1. Vɛɛ kɔl tambɛiyo paaliaŋ yɛ naa?

MI BAHAWƐILAŊ la komal naa lepaa o lepaa. Nduyɛ, miŋ kindiŋ le laŋ solioo mɛɛ kpɛ naŋ tiuba yɛ. Kɛ wana dimi isɔɔ a tonya, te ŋ wa pɛ a kɔl tambɛiyo mi bahawɛilaŋ la komal naa, mbo wa ikala le laŋ solioo. Kɔl tambɛiyo cho nyɛ kɛndɛ kposoŋ te. O nɔla mbo dii naa dialloŋ nduyɛ mbo tosa ŋ ve lɛ a nyaale le. Pulɔwaa 24:​10 (NWT) dimi aa: “Te dɛnɛ palaa o komal num pɛ, ma tambu kɔl, mi yoomuaŋ ma chuu num fo.” A tonya, kɔl tambɛiyo nɔla mbo soli naa yoomuaŋ, nduyɛ miŋ dema le bahawɛila komal naa laŋ biyɔɔ nyɛkɛndɛi.

2. Sɔɔŋ kuɛɛ tɛɛmbuu yɛ naa kɔllo nduyɛ yɛɛ naŋ cho yɛ yaasiaa o buŋgɛi hei niŋ?

² Sɔɔŋ bɔɔbɔɔ nɔla miŋ chuu naa kɔl tambɛiyo. Naapila o ŋdial sɔɔŋ muŋ ŋpum fula ni, kɛ ŋpum yɛ, o cho a naapila le. Le taamaseliiyo, lepum miŋ tosa biondɔŋndaŋ, miŋ nɔ dialuŋ vilɛiyoŋ le sɔɔŋ pum tosaa, ɔɔ miŋ nɔ kɛndiaa lepɛŋndo. Lepum vɛlɛ, miŋ wa kɔl le ma ke naa waltaŋ lapum o kɔɔna Chɛhowaa niŋ, kɛ ŋ sɔla le. Ɔɔ miŋ wa yooŋgu kɛndɔɔ dimioo kɛ wanaa cho o tanda naa niŋ nda yeŋ naa lani le. O buŋgɛi hei niŋ, ŋ cho yaasiaa sɔɔŋ naŋ nɔ miŋ tosa woŋ ŋtiŋ le halikpeŋ miŋ tiu kɔl tambɛiyo ba.

3. Te ŋ benduŋ pɛ, yɛɛ mala yɛ naa miŋ nɔ yiyaŋ kɛndɔɔ a naapila okɔɔ?

³ O wa bɔɔ tɛtɛlɛ le miŋ nɔ yiyaŋ wɔɔŋndo a naapila okɔɔ taama taama te ŋ wa pɛ biondɔŋndaŋ tosaa ɔɔ miŋ nɔ dialuŋ vilɛiyoŋ ŋpum. Le hei, miŋ yiyaŋ maa Chɛhowa cho naa chɛlɔɔ miŋ luɛi o chieeŋ sɛnɛiyo niŋ te. Yiyaŋ waa naa cho yiyaŋ kɛndɛ kposoŋ te. Vɛɛ naŋ nɔ yɛ miŋ che biondɔŋnda naalaŋ? Baabuiyo dimul naa maa Chiisu kinɛi wa wana walaŋndo o chieeŋndo choo ni. Kɛ naa niŋ kpou, wanaa lahakiaa naŋ cho ni. (Luomaŋ.  3:​23) Chɛhowa nuuviaa naa siɔuwoŋ o ŋdial te. O sina maa mɛɛ mɛɛ naŋ kindiŋ, mɛɛ miŋ benduŋ. Finya naa kaalaa o cho ni nduyɛ o cho lɔɔlɔɔ o bɛɛndiaŋ le naa malaa. O sina mɛɛ naŋ cho kindiŋndo le dialuŋ naŋ vilɛiyoŋ chɔulabaa yɛ. O sina vɛlɛ mɛɛ naŋ cho chɔulabaa le yiyaŋ wɔɔŋndo soliŋndo o kɔl a naapila okɔɔ yɛ. Le hei, mbo biunuŋ naa lɔɔlɔɔ.—Luomaŋ. 7:​18, 19.

