1. Awˬ gʼaˇ nuˇ ve ngaˬ hui htaꞈ heuˆ la kuiˬ hkʼaˬ hkʼe cawˬ ve le?

 Teˇ nyi le le ngaˬ hui shoꞈ shaꞈ ve laiˉ ceuˬ gʼa hpuˇ ve yoˬ. Chi ve htaꞈ tawˍ daꞈ gʼa tuˬ ngaˬ hui gʼa coˇ caˇ jaˇ. Ngaˬ hui awˬ gʼaˇ maˇ nuˇ ve kʼo, shoꞈ shaꞈ ve htaꞈ hkʼa dehꞈ tawˍ daꞈ gʼaˇ ve tehꞈ nawˬ mawˬ˗aw laˇ? Chi htaꞈ pa taw, awˬ gʼaˇ nuˇ ve lehˬ maˇ gʼa jehˬ piˇ ve hkehˉ chaw hkʼe hpehꞈ ve tehꞈ ngaˬ hui gʼa shawˍ ve yoˬ. Chi lehˬ ha lehˬ ve, haꞈ hanˉ ve, leh ngaˬ hui ve yonˍ gʼa ve htaꞈ ca veh la ve yoˬ. Tawˇ naˉ ve liꞈ 24:10 hkʼaw kʼoˆ ve, “haˍ ve kanˉ htaꞈ gʼa hpuˇ daꞈ htaˇ nyi ma luˬ puiˉ ve chaw lehˬ, awˬ tehˬ awˬ na gʼaˇ nuˇ ve chaw hpehꞈ ve yoˬ.” Awˬ gʼaˇ nuˇ ve lehˬ ngaˬ hui a shaꞈ teꞈ kuiˬ hkʼaw shoꞈ shaꞈ ve htaꞈ tawˍ daꞈ maˇ gʼaˇ leh awˬ gʼaˇ peuˬ tuˬ te laˇ ve yoˬ.

2. Ngaˬ hui awˬ gʼaˇ nuˇ tuˬ te laˇ gʼa ve aˬ htoꞈ ma cawˬ ve le? Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Ngaˬ hui awˬ gʼaˇ nuˇ tuˬ te laˇ ve laiˉ ceuˬ cawˬ ve yoˬ. Ngaˬ hui ve awˬ to maˇ heˆ leh awˬ nu ve awˬ ceuˬ geh laˬ ve yoˬ hehˉ. Chi ve teˇ hpaˍ lehˬ, maˇ biˇ ve chaw hpehꞈ ve, awˬ gʼa nuˇ ve, ngaˬ hui maˇ chehˇ sha ve, ngaˬ hui te gaˇ ve awˬ vuiˬ maˇ gʼa te ve, leh shu daꞈ ve awˬ lawn sha tanˇ hkʼa dehꞈ maˇ na gaˇ kuiˬ awˬ ti lo gʼa chehˇ ve pa taw yoˬ. Ngaˬ hui te gʼa ve awˬ ceuˬ lehˬ, awˬ gʼaˇ nuˇ ve htaꞈ tawˍ daꞈ gʼaˇ tuˬ awˬ lawn chi ve hkʼaw teˇ geh henˇ tuˬ yoˬ.

3. Ngaˬ hui a shu yawˇ awˬ to htaꞈ maˇ daꞈ ve leh yaꞈ ve tehꞈ dawˇ htaˇ aˬ htoꞈ ma ga laˇ ve le?

³ Ngaˬ hui a shu yawˇ awˬ to htaꞈ maˇ daꞈ ve leh yaꞈ ve tehꞈ dawˇ tuˬ sha jaˇ. Chi hkʼe hpehꞈ htaˇ, Yaˬhoˉvaˬ ngaˬ hui htaꞈ miˬ guiˬ awˬ suhˉ hkʼaw maˇ loꞈ˗e tcuh gaˇ taˍ tehꞈ dawˇ la ve yoˬ. Yaꞈ hkʼaˇ, chi hkʼe ve dawˇ hkʼaˇ lehˬ ngaˬ hui awˬ pon kawˆ tuˬ cawˬ jaˇ. Hkʼe te leh, ngaˬ hui maˇ biˇ ve pa taw te yaꞈ ve htaꞈ hkʼaˬ hkʼe dawˇ tuˬ le? Liꞈ hpu hkʼaw kʼoˆ ve, “chaw hkʼa peu˗eˬ venˇ baˆ te” ve yoˬ. Yeˍsuˆ teˇ gʼaˇ ceh tiˉ biˇ ve chaw hpehꞈ ve yoˬ. (Roˉmaꞈ 3:23) Yaꞈ hkʼaˇ, Yaˬhoˉvaˬ ngaˬ hui te yaꞈ ve htaꞈ tiˉ maˇ nyi leh ngaˬ hui biˇ ve chaw hpehꞈ ve tehꞈ yawˇ maˇ dawˇ.  Yaˬhoˉvaˬ lehˬ haꞈ ve Awˬ pa hpehꞈ leh ngaˬ hui htaꞈ ga laˇ gaˇ ve yoˬ. Leh yawˇ ngaˬ hui htaꞈ kaꞈ yeunˇ hkanˍ laˇ ve yoˬ. Ngaˬ hui awˬ gʼaˇ nuˇ ve htaꞈ tawˍ daꞈ leh a shu yawˇ awˬ to htaꞈ yaꞈ ve tehꞈ maˇ dawˇ tuˬ yawˇ shiˍ ve yoˬ. Leh yawˇ ngaˬ hui htaꞈ hkʼaˬ htaˆ kaꞈ ga laˇ tuˬ gu hehnˇ taˍ ve yoˬ.—Roˉmaꞈ 7:18, 19.

