1. Yinki dekurajement lenda sala beto?

BILUMBU nyonso, beto ke kutaná na mambu mingi yina beto ke nwaná na kuyidika. Nge mpe me ndima ti, beto ke lenda na kuyidika bamambu ya beto kaka si beto ke ve ya kulemba? Na yawu, dekurajement ke faso muyibi yina lenda kwiza katula beto konfianse, kuraje mpe kilengi. Bingana 24:10 na note ya yisi ya paje ke zonzá: “[Si nge vanda ya kulemba] na kilumbu ya mpasi, [ngolo ya nge ke] vanda fioti.” Ya ke vrai, dekurajement lenda manisa ngolo yina beto ke na yawu nsatu, samu na kuyidika bamambu yina beto ke na yawu bubu yayi.

2. Wapi bima yina lenda sala ti dekurajement kumina beto, mpe yinki beto ke longoka na artikle yayi?

² Ya ke na bima mingi yina lenda lembisa beto: ya lenda vanda mambu ya luzingu ya beto to ya bantu ya nkaka. Ya lenda vanda mpe samu beto ke bantu ya masumu, samu na bima yina beto ke lendá ve na kusala, mpe samu na sante ya beto. Ya lenda vanda samu, beto ke zwá ve responsabilite yina beto ke vingilá, to samu teritware ya beto ke butá ve bambuma. Ata mabaku to bankwamusu yayi, artikle yayi ke zonzila bima yina ke sadisa beto na kubwa ve na dekurajement.

3. Yinki lenda sadisa beto na kutadila na faso ya mbote, nzutu ya beto ya masumu mpe bima yina beto ke ve na ngolo ya kusala?

³ Beto lenda manke ekilibre na faso ya kutadila nzutu ya beto ya masumu, mpe bima yina beto ke lendá ve na kusala. Nyonso yayi lenda nata beto na kukanisa ti Yehova ke kotisa ve beto na yinza ya malu-malu. Faso ya kutadila bamambu yina ke vrai yimbi samu na beto. Kasi wa’ faso beto zolá tadila bima yina nzutu ya beto ya masumu ke natá beto na kusala? Biblia ke zonzá ti  sof Yesu Kristo, bantu nyonso “sumuká.” (Rom. 3:23) Kasi, Yehova Nzambi ya beto, ke kukwendá sosá ve masumu na bima ya fioti yina beto ke salá. Kasi faso Tata ya luzolo, yandi ke sosá na kusadisa beto; yandi ke na ntima ya yinda. Mpe yandi ke na talá faso beto ke na nwaná na nyonso yina ke lembisá beto, ya vanda nzutu ya beto ya masumu to bima yina beto ke lendá ve na kusala, mpe faso ya yimbi yina beto ke jujeke mambu yina beto ke salá; kasi yandi ke na nsatu ya kusadisa beto.—Rom. 7:18, 19.

4-5. Faso ke zonzak’ yawu 1 Yoane 3:19, 20, yinki sadisá bampangi ya zole yayi na kulemba ve na kusadila Yehova?

⁴ Beto zonzila kifwani ya Deborah na Maria. * Ntangu yandi vandá mwana ya fioti, Deborah kulá na kisika yina ba vandá talisak’ yandi mpasi na nsoni. Samu ba vandá felisiteke ve yandi mingi, yandi bandá kukanisa ti yandi vandá na ata valeur. Ntangu yandi vandá salá mwa ereur ya fioti, yandi vandá talá ti yimeni, yandi ke kaka kima ya mpamba. Yandi vandá tala ti, yandi ke lenda sala ata kima ya bien. Maria mpe kutaná na mambu ya foso yayi. Samu na yawu, ntangu nyonso yandi vandá kwendá kanisá ti, yandi vandá na ata valeur. Ntangu yandi kuzwá bateme, yandi vandá tala ti yandi meriteke ata fioti nkumbu ya temwe ya Yehova!

