52-زەرتتەۋ ماقالاسى
ەڭسەنى باسقان مۇڭمەن كۇرەسىڭىز
«بار اۋىرتپالىعىڭدى ەحوباعا ارت، ول سەنى دەمەيدى» (ٴزاب. 55:22).
33-ٵن ۋايىمىڭدى ەحوباعا ارت
اڭداتپا *
1. ۇنجىرعامىز تۇسكەندە بىزبەن نە بولۋى مۇمكىن؟
ٴبىز ٵر كۇنى قيىندىقتارعا كەزىگەمىز جانە ولاردى شەشۋگە بارىمىزدى سالامىز. ٴبىراق كەلىسەتىن شىعارسىز، ۇنجىرعامىز تۇسكەندە، قيىندىقتاردى ەڭسەرۋ الدەقايدا قيىنداپ كەتەدى. سوندىقتان ٴبىز ەڭسەمىزدى باسقان مۇڭمەن كۇرەسۋىمىز كەرەك. ايتپەسە ول ٴبىزدى قۋانىشتان جانە ٶز-وزىمىزگە دەگەن سەنىمدىلىكتەن ايىرۋى مۇمكىن. ناقىل سوزدەر 24:10 دا: «قيىن شاقتا ساعىڭ سىنسا، كۇش-جىگەرىڭ تاۋسىلار»،— دەلىنگەن. ٴيا، ەڭسەنىڭ تۇسكەنى قيىندىقتارمەن كۇرەسۋگە جۇمسايتىن كۇشىمىزدى دە سارقىپ الۋى مۇمكىن.
2. ۇنجىرعانىڭ تۇسۋىنە نە سەبەپ بولۋى مۇمكىن جانە بۇل ماقالادا ٴبىز نە قاراستىرامىز؟
2 ۇنجىرعانىڭ تۇسۋىنە كوپ نارسە سەبەپ بولۋى مۇمكىن. مىسالى، ٶزىمىز جايلى جاعىمسىز ويلار، جاساپ قويعان قاتەلىكتەرىمىز، دەنساۋلىقتىڭ جوقتىعى. سونداي-اق ٶزىمىز قالاعان قىزمەتتى اتقارماعاندا، اۋماعىمىزداعى ادامدار شىندىققا قۇلاق اسپاعاندا ۇنجىرعامىز ٴتۇسىپ جاتادى. بۇل ماقالادا ٴبىز ەڭسەمىزدى باسقان مۇڭمەن كۇرەسۋگە كومەكتەسەتىن كيەلى كىتاپتاعى كەيبىر ويلاردى قاراستىرامىز.
ٶزىمىز جايلى جاعىمسىز ويلار مەن قاتەلىكتەرىمىز
3. ٶزىمىز جايلى جاعىمسىز ويلاردىڭ جانە قاتەلىكتەرىمىزدىڭ كەسىرىنەن ۇنجىرعامىز تۇسكەندە، بىزگە نە كومەكتەسەدى؟
3 سانامىزدى ٶزىمىز جايلى جامان ويلار مەڭدەگەندە جانە قاتەلىك جاساپ قويعاندا، ٴبىز تەز-اق مۇڭعا باتىپ كەتەمىز. سونداي كەزدەرى «ەحوبا مەنىڭ جۇماقتا بولعانىمدى قالامايدى» دەگەن ويعا كەلۋىمىز مۇمكىن. بۇلاي ويلاۋ وتە قاۋىپتى. ٴبىز ٶزىمىزدىڭ قاتەلىكتەرىمىزگە قالاي قاراۋىمىز كەرەك؟ كيەلى كىتاپتا بارلىق ادامنىڭ «كۇنا جاسايتىنى» ايتىلعان (ريم. 3:23). ٴبىراق ەحوبا — بويىمىزدان ۇنەمى كەمشىلىك ىزدەيتىن، بىزدەن مىنسىزدىكتى تالاپ ەتەتىن قۇداي ەمەس. قايتا، ول — بىزگە كومەكتەسكىسى كەلەتىن كوكتەگى ٴسۇيۋشى اكەمىز. ول وتە شىدامدى. ەحوبا بىزگە دۇرىس نارسەنى ىستەۋدىڭ، ٶزىمىز جايلى جاعىمسىز ويلارعا بەرىلمەۋدىڭ قانشالىقتى قيىن ەكەنىن كورىپ ٴجۇر. ول بىزگە ٵردايىم كومەكتەسۋگە دايىن (ريم. 7:18، 19).
