1. Lunghnualna chuan engtin nge min nghawng theih?

NI TIN hian buainate kan hmachhawnin, theih tâwp chhuaha chinfel kan tum a. Mahse, lunghnualna kan neih loh hian buainate chu ṭha takin kan chingfel thei tih i pawm a ni lâwm ni? Chuvângin, lunghnualna chu kan inrintâwkna te, huaisenna te, leh hlimnate ru bo theitu anga kan thlîr a ngai a. Thufingte 24:10-na chuan: “Mangan nîa i chauh mai chuan i chakna a bei tham a ni,” tiin a sawi. Ni e, lunghnualna chuan nuna buainate hlawhtling taka chingfel tûra kan mamawh chaknate chu a la bo thei a ni.

2. Engin nge min tilunghnual thei a, he thuziakah hian eng nge kan sawiho vang?

² Thil tam tak avângin kan lunghnual thei—ṭhenkhat chu chhûng lam aṭang a ni a, ṭhenkhat chu pâwn lam aṭangin a ni. Kan lunghnual chhante chu ṭhat famkim lohna te, chak lohna te, leh hrisêl lohna avângte a ni thei a. Chu bâkah, Jehova rawngbâwlnaa kan ngainat tak chanvo kan dawn loh vângte leh kan rawngbâwlna biala mite’n an chhân lêt ṭhat loh vângte pawh a ni thei bawk. He thuziakah hian lunghnualna kan chinfel theih dân ṭhenkhat sawiho a ni ang.

3. Kan ṭhat famkim lohna chungchânga thlîr dân inbûk tâwk tak nei tûrin engin nge min ṭanpui thei?

³ Kan ṭhat famkim lohnate leh chak lohnate chungchânga thlîr dân inbûk tâwk tak neih chu thil awlsam a ni lo. Kan thil tihsualte avângin Jehova chuan a khawvêl thara awm tlâkah min ngai lo vang tia inngaih châng pawh kan nei mai thei. Chutiang ngaih dân neih chu thil hlauhawm tak a ni. Kan ṭhat famkim lohnate chu engtin nge kan thlîr ang? Bible chuan Isua Krista tiam lovin, mi zawng zawngin “thil an tisual tawh vek a,” tiin  a sawi. (Rom 3:23) Mahse, Bible Ziaktu chu kan dik lohna zawngtu leh ṭha famkim tûra min beiseitu a ni lo. Chu aiin, ani chu min ṭanpui duhtu hmangaihna nei tak Pa a ni zâwk. Dawhtheihna nei tak a ni bawk. Kan chak lohnate do va, mahni inthlîr dân inbûk tâwk tak neih tuma theih tâwp kan chhuah dânte chu a hmu a, min ṭanpui tûrin a inpeih reng a ni.—Rom 7:18, 19.

4-5. Johana thawn khat 3:19, 20-na nêna inmilin, engvângin nge unaunu pahnih chu lunghnualna avânga an beidawn loh?

⁴ Deborah-i leh Maria-i te thiltawn hi han ngaihtuah teh. * Deborah-i chu a naupan laiin mahni insitna rilru nei tûr zâwnga cheibâwl a ni fo va. Ani chuan fak a hlawh ngai lo. Chuvângin, a thim zâwnga inthlîrna a nei chho va. Thil ho tê a tihsual palh pawhin hlawhchham hulhual angin a inngai ṭhîn. Maria-i pawhin chutiang harsatna chu a nei a ni. A chhûngkhat lainate chuan mahni inzahpuina nei tûr zâwngin an cheibâwl ṭhîn a. Chuvângin, hlutna nei lo nia inhriatna a nei a ni. Thutak a hriat hnuah pawh, Pathian hming pu tlâkah a inngai lo!

