1. Ania ti mapasamak no maupaytayo?

INALDAW a maipaspasangotayo kadagiti problema ken ar-aramidentayo ti amin a kabaelantayo a mangsango kadagita. Ngem saan kadi a nalaklaka a sanguen dagiti problema no saantayo a maup-upay? Masapul ngarud nga ibilangtayo ti pannakaupay kas mannanakaw a mangikkat iti panagtalek, tured, ken rag-otayo. Kuna ti Proverbio 24:10 ken ti footnote: “No maupayka iti tiempo ti riribuk, agkurangto ti pigsam.” Wen, ti pannakaupay ibusenna ti pigsa a kasapulantayo a mangibtur kadagiti problematayo.

2. Ania dagiti rason a mabalin a maupaytayo, ken ania ti usigentayo iti daytoy nga artikulo?

² Adu ti mabalin a pakaupayantayo, a kas ti kinaimperpektotayo, dagiti pagkapuyantayo, ken panagsakittayo. Mabalin met a maupaytayo no saantayo a maawat ti tartarigagayantayo a pribilehio iti panagserbitayo ken Jehova, wenno kasla saan a nabunga ti teritoriatayo. Iti daytoy nga artikulo, usigentayo ti dadduma a mabalintayo nga aramiden tapno malabanantayo ti pannakaupay.

3. Ania ti makatulong no masurontayo iti bagitayo ken kadagiti pagkamkamaliantayo?

³ Nalaka laeng a masurontayo iti bagitayo gapu iti kinaimperpekto ken kadagiti pagkapuyantayo. Kas resultana, mabalin nga ipagaruptayo a gapu kadagiti pagkamkamaliantayo, dinatayon awaten ni Jehova iti baro a lubong. Delikado dayta a panagpampanunot. Kasano koma ti panangmatmattayo iti kinaimperpektotayo? Ibaga ti Biblia a malaksid ken Jesu-Kristo, amin a tattao “nagbasolda.” (Roma 3:23) Ngem ti Autor ti  Biblia ket saan nga agbirbirok iti kamali wenno perpeksionista. Imbes ketdi, isu ket naayat nga Ama ken kayatnatayo a tulongan. Naanus met. Makitkitana ti panagreggettayo a manglaban kadagiti pagkapuyantayo ken iti negatibo a panangkitatayo iti bagitayo, isu a nakasagana a tumulong.—Roma 7:18, 19.

4-5. Kasano a nakatulong ti 1 Juan 3:19, 20 iti dua a kakabsat a babbai tapno malabananda ti pannakaupay?

⁴ Kitaentayo ti ulidan da Deborah ken Maria. * Idi ubing pay ni Deborah, masansan a mapabpabainan. Manmano a makomendaran isu a negatibo ti panagkitana iti bagina. No agkamali la bassit, panagriknana a kamali aminen nga aramidenna. Kasta met laeng ti problema ni Maria. Pabpabainan dagiti kabagianna. Gapu iti dayta, panagriknana, awan serserbina. Uray idi nabautisaranen, panagriknana ket saan a maikari nga agbalin a Saksi ni Jehova!

⁵ Ngem saan a simmardeng a nagserbi ken Jehova dagitoy a kakabsat. Apay? Gapu ta impalladawda ken Jehova dagiti dadagsenda babaen ti napasnek a panagkararag. (Sal. 55:22) Nabigbigda nga ammo ti nadungngo a nailangitan nga Amatayo nga apektadotayo kadagiti napalabas a kapadasantayo ken iti negatibo a panagpampanunottayo. Ngem makitkitana met ti nasayaat iti pusotayo—dagiti kualidad a mabalin a saantayo a mismo a makitkita.—Basaen ti 1 Juan 3:19, 20.

6. Ania ti mabalin nga aramiden ti maysa no maulitna ti kamalina?

⁶ Mabalin nga ikagkagumaan ti maysa nga isardeng ti saan nga umiso nga ar-aramidenna, ngem mabalin a maaramidna manen dayta ket maupay. Siempre, natural laeng a makonsiensiatayo no makabasoltayo. (2 Cor. 7:10) Nupay kasta, saan koma a sobra ti pannakakonsiensiatayo nga uray la panunotentayon nga awan serserbitayo ken saannatayon a mapakawan ni Jehova. Di umiso dayta a pagarup ket mabalin pay ketdi a dayta ti makagapu a sumardengtayon nga agserbi ken Jehova. Laglagipentayo ti mabasa iti Proverbio 24:10—kurangto ti pigsatayo no maupaytayo. ‘Makilinnawagtayo’ ngarud ken Jehova babaen ti kararag ken panagpakaasi a pakawanennatayo. (Isa. 1:18) Pakawanennaka no makitana a talaga nga agbabbabawika. Umasidegka met kadagiti panglakayen. Siaanus a tulongandaka a bumangon manen iti naespirituan.—Sant. 5:14, 15.

