CILONGESA 52
Bika Bimikwasa Mukolese nga Munazeye?
“Kundika tuyando twobe twoshe kuli Shukulu Kalunga, co ikeye akakukwasa.”—MYASO 55:22.
MWASO 33 Umbila Citele Cobe Hali Yehova
BILI MUNO MU CILONGESA *
1. Bika byasa kulingiwa nga tuzeya?
TUKALIWANA na bukalu ha litangwa na litangwa, co tukeseka mutukasela mwoshe kukolesa. Oloni kukatukaluwila kukolesa nga tunazeye. Ngeci, kuzeya kunasa kutwonowesa kupwa ba kusimpa na kubwahelela. Mukanda wa Visimo 24:10 ngwawo: “Nga uzeya ha simbu ya bukalu, co nzili yobe ipwa yaindondo.” Kuzeya kwasa kutwonowesa kukolesa nga tuliwana na bukalu.
2. Byuma muka byasa kutuzeyesa, co bika bitusimutwiya muno mu cilongesa?
2 Kuli byuma byabingi byasa kutuzeyesa. Ebi byuma binambateselela tupenga twetu na kubinja. Co lalo twasa kuzeya nga kubatwana cipangi citutonda mu munga ya Yehova nambe nga banu ba mu citingitingi cetu kubesi na kutambula muzimbu waubwa. Muno mu cilongesa tusimutwiya byuma byasa kutukwasa nga tunazeye.
TUPENGA TWETU
3. Bika byasa kutukwasa tujeneke kulyana mulonga mwafwa ya tupenga twetu?
3 Bisimbu bimo tunasa kulyana mulonga mwafwa ya tupenga twetu. Co tunasa kuliziba ngwetu Yehova kakatutabesa kukayoya mu Paradaisi mwafwa tunalingi byuma byabibi. Bisinganyeka bya cifwa eci byasa kutukobelesa mu bukalu. Tunapande kumona bati tupenga twetu? Mbimbiliya yamwesa ngwayo, Yesu ikeye lika wapwile munu wa kulumbunuka, oloni banu boshe “banalingi bubi.” (Loma 3:23) Yehova kesi kwaka manene mbunge ku tupenga twetu nambe kushaka ngwendi tulinge byuma mu kulumbunuka. Oloni wapwa Tate yetu wa cizemo, co ashaka kutukwasa. Co lalo wakala na mbunge ya kubandamena. Azibuka ngwendi bwingi bwetu kukatukaluwila kulinga byuma byabibwa, co lalo tukalyana mulonga, ngeci ashaka kutukwasa.—Loma 7:18, 19.
Yehova azibuka byuma byabibwa bitwalingile kunima nebi bituli na kulinga ha simbu ino (Taleni palagilafu 5) *
4-5. Majwi ali ku mukanda wa 1 Yowano 3:19, 20 akwasele bati bandokazi babali omwo bazeyele?
4 Tusimutwiyeni hali Deborah na Maria. * Deborah mwapwile mwanike baka-naanga yendi bakele na kumulinga mwamubi na kumuzibisa shwamwa. Kakangi kubakele na kumushangala. Ngeci mwakolele wakele na kuliziba ngwe wapwa munu wamubi. Mwakele na kusebuka lika kamandondo, wakele na kuliziba ngwe kasa kulinga byuma byabibwa. Maria nendi wakele na bukalu bwa kulifwa. Baka-naanga yendi bakele na kumushaula. Ngeci wakele na kuliziba ngwe wapwile wa ngoco. Nameme mubamumbwitikile wakele na kuliziba ngwe kapandele kupwa Mukaleho wa Yehova.
5 Aba bandokazi babali kubecelele kupangela Yehova. Mwafwa bika? Mwafwa balombelele kuli Yehova na kumuleka bukalu bwabo. (Myaso 55:22) Banangukile ngwabo Tate yetu wa mwilu, Yehova azibuka ngwendi byuma byabibi bibatulingile kunima byasa kutulingisa tulyane mulonga. Co lalo akamono bifwa byetu byabibwa bije kutwasa kumona yetu babenya.—Tandeni 1 Yowano 3:19, 20.
