1. Ngapi omu kudompa mutjima aku tu kunduma?

NKENYE ezuva, ose kuligwanekera nomaudigu nokuhetekera ko kugalididimikira. Nye ayo kutudigopera kulididimikira maudigu nsene tuna dompo mutjima. Twa hepa kutara kudompa mutjima ngwendi muwidi ogu a wiza a ya vake ehuguvaro nouradi ntani noruhafo rwetu. Yisewe 24:10 kutanta asi: “Nsene ove o munkundi momahepeko, o munkundi hena moyirugana.” Yosili, apa atu dompo mutjima kapi atu kara nononkondo dokulididimikira maudigu getu.

2. Yisinke ayi tu ninkisa tu dompe mutjima, ntani yisinke natu ka zogera mosirongwa esi?

² Yininke yinzi yokutuninkisa tu dompe mutjima. Ngwendi kudira kusikilira mo, ndi nampo maupirankondo getu ntani mauvera. Ndi pamwe kapi tuna kugwana situmbukira mombunga zaJehova esi twa hara ndi vantu womomukunda gwetu kapi ava purakene kombudi zetu. Mosirongwa esi, tatu ka zogera eyi natu rugana yipo tu nyokere po kudompa mutjima.

3. Yisinke nayi tu vatera tu kare nomutaro gokuhetakana kokudira kusikilira mo kwetu?

³ Morwa mapuko aga atu tura po, ayo ureru kulizuvha asi ose kwato mulyo. Ngoyitundwamo, ose kuvhura tu gazare asi Jehova kapi ngatu pulisira kukaparuka mouzuni woupe morwa mapuko aga atu tura. Magazaro gangoso madona. Ngapi omu natu tara mapuko getu? Bibeli kulikida asi kugusa ko Jesus Kristusa, vantu navenye “kwa zona.” (Rom. 3:23) Nye Jehova kapi a demenene komapuko getu. Age Guhya geharo ogu ana hara kutuvatera. Age hena Mudidimiki. Age ga diva asi ose kukondja tu funde po maupirankondo getu nomutaro gwepuko ogu twa kara nago kwanyamwetu,  ntani ga liwapaikire kutuvatera.—Rom. 7:18, 19.

4-5. Kuliza na-1 Johanesa 3:19, 20, yisinke ya vaterere vanavazinyetu vavali wovakadi va funde po kudompa mutjima?

⁴ Tu konakoneni sihonena saDeborah naMaria. * Apa Deborah ga kere munona, vemepata lyawo kwa mu tekwire momudona ano eyi ya mu ninkisire a lizuvhe asi age kwato mulyo. Kapi ngava mu pandadeke. Apa ga kulire, age ngali tara mwene asi kwato mulyo. Nampili apa nga tura mapuko gomanunu nga lizuvhu asi age siporo-poro tupu. Maria nage kwa ligwanekerere noudigu wokulifana. Vekoro lyendi ngava mu tekura momudona. Ngoyitundwamo, age nga lizuvhu asi kwato mulyo. Nampili apa ga ya tambwire usili, nga lizuvhu asi kapi ga fira kumutumbwisisa kedina lyaKarunga.

⁵ Nye, vanavazinyetu ava vavali kapi va hagekere kukarera Jehova. Morwasinke? Morwa awo kwa tanterere Jehova maudigu gawo kupitira mekanderero. (Epis. 55:22) Awo va ya yi tambwire asi Guhyetu gemeguru ga diva eyi twa pita ntani nomu ayi tu kundama. Nye hena age kumona yikara yoyiwa eyi twa kara nayo eyi nampo atu dili kumona nyamwetu.—Resa 1 Johanesa 3:19, 20.

6. Ngapi ava lizuvhu vamwe nsene vana tura epuko lyokulifana neli va tulire pomuhowo?

⁶ Gumwe nampo kuna kukondja mokufunda po nkareso zondona ezi ga yika nye simpe kuna kumudigopera kuzisiga, ano eyi kuvhura yi mu dompese mutjima. Ayo kapisi epuko kulizuvha unzoni nsene tuna zono. (2 Kol. 7:10) Nye kapisi tu lizuvhe udona nokugazara asi: ‘Ose kwato mulyo ndi asi Jehova kapi nga tu gusira po.’ Magazaro gangesi kapisi usili, ntani ayo kuvhura kutuninkisa tu hageke kukarera Jehova. Diworokeni eyi tuna resa moYisewe 24:10 asi ose ngatu kara vankundi moyirugana nsene tu dompo. Nye tu hundireni Jehova a tu gusire po nonzo detu kupitira mekanderero. (Jes. 1:18) Apa Jehova nga mona asi ono litezurura sili ntani ono hara kutjindja nkareso zoge nga ku gusira po. Ntani hedera vakuronambunga. Awo ngava kuvatera o tengwidire po elikwatakano lyoge naJehova.—Jak. 5:14, 15.