ەحوبا ٴبىزدىڭ بۇرىن ىستەگەن جانە قازىر ىستەپ جاتقان يگى ىستەرىمىزدى جاقسى بىلەدى (5-ابزاستى قاراڭىز) *
4، 5. جوحاننىڭ 1-حاتى 3:19، 20 نى ەسكەرسەك، ەكى ايەل باۋىرلاسىمىزعا ەڭسەلەرىن باسقان مۇڭمەن كۇرەسۋگە نە كومەكتەستى؟
4 دەبورا مەن ماريا * ەسىمدى باۋىرلاستاردىڭ وقيعاسىن الايىق. دەبورا بالا كەزىندە كوپ قورلىق كورگەن، ماقتاۋ سوزدەردى دە وتە سيرەك ەستىگەن. سوندىقتان ەسەيگەن كەزدە، ول ٶزى جايلى وتە تومەن ويدا بولعان. ٴتىپتى بولماشى قاتەلىك جاساپ قويعان كەزدە دە، ول مەنىڭ قولىمنان تۇك كەلمەيدى دەپ ويلاعان. ماريانىڭ دا جاعدايى وسىعان ۇقساس. ول تۋىستارىنان كوپ ٴجابىر كورگەن. سونىڭ كەسىرىنەن ول ٶزىن تۇككە تۇرعىسىز سەزىنىپ كەتكەن. ال شىندىققا كەلگەن كەزدە، ول ٴتىپتى ٶزىن قۇدايدىڭ ەسىمىن الىپ جۇرۋگە لايىقسىز سەزىنگەن.
5 الايدا بۇل ەكى ايەل باۋىرلاسىمىز ەحوباعا قىزمەت ەتۋدى دوعارعان جوق. نەلىكتەن؟ ونىڭ ٴبىر سەبەبى — ولار ىستىق دۇعا ەتىپ، «بار اۋىرتپالىقتارىن ەحوباعا ارتتى» (ٴزاب. 55:22). ولار مىنا ٴبىر شىندىقتى ٴتۇسىنىپ، قابىلداي ٴبىلدى: كوكتەگى ٴسۇيۋشى اكەمىز وتكەن ٶمىرىمىزدىڭ، جاعىمسىز ويلارىمىزدىڭ بىزگە قالاي اسەر ەتەتىنىن وتە جاقسى بىلەدى. ەحوبا بويىمىزداعى جاقسى قاسيەتتەردى، ٴتىپتى ٶزىمىز بايقاي بەرمەيتىن قاسيەتتەردى دە كورەدى (جوحاننىڭ 1-حاتى 3:19، 20 وقىڭىز).
6. جامان ادەتىن قايتالاپ قويعان ادام نە سەزىنەدى؟
6 بويىنا ٴسىڭىپ قالعان ادەتىمەن كۇرەسىپ جۇرگەن ادام سول ادەتىن قايتالاپ قويسا، قاتتى كوڭىلى ٴتۇسۋى مۇمكىن. ارينە، كۇنا جاساپ قويعاندا كوڭىلىمىزدىڭ ٴتۇسۋى كادىمگى نارسە (قور. 2-ح. 7:10). الايدا ٶزىمىزدى شەكتەن تىس ايىپتاپ، «مەنەن تۇك شىقپايدى، ەحوبا مەنى ەشقاشان كەشىرمەيدى» دەپ ويلاماۋىمىز كەرەك. بۇنداي ويلار شىندىققا جاناسپايدى، ٵرى ەحوباعا قىزمەت ەتۋدى دوعارۋىمىزعا اكەپ سوعۋى مۇمكىن. ناقىل سوزدەر 24:10 دا ايتىلعانداي، ۇنجىرعامىز تۇسكەندە، كۇشىمىز تاۋسىلاتىنىن ۇمىتپاڭىز. «ماسەلەنى ورتاعا سالىپ»، دۇعا ەتىڭىز جانە ەحوبانىڭ كەشىرىمىن ىزدەڭىز (يشايا 1:18). ول شىن وكىنگەنىڭىزدى كورگەندە، ٴسىزدى كەشىرەدى. سونداي-اق اقساقالداردان كومەك ىزدەڭىز، ولار سىزگە قايتادان رۋحاني نىعايۋعا شىداممەن كومەكتەسەدى (جاق. 5:14، 15).