6. Munu nasa kuliziba bati nga elukila kalingolingo kendi kakabi?
6 Nga munu ali na kulifwita kwecela kalingolingo kamo kakabi, oloni akelukila-elukila, nasa kuzeya. Tuzibuka ngwetu kukwabihile kuliziba kubihya nga tunalingi bubi. (2 Koli 7:10) Oloni kutwapandele kuliziba manene kubihya na kusinganyeka ngwetu kutwasa kulinga byabibwa. Nambe kusinganyeka ngwetu Yehova kasa kutukonekela. Ebi binapu bisinganyeka bya kuhenga, co byasa kutwonowesa kupangela Yehova. Anukeni ngweni mukanda wa Visimo 24:10 unamwesa ngwawo nga tuzeya ha simbu ya bukalu, co nzili yetu ipwa yaindondo. Tunapande kulombela kuli Yehova mangana “tulizibasane” nendi na kumulomba ngwetu atukonekele. (Isaya 1:18) Nga Yehova amona ngwendi mwatenguluka, co amikonekela. Kutundaho munapande kulomba bukwasi ku bakulunu. Co bamikwasa mukanyamese busamba bweni na Yehova lalo.—Yako 5:14, 15.
7. Mwafwa bika kutwapandele kuzeya nga kuli na kutukaluwila kulinga byuma byabibwa?
7 Mukulunu umo wa ku France wa lizina lya Jean-Luc walekele banu baje bakalifwiti na tupenga twabo ngwendi: “Yehova kesi kumona munu kupwa muka-busunga mwafwa ya kulinga byuma byabibwa lika simbu yoshe, oloni nameme nga munu nasebuka, co atenguluka na kulinga byuma byabibwa, anga amumona kupwa muka-busunga.” (Loma 7:21-25) Ngeci keti mulizibe ngwe mu ba ngoco nga muli na kulifwita na kapenga kamo. Anukeni ngweni tubaboshe kutwalumbunukile. Co tutonda Njambi atumwese ngozi yakama kwitila mu ndando ya kupatula.—Efeso 1:7; 1 Yowa 4:10.
8. Beya basa kututakamesa nga tunazeye?
8 Bandolome na bandokazi betu mu cikungulukilo basa kututakamesa. Banasa kututolilila ha simbu itusimutwiya nabo na kutuleka majwi amabwa aje atutakamesa. (Visi 12:25; 1 Tesa 5:14) Ndokazi Joy wa ku Nigeria uje wazeyele manene wendekele ngwendi: “Ngwe bandolome na bandokazi kwahi, ngwe kunjasele kukolesa. Bandolome na bandokazi mubakanjitakamesa, njikalimwena ngwange Yehova akakumbulula malombelo ange. Co nange njalilongesa mwakutakamesela bakwetu baje banazeye.” Oloni tunapande kwanuka ngwetu simbu imo bandolome na bandokazi betu kubasa kuzibuka indi tutonda kututakamesa. Ngeci tunapande kuleka ndolome nambe ndokazi wa kuhya ku sipilitu ngwetu tutonda bukwasi.
NGA TUBINJA
9. Mukanda wa Myaso 41:3 na 94:19 ututakamesa bati?
9 Lombeni Yehova amikwase. Kwasa kutukaluwila kumona byuma mu ngila yaibwa nga tuli na kubinja, maneneni nga tunabinji ha simbu yailaha. Nameme Yehova katukangwisa ha simbu ino, oloni asa kutuzembeleka na kutwana nzili mangana tukolese. (Tandeni Myaso 41:3; 94:19.) Cakumwenako, nasa kupangesa mukwetu muka-Kilistu mangana akutukwase kulinga bipangi bya ha njubo nambe kukatulandelako byuma bimo. Nambe kulingisa bandolome betu bakulombele hamo netu. Co lalo nasa kutwanukisa majwi amo a mu Mbimbiliya aje asa kutuzembeleka. Nasa kutwanukisa lilabelelo lituli nalyo lya kukayoya mu kaye kakaha kwa kujeneka kubinja.—Loma 15:4.
