1. Was khent mit uns pasiire wën mer oone muut sin?

YEETE taach tuun mer propleeme mit leepe un fersuuche mer unser pestes mache fer mit tëne um keen. Awer, es is xweyer mit unser propleeme um keen wën mer oone muut sin, kël? Tan, prayche mer ti unmuutichkheet siin wii een xpitspuup woo khan unser sicherheet, koraaj un frooheet xteele. Provérbios 24:10 un ti noote saat: “Wëns tuu oone muut in te xweyere tsayte playpst, tayn kraft tuut weenich sin.” Tan, wën mer oone muut sin, khene mer uns xwach fine un tas lost es xweyer ti propleeme fom leepe aus hale.

2. Was khent uns oone muut lose, un was tuun mer in tiise artikel siin?

² Meyer khene oone muut wëre weeche fiile uersache. Tepay aan tiise uersache sin unser imperfektsyoone, xwacheete un krankheete. Orer, fiilaycht fine mer uns oone muut wayl mer hon net een priwilëj kriit woo mer teete kërn in Yeehoowa sayn aarwayt hon; orer, wayl mer preetiche mise in een plats woo ti meyerste layt tuun net unser pexeet kërn heere. In tiise artikel, tuun mer xpreche iwer welche tinge woo mer khene mache fer mit te unmuutichkheet um keen.

3. Was khan uns helfe wën mer uns traurich xpiire weeche unser imperfektsyoone?

³ Es is laycht fer uns uns traurich fine weeche unser imperfektsyoone un xwacheete. Tes weeche, fiilaycht tenke mer tas, weeche unser feeler, Yeehoowa tuut uns nii mools aan nëme in tëm sayn naye welt. Soo se tenke khan uns xaate mache. Wii sole mer unser imperfektsyoone aan siin? Ti Piipel tsaycht tas, wën mer net Yeesus tepay tseele, ‘al ti mënxe hon kesint’. (Rom. 3:23) Awer Yeehoowa — te Autoer fon te Piipel — tuut sich net traan hale aan unser feeler, orer waarte tas mer perfekt wëre.  Xtats tas, is eyer een liiplich Fater woo wil uns helfe. Eyer is aach ketultich. Tee wees tas, fer fiile fon uns, is es xweyer ti xwacheete iwerkhome un uns net traurich mit uns selepst fine. Un tee is fërtich fer uns helfe. (Rom. 7:18, 19)

4-5. Tëm noo 1 João 3:19, 20, was hot tswaay xwestere keholef keeche ti unmuutichkheet khëmpfe?

⁴ Kuk ti payxpiile fon Deborah un Maria. * Wii Deborah noch een khint waar, sayn familye hot se mit khee liip pehantelt un hot se kemacht sich traurich iwer sich selepst xpiire. Tii waar selte keloopt. Tes weeche, hot se een nekatiiw mënung iwer sich selepst ëntwikelt. Soo kaar wën se kleene feeler kemacht hat, hot se kexpiirt tas se niks richtich mache khent. Maria hat een eenlich propleem kehat. Sayn parente hon se niter kextelt. Tes weeche, hot se kexpiirt tas se kaar khee weyert hat. Un soo kaar noo tas se sich taafe kelos hot, hot se kemënt tas se net kuut kenuuch waar fer Yeehoowa sayn Tsayer sin!

⁵ Soo wii soo, tiise tswaay xwestere hon net noo kelos Yeehoowa tiine. Weeche was? Een uersach is tas se hon sayn last iwer Yeehoowa kexmis torich hërtsliche kepeete. (Sal. 55:22) Tii hon ferxtan tas unser liipliche himlixe Fater wees wii petrefe uns ti xlechte tinge woo mer hon friier mit kemacht un ti xlechte mënunge woo mer iwer uns selepst hon. Awer eyer siit tas kuutes in unser hërts — kwaliteete woo meyer selepst fiilaycht net siin. (Lees 1 João 3:19, 20.) *

6. Wii fiilaycht xtelt yemant sich aan, wën eyer noch mool een feeler macht woo eyer friier kemacht hat?

⁶ Fiilaycht is yemant am sich aan xtrenge fer noo lose was ferkheert is mache. Awer, im xtant, macht eyer noch mool te selwich feeler un tas lost tëm oone muut. Kewis, es is keweenlich uns xultich xpiire wën mer sinte. (2 Cor. 7:10) Awer mer sole net uns soo xultich xpiire tas mer tenke teete: ‘Ich hon kaar khee weyert! Yeehoowa khan mich nii net fertsaye!’ Soo was tenke xtaypt sich net uf te woerheet un khent uns noo lose mache Yeehoowa tiine. Eriner tich was in Provérbios 24:10 xteet — unser kraft tuut weenich sin wën mer oone muut plaype. Xtats tas, tuu ‘ti sache mit Yeehoowa in te ray tuun’ — peet tsu tëm un suuch sayn parmhërtslichkheet. (Isa. 1:18) Wën Yeehoowa siit tas tuu host tich hërtslich peroyt, tuut eyer tich fertsaye. Un noch, xprech mit te elteste. Tii tuun tich mit ketult helfe noch mool kaystlich xtark wëre. (Tia. 5:14, 15)