⁵ Mahse, chûng unaunu pahnihte chuan Jehova rawngbâwl an bânsan lo. Engvângin nge? A chhan pakhat chu tih tak zeta ṭawngṭaiin, an phurrit chu Jehova chungah an nghat a ni. (Sâm 55:22) Hmangaihna nei tak kan Pa vâna mi chuan tûn hmaa kan thiltawnte leh a thim zâwnga thil thlîrnain kan chunga nghawng a neih dânte chu a hre thiam tih an pawm ta a. Ani chuan nei nia kan inhriat loh kan thinlunga mize ṭhate chu a hmu bawk.—1 Johana 3:19, 20 chhiar rawh.

6. Miin a thilsual tih ngai a tihnawn fo hian, chu chuan engtin nge a nghawng theih?

⁶ Chîn dân ṭha lo tak hneh tuma a beih fan fan laia tlu leh ṭhîntu chuan beidawn duhna rilru a nei thei a. Thil sual kan tih avânga inthiam lohna engemaw chen kan nei chu thil pângngai tak a ni. (2 Kor. 7:10) Mahse, ‘Mi tlâktlai lo tak ka ni. Jehova’n engtin nge min ngaihdam theih teh lul ang?’ tia ngaihtuahin, a lutukin mahni kan indem tûr a ni lo. Chutianga a thim zâwnga mahni inthlîr chu a dik lo va, chu chuan Jehova rawngbâwlna pawh min bânsantîr hial thei a ni. Kan lunghnual hunah kan chakna a kiam thei tih Thufingte 24:10-a thu kha hre reng la. Jehova hnênah a khawngaihna dîlin ṭawngṭai ang che. (Is. 1:18) Inchhîrna dik tak i neih a, inthlâk danglam i tum tih a hmuh chuan a ngaidam ang che. Chu bâkah, kohhran upate pawh pan rawh. Anni chuan thlarau lama i chak leh theih nân dawhthei takin an ṭanpui ang che.—Jak. 5:14, 15.

7. Thil dik tih chu harsa kan ti a nih pawhin engvângin nge kan lunghnual loh vang?

⁷ France rama kohhran upa Jean-Luc-a  chuan chak lohna hneh tumtute chungchângah: “Jehova hmaa mi fel chu thil sual ti ngai lotu ni lovin, a thil tihsualte avânga pawi tia inlam lêttu hi a ni,” tiin a sawi a. (Rom 7:21-25) Chuvângin, chak lohna hneh tuma i beih mêk laia i tlu palh leh ṭhîn a nih chuan mahni indem suh. Pathian hmaa mi fel ni tûrin tu mah kan tling lo tih hre reng ang che. Kan za hian Isua tlanna zâra Pathian khawngaihna mamawh ṭheuh kan ni.—Eph. 1:7; 1 Joh. 4:10.

8. Kan lunghnual hunah min ṭanpui tûrin tute nge kan pan theih?

⁸ Min tichak tûrin thlarau lama kan unaute chu kan pan thei! Anni chuan kan thusawite chu min ngaihthlâksakin, mi tichak thei tak thute pawh min hrilh thei a. (Thuf. 12:25; 1 Thes. 5:14) Lunghnualna hneh tumtu Nigeria rama unaunu Joy-i chuan: “Khawvêl pum huap unaute awm lo se, kei hi khaw nge ka awm tâk ang? Hêng ka unaute hi Jehova’n ka ṭawngṭaina min chhânna an ni a. Lunghnuala awm mi dangte fuih dân chu an hnên aṭangin ka zir a ni,” tiin a sawi. Mahse, kan unaute chuan fuih kan ngaih hun chu an hre reng bîk lo tih kan hriat a ngai a. Chuvângin, kan Kristian unau puitling tak chu va pan a, kan mamawh ṭanpuinate hrilh tûrin hma kan lâk hmasak a ngai a ni.