4-5. 1 Yoˇhanˬ liꞈ 3:19, 20 hkʼaw kʼoˆ taˍ ve hkʼe, awˬ viˉ awˬ nyi yaˇ miˇ 2 gʼaˇ awˬ gʼaˇ nuˇ ve htaꞈ tawˍ daꞈ gʼaˇ tuˬ aˬ htoꞈ ma ga piˇ ve le?

⁴ Deˍboˇraˍ leh Maˍriˆ * ve awˬ lawn htaꞈ teˇ geh nyi sheˍ. Yaˇ ehˉ htaˇ Deˍboˇraˍ ve yehˬ kʼa hkʼaw ve chaw lehˬ yawˇ yaꞈ taw tuˬ te piˇ leh yawˇ maˇ daꞈ tehꞈ dawˇ ve yoˬ. Yawˇ htaꞈ teˇ gʼaˇ˗ehꞈ kaꞈ maˇ chiˇ mvuh piˇ jaw. Chi htaꞈ pa taw yawˇ uiˍ la htaˇ, yawˇ awˬ to htaꞈ maˇ daꞈ ve hpawˇ nyi ve chaw hpehꞈ la ve yoˬ. Yawˇ awˬ lawn maˇ uiˍ ve htaꞈ te yaꞈ ve htawˇ, yawˇ teˇ ceuˬ kaꞈ maˇ daꞈ tehꞈ dawˇ ve yoˬ. Maˍriˆ kaꞈ chi ve hkʼa shuˍ shuˍ gʼa hpuˇ ve yoˬ. Yawˇ ve awˬ viˉ awˬ nyi yawˇ htaꞈ maˇ daꞈ ve te piˇ leh yawˇ awˬ hpfuhˇ maˇ cawˬ tehꞈ dawˇ ve yoˬ. Yawˇ Baˆtiˆsaˬ haꞈ yuˬ peuˬ nawˉ kaꞈ Yaˬhoˉvaˬ ve Shaˉhkiˆhkanˍ ve chaw hpehꞈ ve maˇ keunˍ tehꞈ dawˇ ve yoˬ.

⁵ Yaꞈ hkʼaˇ, awˬ viˉ awˬ nyi yaˇ miˇ chi nyiˇ gʼaˇ Yaˬhoˉvaˬ ve kanˉ te chehˇ sheˍ. Yawˇ hui htaꞈ aˬ htoꞈ ma ga piˇ ve le? Yawˇ hui htaꞈ ga piˇ ve awˬ ceuˬ lehˬ, yawˇ hui ve dawˇ haˍ tuˬ teˇ hpaˍ bon lawˬ ve hkʼaw Gʼuiˬ sha geh teh taˍ piˇ leh, nyi ma hkʼaw cawˬ ve awˬ ceuˬ yawˇ htaꞈ kʼoˆ piˇ ve yoˬ. (Chiˇ mvuh ve 55:22) Mvuhˇ naw ma hkʼoˆ chehˇ ve ngaˬ hui htaꞈ haꞈ ve Awˬ pa Yaˬhoˉvaˬ lehˬ, ngaˬ hui aˬ htoꞈ ma gʼa hpuˇ ve yawˇ shiˍ leh, awˬ lawn chi ve ngaˬ hui htaꞈ heuˆ la kuiˬ hkʼaˬ hkʼe cawˬ ve, awˬ viˉ awˬ nyi yaˇ miˇ chi nyiˇ gʼaˇ awˬ tehˬ na gʼa la ve yoˬ. Yaꞈ hkʼaˇ, chi hkʼe ceh maˇ heˆ. Ngaˬ hui nyi ma hkʼaw cawˬ ve awˬ ceuˬ teˇ hpaˍ ngaˬ hui maˇ shiˍ gʼa ve htawˇ, Gʼuiˬ sha lehˬ, ngaˬ hui nyi ma hkʼaw cawˬ ve daꞈ ve awˬ ceuˬ htaꞈ mawˬ ve yoˬ.—1 Yoˇhanˬ 3:19, 20 gʼaw sheˍ.

