1. Nama ulih nyadi enti kitai berasai asa?

NINTING hari kitai napi penanggul lalu enggau naka ulih betan napi nya. Tang kekadang tusah deka mutarka penanggul kitai enti kitai berasai asa ati. Nya alai, kitai patut ingat asai asa ati ulih ngasuh kitai berasai nadai guna sereta tusah ati. Jaku Dalam 24:10, Salin Dunya Baru madah: “Enti nuan lemi lebuh nuan dituntung penusah, pengering nuan deka lenyau.” Au, asa ati ulih ngasuh kitai lemi nyentukka kitai tusah deka betan napi penanggul.

2. Nama ulih ngasuh kitai asa ati, lalu nama deka dipejuraika ba artikel tu?

² Kitai engka berasai asa ati ketegal penyalah ke digaga, pengelemi diri tauka enda bepengerai. Nambahka nya, kitai engka berasai asa lebuh enda nerima tanggung pengawa ba eklisia tauka lebuh orang ba endur alai kitai nginjil enda nerima pesan ke dibai. Ba artikel tu, kitai deka bejuraika sekeda utai ke ulih digaga kena mutar asai asa ati.

3. Nama ulih nulung kitai ngembuan runding ti patut lebuh kitai ngereja penyalah?

³ Endang senang kitai ngembuan runding ti enda betul pasal pengelemi diri tauka penyalah ke digaga. Asil iya, kitai engka ngumbai Jehovah enggai nerima kitai ngagai dunya baru. Runding ke baka tu ulih ngemediska kitai. Nama runding ti patut lebuh kitai ngereja penyalah? Bup Kudus madahka, kelimpah ari Jesus Kristus, semua mensia “bela udah bedosa.” (Rom. 3:23) Tang Jehovah enda betatika penyalah kitai tauka ngarapka kitai enda ngereja penyalah.  Iya baka Apai ke deka nulung kitai. Iya mega sabar enggau kitai. Iya nemu kitai bebendar deka ngelaban pengelemi diri sereta ngembuan runding ti betul pasal diri empu. Nya alai, Iya sedia deka nulung kitai.—Rom. 7:18, 19.

4-5. Sejalai enggau 1 John 3:19, 20, nama kebuah dua iku menyadi Kristian ulih ngelaban asai asa ati?

⁴ Peratika utai ke nyadi ngagai Deborah enggau Maria. * Lebuh iya agi mit, Deborah suah dikemaluka diri sebilik. Sida jarang muji iya. Ketegal nya, iya bisi runding ti enda manah pasal diri empu. Indah lebuh iya ngereja penyalah ti mit, iya ngasaika diri amat enda beguna. Maria mega napi penanggul ti sama. Kaban belayan iya suah ngemaluka iya. Asil iya, Maria berasai enda beguna. Indah pengudah iya dibaptisa, iya ngumbai diri enda layak nyadi seiku ari Saksi-Saksi Jehovah!

⁵ Taja pia, dua iku menyadi Kristian tu enda ngetu nyembah Jehovah. Nama kebuah? Laban seduai iya nyerahka penusah sida ngagai Jehovah nengah sampi. (Mas. 55:22) Seduai iya nyau sedar, Apai kitai Jehovah nemu utai jai ke kala nyadi ba kitai ulih ngasuh kitai ngembuan runding ti enda manah pasal diri empu. Tang Iya mega meda kualiti manah ba kitai, ke enda dipeda kitai empu.—Bacha 1 John 3:19, 20.