4-5. Vɛɛ nyɛ dimiŋ o Chɔŋ Tasoo 3:​19, 20 niŋndo mala yɛ ndepiliaa a ŋiɔɔŋ le kɔl tambɛiyo chɔulabaa?

⁴ Tofawɔ taamasi Diboolua nda Maliaa wo. * Teleŋ Diboolua wa chuaambɔ wo, yuŋgu ndɔɔ chiee ndu biyɔɔ le. Mi ndaa tusi ndu siɔmbulaŋ nduyɛ i wa ikala le ma chandu ndu. Le hei, mbo sul a yiyaŋ koŋ maa o cho wana sɔvɛ le. Te ndoo tosa pɛ biondɔŋ pɔmbɔ, o yiyaŋ maa o nɔla mbo tosa suɛi kɛndɛ lɔɔlɔɔ le. Bahawɛi pilɔɔ hoo Maliaa bɛɛ ndoo nɔ ni. Ndu bɛɛ mi yuŋgu ndɔɔ ndoo tusi ndu siɔmbulaŋ tau. Mi hei ke ndu yiyaŋndo maa o cho wana sɔvɛ le. Mɛɛ o hiŋ o tonyaa niŋ, mbo yiyaŋ pɛŋ maa o suliŋ le ma veelu ndu aa Sei Chɛhowaa le.

⁵ Ndepiliaa ŋiɔɔŋnda haa mel Chɛhowa piɛiyo le. Le yɛɛ? Kanifuule, ma chɔm ndu bahawɛi ndaa o piɛileŋ niŋ. (Sam 55:​22) Ma pɛɛku maa Finya naa kaalaa cho o choo choo niŋndo sina sɔɔŋ yɔŋnuŋ naa paandu woŋ. Nduyɛ maa mi sɔɔŋ muŋ paaliaŋ yiyaŋ naa tau. O sina vɛlɛ suliŋnda kɛndɛla naŋ nɔ laŋ, o yɔŋ bɛɛ miŋ yiyaŋ maa ŋ cho wanaa kɛndɛ le.—Nuawɔ Chɔŋ Tasoo 3:​19, 20.

6. Vɛɛ kɔllo wa yɛ waŋndo te o miŋgi pɛ balaŋ o kaa o cho kindiŋndo le malɔɔ wo niŋ?

⁶ Lepum, mi waŋndo wa kindiŋndo le kaa wɔɔŋndo malɔɔ. Kɛ te o miŋgi vɛlɛ pɛ balaŋ o kaa koŋ niŋ, mbo tambu kɔl tau. O kpeekpei niŋ, ŋ nɔ miŋ tambu kɔl te ŋ tosa pɛ hakioo. (2 Kɔliŋ. 7:​10) Kɛ ŋ nɔ miŋ hiu kɔllo tambu okoŋ miŋ pɛɛsa naapila le. Ɔɔ miŋ dimi aa: ‘I tosa suɛi kɛndɛ lɔɔlɔɔ le. Chɛhowa mel la niŋ haki le.’ Yiyaŋ waa naa chɛlaŋ a nyɛ Baabuiyo dimi wo le. Nduyɛ, o nɔla mbo tosa miŋ mal Chɛhowa piɛiyo. Loonuŋ maa Pulɔwaa 24:​10 dimi maa mi kɔl tambɛiyo dii wana dialloŋ. Lelaŋ, te a tosa hakioo pɛ, kɔ o Chɛhowa lo le mi la ‘dimi diom pilɔɔ.’ A tosa hei te a nyɔɔlu ndu pɛ o piɛileŋ niŋ le mbo mal num haki. (Aisaya 1:​18) Te Chɛhowa che pɛ maa a kɔllo kpou ŋ cho ndu nyɔɔloo ni nduyɛ maa a cho kindiŋndo le ma siŋgaŋ, o cho num malɔɔ haki. O fulawɔ okoŋ kɔɔli, a nɔ ma kuɛ o bɛnduaa lo le ma mala num mi chaŋyɛi miiŋgu nya tɛɛŋ nya Chɛhowa.—Chemi. 5:​14, 15.

