1. Anni i efekto nittam na pakkafi na nono?

KANAYUN ittam nga makkaproblema anna mawag tu attammattam yatun. Ngem marigatan ittam nga magattam nu makafi i nono tam. Ngatta? Matageno tam gare nga awan tu sesserbi tam anna ari ittam nga magayayya. Kagian na Proverbio 24:10 anna ta footnote-na: “Nu nakkafi i nono mu ta tiempo na problema, bumaddi noka i sikammu.” Nu makkafi i nono tam, mofu i sikattam anna marigatan ittam nga magattam.

2. Anni ira i mamakkafi ta nono tam, anna anni i gigiammuattam taw nga artikulo?

² Nadduruma i mamakkafi ta nono tam. Kasali tatun i liwi-liwa ira nga nakua tam, pakkafiattam ira, anna taka-taki. Makkafi gapa i nono tam nu ariattam nga nalawa i kayà tam nga pribilehio ta passerbi kani Jehova onu nu mallayyagayya ittam ta teritoria nga magaru i totolay nga manaki nga magginna ta mensahe tam. Taw nga artikulo, gigiammuattam i karuan ta makua tam tapenu malabanan i pakkafi na nono.

3. Anni nakuan i nonopattam nu nakaliwa ittam tapus madiddismaya ittam ta baggi tam?

³ Awayyana nga madismaya ittam megafu ta nakaliwatattam ira anna ta pakkafiattam. Baka manono tam nga ari ngana ittam mepangngo nga maddian ta paraiso nga nepromesa ni Jehova. Ngem delikadu yatun nga appana-panono. Anni gafu i makasta nga nonopattam nu nakaliwa ittam? Kagian na Biblia nga “ngamin i totolay ay nattagaruli,” fuera kani Jesus. (Roma 3:23) Ngem ari nga maffokus si Jehova ta nakaliwatattam ira anna arianna gapa ekspektan nga mabbalin ittam tu perfekto. Kayàna lallagu ittam nga uffunan anna pasa-pasensianna ittam megafu ta yayya i minaggiddu nga Yama tam. Ammuna nu  marigi-rigatan ittam nga labanan i pakkafiattam anna nu madismaya ittam ta baggi tam. Sigga-paran gapa yayya nga manguffun nittam.​—Roma 7:18, 19.

4-5. Base ta 1 Juan 3:19, 20, kunnasi nga nalabanan na dua nga sister i pakkafi na nono?

⁴ Innattam i ekspiriensa ni Deborah anna Maria. * Ta kabbing ni Deborah, kanayun yayya pasa-pasiranan na familiana anna sinaggi-mittadda laman yayya nga komendan. Megafu tatun, nabbalin tu negatibo i pagimammana ta baggina. Nu makkamali laman yayya tu baddi, matagenona nga awan tu sesserbina. Kunnatun gapa i naekspiriensa ni Maria. Kanayun gapa yayya nga pasiranan na parientesna. Megafu tatun, matagenona nga awan tu sesserbina. Maski nu nabawtisowan ngana yayya, manonona lagapa nga ari yayya mepangngo nga magalan tu Saksi ni Jehova.

⁵ Ngem ari nga nagimmang nga masserbi kani Jehova danaw nga dua nga sister. Ngatta? Megafu ta nipammakataloda i vuru-vurudda kani Jehova gukaban na napafutuan nga pakimallo. (Sal. 55:22) Nalippawada gabbalaman nga ammu na minaggiddu nga Yama tam ta langi i nappasa ira nga ekspiriensa tam anna nu kunnasi nga afektan danatun i pagimamma tam ta baggi tam. Masingi-singanna gapa i mapia ira nga ugali tam nga nu mittan, ariattam mismu masingan ta baggi tam.​—Bibbigan i 1 Juan 3:19, 20.

6. Anni i efektona ta tadday nu nakuana mangana i dati nga nakaliwatanna?

⁶ Awayyana nga laba-labanan na tadday i marake nga annangngua nga neyugalianna. Nu makuana mangana uli yatun, makkafi i nonona. Gagangay laman nga makonsensia ittam nu makaliwa ittam. (2 Cor. 7:10) Ngem ari nakuan nga sossobra i pakkadismaya tam ta baggi tam adde ta punto nga manono tam yaw: ‘Awan tu sesserbì anna ari ngà ngana vuluvuga mapakoma ni Jehova.’ Ari tu kurug yatun nga negatibo nga appana-panono anna pagimmangan ittam natun ta passerbi tam kani Jehova. Ari kari nga kagian na Proverbio 24:10 nga bumaddi i sikattam nu makkafi i nono tam? Yayya nga ‘itunummu i ganna-gannug ta nallatanannu’ ni Jehova gukaban na pappakimallo nisa anna pakkiddaw tu pamakomana. (Isa. 1:18) Nu masingan ni Jehova i napafutuan nga pabbabawim, pakoman naka. Mappoffukka gapa ta mapasensia ira nga elder tapenu makkasta uli i espiritualidad mu.​—Sant. 5:14, 15.

