၁. ပ​မ့ၢ်​သူၣ်​ဟးဂီၤ​သးဟးဂီၤ​တၢ်​န့ၣ်​ တၢ်​က​ကဲထီၣ်​အသး​ဒီး​ပှၤ​ဒ်လဲၣ်.

တနံၤ​​ဘၣ်​တနံၤ ပ​ထံၣ်​ဘၣ်​တၢ်ကီ​တၢ်ခဲ ဒီး​ပ​ဂုာ်ကျဲးစၢး​လဲၤခီဖျိ​အီၤ​လၢ အဂ့ၤ​ကတၢၢ်​လီၤ. ဘၣ်ဆၣ်​ ဖဲ​ပသူၣ်​ဟးဂီၤ​သးဟးဂီၤ​တၢ်​အခါ ပ​လဲၤခီဖျိ​ပ​တၢ်ကီ​တၢ်ခဲ တ​န့ၢ်​ဝဲ​ညီ​ညီ​ဘၣ်. အဃိ ပ​ကြၢး​ထံၣ်​ တၢ်​သူၣ်​ဟးဂီၤ​သးဟးဂီၤ ဒ်​တၢ်ဘျၣ်​လၢ​အ​ဟဲ​လၢ​မုၢ်နၤခီ လၢ​အ​မၤ​လီၤမၢ်​ကွံာ် ပ​တၢ်​သူၣ်ဒူ​သးဒူ, ပ​တၢ်​သူၣ်ခု​သးခု, ဒီး​ပ​တၢ်​နာ်န့ၢ်​လီၤသး​လီၤ. ကတိၤဒိ ၂၄:၁၀ တဲ​ဝဲ​လၢ “န​သး​မ့ၢ်​လီၤဘှါ​လၢ တၢ်နး​တၢ်ဖှီၣ်​အမုၢ်​တနံၤ​န့ၣ်​ဒီး, န​ဂံၢ်​န​ဘါ​မ့ၢ်​အ​ဆံး​လီၤ.” အဃိ ဖဲ​ပသူၣ်​ဟးဂီၤ​သူ​ဟးဂီၤ​အခါ ပ​ဂံၢ်​ပ​ဘါလီၤစၢ်​ဒီး ပ​က​လဲၤခီဖျိ ပ​တၢ်ကီ​တၢ်ခဲ​အဂီၢ် တ​ညီ​လၢၤဘၣ်.

၂. ပသူၣ်​ဟးဂီၤ​သးဟးဂီၤ​သ့​လၢ​ကျဲ​ဒ်လဲၣ်. ဒီး​လၢ​တၢ်​မၤလိ​အံၤ​အ​ပူၤ ပ​က​တဲသကိး​တၢ်ဂ့ၢ်​မနုၤ​လဲၣ်.

^၂ ပ​တၢ်​သူၣ်​ဟးဂီၤ​သးဟးဂီၤ အိၣ်​ထီၣ်​သ့​လၢ ကျဲ​အ​ကလုာ်​ကလုာ်​လီၤ. တနီၤ​န့ၣ်​ပှၤ​ထံၣ်​ဝဲ​သ့ ဒီး​တနီၤ​န့ၣ်​ပှၤ​ထံၣ်​ဝဲ​တ​သ့​ဘၣ်. တၢ်​သ့ၣ်​တဖၣ်​အံၤ ဟဲ​အိၣ်​ထီၣ်​ခီဖျိ​လၢ ပ​တလၢ​တ​ပှဲၤ​ဘၣ်, ပ​အိၣ်ဒီး​တၢ်​ဂံၢ်စၢ်​ဘါစၢ် ဒီး​တၢ်ဆူး​တၢ်ဆါ​အဃိ​လီၤ. တကးဒံးဘၣ်​ ပၣ်ဃုာ်ဒီး​ပ​အဲၣ်ဒိး ဒိးန့ၢ်​အါထီၣ်​မူဒါ​လၢ ယဟိဝၤ​ယွၤ​အ​တၢ်ဖံး​တၢ်မၤ​အ​ပူၤ ဘၣ်ဆၣ်​ ဖဲ​ပ​တ​ဒိးန့ၢ်​ဘၣ်​အခါ ပသူၣ်​ဟးဂီၤ​သးဟးဂီၤ​သ့​လီၤ. ဒီး​ဖဲ​ပ​တၢ်​စံၣ်တဲၤ​တဲ​လီၤ​တၢ်လီၢ်​ကဝီၤ တ​လဲၤထီၣ်​လဲၤထီ​ဒီး ပှၤ​တ​တူၢ်လိာ် ပ​တၢ်သးခု​ကစီၣ်​​ဘၣ်​အခါ ပသူၣ်​ဟးဂီၤ​သးဟးဂီၤ​သ့​ဝဲ​စ့ၢ်ကီး​လီၤ. လၢ​တၢ်​မၤလိ​အံၤ​အ​ပူၤ ပ​က​တဲသကိး​ကျဲ​တနီၤ​လၢ ပ​လဲၤခီဖျိ ပ​တၢ်​သူၣ်​ဟးဂီၤ​သးဟးဂီၤ က​သ့​အဂ့ၢ်​န့ၣ်​လီၤ.

၃. ဖဲ​ပ​တူၢ်​ဘၣ်​လၢ ပ​တၢ်ကမၣ်​အိၣ်ဒီး ပသူၣ်​ဟးဂီၤ​သးဂီၤ​အခါ တၢ်မနုၤ​က​မၤစၢၤ​ပှၤ​လဲၣ်.

^၃ ခီဖျိ​လၢ ပ​တလၢ​တ​ပှဲၤ​ဘၣ်​ ဒီး​ပ​မၤ​ကမၣ်​တ့ၢ်​တၢ်​အဃိ ညီ​ဒိၣ်မး​လၢ ပ​ကအိၣ်​ဒီး တၢ်ထံၣ်​လၢ​အ​တဂ့ၤ​လီၤ. လၢတၢ်န့ၣ်​အဃိ ပ​က​တူၢ်​ဘၣ်​လၢ ပ​မၤ​ကမၣ်​​ဘၣ်​တၢ် ဒီး​ယဟိဝၤ​ယွၤ​တ​အဲၣ်ဒိး​လၢ ပ​က​အိၣ်မူ​​ဘၣ်​လၢ ဟီၣ်ခိၣ်​ပၤရဒံစူး​အ​ပူၤ​ဘၣ်. တၢ်​ပာ်သူၣ်​ပာ်သး​ဒ်အံၤ​န့ၣ်​ ​လီၤ​ဘၣ်ယိၣ်​ဒိၣ်မး​အဃိ တၢ်ကမၣ်​လၢ​ပ​မၤတ့ၢ်​​ဘၣ်​န့ၣ်​ ပ​ကြၢး​ထံၣ်​အီၤ​ဒ်လဲၣ်.  လံာ်စီဆှံ​တဲ​ဝဲ​လၢ ပှၤ​ဟီၣ်ခိၣ်​ဖိ​ခဲလၢာ် “မၤ​တၢ်ဒဲးဘး” ထဲ​ယ့ၣ်ၡူး​တဂၤဧိၤ​န့ၣ်​ အ​တ​မၤ​တၢ်ဒဲးဘး​ဘၣ်. (ရိမ့ၤ ၃:၂၃) ဘၣ်ဆၣ်​ ယဟိဝၤ​ယွၤ​န့ၣ်​ တ​သးစၢၢ်ဆၢ​ပ​တၢ်ကမၣ်​ ဒီး​မုၢ်လၢ်တၢ်​လၢ​တၢ်​ပှဲၤ လၢ​ပ​အိၣ်ဘၣ်. လၢတၢ်န့ၣ်​အလီၢ် ပ​ပၢ်​ယဟိဝၤ​ယွၤ​အဲၣ်​ပှၤ, အဲၣ်ဒိး​မၤစၢၤ​ပှၤ ဒီး​အ​ဝဲ​ဝံသးစူၤ​ပှၤလီၤ. ပ​​ဘၣ်​လဲၤခီဖျိ ပ​တၢ်​ဂံၢ်စၢ်​ဘါစၢ်​ဒီး ပ​တၢ်ထံၣ်​လၢ​အ​တဂ့ၤ လၢ​ပ​နီၢ်ကစၢ်​အ​ဖီခိၣ်​အိၣ်​ဒ်လဲၣ်​န့ၣ်​ အ​သ့ၣ်ညါ​​ဝဲ​အဃိ အ​ဝဲ​သးအိၣ်​မၤစၢၤ​ပှၤလီၤ.—ရိမ့ၤ ၇:၁၈, ၁၉.