7. Te ŋ wa pɛ kaa pum chɔulabaa, le yɛɛ naŋ nɔ yɛ miŋ tambu kɔl te?

⁷ Tofawɔ diomnda kɔl dɛɛniaala Siaŋ Luk, bɛndu kunda cho Filaŋsi wo dimi le wanaa cho dialuŋ ndaŋ vilɛiyoŋ chɔulabaa wa. Mbo dimi aa: “O cho wana binduŋ kposoŋ te wo le  Chɛhowa chua maa o cho wana sakpo le. Kɛ wana kial suei le biondɔŋ ndɔɔ nduyɛ mbo kindiŋ le ndu malɔɔ wo.” (Luomaŋ. 7:​21-25) Lelaŋ, te a wa pɛ kaa pum chɔulabaa ma benduŋ, tambu kɔl ma hiou ba le. Loonuŋ maa te o cho a sala baŋaa Chiisu wo le, wana o wana nɔla mbo wa sakpo Mɛlɛka o hɔl te.—Ɛfi. 1:​7; 1 Chɔŋ 4:​10.

8. Te kɔl tambɛiyo komal naa pɛ, nɛɛ yaa nɔla yɛ ma dɛɛniaa naa?

⁸ Puaapiliaa a ndepiliaa cho o kundaa niŋ nda nɔla ma ke naa kɔl dɛɛniaa! Te ŋ wa nda bahawɛi naa chɔmndo pɛ, ma yaŋ naa nilaŋ nyɛkɛndɛi nduyɛ ma dimul naa diomnda dɛɛniaa naa kɔllo laŋ. (Pulɔ. 12:​25; 1 Tɛsa. 5:​14) Kɔl tambɛiyo paaliaŋ niŋ Chɔi, ndepilɛnɔ cho Naŋchiiliaa wo le teleŋnda bɔɔbɔɔ. Mbo dimi aa, “Te ndoo ve kɔl dɛɛniaa puaapiliaa a ndepiliaa wa ya kioo wo le, I sina mɛɛ sɔɔŋ wa ya wa choo yɛ le. Nda mala ya ni le sinaa kɛsɛ maa Chɛhowa muli piɛile nileŋ. Taamasi ndaa mala ya niŋ le sinaa mɛɛ wana dɛɛniaa waŋnda kɔllo yɛ.” Ŋ nɔ miŋ kɛsiŋ o kɔl maa teleŋndaŋ lapum miŋ wa a kɔl tambɛiyo, kɛ puaapiliaa naa sina le. Mɛɛ miŋ dimul nda malaŋ nda sina. Lelaŋ te sɔɔŋ kendu naa pɛ choo, ŋ nɔ miŋ dimul chaaŋaa naa kendu o Mɛlɛka piɛiyo niŋ nda le malaa.

9. Vɛɛ nyɛ dimiŋ o Sam 41:​3 a 94:​19 niŋndo dɛɛniaa ya naa kɔllo?

⁹ Nyuna Chɛhowa le mbo mala num. Mi yiyaŋnda wɔɔŋndaŋ la hiŋ naa o kɔl tau te ŋ del pɛ a naa ɔɔ miŋ nɔ naa siŋgu le wo. Chɛhowa tosa hau kaamaa le naa siŋgioo le. Kɛ te ŋ wa pɛ a naa, mbo dɛɛniaa naa kɔllo nduyɛ mbo luei naa yoomuaŋ le miŋ biuŋ. (Nuawɔ Sam 41:​3; 94:​19.) Le tamaseliiyo, mbo soliŋ chaaŋaa naa laalaŋnda kpeku le ma mala naa walta pɔmpɔmbɔ laŋ tosaa o bɛɛ a piinduulaŋ. Lepum pɛŋ ma piɛi a naa latulu. Ɔɔ, mi Chɛhowa mala naa vɛlɛ le miŋ loonuŋ bolii Baabui soo a chieeŋ sɛnɛiyo okɔɔ ve. Bolii Baabuiye hei chɔm maa naalaŋ a nyɛ nɛiyaa cho hunɔɔ faŋaŋ.—Luomaŋ. 15:​4.