6. Chaw teˇ hpaˍ yawˇ hui kʼawꞈ te yaꞈ htaˇ hkʼaˬ hkʼe dawˇ ve le?

⁶ Laiˇ gʼaˇ maˇ daꞈ ve htaꞈ maˇ te tuˬ coˇ caˇ jaˇ ve htawˇ, te yaꞈ sheˍ ve yoˬ. Chi yawˇ dawˇ taˍ ve hkʼe te maˇ gʼa leh awˬ gʼaˇ nuˇ jaˇ ve yoˬ. Yaꞈ hkʼaˇ, ngaˬ hui venˇ baˆ te yaꞈ htaˇ nyi ma luˬ ve lehˬ, a hkʼe leˇ hpehꞈ ve yoˬ. (2 Kawˇrenˍhtuˆ 7:10) Yaꞈ hkʼaˇ, ngaˬ hui awˬ to htaꞈ venˇ baˆ hkʼe taw maˇ taˍ cawˇ. ‘Ngaˬ daꞈ kuiˬ teꞈ chiˉ maˇ cawˬ. Yaˬhoˉvaˬ ngaˬ htaꞈ venˇ baˆ hpehˇ laˇ tuˬ awˬ nyi maˇ cawˬ’ tehꞈ dawˇ ve yoˬ. Chi hkʼe ve dawˇ hkʼaˇ lehˬ awˬ tehˬ maˇ heˆ. Chi ngaˬ hui Yaˬhoˉvaˬ ve kanˉ maˇ te tuˬ te laˇ gʼa ve yoˬ hehˉ. Tawˇ naˉ ve liꞈ 24:10 hkʼaw kʼoˆ taˍ ve htaꞈ dawˇ nyi sheˍ. Ngaˬ hui awˬ gʼaˇ nuˇ htaˇ, awˬ gʼaˇ awˬ shaˉ i la ve tehꞈ gʼa mawˬ ve yoˬ. Leh nawˬ Yaˬhoˉvaˬ geh kʼawꞈ la˗oˆ. Yawˇ venˇ baˆ hpehˇ laˇ tuˬ bon lawˬ sheˍ. (Iˉsaˍyaˆ 1:18) Nawˬ awˬ tehˬ awˬ na nyi ma luˬ ve Yaˬhoˉvaˬ mawˬ htaˇ maˇ kʼawꞈ te yaꞈ ve kʼo, yawˇ nawˬ htaꞈ venˇ baˆ hpehˇ laˇ tuˬ yoˬ. Chi hkʼoˆ kaꞈ, nyi haꞈ shaˉ paˍ ga laˇ tuˬ lawˬ leh nawˬ co ha hpawˇ awˬ gʼaˇ kʼawꞈ hehnˇ la tuˬ ga laˇ tuˬ yoˬ.—Yaˍkoˆ 5:14, 15.

7. Ngaˬ hui awˬ gʼaˇ nuˇ ve htaꞈ tawˍ daꞈ maˇ gʼaˇ ve kʼo aˬ htoꞈ ma te awˬ gʼaˇ maˇ nuˇ cawˇ ve le?

 ⁷ Hpaˉlanˍ mvuhˇ miˬ lo nyi haꞈ shaˍ paˍ Sawn˗luˆ awˬ viˉ awˬ nyi awˬ gʼaˇ nuˇ ve htaꞈ tawˍ daꞈ chehˇ ve geh tawˇ yaw piˇ ve yoˬ. Yawˇ kʼoˆ ve, “Yaˬhoˉvaˬ mehˆ gʼuˇ suhˍ daꞈ ve chaw lehˬ maˇ te yaꞈ jaw ve maˇ heˆ. Yaꞈ hkʼaˇ, yawˇ te yaꞈ ve htaꞈ nyi ma luˬ ve yoˬ. Venˇ baˆ dawˇ hpfuhˆ˗oˬ htaˇ, pa tuˬ gʼa coˇ caˇ jaˇ.” (Roˉmaꞈ 7:21-25) Chi htaꞈ pa taw a shu yawˇ awˬ to htaꞈ venˇ baˆ taˇ taˍ. A shu yawˇ awˬ to awˬ hpfuhˇ maˇ cawˬ ve tehꞈ taˇ dawˇ. Nawˬ awˬ to awˬ gʼaˇ nuˇ ve htaꞈ tawˍ daꞈ maˇ gʼaˇ ve kʼo, ngaˬ hui awˬ hkʼaw lo chaw teˇ gʼaˇ kaꞈ Yaˬhoˉvaˬ mehˆ gʼuˇ suhˍ daꞈ ve maˇ hpehꞈ tehꞈ tawnˇ taˍ sheˍ. Ngaˬ hui teˇ gʼaˇ le le te yaꞈ ve pa taw, haꞈ pehnˇ uiˍ jaˇ ve Gʼuiˬ sha ve htaiˍ hkʼawꞈ laˇ tcuh ve awˬ hpfuhˇ gʼa cawˬ cawˇ ve yoˬ.—Eˇfeˇsuꞈ 1:7; 1 Yoˇhanˬ 4:10.

8. Ngaˬ hui awˬ gʼaˇ nuˇ htaˇ a shu ga laˇ gʼa tuˬ le?

⁸ Hkriꞈ yaˇ awˬ moˍ hkʼaw ve awˬ viˉ awˬ nyi ngaˬ hui htaꞈ awˬ gʼaˇ peꞈ laˇ gʼa ve! Ngaˬ hui nyi ma hkʼaw cawˬ ve awˬ ceuˬ yawˇ hui htaꞈ kʼoˆ maˍ piˇ htaˇ, yawˇ hui hkʼa dehꞈ na taˍ leh ngaˬ hui nyi ma sha la tuˬ awˬ pon tawˇ yaw laˇ gʼa ve yoˬ. (Tawˇ naˉ ve 12:25; 1 Hteˇsaˍlawˇniˆ 5:14) Nai˗jeˇri˗aˇ mvuhˇ miˬ lo awˬ viˉ awˬ nyi Caweh awˬ gʼaˇ nuˇ ve htaꞈ tawˍ daꞈ ve yoˬ. Yawˇ kʼoˆ ve, “awˬ viˉ awˬ nyi maˇ cawˬ ve kʼo ngaˬ ve a shaꞈ teꞈ hkʼaˇ hkʼaˬ hkʼe hpehꞈ tuˬ maˇ shiˍ. Yawˇ hui ngaˬ ve bon lawˬ hkawˇ htaꞈ hkʼawꞈ laˇ shehˍ hpaˇ hpehꞈ ve yoˬ. Ngaˬ shu htaꞈ te piˇ tuˬ ve awˬ hkʼaˇ kaꞈ yawˇ hui maˍ laˇ leh yawˇ hui ngaˬ htaꞈ ga laˇ gʼa jaˇ.” Ngaˬ hui awˬ gʼaˇ hkʼaˬ hkʼe htaˇ loˍ ve teˇ pawˆ le le awˬ viˉ awˬ nyi maˇ shiˍ ve tehꞈ tawnˇ taˍ sheˍ. Chi htaꞈ pa taw awˬ viˉ awˬ nyi hpehꞈ laˬ jaw ve awˬ lawn cawˬ ve chaw htaꞈ awˬ chawˇ te leh ngaˬ hui ga laˇ tuˬ loˍ ve tehꞈ yawˇ htaꞈ kʼoˆ maˍ piˇ sheˍ.