7. دۇرىس نارسەنى ىستەۋ قيىن بولىپ جاتسا، نەگە كوڭىلىمىز تۇسپەۋ كەرەك؟
7 فرانسيادا تۇراتىن جان-ليۋك ەسىمدى اقساقال السىزدىكتەرىمەن كۇرەسىپ جۇرگەن باۋىرلاستارعا بىلاي دەيدى ەكەن: «ەحوبانىڭ كوز الدىنداعى ٵدىل ادام دەگەن ەشقاشان قاتەلىك جاسامايتىن ادامدى ەمەس، جاساعان قاتەلىكتەرىنە وكىنىپ، بارىنشا وزگەرۋگە تىرىساتىن ادامدى بىلدىرەدى» (ريم. 7:21—25). قانداي دا ٴبىر السىزدىكپەن كۇرەسىپ جۇرگەن بولساڭىز، ٶزىڭىزدى تۇككە تۇرعىسىز سەزىنىپ جۇرمەڭىز. ەشقايسىسىمىز قۇدايدىڭ الدىندا ٶز كۇشىمىزبەن ٵدىل بولا المايتىنىمىزدى ۇمىتپاڭىز. ٴبارىمىز دە قۇدايدىڭ تولەم ارقىلى تانىتاتىن راقىمىنا مۇقتاجبىز (ەفەس. 1:7؛ جوح. 1-ح. 4:10).
8. ەڭسەمىز تۇسكەندە كىمنەن كومەك ىزدەسەك بولادى؟
8 باۋىرلاستارىمىزدان — رۋحاني وتباسىمىزدان — جىگەر ىزدەيىك! قاجەت كەزدە ولار بىزگە تىڭدايتىن قۇلاق بولىپ، جىگەرلى سوزدەرىمەن جۇرەگىمىزدى شاتتىققا تولتىرا الادى (ناق. س. 12:25؛ سال. 1-ح. 5:14). نيگەرياداعى دجوي دەگەن ايەل باۋىرلاس ٴبىر كەزدەرى ۇنجىرعاسى ٴتۇسىپ، قاتتى قينالعان. ول بىلاي دەيدى: «باۋىرلاستارىم بولماعاندا مەن نە ىستەر ەدىم؟ باۋىرلاستاردىڭ ارقاسىندا ەحوبا مەنىڭ دۇعالارىما جاۋاپ بەرەتىنىنە كوزىم جەتتى. مەن ٴتىپتى ولاردان كوڭىلى قۇلازىعان جاندى قالاي جىگەرلەندىرۋگە بولاتىنىن ۇيرەندىم». الايدا مىنانى دا ۇمىتپايىق: باۋىرلاستارىمىز جىگەرگە مۇقتاج ەكەنىمىزدى ٵردايىم بىلە بەرمەۋى مۇمكىن. سوندىقتان كەيدە رۋحاني تولىسقان باۋىرلاسقا ٶزىمىز بارىپ، كومەككە مۇقتاج ەكەنىمىزدى اشىق ايتۋىمىز كەرەك بولادى.