10. Yɛɛ mala yɛ Isaŋ mbo pɛŋgi kɔl tambɛiyo mɛɛ kpundɔɔ komal ndu?

¹⁰ Teleŋ pilɛ, mi kpundɔɔ komal Isaŋ puaapilɛnɔ cho Naŋchiiliaa wo. Mɛɛ nda kuɛ a ndu o lapita, mi wana ndɔ chiɔuwaa dimul ndu maa fɛŋ bɛɛ o cho lɛ nɔla mbo kuɛ a ba ndɔ le. Mi Isaŋ dimi aa, “Mɛɛ ya tuei lende, mi kɔllo laasiaŋ ya niŋ kpou nduyɛ mi bii mɔnɛi tau.” Baa mi ndoo lo pa o mɔnɛi keŋ niŋ? Sako! Yɛɛ mala yɛ ndu mbo pɛŋgi kɔl tambɛiyo? Mi Isaŋ hiau lachi a dimioo aa, “Mi naŋ piɛi lɔɔlɔɔ o Chɛhowa lo naa laa nuu nduyɛ mi naŋ pɛɛku vɛlɛ Diom ndɔɔ. Miŋ kɛɛsiaa vɛlɛ le kɔllo kɛsioo o sɔɔŋ kɛndɛŋ Chɛhowa tosal naa niŋndoŋ choo. Sɔɔŋ muŋ ipilɛ cho tiindaŋ o ke naa le waa achal o chieeŋ sɛnɛiyo niŋndo ni.”

11. Yɛɛ mala yɛ Sindi mbo wa a nyaale mi che bɛɛ o wa a dialii nɛyɛi kala kalɛi?

¹¹ Mi wana chiɔuwaa dimul ndepilɛnɔ pilɛ o Mɛsiko niŋ diolaŋ Sindi maa naa bii ndu wo cho ndu keleŋa diyɔɔ. Yɛɛ mala yɛ ndu mbo biuŋ? Te wanaa chiɔuwaa ndaa kuɛ pɛ le ndu koowaŋ kioo, mi ndoo dimul nda yooŋgu kɛndɔɔ. Mbo dimi aa: “Mi hei tosa mi muli hɔlla le waŋnda malaa. Okoŋ, mi faŋa kɔllo o yambɔɔ yaa nɔ le sɔlaa wo a nyɛ nɛiyaa wa ya wo. Mɛɛ yaa dimi yooŋgu kɛndɔɔ yɛ wa hoo ni. Te yaa wa pɛ baltaŋ naa wanaa niaa chiɔuwaa, mi yaa nyuna nda a yuŋgula ndalaŋ okɔɔ. Okoŋ mi yaa nyuna nda le sabu nda pɛɛku wali kala koŋ ndo. Te ndaa mulul la pɛ, I sina dɔɔ mɛɛ yaa suaa o nda lo mi pilaŋ nda kɔllo yɛ. Mi a bɔɔbɔɔ dimi maa i cho ikala le mi wana naa nyuna wana ndɔ chiɔuwaa aa, ‘Vɛɛ ŋ lɔl lɛ?’ Mi ndaa chandu ya le mɛɛ yaa buulaŋ a nda okɔɔ yɛ. Mi apum ke ya pɛŋ nɔmbɛi foŋ ndaa.  Mi Chɛhowa ke ya kɔl dɛɛniaa ya ve kɔl te wo o teleŋ kala kalaa hoo niŋ.—Pulɔ. 15:​15.

12-13. Vɛɛ puaapiliaa a ndepiliaa cho a naalaŋ nda a bɛnduaa yuuwa apum cho yɛ hau yooŋgu kɛndɔɔ dimioo nduyɛ, yɛɛ cho yɛ fulamakɔɔlioo?

¹² Mi puaapiliaa a ndepiliaa cho a naalaŋ nda tambu kɔl kanifuule, a nɔla lɛ tosaa tau o wali pollo niŋ maa paandu le. Kɛ a koŋ kpou, a bɔɔbɔɔ cho nɛilaŋ nuuviaa le yooŋgu kɛndɔɔ dimioo. Ndepilɛnɔ pum wa a naa Amɛlika diolaŋ aa Laulɛl. Ma wou ndu o maasii wa ndu malaa le yoomoo wo niŋ le wɔsilaŋ 37! Ndoo nɔ kaŋsɛiyo, nduyɛ mi naa pum ndoo fula ndu lekɔɔ. Mbo kei vɛlɛ o yambɔɔla bɔɔbɔɔ bɛŋgu. Kɛ a simulta wa ndu laŋ choo laŋ kpou, o wa yooŋgu kɛndɔɔ dimioo. Mi ndoo dimul wanaa nduaa chiɔuwaa yooŋgu kɛndɔɔ a wanaa ndaa kua ndu yilɔɔ wa. Yɛɛ wa yɛ fulamakɔɔlioo? Wanaa o mala ma sina tonya Baabuiyo wa ndaa wa le ŋwaŋ 17! *

