1. Ino kulefuka inga kwatupa kulinyumfwa buyani?

BUSHIKU buli boonse tulaba amapensho alimwi tuleelesha kucita nsheenga twacikonsha kwaamba ayi tukome mapensho ayo. Nacibi boobo, teshi cuubu kuliyumya mumapensho na katulinyumfwa kulefuka. Aboobo tulyeelete kwiibaluka kwaamba ayi kulefuka inga kwatupa kunoolibona anga taaku mbotubete alimwi ici inga catupa kutaba alusangalalo. Baibo pa Tushimpi 24:10 ilaamba ayi: ‘Na watentuka muciindi camapensho, nkokwaamba ayi nkusu shako shilaceya.’ Aboobo kulefuka inga kwatumana nkusu cakwaamba ayi twaalilwa kuliyumya mumapensho.

2. Ino nshiinshi sheenga shapa kwaamba ayi tulinyumfwe kulefuka, alimwi ino nshiinshi nsheshi twiiye mumutwi uyu?

² Kuli shintu shiinji sheenga shatupa kulefuka. Cimwi ciindi inga twalilefula sobene na kulefuka ceebo ca bamwi. Shintu shimwi pasheesho shitupa kulefuka shileelikaawo kutaba bantu bamaninite, shilubo, alimwi akuciswa ciswa. Cimwi ciindi inga twalinyumfwa kulefuka ceebo cakutapekwa mukuli ngotusuni mulibunga lyakwe Yehova, na kushimikila kumusena bantu nkobatasuni kukutika. Mumutwi uyu, tutokwiiya nsheenga twaciita kwaamba ayi tucileeke kulinyumfwa kulefuka.

3. Ino nshiinshi sheenga shatucafwa kutanoolibona anga taakuwo mbotubete akucileka kulinyumfwa cibiibi abuumbi ceebo ca shilubo shesu?

³ Ncuubu kutalika kulibona anga taakuwo mbotubete akulinyumfwa cibiibi ceebo ca shilubo shesu. Aboobo ici inga catupa kutalika kuyeeya ayi Yehova teshi akatusuminishe kunjila mucishi cipya ceebo ca shilubo shesu. Kuyeeya kwa mushobo uyu takubete kabotu. Aboobo ino tulyeelete kunolinyumfwa buyani pashilubo shesu? Baibo ilaamba ayi bantu boonse “bakabisha,” kukushakobo Yesu Klistu. (Loma. 3:23) Nacibi boobo, Mulembi wa Baibo  taalangooli shilubo nabi kutulangila kucita shintu anga mbantu bamaninite. Sombi ngu Ishiwesu shilusuno usuni kutucafwa. Alimwi alakalika moyo. Alicishi kwaamba ayi buunji bwandiswe cilatuyumina kucita shiluleme alimwi tulalinyumfwa cibiibi abuumbi pashilubo shesu, aboobo alilibambite kutucafwa.—Loma. 7:18, 19.

4-5. Kweelana a 1 Joni 3:19, 20, ino nciinshi cakacafwa benankashi bobilo kucileka kulinyumfwa kulefuka?

⁴ Amuleke tubandike cakubonenaako caba Deborah aba Maria. * Ndyebakalinga banike, ba Deborah tabakalinga kubikilwa maano mumukwashi wabo alimwi ici cakabapa kulinyumfwa cibiibi abuumbi. Tabakalinga kubalumbawo. Aboobo ici cakabapa kutalika kulinyumfwa anga taakuwo mbobabete. Alimwi nabi bacita cilubo ciniinibo, bakalinga kulibona anga teshi bakacitewo cibotu. Ubu bweenka mbocakalinga akuli ba Maria. Beshikamukowa babo bakalinga kubapensha. Aboobo bakalinga kulinyumfwa anga ngumuntu utacite ncito. Pesule lyakwiiya cancine, bakalinyumfwa kuteelela kwiitwa liina lyakwe Lesa!