9. Engtin nge Sâm 41:3 leh 94:19-na chuan min tihchak theih?

⁹ Ṭanpuitu atân Jehova pan rawh. Kan nawmsam loh hian, a bîk takin natna benvawn kan neih hian a êng zâwnga thil thlîr chu a harsa thei a. Tûn laiah Jehova’n thil mak tihna hmangin min tidam lo mah se, min thlamuanin chhel taka tuar chhuak thei tûra kan mamawh chaknate min pe thei a ni. (Sâm 41:3; 94:19 chhiar rawh.) Entîr nân, in chhûng hnathawh leh bazâr ang chi ṭanpuina kan mamawh hunah min ṭanpui tûrin kan Kristian unaute chu a chêttîr thei a. Anni chu min ṭawngṭaisak tûrin a chêttîr thei bawk. A nih loh leh, natna leh hrehawm tawrhna awm tawh lohna khawvêl thar beiseina ropui tak ang chi a Thu, Bible-a kan hmuh thlamuanna thute chu min hriat chhuahtîr thei a ni.—Rom 15:4.

10. Engvângin nge unau Isang-a chu accident a tawh hnuah pawh beidawnga a awm reng loh?

¹⁰ Nigeria rama awm unau Isang-a chu accident avângin a zeng a. Doctor chuan kein a kal leh thei tawh lovang tih a hrilh a ni. “Ka lunghnualin, ka beidawng ngawih ngawih,” tiin a sawi. A nih leh, beidawngin a awm reng em? Awm reng lo! Ani chu engin nge ṭanpui? “Kan nu nên hian Jehova hnêna ṭawngṭai leh a Thu zir chu kan bânsan ngai lo. Pathian khawvêl thara nun beiseina pawh tiamin, malsâwmna kan dawnte chu chhût kan tum tlat a ni,” tiin a sawi.

11. Engtin nge unaunu Cindy-i chuan natna khirh tak a tuar chung pawha hlimna a neih theih?

¹¹ Mexico rama awm unaunu Cindy-i chuan natna khirh tak a nei a. Chu chu engtin nge chhel taka a tawrh theih? Damdâwi ina enkawl a nih chuan nî tina thu hrilh chu thiltumah a nei a. Ani chuan: “Chutianga tihna chuan, ka inzaina te, ka natna te, leh ka hrehawm tawrhte aia thil dang ngaihtuah zâwk tûrin min ṭanpui a. Ka tih tum chu hei hi a ni: Doctor-te leh nurse-te nêna kan inbiak hunah an chhûngkaw chanchin ka zâwt ang a. Chumi hnuah, hetiang hna hahthlâk tak thawh an thlan chhante pawh ka zâwt ang a. Chutiang chuan, an ngaihven zâwng thute chu ka hre thei ang. An zînga tam tak chuan dam lo zâwkin doctor leh nurse-te chu, ‘I dam em?’ tiin an zâwt khât hle tih an sawi a. Chutianga ngaihsakna ka lantîr avângin ka chungah an lâwm hle. An zînga ṭhenkhat chuan ka biak pawh theih nân an phone number leh address-te min pe a. Chuvângin,  he ka hun khirh tak chhûng hian Jehova chuan keimah ngei pawhin mak ka tih khawpin chhûngrila hlimna min pe a ni!” tiin a sawi.—Thuf. 15:15.

12-13. Dam lote leh tisa lama chak tawh lote chu engtin nge rawngbâwlnaa an tel theih a, eng nge a rah chhuah?

¹² Dam lo leh tisa lama chak tawh lote chu rawngbâwlnaa an tih theihte a beitham êm avângin an lunghnual thei a. Chuti chung pawhin an zînga tam tak chuan thu hrilh dân kawng ṭha takte an la nei thei a ni. United States rama unaunu Laurel-i chu kum 37 chhûng khâwl hmanga thâwktîr a ni! Cancer a vei a, vawi tam tak zaipui a tuar a, vun natna a nei bawk. Chûng harsatna khirh tak takte chuan a thuhrilhna chu a titâwp chuang lo. Amah enkawl tûra a ina lo kal nurse-te chu thu a hrilh ṭhîn a ni. Eng nge a rah chhuah? Bible hriatna dik tak nei tûrin mi 17 lai a ṭanpui a ni! *

¹³ France rama kohhran upa unau Richard-a chuan pâwn chhuak thei lova awmte, a nih loh leh nurse enkawlna hnuaia awmte tân thurâwn ṭha tak a nei a. Ani chuan, “Mite hmuh theih tûra lehkhabu leh magazine ṭhenkhat pho chhuak tûrin ka fuih duh a. Chu chuan mite chu hriat duhna leh tîtîna a neihtîr theiin, rawngbâwlnaa kal chhuak thei lo kan unaute chu a tichak thei a ni,” tiin a sawi. Pâwn chhuak thei lote pawh lehkhathawn leh telephone-a thu hrilhna hmangin rawngbâwlnaah an tel thei a ni.