¹³ Mi Luichad bɛndu kunda cho Filaŋsi wo yɔŋgu kɛɛsiaa le wanaa nɔla lɛ fulaa le yooŋgu kɛndɔɔ dimioo le wa. Mbo dimi aa, “O bɛnda ma you nda pɛŋgɛi naŋ dimi yooŋgu kɛndɔɔ ve a yaulaŋ lechoo. Te wanaa kua nda yilɔɔ wa che pɛ yaulaŋ ndaŋ, a nɔla ma nyuna okoŋ ma kandu baltaŋ nda ndaa. Mi hei dɛɛniaa puaapiliaa a ndepiliaa nɔla lɛ haa kɔlaŋ yooŋgu kɛndɔɔ dimioo le wa tau.” Wanaa nɔla lɛ fulaa o bɛɛ le wa nɔla ma dimi yooŋgu kɛndɔɔ o nɛi cheleŋ niŋ. A poonyial waŋnda yaulaŋ ɔɔ ma veelu nda o foŋndo choo.

14. Taamasi kɛndɛ kuɛɛ Deeve kɛsul lɛ naa?

¹⁴ Miŋ yeema dilakeŋnaŋ ndaŋ lapum o kundaa niŋ kɛ ŋ sɔla le. Le yɛɛ? Kanifuule, mi yuuwɛi, kɛndiaa lepɛŋndo, ɔɔ bahawɛila cheleŋ la kuuna naa waltaŋ lapum tosaa. O hei niŋ, taamasi Masaa Deeve wo nɔla mbo mala naa tau. Deeve ndoo nɔ yeemɛi le chiɛi Mɛlɛkaa taŋgullo. Kɛ mɛɛ nda dimul ndu maa o cho ndu le cho ndu taŋgul te, mbo toolu wana Mɛlɛka hɛli le wali koŋ tosaa wo. Mi Deeve yɔŋgu nyɛm baa kalaŋ tau le mi chiɛiyo hoo taŋguluŋ. Taamasi kɛndɔɔ pila o kɛsi hoo le naa ni!—2 Saam. 7:​12, 13; 1 Kolo. 29:​1, 3-5.

15. Yɛɛ mala yɛ Hius mbo pɛŋgi kɔl tambɛiyo?

¹⁵ Bɛndu kundaa Hius wa o Filaŋsi niŋ ni. Kɛ mɛɛ bahawɛi kɛndiaa komal ndu, mi dikeŋnaŋndo hoo hialuŋ ndu. Nduyɛ, ndoo nɔla lɛ walta taaniŋndaŋ tosaa o ndu lo bɛɛ le. Mbo dimi aa: “Mi tambu kɔl puɛɛ o tasela ndɔ nduyɛ mi yiyaŋ pɛŋ maa I cho wana sɔvɛ le. Mɛɛ teleŋ tiŋ hiou, mi cha maa i cho bɔɔ suɛi sɔvɛ le mi pɛŋgi kɔl tambɛiyo. Kanifuule, yaa nɔla lɛ waltaŋ ndaŋ tosaa le. Mi naŋ kɔl tau le tosaa o ya tiuba o wali Chɛhowaa niŋndo. I kɛɛsiaŋ o kɔl maa fɛŋ bɛɛ I mel Chɛhowa piɛiyo le. Maa Kidiɔŋ a puaa nduaa kɛmɛ leyaa wa a saŋgɛi ya  wa, ya bɛɛ cho hiouwɔɔ lachi a chɔulabaa haaa o mɛɛlulaŋ!”—Chɔɔchi. 8:​4.