7. Warom sole mer net uns oone muut fine wën mer am khëmpfe sin fer tas richtiches mache?

 ⁷ Jean-Luc, een elteste in Frankraych, saat fer tii woo sin mit een xwacheet am khëmpfe: “Een kerechte persoon foer Yeehoowa sayn aue is net yemant woo nii mools feelt; awer yemant woo sich traurich xpiirt weeche sayn feeler un peroyt sich imer.” (Rom. 7:21-25) Tan, tenk net tas tuu kaar khee weyert host wëns tuu mit een xwacheet am khëmpfe pist. Wayl meyer al feeler mache, meyer al prayche Yeehoowa sayn unfertiint kuutheet, woo eyer uns kept torich tas fray khaaf opfer. (Efé. 1:7; 1 João 4:10)

8. Wën mer oone muut sin, weer khene mer suuche fer hilef kriin?

⁸ Meyer khene unser priiter un xwestere suuche fer uf kemuut wëre. Tii khene uns horiche wën mer fertseele prayche, un tii khene uns xeene wërter saan woo uns uf muute. (Pro. 12:25; 1 Tes. 5:14) Joy, een xwester in Nikeerya, woo keeche ti unmuutichkheet khëmpft, saat: “Woo teet ich sin wën ich net ti pruuterxaft hët? Mayn priiter un xwestere sin een pewaysung tas Yeehoowa tuut mayn kepeete antworte. Ich hon soo kaar mit tëne kelërnt wii tii woo traurich sin uf muute.” Awer mer sole uns erinere tas unser priiter un xwestere wise net imer wën mer prayche uf kemuut wëre. Tan, im xtant, thërfe mer te eyerste xrit kepe un een rayfe pruuter orer xwester suuche, un tëne saan tas mer hilef prayche.

9. Wii tuun ti Salmos 41:3 un 94:19 uns uf muute?

⁹ Suuch Yeehoowa fer unerxtitsung kriin. Wën mer uns net kuut fine un, hauptseechlich, wën mer fer een lang tsayt krank sin, fiilaycht fine mer es xweyer positiiw tenke. Opwool hayt, Yeehoowa tuut net een wuner mache fer uns heele, tuut eyer uns treeste un ti kraft woo mer prayche kepe fer tas aus hale. (Lees Salmo 41:3; * 94:19.) * Tsum payxpiil, fiilaycht tuut eyer unser priiter un xwestere uf rechne fer uns helfe etliche aarwayte tehëm mache, orer uns helfe wën mer prauche etwas khaafe. Eyer khan unser priiter uf rechne fer mit uns peete, orer khan eyer uns helfe xeene ketanke fon sayn Wort erinere, woo uns treeste khene — soo wii ti wunerlich hofnung fom perfekte leepe mit khee krankheet un phayn in te naye welt woo khomt. (Rom. 15:4)

10. Noo tas Isang een unfal mit kemacht hot, was hot tëm keholef net oone muut plaype?

¹⁰ Isang, woo in Nikeerya leept, khan sich net mee weekele weeche een unfal woo pasiirt is. Sayn tokter hot iim kesaat tas eyer teet nii mools noch mool laafe. Tee hot kesaat: “Mayn hërts waar ferproch un mayn kayst waar fertriikt.” Awer, is eyer wayter soo keplip? Nee. Was hot tëm keholef? Tee leet aus: “Ich un mayn fraa hon nii noo kelos tsu Yeehoowa peete un sayn Wort xtutiire. Meyer waare aach pextimt petanklich sin fer ti kuute tinge woo mer hate, too tepay unser hofnung fer in Kot sayn naye welt leepe.”