၄-၅. ဒ် ၁ ယိၤဟၣ်​ ၃:၁၉, ၂၀ ပာ်ဖျါ​ထီၣ်​ဝဲ​အသိး ဒီပုၢ်ဝဲၢ်​မုၣ်​လၢ အိၣ်ဒီး​တၢ်ထံၣ်​လၢ​အ​တဂ့ၤ​ဘၣ်​ လၢ​အ​နီၢ်ကစၢ်​အဖီ​ခိၣ်​ခံဂၤ​အံၤ ​ဘၣ်​မနုၤ​အဃိ တ​ဟ့ၣ်အၡူ​​ဘၣ်​လဲၣ်.

^၄ ပ​ကကွၢ်​သကိး ဒဲဘိရၤ​ဒီး မရံယၤ​အဂ့ၢ်​လီၤ. * ဖဲ​ဒဲဘိရၤ​အ​နီၢ်ဆံး​အခါ အ​ဟံၣ်ဖိ​ဃီဖိ ရ့​အီၤ​အၢ​အၢ​သီသီ ဒီး​တ​ပတြၢၤ​အီၤ​​ဘၣ်​အဃိ အ​ဝဲ​ဆိကမိၣ်​ဆံး​လီၤအသး​လီၤ. တ​က​ဒံး​ဘၣ်​ အ​ဝဲ​အိၣ်ဒီး​တၢ်ထံၣ်​လၢ​အ​တဂ့ၤ လၢ​အ​နီၢ်ကစၢ်​အ​ဖီခိၣ်​လီၤ. ဒီး​ဖဲ​အ​မၤ​​ဘၣ်​တၢ်ကမၣ်​ ဆံး​ဆံး​ဖိ​အခါ အ​တူၢ်​ဘၣ်​လၢ​အ​မၤတၢ်​န့ၣ်​ အ​ဘၣ်​တအိၣ်​နီတဘျီ​ဘၣ်. မရံယၤ​စ့ၢ်ကီး တူၢ်​ဘၣ်​​ဝဲ​ဒ်​န့ၣ်​လီၤ. အဘူး​အတံၢ်​တဖၣ်​န့ၣ်​ တ​ရ့​ဒီး​အီၤ​ဂ့ၤဂ့ၤ​ဘၣ်. အဃိ အ​တူၢ်​ဘၣ်​​ဝဲ​လၢ အလုၢ်​အပှ့ၤ​တအိၣ်​ဘၣ်. လၢခံ​အ​န့ၢ်ဘၣ်​ တၢ်မ့ၢ်​တၢ်တီ​ဒၣ်လဲာ် အ​တူၢ်​ဘၣ်​​ဝဲ​လၢ အ​တ​ကြၢး​ကဲ ယဟိဝၤ​ပှၤအုၣ်​အသး​လၢၤဘၣ်.

^၅ ဘၣ်ဆၣ်​ ဒီပုၢ်ဝဲၢ်​မုၣ်​ခံဂၤ​အံၤ တ​ပတုာ်​မၤ​ယဟိဝၤ​ယွၤ​အ​တၢ်မၤ​ဘၣ်. ​ဘၣ်​မနုၤ​အဃိ​လဲၣ်. တၢ်ဂ့ၢ်​တခါ​လၢ အဝဲသ့ၣ်​မၤဝဲန့ၣ်​မ့ၢ်ဝဲ အဝဲသ့ၣ်​ပာ်ထီၣ်​အ​တၢ်ဝံ​တၢ်​ယိာ်​လၢ ယဟိဝၤ​ယွၤ​အလိၤ ခီဖျိ​ဃ့​ဘါ​ထုကဖၣ်​ ဒီး​တဲ​ဘၣ်​ယဟိဝၤ​ယွၤ​လၢ အ​တၢ်​တူၢ်​ဘၣ်​တဖၣ်​လီၤ. (စံးထီၣ်​ပတြၢၤ ၅၅:၂၂) အဝဲသ့ၣ်​သ့ၣ်ညါ​​ဝဲ​လၢ ယဟိဝၤ​ယွၤ​ထံၣ်ဝဲ တၢ်​ကဲထီၣ်​အသး​ဒီး​ပှၤ ဒီး​ပ​တၢ်​တူၢ်​ဘၣ်​အိၣ်​ လၢ​ပ​နီၢ်ကစၢ်​အ​ဖီခိၣ်​ဒ်လဲၣ်. တကးဒံးဘၣ်​ ပ​တၢ်ဂ့ၤ​တၢ်ဝါ​အိၣ်​ဒ်လဲၣ်​န့ၣ်​ ပ​နီၢ်ကစၢ် မ့ၢ်​တ​သ့ၣ်ညါ​ဒၣ်လဲာ် ယဟိဝၤ​ယွၤ​ထံၣ်ဝဲ ဒီး​ပာ်လုၢ်​ပာ်ပှ့ၤ​​ဝဲ​န့ၣ်​လီၤ.—ဖး ၁ ယိၤဟၣ်​ ၃:၁၉, ၂၀ တက့ၢ်.

၆. ဖဲ​ပှၤဂၤ​ဂၤ မၤ​​ဘၣ်​တၢ်ကမၣ်​ဒ်​အလီၢ်​လီၢ် ဒီး​အသး​ဟးဂီၤ​​ဝဲ​အခါ အ​က​​ဘၣ်​မၤ​ဝဲ​တၢ်မနုၤ​လဲၣ်.

^၆ ပှၤ​တဂၤဂၤ ဂုာ်ကျဲးစၢး​​ဝဲ​ဒ်သိး အ​သု​တ​မၤ​​ဘၣ်​တၢ်ကမၣ်​ ဒ်​အ​ပူၤကွံာ်​တဂ့ၤ​အဂီၢ် ဘၣ်ဆၣ်​ မ့ၢ်​လၢ​အ​က့ၤ​မၤ​ဘၣ်​ တၢ်ကမၣ်​ဒ်​အလီၢ်​လီၢ်​အသိး​အဃိ အ​သူၣ်​ဟးဂီၤ​သူ​ဟးဂီၤ​​ဝဲ​လီၤ. တၢ်​တူၢ်​ဘၣ်​ဒ်အံၤ​န့ၣ်​ ကဲထီၣ်​အသး​သ့​လီၤ. (၂ ကရံၣ်သူး ၇:၁၀) ဘၣ်ဆၣ်​ ခီဖျိ​လၢ​ပ​မၤ​ကမၣ်​​ဘၣ်​တၢ်​အဃိ ပ​တ​ကြၢး​တူၢ်​ဘၣ်​လၢ ‘ပလုၢ်​ပပှ့ၤ​တအိၣ်​လၢၤ​ဘၣ်​ဒီး ယဟိဝၤ​ယွၤ​ပျၢ်​ပ​တၢ်ကမၣ်​ တ​သ့​လၢၤ​ဘၣ်​န့ၣ်​ဘၣ်.’ ​ဘၣ်​မနုၤ​အဃိ​လဲၣ်. ပ​မ့ၢ်​အိၣ်ဒီး တၢ်​တူၢ်​ဘၣ်​လၢ​အ​တဂ့ၤ​​ဘၣ်​တဖၣ်​န့ၣ်​ ပ​တ​အဲၣ်ဒိး​ဆဲး​မၤ ယဟိဝၤ​ယွၤ​အ​တၢ်မၤ​လၢၤဘၣ်. ကတိၤဒိ ၂၄:၁၀ တဲ​ဝဲ​လၢ ဖဲ​ပ​သးဟးဂီၤ​အခါ ပ​ဂံၢ်​ပ​ဘါ​က​လီၤစၢ်​​ဝဲ​လီၤ. လၢတၢ်န့ၣ်​အလီၢ် ပ​က​ဘၣ်​ “စံး​ကတိၤ” တၢ်​ဒီး​ယဟိဝၤ​ယွၤ ခီဖျိ​ပ​တဲပၠး​အီၤ ပ​တၢ်​တူၢ်​ဘၣ်​လၢ တၢ်​ထုကဖၣ်​အ​ပူၤ​ဒီး ဃ့​ပျၢ်​ပ​တၢ်ကမၣ်​လီၤ. (ယၡါယၤ ၁:၁၈) ဖဲ​ယဟိဝၤ​ယွၤ​ထံၣ်​ဝဲ​လၢ ပ​ပီၢ်ယၢ်​​လီၤ​ပသး​နီၢ်နီၢ် ဒီး​ပ​ဂုာ်ကျဲးစၢး​ဆီတလဲ​က့ၤ ပ​တၢ်အိၣ်မူ​အခါ အ​ဝဲ​က​ပျၢ်​ကွံာ်​ပ​တၢ်ကမၣ်​လီၤ. တ​က​ဒံး​ဘၣ်​ ပ​က​​ဘၣ်​လဲၤ​ထံၣ်​လိာ်သး​ဒီး တၢ်​အိၣ်ဖှိၣ်​သးပှၢ် ခီဖျိ​လၢ​အဝဲသ့ၣ်​သးအိၣ်​မၤစၢၤ​ပှၤလၢ တၢ်​ဝံသးစူၤ​အ​ပူၤ ဒ်သိး​ပ​က​အိၣ်ဆူၣ်​ထီၣ်​က့ၤ​လၢ နီၢ်သး​တခီ​လီၤ.—ယၤကိာ် ၅:၁၄, ၁၅.