16. Yɛɛ naŋ pɛɛku yɛ o taamasi maalikɛiya niŋ?

¹⁶ Maalikɛiyaa cho le Mɛlɛka wa cho bɔɔ taamasi kɛndɛ le naa. Teleŋ Ehabi wa o masaleŋ choo wo, mi Chɛhowa nyuna maalikɛiya le ma chɔm nɛi nda nɔla ma hui masa dɛnɛ wɔɔŋndo hoo wo. Mi a bɔɔbɔɔ chɔm nɛila teŋgeŋ teŋgeŋndaŋ le hei tosaa. Kɛ mɛɛ opum chɔm nɛiyo o ndɔɔ, mi Mɛlɛka chɛl kɛɛsiaa ndɔɔ. Mbo dimul ndu maa te o kuɛ pɛ o cho lakɔ batiuwaa sɔla. (1 Masaa. 22:​19-22) Baa mi maalikɛiya a tuaa tambu pa kɔl le mɛɛ Chɛhowa kɛɛ kɛɛsiaa ndaa yɛ? Baa mi ndaa yiyaŋ pa maa ndoo wa fisa mi ndaa meinuŋ? Sako bɛɛ. Maalikɛiya tusiŋ bɔɔ, nduyɛ, Chɛhowa ndupilɛ kpe nda yeema ni mbo sɔla saŋgalaa.—Chɔɔchi. 13:​16-18; Sɔɔŋ. 19:​10.

17. Yɛɛ naŋ nɔ yɛ miŋ tosa te ŋ tambu pɛ kɔl le mɛɛ naŋ sɔla dilakeŋnaŋ ndaŋ lapum te yɛ?

¹⁷ Naa kpou nɔ dioo le mi diola Mɛlɛkalaŋ la wa naa choo a le yooŋgu kɛndɔɔ dimioo a Masale ndɔleŋ okɔɔ. Lelaŋ, kɛsi kɔllo o keŋ choo. Ma ke naa hau wallo le tosaa o kɔɔna Chɛhowaa niŋ, kɛ siɔdii mi wali koŋ siŋgaŋ. Kɛ kɛsiŋ o kɔl maa o cho walta nda ke naalaŋ ndaŋ te la tosa miŋ wa wanaa sɔvɛ Mɛlɛka o hɔl te. Te ŋ sina pɛ kpeleŋ naa nduyɛ miŋ wa wanaa tusiaŋ, koŋ tosa mi Chɛhowa a puaapiliaa a ndepiliaa naa kaala naa. Lelaŋ, piɛi o Chɛhowa lo le mbo mala num ma hiou lachi a suliŋndaŋ ndaŋ chɔmndo. Baabuiyo soo tau a wanaa kɛsi taamasi kɛndɔɔ le kpeleŋ ndaa sinaa a kaa tusiaŋndo chɔmndo wa okɔɔ. Chua teleŋndo ma yiyaŋ o taamasilaŋ ndaŋ choo. Yɔŋguŋ le puaapiliaa numnda malaa o nɛi o nɛi niŋ.—Sam 138:​6; 1 Pitɛ 5:​5.

18-19. Yɛɛ mala yɛ num ma wa a nyaale o wali pollo niŋ o yɔŋ bɛɛ mi waŋnda kɛɛ le num nilaŋ yaŋɔɔ?

¹⁸ Baa a tambu niŋ pa kɔl le mɛɛ ŋ kuɛ yooŋgu kɛndɔɔ dimioo mi waŋnda kɛɛ le num nilaŋ yaŋɔɔ yɛ? Ɔɔ naapum ma tambu kɔl le mɛɛ ŋ komal waŋnda o la nda lo bɛɛ le yɛ. Te o yɔŋ pɛ aa o tanda waa naa niŋ naŋ cho ni, yɛɛ naŋ nɔ yɛ miŋ tosa le miŋ hiou lachi a waa a nyaale? Kɛɛsiaalaŋ lapum la cho o kɔfoo hoo niŋ, “ Nyɛ Ŋ Nɔ Ma Tosa le Ma Tuei Wali Pollo Yeela Wo.” O bɛnda bɔɔ ma nɔ yiyaŋ kɛndɔɔ a wali pollo okɔɔ. Yɛɛ hei sim yɛ?