⁵ Kasi, ata faso yina, bampangi ya beto yayi biká ve kusadila Yehova. Samu na yinki? Ba vandá pesá kilo ya bawu na Yehova na kati ya priere. (Nku. 55:22) Ba kwizá ndima ti, Yehova zaba bampasi ya bawu, mpe zabá makanisi ya bawu. Mpe yandi ke talá yina ke bien na kati ya beto, bifu ya beto ya mbote yina ata beto mosi na bantu ya nkaka ke talá ve.—Tanga 1 Yoane 3:19, 20.

6. Yinki beto lenda sala si beto me vutukila mambu ya yimbi yina beto ke na sosá na kubika?

⁶ Muntu yina ke na nwaná na kukatula kifu ya yimbi, lenda lemba mpe kubwa na dekurajement. Ya vrai, ya ke ve yimbi si beto me sala disumu na kutala mpasi na ntima. (2 Ko. 7:10) Kasi, beto lutisa ve na kukwendá kanisá ti beto lenda sala ata kima mosi ya bien; mpe ya kuyufulá: ‘Samu mu lenda sala ata kima mosi ya bien, Yehova lenda lemvokila kwandi munu?’ Kasi Yehova ke tadilá bamambu faso yayi. Mpe ya lenda sala ti beto bika kusadila yandi. Kuzimbana ve yina beto me tala na Bingana 24:10: ngolo ya beto ke kuma fioti si beto ke ya kulemba. Kasi, “beto tala na mantwala”, beto pesa nyonso na Yehova na kati ya priere. (Iza. 1:18) Ntangu yandi ke talá faso beto ke nyongá masumu ya beto, Yehova ke lemvokilá beto. Yandi tulá bakuluntu samu na yawu. Ba ke lakisa ntima ya yinda samu nge kuma dyaka ngolo na kimpeve.—Zaki 5:14, 15.

7. Samu na yinki beto zolá lemba ve si beto ke na lendá ve na kubika kifu ya yimbi?

 ⁷ Jean-Luc, kuluntu mosi na France, pesá konseye yayi na ba yina ke na nwaná na kubika kifu yina ba zaba ti ya ke yimbi: “Muntu ya mbote na meso ya Yehova, ke ve muntu yina ke salá ve ba-ereur, kasi ya ke ni muntu yina ke nyongak’ yawu, mpe yina ke lombá mulemvo.” (Rom. 7:21-25) Nzambi zaba ti ata muntu ke ya kulunga. Samu na yawu, si nge ke na vutukilá kifu ya yimbi yina nge ke na nwaná na kubika, kulutisa ve kukondane ntima ya nge. Beto nyonso, beto ke na nsatu Yehova sadila sakrifise ya Yesu, samu yandi lakisa beto ntima ya mbote.—Ef. 1:7; 1 Yoa. 4:10.

8. Si beto ke ya kulemba, na nani beto ke lomba yandi sadisa beto?

⁸ Beto lenda lomba na bampangi ya kimpeve sadisa beto samu beto lemba ve! Ba lenda kuwa beto mpe mambu yina ba ke zonza lenda bwela beto ngolo. (Bin. 12:25; 1 Tes. 5:14) Joy, mpangi ya kento yina ke vandá na Nigéria yina ke na nwaná na dekurajement me zonza: “Wa’ kote mu zolá vanda si bampangi ya kimpeve vandá ve? Ya me lakisa ti Yehova ke sadilá bawu, na kupesa bareponse na bapriere ya munu. Ni yawu longoká munu mpe faso ya kusadisa ba yina ke ya kulemba.” Samu bampangi ya beto lenda zaba ve ntangu nyonso yina beto ke vandá ya kulemba, beto lenda zonzila yawu na mpangi mosi yina ke ya kukula na kimpeve, samu yandi zaba ti beto ke na nsatu ya diboko ya yandi.

