1. Okuluwala kutena kutubhekela makahi?

ETWENYOSO twene mudibhana ni maka. Tubhanga yoso itutena phala ku abatula mu ukexilu watokala. Maji ki uxikina kwila tubatula dingi kyambote omaka, se twasanguluka kumuxima? Kyenyikiphe, twatokala kumona okuluwala kala mwiyi utena kunyana okidyelelu kyetu, okuswina kwetu ni kusanguluka kwetu. Jisabhu 24:10 yamba: “bhu kizuwa kya ohaxi se ubeleketa, kwabhu, ni nguzu yé itola.” Kidi mwene! Okuluwala, kutena kutukatula onguzu itwabhindamena phala kutolola o ibhidi kumwenyu.

2. Ima yahi itubhangesa kutuluwala? Ihi itwandadilonga mumbandu yiyi?

² Ima yavulu itena kutuluwalesa kala okukamba kuyuka kwetu, o itondalu yetu ni mawuhaxi. O ima yamukwa we kala okukamba kutambula ujitu utwakingila mu kilunga kya Jihova, mba kusuluka ni kuboka mumbambe mwedi kala o athu kamutubhana matwi. Mumbandu yiyi twandamona se ihi itutena kubhanga phala kudibhana ni kuluwala mu ithangana yiyi.

3. Ihi itena kutukwatekesa kutala okukamba kuyuka kwetu m’ukexilu watokala?

³ Kikubhonzo kuditala kyayibha mukonda dya kukamba kuyuka ni itondalu yetu. Itondalu yetu, itena kutubhangesa kuxinganeka kwila, Jihova kandatwehela kubokona kumundu wobhe. Okuxinganeka kiki kilwezu kyadikota. Kyenyikiphe, kyebhi kitutena kudibhana ni itondalu yetu ijila mukukamba kuyuka? O Bibidya yamba kuma, katuku Jezú Kidistu, o athu “ituxi a ite.” (Loma 3:23) Maji Jihova wavu o Bibidya, kimuthu ujijila kuyuka kwa akwa kana. Muveji dya kiki, Jihova Nzambi ya henda, mwene wamesena kutukwatesa. Mwene we  mukwa mwanyu, utala onguzu itubhanga phala kutolola o itondalu yetu ni kuditala m’ukexilu ututala mwene. Jihova wala jinga polondo phala kutukwatekesa.—Loma 7:18, 19.

4-5. Kala kilondekesa 1 Nzwá 3:19, 20, ihi yakwatekesa ophange jiyadi kusuluka ni kusanguluka?

⁴ Mukifika tala ophangu ya Debola ni Madiya *. Kyoso kyexile monandenge Debola exile mumusebhulula kwolo jindandu jê muveji javulu, ene kexile mumuximana né ngo lumoxi. Kiki, kyamubhangesa kuditala mu ukexilu wayibha. Kyenyiki, ne mwene kyoso kyexile muta tu itondalu twofele, mwene wexile mudivwa kala mwene kabhangye dingi kima kyambote. Madiya wexile mudibhana we ni maka adifu kiki. Omweji wê wexile we mumusebhulula kyavulu. Kyenyiki, mwene wexile mudivwa kwila, kale ni valolo. Kyoso mwene kyamubatizala, wexile mudivwa kwila, kafwama kukala Mbangi ya Jihova.

⁵ Sumbala ni ibhidi yoso yiyi, ojiphange jiyadi jiji asuluka ni kubheza Jihova. Ihi ya akwatekesa? Kyadyanga, ene asambe kwa Jihova ni muxima woso, amubhakwila omakamâ moso. (Jisá. 55:22) Kiyadi kya atendela kwila, o Tata yetu yadyulu, wejiya o ibhidi itwadibhana nayu kya kumwenyu, wejiya we kwila o ixinganeku yayibha itena kutuluwalesa kyavulu. Maji Jihova umona o ima yambote itwala nayu kumuxima. O idifwa yoyo itwakambe kwijiya.—Tanga 1 Nzwá 3:19, 20.

6. Kyebhi kitena kudivwa o muthu uvutukila mu kituxi kye kyokulu?

⁶ Omuthu nange wamubhanga phala kutolola kifwa kyayibha. Maji mukubhita kithangana, mwene uvutukila dingi kuta okituxi kyene muta kyá. Kyenyiki, mwene uluwala kyavulu. Kikima kyayibha kudivwa kuma wala ni kikuma kyoso muthu kyata kituxi. (2 Kol. 7:10) Maji, kitwatokala kudifundisa kyavulu mukuxinganeka kiki: ‘Eme bhabha ngalembwami kya mwene. Jihova nuka wandangiloloka.’ O ixinganeku yiyi yayibha, kiya lungu ni kidi kya Nzambi. Itena kutufidisa kusuluka ni kubheza Jihova. Lembalala itwatange mudivulu dya Jisabhu 24:10. Se tubheleketa ni nguzu yetu itola. Muveji dya kubheleketa, sota kuzwela ni Jihova, mubhinge muloloki bhukaxi ka musambu. (Iza. 1:18) Se Jihova umona kwila eye wadyela ni kidi kyoso, mwene wandakuloloka. Kumbandu yengi, zwela we ni tufunga. Ene andakukwatekesa kukala dingi kyambote mu nzumbi.—Tiya. 5:14, 15.