7. Apay a saantayo koma a maupay no marigatantayo a mangaramid iti umiso?

⁷ Ti maysa a panglakayen a ni Jean-Luc a taga-France kinunana maipapan kadagidiay  marigrigatan a manglaban iti pagkapuyanda: “Ti nalinteg a tao iti imatang ni Jehova ket saan a daydiay di pulos agkamali no di ket daydiay pagladladingitanna dagiti kamalina ken ikagkagumaanna ti agbalbaliw.” (Roma 7:21-25) Isu a dimo panunoten nga awanen serserbim no ikagkagumaam a labanan ti maysa a pagkapuyam. Laglagipem nga awan kadatayo ti makapagtakder a nalinteg iti imatang ti Dios. Kasapulantayo amin ti nagpaiduma a kinaimbag ti Dios babaen ti subbot.—Efe. 1:7; 1 Juan 4:10.

8. Pagpatulongantayo no maup-upaytayo?

⁸ Mapabilegdatayo dagiti kakabsat iti kongregasion! Denggendatayo no kayattayo ti makisarita ket maparagsak ken maparegtadatayo. (Prov. 12:25; 1 Tes. 5:14) Kuna ni Joy a maysa a kabsat idiay Nigeria a manglablaban iti pannakaupay: “Ania ngatan ti kasasaadko no awan dagiti kakabsat? Dagiti kapammatiak ti ebidensia a sungsungbatan ni Jehova dagiti kararagko. Nasursurok pay ketdi kadakuada no kasano ti mangparegta kadagiti maup-upay.” Ngem masapul a laglagipentayo a mabalin a saan a kanayon nga ammo dagiti kakabsat no kaano a kasapulantayo ti pammaregta. Isu a masapul a datayo ti umuna nga umasideg iti nataengan a kapammatian ket ibagatayo a kasapulantayo ti tulong.

9. Kasano a maparegtanatayo ti Salmo 41:3 ken 94:19?

⁹ Agpatulongtayo ken Jehova. No agsakittayo, ken nangnangruna no nakaro ken nabayagen dayta, mabalin a marigatantayo nga agpanunot iti positibo. Nupay saannatayo a simimilagro nga agasan ni Jehova ita, liwliwaen ken pabilgennatayo tapno makapagibturtayo. (Basaen ti Salmo 41:3; 94:19.) Kas pagarigan, mabalin a tignayenna dagiti padatayo a Kristiano a tumulong kadatayo kadagiti trabaho iti balay wenno makitienda. Mabalin a tignayenna dagiti kakabsat a makipagkararag kadatayo. Wenno mabalin nga ipalagipna kadatayo dagiti makaliwliwa a mensahe iti Saona, a kas iti nagsayaat a namnama nga agbiagtayton a perpekto ken saantayton nga agsakit ken makarikna iti ut-ot iti um-umayen a baro a lubong.—Roma 15:4.

10. Ania ti nakatulong ken Isang tapno saan nga agtultuloy a maupay idi naaksidente?

¹⁰ Ni Isang a taga-Nigeria ket naaksidente isu a naparalisado ti bagina. Imbaga ti doktorna a saanton a pulos a makapagna. “Nasaktan ti pusok ken nadudog ti espirituk,” kinunana. Ngem nagtultuloy kadi a kasta? Saan! Ania ti nakatulong ken Isang? “Saankami a simmardeng ken baketko a nagkarkararag ken Jehova ken nangadal iti Saona. Determinadokami met a mangbilang kadagiti bendision a naawatmi a pakairamanan ti namnamami nga agbiag iti baro a lubong ti Dios.”