⁵ Nacibi boobo, benankashi aba tabakwe kucileka kusebensela Yehova. Ino nceebonshi? Cintu comwi cakabacafwa nkupaila kuli Yehova akumulwiita mbobakalinga kulinyumfwa. (Kulu. 55:22) Bakeeya kwaamba ayi Ishiwesu shilusuno alishi mbotulinyumfwa ceebo ca shintu shibiibi shakatucitikila kale kale. Sombi alabona amibo ibotu njetucite nabi kwaamba ayi mpashi sobeene tulalibona anga taakuwo mbotubete.—Amubelenge 1 Joni 3:19, 20.

6. Ino muntu inga walinyumfwa buyani na wabooshawo alimwi kucita cilubo?

⁶ Cimwi ciindi muntu inga weelesha cankusu kwaamba ayi acileeke cilabo cimwi cibiibi, sombi cimwi ciindi inga wabooshawo alimwi kucita cilubo akulinyumfwa kulefuka. Ncakwiila kwaamba ayi tulalinyumfwa cibiibi na twaciita cilubo. (2 Koli. 7:10) Nacibi boobo, tatweelete kulinyumfwa cibiibi cakwiindilila cakwaamba ayi twatalika kuyeeya ayi: ‘Camana ndaalilwa teshi nkacinjeewo. Yehova inga taandekeleliwo.’ Ishi teshi nshoyaamba Baibo, alimwi kuyeeya kwa mushobo uyo inga kwapa kwaamba ayi tucileeke kusebensela Yehova. Amwiibaluke shaamba Tushimpi 24:10—nkusu shesu shilaceya na twalinyumfwa kulefuka na kutentuka. Aboobo tulyeelete ‘kubandikishanya’ a Yehova mumupailo akumusenga ayi atunyumfwile nkumbu. (Isa. 1:18) Na Yehova wabona ayi ncakwiila mwaana, alaakumunyumfwila nkumbu. Kwiilikaawo, amusenge lucafwo kubamanene. Balaakumucafwa cakukalika moyo kwaamba ayi mucikoonshe kutolelela kuba bayumu lwakumushimu.—Jemu. 5:14, 15.

7. Ino nceebonshi tatweelete kulinyumfwa cibiibi na tutokweelesha cankusu kwaamba ayi tucileeke cilabo cibiibi?

 ⁷ Ba Jean-Luc, banene mulibungano ku France, bakaamba maswi eenga ayuminisha baabo batokweelesha cankusu kucileka cilabo cibiibi. Bakaamba ayi: “Yehova mbwaabona ayi mbaluleme teshi bantu bataciti shilubo, sombi mbaabo balinyumfwa cibiibi na babisha, alimwi beelesha cankusu kutabooshawo alimwi kubisha.” (Loma. 7:21-25) Aboobo na mutookweelesha cankusu kucileka cilabo cibiibi, mutanyumfwi anga taakuwo mbomubete. Mukwiinga soonse tulabisha, tulayandika nkumbu shakwe Lesa, isho nshatutondesha kwiinda mucilubula.—Efe. 1:7; 1 Joni 4:10.

8. Ino mbaani mbeenga twasenga lucafwo na twalinyumfwa kulefuka?

⁸ Bamakwesu abenankashi inga batuyuminisha! Inga bakutika ndyetutoobasansulwiita mbotutoolinyumfwa alimwi inga batulwita maswi eenga atuyuminisha. (Tus. 12:25; 1 Tesa. 5:14) Nankashi Joy, waku Nigeria wakeenda mulipenshi lyakulinyumfwa kulefuka, wakaamba ayi: “Kwakubula bamakwesu abenankashi naakwiinga nshikwe kucikonsha kuliyumya. Kuyuminisha kwa bamakwesu abenankashi ncitondesho cakwaamba ayi Yehova alakumbula mipailo yangu. Lucafwo lwabo lwancafwa kwiiya mbweenga anebo ndayuminishako bamwi balefukite.” Nacibi boobo, tulyeelete kwiibaluka kwaamba ayi cimwi ciindi bamakwesu abenankashi inga tabashibiwo ayi tutoyandika kuyuminishikwa. Aboobo inga twayandika kulwiitako umwi ushimpite lwakumushimu kwaamba ayi atucaafwe.