7. Mukonda dyahi kitwatokala kudifundisa kyavulu se twamubhânga ni itondalu yetu?

⁷ Phange Jean-Luc, kafunga ku ixi ya França wene muzwela kiki kwa yo ene mudibhana ni itondalu: “Ku mesu ma Jihova omuthu  wayuka yó udyela o ituxi kyoso kyatondala, kana yó ukamba kuta o ituxi.” (Loma 7:21-25) Kyenyiki, kana kudifundisa se wamubhânga ni itondalu yé. Lembalala kwila, mukonda dya kituxi, seku muthu mudyetu utena kuyuka kumesu ma Jihova, mu nguzu yê mwene. Etwenyoso twabhindamena okyadi kyatulondekesa Nzambi bhukaxi kasata ya kukula.—Efe. 1:7; 1 Nzwá 4:10.

8. Nanyi utena kutuswinisa kyoso kituluwala?

⁸ Ojiphange jetu mu kilunga atena kutuswinisa. Ene atena kutwivwa kyoso kitubhindamena muthu phala kuzwela nê, atena we kuzwela kama katena kutuswinisa. (Jisa. 12:25; 1 Tes. 5:14) Phange yamuhatu ku ixi ya Nigeria amwixana Jay, wene mubhânga ni kuluwala, wambe: “Eme se ojiphange jami mukilunga manyi kya. Okikwatekesu kyene mungibhana, kilondekesa kwila, Jihova wene mutambwijila omisambu yami. Ene angilongo kuswinisa we akwetu amudibhana ni kuluwala kwa muxima.” Maji twatokala kwijiya kwila, sayi ithangana ojiphange jetu kanda kwijiya se twabhindamena kiswinisu. Kyenyiki, nange etu mwene twatokala kubhinga okikwatekesu kwa phange wakulu mu nzumbi.

9. Odivulu dya Jisálamu 41:3 ni 94:19, dituswinisa kyebhi?

⁹ Bhinga okikwatekesu kya Jihova. Kyoso kitukata, kotelele se uhaxi kiwivu milongo, kibhonza kukala ni ixinganeku yambote. Jihova lelu kabhange madiwanu phala kutusaka. Maji mwene utuximbakatesa, utubhana onguzu itwabhindamena phala kukolokota. (Tanga Jisálamu 41:3; 94:19.) Mukifika, Jihova utena kuswinisa phange mukilunga phala kutukwatekesa ni kakikalakalu kubhata mba kutukwatekesa kusumba kama. Mwene utena we kuswinisa ojiphange mukilunga phala kututumbula jinga mumisambu yâ. Mbaphe, Jihova utena kutubhangesa kulembalala ikanenu ya Bibidya ituswinisa, kala okidyelelu kyakatunda kyakukala ni mwenyu wakalelaku kuhádya, sé kukata.—Loma 15:4.

10. Mukonda dyahi phange Isang kasuluka ni kuluwala kwe kyoso kyabhiti mu kilwezu?

¹⁰ Phange Isang ku ixi ya Nigeria wabhiti mukilwezu. Odotolo wamwambela kwila, mwene kejitena dingi kwenda. Phange Isang wambe: “Ngaluwala kyavulu kyoso kyangitangela onjimbu yiyi”. Maji okwila mwene wasuluka ni kuluwala? Kana. Ihi yamukwatekesa? Phange Isang wajimbulula wixi: “Eme ni muhatwami, twasuluka ni kusamba kwa Jihova ni kudilonga o Maka mê. Twasolo we kumuxima wetu kulunga omesu kumabesa ni kukidyelelu kya kutunga kumundu wobhe watu kanena Nzambi.”

