1. Chumanyi chinateli kumwekana neyi tunaneñi?

MAFUKU ejima twamonaña kukala nawa twazataña nañovu kulonda tuumiki. Ilaña, chakalaña kuumika kukala kutunakumona neyi chakwila tunaneñi. Dichi twatela kumonaña kukala neyi ikombi dinateli kutuletesha kubula kwikala nachikuhwelelu, ahamuka nimuzañalu. Yishimu 24:10 yahosha nawu: “Neyi wakazeya hefuku dakala ñovu jeyi jakeha.” Neyi tunaneñi tunateli kuzeya nawa chinateli kutukalila kuumika kukala.

2. Yumanyi yinateli kutuneñesha, nawa yumanyi yitukuhanjeka muchinu chibaaba?

² Kudi yuma yayivulu yinateli kutuneñesha, yuma yamwekanaña niyabulaña kumwekana. Yumiyi munabombeli kubula kuwanina, kuzeya-zeya niyikatu. Tunateli cheñi kuneña hamuloña wakwila anatwinki wanyi kukooleka kutwakeñaña mumudimu waYehova hela hamuloña wakwila antu amwiluña mutwashimwinaña atiyililaña wanyi kunsañu yetu. Muchinu chibaaba, tukuhanjeka hayuma yitwatela kwila hakwila nawu tuleki kuneña.

3. Chumanyi chinateli kutukwasha neyi tunakutiya kutama hamuloña wayiluwa yetu nikuzeya-zeya kwetu?

³ Tunateli kutiya kutama hamuloña wakubula kuwanina nikuzeya-zeya kwetu. Chuma chinateli kufumamu, tunateli kutachika kutoñojoka netu Yehova wakatwiñija wanyi mwituña dadiha hamuloña wakuluwañesha kwetu. Yitoñojoka yamuchidiwu yinateli kutuzeyesha. Tunateli kutiya ñahi hamuloña wayiluwa yetu? Bayibolu yahoshaña nawu “antu ejima anavulumuni,” kufumishaku hohu Yesu. (Rom. 3:23) Ilaña Nsoneki  waBayibolu hakeñakeñaña yiluwa mudi etu hela nindi chiña twikali awaninaku. Yena hiTata yetu watukeña nawa wakeñaña kutukwasha. Cheñi wadiwunjika. Wamonaña chitwazataña nañovu hakwila nawu tuumiki kuzeya-zeya kwetu nichitwatiyaña kutama hayiluwa yetu, dichi yena wafwilaña kutukwasha.—Rom. 7:18, 19.

4-5. Kwesekeja na 1 Yowanu 3:19, 20, chumanyi chayikwashili awa ahela ayedi kuleka kutoñojoka nawu amukunkulwayi?

⁴ Talenu chakutalilahu chamuhela Deborah niMaria. * Muhela Deborah hadiñayi kansi amwilileña chatama, dichi chumichi chamutiyishileña kutama. Kakavulu, amuhamekeleña wanyi. Chakuliliyi watachikili kutoñojoka nindi wamukunkulwayi. Neyi naluwañeshi watoñojokeleña nindi wamukunkulwayi. Muhela Maria niyena dikukala kwamweniyi. Antaña jindi amusawishileña. Chafuminimu, wadimweneña nindi washikilamu wanyi. Hanyima yakupapatishewa watoñojokeleña nindi washikililimu wanyi kwikala Chinsahu chaYehova.

⁵ Hela chochu, awa ahela ayedi hiyalekeli kumukalakela Yehovaku. Muloñadi? Amumbilili Yehova yiteli yawu kuhitila mukulomba. (Mas. 55:22) Elukili nawu Tata yetu waMwiwulu weluka nindi kukala kutwamweni kwatuneñeshaña. Ilaña wamonaña cheñi yuma yayiwahi munyichima yetu, dikwila nawu yilwilu yayiwahi yitwabulaña kumona etu aweni.—Tañenu 1 Yowanu 3:19, 20.