9. Chiˇ mvuh ve liꞈ 41:3 leh 94:19 hkʼaw ngaˬ hui htaꞈ awˬ gʼaˇ hkʼaˬ hkʼe peꞈ laˇ ve le?

⁹ Yaˬhoˉvaˬ ga laˇ tuˬ lawˬ sheˍ. Ngaˬ hui naˬ maw jaˇ˗oˬ leh maˇ na˗e sheˍ ve kʼo, daꞈ ve hpawˇ dawˇ tuˬ haˍ jaˇ ve yoˬ hehˉ. Chi teˇ hkui ngaˬ hui na˗e tuˬ Yaˬhoˉvaˬ maˇ ga laˇ ve htawˇ, ngaˬ hui awˬ gʼaˇ hehnˇ leh yeunˇ hkanˍ gʼaˇ tuˬ yawˇ ga laˇ tuˬ yoˬ. (Chiˇ mvuh ve 41:3; 94:19 gʼaw sheˍ.) Tawˇ pa haˉ te kʼo, awˬ viˉ awˬ nyi ngaˬ hui ve aˉ hkʼaw kanˉ gʼa te laˇ ve, mawˇ vuiˬ laˇ ve, teˇ geh bon lawˬ laˇ ve, Liꞈ hpu teˇ tawn tawn tawnˇ gʼa tuˬ ga laˇ ve, Gʼuiˬ sha yawˇ hui htaꞈ cuˇ ve yoˬ hehˉ. Miˬ guiˬ awˬ suhˉ hkʼaw biˇ jaˇ ve a shaꞈ cawˬ tuˬ ve, naˬ ve gawˬ ve maˇ cawˬ tuˬ ve, chaw teˇ gʼaˇ kaꞈ kʼawꞈ naˬ tuˬ ve maˇ heˆ tehꞈ Gʼuiˬ sha yawˇ hui htaꞈ cuˇ leh Liꞈ hpu awˬ tawn awˬ gʼaˇ peꞈ laˇ tcuh ve yoˬ.—Roˉmaꞈ 15:4.

10. I˗shaw maˇ dawˇ maˇ gaˇ ve awˬ ceuˬ htaꞈ gʼa hpuˇ peuˬ hkʼawꞈ nawˉ, awˬ gʼaˇ nuˇ ve htaꞈ tiˉ maˇ dawˇ nyi tuˬ aˬ htoꞈ ma ga piˇ ve le?

¹⁰ Nai˗jeˇri˗aˇ mvuhˇ miˬ lo chehˇ ve I˗shaw maˇ dawˇ maˇ gaˇ ve awˬ ceuˬ gʼa hpuˇ leh awˬ to teˇ paˉ suh˗e ve yoˬ. Yawˇ maˇ kʼawꞈ juˇ gʼa˗o tehꞈ saˍ laꞈ gʼonˍ kʼoˆ piˇ ve yoˬ. I˗shaw kʼoˆ ve, “ngaˬ nyi ma luˬ jaˇ.” Yaꞈ hkʼaˇ, yawˇ awˬ gʼaˇ nuˇ ve htaꞈ tiˉ maˇ dawˇ nyi ve pa taw yawˇ awˬ gʼaˇ kʼawꞈ cawˬ la tuˬ aˬ htoꞈ ma ga piˇ ve le? Yawˇ kʼoˆ ve, “ngaˬ leh ngaˬ miˇ ma hkʼaˬ htaˆ kaꞈ Yaˬhoˉvaˬ geh bon lawˬ leh Liꞈ hpu henˇ ve maˇ jehˇ jaw. Miˬ guiˬ awˬ suhˉ hkʼaw co co taiˍ taiˍ ve a shaꞈ dawˇ law kuiˬ leh daꞈ ve awˬ ceuˬ htaꞈ coˇ caˇ leh dawˇ nyi ve yoˬ.”