11. Ihi yakwatesa phange Sindi kukala ni kusanguluka sumbala ni uhaxi?

¹¹ Phange Sindi watungu ku ixi ya Mexiku, amuzambula uhaxi wabhonzo. Kyebhi kyadibhana ni maka yâ? Kyoso kyexile mumutalatala mwene wasuwu ombambe yakubhana umbangi izuwa yoso. Mwene wambe: “Kubhana umbangi izuwa yoso kwangikwatesa kusuwa akwetu, muveji dya kubhanza kyango mupelasá, mundolo ni uhaxi wami.” Eme ngexile mubhanga kiki: “Kyoso kingizwela ni jidotolo ni asaki, nga ebhwidisa se mwiji wazekele kyambote. Mukusuluka, nga ebhwidisa se mukonda dyahi asolo o ufunu yú wabhonzo kyavulu. Mukubhanga kiki, kikwabhonzele dingi kuzwela nawu maka awabhela ene. Avulu mudya ambe kwila, ojihaxi kene mu ebhwidisa se ene ala kyebhi. Angisakidila mukonda dya kwasuwa, amoxi kate mwene angibhana omuxinda wamitelembe yâ. Sumbala kyexile kithangana kyabhonzo, Jihova wangisangulukisa mu ukexilu ubhangesa kudiwana!”—Jisa. 15:15.

12-13. Ojiphange jakate mba yó kala ni sawidi yambote ene mubhanga kyebhi phala kuboka? Kyebhi kyene muditunda?

¹² Omuthu wakate mba yo kala ni sawidi yambote, atena kuluwala mukonda kamutena kubhanga dingi ima yavulu mukikalakalu kyakuboka. Né kiki, avulu mudya ene musanga ndunge phala kuboka. Ku ixi ya Estados Unidos, sayi phange yamuhatu amwixana Laurel wabhiti 37 amivu ni kuhemena bhukaxi kamakina a axana pulmão de aço. Mwene wadibhana ni uhaxi wa kanser, amuphelala veji javulu, wexile we ni uhaxi wakikonda. Maji o ibhidi yoso yiyi, kiyamufidisa kuboka. Mwene wexile mubokela o asaki ni athu amukwa exile kumulanga kubata dyê. Ihi yabhiti? Mwene wakwatekesa 17 dya athu kwijiya okidi kya Bibidya. *

¹³ Phange Richard kafunga ku ixi ya França, ubhana ndunge yambote kwa yó katena kutunda kubhata mba ala mu inzo ilanga adyakime akuka. Mwene wambe, ondunge ingabhana yiyi: “Atokala kutula omadivulu mu ididi idimonekena kyambote. O athu kyoso kyandakwa amona, andabhanga ibhwidisu. O ibhwisisu yiyi ikwatekesa o aboki kumateka kuzweka nawu. Kubhanga kiki kutena kukwatekesa ojiphange jetu jakazola, katena dingi kuboka nzo ni inzo.” Ojiphange jetu katena kutunda kubhata atena we kuboka bhukaxi kamitelembe ni mikanda.

14. Phangu yebhi yatuxila Sobha Davidi?

¹⁴ Mukonda dya kukuka, kukata mba ima yengi, sayi phange jetu kene mutambula ujitu mu kilunga mba musirkwitu yâ. Se kiki kyamubhita we netu, tutena kukatula mbote kuphangu ya Sobha Davidi. Mwene wamesenene kyavulu kutunga tembulu phala o ubhezelu wa Jihova. Maji amutangela kwila, kimwene weji ku itunga. Né kiki, mukubhita kithangana, mwene wakwatekesa yó amusolele phala kutambula o ujitu yú. Sobha Davidi kate wabhana jimbote ni kitadi kyê phala kukwatekesa okikalakalu kya kutunga. Se phata, Davidi watuxila phangu yambote!—2 Sam. 7:12, 13; 1 Mal. 29:1, 3-5.

15. Kyebhi phange Hugues kyatolola okuluwala?

¹⁵ Mukonda dya kukata, phange Hugues ku ixi ya França katenene dingi kusidivika kala kafunga. Mwene katenene kubhanga kate mwene tu ikalakalu twofele kubhata dyê. Mwene wasoneka wixi: “Kudimatekenu ngaluwalele kyavulu. Maji mukubhita kithangana ngatendela kwila, sayi ima kingitena dingi ku ibhanga. Mukubhanga kiki, ngamateka kusanguluka ni ima ingatenene kubhanga mu sidivisu ya Jihova. Ngandasuluka jinga ni kubhânga kala  kyabhangele Ngidiyone ni 300 jamasoladi, sumbala kexile ni nguzu yavulu!”—Afun. 8:4.

16. Ojianju kudyulu jatubhana phangu yahi?

¹⁶ Ojianju jafiyele kudyulu jitubhana we phangu yambote. Sayi kithangana, Jihova wabhingi ku jianju phala kubhana jindunge phala kunganala o Sobha yayibha, Akabe. Jianju javulu jabhana ojindunge jâ. Maji Nzambi wasolobhu ndunge ya anju imoxi ngó. Wambe kwila, ondunge yiyi yene yafwama. (1 Jis. 22:19-22) Okwila ojianju jamukwa jaluwala, mukuxinganeka kwila ‘twazange ngó okithangana kyetu mukubhana ojindunge?’ Kana! Ojianju jalenduka kyavulu. Ene amesena kubhana okijingu kyoso kwa Jihova.—Afun. 13:16-18; Dij. 19:10.