دەنساۋلىعىمىز ناشار بولعاندا
9. ٴزابۇر 41:3 پەن 94:19 داعى سوزدەر ٴبىزدى قالاي جىگەرلەندىرەدى؟
9 ەحوبادان قولداۋ ىزدەڭىز. ٶزىمىزدى ناشار سەزىنگەندە، اسىرەسە سوزىلمالى اۋرۋعا شالدىققاندا، بىزگە وڭ كوزقاراس ساقتاۋ قيىن بولىپ جاتادى. قازىرگى ۋاقىتتا ەحوبا اۋرۋىمىزدان كەرەمەت تۇردە ساۋىقتىرماسا دا، ول ٴبىزدى جۇباتىپ، تاباندىلىق تانىتۋىمىزعا قاجەتتى كۇش بەرەدى (ٴزابۇر 41:3؛ 94:19 وقىڭىز). مىسالى، ٷي تىرلىكتەرىن جاساۋعا، كەرەك-جاراقتارىمىزدى ساتىپ الۋعا شامامىز كەلمەي جاتسا، ول باۋىرلاستاردىڭ جۇرەگىنە قوزعاۋ سالىپ، بىزگە كومەككە جىبەرۋى مۇمكىن. سونداي-اق باۋىرلاستارىمىزدى بىزبەن بىرگە دۇعا ەتۋگە تالپىندىرۋى مۇمكىن. كەيدە ول ٶزىنىڭ سوزىندەگى جۇبانىش بەرەتىن ويلاردى، مىسالى جاڭا دۇنيەدە ەش اۋرۋ-سىرقاۋسىز ٶمىر سۇرەمىز دەگەن عاجاپ ٷمىتىمىزدى، ەسىمىزگە سالادى (ريم. 15:4).
10. يسان باۋىرلاسقا وقىس وقيعادان كەيىن ەڭسەسىن كوتەرۋگە نە كومەكتەستى؟
10 نيگەريادا تۇراتىن يسان ەسىمدى ەر باۋىرلاس ٴبىر وقىس جاعدايعا ۇشىراعان. دارىگەر وعان بۇدان بىلاي ەشقاشان جۇرە المايتىنىن ايتقان. «سوندا مەن رۋحىم كۇيرەپ، ابدەن ٴتۇڭىلىپ كەتتىم»،— دەيدى ول. ٴبىراق ول ەڭسەسىن كوتەرە الدى. وعان نە كومەكتەستى؟ ول بىلاي دەيدى: «ايەلىم ەكەۋمىز ەحوباعا دۇعا ەتۋدى، ونىڭ ٴسوزىن زەرتتەۋدى ەش دوعارعان ەمەسپىز. سونداي-اق ٴبىز كورىپ جۇرگەن باتالارىمىزدى ساناپ ٴجۇرۋدى ۇيعاردىق. سول باتالاردىڭ ىشىندە قۇدايدىڭ جاڭا دۇنيەسىندە ٶمىر سۇرۋگە دەگەن ٷمىتىمىز دە بار».