11. Wii hot Cindy frooheet kefun wii se krank waar?

¹¹ Cindy, woo in Mëksiko leept, hot raus kefun tas se een xroo krankheet hat, un tii khont soo kaar weeche tas xtërpe. Wii hot se tas kephakt? Torich sayn tratament, hot se een tsiil kextelt: yeete taach een mool tsaye kepe. Tii xraypt: “Tas hot mich keholef aan te anere tenke, xtats aan mayn operatsyoon, ti phayn woo ich hat, orer wii krank waar ich. Tas is was ich kemacht hon: wën ich mit te toktere un krankxwestere kexproch hon, hon ich iwer sayn familye kefroot. Tan, hon ich tëne kefroot warom hate se soo een xweyer aarwayt  raus kesuucht. Noo tas, waar es laycht se mërke was fer sache teete fiilaycht aan tëne sayn hërts krayfe. Fiile fon tëne hon kesaat tas ti pasyente tuun net eftas tëne frooe ‘Wii keets tich?’ Un fiile hon mich petankt wayl ich hon mich mit tëne kekhimert. Welche hon soo kaar sayn kontakt informatsyoone kep. Tan, torich tiise xweyer tsayt in mayn leepe, Yeehoowa hot mich een tiif frooheet kep, woo hot soo kaar mich ferwunert!” (Pro. 15:15)

12-13. Wii hon welche woo krank orer elter sin, es hin kriit in tëm preetich xafe? Un was fer waare ti resultaate?

¹² Tii woo krank orer elter sin, fiilaycht fine sich oone muut wayl tii khene net soo fiil in tëm preetich mache wii se kërn wolte. Soo wii soo, fiile tuun noch aate fine fer se preetiche. In te Fereenichte Xtaate fon Amërika, ti xwester Laurel is fer 37 yoer laye keplip trin een maxiin woo tëne keholef hot luft in tsiie. Tii hot aach kreeps, phaar operatsyoone un haut krankheete kephakt. Awer soo kaar mit tiise xrooe kefoere, hot se net noo kelos se preetiche. Tii hot kepreeticht fer ti krankxwestere un anere woo sin tsu sayn haus khom. Was fer waar te resultaat? Tii hot ferweenichs 17 layt keholef iwer Yeehoowa lërne! *

¹³ Richard, een elteste in Frankraych, kept een praktix aanung fer tii woo khene net ausm haus keen, orer woo in hayse fer alte woone: “Tii khene een kleene puplikatsyoon display hon. Wën ti layt tat torich keen, tuun se tas siin un too triwer frooe. Tas tuut unser liipe priiter un xwestere woo khene net mee haus tsu haus preetiche uf muute.” Tii woo khene net ausm haus keen, khene aach preetiche torich priife un telefoon.

14. Was fer xeene payxpiil hot te kheenich Tawi uns kelos?

¹⁴ Weeche fiile uersache, fiilaycht khene mer net een flicht kriin woo mer teete kërn in Yeehoowa sayn tiinst hon. Tsum payxpiil, fiilaycht sin mer tsu alt, orer hon mer kesunt propleeme, orer noch anere situatsyoone. Wën tas mit uns pasiirt, khene mer mit tëm kheenich Tawi sayn payxpiil lërne. Tawi wolt wërklich fiil een thempel fer Kot paue. Awer Yeehoowa hot yemant aneres raus kesuucht fer tas mache. Tawi hot sayn kans unerxtitsung kep fer tee woo tiise flicht kriit hat. Tee hot soo kaar fiil kolt un silwer fer ti paueray kep. Was fer een xeene payxpiil fer uns! (2 Sam. 7:12, 13; 1 Crô. 29:1, 3-5)

15. Wii hot Hugues ti unmuutichkheet iwerkhom?

¹⁵ Weeche kesunt propleeme, Hugues, een pruuter in Frankraych, hot noo kelos wii elteste tiine. Eyer khont soo kaar net mee keweenliche  tinge in sayn haus mache. Eyer xraypt: “Am aanfang, hon ich mich kans oone muut un unutslich kexpiirt. Awer, mit te tsayt, hon ich kesiin tas es wërklich wichtich waar fer mich noo lose traurich wëre weeche ti tinge woo ich khont net mee mache. Tan, hon ich frayt kefun aan was ich khont noch in Yeehoowa sayn tiinst mache. Ich sin pextimt net uf kepe. Soo wii Kiteoon un sayn 300 mëner — woo aarich miit waare — tuun ich wayter khëmpfe!” (Juí. 8:4)