11. Se˗diˇ yawˇ naˬ jaˇ htaˇ hkʼaˬ hkʼe te ha lehˬ gʼa ve le?

¹¹ Mehˆsiˬkoˬ mvuhˇ miˍ lo chehˇ ve Se˗diˇ yawˇ gʼa suh la ve a naˍ cawˬ ve tehꞈ saˍ laꞈ gʼonˍ kʼoˆ ve yoˬ. Yawˇ chi hkʼe gʼa kaˇ htaˇ, hkʼaˬ hkʼe te haꞈ yuˬ gʼa ve le? Yawˇ naˆ tsuhˇ yehˬ lo chehˇ htaˇ, awˬ nu ve chaw htaꞈ hto maˍ piˇ tuˬ dawˇ teh taˍ ve yoˬ. Yawˇ kʼoˆ ve, “chi hkʼe te ve pa taw ngaˬ shawˆ hpeꞈ tuˬ ve, ngaˬ hkʼaˬ hkʼe taw naˬ ve, leh hkʼaˬ hkʼe hpehꞈ tuˬ ve htaꞈ tiˉ maˇ dawˇ nyi. Yaꞈ hkʼaˇ, ngaˬ shu awˬ pon a yeˇ yuˬ piˇ ve yoˬ. Ngaˬ saˍ laꞈ gʼonˍ leh saˍ laꞈ gʼonˍ htaꞈ ga piˇ shehˍ ma htaꞈ tawˇ yaw daꞈ htaˇ, yawˇ hui ve yehˬ kʼa htaꞈ na piˇ ve yoˬ. Aˬ htoꞈ ma te nawˬ hui kanˉ haˍ jaˇ ve htaꞈ leuˆ te ve le? tehꞈ ngaˬ na piˇ ve yoˬ. Chi hkʼe na piˇ peuˬ hkʼawꞈ nawˉ, yawˇ hui aˬ htoꞈ ma htaꞈ dawˇ cawˇ ve ngaˬ shiˍ ve yoˬ. Saˍ laꞈ gʼonˍ leh saˍ laꞈ gʼonˍ htaꞈ ga piˇ shehˍ ma kʼoˆ ve, ‘hkʼaˬ hkʼe kʼai le? chehˇ sha chehˇ˗aw laˇ?’ chaw naˬ teˇ gʼaˇ kaꞈ maˇ na laˇ jaw. Laiˉ gʼaˇ ngaˬ yawˇ hui  htaꞈ a yeˇ yuˬ piˇ ve awˬ bon uiˍ jaˇ kʼoˆ laˇ ve yoˬ. Teˇ gʼaˇ gʼaˇ kʼo yawˇ hui ve tawˇ yaw tuˬ nanˍ baꞈ maˇ heˆ leh yawˇ hui ve chehˇ kuiˬ awˬ ti bvuhꞈ leh peꞈ laˇ ve yoˬ. Awˬ yanˇ chi ve ngaˬ tuꞈ hkanˍ jaˇ ve htawˇ, Yaˬhoˉvaˬ ngaˬ nyi ma hkʼaw ha lehˬ tuˬ ga laˇ ve pa taw, ngaˬ ha lehˬ gʼa ve yoˬ!”—Tawˇ naˉ ve 15:15.

12-13. Naˬ ve chaw leh a shaꞈ maˇ ve chaw hkʼaˬ hkʼe te hto toˇ gʼa tuˬ le? Leh awˬ bon hkʼaˬ hkʼe gʼa ve le?

¹² Naˬ ve chaw leh a shaꞈ maˇ ve chaw Yaˬhoˉvaˬ ve kanˉ yawˇ hui te gaˇ ve hkʼe te maˇ gʼa ve pa taw, awˬ gʼaˇ nuˇ ve yoˬ. Yaꞈ hkʼaˇ, laiˉ gʼaˇ Gʼuiˬ sha ve kanˉ hkʼa dehꞈ te gʼa ve yoˬ. Aˍmeˬriˆkaꞈ mvuhˇ miˬ lo chehˇ ve awˬ viˉ awˬ nyi Law˗le teꞈ chiˉ te maˇ gʼa ve 37 hkʼawꞈ hkʼa gaˬ naˬ ve yoˬ. Yawˇ mvuhˇ haˉ caˇ ve a naˍ kaꞈ hpehꞈ leh laiˉ pawˆ gʼa shawˆ hpeꞈ ve yoˬ. Leh awˬ guiˬ kuˉ hkʼoˆ pehˉ puiˉ ve a naˍ kaꞈ cawˬ ve yoˬ. Yawˇ chi hkʼe taw taw naˬ jaˇ ve htawˇ, maˇ hto toˇ gʼa tuˬ teˇ ceuˬ kaꞈ maˇ te laˇ tcuh. Yawˇ saˍ laꞈ gʼonˍ htaꞈ ga piˇ shehˍ ma leh yawˇ aˉ hkʼaw lo ca nyi haꞈ shaˉ la ve chaw htaꞈ hto maˍ piˇ ve yoˬ. Awˬ bon gʼa ve teˇ ceuˬ lehˬ, 17 gʼaˇ htaꞈ Liꞈ hpu henˇ tuˬ ga piˇ gʼa ve yoˬ! *

¹³ Hpaˉlanˍ mvuhˇ miˬ lo nyi haꞈ shaˉ paˍ Riˆchaˬ lehˬ, aˉ hkʼaw lo tiˉ chehˇ ve chaw maˇ heˆ leh chaw mawˇ htaꞈ nyi haꞈ shaˉ kuiˬ awˬ ti lo ve chaw htaꞈ beˆ maˍ piˇ ve awˬ bon cawˬ jaˇ. Yawˇ kʼoˆ ve, “ngaˬ hui ve liꞈ kʼoˆ htu ve leh liꞈ kʼoˆ teˇ hpaˍ shu mawˬ gʼa kuiˬ teh taˍ tehꞈ ngaˬ hui ve awˬ viˉ awˬ nyi teˇ hpaˍ htaꞈ beˆ maˍ piˇ ve yoˬ. Shu kʼai kʼai laˬ laˬ te htaˇ, liꞈ kʼoˆ chi teˇ hpaˍ htaꞈ mawˬ ve pa taw chaw teˇ hpaˍ hpaˍ, htawˇ dawˇ nawˬ dawˇ cawˬ leh shiˍ gaˇ tuˬ yoˬ hehˉ. Chi hkʼe te htaˇ awˬ viˉ awˬ nyi teˇ yehˬ peuˬ teˇ yehˬ hto toˇ maˇ gʼa ve chaw awˬ gʼaˇ gʼa ve yoˬ.” Chi hkʼoˆ kaꞈ, choˬ kʼai oˇ kʼai te maˇ gʼa ve chaw kaꞈ Gʼuiˬ sha ve kanˉ te gʼa sheˍ ve yoˬ. Liꞈ bvuhꞈ ve maˇ heˆ leh tawˇ yaw tuˬ awˬ hkʼeun hkʼaw hto maˍ piˇ gʼa ve yoˬ.

