1. Erihwa amani lyanga thuhambako lithi?

OBULI kiro thukabana ebitsibu kandi ithwakolha ekyo thwanga thoka eribighumira. Aliwe kikalire erighumira ebitsibu ithunahwere amani. Neryo thutholere ithwalhangira erihwa amani ng’omwibi oyukanza erithulhusyako erisika, obuthubaha, n’etseme yethu. Emisyo 24:10, NW hathi: “Wamahwa amani omwa buthuku bw’ebitsibu, amaaka wawu iniakendi keha.” Neryo erihwa amani lyanganaleka ithuthabya n’akaghalha ako thukayithagha erighumira ebitsibu byethu.

2. Ni byahi ebyanga leka ithwahwa amani, kandi thukendi kania okuki omo mwatsi ono?

² Ni bingyi ebyanga thughunza amani​—ebindi biri omw’ithwe, n’ebindi bikathwasira. Ebi mwanganabya imwamuli ebisobyo byethu, n’amalhwere. N’ebindi mwanganabya imwamuli erithendi thunga olhusunzo olho thwanzire omwa mubiiri wa Yehova kutse obundi erithulira omwa bulhambu obuli mw’abandu abathe hulikirira. Omo mwatsi ono thukendi kania okwa bindu birebe ebyo thwanga kolha erirwanisya erihwa amani.

3. Ni kyahi ekyanga thuwathikya thukayithungako amalengekania awatholere n’eriyowa nabi busana n’ebisobyo byethu?

³ Kyolhobire eriyithungako amalengekania awathatholere n’eriyowa nabi busana n’ebisobyo byethu. Busana n’ekyo, ithwangana lengekania thuthi erilemererwa lyethu lyangana syaleka Yehova iniaghana erithwingirya omo kihugho kiwe kihya-kihya. Amalengekania ng’ayo ni w’akabi. Thutholere ithwalhangira thuthi ebisobyo byethu? E Biblia yikabugha yithi abandu abosi “babirikolha ebibi,” erihako Yesu Kristo musa. (Abar. 3:23) Omwinye e Biblia syaliho erithusondekania mw’ebisobyo kutse erithuyithaghako erihikana. Aliwe, ni  Thatha oyuwithe olhwanzo oyuwanzire erithuwathikya. Kandi akaghumisirizaya. Akalhangira ku thukarwanisaya erilemererwa lyethu n’amalengekania awathatholere agho thuyiwitheko, kandi anayitheghekire erithuwathikya.​—Abar. 7:18, 19.

4-5. Ngoku kiri omu 1 Yoane 3:19, 20, ni kyahi ekyaleka bali bethu babiri ibathabikyako busana n’erihwa amani?

⁴ Thulebaye eky’erileberyako kya Deborah na Maria. * Deborah iniakine mulere, ab’eka yabu ibakamukolha nabi neryo ikyaleka iniayowa mwa wabbule. Isihali n’oyukamusima. Neryo mwayithungako amalengekania awathatholere. Iniakabya amakolha n’akasobyo kake iniakayowa ng’abirilemerwa ighuma. Maria nayu abya awithe ekitsibu ng’ekyo. Abahughu biwe ibakamuhemulikanaya. Neryo ekyo mukyaleka iniayowa mwa wabbule. Abere abiryasa omo kwenene, nibya mwayowa nga syatholere eryahulhwa omo lina lya Nyamuhanga!

⁵ Aliwe bali bethu babiri aba mubathaleka erikolera Yehova. Busana naki? Kundi mubaghusira Yehova y’amalighe wabu wosi omw’isaba erilhua oko muthima. (Esy. 55:22) Mubahika okw’iligha ngoku Thatha wethu w’elhubulha anasi ngoku ebyo thwalhabamo kera n’amalengekania awathatholere agho thuwithe ku bikathuhambako. Aliwe kandi akalhangira ebibuya ebiri omwa mithima yethu​—emibere eyo ithwe thuthe thwanga yilhangiramo.​—Soma 1 Yoane 3:19, 20.

6. Omundu angayowa athi amathasyakolha ekindu ekithuwene ekyo anemulengaho erirwanisya?

⁶ Omundu oyunemulengaho kutsibu erileka erikolha ekindu ekithuwene anganahwa amani amathasyakikolha. Ni kwenene, ni kya buli kiro eriyowa nabi thwamasobya. (2 Kor. 7:10) Aliwe sithutholere thukalhabirirania n’eriyitsweba kutsibu, erilengekania thuthi: ‘Nabirilemerwa ighuma. Yehova syanga nyighanyira?’ Amalengekania ng’ayo syahikire kandi angana kulemesya erikolera Yehova. Ibuka ebyo thulyasoma omwa Emisyo 24:10, NW​—thwamahwa amani amaaka wethu iniakendi keha. Omwakanya k’ekyo, iwanaya emyatsi yawu na Yehova omwa musabe kandi musabe ekighanyiro. (Isa. 1:18) Wamayisubamo erilhua oko muthima, iniakendi kughanyira. Eryongera okw’ekyo, hika oko basyakulhu. Omw’ighumisirizya ibakendi kuwathikya erisuba-subana bunyakirimu.​—Yak. 5:14, 15.