6. Nama engka nyadi enti seseiku orang ngulang penyalah ke kala digaga iya?

⁶ Seiku orang engka enggau naka ulih deka badu ngereja penyalah. Tang iya engka ulih ngereja penyalah ti sama bekali-kali, lalu tu ulih ngasuh iya asa ati. Endang amat, kitai patut berasai besalah lebuh ngereja dosa. (2 Kor. 7:10) Taja pia, kitai enggai kelalu nyalahka diri nyentukka kitai berunding: ‘Aku nadai guna! Jehovah enggai ngampunka aku.’ Runding ke baka tu enda betul, lalu ulih ngasuh kitai badu nyembah Jehovah. Kingatka utai ke dibacha kitai ba Jaku Dalam 24:10—pengering kitai deka lenyau ketegal asa ati. Nya alai, kitai patut mutarka pekara tu enggau Jehovah nengah sampi, lalu minta Iya ngampunka kitai. (Isa. 1:18) Lebuh Jehovah meda nuan amat nesal ati lalu deka ngaga ubah, Iya tentu deka ngampun nuan. Kelimpah ari nya, nuan mega ulih minta bantu ari bala tuai gempuru. Sida deka nulung nuan ngaduka kaul enggau Jehovah baru.—Jas. 5:14, 15.

7. Nama kebuah kitai enda patut berasai asa enti kitai tusah deka ngereja utai ti ngena?

 ⁷ Ku seiku tuai gempuru ke benama Jean-Luc ari Perancis meransang sida ke ngelaban pengelemi diri: “Orang ke lurus ba mata Jehovah ukai orang ke enda kala ngereja penyalah. Tang iya nesal ati lebuh ngereja penyalah lalu seruran nguji ngaga ubah.” (Rom. 7:21-25) Nya alai, enti nuan tusah deka mutarka pengelemi diri, anang meh ngumbai diri nadai guna. Semua kitai ngereja penyalah, lalu begunaka pengasih Jehovah ke diberi Iya nengah tebus Anak Iya.—Eps. 1:7; 1 Jhn. 4:10.

8. Lebuh kitai berasai tusah ati, sapa ke ulih digiga kitai?

⁸ Kitai ulih ngiga bala menyadi Kristian kena bulih jaku peransang. Sida ulih mendingka kitai lebuh kitai bisi pengirau ati sereta meri jaku peransang kena ngelantangka ati kitai. (J-lam. 12:25; 1 Tes. 5:14) Joy, seiku menyadi indu ari Nigeria bisi berasai tusah ati. Iya madah: “Enti ukai ketegal bala menyadi Kristian, aku engka tusah deka betan. Tang Jehovah ngena sida nyaut sampi aku. Aku mega belajar ari sida chara meransang orang bukai ke bisi tusah ati.” Kingatka, bala menyadi kitai engka enda nemu ni maya kitai begunaka peransang. Nya alai, kitai patut ngiga sida lalu madahka pasal penanggul ke ditapi kitai.

9. Baka ni Masmur 41:3 enggau 94:19 meransang kitai?

⁹ Bepanggai ba Jehovah. Lebuh kitai berasai sakit, kelebih agi enti kitai napi penyakit raya, kitai engka tusah deka berunding enggau manah. Taja pan Jehovah enda ngeraika kitai diatu, tang Iya ulih ngelantangka kitai sereta meri pengering ke diguna ngambika ulih betan. (Bacha Masmur 41:3; 94:19.) Ambika chunto, Iya engka meransang bala menyadi Kristian datai nulung kitai lebuh kitai begunaka bantu ngereja pengawa ba rumah tauka bebelika barang. Iya mega engka meransang sida besampi enggau kitai, tauka Iya ulih nulung kitai ingat ayat Bup Kudus ke ulih meransang kitai. Ambika chunto, pengidup ti nadai agi sakit sereta pemedis ba dunya baru.—Rom. 15:4.

10. Nama kebuah Isang ulih mutarka asai tusah ati pengudah iya bakal?

¹⁰ Isang, ke diau ba Nigeria, bisi bakal lalu lutur madahka iya nadai ulih bejalai agi. “Aku berasai amat tusah ati sereta nadai agi pengadang,” ku Isang. Tang kati iya terus berasai baka nya? Enda! Nama nulung iya? Ku Isang: “Aku enggau bini aku enda ngetu besampi ngagai Jehovah lalu belajarka Bup Kudus. Kami duai beterima kasih enggau utai manah ti dikemisi kami, nyengkaum pengadang diau ba dunya baru.”