9. Ino Kulumbaisha 41:3 a 94:19 inga yatuyuminisha buyani?

⁹ Amusenge lucafwo kuli Yehova. Na twaciswa, bunene bunene na twaciswa kwaciindi cilaamfu, inga caba ciyumu kuyeeya pashintu shibotu. Nabi kwaamba ayi Yehova inga taaciti caankamiko cakutoolesha pacecino ciindi, alatuyuminisha akutupa nkusu shakwaamba ayi tucikoonshe kuliyumya. (Amubelenge Kulumbaisha 41:3; 94:19.) Kucakubonenaako, mpashi inga watucafwa kwiinda mukupa kwaamba ayi Mwineklistu ese mukutucafwa anciito sha palubaansa na kutuulilako shintu. Inga wapa kwaamba ayi bamakwesu batupailileeko. Na mpashi kutucafwa kwiibaluka makani ayuminisha ngotwakabelengawo mu Maswi akwe, mbuli makani aamba pabuumi bubotu butacite mapensho, malwashi alimwi akucisa kuli koonse mbweshi tukacane mucishi cipya.—Loma. 15:4.

10. Ino nceebonshi ba Isang tabakwe kutolelela kulinyumfwa cibiibi pesule lyakulicisa?

¹⁰ Ba Isang, abo bekala ku Nigeria, bakalinga mulipenshi lyakapa kwaamba ayi myeendo yoonse yobilo icileeke kusebensa. Ba dokota bakabalwiita ayi teshi bakeendewo alimwi. Ba Isang bakaamba ayi: “Ndakalinyumfwa cibiibi abuumbi akulefuka.” Ano sa bakatolelela kulinyumfwa kulefuka? Sobwe! Ino nciinshi cakabacafwa? Bakaamba ayi: “Nebo abakaangu twakatolelela kupaila kuli Yehova akwiiya Maswi akwe, alimwi twakalinga kushinishite kubikila maano kunookwiibaluka shintu shibotu Yehova nshakaatupa mbuli cishomesho ca cishi cipya.”

11. Ino nciinshi cakacafwa ba Cindy kuba alusangalalo nabi ndyebakalinga balwashi?

¹¹ Ba Cindy, abo bekala kucishi ca Mexico, bakabacana abulwashi bunene bucaya. Ino bakacikonsha buyani kuliyumya? Ndyebakalinga kushilikwa, bakashinisha kunooshimikila bushiku abushiku. Bakaamba ayi: “Ici cakancafwa kutabikila maano kukucisa, na kubulwashi mbondakalinga kuciswa. Nshendakalinga kucita nsheeshi: Na ntobandika aba dokota nabi ba naasi, ndakalinga kubeepusha pamikwashi yabo. Lyalo ndakalinga kubeepusha cakapa kwaamba ayi basale kwiiya ncito iyumu iyi. Lyalo cakalinga kuba cuubu kushiba makani eenga abashika pamoyo. Baanji bakaamba ayi teshi liinji mulwashi kwiipusha mbobabete amukwashi wabo. Alimwi  baanji bakalinga kulumba mbondakalinga kubatondesha kubikila maano. Bamwi bakalinga kundwiita nkobakala na kumpa fooni namba yabo. Aboobo nabi kwaamba ayi ici cakalinga ciindi ciyumu abuumbi, Yehova wakanjuminisha abuumbi munshila yakuteengashilawo!”—Tus. 15:15.

12-13. Ino bamakwesu balwashi na abo baciswa ciswa balacita buyani kwaamba ayi bacikoonshe kwaabanamo lubasu muncito yakushimikila, alimwi ino nshiinshi shiswaamo?

¹² Muntu na ngumulwashi nabi na alaciswa ciswa, inga walinyumfwa kulefuka ceebo cakutacikonsha kusebensa kweelana ambwakalinga kucita kale kale. Nacibi boobo, baanji balacana nshila shibotu shakushimikila. Nankashi Laurel waku America bakamubika kumashini yakalinga kumucafwa kuyooya kwa myaaka 37! Wakaliyumya kubulwashi bwa kansa, maopaleshoni anene, kwiilikaawo amalwashi amwi atamaani. Nabi kwaamba ayi wakalinga kwiinda mumalwashi oonse aya, taakwe kucileka kushimikila. Wakalinga kushimikila kumanasi akubaabo bakalinga kusa mukumulama kuŋanda yakwe. Ino nshiinshi shakaswaamo? Wakacikonsha kucafwa bantu bashika kuma 17 kwiiya cancine camu Baibo! *