14. Jawˇmawˇ Daˍviˆ aˬ htoꞈ ma awˬ lawn daꞈ ve henˇ yuˬ tuˬ hpehꞈ ve le?

¹⁴ Ngaˬ hui te gaˇ ve awˬ vuiˬ maˇ heˆ leh daꞈ ve awˬ vuiˬ htaꞈ maˇ gʼa te tuˬ, te laˇ gʼa ve laiˉ ceuˬ cawˬ ve yoˬ hehˉ. A shaꞈ maˇ ve, maˇ chehˇ sha ve, maˇ heˆ leh awˬ nu ve awˬ ceuˬ htaꞈ pa taw yoˬ hehˉ. Chi hkʼe hpehꞈ ve kʼo, jawˇ mawˇ Daˍviˆ ve awˬ lawn htaꞈ dawˇ nyi sheˍ. Yawˇ Yaˬhoˉvaˬ ve bon yehˬ lonˉ te gaˇ jaˇ. Yaꞈ hkʼaˇ, Yaˬhoˉvaˬ yawˇ htaꞈ maˇ te tcuh. Kanˉ chi te tuˬ Yaˬhoˉvaˬ awˬ nu ve chaw htaꞈ leuˆ ve yoˬ. Chi hkʼe hpehꞈ ve htawˇ, jawˇ mawˇ Daˍviˆ lehˬ Yaˬhoˉvaˬ te tcuh gaˇ ve chaw htaꞈ yawˇ hkʼa dehꞈ ga piˇ ve yoˬ. Kanˉ chi ve htaꞈ ga tuˬ yawˇ hpu shi mawˇ jeˬ tanˇ piˇ maˇ jaˇ. Daˍviˆ ngaˬ hui awˬ pon henˇ yuˬ tuˬ daꞈ jaˇ!—2 Saˍmo˗eˍlaˆ 7:12, 13; 1 Raˍsaˍvanˍ 29:1, 3-5.

15. Awˬ viˉ awˬ nyi Hon awˬ gʼaˇ nuˇ ve htaꞈ hkʼaˬ hkʼe tawˍ daꞈ gʼaˇ ve le?

¹⁵ Hpaˉlanˍ mvuhˇ miˬ lo chehˇ ve awˬ viˉ awˬ nyi Hon laiˉ ceuˬ hpawˇ naˬ ve pa taw nyi haꞈ shaˉ paˍ maˇ gʼa te˗o. Leh yawˇ aˉ hkʼaw ve kanˉ maˇ uiˍ ve htawˇ te maˇ gʼa˗o. Yawˇ kʼoˆ ve, “awˉ lawˉ htaˇ ngaˬ awˬ gʼaˇ nuˇ jaˇ leh awˬ hpfuhˇ maˇ cawˬ tehꞈ dawˇ ve yoˬ. Yaꞈ hkʼaˇ, awˬ yanˇ ponˬ kʼai htaˇ ngaˬ te gʼa ve awˬ ceuˬ htaꞈ haꞈ yuˬ ve a yeˇ uiˍ jaˇ tehꞈ shiˍ la ve yoˬ. Ngaˬ  chi hkʼe te htaˇ, Yaˬhoˉvaˬ awˬ pon te gʼa ve awˬ ceuˬ htaꞈ ngaˬ ha lehˬ ve yoˬ. Giˉdonˍ leh maꞈ yaˇ 300 gʼaˇ heuˬ jaˇ ve htawˇ canˇ paˍ hkʼaˇ suh gʼaꞈ yuˬ kʼai ve hkʼa shuˍ, ngaˬ te tcuhˉ taˍ leh caˉ leh kʼawꞈ te kʼai tuˬ yoˬ.”—Suhˉ jehˬ ve 8:4.

16. Mvuhˇ naw ma tcuh yaˇ hui ve awˬ lawn ngaˬ hui htaꞈ hkʼaˬ hkʼe maˍ laˇ ve le?

¹⁶ Mvuhˇ naw ma tcuh yaˇ ka tiꞈ yeˬ ve ngaˬ hui awˬ pon henˇ yuˬ tuˬ daꞈ jaˇ. Jawˇmawˇ Aˍhaˆ uˉ peunˍ chehˇ ve awˬ yanˇ htaˇ, Yaˬhoˉvaˬ mvuhˇ naw ma tcuh yaˇ htaꞈ cuˇ leh jawˇ mawˇ Aˍhaˆ haiˬ jaˇ ve htaꞈ ca heˍ tcuh ve yoˬ. Mvuhˇ naw ma tcuh yaˇ laiˉ gʼaˇ dawˇ hkʼaˇ laiˉ ceuˬ piˇ ve yoˬ. Yaꞈ hkʼaˇ, Yaˬhoˉvaˬ mvuhˇ naw ma tcuh yaˇ teˇ gʼaˇ ve dawˇ hkʼaˇ htaꞈ leuˆ leh yawˇ kʼoˆ ve awˬ ceuˬ lehˬ awˬ tehˬ biˇ la tuˬ yoˬ tehꞈ kʼoˆ piˇ ve yoˬ. (1 Jawˇmawˇ 22:19-22) Awˬ nu ve mvuhˇ naw ma tcuh yaˇ awˬ gʼaˇ nuˇ˗aw laˇ? Yawˇ hui dawˇ ve, ‘ngaˬ aˬ htoꞈ ma awˬ pon coˇ caˇ ve le?’ Yawˇ hui chi hkʼe maˇ dawˇ taˍ tehꞈ ngaˬ hui shiˍ ve yoˬ. Mvuhˇ naw ma tcuh yaˇ hui nyi ma nuˇ nehˬ leh awˬ meꞈ awˬ hponˇ hkʼa peu˗eˬ Yaˬhoˉvaˬ htaꞈ gʼa tcuh gaˇ ve yoˬ.—Suhˉ jehˬ ve 13:16-18; Hpeuꞈ maˍ ve 19:10.