6. Chumanyi chinateli kwilayi muntu neyi yafuntishahu chiluwa chochimu?

⁶ Muntu wunakuzata nañovu nindi yaleki kwila yuma yatama nawa yafuntishahu cheñi chiluwa chochimu nateli kuneña. Hela chochu, chatama wanyi kudinka nyiloña neyi tunavulumuni. (2 Kor. 7:10) Ilaña bayi tuswejaña kudinka nyiloña nakutoñojoka netu: ‘Nidi wamukunkulwayiku. Yehova nateli kuñanakena wanyi.’ Yitoñojoka yamuchidiwu yatama nawa yinateli kutuletesha kuleka kumukalakela Yehova. Anukenu mazu ekala haYishimu 24:10, nawu ñovu jetu jakakeha neyi tunaneñi. Ilaña ‘tiyañanenu’ naYehova mukulomba nawa mulombenu yayanakeni. (Isa. 1:18) Neyi Yehova yamona nindi munabalumuki mumuchima, wukuyanakena. Kubombelahu, dimonenu nawakulumpi. Akuyikwasha kwikala cheñi nawubwambu wakola naYehova.—Yak. 5:14, 15.

7. Muloñadi chitwatela kubula kuneñela neyi chakwila tunakukeña kwila yuma yaloña ilaña tunakukañanya?

⁷ Manakwetu Jean-Luc, mukulumpi wakuFrance, wahosheli kutalisha hadi antu  anakukabakana nakuzeya-zeya nindi: “Muntu waloña kudi Yehova himuntu wabulaña kuluwañeshaku, ilaña himuntu wadanakenaña nakubalumuka mumuchima.” (Rom. 7:21-25) Dichi bayi mutoñojokaña nenu mudi amukunkulwayi neyi mukweti kuzeya-zeyaku. Mwatela kwanukaña nenu kwosi muntu waloña kumesu aYehova. Dichi wonsu wetu twakeñaña Nzambi yatumwekesheli luwi lwindi lwasweja kuhitila mwifutu danyiloña.—Efwe. 1:7; 1 Yow. 4:10.

8. Kudihi kutunateli kutambwila wukwashu neyi tunaneñi?

⁸ Amanakwetu niahela muchipompelu anateli kutukolesha! Neyi tunakukeña kuhanjeka nawu anateli kututiyilila nakanañachima nawa akutukolesha. (Yish. 12:25; 1 Tes. 5:14) Muhela Joy, wakuNigeria wadiña nachineñi wahosheli nindi: “Nadi kutwesha kuumika wanyi chakadi amanakwetu niahela. Chankoleshañawu amanakwetu niahela chamwekeshaña nawu Yehova wakulaña kulomba kwami. Chumichi chinankwashi ninami kwiluka chakukolesha akwetu ananeñi.” Twatela kwanukaña netu amanakwetu niahela hiyanateli kwiluka neyi chakwila tunakukeñeka kutukoleshaku. Dichi, twatela kuleja akwetu akwakwitiya apama neyi tunakukeña netu atukwashi.

9. Masamu 41:3; 94:19 yatukoleshaña ñahi?

⁹ Itejenuña Yehova yayikwashi. Neyi twakata nawa tunakati hadi mpinji yayilehi chinateli kutukalila kuumika. Hela chakwila Yehova hatuukaña muchihayamishaku, ilaña watukundejaña nikutwinka ñovu yakuumika. (Tañenu Masamu 41:3; 94:19.) Chakutalilahu, nateli kusañumuna mukwetu mukwaKristu kwinza nakutukwashaku tunyidimu twahetala hela kuya nakutulandilaku yuma. Nateli cheñi kutemesha manakwetu kwinza nakutulombelaku. Hela nateli kutukwasha kwanuka nsañu yakukundeja yidi Mwizu dindi, chidi neyi kuchiñeja kwakushakama chakadi kukata mwituña dadiha.—Rom. 15:4.

10. Chumanyi chamukwashili Manakwetu Isang kubula kwikala nachineñi hanyima yamaposu?

¹⁰ Manakwetu Isang, wakuNigeria wadiña mumaposu amushila wufwayi. Ndotolu yindi wamulejeli nindi hamba kendahuku. Manakwetu Isang wahosheli nindi: “Muchima wami wabalukili nawa spiritu yachikekeli puchi.” Komana watwalekelihu kwikala naspiritu yachikeka? Inehi! Chumanyi chamukwashili? Walumbulwili nindi: “Ami niñodami twalekeli wanyi kumulomba Yehova nikudiza Izu dindi. Nawa twazañaleleña nayuma yitwadiña nayu nikuchiñeja kwakwikala mwituña daNzambi dadiha.”