17. Se tuluwala mukonda dya kukamba kutambula mawujitu ihi itwatokala kubhanga?

¹⁷ Lunga omuxima ku ujitu wakukala Mbangi ya Jihova ni kuboka o Utuminu we. Omawujitu eza anga abhita. Maji k’ene abhangesa omuthu kufwama kumesu a Nzambi. Kibhangesa omuthu kumuzola kwala Jihova ni jiphange mu kilunga, o ukexilu wakuditulula ni kulenduka. Kyenyiki, bhinga kwa Jihova mumusambu phala na kukwatekesa kuditulula ni kulenduka. Xinganeka ophangu ya athu alondekesa okifwa kya kuditulula ni kulenduka. Sota kubhanga yoso i utena phala kusidivila jiphange jé.—Jisá. 138:6; 1 Phe. 5:5.

18-19. Kyebhi ki utena kukala ni kusanguluka né mwene se wamuboka mumbambe yedi kala o athu kamesena kwivwa o Maka a Nzambi?

¹⁸ Waluwalele kya mukonda ombambe mu wene mukalakala yedi kala o athu kamesena kwivwa o Maka a Nzambi? Mba kiwene musanga athu? Se kiki kyamubhita neye, ihi i utena kubhanga phala kubandekesa okusanguluka kwé? Okaxa “ Kyebhi ki Utena Kusanguluka Dingi M’ukunji wé,” ibhana jindunge jambote. Kumbandu yengi, kima kyambote kutala osidivisu yakuboka m’ukexilu wambote. Kiki kilombolola ihi?

¹⁹ Lembalala kwila okima kitubhangesa okuboka okulonga odijina dya Nzambi ni Utuminu wê. Jezú wambe kwila, atolo ejixikina kwendela mu njila yambata kumwenyu wakalelaku. (Mat. 7:13, 14) Kyoso kituya kuboka, twala ni ujitu wakukalakala kumoxi ni Jihova, ni Jezú ni Jianju. (Mat. 28:19, 20; 1 Kol. 3:9; Dij. 14:6, 7) Jihova mwene wixana o athu afwamena okidi. (Nzwá 6:44) Se muthu lelu kamesena kwivwa onjimbu, mungu utena ku itambwijila kyambote.

20. Kyalungu ni kubhânga ni kuluwala ihi itudilonga Jelemiya 20:8, 9?

²⁰ Tutena kukatula mbote mu phangu yatuxila polofeta Jelemiya. Mwene amutumina kuboka mumbambe yabhonzele kyavulu. O athu exile “ku musebhulula ni kumutobhesa kumbi dyoso dya kambamba.” (Tanga Jelemiya 20:8, 9.) Mwene waluwalele kyavulu, kate waxinganeka kwila katokalele dingi kusidivila Jihova. Maji mwene kabhwila kana. Mukonda dyahi? Mukonda o “Maka ma Jihova” edile kala tubhya mu ifuba ya Jelemiya. Mwene walembwa ku abhaka. Kyene we kyanda bhita netu lelu, setuzalesa omuxima wetu ni kilunji kyetu ni maka ma Nzambi. Kyenyikiphe, twatokala kutanga ni kuxinganeka mu Maka a Nzambi izuwa yoso. Se kyene kitubhanga, okusanguluka kwetu kwandaya jinga ni kudibandekesa.—Jel. 15:16.

21. Kyebhi ki utena kutolola okuluwala?

²¹ Phange Debola twamutumbula kudimatekenu wambe: “Satanaji usota kutuluwalesa phala kutuzozesa.” Maji okutena kwa Jihova kwabeta dingi kota o uta yu wakadyaphemba ndenge. Kyenyikiphe, se umona kwila sayi kima kyamukuluwakesa, bhinga kikwatekesu kwa Jihova. mwene wandakubhna nguzu phala kudibhana ni kukamba okuyuka ni itondalu yê. Mwene wandakukwatekesa kyoso ki ukata ni kutala omawujitu mukilunga m’ukexilu watokala. Jihova wandakukwatekesa we kutala osidivisu ya kuboka m’ukexilu wambote. Okyabeta dingi kota, jikula muxima we kwa Tata yetu ya dyulu, mutangele yoso yamukutandanganyesa, yamukukatula okilu. Ni kikwatekesu kya Jihova, eye utena kutolola okuluwaka!