9. Wa’ faso mambu yina ke na Bankunga 41:3; 94:19 lenda vutula beto kuraje?

⁹ Sosa Yehova sadisa nge. Si beto me kula, mingi-mingi si beto ke na maladi ya kronik, makanisi ya yimbi lenda banda kukwizila beto. Ya vrai, bubu yayi, Yehova ke belusá ve beto na mirakle, kasi yandi ke sadisá beto mpe ke pesá beto ngolo yina beto ke na yawu nsatu samu beto lemba ve. (Tanga Bankunga 41:3; 94:19.) Na kifwani, ya lenda puse mpangi mosi, na kukwiza sala bisalu na yinzo ya beto, na kusala bakurse ya beto, na kusambila samu na beto, to yandi rapele beto mambu ya kitoko yina beto ntangá na Biblia, mpe kivuvu ya beto ya kuvanda na nzutu yina lenda bela dyaka ve na yinza ya malu-malu.—Rom. 15:4.

10. Samu na yinki na manima ya aksident yina paralizeke yandi, luzingu ya Isang kumá ve ndudi?

¹⁰ Mpangi Isang, yina ke vandá na Nigeria, salá aksident yina paralizek’ yandi. Dokteur zonzá na yandi ti, yandi ke tambula dyaka ve. Mpangi Isang zonzá: “Mu kumá kaka mawa-mawa mpe mu fuluka na basusi.” Kasi, luzingu nyonso ya yandi kumá kaka ndudi? Ve! Samu na yinki? Isang zonzá ti “Samu ti, na kento ya munu, beto biká ve na kusambila mpe kutanga Biblia. Beto vandá tula ntima na babenediksion yina beto ke deja na yawu, na kivuvu ya kuvanda na yinza ya malu-malu.”

11. Wa’ kote Cindy kuzwá kilengi ntangu yandi vandá na maladi yina zolá nata yandi ti na lufwa?

¹¹ Yinki sadisá mpangi Cindy yina ke vandá na Mexico, ntangu dokteur zonzá ti yandi vandá na maladi yina lenda nata yandi na lufwa? Yandi baká desizion ya kuzonzila Biblia na muntu mosi bilumbu nyonso ntangu ya kubaka manganga. Mpe yandi soniká: “Kaka ni faso yina, mu kuzwá ngolo ya kukanisa mingi na bampasi ya bampangi, mpe ya kubika kutula basusi na operasion to bampasi ya munu. Ni faso yayi mu vandá salá: Ntangu badokteur to ba-infirmier vandá kwiza tala munu, mu vandá yufulá sante na bafamiye ya bawu. Mpe mu vandá yufula samu na yinki ba solá kisalu ya mpasi yayi. Ni faso yina mu vandá zabá ntima ya nani mu me tuche. Mingi vandá zonzá ti, ya ke rare na kuwa muntu ya kubela ke na yufulá na dokteur, ‘Wa’ faso sante ya nge?’, to na kusalá atension na luzingu  ya yandi mpe. Ba ya nkaka ndimá na kupesa munu adrese na numero ya bawu. Na bantangu ya mpasi yina, Yehova pesá munu kilengi ya ngolo yina ata munu mosi vandá ndimá ve!”—Bin. 15:15.

12-13. Yinki me sadisa bampangi ya beto yina, ke ya kukangama na yinzo to samu ba ke andikape na kupreche, mpe wapi mbuma yina yawu me pesa?

¹² Bantu yina ke ya kubela to Andikape lenda kubwa na dekurajement, samu ba ke precheke dyaka ve mingi. Kasi, beto zaba ti mingi na bawu ke zwá posibilite ya kuzwa kilengi na predikasion. Laurel, mpangi mosi na États-Unis, lutisá 37 ans, na kati ya machine yina sadisa yandi na kupema! Yandi vandá nwana na cancer mosi ya ngolo, kuzwá ba-operasion mingi mpe vandá na maladi ya kronik na mpusu. Bampasi nyonso yayi kangá ve yinwa ya yandi. Yandi vandá preche na ba-infirmier mpe bantu ya nkaka na lopital mpe yina vandá kwiza tala yandi. Mpe wapi mbuma ya pesá? Yandi sadisá bantu 17 na kukuma batemwe ya Yehova! *

¹³ Richard, kuluntu mosi na France, pesá dikanisi yayi samu na ba yina ya kukangama na yinzo to na mfulu ya lopital: “Ya ke bien ba vanda na balivre to mikanda ya beto ya nkaka na kisika yina ba kele, samu ti ya lenda benda atension ya ba yina ke zolá kutanga, mpe ba lenda vanda na bakestion. Ni yawu ke sadisa bampangi yina ke ve na posibilite ya kubasika na predikasion ya yinzo nyinzo, na kupreche.” Ba lenda sadila mpe baletre to telefone samu na kupreche.