၇. ဖဲ​ပ​အဲၣ်ဒိး​မၤတၢ်​လၢ​အဘၣ်​ ဘၣ်ဆၣ်​ ပ​မ့ၢ်​မၤ​​ဘၣ်​တၢ်ကမၣ်​န့ၣ်​ ​ဘၣ်​မနုၤ​အဃိ ပ​တ​ကြၢး​သူၣ်​ဟးဂီၤ​သးဟးဂီၤ​​ဘၣ်​လဲၣ်.

 ^၇ တၢ်​အိၣ်ဖှိၣ်​သးပှၢ်​ကၠ့​လူၤ လၢ​အ​အိၣ်​လၢ​ကီၢ်ဖြၣ်စ့ၣ်​န့ၣ်​ တဲ​ဘၣ်​ပှၤလၢ​အသး​လီၤစၢ်​တဖၣ်​လၢ “လၢ​ယဟိဝၤ​ယွၤ​အမဲာ်ညါ ပှၤတီ​ပှၤလိၤ​တဂၤ​န့ၣ်​ အမ့ၢ်​ပှၤလၢ​အ​မၤ​​ဘၣ်​တၢ်ကမၣ်​လီၤ. ဘၣ်ဆၣ်​ အ​ဝဲ​သး​တ​မုာ်​လၢ တၢ်​လၢ​အ​မၤ​​ဘၣ်​​ဝဲ​တဖၣ်​အဃိ ဒီး​အ​ပီၢ်ယၢ်​​လီၤ​က့ၤ​အသး​ထီဘိ​လီၤ.” (ရိမ့ၤ ၇:၂၁-၂၅) လၢတၢ်န့ၣ်​အဃိ တ​ဘၣ်​တူၢ်​ဘၣ်​လၢ န​လုၢ်​န​ပှ့ၤ​တအိၣ်​​ဘၣ်​န့ၣ်​တဂ့ၤ. ဖဲ​ပ​မၤ​ကမၣ်​တၢ်​အခါ ပ​က​​ဘၣ်​သ့ၣ်နီၣ်​ထီၣ်​လၢ ပ​ဝဲ​တဂၤ​မး ပ​တမ့ၢ်​ပှၤတီ​ပှၤလိၤ​လၢ ယဟိဝၤ​ယွၤ​အမဲာ်ညါ​ဘၣ်. လၢတၢ်န့ၣ်​အဃိ ပ​ဝဲ​ခဲလၢာ်​ပ​လိၣ်ဘၣ်​ ကစၢ်​ယွၤ​အ​တၢ်​သးကညီၤ​ဒိၣ်ဒိၣ်​မုၢ်မုၢ် ခီဖျိ​လၢ​ယ့ၣ်ၡူး​အ​တၢ်ပှ့ၤက့ၤ​လီၤ.—အ့းဖ့းစူး ၁:၇; ၁ ယိၤဟၣ်​ ၄:၁၀.

၈. ဖဲ​ပသူၣ်​ဟးဂီၤ​သးဟးဂီၤ​အခါ မတၤ​သ့ၣ်​တဖၣ်​ မၤစၢၤ​ပှၤ​သ့​လဲၣ်.

^၈ ပ​ဒီပုၢ်ဝဲၢ်​မုၣ်​ခွါ​လၢ တၢ်​အိၣ်ဖှိၣ်​အ​ပူၤ​န့ၣ်​ ဟ့ၣ်ဂံၢ်​ဟ့ၣ်ဘါ​ပှၤ​သ့. ဖဲ​ပ​တဲ​ဘၣ်​အဝဲသ့ၣ်​ ပ​တၢ်ကီ​တၢ်ခဲ​ဒီး ပ​အဲၣ်ဒိး​လၢ​အဝဲသ့ၣ်​ က​မၤမုာ်​ထီၣ်​ပသး​အခါ အဝဲသ့ၣ်​သးအိၣ်​ဒိကနၣ်​န့ၢ်​ပှၤ ဒီး​မၤမုာ်​ထီၣ်​ပသး​သ့​လီၤ. (ကတိၤဒိ ၁၂:၂၅; ၁ သ့းစၤလနံ ၅:၁၄) ဒီပုၢ်ဝဲၢ်​မုၣ်​ကၠဝဲ လၢ​အ​အိၣ်​လၢ​နဲးကၠံရံယါ လၢ​အ​အိၣ်ဒီး တၢ်​သူၣ်​ဟးဂီၤ​သးဟးဂီၤ​န့ၣ်​ တဲ​ဝဲ​လၢ “ယ​ဒီပုၢ်ဝဲၢ်​မုၣ်​ခွါ မ့ၢ်​တအိၣ်​​ဘၣ်​ဒု ယ​မၤတၢ်​တ​သ့​နီတမံၤ​ဘၣ်. ပ​ဒီပုၢ်ဝဲၢ်​မုၣ်​ခွါ​သ့ၣ်​တဖၣ်​န့ၣ်​ ပာ်ဖျါ​ထီၣ်​ဝဲဒၣ်​လၢ ယဟိဝၤ​ယွၤ စံးဆၢ​ယ​တၢ်​ထုကဖၣ်​ အဃိ ယ​သ့ၣ်ညါ​ထီၣ်​ဘၣ်​လၢ ယ​က​​ဘၣ်​မၤစၢၤ​ပှၤလၢ အသး​လီၤစၢ်​တဖၣ်​လၢ​ကျဲ​ဒ်လဲၣ်.” ပ​က​​ဘၣ်​သ့ၣ်နီၣ်​ထီၣ်​က့ၤ​လၢ ပ​လိၣ်ဘၣ်​ တၢ်​ဟ့ၣ်ဂံၢ်​ဟ့ၣ်ဘါ​အခါ​ဖဲလဲၣ်​န့ၣ်​ ပ​ဒီပုၢ်ဝဲၢ်​မုၣ်​ခွါ​တဖၣ်​ တ​သ့ၣ်ညါ​​ဝဲ​ဘၣ်. အဃိ ပ​က​​ဘၣ်​တဲဖျါထီၣ်​ပ​တၢ်​တူၢ်ဘၣ်​ ဒီး​ပ​က​​ဘၣ်​တဲပၠး​အီၤ​ပ​တၢ်ကီ​တၢ်ခဲ ဒ်သိး​အဝဲသ့ၣ်​မၤစၢၤ​ပှၤ​က​သ့​အဂီၢ်​လီၤ.