7. Ngatta ari nakuan makkafi i nono tam nu marigatan ittam nga labanan i pakkafiattam?

⁷ Kunnaw i kagian na tadday nga elder ta France nga si Jean-Luc turi ira ta  laba-labanadda i pakkafiadda: “Para kani Jehova, i matunung nga tolay ay yuri i makkiddaw tu pamakoma ta naliwatanna anna kanayun nga mabbabawi, ari tu i tadday nga arianna vuluvuga makaliwa.” (Roma 7:21-25) Nu egga laba-labanammu nga pakkafian, ariammu nonopan nga awan tu sesserbim. Daddammammu nga makaliwa ittam ngamin yayya nga mawag tam i ari nga maguku-gukug nga inaggallallo na Dios nga iyawana nittam gukaban na tavvu.​—Efe. 1:7; 1 Juan 4:10.

8. Nu egga i problema tam, sinni i mamasikan ta nono tam?

⁸ Mapasikan na wawwaragi ta kongregasion i nono tam! Nu egga i problema tam anna kayà tam nga egga i pakkagianattam tatun, magginna i wawwaragi anna makeyawa ira tu makapagaram ira nga uvovug nga mamasikan ta nono tam. (Prov. 12:25; 1 Tes. 5:14) Nilabanan ni Sister Joy nga taga-Nigeria i pakkafi na nono. Kunnaw i kagianna: “Pia ngana laman ta egga i wawwaragì ta kongregasion. Megafu tannira, ammù nga tattabbagan ni Jehova i pakimallo ku ira. Nagigiammù paga lagu nira nu kunnasi gapa nga pasikannan i tanakuan nga nakkafi i nonoda.” Ngem ari insigida nga mammuan na wawwaragi tam nga kawagattam i pamasikan ta nono. Yayya nga sittam nakuan i magollu nga umaranni ta manakam ta espiritual nga wagi tam tapenu meyistoria tam nisa i problema tam anna moffunanna ittam.

9. Ngatta makapasikan ta nono i Salmo 41:3 anna 94:19?

⁹ Mappoffukka kani Jehova. Nu mataki ka anna nu nabayag mu ngana nga attattamman yatun, baka negatibo ngana i nononopammu. Ngem maski nu ari ittam nga milagro nga pammapian ni Jehova sangawe, banna-bannayan anna pasikannanna ittam tapenu makapagattam ittam. (Bibbigan i Salmo 41:3; 94:19.) Awayya nga paguyuan ni Jehova i wawwaragi tam tapenu uffunadda ittam nga kuan i mawag ira nga matrabahu ta balay onu uffunadda ittam nga maggatang tu pakawagattam. Puedena gapa ira nga paguyuan tapenu makimallo kavulu tam. Ipanono gapa nittam ni Jehova i makapabannay nga teksto ira ta Biblia gitta na i iddanama tam nga perfekto nga inango ta paraiso nu sitaw awan ngana noka i mataki anna maddaga-raging.​—Roma 15:4.

10. Kunnasi nassikan i nono ni Isang maski nu naaksidente yayya?

¹⁰ Nabbalin tu paralisadu si Brother Isang nga taga-Nigeria turi ta naaksidente yayya. Kinagi na doktor nga ari ngana yayya vuluvuga makalakag. Yayya nga kunnaw i kinagi ni Isang: “Nakkafi i nono ku anna nawanan ngà tu iddanama.” Ngem nassikan gabbalaman i nonona. Kunnasi? Kunna: “Ari kami vuluvuga nagimmang na atawà nga makimallo kani Jehova anna kanayun nga gigiammuammi i Uvovugna. Nakafokus kami gapa ta napakaru nga bendisiommi anna ta iddanamami nga mattolay ta paraiso.”