ٴتىپتى مۇمكىندىگى شەكتەۋلى باۋىرلاستار دا قىزمەتتە جەمىستى بولىپ، قۋانىشقا كەنەلە الادى (11—13-ابزاستاردى قاراڭىز)
11. اۋىر دەرتكە شالدىققاندا سينديگە قۋانىشىن جوعالتپاۋعا نە كومەكتەستى؟
11 مەكسيكادا تۇراتىن سيندي ەسىمدى ايەل باۋىرلاس ومىرىنە قاۋىپ توندىرگەن اۋىر دەرتكە شالدىقتى. ول بۇل قيىندىعىمەن قالاي كۇرەستى؟ ول ەم قابىلداپ جۇرگەن كەزدە، كۇن سايىن كۋالىك بەرۋدى ماقسات ەتىپ قويىپتى. سيندي بىلاي دەپ جازدى: «وسىنىڭ ارقاسىندا مەن بار نازارىمدى اۋرۋىما، وتاعا، شەگىپ جاتقان ازابىما ەمەس، وزگەلەرگە اۋدارا الدىم. مەن دارىگەرلەرمەن، مەدبيكەلەرمەن سويلەسكەن كەزدە، ولاردىڭ وتباسىلارى جايلى سۇراستىراتىنمىن. سوسىن، نەگە وسىنداي قيىن ماماندىق تاڭداعاندارى جايلى سۇرايتىنمىن. ٴسۇيتىپ، ولارعا نە جايلى سويلەسكەن قىزىق بولاتىنىن ٴبىلىپ الاتىنمىن. ولاردىڭ كەيبىرى ناۋقاستار اۋرۋحانا قىزمەتكەرلەرىنىڭ جاعدايىن سۇراي بەرمەيتىنىن ايتتى. سوندىقتان ولار جاعدايلارىن سۇراعانىما ريزا بولىپ قالاتىن. كەيبىرى ٴتىپتى ماعان ٶز مەكەنجايلارى مەن تەلەفون نومىرلەرىن بەردى. ٶمىرىمنىڭ وسى كەزەڭىندە ەحوبا ماعان زور قۋانىش سيلادى، سونشا قۋانعانىما ٴتىپتى ٶزىم دە تاڭعالىپ قالدىم!» (ناق. س. 15:15).
12، 13. قارت نەمەسە دەنساۋلىعى ناشار كەيبىر باۋىرلاستارىمىز قىزمەتكە قالاي اتسالىسا الادى جانە ونىڭ ناتيجەسى قانداي بولادى؟
12 قارت نەمەسە دەنساۋلىعى ناشار باۋىرلاستار قىزمەتتە كوپ ٸس اتقارا الماعاندىقتان، ۇنجىرعالارى ٴتۇسۋى مۇمكىن. ٴبىراق سونداي كەزدەرى دە جاقسى كۋالىك بەرگەن باۋىرلاستار كوپ. مىسالى، قۇراما شتاتتاردا لورەل ەسىمدى ايەل باۋىرلاس 37 جىل بويى تىنىس الۋعا ارنالعان تەمىر اپپاراتتىڭ ىشىندە جاتقان. ول قاتەرلى ىسىكپەن كۇرەستى، وعان كۇردەلى وتالار جاسالدى جانە ونىڭ تەرىمەن بايلانىستى اۋرۋلارى دا بولدى. ٴبىراق وسىنداي وتە اۋىر جاعدايى وعان ۋاعىزداۋعا كەدەرگى بولمادى. ول ۇيىنە كەلگەن مەدبيكەلەر مەن وزگە دە ادامدارعا كۋالىك بەرەتىن. بۇنىڭ ناتيجەسى قانداي بولدى؟ لورەل باۋىرلاس كەم دەگەندە 17 ادامعا شىندىققا كەلۋگە كومەكتەستى *.
13 ۇيلەرىنەن شىعا المايتىن نەمەسە ناۋقاستارعا كۇتىم كورسەتىلەتىن مەكەمەدە جاتقان باۋىرلاستارعا فرانسيادا تۇراتىن ريچارد ەسىمدى اقساقالدىڭ ايتار كەڭەسى بار. «مەن بۇنداي باۋىرلاستارعا قاستارىنا كىشىگىرىم ادەبيەت ارباسىن اكەپ قويۋدى ايتار ەدىم. بۇل ادامداردىڭ قىزىعۋشىلىعىن وياتىپ، جاقسى اڭگىمەگە جول اشۋى مۇمكىن. وسىلاي ۇيمە-ٷي ۋاعىزداي المايتىن اياۋلى باۋىرلاستارىمىز جىگەر الا الادى»،— دەيدى ول. ۇيلەرىنەن شىعا المايتىن باۋىرلاستار حات جازۋ ارقىلى، تەلەفونمەن ۋاعىزداۋ ارقىلى دا قىزمەتكە اتسالىسا الادى.