7. Morwasinke natu dilira kudompa mutjima nsene ose kuna kukondja mokurugana youhunga?

⁷ Jean-Luc, mukuronambunga gomoFransa kutantera ava ava kondjo nomaupirankondo gawo asi: “Muntu gomuhungami kosipara saJehova, kapisi googu ga dira kutura rumwe epuko, nye googu a dimburura mapuko gendi nokulitezurura.” (Rom. 7:21-25) Yipo nye, wa ha gazara  asi ove kwato mulyo nsene kwa kukondja nomaupirankondo goge. Natuvenye kutura mapuko, yiyo twa hepera nkenda zaKarunga ezi atu gwana kupitira mosizoweseso.—Efe. 1:7; 1 Joh. 4:10.

8. Wolye nava tu vatera apa atu dompo mutjima?

⁸ Vanavazinyetu womombungakriste kuvhura va tu hengagwide! Awo kuvhura va tu purakene nsene tu va tantera omu twa kulizuvha ntani nokutupa makorangedo. (Yis. 12:25; 1 Tes. 5:14) Munazinyetu gomukadi Joy gomoNigeria ogu ga kere noudigu wokudompa mutjima, kwa tanta asi: “Vanavazinyetu va vaterere nge. Ekorangedo eli na gwene ko vanavazinyetu kwa geve umbangi asi Jehova ga limbwilire makanderero gange. Name na lirongera ko kwawo omu nani vatera ava vana dompo mutjima.” Twa hepa kudiworoka asi vanavazinyetu kapi ava diva asi siruwo musinke tuna hepa makorangedo. Yiyo twa hepera kuhedera munazinyetu ogu ga kura pampepo nokumutantera asi twa hepa evatero.

9. Ngapi omu Episarome 41:3 ntani 94:19 ali tu korangeda?

⁹ Pura Jehova a ku vatere. Nsene ose kuvera-vera kuvhura yi tu karere udigu kugazara yoyiwa. Jehova kapi tatu verura pasitetu, nye age kutuhengagwida nokutupa nonkondo edi twa hepa yipo tu twikire kulididimikira. (Resa Episarome 41:3; 94:19.) Pasihonena, age kuvhura a ruganese vanavazinyetu va tu vatere kuzeresa membo ndi kuza kositora va ka tu randangere po. Kuvhura a ninke vanavazinyetu va tu kanderere po. Ndi kuvhura a tu diworokese magano gokuhengagwida aga ga kara moNonkango dendi, ngwendi ehuguvaro lyokukaparuka narunye mouzuni woupe twa hana kuvera ndi kuzuva kukora.—Rom. 15:4.

10. Morwasinke Isang ga dilire kutwikira kudompa mutjima konyima zapa ga ligwanekerere nehudi?

¹⁰ Isang gomoNigeria kwa ligwanekerere nehudi eli lya mu ninkisire a kare sirema. Ndokotora gwendi kwa mu tanterere asi kapi nga genda hena. Isang kwa tente asi: “Ame kwa dompere mutjima nokupira ehuguvaro.” Age ga twikilire kudompa mutjima ndi? Hawe! Yisinke ya mu vaterere? Isang kwa faturura asi: “Name namukadange kapi twa hagekere kukanderera kwaJehova ntani nokulironga Nonkango dendi. Ose kwa demenene kokupandura Jehova koyininke yoyiwa eyi twa kara nayo, kukwatera mo ehuguvaro lyokukaparuka mouzuni woupe.”