၉. စံးထီၣ်​ပတြၢၤ ၄၁:၃ ဒီး ၉၄:၁၉ န့ၣ်​ ဟ့ၣ်ဂံၢ်​ဟ့ၣ်ဘါ​ပှၤ​ဒ်လဲၣ်.

^၉ ဃ့​ယဟိဝၤ​ယွၤ အ​တၢ်မၤစၢၤ​တက့ၢ်. ဖဲ​ပ​အိၣ်ဒီး​တၢ်ဆါ ယံာ်​ယံာ်​ထၢ​ထၢ​အခါ ပ​ကအိၣ်​ဒီး တၢ်ထံၣ်​လၢ​အဂ့ၤ​အဂီၢ်​န့ၣ်​ တ​ညီ​ဝဲ​ဘၣ်. မုၢ်မဆါ​တနံၤ​အံၤ ယဟိဝၤ​ယွၤ​တ​မၤဘျါ ပ​တၢ်ဆူး​တၢ်ဆါ​လၢ ကျဲ​လၢ​အ​လီၤလိၢ်​လီၤလး​ဘၣ်. ဘၣ်ဆၣ်​ အ​ဝဲ​မၤမုာ်​ထီၣ်​ပသး​ဒီး ဟ့ၣ်​ပှၤ​တၢ်ဂံၢ်​တၢ်ဘါ ဖဲ​ပ​လိၣ်​ဘၣ်​အီၤ​အဆၢ​ကတီၢ် ဒ်သိး​ပ​လဲၤခီဖျိ တၢ်ဆူး​တၢ်ဆါ​က​န့ၢ်​အဂီၢ်​လီၤ. (ဖး စံးထီၣ်​ပတြၢၤ ၄၁:၃; ၉၄:၁၉ တက့ၢ်.) အဒိ, ယဟိဝၤ​ယွၤ​က​ထိၣ်ဟူး​ထိၣ်ဂဲၤ​ထီၣ်​ ဒီပုၢ်ဝဲၢ်​မုၣ်​ခွါ​လၢ က​မၤစၢၤ​ပှၤ​ဖဲ ပ​လိၣ်​တၢ်မၤစၢၤ ဒ်သိး​ဒီး​ပ​က​လဲၤ​ပှ့ၤတၢ် ဒီး​ပ​က​မၤ​ဟံၣ်ဃီ​တၢ်ဖံး​တၢ်မၤ​အခါ​လီၤ. တကးဒံးဘၣ်​ အ​က​ထိၣ်ဟူး​ထိၣ်ဂဲၤ​ထီၣ်​ ဒီပုၢ်ဝဲၢ်​မုၣ်​ခွါ​လၢ က​ဃ့​ဘါ​ထုကဖၣ်​န့ၢ်​တၢ်​လၢ​ပဂီၢ်​လီၤ. ​ဘၣ်​သ့ၣ်​သ့ၣ်​ ပ​ကသ့ၣ်​နီၣ်ထီၣ်က့ၤ လံာ်စီဆှံ​အဆၢ​လၢ အ​ဘၣ်ဃး​ဒီး​တၢ်​မုၢ်လၢ်​လၢ​ခါဆူညါ​လၢ ပ​က​အိၣ်မူ​​ဘၣ်​လၢ​ဟီၣ်ခိၣ်​သီ​အ​ပူၤ ပှဲၤ​ဒီး​တၢ်​အိၣ်ဆူၣ်​အိၣ်ချ့​လၢ​အဂ့ၤ​လီၤ. တၢ်ဂ့ၢ်​သ့ၣ်​တဖၣ်​အံၤ မၤမုာ်​ထီၣ်​ပသး​ဒိၣ်မး​လီၤ.—ရိမ့ၤ ၁၅:၄.

၁၀. ဖဲ​တၢ်​ကဲထီၣ်​အသး​ဒီး အါ​စဲ​သတူၢ်​ကလာ်​ဝံၤ​အလီၢ်​ခံ ​ဘၣ်​မနုၤ​အဃိ အသး​တ​ဟးဂီၤ​ဝဲ ထီဘိ​​ဘၣ်​လဲၣ်.

^၁၀ ဒီပုၢ်ဝဲၢ်​ခွါ​အါ​စဲ လၢ​အ​အိၣ်​လၢ နဲးကၠံရံယါ​န့ၣ်​ ခီဖျိ​တၢ်​ကဲထီၣ်​အသး​ဒီး​အီၤ သတူၢ်​ကလာ်​အဃိ အ​ခီၣ်​​လီၤ​ဘျ့​​ဝဲ​လီၤ. အ​ကသံၣ်​သရၣ်​တဲ​အီၤ​လၢ အ​ဟး​တ​သ့​နီတဘျီ​လၢၤဘၣ်. အါ​စဲ​တဲ​ဝဲ​လၢ “ယ​သူၣ်​ဘၣ်ဒိ​ယ​သးဘၣ်ဒိ ဒီး​ယ​သးဟးဂီၤ​လၢာ်​ပျီ” ဘၣ်ဆၣ်​ မ့ၢ်​အ​သူၣ်​ဘၣ်ဒိ​သးဘၣ်ဒိ ထီဘိ​ဧါ. တၢ်မနုၤ​မၤစၢၤ​အီၤ​လဲၣ်. အါ​စဲ​တဲ​ဝဲ​လၢ “ယၤ​ဒီး​ယ​မါ ပ​တ​ပတုာ်​ဃ့​ဘါ​ထုကဖၣ်​တၢ်​လၢ ယဟိဝၤ​ယွၤ​အ​အိၣ်​နီတဘျီ​ဘၣ်. ထီဘိ​န့ၣ်​ ပ​မၤလိ​ယဟိဝၤ​ယွၤ​အ​ကလုၢ်​ကထါ အဃိ ပသး​မံ​ဒီး​တၢ်​လၢ​အ​အိၣ်ဒီး​ပှၤလီၤ. တကးဒံးဘၣ်​ တၢ်​မုၢ်လၢ်​လၢ​ခါဆူညါ ဘၣ်ဃး​ဒီး​ဟီၣ်ခိၣ်​သီ​န့ၣ်​ မ့ၢ်​တၢ်​နီၢ်ကီၢ်​လၢ​ပဂီၢ်​လီၤ.”

၁၁. ဖဲ​ဒီပုၢ်ဝဲၢ်​မုၣ်​စဲဒံၤ ထံၣ်​ဘၣ်​ဒီး​တၢ်​အိၣ်ဆူၣ်​အိၣ်ချ့ လၢ​တဂ့ၤ​​ဘၣ်​အခါ တၢ်မနုၤ​မၤစၢၤ​အီၤ​လၢ အ​ကအိၣ်​ဒီး​တၢ်သးခု​လဲၣ်.