7. Busana naki sithutholere thukahwa amani kyamathukalira erikolha ekihikire?

⁷ Jean-Luc, omusyakulhu w’ekithunga e France, akabwira abakayowa nabi busana n’ebisobyo byabu athi: “Omundu omuthunganene embere sya Yehova, siy’omundu oyuthesobaya aliwe y’omundu oyukayikubaya bwomo  busana n’ebisobyo biwe kandi iniayisubamo.” (Abar. 7:21-25) Neryo isiwayitsweba wamabya iwunemuyowa nabi busana n’ekisobyo kyawu. Ambi iwibuka ngoku sihali n’omughuma w’okw’ithwe oyutholere obuthunganene embere sya Nyamuhanga. Ithwe bosi thukayithagha olhukogho lhwa Nyamuhanga erilhabira omwa ndongolya.​—Efe. 1:7; 1 Yn. 4:10.

8. Thwamahwa amani, ni bahi abo thutholere ithwasaba obuwathikya?

⁸ Balikyethu​—erihiika lyethu ly’obunyakirimu​—bangana thuhumulikania!  Bangana thuhulikirira thukakania kandi ibathubwira ebinywe ebyanga thuhumulikania. (Emi. 12:25; 1 Tes. 5:14) Mwali wethu we Nigeria ya Joy, oyuwabirirwanisya kutsibu erihwa amani akabugha athi: “Nangabere hayi ku hathabya balikyethu? Erihumulikania eryo balikyethu bakamba likakanganaya ngoku Yehova akasubiraya emisabe yaghe. Nibya nabiribighirako ngoku nanga humulikania abandi ababbunikire muthima.” Thutholere ithw’ibuka ngoku balikyethu bangana ghana eriminya ngoku thukayithagha erihumulikanibwa. Neryo thutholere ithwaghenda eyiri mulikyethu oyukulire bunyakirimu n’erimubwira ku thukayithagha obuwathikya.

9. Esyonyimbo 41:3 na 94:19 hanga thuhumulikania hathi?

⁹ Saba Yehova y’obuwathikya. Thwamabya isithuli yowa ndeke kandi kutsibu-tsibu thwamabya ithulhwere obulhwere obuthelhama, ikyangana thukalira eribya n’amalengekania awatholere. Nomwakine indi lino Yehova syali thulhamaya omo nzira y’ekithiko-thiko, angana thuhumulikania n’erithuha akaghalha ako thukayithagha erithoka erighuma. (Soma Esyonyimbo 41:3; 94:19.) Ng’eky’erileberyako, anganahira omwa Bakristayo balikyethu mw’omuhwa w’erithuwathikya oko mibiiri y’eka kutse erithughendera omwa kathali. Anganahira omwa balikyethu mw’omuhwa w’erisaba haghuma nethu. Kutse angana thwibukya emyatsi eyikahumulikanaya eyiri omwa Kinywe kiwe, ng’amaha mabuyanga aw’engebe eyihikene eyithemo amalhwere n’obulhumi ey’omwa kihugho kihya-kihya ekikayasa.​—Abar. 15:4.

10. Busana naki Isang mwathakwama kyayireka omwa mibere y’erihwa amani?

¹⁰ Isang, oyuwikere e Nigeria, mwathunga aksidenti neryo amasanyarara. Dokita mwamubwira athi syendi syasathoka erighenda. Isang mwabugha athi: “Munabbunika muthima n’erihwa amani.” Mwanakwama kyayireka omwa mibere y’erihwa amani eyi? Eyihi! Ni kyahi ekya muwathikaya? Isang akabugha athi: “Ingye na mukali waghe muthuthaleka erisaba Yehova n’erigha Ekinywe kiwe. Kandi muthwathwamu erilengekania okwa mighisa eyo thuwithe imwamune n’amaha wethu w’engebe ey’omwa kihugho kihya-kihya kya Nyamuhanga.”