11. Kasano a nakapagtalinaed a naragsak ni Cindy uray grabe ti sakitna?

¹¹ Ni Cindy a taga-Mexico ket nadayagnos nga adda grabe a sakitna. Kasano a nakapagibtur? No mapan agpaagas iti ospital, kalatna ti mangasaba iti kada aldaw. Insuratna: “Idi inaramidko dayta, nakapagpokusak iti sabsabali imbes nga iti pannakaoperak, iti ut-ot a marikriknak, wenno iti sakitko. Kastoy ti inaramidko: No umay dagiti doktor wenno nars, komustaek dagiti pamiliada. Kalpasanna, damagek no apay a pinilida dayta a narigat a trabaho. Ammok no kuan dagiti topiko a paginteresanda. Adda dagiti nangibaga a manmano kano ti pasiente a kas kaniak a mangkomusta kadakuada. Isu nga adu ti nagyaman kaniak gapu iti pannakaseknanko.  Adda pay ketdi ti nangted kadagiti adres wenno numero ti teleponoda. Isu a bayat daytoy a narigat a kasasaad iti biagko, inikkannak ni Jehova iti kasta unay a ragsak!”—Prov. 15:15.

12-13. Kasano a nakapangasaba ti dadduma a masakit wenno lallakay ken babbaketen, ken ania dagiti resultana?

¹² Mabalin a maupay dagiti masakit wenno lallakay ken babbaketen gapu ta limitadon ti maaramidanda iti ministerio. Ngem makapangasaba latta ti adu kadakuada. Idiay United States, ti kabsat nga agnagan Laurel ket naikabil iti iron lung (respirator a tumulong iti panaganges ti pasiente) iti 37 a tawen! Inibturanna ti kanser, dadakkel nga operasion, ken nakaro a sakit ti kudil. Ngem iti laksid dagitoy a nakaro a problemana, saan a simmardeng. Kinasabaanna dagiti nars ken dagiti paraaywan a nangasikaso kenkuana idiay balayda. Ti resulta? Natulonganna ti 17 a tattao a maaddaan iti umiso a pannakaammo maipapan iti Biblia! *

¹³ Adda praktikal a suhestion ni Richard a panglakayen idiay France kadagidiay saanen a makapanaw iti balayda wenno kadagiti adda iti nursing facility. “Adda koma bassit a pagidispleyanda kadagiti publikasiontayo. No makita dayta dagiti lumabas a tattao, aginteresda ket mairugi ti saritaan. Dayta ti mangparegta kadagiti kakabsattayo a saanen a makapagbalaybalay.” Dagidiay saanen a makapanaw iti balayda ket makapangasaba met babaen ti surat wenno telepono.

14. Ania ti nagsayaat nga inyulidan ni Ari David?

¹⁴ Gapu iti edad, salun-at, wenno dadduma pay a rason, mabalin a saantayo a makualipikar nga umawat iti maysa nga asaynment wenno pribilehio iti kongregasion wenno sirkito. No kasta ti kasasaadtayo, makasursurotayo iti ulidan ni Ari David. Kayatna la unay nga ibangon ti templo ti Dios ngem naibaga kenkuana a saan nga isu ti napili iti dayta a proyekto. Ngem naan-anay a sinuportaranna daydiay pinili ti Dios a mangaramid iti dayta. Sipaparabur pay ketdi a nagkontribusion iti dayta a proyekto. Nagsayaat a tuladentayo!—2 Sam. 7:12, 13; 1 Cron. 29:1, 3-5.

15. Kasano a nalabanan ni Hugues ti pannakaupay?

¹⁵ Ti maysa a kabsat idiay France a ni Hugues ket nagsardeng kas panglakayen idi nagsakit. Dina payen maasikaso uray dagiti babassit a trabaho idiay balayda. Insuratna: “Idi damo, nariknak nga awan serserbik isu a permi a naupayak. Ngem idi agangay, nakitak ti kinapateg ti panangakseptar kadagiti limitasionko, ket nariknak ti rag-o nga agserbi  ken Jehova iti laksid dagita. Determinadoak a di sumuko. Kas ken Gideon ken ti 300 a tattaona—nga aminda ket nabannog idi—itultuloyko met ti makilaban!”—Uk. 8:4.

16. Ania ti masursurotayo iti ulidan dagiti anghel?

¹⁶ Nagsayaat nga ulidan dagiti matalek nga anghel. Bayat ti panagturay ni Ari Ahab, kiniddaw ni Jehova kadagiti anghel a mangtedda iti suhestion no kasano a maallilaw ti dakes nga ari. Adda dagiti anghel a nangted iti suhestion. Ngem nangpili ti Dios iti maysa nga anghel ket imbagana nga agballigi ti suhestionna. (1 Ar. 22:19-22) Naupay kadi ti dadduma a matalek nga anghel, a mabalin a pinanunotda, ‘Sayang la ti suhestionko!’ Siempre, saan. Talaga a napakumbaba dagiti anghel ken kayatda nga ipaay ken Jehova ti amin a dayaw.—Uk. 13:16-18; Apoc. 19:10.