11. Muhela Cindy wekalili ñahi namuzañalu hampinji yakatiliyi?

¹¹ Muhela Cindy wakuMexico amuwanini nachikatu chafwana. Womikili ñahi? Hamukileñawu, wafuukwilihu kushimwina mafuku ejima. Wasonekeli nindi: “Chumichi chankwashili kubula kusha maana hakuyeña kunatiyileña hamuloña wakunladika hela hayikatu yami. Ichi dichinelileña: Neyi inakuhanjeka nawandotolu hela anansi nayihwileña chidi yisaka yawu. Kuhiñahu nayihwileña chuma chaletesheli atondi mudimu wakola. Chumichi chankwashileña kwiluka mutu wunateli kuyisañumuna. Amavulu ahosheleña nawu chavula wanyi muyeji kukwimusha nindi, ‘Mudi ñahi?’ Nawa amavulu ansakilileña hamuloña wakuyisha maana. Amakwawu anyinkeli mafoni namba awu nimakeyala awu. Dichi haniyi mpinji yakala Yehova wankwashili kuumika nawa nekalili namuzañalu chakwila nadihayaminini.”—Yish. 15:15.

12-13. Indi antu akata niabulaña kwenda ashimwinaña ñahi, nawa yumanyi yinafumimu?

 ¹² Antu akata hela ayifwayi anateli kuneña muloña wakwila anateli kushimwina wanyi neyi chinakukeñawu. Hela chochu, amavulu ashimwinaña. Muhela Laurel wakuUnited States, amushili mwikina damukwashileña kwona datenañawu nawu iron lung hadi yaaka 37! Wakatili kansa, amuladikili kakavulu nawa wakatili nyisoñu yikwawu yahekowa. Hela chakwila wamweni iku kukala halekeli kushimwinaku. Wayishimwinineña anansi niantu enjileña nakumuhempula hetala dindi. Chumanyi chafuminimu? Wakwashili antu 17 kumwiluka Yehova! *

¹³ Manakwetu Richard, mukulumpi wakuFrance, washimwiniku nsañu yinateli kukwasha antu abulaña kwenda muloña wayikatu. Wahosheli nindi: “Atela kwikalaku namesa hakusha nyikanda hela magazini kulonda antu yimoneña. Antu neyi anakuhita akuyimonaña nawa akukeñaña kuhanjeka nawu. Chumichi, chinateli kuyikolesha amanakwetu niahela abulaña kushimwina kwitala nikwitala.” Antu abulaña kwenda niwena anateli kushimwina kuhitila mukusoneka nyikanda nikuzatisha mafoni.

14. Chilwilwinyi chachiwahi chamwekesheliyi Mwanta Davidi?

¹⁴ Kudi yuma yayivulu yinateli kuletesha abuli kutwinka mudimu wutwakeñaña mumudimu waYehova. Chakutalilahu, wushinakaji, yikatu hela yuma yikwawu. Neyi dikukala kutukweti, twatela kudizila kudi Mwanta Davidi. Davidi wafwilileña kutuñila Nzambi tembeli, ilaña amulejeli nawu yena diyi wukutuña wanyi, anatondi muntu wacheñi. Davidi welili ñahi? Wamukwashiliku chikupu iyala atondeliwu. Davidi wahanini yawaana yayivulu yakukwasha iwu mudimu. Ichi hichakutalilahu chachiwahi chitwatela kwimbujola.—2 Sam. 7:12, 13; 1 Kushi. 29:1, 3-5.

15. Manakwetu Hugues walekeli ñahi kuneña?

¹⁵ Hamuloña wakukatakata manakwetu Hugues, wakuFrance, walekeli kuzata neyi mukulumpi nawa hatwesheleña nikuzata tunyidimu twanyanya twahetalaku. Wasonekeli nindi: “Hakusambila naneñeleña nawa nadimweneña nami hinashikilamuku. Chimwahitili mpinji namweni nami natela kuleka kuneña hayuma yinateli kubula kutwesha kuzata. Chafuminimu nekalili namuzañalu hakuzata nyidimu yinatwesheleña mumudimu waYehova. Inakufwila kutwalekahu.  Kufwana Gideyona niamayala 300 adiñayi nawu azeyeli, nikutwalekahu chakadi kuzeya!”—Ansomp. 8:4.

16. Yumanyi yitunateli kudizila kudi añelu?

¹⁶ Twatela kudizila kudi añelu ashinshika. Hampinji yayuulileñayi Mwanta Ahabi, Yehova walejeli añelu ashinshika kuhana yitoñojoka yawu hachinateli kumudimbawu iwu mwanta watama. Añelu amakwawu ashimwini yitoñojoka yawu. Ilaña Nzambi watondelihu yitoñojoka yakañelu wumu nawa wamulejeli nindi diyi yikuzatika. (1 Anya. 22:19-22) Komana añelu amakwawu aneñeli hadaha nikutoñojoka nawu, ‘Nadikabishilañadi?’ Dichatoñojokeleñawu wanyi. Añelu ekala adizoza nawa akeñaña kalemesha kejima kuya kudi Yehova.—Ansomp. 13:16-18; Chim. 19:10.