ٶزىمىز قالاعان قىزمەتكە قولىمىز جەتپەگەندە
14. ٴداۋىت پاتشا بىزگە قانداي تاماشا ۇلگى قالدىردى؟
14 كەيدە جاسىمىزعا، دەنساۋلىعىمىزعا جانە وزگە دە جايتتارعا بايلانىستى ٶزىمىز قالاعان قىزمەتكە قولىمىز جەتپەۋى مۇمكىن. وسى ورايدا ٴداۋىت پاتشا بىزگە تاماشا ۇلگى قالدىردى. ول قۇدايدىڭ عيباداتحاناسىن سوعۋدى قاتتى قالادى. ٴبىراق ەحوبا وعان عيباداتحانانى سوعۋ ٷشىن باسقا ادامدى تاڭداعانىن ايتتى. سوندا ٴداۋىت سول تاڭدالعان ادامعا بارىنشا قولداۋ كورسەتتى. ول ٴتىپتى بۇل جوباعا ارناپ مولىنان التىن-كۇمىس ساداقا ەتتى. بۇل ٴبىز ٷشىن نەتكەن تاماشا ۇلگى دەسەڭىزشى! (سام. 2-ج. 7:12، 13؛ شەج. 1-ج. 29:1، 3—5).
15. يۋگ باۋىرلاس ەڭسەسىن قالاي تىكتەدى؟
15 فرانسيادا تۇراتىن يۋگ ەسىمدى ەر باۋىرلاس دەنساۋلىعىنا بايلانىستى ٵرى قاراي اقساقال بولىپ قىزمەت ەتە المايتىن بولدى. ول ٴتىپتى قاراپايىم ٷي تىرلىكتەرىن دە اتقارا الماي قالدى. ول بىلاي دەپ جازدى: «باسىندا مەن ابدەن ٴتۇڭىلىپ، ٶزىمدى تۇككە تۇرمايتىن ادامداي سەزىندىم. ٴبىراق ۋاقىت وتە ٶز جاعدايىما كونىپ، قولىمنان كەلمەيتىن نارسەلەرگە كوڭىلىمدى تۇسىرە بەرمەۋىم كەرەكتىگىن ٴتۇسىندىم. ٶز مۇمكىندىگىمنىڭ شەڭبەرىندە ەحوباعا قىزمەت ەتۋدەن قۋانىش تابۋدى ۇيرەندىم. مەن ەش بەرىلمەۋگە بەلىمدى بەكەم بۋدىم. گەدەون مەن ونىڭ قاسىنداعى 300 ەر ادام سياقتى، مەن دە شارشاعانىما قاراماي، كۇرەسە بەرەمىن!» (بي. 8:4).
16. ٴبىز پەرىشتەلەردەن نە نارسەگە ۇيرەنسەك بولادى؟
16 ادال پەرىشتەلەر ٴبىز ٷشىن كەرەمەت ۇلگى بولىپ تابىلادى. بىردە ەحوبا پەرىشتەلەرىن جيناپ، زۇلىم پاتشا احابتى قالاي الداۋعا بولاتىنىنا قاتىستى ولاردىڭ ويلارىن سۇرادى. پەرىشتەلەر ٵرتۇرلى ۇسىنىستار ايتىپ جاتتى. ٴبىراق ەحوبا ٴبىر پەرىشتەنى تاڭداپ، ۇسىنىسى ىسكە اساتىنىن ايتتى (پات. 1-ج. 22:19—22). سوندا وزگە ادال پەرىشتەلەر ەڭسەلەرى ٴتۇسىپ، «سونشا تىرىسقانىم بەكەر بولدى» دەپ ويلادى ما؟ ارينە، جوق! پەرىشتەلەر وتە كىشىپەيىل، ولار بار ماداققا ەحوبانىڭ يە بولعانىن قالايدى (بي. 13:16—18؛ ايان 19:10).