11. Baka ni Cindy tetap gaga ati taja pan iya balat sakit?

¹¹ Cindy, ke diau ba menua Mexico, bisi penyakit raya ke ulih nganu nyawa iya. Nama nulung iya? Lebuh iya berubat ba sepital, iya ngembuan juluk ati deka nginjil ninting hari. Ku iya: “Lebuh aku ngereja nya, aku enda berundingka pemedis ke diasai. Tu meh utai ke digaga aku: Lebuh aku berandau enggau bala lutur tauka misi, aku betanyaka pasal diri sebilik sida. Udah nya aku nanya, nama kebuah sida milih pengawa ti tusah tu. Enggau nya, senang aku milih topik ke ulih negu ati sida. Sekeda ari sida madah, jarang bisi pesakit ti ibuhka sida. Lalu mayuh ari sida madahka terima kasih, indah meri lumur telefon tauka alamat sida. Taja pan aku nemu Jehovah tentu deka nulung aku betan napi penanggul tu,  tang aku enda nyangka Iya meri aku pengaga ati ti besai baka tu!”—J-lam. 15:15.

12-13. Baka ni menyadi ke sakit tauka ke udah tuai ulih terus nginjil, lalu nama asil iya?

¹² Sida ke sakit tauka ke udah tuai engka berasai asa ati laban sida enda ulih ngereja mayuh ba pengawa nginjil. Tang mayuh ari sida ngiga chara bukai ngambika ulih mujur ba pengawa nginjil. Ba Amerika Serikat, seiku menyadi indu ke benama Laurel patut gali ba dalam mesin pengelama 37 taun ngambika iya ulih enseput! Iya mega bisi kanser, beputung bekali-kali sereta bisi penyakit kulit. Taja pia, iya enda ngetu nginjil. Iya nginjil ngagai bala misi tauka orang ke datai ngagai rumah iya. Nama asil iya? Iya ulih nulung 17 iku orang nerima pemendar! *

¹³ Richard, seiku tuai gempuru ba Perancis, madahka utai ke ulih digaga menyadi ke enda ulih ninggalka rumah tauka ke diau ba rumah orang tuai. “Sida ulih nyimpan sekeda litaricha ba endur ke senang dipeda orang. Lebuh orang mansa, sida engka betanyaka pasal litaricha kitai. Chara tu ulih meransang bala menyadi kitai ke enda ulih nginjil ari rumah ke rumah.” Sida ke enda ulih ninggalka rumah mega ulih nulis surat tauka nginjil ngena telefon.

14. Baka ni Raja David nyadi teladan ti manah ke kitai?

¹⁴ Bisi mayuh kebuah kitai enda nerima pengawa ti dikerinduka kitai. Ambika chunto, kitai engka udah tuai, enda bepengerai tauka ketegal kebuah bukai. Kitai ulih belajar ari teladan Raja David. Iya amat deka nirika rumah sembiang Jehovah. Tang lebuh Jehovah milih orang bukai ngereja pengawa nya, David nyukung orang ke dipilih Jehovah. Iya meri emas enggau pirak ti mayuh kena nirika Rumah Sembiang nya. Endaka David teladan ti manah ke kitai?—2 Sam. 7:12, 13; 1 Ban. 29:1, 3-5.

15. Baka ni Hugues mutarka asai asa ati iya?

¹⁵ Hugues, seiku menyadi ba Perancis, ngetu nyadi tuai gempuru ketegal enda bepengerai. Iya indah enda ulih ngereja pengawa ti mudah ba rumah. Ku iya: “Terubah, aku berasai amat nadai guna sereta asa ati. Tang nyau kelama, aku nyau sedar aku enda patut ngenang utai ke enda ulih  digaga aku. Lebuh aku ngereja utai ke ulih aku, nya baru aku ulih gaga ati nyembah Jehovah. Baka Gideon enggau tiga ratus iku soldadu iya, aku mega enggai ngalahka diri taja pan lelak!”—P-ulu. 8:4.

16. Nama ulih dipelajar kitai ari teladan bala melikat?

¹⁶ Kitai ulih belajar ari teladan bala melikat ti tetap ati. Bisi sekali, Jehovah nanya bala melikat chara deka nipu Raja Ahap. Mayuh ari sida meri penemu sida. Tang Jehovah milih seiku melikat lalu madahka pelan iya deka mujur. (1 Raj. 22:19-22) Kati melikat ke bukai berasai asa lalu berunding, ‘Enti pia, nama kebuah aku kiruh deh?’ Tentu enda! Sida amat baruh ati lalu deka semua mulia diberi ngagai Jehovah.—P-ulu. 13:16-18; Pem. 19:10.