17. Chumanyi chitwatela kwila neyi tunatiyi kutama hamuloña wakubula mudimu mukuloñesha kwaYehova?

¹⁷ Anukenuña hakukooleka kutukweti kwakututena nawu aYinsahu jaYehova nikwakushimwina nsañu yaWanta. Anateli kutwinka mudimu nikututambula cheñi, ilaña twatela kwanukaña netu bayi neyi mudimu diwu watuleteshaña kwikala alema kumesu aNzambiku. Ilaña neyi twadizoza tunateli kwikala alema kudi Yehova nikudi amanakwetu niahela. Dichi mulombenuña Yehova kulonda yayikwashi kwikala adizoza. Toñojokenuña chikupu hadi ambuña Nzambi adizoza ashimunawu Mwizu dindi. Yikalakelenuña amanakwenu munjila yejima yimukutwesha.—Mas. 138:6; 1 Pet. 5:5.

18-19. Munateli kwikala ñahi namuzañalu hela chakwila antu atiyililaña wanyi?

¹⁸ Komana mpinji yimu mwatiyilihu kutama hamuloña wakwila antu amwiluña denu atiyililaña wanyi kunsañu yetu indi kwiji antu antesha hohu diwu ekalaña hamatala? Munsañu jamuchidiwu munateli kutwalekahu ñahi kwikala namuzañalu? Nsañu yinateli kuyikwasha anayishimuni muchikasha chinakuhosha nawu “ Njila Jinateli Kuyikwasha Kuwahishaku Mudimu Wenu Wakushimwina.” Cheñi mwatela kumonaña mudimu wenu wakushimwina munjila yayiwahi. Chumichi chinatalishi mudihi?

 ¹⁹ Shenu muchima hakutiyakesha ijina daNzambi niWanta windi. Yesu wahosheli nindi antu antesha hohu diwu akawana njila yaya kuwumi. (Mat. 7:13, 14) Neyi tudi mumudimu wakushimwina twazatilaña hamu naYehova, Yesu niañelu. (Mat. 28:19, 20; 1 Kor. 3:9; Chim. 14:6, 7) Yehova wakokaña antu akeñaña kumukalakela. (Yow. 6:44) Dichi neyi muntu yakaana kutiyilila kunsañu yetu katachi, ifuku dikwawu waketeja.

20. Yeremiya 20:8, 9 yatukwashaña ñahi kubula kwikala nachineñi?

²⁰ Tunateli kudizilaku yuma yayivulu kudi kaprofwetu Yeremiya. Amutumini kuya nakuzatila mwiluña dakala. Antu adiña nakumutuka nikumuseha “mwaana wejima.” (Tañenu Yeremiya 20:8, 9.) Mpinji yimu waneñeli chakwila wakeñeleña kuleka kushimwina. Ilaña walekeli wanyi. Muloñadi? “Izu daYehova” dadiña neyi kesi mumuchima waYeremiya nawa halekeli kushimwinaku. Dichi chitwatiyaña ninetu neyi twinzesha yitoñojoka nimuchima wetu Nezu daNzambi. Dichuma chikwawu chitwatela kudizilaña Bayibolu mpinji yejima nikutoñojokahu chikupu. Nawu chikufumamu, tukwikala namuzañalu chikupu nawa antu akutiyililaña nsañu yitunakuyishimwina.—Yere. 15:16.

21. Chumanyi chinateli kutukwasha kuleka kuneña?

²¹ Muhela Deborah itwashimuna hakusambila wahosheli nindi, “Chineñi dichitwa cheneni chazatishañayi Satana.” Ilaña Yehova Nzambi wukweti ñovu nankashi kubadika Satana niyitwa yindi. Dichi, neyi munaneñi nakukala kudi kwejima lombenu kudi Yehova yayikwashi. Wukuyikwasha kuumika hakubula kuwanina nikuzeya-zeya kwenu. Wukuyikwasha kuumika neyi mwakata. Wukuyikwasha kumonaña chiwahi nyidimu yenu. Nawa wukuyikwasha kulonda mumoneña chiwahi mudimu wenu wakushimwina. Kubombelahu, lombenuña kudi Tata yenu wamwiwulu nawa mulejenu kukala kwenu. Nawa wukuyikwasha kuleka kuneña.