11. Cindy mwabana athi etseme inianalhwere obulhwere obukalire?

¹¹ Cindy, oyuwikere e Mexico, mubamupima mw’obulhwere obukalire. Ni kyahi ekya muwathikaya erighuma? Abere anemuthambirwa, mwayihiriraho ekilhubirirwa ky’erithulira obuli kiro. Akabugha athi: “Erikolha ekyo, munathoka erilengekania oko bandi omwakanya k’erilengekania okwa muhamba, obulhumi kutse obulhwere. Iningakolha kino: Iningabya ingakania n’abathambiri, iningababulhaya okwa b’eka yabu. Neryo kandi iningababulhaya nga ni kyahi ekyaleka ibathwamu erikolha omubiiri owakalire oyu. Neryo aho ikikolhoba eriminya omwatsi owangabahika okwa muthima. Abangyi ibakabugha bathi mughulhu mungyi sibaliowa abalhwere bakababulya  bathi, ‘Muli ya muthi?’ Kandi abangyi ibakanyisima busana n’eribatsomana. Nibya n’abandi ibakananyiha esyongangirira syabu. Neryo okwa mughulhu owakalire oyo, munasweka Yehova akanyiha obutseme bunene!”​—Emi. 15:15.

12-13. Abalhwere kutse abatsekire babirithoka bathi erisangira omw’ithulira, kandi mwabirilhwiririraki?

¹² Abalhwere kutse abatsekire banganahwa amani kundi sibakikolha bingyi omwa mubiiri w’erithulira. Nomwabine, abangyi banemukolesya esindi nzira sy’erithuliramo. E Amerika, mwali wethu ya Laurel mwaghunza emyaka 37 iniane omwa kyuma ekikamuwathikaya erihumulha! Mwaghumira ekansa, erisemezibwa mirundi mingyi, n’amalhwere w’engoba awathelhama. Nomwanabana ebitsibu ebikalire ebi mwathaleka erikolera Yehova. Iniakathulira abathambiri n’abandi abakasa eka wabu. Mumwalhwiririraki? Mwawathikya abandu nga 17 eriminya ekwenene ye Biblia! *

¹³ Richard, omusyakulhu w’ekithunga e France, awithe amenge awanga wathikya abatseke abathe bangalhua eka kutse abali omo mwanya ogho bakalhabiriramu abakulire basa. “Ngabugha indi ibabya n’akameza kake ak’erihirako ebitabu. Ebitabu ebi bikaleka abandu ibanza eriminya neryo omukania iniatsuka. Eki kyangana wathikya balikyethu abathe bangathasyathoka erighenda nyumba okwa nyumba.” Kandi abathe bangalhua eka busana n’eritseka bangana sangira omw’ithulira omw’ihandika esyobbaruha n’erithulira okwa simu.

14. Ni ky’erileberyako kyahi ekyuwene ekyo Mwami Dawudi athuhiriraho?

¹⁴ Busana n’erikulha omo myaka, amaghalha eritsotsobera, kutse ebindi bitsibu, thwanganabya isithwanga thasyatholera erihebwa omubiiri mulebe kutse olhusunzo omwa kithunga kutse omwa muthimbo. Omwa mibere ng’eyo, thwangan’ighira okwa ky’erileberyako ky’Omwami Dawudi. Dawudi abere abiribwirwa ngoku syendi himba ehekalu ya Nyamuhanga​—ekindu ekyo abya anzire kutsibu erikolha​—mwasighika kutsibu oyo Nyamuhanga asombolha erikolha omubiiri oyo. Dawudi mwahayo n’omuthima wiwe wosi erisighika obuhimbe obo. Eki ni ky’erileberyako ekyuwene ekyo thwanga kwama!​—2 Sam. 7:12, 13; 1 Emy. 29:1, 3-5.

15. Hugues mwarwanisya athi erihwa amani?

¹⁵ Mughalha wethu Hugues, e France, mwaleka erithasyakolha ng’omusyakulhu busana n’amaghalha erighana kandi nibya mwabya isyanga thasyathoka n’erikolha n’ehibiiri hike-hike eka ewiwe. Akabugha athi: “Erimbere  munahwa amani n’eriyowa mwa wabbule. Aliwe endambi muyahika namalhangira omughaso w’eriligha erilemererwa lyaghe kandi munabana obutseme bw’erikolera Yehova ingana withe erilemererwa eryo. Nabirithwamu erithendi bikyako. Nga Gideoni n’abalhume biwe bikumi bisathu​—abosi ababya balhuhire​—naghe sinendilhuhirira!”​—Abat. 8:4.

16. Eky’erileberyako ky’abamalaika kikathweghesayaki?

¹⁶ Abamalaika abathaleghulha ni ky’erileberyako ekyuwene. Omw’ithabalha ly’Omwami Ahabu, Yehova mwasaba abamalaika amenge aw’eritheberamo omwami mubi oyo. Abamalaika balebe mubaha amenge. Aliwe Nyamuhanga mwasombolhako omumalaika mughuma n’erimubwira athi amenge wiwe akendi kolha. (1 Bam. 22:19-22) Mbwino abandi bamalaika abathaleghulha mubanahwa amani, obundi erilengekania bathi, ‘Obuthuku bwaghe namabwithiraki?’ Sihali ekyanga leka ithwabugha thuthya. Abamalaika bayikehirye kandi banzire olhukengerwa olhwosi ilhwaghendera Yehova.​—Abat. 13:16-18; Erib. 19:10.