17. ٶزىمىز قالاعان قىزمەتتى اتقارماعاندىقتان كوڭىلىمىز تۇسسە، نە ىستەۋىمىز كەرەك؟
17 ەحوبانىڭ ەسىمىمەن اتالىپ، ونىڭ پاتشالىعىن جاريالاۋدان اسقان زور مارتەبە جوق ەكەنىن ۇمىتپاڭىز. تاعايىندالۋلار كەلەدى، كەتەدى. ٴبىزدىڭ ەحوبا ٷشىن قانشالىقتى باعالى ەكەنىمىز قانداي قىزمەت اتقاراتىنىمىزعا بايلانىستى ەمەس. ٴبىزدى ەحوبانىڭ جانە باۋىرلاستاردىڭ كوز الدىندا باعالى ەتەتىن — قاراپايىمدىلىعىمىز بەن كىشىپەيىلدىلىگىمىز. سوندىقتان ەحوباعا جالبارىنىپ، قاراپايىم دا كىشىپەيىل بولىپ قالۋعا كومەكتەسۋىن سۇراڭىز. كيەلى كىتاپتاعى قاراپايىمدىلىق پەن كىشىپەيىلدىلىك تانىتقان ەحوبانىڭ قىزمەتشىلەرى جايلى وي جۇگىرتىڭىز. قولىڭىزدان كەلگەنشە، باۋىرلاستارىڭىزعا زور ىقىلاسپەن قىزمەت ەتىڭىز (ٴزاب. 138:6؛ پەت. 1-ح. 5:5).
ادامدار ىزگى حابارعا قۇلاق اسپاعاندا
18، 19. اۋماعىڭىز جەمىسسىز كورىنگەندە، قۋانىشىڭىزدى قالاي ساقتاپ قالا الاسىز؟
18 ۋاعىزداپ جۇرگەن اۋماعىڭىز ەشقانداي جەمىس بەرمەيتىندەي كورىنگەندە، يا بولماسا ادامدار ۇيلەرىندە بولماعاندا، كوڭىلىڭىز تۇسكەن كەزدەر بولعان با؟ وسىندايدا قۋانىشىمىزدى ساقتاپ قالۋعا يا ارتتىرۋعا نە كومەكتەسەدى؟ « قىزمەتىمىزدى جەمىستى ەتۋدىڭ جولدارى» دەگەن قورشاۋدا ٴبىراز ٴتيىمدى كەڭەستەر جازىلعان. سونداي-اق قىزمەتكە قاتىستى وڭ كوزقاراس ساقتاۋدىڭ دا ماڭىزى زور. بۇل نەنى بىلدىرەدى؟
19 ۋاعىزدايتىنىمىزدىڭ ەڭ باستى سەبەبى قۇدايدىڭ ەسىمى مەن ونىڭ پاتشالىعىنىڭ جاريالانۋى ەكەنىن ۇمىتپاڭىز. يسا ومىرگە اپاراتىن جولدى تاباتىنداردىڭ از بولاتىنىن ناقتى ايتقان (مات. 7:13، 14). ٴبىز ۋاعىزعا شىققان كەزدە، ەحوبانىڭ، يسانىڭ جانە پەرىشتەلەردىڭ وزىمەن قىزمەتتەسەمىز! (مات. 28:19، 20؛ قور. 1-ح. 3:9؛ ايان 14:6، 7). ەحوبا وزىنە لايىقتى ادامداردى جاقىنداتىپ تارتادى (جوح. 6:44). سوندىقتان ادام ىزگى حابارعا قۇلاق اسپاي جاتسا، كوڭىلىمىز تۇسپەسىن. ول حابارىمىزعا كەلەسى كەلگەنىمىزدە قۇلاق اسۋى مۇمكىن.