¹³ Ba Richard, abo batoosebensa mbuli munene mulibungano ku France, bakaamba sheenga shacafwa bamakwesu balwashi bateendi kuswa paŋanda na abo bekala kumusena kulaminwa balwashi. Bakaamba ayi: “Inga cabota na kabacite kakubikawo mabuku kwaamba ayi abo batoosa mukubabona banoobona. Bantu baanji na babona mabuku inga basuna kwiiya alimwi ici inga capa kwaamba ayi mutalike mubandi. Kucita sheeshi inga kwayuminisha bamakwesu abenankashi batacikoonshi kushimikila ku ŋanda aŋanda.” Abo batacikoonshi kweenda kuswa paŋanda ceebo cakuciswa ciswa inga bashimikila kwiinda mukulemba makalata alimwi apafooni.

14. Ino nshiinshi shibotu Mwaami Defedi nshaakacita?

¹⁴ Cimwi ciindi inga tabatupi mikuli mulibungano ceebo cakukula, kuciswa ciswa, na shimwi. Na caba boobo, inga tweeya shibotu kuswa kucakubonenaako ca Mwaami Defedi. Ndyaakalwitikwa ayi teshi ngweshi akasebense ncito njaakalinga kulangila, ya kuyaka tempele yakwe Lesa, wakacafwilisha wooyo wakasalwa ayi asebense ncito iyo. Wakapa ashabupe shakalinga kuyandika muncito iyi. Wakatondesha cakubonenaako cibotu abuumbi aswebo ncotweelete kukonkela!—2 Samwe. 7:12, 13; 1 Maka. 29:1, 3-5.

15. Ino mukwesu Hugues wakacita buyani kwaamba ayi acileeke kulinyumfwa cibiibi?

¹⁵ Ceebo camapensho akuciswa, mukwesu waliina lya Hugues wakucishi ca France,  wakacileka kusebensa mbuli munene mulibungano, alimwi wakalinga kwaalilwa nabi kusebensa tucito tuniini twapalubaansa. Wakalemba ayi: “Pakutaanguna, ndakalinyumfwa kulefuka akubula mpindu. Ano mukuya kwaciindi, ndakabona kwaamba ayi ndakalinga kweelete kucileka kulinyumfwa cibiibi pashintu nshendakalinga kwaalilwa kucita, aboobo ndakatalika kuba alusangalalo mukusebensela Yehova kweelana ansheenga ndacikonsha. Ndishinishite kutaboolela mwisule. Bweenka mbuli Gidyoni abasankwa bali 300 mbaakalingaabo mbobakacita nabi kwaamba ayi bakalinga kulemete, anebo ndaakutolelela kuliyumya!”—Boombo. 8:4.

16. Ino nciinshi nceenga tweeya kucakubonenaako ca baanjelo?

¹⁶ Kuli nsheenga tweeya kuswa kucakubonenaako ca baanjelo bashomeka. Muciindi ca bulelo bwa Mwaami Aabu, Yehova wakalwiita baanjelo ayi baambe nshila njobalinga kubona ayi inga yasebensa kabotu kucenjeeka Mwaami mubiibi Aabu. Baanjelo bamwi bakaamba nshila shipusenepusene nshobakalinga kubona ayi inga shasebensa. Sombi Yehova wakasalawo nshila yomwibo yakaamba munjelo umwi. (1 Baa. 22:19-22) Ano sa baanjelo bashomeka aba bamwi bakalinyumfwa cibiibi, mpashi akutalika kuyeeya ayi, ‘Ino ndasowela nshi ciindi cangu kwaamba muyeeyo wangu?’ Sobwe napaceyi. Ncakwiila baanjelo balaliceesha alimwi balisuni kwaamba ayi kulumbaisha koonse kunooya kuli Yehova.—Boombo. 13:16-18; Ciyu. 19:10.