17. Ngaˬ hui te gaˇ ve daꞈ ve awˬ vuiˬ htaꞈ maˇ gʼa te ve pa taw, ngaˬ hui awˬ gʼaˇ nuˇ ve kʼo hkʼaˬ hkʼe te cawˇ ve le?

¹⁷ Yaˬhoˉvaˬ ve Shaˉhkiˆhkanˍ ve chaw hpehꞈ ve leh Gʼuiˬ sha ve mvuhˇ miˬ daꞈ ve awˬ lawn sha tanˇ hto toˇ ve lehˬ daꞈ jaˇ ve awˬ vuiˬ hpehꞈ ve tehꞈ tawnˇ taˍ sheˍ. Awˬ vuiˬ lehˬ te peuˬ˗oˬ ve kʼo, peuˬ˗oˬ ve yoˬ. Yaꞈ hkʼaˇ, ngaˬ hui Yaˬhoˉvaˬ mehˆ gʼuˇ suhˍ awˬ hpfuhˇ hkʼaˆ ve lehˬ awˬ vuiˬ gʼa ve geh cawˬ ve maˇ heˆ. Ngaˬ hui te gʼa ve awˬ ceuˬ lehˬ Gʼuiˬ sha haꞈ ve chaw hpehꞈ leh awˬ viˉ awˬ nyi geh nyi ma nuˇ nehˬ ve gʼa cawˬ ve yoˬ. Nawˬ nyi ma nuˇ nehˬ ve chaw hkʼaˬ htaˆ kaꞈ hpehꞈ tuˬ Yaˬhoˉvaˬ ga laˇ tuˬ bon lawˬ sheˍ. Liꞈ hpu hkʼaw cawˬ ve nyi ma nuˇ nehˬ ve chaw ve awˬ lawn htaꞈ dawˇ nyi sheˍ. Awˬ viˉ awˬ nyi htaꞈ na gʼa leh ha lehˬ ve hkʼaw ga piˇ sheˍ.—Chiˇ mvuh ve 138:6; 1 Peˍtruˆ 5:5.

18-19. Nawˬ hto toˇ ve htaꞈ na gaˇ ve chaw teˇ gʼaˇ kaꞈ maˇ cawˬ ve kʼo, nawˬ ha lehˬ gʼa tuˬ aˬ htoꞈ ma ga laˇ gʼa ve le?

¹⁸ Hto toˇ˗e ve nyi ma pfuhˇ ve chaw maˇ cawˬ ve, maˇ heˆ leh aˉ hkʼaw chaw chehˇ˗a ve htaꞈ maˇ gʼa mawˬ daꞈ jaw ve pa taw, teˇ pawˆ pawˆ kʼo nawˬ awˬ gʼaˇ nuˇ jaw˗aw laˇ? Chi hkʼe hpehꞈ htaˇ Gʼuiˬ sha ve kanˉ te ve ha lehˬ gʼa sheˍ ve aˬ htoꞈ ma ga laˇ ve le? Beˆ maˍ laˇ hkawˇ awˬ bon cawˬ ve awˇ ceˬ awˇ fa “ Gʼuiˬ sha ve kanˉ hkʼaˬ hkʼe te htaˇ ha lehˬ gʼa ve le?” hkʼaw nyi sheˍ. Chi hkʼoˆ kaꞈ, ngaˬ hui Gʼuiˬ sha ve kanˉ te ve htaꞈ cawˇ ve hpawˇ nyi tuˬ, a yeˇ uiˍ jaˇ ve awˬ ceuˬ hpehꞈ ve yoˬ. Chi aˬ htoꞈ ma htaꞈ kʼoˆ gaˇ ve le?

¹⁹ Ngaˬ hui hto toˇ ve teˇ ceuˬ lehˬ, shu Gʼuiˬ sha ve awˬ meh leh Gʼuiˬ sha ve mvuhˇ miˬ htaꞈ shiˍ tuˬ ngaˬ hui ga piˇ gaˇ ve tehꞈ tawnˇ taˍ sheˍ. Yeˍsuˆ kʼoˆ ve, co co taiˍ taiˍ ve a shaꞈ gʼa tuˬ yaꞈ kʼaw hkʼoˆ lo chehˇ  ve chaw hkʼaˬ nyiˇ gʼaˇ maˇ cawˬ. (Maꞈhtehˍ 7:13, 14) Ngaˬ hui kaꞈ Yaˬhoˉvaˬ, Yeˍsuˆ, leh mvuhˇ naw ma tcuh yaˇ hui geh kanˉ teˇ geh gʼa te ve daꞈ jaˇ ve awˬ vuiˬ hpehꞈ ve yoˬ. (Maꞈhtehˍ 28:19, 20; 1 Kawˇrenˍhtuˆ 3:9; Hpeuꞈ maˍ ve 14:6, 7) Chi hkʼoˆ kaꞈ, Yaˬhoˉvaˬ lehˬ nyi ma daꞈ ve chaw htaꞈ yawˇ geh laˬ tuˬ gʼawˬ veu laˇ ve yoˬ. (Yoˇhanˬ 6:44) Chi htaꞈ pa taw, ngaˬ hui hto maˍ piˇ ve chaw chi teˇ pawˆ maˇ na gaˇ ve kʼo, awˬ gʼuˇ suhˍ hpawˇ yawˇ na gaˇ tuˬ yoˬ hehˉ.