11. Ngatta magayayya lagapa si Cindy maski nu grabe i takina?

¹¹ Kinagi na doktor kani Sister Cindy nga taga-Mexico nga egga i takina nga awayyana nga ipatay. Anni i kingnguana tapenu marubanna yatun? Durante nga mapporu yayya, nikagumanna nga layyagayyan i tanakuan kadaggaw. Kunnaw i niturana: “Nakoffun nio yatun tapenu nakafokus ngà ta tanakuan imbes nga agga-nono ku i operasiokku, i taki nga mataga-tageno ku, onu i paddaddam ku. Kunnaw i kukukuakku: Kada kibbidakku i doktor onu nars ira, kumustakku i familiada, tapus iyavu ku nu ngatta nikayada i kunnatun nga mariga nga trabahu. Gafu tatun, mammuakku  ngana nu anni nga topiko i makapa-interes nira. Aru i makkagi nio nga bihira laman ta pasiente ira i makkiavu nira tu ‘Kumusta kamu?’ Yayya nga aru i nappabalo nio megafu tatun nga pangikavurukku nira. Niyawa paga lagu na karuan i adres onu i cellphone number-da. Ammù nga uffunannà ni Jehova nga attamman yaw nga situasiokku. Ngem ari ngà makapangurug nga magayayya ngà lagapa maski kunnaw i situasiokku!”​—Prov. 15:15.

12-13. Kunnasi lagapa nga nakapallayyagayya danuri mataki onu makafi ngana, anna anni i resulta natun?

¹² Makkafi gapa i nono danuri mataki onu makafi ngana megafu ta limitadu ngana laman i makuada ta ministerio. Ngem aru lagapa tannira i nakaleg tu tiansa tapenu makapallayyagayya. Tadday tatun si Sister Laurel nga taga-United States. Agga-idda yayya ta unag na iron lung machine ta 37 nga dagun tapenu laman makenango. Nak-cancer gapa yayya, namippiga nga naoperan, anna aru gapa i taki na tabbina. Ngem maski nu kunnatun kagrabe i situasionna, awan tu nakefugag nisa. Nilayyagayyanna lagapa danuri nars anna manangngaw nisa nga umay ta balena. Megafu tatun, noffunanna i 17 nga totolay tapenu maggigiammu tu Biblia! *

¹³ Egga i suhestion ni Richard nga tadday nga elder ta France para ta ari ngana nga maka-ali ta baleda onu egga ta nursing home. Kunna: “Makasta nu egga i displey na libru anna magazina ira nga masingan na totolay. Tapus nu matalebagadda yatun, mala i atensiodda anna makkiavu ira. Megafu tatun, mapasikan i nono na meddu nga wawwaragi nga ari ngana makapallayyagayya ta babalay.” Awayyada gapa i mallayyagayya gukaban na letter writing anna telephone witnessing.

14. Anni i magigiammu tam kani Patul David?

¹⁴ Nadduruma i rason nu ngatta ariattam malawa i tadday nga pribilehio ta passerbi ta kongregasion onu ta sirkito. Awayyana tu bako onu lakay ittam ngana, mataki ittam, onu ari nga ipamavulun na sirkumstansia tam. Nu kunnatun, makagigiammu ittam kani Patul David. Kakayàna nga ipataddag i templo na Dios. Ngem turi ta nekagi nisa nga ari tu yayya i napili tapenu kuan yatun, sinuportanna lagapa i pinili na Dios para tatun nga pribilehio. Vuka-palag paga lagu nga nangiyawa si David tu napakaru nga vulawan anna pira para tatun nga proyekto. Parigattam nakuan i ehemplona!​—2 Sam. 7:12, 13; 1 Cro. 29:1, 3-5.

15. Kunnasi nga nalabanan ni Hugues i pakkafi na nono?

¹⁵ Nagimmang nga masserbi bilang elder si Brother Hugues nga taga-France megafu ta  takina. Arianna ngana gapa makua maski i alappaw nga trabahu ta baleda. Niturana: “Natageno ku bi nga awan tu sesserbì anna nakkafi i nono ku. Dismayadu ngà ta aru ngana i kakku makua. Ngem maski nu kunnaw ngana i situasiokku, magayayya ngà lagapa nga masserbi kani Jehova. Kuakku lagapa i adde na mawayyà. Kagitta ni Gideon anna i 300 nga suddaluna, itulu-tuloy ku gapa i pakillabakku maski nu nababbannag ngà!”​—Uk. 8:4.

16. Anni i magigiammu tam ta anghel ira?

¹⁶ Makasta nga parigan i matalo nga anghel ira. Angngariganna, turi ta niyavu ni Jehova nira nu kunnasi melogo i marake nga patul nga si Ahab, aru nga anghel i nakkagi tu suhestiodda. Ngem tadday laman nga anghel i pinili na Dios anna kinagina tu mavviktoria yatun. (1 Pat. 22:19-22) Nakkafi kari i nono na karuan nga matalo nga anghel? Ninonoda kari nga kakenga laman i tiempoda nga nannono tu suhestion? Siempre ari! Mapakalinno i anghel ira anna ikayada nga si Jehova laman i medayaw.​—Uk. 13:16-18; Nep. 19:10.