11. Ngapi omu Cindy ga kere noruhafo nampili ngomu ga verere unene?

¹¹ Cindy gomoMeksiko kwa mu kwatekere uvera wokutwaredesa konomfa. Ngapi omu ga lididimikilire? Age kwa litulilire po sitambo sokuzuvhisa nkenye ezuva, apa nga gwana uhaku wendi. Age kwa tjanga asi: “Pokuyirugana oyo, ame kwa demenene kwava wopeke mevango lyokudemenena ketauro lyange ntani kukora oku na zuvhire. Apa ngani zogere novandokotora ndi vanesa, ame ngani va pura kuhamena mapata gawo. Makura tani va pura eyi va horowera sirugana esi. Konyima zoyo, ayo ngayi karere nge ureru kudiva sirongwa esi nasi va twa komutjima. Vamwe kwa uyungire asi kapisi ureru kugwana muveli ogu na kupura omu ono karere. Ano sinzi sawo va pandwire nge kweyi na kere nosinka kwawo. Vamwe kwa pere nge nonomora donotelefona dawo. Nampili ngomu na ligwanekerere noukaro ou woudigu, Jehova ga pere nge ruhafo romomutjima na hana kuyindindira!”—Yis. 15:15.

12-13. Ngapi ava ava vera-vera ndi vakurupe ava zuvhisa, ntani yitundwamo musinke ayi kara?

 ¹² Wokuvera-vera ndi vakurupe kuvhura va dompe mutjima morwa kapi vana kuvhura kuzuvhisa ngamoomu va yi harera. Nye sinzi sawo simpe kugwana nompito dokugava umbangi wouwa. Munazinyetu gomukadi Laurel gomoAmerika, kwa mu tulire kehina ure wonomvhura 37 eli lya mu vaterere a vhure kuhesera! Age hena kwa kere nokankera, kwa mu tawire yikando yoyinzi ntani kwa kere nouvera wosipapa. Maudigu ogo kapi ga mu ninkisire a hageke kuzuvhisa. Age nga zuvhisire vanesa ntani nava ngava wiza va ya mu dingure. Yitundwamo musinke ya kere? Age kwa vaterere vantu 17 va lironge kuhamena Jehova! *

¹³ Richard, mukuronambunga gomoFransa kwa gava magano gomawa kowo ava dili kutunda membo morwa uvera ndi ava va kara momambo govakurupe. Age kwa tanta asi: “Kuvhura va ture yimbapiratjangwa pevango apa nava yi mona vantu. Vantu apa nava pita po tava yi mono ano eyi kuvhura yi twaredese konzogera. Eyi kuvhura yi korangede vanavazinyetu ava ava dili kuvhura kurugana tunda embo zende embo.” Ano ava ava dili kuvhura kupwaga membo morwa uvera, kuvhura va zuvhise kupitira kotelefona ndi pokutjanga nombilive.

14. Sihonena musinke sosiwa ga tura po hompa Ndafita?

¹⁴ Pwa kara nokonda dononzi deyi natu dilira kugwana situmbukira esi twa hara mombunga zaJehova, pasihonena, nampo tu vakurupe, ndi kuvera-vera ndi maukaro gamwe. Nsene moukaro wangoso tuna kara kuvhura tu lirongere ko kosihonena sahompa Ndafita. Apa Ndafita ga mu tanterere Jehova asi kapisi yige nga mu dikira ntembeli nampili ngomu ga here kuzidika, age kwa kwatesere ko ogu ga horowere Karunga a rugane sirugana oso. Ndafita kwa geve ngorodo zonzi unene nosisiliveli kosirugana oso. Aso kuna kara sihonena sosiwa kwetu!—2 Sam. 7:12, 13; 1 Hist. 29:1, 3-5.

15. Ngapi omu Hugues ga fundire po kudompa mutjima?

¹⁵ Munazinyetu gomugara Hugues gomoFransa kwa hagekere kukara mukuronambunga morwa kuvera-vera ntani kapi nga vhuru kurugana nampili yirugana yoyinunu membo. Age kwa tjenge asi: “Pomuhowo ame kwa dompere mutjima ntani ngani lizuvhu asi kwato mulyo. Nye mwaza  siruwo, na ya tambwire ukaro wange ntani na gwene ruhafo mokukarera Jehova. Ame nina tokomene kutwikira kukarera Jehova. Ngwendi Ngidiyona novagara vendi mafere gatatu ava va rorokere, name tani twikire ngorooro kurwa!”—Vap. 8:4.

16. Yisinke natu lirongera ko kosihonena sovaengeli?

¹⁶ Vaengeli wovalimburukwa kuna kara sihonena sosiwa. Pasihonena, Jehova kwa pulire vaengeli va gave magano omu nava kumbagera hompa komudona Ahaba. Vaengeli wokulisiga-siga kwa geve magano gawo. Nye Karunga kwa horowere muengeli gumwe tupu ntani kwa mu tanterere asi magano gendi ta ga ka rugana. (1 Vah. 22:19-22) Eyi ya dompesere vaengeli vakwawo nokugazara asi: ‘Morwasinke nina hepekere siruwo sawo mokugava magano ndi?’ Hawe, awo kapi va yi gazarere. Vaengeli va linunupika ntani va hara efumano nalinye lize kwaJehova.—Vap. 13:16-18; Ehor. 19:10.