20. Yeˍraˍmiˆ liꞈ 20:7-9 hkʼaw ngaˬ hui awˬ gʼaˇ nuˇ ve htaꞈ tawˍ daꞈ gʼaˇ tuˬ hkʼaˬ hkʼe maˍ laˇ ve le?

²⁰ Tcuh kaˍ paˍ Yeˍraˍmiˆ htaꞈ ngaˬ hui laiˉ ceuˬ henˇ yuˬ gʼa ve yoˬ. Yawˇ haˍ jaˇ kuiˬ lo bon maˍ tuˬ awˬ vuiˬ gʼa ve yoˬ. Yawˇ ve hkawˇ chaw teˇ gʼaˇ kaꞈ maˇ na gaˇ. “Teˇ nyi tanˇ vanˇ” yawˇ htaꞈ shu maˇ shawˍ maˇ caˆ kʼoˆ leh deˇ piˇ ve yoˬ. (Yeˍraˍmiˆ 20:7-9 gʼaw sheˍ.) Yeˍraˍmiˆ awˬ gʼaˇ nuˇ jaˇ leh Yaˬhoˉvaˬ ve kanˉ maˇ te gaˇ˗o tehꞈ dawˇ ve htawˇ, yawˇ chi hkʼe maˇ te. Aˬ htoꞈ ma pa taw le? Yaˬhoˉvaˬ ve tawˇ hkawˇ lehˬ, yawˇ ve nyi ma hkʼaw aˬ miˍ hkʼe toꞈ chehˇ taˍ ve yoˬ. Hkʼe te leh yawˇ ve nyi ma hkʼaw biˇ jaˇ leh kʼoˆ maˍ piˇ gaˇ jaˇ ve yoˬ. Teˇ nyi le le Liꞈ hpu gʼaw leh awˬ lawn chi ve htaꞈ caˉ daꞈ ve hkʼa dehꞈ dawˇ nyi ve kʼo, Gʼuiˬ sha ve tawˇ hkawˇ ngaˬ hui ve nyi ma hkʼaw hkʼa biˇ cawˬ ve yoˬ. Ngaˬ hui kaꞈ ha lehˬ leh ngaˬ hui hto toˇ ve awˬ lawn kaꞈ shu na gaˇ tuˬ yoˬ hehˉ.—Yeˍraˍmiˆ 15:16.

21. Ngaˬ hui awˬ gʼaˇ nuˇ ve htaꞈ hkʼaˬ hkʼe te tawˍ daꞈ gʼaˇ tuˬ le?

²¹ Gʼa henˇ peuˬ ve Deˍboˇraˍ yawˇ kʼawꞈ kʼoˆ ve, “awˬ gʼaˇ nuˇ ve lehˬ Saˍtanˍ ve laꞈ caˉ teˇ ceuˬ hpehꞈ ve yoˬ.” Yaꞈ hkʼaˇ, Saˍtanˍ ve laꞈ caˉ teˇ ceuˬ le le aꞈ kehˉ Yaˬhoˉvaˬ kanˇ paˆ cawˬ jaˇ. Nawˬ aˬ htoꞈ ma htaꞈ pa taw awˬ gʼaˇ nuˇ ve htawˇ, Yaˬhoˉvaˬ ga laˇ tuˬ bon lawˬ sheˍ. Nawˬ maˇ biˇ ve chaw hpehꞈ leh awˬ gʼaˇ nuˇ kuiˬ htaꞈ tawˍ daꞈ gʼaˇ tuˬ yawˇ ga laˇ tuˬ yoˬ. Nawˬ naˬ ve kʼo yawˇ nawˬ htaꞈ haꞈ shaˉ laˇ tuˬ yoˬ. Chi hkʼoˆ kaꞈ, nawˬ ve awˬ vuiˬ htaꞈ cawˇ ve hpawˇ nyi tuˬ leh Gʼuiˬ sha ve kanˉ daꞈ ve hpawˇ nyi tuˬ yawˇ ga laˇ tuˬ yoˬ. Nawˬ shoꞈ shaꞈ ve aˬ htoꞈ ma gʼa hpuˇ ve htawˇ, nawˬ nyi ma hkʼaw cawˬ ve awˬ ceuˬ bon lawˬ ve hkʼaw yawˇ htaꞈ kʼoˆ piˇ leh, mvuhˇ naw ma hkʼoˆ chehˇ ve Awˬ pa Yaˬhoˉvaˬ htaꞈ kʼoˆ maˍ piˇ sheˍ. Nawˬ awˬ gʼaˇ nuˇ ve htaꞈ tawˍ daꞈ gʼaˇ tuˬ yawˇ ga laˇ tuˬ yoˬ.