17. Ino nshiinshi nshotweelete kucita na katulinyumfwa cibiibi ceebo cakwaamba ayi tatucite mikuli imwi mulibungano?

¹⁷ Mutaluubi kwaamba ayi coolwe cinene ncetucite nkwiitwa liina lyakwe Lesa akwaambilisha Bwaami bwakwe. Cimwi ciindi inga twapekwa mikuli mulibungano alimwi akunyaikwa, sombi mikuli teshi ncecintu citupa kuba bayandika kuli Lesa. Kuliceesha nkweenga kwapa kwaamba ayi Yehova abamakwesu abenankashi batusuune. Aboobo amupaile akusenga Yehova kwaamba ayi amucaafwe kuba muntu uliceesha. Amuyeeye pashakubonenaako shiinji sha basebenshi bakwe Yehova baliceesha nshetucana mu Maswi akwe. Amulyaabe kusebensela bamakwesu abenankashi munshila ili yoonse njeenga mwacikonsha.—Kulu. 138:6; 1 Pita 5:5.

18-19. Ino inga mwacita buyani kwaamba ayi munoosangalala muncito yakushimikila nabi kwaamba ayi nkomushimikila taakuwo bantu bakutika?

¹⁸ Sa cimwi ciindi mulalinyumfwa kulefuka ceebo cakwaamba ayi bantu nkomushimikila  tabasuniiwo kukutika, na mpashi baanji tabacaniki paŋanda? Na caba boobo, ino inga mwacita buyani kwaamba ayi mutolelele kuba alusangalalo? Shimwi shicafwa nsheenga mwaciita shatondeshekwa pakabokosi kacite mutwi utokwaamba ayi “ Sheenga Shamucafwa Kusangalala Muncito Yakushimikila.” Cimwi ciyandika nkushiba luyaando lwancito yakushimikila. Ino ici cilaamba nshi?

¹⁹ Amubikile maano kwaambilisha liina lyakwe Lesa a Bwaami bwakwe. Yesu wakaambila limwi patuba ayi mbantu baniinibo beshi bakacane nshila yakubuumi. (Mate. 7:13, 14) Incito yakushimikila ilatupa coolwe cakusebensela pomwi a Yehova, Yesu, alimwi abaanjelo. (Mate. 28:19, 20; 1 Koli. 3:9; Ciyu. 14:6, 7) Yehova atolangoola bantu basuni kumusebensela. (Joni 6:44) Aboobo na muntu taasuni kukutika makani ngotushimikila pacecino ciindi, mpashi inga wakutika paciindi cimwi na twaboolelako alimwi.

20. Ino nshiinshi nsheenga tweeya pa Jelemiya 20:8, 9 pamakani akukoma kulefuka?

²⁰ Inga tweeya shiinji kucakubonenaako ca mushinshimi Jelemiya. Bantu kumusena nkwakalinga kushimikila bakalinga kukaka kukutika. Bakalinga kumucobola akumuseka “ciindi coonse.” (Amubelenge Jelemiya 20:8, 9.) Paciindi cimwi wakalinyumfwa kulefuka abuumbi cakwaamba ayi wakalinga kusuni kucileka. Sombi taakwe kucileka. Ino nceebonshi? Jelemiya wakaamba ayi: “Maswi akwe Yehova” akalinga anga ngumulilo mumoyo wakwe aboobo wakaalilwa kwaasunga! Aswebo ubu mbweenga twalinyumfwa na katwiiya Maswi akwe Lesa lyoonse akukutumana kuyeeyawo abuumbi. Kucita boobo kulaakutupa kuba alusangalalo ndyetutoshimikila alimwi bantu baanji inga basuna kukutika.—Jele. 15:16.

21. Ino inga twacita buyani kwaamba ayi tukome kulefuka?

²¹ Ba Deborah mbotwalinga twaambawo bakaamba ayi: “Kulefuka ncilwanisho cikali Satana ncaasebensesha.” Nacibi boobo, Yehova alicite nkusu kwiinda Satana ashilwanisho shakwe. Aboobo na mwalinyumfwa kulefuka, amupaile kuli Yehova. Alaakumucafwa kulwana shilubo shanu. Alaakumupa nkusu ndyemwaciswa. Alaakumucafwa kunoobona mikuli mulibungano lyakwe munshila yeelete. Alimwi akwiibaluka citupa kwaamba ayi tunoshimikila. Aboobo munopaila lyoonse kuli Ishiwanu wakwiculu akumulwiita mbomutoolinyumfwa. Kwiinda mulucafwo lwakwe inga mwacikonsha kucileka kulinyumfwa kulefuka.