17. Yisinke natu rugana nsene tuna dompo mutjima morwa kapi tuna kugwana yitumbukira mombunga?

¹⁷ Diworoka asi kukara gumwe goNombangi daJehova nokuzuvhisa kuhamena Uhompa wendi yiso situmbukira sosinene po. Kuvhura tu gwane situmbukira ndi tu si zumbanese, nye oyo kapisi yiyo ayi tu ninkisa tu kare mulyo kwaKarunga. Nye nsene tu linunupika, Jehova ngatu tara asi ose mulyo ntani vanavazinyetu nawo ngava tu tara asi ose mulyo. Yipo nye, likwambera kwaJehova a ku vatere o twikire kukara nelinunupiko. Teda ko koyihonena yovakareli vaJehova ava va linunupikire ava va tumbura moBibeli. Vatera vanavazinyetu mononkedi dokulisiga-siga.—Epis. 138:6; 1 Pet. 5:5.

18-19. Ngapi omu no twikira kukara noruhafo nsene asi vantu womomukunda kapi ava purakene kombudi zetu?

¹⁸ Ove wa dompa rumwe mutjima morwa vantu kapi ava purakene kombudi zetu ndi morwa kugwana vantu wovasesu tupu pembo? Yisinke natu rugana, yipo tu twikire kukara noruhafo moukaro owo? Magano gamwe kwa ga zogera mokakende “ Ngapi no gwana ruhafo mokuzuvhisa?” Ya kara nomulyo hena tu kare nomutaro gouhunga kosirugana sokuzuvhisa. Yisinke ayi tanta?

¹⁹ Demenena kokudivisa edina lyaKarunga noUhompa wendi. Jesus ga uyungire asi wovasesu tupu ngava mu kwama. (Mat. 7:13, 14) Apa atu kara mokuzuvhisa, ose kurugana kumwe naJehova naJesus ntani vaengeli. (Mat. 28:19, 20; 1 Kol. 3:9;  Ehor. 14:6, 7) Jehova kupapara vantu ava va hara kumukarera. (Joh. 6:44) Nsene muntu kapi ana kupurakena kombudi zongwa ngesi, nampo nga purakena komeho.

20. Yisinke Jeremiya 20:8, 9, zina kuturonga omu natu funda po kudompa mutjima?

²⁰ Yinzi natu lirongera ko komuporofete Jeremiya. Age kwa ka zuvhisilire momukunda omu vantu va dilire kumupurakena. Vantu ngava mu swaura oku tava muzoro “nkenye siruwo.” (Resa Jeremiya 20:8, 9.) Posiruwo simwe, age kwa dompere unene ntani kwa here kuhageka. Nye kapi ga hagekere. Morwasinke? “Mbudi” zaJehova kwa kere ngwendi mundiro guna kutwera mwaJeremiya, ntani kapi ga vhulire kuzimina ndi kuzimwena. Nose ngatu kara ngwendi Jeremiya nsene tu resa Nonkango daKarunga nkenye ezuva nokuteda ko. Ngoyitundwamo, ose ngatu kara noruhafo mosirugana sokuzuvhisa ntani vantu ngava tu purakena.—Jer. 15:16.

21. Yi kare asi moukaro musinke tuna kara, ngapi natu funda po kudompa mutjima?

²¹ Deborah ogu tuna tumbura mosirongwa esi, kwa tanta asi: “Edompo mutjima kuna kara sirwiso esi a ruganesa Satana.” Nye yirwiso yaSatana nayimwe si kwaJehova Karunga. Yipo nye, nsene o dompo mutjima yi kare asi konda musinke, kanderera kwaJehova a ku vatere. Age nga ku vatera nomaupirankondo goge ntani nokudira kusikilira mo koge. Nga ku vatera nsene to vere. Age nga ku vatera o kare nomutaro gouhunga kuhamena yitumbukira. Ntani nga ku vatera yi ku tompoke mosirugana sokuzuvhisa. Ntani hena, gava yinka yoge kwaGuhyetu gemeguru. Nevatero lyendi, ngayi ku tompoka yipo o funde po kudompa mutjima.