17. Anni i kuattam nu nakkafi i nono tam megafu ta ariattam nala i kayà tam nga pribilehio?

¹⁷ Daddamman nga i pabbalin tu Saksi ni Jehova anna pangilayyagayya ta Pappatulan i kadakallan nga pribilehio tam. Nu karuan, makalawa ittam tu pribilehio anna posible gapa nga mawawattam yatun. Ngem ari tu danatun i rason nu ngatta iddukan ittam na Dios. I kurug, iddukan ittam ni Jehova anna na wawwaragi tam nu mapakalinno ittam. Yayya nga ikiddom kani Jehova nga uffunan naka nga mattalupaddian nga mapakalinno. Pannonopammu gapa tu mapia i makasta ira nga ammarigan ta Biblia danuri na mapakalinno. Sigga-paran nga passerbiammu i wawwaragim adde ta mawayyam.​—Sal. 138:6; 1 Ped. 5:5.

18-19. Kunnasi ka nga magayayya ta ministeriom maski nu manaki nga magginna na totolay?

¹⁸ Nakkafi kari ngana i nono mu megafu ta manaki na totolay nga magginna ta mensahe tam onu ariammu ira madanganan ta baleda? Anni i kuammu tapenu magayayya ka lagapa? Makoffun i suhestion ira ta kahon nga “ Kunnasi Ka nga Mas Magayayya ta Ministeriom?” Importante gapa nga fustu i pagimamma mu ta ministerio. Anni i kayà kagian natun?

¹⁹ Mallayyagayya ittam megafu ta kayà tam nga ipakannammu ta totolay i ngagan na Dios anna i Pappatulanna. Kinagi ni Jesus nga  pilippiga laman i makaleg ta dalan mappange ta inango. (Mat. 7:13, 14) Pribilehio tam nga makipattrabahu kani Jehova, kani Jesus, anna ta anghel ira nu mallayyagayya ittam. (Mat. 28:19, 20; 1 Cor. 3:9; Nep. 14:6, 7) Alegan ni Jehova i totolay nga kayàda i masserbi nisa. (Juan 6:44) Maski nu ari nga ginnan na tolay i mensahe tam sangawe, baka magginna yayya sonu tumunug nga pakibbida tam nisa.

20. Kunnasi nga makoffun i Jeremias 20:8, 9 tapenu malabanattam i pakkafi na nono?

²⁰ Aru i magigiammu tam kani profeta Jeremias. Zinog yayya ni Jehova ta teritoria nu sitaw ari nga maggigginna i totolay. “Interu aggaw” yayya nga ininsulto anna kukkulletan na totolay. (Bibbigan i Jeremias 20:8, 9.) Megafu tatun, nakkafi i nono ni Jeremias anna kayàna ngana i magimmang ta pallayyagayya. Ngem arianna nga kingngua yatun. Ngatta? Gittana afi gare i “uvovug ni Jehova” ta unag ni Jeremias anna arianna ngana nga mafugu-fugaddan yatun! Maparigattam gapa si Jeremias nu inaggaw ittam nga mabbibbig tu Biblia anna pannonopattam tu mapia i mabibbig tam. Nu kunnatun i kuattam, mas magayayya ittam ta ministerio anna mas aru nga totolay i magginna nittam.​—Jer. 15:16.

21. Kunnasi tam nga labanan i maski anni nga mamakkafi ta nono tam?

²¹ “Kurug tu masiki-sikan nga armas ni Satanas i pamakkafi ta nono,” kagian ni Deborah nga nakagi ta gafu. Ngem ararayyu nga mas masikan si Jehova anne kani Satanas anna ta ngamin nga armasna. Yayya nga maski anni paga i mamakkafi ta nono mu, ipakimemallo mu nga uffunan naka ni Jehova. Uffunan naka nu marigatakka megafu ta pakkamaliammu ira anna nu laba-labanammu i pakkafiammu ira. Uffunan naka gapa nu egga i taki mu anna nu ariammu nga malawa i kayà mu nga pribilehio ta passerbi. Uffunan naka gapa tapenu ari ka nga mannegatibo ta ministeriom. Makasta nu ivuvvu mu i futum ta Yamam ta langi. Ta uffunna, malabanammu i pakkafi na nono.