17. Thwanga kolhaki thwamahwa amani busana n’erithendi thunga olhusunzo lhulebe?

¹⁷ Ibuka olhusunzo olhwa thuwithe olhw’eryahulhwa omwa lina lya Nyamuhanga n’erithulhughania Obwami bwiwe. Thwangana thunga olhusunzo kandi ilhwahwa, aliwe silho lhukaleka ithwabya b’obughuli embere sya Nyamuhanga. Eriyikehya ly’erikaleka ithwabya b’obughuli embere sya Yehova n’abalikyethu. Neryo saba Yehova akuwathikaye eribya iwunayikehirye. Ghaniraya okwa by’erileberyako ebyuwene eby’eriyikehya ebiri omwa Kinywe kiwe. Wathikaya balikyethu erilhua okwa muthima kandi omo nzira yosi-yosi.​—Esy. 138:6; 1 Pet. 5:5.

18-19. Wanga bana wuthi etseme omw’ithulira nibya abandu ab’omwa bulhambu bwenyu isibali hulikirira?

¹⁸ Wune wathahwa amani busana n’abandu b’omwa bulhambu bwenyu eribya isibali hulikirira kutse eribya isibalibya eka? Omwa mibere ng’eyo, thwanga kolhaki eryongera etseme yethu? Ebyanga thuwathikya bine omwa kasanduko “ Esyonzira Esyo Wanguwaniryamo Erithulira Lyawu.” Kandi ni kikulhu eribya n’amalengekania awatholere okwa mubiiri w’erithulira. Ekyo mwamuliki?

¹⁹ Hweraya amalengekania wawu okw’ithulhughania erina lya Nyamuhanga n’Obwami bwiwe. Yesu mwakikangania ndeke-ndeke ngoku abandu bake buyira babanga kwamire enzira y’engebe. (Mt. 7:13, 14) Omughulhu thuli  omw’ithulira, thukabana olhusunzo lhw’erikolha haghuma na Yehova, Yesu, n’abamalaika. (Mt. 28:19, 20; 1 Kor. 3:9; Erib. 14:6, 7) Yehova yukaletha abanzire erimukolera. (Yn. 6:44) Neryo omundu amaghana erihulikirira omwatsi wethu thukanamubana, iniangana syahulikirira thukathasyakania nayu ekindi kiro.

20. Yeremia 20:8, 9 hanga thuwathikya hathi erirwanisya erihwa amani?

²⁰ Thwanga n’igha bingyi oko muminyereri Yeremia. Mwathumwa omwa bulhambu obukalire kutsibu. Abandu ibakamutsuma n’erimuseka omwa “musibo wosi.” (Soma Yeremia 20:8, 9.) Buthuku bughuma mwahwa amani n’erianza eribikyako. Aliwe mwathabikyako. Busana naki? “Ekinywe ky’Omwami Mukulhu” kyabya ng’omuliro omw’isi wa Yeremia, neryo abya isyanga thoka erikihunira! Nethu ku thukanayowa thuthya thwamabirisulya Ekinywe kya Nyamuhanga omwa malengekania n’omwa mithima yethu. Eyo ni yindi nzumwa eyanga leka ithw’igha e Biblia buli kiro n’erighanirya kuyo. Neryo etseme yethu iyikendi lholha embere eriyongera, n’abandu bangyi ibathuhulikirira.​—Yer. 15:16.

21. Thwanga singura thuthi erihwa amani?

²¹ Deborah oyo thulyakanayako ahighulhu akabugha athi: “Erihwa amani ni kindu ekyo Sitani akakolesaya kutsibu.” Aliwe Yehova Nyamuhanga awithe amaaka manene okwa bya Sitani akakolesaya. Neryo hamabya ekyanga kughunza amani, saba Yehova y’obuwathikya. Akendi kuwathikya erirwanisya eriyowa nabi busana n’ebisobyo byawu n’eby’abandi. Akendi kusighika omughulhu wulhwere. Akendi kuwathikya eribya n’amalengekania awatholere okw’ihebwa esyonzunzo. Kandi akendi kuwathikya eribya n’amalengekania awatholere okwa mubiiri w’erithulira. Bwira Thatha wawu w’elhubulha ebiri okwa muthima. Busana n’obuwathikya bwiwe, wangana singura erihwa amani.