17. Ania ti masapul nga aramidentayo no maupaytayo gapu ta saantayo a naawat ti maysa a pribilehio?

¹⁷ Sipapanunottayo iti pribilehiotayo a mangawit iti nagan ti Dios ken mangikasaba iti Pagarianna. Mabalin a makaawattayo iti pribilehio wenno mapukawtayo dayta. Ngem saan a dayta ti mamagbalin kadatayo a napateg iti Dios. No naemma ken napakumbabatayo, ipategnatayo ni Jehova ken dagiti kakabsattayo. Isu nga ipakaasim a tulongannaka ni Jehova nga agtalinaed a naemma ken napakumbaba. Panunotem ti adu a nagsayaat nga ulidan dagiti naemma ken napakumbaba a tattao a naisurat iti Saona. Situtulok nga agserbika kadagiti kakabsat iti aniaman a pamay-an a kabaelam.—Sal. 138:6; 1 Ped. 5:5.

18-19. Kasano a naragsakka latta iti ministeriom uray no kasla saan a nabunga ti teritoriayo?

¹⁸ Napadasam kadin ti naupay gapu ta kasla saan a nabunga ti teritoriayo wenno manmano ti madanonmo iti balayda? Iti kasta a situasion, ania ti maaramidam tapno naragsakka latta wenno manayonan ti rag-om? Dadduma a praktikal a suhestion ket makitam iti kahon a “ Tapno Naragragsak ti Ministeriom.” Napateg met nga umiso ti panangmatmatmo iti ministeriom. Ania ti karaman iti dayta?

¹⁹ Agpokuska iti panangipakaammom iti nagan ti Dios ken iti Pagarian. Nalawag nga imbaga ni Jesus a manmano ti makasarak iti dalan ti biag. (Mat. 7:13, 14) No addatayo iti ministerio, pribilehiotayo ti makipagtrabaho ken Jehova, ken Jesus, ken kadagiti anghel. (Mat. 28:19, 20; 1 Cor. 3:9; Apoc. 14: 6, 7) Birbiroken ni Jehova dagidiay mayat nga agserbi kenkuana. (Juan 6:44) Isu a no ti maysa a tao ket saan nga interesado ita iti mensahetayo, mabalin a dumngegto inton sumaruno.

20. Ania ti isuro ti Jeremias 20:8, 9 maipapan iti pananglaban iti pannakaupay?

²⁰ Adu ti masursurotayo ken propeta Jeremias. Naibaon iti nakarigrigat a teritoria. “Agmalmalem” nga inin-insulto ken inuy-uyaw dagiti tattao. (Basaen ti Jeremias 20:8, 9.) Kasta la unay ti pannakaupayna nga uray la kayatnan ti sumuko. Ngem saan a simmuko. Apay? “Ti sao ni Jehova” ket kasla apuy iti uneg ni Jeremias, ket saanna a kabaelan nga ibturan! Kastatayo met no punnuentayo ti panunot ken pusotayo iti Sao ti Dios. Dayta ti maysa a rason nga adalentayo nga inaldaw ti Biblia ken utobentayo dayta. Kas resultana, agtultuloytayo a naragsak ken nabungbunga ti ministeriotayo.—Jer. 15:16.

21. Kasano a maabakmo ti pannakaupay, aniaman ti makagapu iti dayta?

²¹ “Us-usaren ni Satanas ti pannakaupay kas nabileg nga armas kontra kadatayo,” kinuna ni Deborah a nadakamat itay. Ngem awan ti agballigi nga armas ni Satanas maibusor ken Jehova a Dios. Isu a no adda aniaman a pakaupayam, ikararagmo ken Jehova a suportarannaka. Tulongannaka a manglaban iti kinaimperpektom ken kadagiti pagkapuyam. Suportarannaka no masakitka. Tulongannaka a maaddaan iti balanse a panangmatmat kadagiti pribilehio iti organisasion. Tulongannaka met nga agbalin a positibo iti ministeriom. Kasta met, iyebkasmo ti amin a pakaseknam iti nailangitan nga Amam. Iti tulongna, mangabakka iti laban kontra iti pannakaupay.