20. ۇنجىرعانىڭ تۇسۋىمەن كۇرەسۋگە قاتىستى ەرەميا 20:8، 9 دان نە ۇيرەنەمىز؟
20 ٴبىز ەرەميا پايعامباردان كوپ نارسەگە ۇيرەنە الامىز. ول ۋاعىزداۋ قيىنعا سوعاتىن اۋماققا تاعايىندالعان ەدى. ەرەميا ادامداردان «كۇنۇزاققا قورلىق كورىپ، ۇرىس ەستىگەن» (ەرەميا 20:8، 9 وقىڭىز). بىردە ۇنجىرعاسى تۇسكەنى سونشا — ول بۇدان ٵرى ۋاعىزداعىسى كەلمەدى. ٴبىراق ول ۋاعىزداۋدى توقتاتقان جوق. ويتكەنى ەرەميا جۇرەگىندە وتتاي جانعان «ەحوبانىڭ ٴسوزىن» ۇستاپ تۇرا المادى! ەگەر ٴبىز جۇرەگىمىز بەن سانامىزدى قۇداي سوزىنە تولتىرساق، بىزبەن دە سولاي بولادى. بۇل — كيەلى كىتاپتى كۇندەلىكتى وقىپ، وي جۇگىرتۋگە تاعى ٴبىر سەبەپ. سولاي ەتەر بولساق، قۋانىشىمىز ەسەلەنەدى، قىزمەتىمىز دە جەمىستى بولا تۇسەدى (ەرم. 15:16).
21. ۇنجىرعانىڭ تۇسۋىمەن كۇرەسكەندە، قالاي جەڭىسكە جەتە الامىز؟
21 «ەڭسەمىزدى باسقان مۇڭ شايتاننىڭ قولىندا مىقتى قارۋعا اينالۋى مۇمكىن»،— دەيدى جوعارىدا ايتىلعان دەبورا. ٴبىراق ەحوبا قۇداي شايتاننىڭ وزىنەن جانە ونىڭ بارلىق قارۋلارىنان الدەقايدا مىقتى. سوندىقتان ۇنجىرعاڭىز قانداي سەبەپپەن تۇسپەسىن، ەحوباعا جالبارىنىپ، كومەك سۇراڭىز. ٶزىڭىز جايلى جاعىمسىز ويلار مەڭدەگەندە يا قاتەلىك جاساپ قويعاندا، ول سىزگە بەرىلمەي كۇرەسۋگە كومەكتەسەدى. اۋىرعان كەزىڭىزدە دەمەۋ بولادى. تاعايىندالۋلارعا قاتىستى دۇرىس كوزقاراستا بولۋعا كومەكتەسەدى. سونداي-اق ۋاعىز قىزمەتىنە قاتىستى وڭ كوزقاراستا بولۋعا كومەك بەرەدى. كوكتەگى اكەڭىزگە دۇعا ەتىپ، جۇرەگىڭىزدەگى ۋايىمدارىڭىزدى اقتارىڭىز. ونىڭ كومەگىمەن ٴسىز ەڭسەڭىزدى باسقان مۇڭمەن كۇرەسىپ، جەڭىسكە جەتە الاسىز!
41-ٵن ەستي كور مەنى دەپ وتىنەم
^ 5-ابزاس بارلىعىمىزدىڭ ۇنجىرعامىز تۇسەتىن كەزدەر بولادى. بۇل ماقالادا ٴبىز ساعىمىز سىنعاندا بەرىلمەي كۇرەسۋگە كومەكتەسەتىن كەيبىر جايتتاردى قاراستىرامىز. الدا كورەتىنىمىزدەي، ٴبىز ەحوبانىڭ كومەگىمەن بۇل كۇرەستە جەڭىپ شىعا الامىز.
^ 4-ابزاس كەيبىر ەسىمدەر وزگەرتىلگەن.
^ 12-ابزاس 2001-جىلعى «كۇزەت مۇناراسىنىڭ» 1-جەلتوقسانداعى سانىن (حانزۇشا) قاراڭىز (15-ب.، 10-ابز.).
^ 69-ابزاس سۋرەت سيپاتتاماسى: ۇنجىرعاسى تۇسكەن قىز باۋىرلاس بۇرىن اتقارعان قىزمەتى جايلى وي جۇگىرتىپ، دۇعا ەتىپ جاتىر. ول بۇرىن ىستەگەن جانە قازىر ىستەپ جاتقان يگى ىستەرىن ەحوبا ۇمىتپايتىنىنا سەنىمدى.