¹⁹ Sabu kpeekpei naŋ kua o wali pollo niŋndo cho le mi waŋnda sina diola Mɛlɛkalaŋ a Masale ndɔleŋ ni. Kɛsi kɔllo o keŋ choo. Mi Chiisu dimi kpendekele maa waŋnda nyɛɛmbɔ koni cho lakɔ o nɛi yoomoo choo ni. (Maa. 7:​13, 14) Te  ŋ wa pɛ o wali pollo niŋ, miŋ tosa wallo latulu a Chɛhowa, Chiisu, a maalikɛiya. Bɛɛle bɛndeŋ pila naŋ sɔla leŋ ni. (Maa. 28:​19, 20; 1 Kɔliŋ. 3:​9; Sɔɔŋ. 14:​6, 7) Mɛɛ mi Chɛhowa che waŋndo o kɔl maa o yeema mbo piɛi ndu malaŋ o naŋnuŋ ndu o ibuŋ. (Chɔŋ 6:​44) Lelaŋ, te ŋ kuɛ pɛ yooŋgu kɛndɔɔ dimioo mi waŋndo yeŋ naa lani le, ŋ nɔ miŋ tambu kɔl te. Naapum te ŋ kuɛ pɛ lɔɔ cheleŋ, o cho nilaŋ yaŋɔɔ.

20. A mɛɛ naŋ che o Chɛluimaya 20:​8, 9 niŋ yɛ, yɛɛ naŋ nɔ yɛ miŋ tosa le miŋ pɛŋgi kɔl tambɛiyo?

²⁰ Taamasi Chɛluimaya wo nɔla mbo mala naa tau te o hiŋ pɛ a wali pollo okɔɔ. Wanaa ndoo dimul yooŋgu Mɛlɛkaa wa ndaa kendu bɔɔ bolle. Mi waŋnda haa ndaa yiou ndu nduyɛ mi ndaa tɛɛmbuu ndu bɛɛlaŋ “lepaa o lepaa.” (Nuawɔ Chɛluimaya 20:​8, 9.) A teleŋ pilɛ, mɛɛ o hiu kɔllo tambei tei, mbo yeema pɛŋ le wali Mɛlɛka ndoo ke ndu wo malɔɔ. Kɛ o mel te. Le yɛɛ? Mbo dimi maa “Mɛlɛka Yaawɛɛ . . . yooŋgula ndɔlaŋ” la wa ndu lumi lumioo maa le yiŋ. Le hei, ndoo nɔla mbo pɛŋgi suɛi le! Te naa bɛɛ pɛɛku pɛ Diom Mɛlɛkaa nyɛkɛndɛi, ŋ nɔla miŋ chalnuŋ miŋ kɛɛ waŋnda ndu dimul te. Le saboo hoo naŋ nɔ vɛlɛ ni miŋ pɛɛku Baabuiyo nduyɛ miŋ yiyaŋ o nyɛ naŋ pɛɛku wo choo. Te ŋ tosa lende pɛ, ŋ cho hiouwɔɔ lachi a waa a nyaale nduyɛ miŋ che fulamakɔɔli kɛndɔɔ o wali naa pollo niŋ.—Chɛlui. 15:​16.

21. Yɛɛ naŋ nɔ yɛ miŋ tosa le miŋ pɛŋgi kɔl tambɛiyo?

²¹ Mi Diboolua naŋ soo a ndu okɔɔ wo dimi aa, “Wolɔɔ chɔu Setana keleŋa lepum soliŋ kpeku le naa chɔulabaa wo cho kɔl tambɛiyo ni. Kɛ Chɛhowa nɔ kpaayaa mbo hiau Setana a wolɔɔ chɔu kɛ kɛ o nɔ. Lelaŋ te a tambu kɔl pɛ, piɛi o Chɛhowa lo le malaa. O cho num mala ma chɔulaba biondɔŋnda ŋ tosa laŋ a dialuŋ num vilɛiyoŋ. O nɔla vɛlɛ mbo mala num te a del pɛ a naa. Mbo mala num ma nɔ yiyaŋ kɛndɔɔ a dilakeŋnaŋndaŋ okɔɔ. Nduyɛ, o cho num mala ma nɔ yiyaŋ kɛndɔɔ a wali pollo okɔɔ. Fɛŋ bɛɛ kɛɛ le Finya num kaalaa cho o choo choo niŋndo sɔɔŋ paaliaŋ num ndoŋ dimullo le. Kanifuule, o nɔla mbo mala num ma pɛŋgi kɔl tambɛiyo.