^၁၁ ဒီပုၢ်ဝဲၢ်​မုၣ်​စဲဒံၤ လၢ​အ​အိၣ်​လၢ ကီၢ်မဲးကစံၣ်ကိၣ်​န့ၣ်​ အိၣ်ဒီး​တၢ်ဆါ​လၢ အ​​လီၤ​ဘၣ်ယိၣ်​လၢ အသး​သမူ​အဂီၢ်​လီၤ. အ​ဝဲ​လဲၤခီဖျိ တၢ်ဆါ​အံၤ​န့ၢ်​ဒ်လဲၣ်. ဖဲ​အ​လဲၤ​ကူ​ဆါ​ယါဘျါ​အသး​အခါ အ​ဝဲ​ပာ်​လီၤ​ဖီတၢၣ်​လၢ အ​က​စံၣ်တဲၤ​တဲ​လီၤ​တၢ် ကိးနံၤဒဲး​လီၤ. အ​တဲ​ဝဲ​လၢ “ယ​မၤ​ဒ်​န့ၣ်​အဃိ ပ​တ​သးစၢၢ်ဆၢ ယ​နီၣ်​ကစၢ်​တၢ်ဆူး​တၢ်ဆါ​ဒီး တၢ်​လၢ​ယ​​ဘၣ်​တူၢ်​ဘၣ်​သ့ၣ်​တဖၣ်​န့ၣ်​ဘၣ်. လၢတၢ်န့ၣ်​အလီၢ် ယ​သးစၢၢ်ဆၢ​လၢ ပှၤဂၤ​အ​တၢ်လိၣ်​ဘၣ်​လီၤ. ဖဲ​ယ​တဲ​သ​သိးတၢ်​ဒီး​ကသံၣ်​သရၣ်  ဒီး​ပှၤလၢ​အ​ဘၣ်​ကွၢ်ထွဲ​ယၤ​တဖၣ်​အခါ ယ​သံကွၢ်​အဝဲသ့ၣ်  အ​ဟံၣ်ဖိ​ဃီဖိ​အဂ့ၢ်​ဒီး ယ​သံကွၢ်​​ဘၣ်​မနုၤ​အဃိ အဝဲသ့ၣ်​ဃုထၢ တၢ်ဖံး​တၢ်မၤ​လၢ​အကီ​လဲၣ်. ဖဲ​န့ၣ်​ဝံၤ​အလီၢ်​ခံ ယ​ထံၣ်​ဘၣ်​လၢ ယ​က​​ဘၣ်​တဲပၠး​အဝဲသ့ၣ်​ တၢ်ဂ့ၢ်​မနုၤ​လဲၣ်န့ၣ်​ ယ​သ့ၣ်ညါ​ထီၣ်​အဃိ  ညီ​ဒိၣ်မး​လၢ ယ​က​တဲတၢ်​ဒီး​အဝဲသ့ၣ်​န့ၣ်​လီၤ. ကသံၣ်​သရၣ်​အါဂၤ​န့ၣ်​ တဲ​ဝဲ​လၢ ပှၤဆါ​က​သံကွၢ်​ အဝဲသ့ၣ်​ ‘န​အိၣ်ဆူၣ်​ဧါ’ န့ၣ်​ တအိၣ်​ကြီကြီ​ဘၣ်. ဒီး​ကသံၣ်​သရၣ်​အါဂၤ စံးဘျုး​ယၤ ဒီး​တနီၤ​န့ၣ်​ ဟ့ၣ်​လီၤ​ယၤ​အဟံၣ်​နီၢ်​ဂံၢ်​ဒီး အ​လီ​တဲဆိ​နီၣ်ဂံၢ်​လီၤ. အဃိ ဖဲ​တၢ်​ဆၢကတီၢ်​အကီ​အခဲ​အံၤန့ၣ်​ ယ​ထံၣ်​ဘၣ်​လၢ ယဟိဝၤ​ယွၤ​ဟ့ၣ်​ယၤတၢ်​သူၣ်မံ​သးမုာ် ဒီး​တုၤ​ဒၣ်လဲာ်​မၤစၢၤ​ယၤ​ကျဲ​လၢ ယ​တ​ဆိၣ်​ကမိၣ်​ဘၣ်​ နီတဘျီ​​ဘၣ်​န့ၣ်​လီၤ.”—ကတိၤဒိ ၁၅:၁၅.

၁၂-၁၃. ပှၤလၢ​အ​တၢ်​အိၣ်ဆူၣ်​အိၣ်ချ့​တဂ့ၤ​ဘၣ်​ ဒီး​ပှၤ​သးပှၢ်​တဖၣ်​န့ၣ်​ အဝဲသ့ၣ်​ပၣ်ဃုာ်​လၢ တၢ်​စံၣ်တဲၤ​တဲ​လီၤ​တၢ်မၤ​အ​ပူၤ​က​သ့​ဒ်လဲၣ်. ဒီး​ခီဖျိ​လၢ​အဝဲသ့ၣ်​မၤ​ဝဲ​ဒ်​န့ၣ်​အဃိ တၢ်​ကဲထီၣ်​လိၣ်ထီၣ်​အိၣ်​ဝဲ​ဒ်လဲၣ်.

^၁၂ ပှၤလၢ​အ​တၢ်​အိၣ်ဆူၣ်​အိၣ်ချ့​တဂ့ၤ ဒီး​မၤတၢ်​တကဲ​အါအါ​​ဘၣ်​တဖၣ်​န့ၣ်​ ခီဖျိ​လၢ ဟး​စံၣ်တဲၤ​တဲ​လီၤ​တၢ်​တ​န့ၢ် ဒ်​လၢညါ​အသိး​​ဘၣ်​အဃိ အဝဲသ့ၣ်​အသး​က​ဟးဂီၤ​​ဝဲ​လီၤ. ဘၣ်ဆၣ်​ ပှၤ​အါဂၤ​န့ၣ်​ တ​သ့​ဖဲ​အ​သ့ အဝဲသ့ၣ်​ဂုာ်ကျဲးစၢး စံၣ်တဲၤ​တဲ​လီၤ​တၢ်​လီၤ. ဒီပုၢ်ဝဲၢ်​မုၣ်​လီရၤ လၢ​အ​အိၣ်​လၢ ကီၢ်အမဲရကၤ​န့ၣ်​ အ​ဝဲ​​ဘၣ်​အိၣ်​လၢ​ပသိၣ်​စဲး (iron lung) အ​ပူၤ ၃၇ နံၣ်​ညါ​လီၤ. အ​ဝဲ​အိၣ်ဒီး ခဲစၢၣ်​တၢ်ဆါ​ဒီး ​ဘၣ်​ဖွဲး​အသး​ဖးဒိၣ်​ တဘျုး​ဘျီ​ညါ. ဒီး​အ​ဝဲ​အိၣ်ဒီး အဖံး​ဘ့ၣ်​တၢ်ဆါ​စ့ၢ်ကီး ဘၣ်ဆၣ်​ တၢ်​သ့ၣ်​တဖၣ်​အံၤန့ၣ်​ တ​မၤ​ပတုာ်​အီၤ​လၢ အ​က​စံၣ်တဲၤ​တဲ​လီၤ​တၢ်​အဂီၢ်​ဘၣ်. အ​ဝဲ​စံၣ်တဲၤ​တဲ​လီၤ​ကသံၣ်​သရၣ်​ဒီး ပှၤလၢ​အ​ဟဲ​ကွၢ်ထွဲ​အီၤ​တဖၣ်​လီၤ. ခီဖျိ​လၢ​အ​မၤ​ဝဲ​ဒ်အံၤ​အဃိ အ​ကဲဘျုး​​ဝဲ​ဒ်လဲၣ်. အ​မၤစၢၤ​​ဘၣ်​ပှၤ​အစှၤကတၢၢ် ၁၇ ဂၤ​လၢ​က​သ့ၣ်ညါ​ထီၣ်​ တၢ်မ့ၢ်​တၢ်တီ​လၢ လံာ်စီဆှံ​အ​ပူၤ​လီၤ. *

^၁၃ တၢ်​အိၣ်ဖှိၣ်​သးပှၢ်​ရံခၠၢၤ လၢ​အ​အိၣ်​လၢ​ကီၢ်ဖြၣ်စ့ၣ်​န့ၣ်​ အ​ဟ့ၣ်ကူၣ်​​ဝဲ​လၢ ပှၤလၢ​အ​ဟးထီၣ်​လၢ​အဟံၣ်​ချၢ​တ​သ့​ဘၣ်​ ဒီး​အ​အိၣ်​လၢ​ပှၤ​ပာ်​ပှၤ​သးပှၢ်​အလီၢ်​န့ၣ်​ဒ်အံၤ​လီၤ. အ​တဲ​ဝဲ​လၢ “ယ​အဲၣ်ဒိး​လၢ​အဝဲသ့ၣ်​ က​ပာ်​လီၤ​လံာ်​တနီၤ​ဒီး မဲးကစံ​တနီၤ​လၢ​စီၢ်နီၤခိၣ်​အ​ဖီခိၣ်​ လၢ​ပှၤ​ထံၣ်​ဘၣ်​အီၤ​ညီ​လီၤ. ဒီး​ဖဲ​ပှၤ​ထံၣ်​ဝဲ​လံာ်​တဖၣ်​အံၤ ဒီး​ပှၤ​မ့ၢ်​သံကွၢ်​ဝဲ​န့ၣ်​ က​မၤစၢၤ​အီၤ​လၢ က​စးထီၣ်​တဲသကိး​တၢ်​ဒီး ပှၤဂၤ​လီၤ. ခီဖျိ​လၢ ပ​ဒီပုၢ်ဝဲၢ်​မုၣ်​ခွါ​တဖၣ်​ ဟး​စံၣ်တဲၤ​တဲ​လီၤ​တၢ်​လၢ တ​ဟံၣ်​​ဘၣ်​တ​ဟံၣ်​တ​သ့​​ဘၣ်​အဃိ ဖဲ​အဝဲသ့ၣ်​မၤ​ဝဲ​ဒ်​န့ၣ်​အခါ ကဲထီၣ်​တၢ်ဂံၢ်​တၢ်ဘါ​လၢ အဝဲသ့ၣ်​အဂီၢ်​ဒိၣ်မး​လီၤ.” ပှၤလၢ​အ​ဟးထီၣ်​လၢ အဟံၣ်​ချၢ​တန့ၢ်​ဘၣ်​သ့ၣ်​တဖၣ်​ အဝဲသ့ၣ်​မၤ​ဝဲ​တၢ်​စံၣ်တဲၤ​တဲ​လီၤ​တၢ်မၤ​သ့ ခီဖျိ​လၢ​ကွဲး​ဝဲ​လံာ်ပရၢ​ဒီး စံၣ်တဲၤ​တဲ​လီၤ​တၢ်​လၢ​လီတဲစိ​လီၤ.