14. Samu na yinki Mfumu David ke model ya kitoko ya kulanda?

¹⁴ Samu na sante ya beto, buboba, to samu na barezon ya nkaka, ya lenda vanda mpasi na kuzwa baresponsabilite na kati ya kimvuka to na kati ya sirkonskripsion. Samu na yawu, beto lenda landa kifwani ya David. Yandi mpe vandá vingila responsablite ya kutunga tample ya Yehova. Kasi Yehova solá muntu ya nkaka na plase ya yandi. Kasi, David salá nyonso na kupesa diboko na muntu yina Yehova solá. Mpe, na luzolo nyonso, David prepareke bima mingi samu na projet yango. Yandi ke model ya kitoko ya kulanda!—2 Sa. 7:12, 13; 1 Ns. 29:1, 3-5.

15. Yinki sadisá Hugues na kubwa ve na dekurajement?

¹⁵ Samu sante ya yandi vandá dyaka ve bien, Hugues mpangi mosi na France, biká kusadila kimvuka faso kuluntu (ancien); mpe yandi vandá dyaka ve na ngolo ya kusala ata mwa bisalu ya fioti na yinzo. Yandi soniká: “Na kubanda, mambu yango kwizá lembisa munu mpe mu bandá kutala ti mu ke dyaka ve kisalu. Kasi mwa ntangu fioti lutá, mu bandá na kundima balimite ya munu. Mu bandá kuzwa kilengi na  ndambu yina mu vandá pesa na Yehova. Mpe mu baká desizion ya kubika ve, mpe ya kulanda kifwani ya Gédéon. Yandi vandá kaka na bantu 300 ya vrai kulemba; kasi ba biká ve na kunwana!”—Baz. 8:4.

16. Na yinki ba-ange ke model ya kitoko ya kulanda?

¹⁶ Ba-ange mpe ke bamodel ya kitoko na kulanda. Ntangu Achab vandá roi, Yehova zonzá na ba-ange ya yandi na kupesa dikanisi samu na kuvuna Achab. Ba-ange mingi pesá makanisi ya bawu. Kasi Yehova solá na kuwa kaka ya ange mosi mpe Yehova zonzá na yandi: sala yina nge me zonza, ya ke simba. (1 Mf. 22:19-22) Ba-ange ya nkaka yina kubwá na dekurajement, to bandá kukanisa ti ba vandá ve kisalu na meso ya Yehova, to bandá kuzonza, ‘Samu na yinki ba me baka ve dikanisi ya munu’? Ve. Ba salá ata fioti faso yina. Ba-ange ke ya kukuluka mpe ba zola kupesa nkembo na Yehova.—Baz. 13:16-18; Luz. 19:10.

17. Yinki beto lenda sala si beto ke na zwá ve responsabilite yina ba vandá vingila?

¹⁷ Tula ntima ya nge na bweso yina nge ke na yawu ya kulwata nkumbu ya Yehova mpe ya kuzonzila nsangu ya kimfumu ya yandi. Baresponsabilite ke kwizá, mpe ke vutuká. Kasi ni yawu ve ke salá ti beto vanda bantu ya kitoko na meso ya Yehova. Kima yina ke salá ti Yehova na ba mpangi ya beto zola beto, ya ke ni kuvanda ya kukuluka mpe kuzaba balimite ya beto. Na yawu, sambila Yehova samu nge vanda ya kukuluka mpe nge ndima balimite ya nge. Kanisa bantu yina lakisá na kati ya Biblia ti ba vandá ya kukuluka to ndimá balimite ya bawu. Na luzolo nyonso, kuzwa kilengi na ndambu yina nge lenda sala.—Nku. 138:6; 1 Pi. 5:5.