17. Nama patut digaga kitai enti kitai berasai asa ketegal enda nerima pengawa ti dikedekaka kitai?

¹⁷ Kingatka, kitai bisi basa ti besai nyadi Saksi-Saksi Jehovah sereta nusui pasal Perintah Iya. Pengawa kitai ulih berubah. Tang ukai nya ke ngasuh kitai berega ba mata Jehovah. Lebuh kitai baruh ati, nya baru kitai dikumbai berega ba mata Jehovah enggau bala menyadi Kristian kitai. Nya alai, minta meh Jehovah nulung nuan mengkang baruh ati. Titihka teladan manah nembiak Jehovah ti baruh ati ba Bup Kudus. Lalu nulung bala menyadi enggau nama chara ke ulih nuan.—Mas. 138:6; 1 Pet. 5:5.

18-19. Baka ni nuan ulih gaga ati ba pengawa nginjil lebuh orang ba endur alai kitai nginjil enggai nerima berita manah?

¹⁸ Kala nuan kekadang berasai enda diperansang ketegal orang ba endur alai nuan nginjil enggai nerima berita manah tauka tusah deka betemu enggau orang ba rumah? Enti ya, baka ni kitai ulih mengkang gaga ati? Peda sekeda chara ke disedia ba kutak “ Ngemanahka Agi Chara Nginjil Nuan.” Taja pia, kitai mega patut ngembuan runding ti betul pasal pengawa nginjil. Nama reti nya?

¹⁹ Kingatka, kebuah kitai nginjil iya nya madahka nama Jehovah sereta Perintah Iya. Jesus madahka semina mimit aja orang deka nitihka iya. (Mat. 7:13, 14) Lebuh kitai nginjil, kitai bekereja enggau Jehovah, Jesus sereta bala melikat. (Mat. 28:19, 20; 1 Kor. 3:9; Pem. 14:6, 7) Jehovah ngiga  orang ke amat deka nyembah Iya. (Jhn. 6:44) Nya alai, enti orang nya enggai ninga pesan maya tu, iya engka deka ninga ba maya bukai.

20. Nama utai ke dipelajar kitai ari Jeremiah 20:8, 9 pasal mutarka asai asa ati?

²⁰ Kitai ulih belajar ari nabi Jeremiah. Orang ba endur alai iya nginjil enggai ninga pesan ke dibai iya. Iya “seruran” dikemelika sereta dipechat sida. (Bacha Jeremiah 20:8, 9.) Bisi sekali iya berasai amat asa ati nyentukka deka badu nginjil. Tang iya enda ngereja nya. Nama kebuah? Laban pesan Jehovah “mau baka api” dalam ati iya, lalu iya enda ulih nagang diri ari madahka pesan nya. Kitai ulih nunda Jeremiah enti kitai macha Bup Kudus ninting hari lalu belematika nya. Asil iya, pengaga ati kitai deka majak nambah, lalu kitai deka bulih asil ti manah ba pengawa nginjil.—Jer. 15:16.

21. Baka ni kitai ulih ngelaban asai asa ati?

²¹ Ku Deborah ke disebut sebedau tu, “Sitan ngena asai asa ati nyadika senyata ngambika kitai berasai lemi.” Tang Jehovah jauh bekuasa agi ari Sitan. Enti nuan berasai asa ati, minta meh tulung ari Jehovah. Iya deka nulung nuan mutarka pengelemi diri sereta penyalah ke udah digaga nuan. Iya mega deka nyukung nuan lebuh nuan sakit, lalu nulung nuan ngembuan runding ti betul pasal pengawa ke diterima sereta pengawa nginjil. Nya alai, besampi meh ngagai Jehovah lalu bantaika asai ati nuan ngagai Iya. Enggau tulung Iya, nuan ulih menang ngelaban asai asa ati!