14. Lal Davida’n eng entawn tûr ṭha nge a hnutchhiah?

¹⁴ Kum upatna te, hrisêl lohna te, leh chhan dangte avângin kohhranah leh bial chhûngah chanvo hlu engemaw kan dawng lo pawh a ni thei. Chutiang dinhmunah kan awm a nih chuan Lal Davida thiltawn aṭangin kan inzir thei a ni. Davida chu a thawh châk tak, Pathian biak in satu a ni dâwn lo tih hriattîr a nih chuan, chu chanvo hlen tûra Pathian mi thlan chu theih tâwp chhuahin a thlâwp a. Ani chuan chu hna chu hlen chhuah a nih theih nân phal takin thawhlâwmte a thawh a ni. Entawn tûr ṭha tak a va ni êm!—2 Sam. 7:12, 13; 1 Chro. 29:1, 3-5.

15. Engtin nge unau Hugues-a chuan a lunghnualna chu a hneh?

¹⁵ France rama awm unau Hugues-a chu a hrisêl lohna avângin kohhran upa a nihna ata a châwl a, in chhûng sekrek tak ngial pawh a khawih thei tawh lo va. Ani chuan: “A tîr chuan hlutna rêng nei lo nia ka inhriat avângin ka lunghnual hle a. Mahse, a hnuah ka theih chin tâwk ka pawm thiam a ngai tih ka hria a, ka theih ang tâwka Jehova rawng ka bâwlnaah hlimna ka hmu a ni. Beidawn loh ka tum  tlat a. Chau hle chung pawha bei zawm zêltu Gideona leh a sipai zathumte angin, keipawhin ka bei fan fan ang!” tiin a ziak a ni.—Ro. 8:4.

16. Vântirhkohte entawn tûr siam aṭangin eng nge kan zir theih?

¹⁶ Vântirhkoh rinawmte chu entawn tûr ṭha tak an ni a. Lal Ahaba’n ro a rêl laiin, Jehova’n chu lal sual tak bum dân chungchânga thurâwn pe tûrin vântirhkohte chu a sâwm a. Vântirhkoh tam tak chuan an ngaih dânte an sawi a. Mahse, Pathianin vântirhkoh pakhat thurâwn pêk chu pawmin, a thurâwn pêk chu a hlawhtlin tûr thu pawh a hrilh a ni. (1 Lal. 22:19-22) Vântirhkoh rinawm dangte chuan, ‘Engah nge ka lo inrawlh buai ve,’ tia ngaihtuahin an lunghnual em? Chutiangin an ti ang tih rinna tûr chhan kan nei lo. Vântirhkohte chu inngaitlâwm tak an ni a, chawimawina zawng zawng chu Jehova’n dawng se tih an duh a ni.—Ro. 13:16-18; Thup. 19:10.

17. Rawngbâwlnaa chanvo ṭhenkhat kan dawn loh avânga kan lunghnual a nih chuan eng nge kan tih ang?

¹⁷ Jehova hming pu a, a Lalram kan puang thei hi kan neih theih chawimawina sâng ber a ni tih hria ang che. Chanvote chu kan dawngin kan chân thei a; mahse, chûngte chu Pathian mithmuha hlutna min neihtîrtu a ni lo. Thuhnuairawlhna leh inngaihtlâwmna kan neih hian Jehova leh kan unaute tân mi duhawm tak kan ni a. Chuvângin, Jehova hnênah thuhnuairawlhna leh inngaitlâwmna nei reng thei tûrin a ṭanpuina dîl ang che. A Thu, Bible-a chhinchhiah thuhnuairawlhna leh inngaihtlâwmna chungchânga entawn tûr ṭha tam tak chu chhût ngun la. I unaute tâna i tihsak theihte chu inhuam takin ti ang che.—Sâm 138:6; 1 Pet. 5:5.