18-19. Wa’ faso beto lenda kuzwa kilengi na predikasion ya beto, si ya ke na butá ve bambuma?

¹⁸ Ya me kuminá deja nge na kubanda kulemba ntangu teritware ya nge ke butá kaka bambuma fioti, to ntangu beto ke kutaná kaka na bantu ndambu? Si ya ke ni faso yina, yinki beto lenda sala samu na kubumba to kukumisa kilengi ya beto ngolo? Ya ke na makanisi ya kitoko yina beto lenda sadila na kati ya tablo, “ Bafaso ya kukumisa predikasion ya beto kitoko.” Ya ke mpe bien beto zaba faso ya kutadila predikasion. Yinki ya zola zonza?

¹⁹ Kuzwa kilengi mingi samu nge ke na zonzilá nkumbu ya Nzambi na kimfumu ya yandi. Yesu zonzá ti bantu kaka ndambu zolá sola nzila ya fioti yina ke natá na luzingu. (Mat. 7:13, 14) Ntangu beto ke salá kisalu ya predikasion, beto ke salá kintwadi na Yehova, Yesu mpe ba-ange.  (Mat. 28:19, 20; 1 Ko. 3:9; Luz. 14:6, 7) Yehova ke bendá na yandi, bantu yina ke na nsatu ya kusadila yandi. (Yoa. 6:44) Na yawu, si muntu me ndima ve mesaje yina beto ke na pesak’ yandi bubu yayi, ntangu ya nkaka yandi lenda ndima yawu na mantwala.

20. Wa’ faso Yeremia 20:8, 9, lenda sadisa beto na kulemba ve si teritware ya beto ke na butá ve bambuma?

²⁰ Beto lenda longoka mingi na yina kuminá profete Jérémie. Yandi vandá preche na teritware yina bantu vandá zolá ve kuwa yandi. “Kilumbu [nyonso]”, bantu yango vandá finga yandi mpe kusombola yandi (Tanga Yeremia 20:8, 9.) Samu yandi lembá mingi, yandi baká desizion ya kubika kupreche. Kasi yandi lendá ve. Samu na yinki? Yandi zonzá, “Mambu ya Nzambi” kumá faso tiya yina vandá yoka ntima ya yandi mpe yandi vandá lenda ve na kukanga ntima! Si beto fulusa ntima ya beto na mambu ya Nzambi, ya ke sala beto faso yandi. Yayi mpe ke rezon yina ke lakisá beto samu na yinki kutanga Biblia mpe ya kukanisa na yina beto ke tangá ke nesesere. Mpe wapi mbuma yina ya ke buta? Kilengi ya beto lenda kuma mingi, mpe predikasion ya beto lenda banda kubuta bambuma ya kulutila.—Yer. 15:16.

21. Yinki beto lenda sala samu dekurajement bwisa ve beto?

²¹ Deborah yina beto me zonzila, zonzá: “ Dekurajement ke munduki ya ngolo yina Satan lenda sadila samu na kubwisa beto”. Kasi, beto zaba ti ata munduki ya Satan lenda telama na minduki ya Yehova. Na yawu, si samu na mambu ni mambu, dekurajement mase kumina nge, bondila Yehova na kati ya priere samu yandi sadisa nge. Yandi ke pesa nge ngolo ya kunwana na nzutu ya nge ya masumu, na maladi ya mpasi, mpe na bima yina nge ke lendá ve na kusala. Yandi ke sadisa nge na kuvanda na ekilibre na faso ya kutadila predikasion ya nge. Mpe yandi ke sadisa nge na kutadila, yawu na faso yina me bonga. Yina me lutila nyonso, pesa ntima ya nge na Yehova. Zonza na Tata ya beto ya mazulu mambu yina ke na nge na ntima, mpe yandi ke sadisa nge samu nge lemba ve.