၁၄. စီၤပၤ​ဒၤဝံး​ပာ်​လီၤ​န့ၢ်​ပှၤ ဒိဂ့ၤ​တဲာ်​ဘၣ်​လၢ ပ​က​ကွၢ်လိ​အီၤ​ဒ်လဲၣ်.

^၁၄ တၢ်ဂ့ၢ်​အိၣ်​ဝဲ​အါမး​လၢ ပ​တ​ဒိးန့ၢ်​ဘၣ်​မူဒါ​လၢ ယဟိဝၤ​ယွၤ​အ​တၢ်မၤ​အ​ပူၤ​လၢ ပ​အဲၣ်ဒိး​မၤ​အီၤ​အိၣ်​ဝဲ​လီၤ. အဒိ, ခီဖျိ​လၢ​ပ​သးပှၢ်​ထီၣ်, ပ​တၢ်​အိၣ်ဆူၣ်​အိၣ်ချ့​တဂ့ၤ​ဘၣ်​ မ့တမ့ၢ် တၢ်အိၣ်သး​လၢ​အဂၤ​တဖၣ်​အဃိ​လီၤ. ပ​မ့ၢ်​တူၢ်​ဘၣ်​ဒ်​န့ၣ်​န့ၣ်​ ပ​ကြၢး​ကွၢ်လိ စီၤပၤ​ဒၤဝံး​အဒိ​အတဲာ်​လီၤ. စီၤ​ဒၤဝံး​အ​သးဆူၣ်​လၢ အ​က​သူၣ်ထီၣ်​ယဟိဝၤ​ယွၤ အ​တၢ်လုၢ်ဟံၣ်​ ဘၣ်ဆၣ်​ ယဟိဝၤ​ယွၤ​ဃုထၢ​ပှၤဂၤ​လီၤ. အဃိ စီၤ​ဒၤဝံး​ဆီၣ်ထွဲ​​ဝဲ​ပှၤလၢ အ​ဒိးန့ၢ်​ဘၣ်​မူဒါ​အံၤ​ဒီး ဟ့ၣ်​လီၤ​​ဝဲ​ထူ, စ့ ဒီး​တၢ်ဖိ​တၢ်လံၤ​လၢ ပှၤ​က​သူၣ်ထီၣ်​တၢ်လုၢ်ဟံၣ်​အံၤ​လီၤ. စီၤ​ဒၤဝံး​ပာ်​လီၤ​န့ၢ်​ပှၤ ဒိဂ့ၤ​တဲာ်​ဘၣ်​လၢ ပ​က​ကွၢ်လိမၤဒိး​အီၤ​အဂီၢ်​လီၤ.—၂ ၡမူၤအ့လး ၇:၁၂, ၁၃; ၁ ကွဲးနီၣ်​တၢ် ၂၉:၁, ၃-၅.

၁၅. ဒီပုၢ်ဝဲၢ်​ခွါ​ဟူၣ်(စ်) လဲၤခီဖျိ​ဝဲ အ​တၢ်​သူၣ်​ဟးဂီၤ​သးဟးဂီၤ​န့ၢ် လၢ​ကျဲ​ဒ်လဲၣ်.

^၁၅ ဒီပုၢ်​​ဝဲ​ခွါ​ဟူၣ်(စ်) လၢ​အ​အိၣ်​လၢ​ကီၢ်ဖြၣ်စ့ၣ်​န့ၣ်​ အ​တၢ်​အိၣ်ဆူၣ်​အိၣ်ချ့​တဂ့ၤ​​ဘၣ်​အဃိ  အ​ဝဲ​တကဲ  တၢ်​အိၣ်ဖှိၣ်​သးပှၢ်​လၢၤဘၣ်.  ဒီး​တၢ်ဂ့ၢ်​ဆံး​ဆံး​ဖိ လၢ​အ​ဟံၣ်ပူၤဃီပူၤ​ဒၣ်လဲာ် အ​ကွၢ်ထွဲ​ဝဲ​တ​သ့​လၢၤဘၣ်. အ​ဝဲ​တဲ​ဝဲ​လၢ “အ​ခီၣ်ထံး​ခါ​န့ၣ်​ ယ​တူၢ်​ဘၣ်​လၢ ယ​လုၢ်​ယ​ပှ့ၤ​တအိၣ်​လၢၤဘၣ်​ ဒီး​ယ​သူၣ်​ဟးဂီၤ​ယ​သးဟးဂီၤ​ဒိၣ်မး. ဖဲ​န့ၣ်​ဝံၤ​အလီၢ်​ခံ ယ​သ့ၣ်ညါ​ထီၣ်​ဘၣ်​လၢ ယ​တ​ဘၣ်သူၣ်​ဟးဂီၤ​သးဟးဂီၤ​ဒီး တၢ်​လၢ​ယ​မၤ​တ​သ့​​ဘၣ်​န့ၣ်​ဘၣ်. လၢတၢ်န့ၣ်​အလီၢ် ယ​က​ဘၣ်သူၣ်​ခု​သးခု ဒီး​တၢ်​လၢ​ယ​မၤ​သ့ လၢ​ယဟိဝၤ​ယွၤ​အ​တၢ်မၤ​အ​ပူၤ​လီၤ. ဒ်​စီၤ​ကံးဒဧိၣ်​ဒီး အ​ပှၤ​သၢ​ကယၤ​အသိး အဝဲသ့ၣ်​လီၤဘှံး​လီၤတီၤ​သနာ်က့ အဝဲသ့ၣ်​ဂုာ်ကျဲးစၢး​​ဝဲ​အဃိ ယၤ​စ့ၢ်ကီး​ယ​က​​ဘၣ်​ဆဲး​လဲၤ​ဒီး ယ​က​​ဘၣ်​ဆဲး​ဒုးတၢ်​လီၤ.”—စံၣ်ညီၣ်ကွီၢ် ၈:၄.

၁၆. လၢ​မူခိၣ်​ကလူး​သ့ၣ်​တဖၣ်​အံၤ​အ​အိၣ်​န့ၣ်​ ပ​မၤလိ​န့ၢ်​တၢ်မနုၤ​လဲၣ်.