16. Was khene mer mit te payxpiile fon te engele lërne?

¹⁶ Ti troye engele sin een xeene payxpiil. Torich tëm kheenich Akaap sayn rechiirung, Yeehoowa hot ti engele in kelaat fer aanunge kepe iwer wii tiise xlechte kheenich hinerkeen. Welche engele hon aanunge kep, awer Kot hot eene engel raus kesuucht un hot tëm kesaat tas sayn aanung teet richtich pariire. (1 Reis 22:19-22) Sin ti anere troye engele oone muut kep, fiilaycht am tenke: ‘Weeche was hon ich mayn tsayt ferloer fer een aanung kepe?’ Kewis net. Ti engele sin teemuutich un wole tas al ti eer tsu Yeehoowa keet. (Juí. 13:16-18; Apo. 19:10)

17. Was sole mer mache wën mer uns oone muut xpiire, wayl mer net welche flichte in Yeehoowa sayn tiinst hon?

¹⁷ Eriner tich tas ti kreeste eer woo mer hon, is Yeehoowa sayn Tsayer sin un iwer tas Raych preetiche. Ti flichte khome un keen. Awer sin net tii woo tsayche wii fiil weyert hon mer foer Yeehoowa. Wën mer teemuutich sin, tuun mer wërklich fiil weyert foer Yeehoowa un unser priiter un xwestere hon. Tan, hal tsu Yeehoowa aan tas eyer tich heleft teemuutich plaype. Tenk traan aan te fiile xeene payxpiile fon teemuut woo in sayn Wort xteen. Tuu tayn priiter wilich tiine in yeete aat wiis tuu khanst. (Sal. 138:6; 1 Ped. 5:5)

18-19. Wii khanst tuu frayt in tëm preetich fine, soo kaar wën siits aus tas in tayn teritooryum ti layt wole net heere?

¹⁸ Host tuu tich xon oone muut kexpiirt wayl es siit aus tas ti layt in tayn teritooryum wole net ti kuute oter heere, orer wayl weeniche tehëm sin? In soo een situatsyoon, was khan tich helfe tayn frooheet hale orer ferkreese? In te khaste  “Wii kreeser frayt in tëm preetich hon”, khanst tuu kuute aanunge fine. Es is aach wichtich ti preetich aarwayt in te richtich aat siin. Was wil tas saan?

¹⁹ Hal tich traan aan Kot sayn naame un Raych pekhant mache. Yeesus hot taytlich kesaat tas weeniche teete tëm weech fom leepe fine. (Mat. 7:13, 14) Wën mer in tëm preetich sin,  hon mer ti eer fer mit Yeehoowa, Yeesus un ti engele xafe. (Mat. 28:19, 20; 1 Cor. 3:9; Apo. 14:6, 7) Yeehoowa is am layt suuche woo wole tëm tiine. (João 6:44) Tan, wën een persoon wil net unser pexeet yets heere, fiilaycht heert eyer uns tas neekste mool woo mer mit tëm xpreche.

20. Was khan Jeremias 20:8, 9 uns in lërne iwer keeche ti unmuutichkheet khëmpfe?

²⁰ Meyer khene fiil lërne mit tëm profeet Yeeremias sayn payxpiil. Tee praucht in een plats preetiche woo ti layt wolte tëm net heere. Ti layt hon tëm “te kanse taach” kexënt un kexpot. (Lees Jeremias 20:8, 9.) * Een mool, is eyer soo oone muut keplip, tas eyer wolt uf kepe. Awer eyer hot net. Weeche was net? Wayl “Yeehoowa sayn wërter” waare wii een fayer in Yeeremias kewees, un eyer khont tas net pehale. Meyer khene soo wii tëm sin, wën mer unser ketanke un hërts mit Kot sayn Wort file. Was fer een kuut uersach fer ti Piipel yeete taach xtutiire un aan tëne triwer noo tenke! Was tuut tan pasiire? Meyer tuun kreeser frayt in tëm preetich hon un noch mee layt tuun fiilaycht uns heere. (Jer. 15:16)

21. Wii khene mer ti khampf keeche ti unmuutichkheet kewine?

²¹ Deborah, iwer weem mer kraat kexproch hon, saat: “Satanaas penutst ti unmuutichkheet wii een mechtich waf keeche uns.” Awer Yeehoowa Kot is fiil mechticher wii Satanaas un ale sayn wafe. Tan, wëns tuu tich oone muut finst, ekaal ti uersach, hal tsu Yeehoowa aan tas eyer tich unerxtitst. Eyer tuut tich helfe mit tayn imperfektsyoone un xwacheete um keen un tich unerxtitse wëns tuu krank pist. Eyer tuut tich helfe ti flichte in te kemaynt in te richtich aat siin. Un eyer heleft tich aach een positiiw mënung iwer tas preetich hon. Un noch, mach tayn hërts fer tayn himlixe Fater uf. Mit tëm sayn hilef, khanst tuu ti khampf keeche ti unmuutichkheet kewine!