuzamba bwawe. Akurhabala amango olwere. Akurhabala ongenderere kugwarha amawazo makwirire oku bilolere engabane omu kasi ka Yehova. Ashuba kukurhabala ogwarhe amawazo menja eju y’akasi k’okuhubiri. Osalire Yisho w’obuzigire, onamubwire wazi okuntu oli wachiyunva. Kugerera oburhabale bwage, wagala kulwisa ehali y’okuvunika omurhima.