18-19. Rawngbâwlna biala mite’n an chhâng lêt ṭha lo angin lang mah se, rawngbâwlnaah engtin nge hlimna i neih reng theih?

¹⁸ I rawngbâwlna biala mite’n an chhân lêt ṭhat loh avâng leh ina hmuh tûr an awm loh avângin lunghnual châng i nei tawh ṭhîn em? Chutiang dinhmunah chuan kan hlimna vawng tlat tûrin eng nge kan tih theih? “ I Rawngbâwlna Tihhlawhtlin Theih Dân Kawngte,” tih bâwmah chuan thurâwn ṭha ṭhenkhat târ lan a ni. Rawngbâwlna chungchânga thlîr dân dik tak neih chu thil pawimawh tak a ni a. Chutah chuan eng nge tel?

¹⁹ Pathian hming leh a Lalram puanchhuah chu ngaihven tlat rawh. Isua chuan mi tlêm tê chauhvin nunna kawng an zawh ang tih chiang  takin a sawi a. (Mt. 7:13, 14) Rawngbâwlnaa kan tel hian Jehova, Isua, leh vântirhkohte nêna thawhho theihna chanvo hlu kan nei a ni. (Mt. 28:19, 20; 1 Kor. 3:9; Thup. 14:6, 7) Jehova chuan a rawngbâwl duhtute chu a zawng a. (Joh. 6:44) Chuvângin, miin kan thuchah ken chu a chhâng lêt nghâl lo a nih pawhin, ni dangah an ngaithla duh thei a ni.

20. Jeremia 20:8, 9-na chuan lunghnualna do theih dân chungchângah eng nge min zirtîr theih?

²⁰ Zâwlnei Jeremia hnên aṭangin thil tam tak kan zir thei a. Ani chu a thuchah ken ngaihven lotute awmna hmuna rawngbâwl tûra tih a ni a. ‘Ni lênga’ mite dem leh hmuhsit a hlawh a ni. (Jeremia 20:8, 9 chhiar rawh.) Ṭum khat chu thu hrilh bânsan duh hial khawpin a beidawng a. Mahse, a bânsan lo. Engvângin nge? “LALPA Thu” chu Jeremia thinlungah mei kâng ang maiin a awm a, a pai hle hle thei lo a ni! Kan thinlung leh rilru chu Pathian Thua a khah chuan chutiang chuan kan awm ve ang. Chu chu nî tina Bible zir a, kan chhût ngunna tûr chhan dang leh a ni. Chutianga kan tih chuan, kan hlimna chu a pung ang a, rawngbâwlnaah pawh kan hlawhtling lehzual ang.—Jer. 15:16.

21. Kan lunghnual chhan chu eng pawh ni se, engtin nge chu chu kan do hneh theih?

²¹ A chunga kan târ lan tâk unaunu Deborah-i chuan, “Lunghnualna hi Setana hmanraw hlauhawm tak a ni thei,” tiin a sawi. Mahse, Pathian Jehova chu Setana leh a hmanraw hlauhawm takte aiin nasa takin a chak zâwk a. Chuvângin, i lunghnual chhan chu eng pawh ni se, Pathian Jehova hnênah a ṭanpuina dîlin ṭawngṭai ang che. Ani chuan i ṭhat famkim lohnate leh i chak lohnate chu hmachhawn thei tûrin a ṭanpui ang che a. I dam loh hunah pawh a ṭanpui ang che. Rawngbâwlna chanvo chungchângah thlîr dân inbûk tâwk tak nei tûrin a ṭanpui che ang a. I rawngbâwlna chu a êng zâwnga thlîr tûrin a ṭanpui bawk ang che. Chu bâkah, i lungngaihnate chu vâna kan Pa hnênah ṭawngṭaiin hrilh ang che. A ṭanpuinain lunghnualna chu i do hneh thei a ni.