^၁၆ ထံၣ်တမှံ​ကွၢ် မူခိၣ်​ကလူး​သ့ၣ်​တဖၣ်​န့ၣ်​တက့ၢ်. ဖဲ​စီၤပၤ​အၤဃာ်​ပၢတၢ်​အခါ ယဟိဝၤ​ယွၤ​ကွဲမုာ်​ဝဲ မူခိၣ်​ကလူး​တဖၣ်​ဒ်သိး က​ဟ့ၣ်ထီၣ်​အ​တၢ်ထံၣ်​လၢ က​ကွဲန့ၢ်​လွဲန့ၢ်​စီၤပၤ​လၢ အအၢ​အသီ​တဂၤ​အံၤ​လီၤ. မူခိၣ်​ကလူး​သ့ၣ်​တဖၣ်​န့ၣ်​ ပာ်ဖျါ​ထီၣ်​အ​တၢ်ထံၣ်​တဂၤ​ဒီး​တဂၤ ဘၣ်ဆၣ်​ ယဟိဝၤ​ယွၤ​ဃုထၢ​ထီၣ်ဝဲ ထဲ​တဂၤဧိၤ​လီၤ. ဒီး​ယဟိဝၤ​ယွၤ​တဲ​ဝဲ​လၢ အ​တၢ်ဟ့ၣ်ကူၣ်​အံၤ က​ကဲထီၣ်​လိၣ်ထီၣ်​​ဝဲ​လီၤ. (၁ စီၤပၤ ၂၂:၁၉-၂၂) မူခိၣ်​ကလူး​လၢ​အဂၤ​သ့ၣ်​တဖၣ်​န့ၣ်​ မ့ၢ်​အ​သူၣ်​ဟးဂီၤ​သးဟးဂီၤ ဒီး​ဆိကမိၣ်​​ဝဲ​လၢ ‘​ဘၣ်​မနုၤ​အဃိ ယ​​ဘၣ်​ဟဲ​မၤ​လၢာ်ဂီၤ ယ​တၢ်​ဆၢကတီၢ်​လဲၣ်န့ၣ်​ဧါ.’ တမ့ၢ်​လၢ​အဝဲသ့ၣ်​ က​ဆိကမိၣ်​​ဝဲ​ဒ်​န့ၣ်​ဘၣ်. မူခိၣ်​ကလူး​သ့ၣ်​တဖၣ်​န့ၣ်​ အိၣ်ဒီး​တၢ်ဆီၣ်​လီၤ​အသး ဒီး​အဲၣ်ဒိး​မၤလၤ​ကပီၤ ယဟိဝၤ​ယွၤ​လီၤ.—စံၣ်ညီၣ်ကွီၢ် ၁၃:၁၆-၁၈; လီၣ်ဖျါ ၁၉:၁၀.

၁၇. ပ​မ့ၢ်​သးဟးဂီၤ​ခီဖျိ​လၢ ပ​တ​ဒိးန့ၢ်​ဘၣ်​တၢ်ခွဲး​တၢ်ယာ်​လၢ ကစၢ်​ယွၤ​အ​တၢ်မၤ​အ​ပူၤ​​ဘၣ်​န့ၣ်​ ပ​က​​ဘၣ်​မၤ​တၢ်မနုၤ​လဲၣ်.

^၁၇ သ့ၣ်နီၣ်​ထီၣ်​က့ၤ​လၢ​န​မ့ၢ် ယဟိဝၤ​ပှၤအုၣ်​အသး​တဂၤ​ ဒီး​စံၣ်တဲၤ​တဲ​လီၤ​ဘၣ်​ ယွၤ​အဘီ​အမုၢ်​အဂ့ၢ်​န့ၣ်​ မ့ၢ်​ဝဲ​တၢ်ခွဲး​တၢ်ယာ် ဖးဒိၣ်​တခါ​လီၤ. တၢ်​လၢ​မူဒါ​န့ၣ်​ န​ဒိးန့ၢ်​ဘၣ်​အီၤ​သ့​ဒီး အ​လီၤမၢ်​ကွံာ်​ဝဲ​သ့​လီၤ.  ဘၣ်ဆၣ်​မူဒါ​သ့ၣ်​တဖၣ်​န့ၣ်  တ​ပာ်ဖျါ​ထီၣ်​ဝဲ​လၢ န​မ့ၢ်​ပှၤ​လုၢ်ဒိၣ်​ပှ့ၤဒိၣ်​လၢ ယဟိဝၤ​ယွၤ​အဂီၢ်​ဘၣ်. ဖဲ​န​အိၣ်ဒီး​တၢ်သးစူၤ  ဒီး​တၢ်ဆီၣ်​လီၤသး​အခါ  န​ကဲထီၣ်​ပှၤ​လုၢ်ဒိၣ်​ပှ့ၤဒိၣ်​လၢ ယဟိဝၤ​ယွၤ​အဂီၢ်​ဒီး လၢ​ဒီပုၢ်ဝဲၢ်​မုၣ်​ခွါ​တဖၣ်​အဂီၢ်​စ့ၢ်ကီး​လီၤ. အဃိ ဃ့ကညး​ယဟိဝၤ​ယွၤ ဒ်သိး​အ​က​မၤစၢၤ​နၤ​လၢ န​ကအိၣ်​ဒီး​တၢ်ဆီၣ်​လီၤသး​ဒီး တၢ်​သူၣ်ဂ့ၤ​သးဝါ​န့ၣ်​တက့ၢ်. ဆိကမိၣ်​ထီၣ်​ပှၤ​ဒိဂ့ၤ​တဲာ်ဘၣ်​ လၢအ​အိၣ်ဒီး​တၢ်ဆီၣ်​လီၤသး​လၢ အ​မၤ​ယဟိဝၤ​ယွၤ​အ​တၢ်မၤ လၢ​လံာ်စီဆှံ​အ​ပူၤ ဒီး​ဂုာ်ကျဲးစၢး​မၤစၢၤ ဒီပုၢ်ဝဲၢ်​မုၣ်​ခွါ​သ့ၣ်​တဖၣ်​ လၢ​အဂ့ၤ​ကတၢၢ်​တက့ၢ်.—စံးထီၣ်​ပတြၢၤ ၁၃၈:၆; ၁ ပ့းတရူး ၅:၅.

၁၈-၁၉. ဖဲ​ပလီၢ်​ကဝီၤ​အ​ပူၤ တၢ်​လဲၤထီၣ်​လဲၤထီ​တအိၣ်​​ဘၣ်​အခါ ပ​မၤ​အါထီၣ်​ပ​တၢ်သးခု လၢ​ပ​တၢ်​စံၣ်တဲၤ​တဲ​လီၤ​တၢ်မၤ​အ​ပူၤ က​သ့​ဒ်လဲၣ်.

^၁၈ န​မ့ၢ်​အိၣ်​ဘၣ်​တၢ်လီၢ်​လၢ တၢ်​စံၣ်တဲၤ​တဲလီၤ တ​လဲၤထီၣ်​လဲၤထီ​ဘၣ်​ ဒီး​ဖဲ​န​လဲၤ​စံၣ်တဲၤ​တဲ​လီၤ​တၢ်​ဒီး ဟံၣ်​ကစၢ်​တအိၣ်​​ဘၣ်​အခါ မ့ၢ်​န​သးဟးဂီၤ​ဧါ. တၢ်အိၣ်သး​မ့ၢ်​ကဲထီၣ်​ဒ်အံၤ​န့ၣ်​ န​ဆဲး​ပၢၤဃာ် တၢ်သးခု​က​သ့​ဒ်လဲၣ်. တၢ်ဟ့ၣ်ကူၣ်​တနီၤ​လၢ ပ​မၤထွဲ​အီၤ​သ့​န့ၣ်​ အိၣ်​လၢ​တၢ်လွံၢ်နၢၣ်​အ​ပူၤ  “ လၢ​တၢ်​စံၣ်တဲၤ​တဲ​လီၤ​တၢ်မၤ​အ​ပူၤ န​မၤ​အါထီၣ်​န​တၢ်သးခု က​သ့​ဒ်လဲၣ်.” န​ကအိၣ်​ဒီး​တၢ်ထံၣ်​အဂ့ၤ​လၢ တၢ်​ စံၣ်တဲၤ​တဲ​လီၤ​တၢ်မၤ​အ​ပူၤ​န့ၣ်​ အရ့ဒိၣ်​ဒိၣ်မး​အဃိ ပ​က​​ဘၣ်​မၤ​တၢ်မနုၤ​လဲၣ်.

^၁၉ သးစၢၢ်ဆၢ​လၢ န​က​တဲ​ဘၣ်​ပှၤဂၤ​လၢ ကစၢ်​ယွၤ​အ​မံၤ​ဒီး အဘီ​အမုၢ်​အဂ့ၢ်​န့ၣ်​တက့ၢ်. ယ့ၣ်ၡူး​တဲ​ဝဲ​လၢ ပှၤလၢ​က​ပိာ်​အခံ​န့ၣ်​ အိၣ်​ထဲ​စှၤဂၤ​လီၤ. (မးသဲ ၇:၁၃, ၁၄) ဖဲ​ပ​ဟး​စံၣ်တဲၤ​တဲ​လီၤ​တၢ်​အခါ ပ​အိၣ်ဒီး​တၢ်ခွဲး​တၢ်ယာ်​လၢ ပ​မၤ​သကိး​​ဘၣ်​တၢ်​ဒီး ယဟိဝၤ​ယွၤ, ယ့ၣ်ၡူး ဒီး​မူခိၣ်​ကလူး​တဖၣ်​လီၤ. (မးသဲ ၂၈:၁၉, ၂၀; ၁ ကရံၣ်သူး ၃:၉; လီၣ်ဖျါ ၁၄:၆, ၇) ယဟိဝၤ​ယွၤ​မူၤ​ဃီၤ​ပှၤလၢ အ​အဲၣ်ဒိး​မၤ အ​တၢ်မၤ​သ့ၣ်​တဖၣ်​လီၤ. (ယိၤဟၣ်​ ၆:၄၄) အဃိ ပ​မ့ၢ်​ထံၣ်​ပှၤ​တဂၤ​လၢ အ​တ​ဒိကနၣ်​ပ​တၢ်သးခု​ကစီၣ်​ဒံး​​ဘၣ်​န့ၣ်​ ​ဘၣ်​သ့ၣ်​သ့ၣ်​ လၢခံတဘျီ​အ​ဝဲ​က​ဒိကနၣ်​ ပ​တၢ်သးခု​ကစီၣ်​လီၤ.

၂၀. ဒ် ယံးရမံယၤ ၂၀:၈, ၉ ပာ်ဖျါ​ထီၣ်​ဝဲ​အသိး ဖဲ​ပသူၣ်​ဟးဂီၤ​သးဟးဂီၤ​အခါ ပ​မၤနၢၤ​အီၤ​က​သ့​ဒ်လဲၣ်.

^၂၀ ပ​မၤလိ​န့ၢ်​တၢ်​လၢ ဝံ​ယံးရမံယၤ​အ​အိၣ်​သ့​အါမး​လီၤ. ဝံ​ယံးရမံယၤ​ဒိးန့ၢ်​ဘၣ်​မူဒါ​လၢ အ​က​​ဘၣ်​လဲၤ​စံၣ်တဲၤ​တဲ​လီၤ​တၢ်​လၢ ပှၤ​တ​ဒိကနၣ်​ အ​တၢ်ကစီၣ်​​ဘၣ်​အ​အိၣ်​လီၤ. ပှၤ​ဖဲ​န့ၣ်​တဖၣ်​ ဒုၣ်ဒွဲၣ်​အီၤ​ဒီး​ထီဒါ​အီၤ “ကိးမုၢ်နံၤ​မုၢ်နၤ​ဒဲး​လီၤ.” (ဖး ယံးရမံယၤ ၂၀:၈, ၉ တက့ၢ်.) ဝံ​ယံးရမံယၤ​အ​သူၣ်​ဟးဂီၤ​သးဟးဂီၤ တုၤ​ဒၣ်လဲာ်​အ​တ​အဲၣ်ဒိး ဆဲး​မၤ​မူဒါ​အံၤ​လၢၤဘၣ်​ ဘၣ်ဆၣ်​ အ​ဝဲ​တ​ပတုာ်​ဝဲ​ဘၣ်. ​ဘၣ်​မနုၤ​အဃိ​လဲၣ်. မ့ၢ်​လၢ​ယဟိဝၤ “ယွၤ​အ​ကလုၢ်​ကထါ” လီၤဂာ်​ဒီး​မ့ၣ်အူ​အိၣ်​လၢ​အ​ပူၤ​အဃိ အ​ဝဲ​တူၢ်​ဝဲ​တ​ပှဲၤ​ဘၣ်. အဃိ အ​ဝဲ​စံၣ်တဲၤ​တဲ​လီၤ​တၢ်​လီၤ. ဒ်​န့ၣ်​အသိး ပ​လီၤဂာ်​ဒီး​ဝံ​ယံးရမံယၤ​သ့ ခီဖျိ​ပ​ဖး​ကစၢ်​ယွၤ​ကလုၢ်​ကထါ​ကိးနံၤဒဲး ဒီး​ဆိကမိၣ်​ထံ​အီၤ​လီၤတံၢ်​လီၤဆဲး​လီၤ. ပ​မ့ၢ်​မၤ​ဒ်​န့ၣ်​န့ၣ်​ ပ​က​ဆဲး​အိၣ်ဒီး​တၢ်သးခု ဒီး​ပ​တၢ်​စံၣ်တဲၤ​တဲ​လီၤ​တၢ်မၤ မ့ၢ်​တ​လဲၤထီၣ်​လဲၤထီ​​ဘၣ်​သနာ်က့ ပ​က​ဆဲး​မၤ​အီၤ​လီၤ.—ယံးရမံယၤ ၁၅:၁၆.

၂၁. ဖဲ​န​သူၣ်​ဟးဂီၤ​သးဟးဂီၤ​အခါ န​မၤနၢၤ​ကွံာ်​အီၤ​က​သ့​ဒ်လဲၣ်.

^၂၁ ပာ်သူၣ်​ပာ်သး ဒီပုၢ်ဝဲၢ်​မုၣ်​ဒဲဘိရၤ အ​တၢ်ကတိၤ​လၢ အ​ခီၣ်ထံး​အ​တဲ​ဝဲ​လၢ  “တၢ်​သူၣ်​ဟးဂီၤ​သးဟးဂီၤ​န့ၣ်  မ့ၢ်​ကျဲ​တဘိ​လၢ မုၣ်ကီၤလံၢ်​သူ​ဝဲ​လီၤ.” ဘၣ်ဆၣ်  မုၣ်ကီၤလံၢ်​အ​စုကဝဲၤ​အံၤ မၤနၢၤ​ဝဲ ယဟိဝၤ​ယွၤ​တ​သ့​ဘၣ်. အဃိ ဖဲ​ပသူၣ်​ဟးဂီၤ​သးဟးဂီၤ​လၢ တၢ်ဂ့ၢ်​တ​မံၤဂ့ၤ​တ​မံၤဂ့ၤ​အခါ ဃ့ကညး​ယဟိဝၤ​ယွၤ​လၢ အ​က​ဆီၣ်ထွဲ​မၤစၢၤ​ပှၤ ဒ်သိး​ပ​က​လဲၤခီဖျိ ပ​တၢ်ကီ​တၢ်ခဲ​က​န့ၢ်​အဂီၢ်​လီၤ. တကးဒံးဘၣ်​ က​မၤစၢၤ​ပှၤလၢ ပ​ကအိၣ်​ဒီး​တၢ်ထံၣ်​အကြၢး​အ​ဘၣ်​လၢ ပ​မူဒါ​အ​ဖီခိၣ်​လီၤ. ဒီး​က​မၤစၢၤ​စ့ၢ်ကီး​ပှၤလၢ ပ​ကအိၣ်​ဒီး​တၢ်ထံၣ်​လၢ အဂ့ၤ​လၢ​ပ​တၢ်​စံၣ်တဲၤ​တဲ​လီၤ​တၢ်မၤ​လၢ အ​တ​လဲၤထီၣ်​လဲၤထီ​ဘၣ်​ လၢ​ပလီၢ်​ကဝီၤ​အ​ပူၤ​န့ၣ်​လီၤ. အါန့ၢ်​အန့ၣ်​ ပာ်ထီၣ်​န​တၢ်​ဘၣ်ယိၣ်​ဘၣ်ဘှီ ခဲလၢာ်​လၢ ယဟိဝၤ​ယွၤ​အလိၤ​တက့ၢ်. ခီဖျိ​လၢ​အ​တၢ်မၤစၢၤ​အဃိ န​မၤနၢၤ​ကွံာ်​တၢ်​သူၣ်​ဟးဂီၤ​သးဟးဂီၤ​သ့​ဝဲ​လီၤ.