10. Bika byakwasele Isang omwo wazeyele mwafwa ya kukala mu monde?
10 Isang wa ku Nigeria wakele mu monde, co bilyo byendi bimo bya mubila byecelele kupanga. Ndotolo wamulekele ngwendi kakasa kwenda lalo. Isang ngwendi: “Njapokokele mbunge, co njazeyele.” Kuma watwaleleho kupwa wa kuzeya ndi? Embwe. Bika byamukwasele? Isang wendekele ngwendi: “Yange na munakazi wange twatwaleleleho kulombela kuli Yehova na kutanda Lijwi lyendi. Co lalo twatwaleleleho kukandelela kuli Yehova ha byuma byabibwa byanatulingila kwambateselela na lilabelelo lya kukayoya mu kaye kakaha.”
Nameme baje kubasa kulinga byabingi mwafwa ya kubinja nambe kukulubala basa kulikuwa cipangi ca kwambulula (Taleni palagilafu 11-13)
11. Bika byakwasele Cindy abwahelele ha simbu yabinjile?
11 Cindy uje wakala ku Mexico bamuwanene na mushongo wakama uje wasele kumutsiya. Bika byamukwasele akolese? Omwo bakele na kumusaka, walyakelele cilengo ca kwambulula ha litangwa na litangwa. Wasonekele ngwendi: “Kulinga ngoco kwanjikwasele kwaka bakwetu mbunge keti kusinganyeka manene ha bubezi bwange, bimbandu byange nambe kubabala kunjakele na kuziba. Munjakele na kusimutwiya na bandotolo na manasi, njakele na kubehula mubanendukila baka-naanga yabo. Kutundaho njakele na kubehula byabalingisile bangule eci cipangi cacikalu. Kulinga ngoco kwanjikwasele njisimutwiye nabo ha biñanda bije byasele kubeta ku bimbunge. Bwingi bwabo bendekele ngwabo keti kakangi babezi kwindwisa baka-kusaka. Co bandotolo babangi bakandelelele ha kubaka mbunge. Bamo banjanene bikeyala na binamba bya mafoni abo. Ngeci, ha simbu eyi yaikalu, Yehova wanjikwasele njibwahelelele manene kutubakana munjinasinganyekelele.”—Visi 15:15.
12-13. Baka-kubinja na tukulukazi bamo bakambulula bati, co bika binatundumo?
12 Baje bali na kubinja nambe tukulukazi banasa kuzeya mwafwa kubasa kulinga byabingi mu cipangi ca kwambulula. Nameme ngoco, babangi bakawana bingila bya kwambulwilamo. Ndokazi Laurel wa ku United States wayoyele mu likina lije likwasa munu kuhwima libatumbula ngwabo iron lung ha myaka 37. Co lalo, wakele na kubinja mushongo wa cancer na mishongo ya ha cikanda. Kutundaho, bamutabwile ha bisimbu byabingi. Oloni obu bukalu bwoshe kubwamwecelesele kwambulula. Wakele na kwambulwila manasi na baka-kumunyunga baje bakele na kwija ku njubo yendi. Bika byatundilemo? Wakwasele banu ba kutubakana 17 kulilongesa bya Yehova. *
13 Mukulunu wa ku France wa lizina lya Richard wendekele byuma bimo bije byasa kukwasa baje bakala lika ha njubo nambe ha binjubo bya kunyungila babezi ngwendi: “Basa kwaka mabulu etu haje habasa kuwamona banu baje baija na kubamenekela. Co omwo banu bamona mabulu, banasa kwihula bihula bije bilingisa bashangumuke kusimutwiya nabo. Kupangesa eyi ngila kwasa kutakamesa bandolome na bandokazi betu baje kubasa kwambulwila ku njubo na njubo.” Baje bakala lika ha njubo basa lalo kwambulula kupangesa mikanda nambe mafoni.
NGA KUBATWANA CIPANGI CITUTONDA
14. Ndabiti natumwesa bati mwanja waubwa?
14 Kuli byuma byabingi byasa kulingisa bajeneke kutwana cipangi citutonda mu munga ya Yehova bya kufwa ngwe kukulubala, kubinja nambe byuma byeka. Nga tuli mu bukalu bwa cifwa eci, co twasa kulilongesako bimo kuli Mwene Ndabiti. Ndabiti watondele kutunga tembele, oloni Yehova wangwile munu weka mangana aitunge. Nameme ngoco, Ndabiti wakwasele uje yangwile Yehova. Cakumwenako, walambwile ngolinde na siliba yaingi. Cili bene, Ndabiti natumwesa mwanja waubwa manene.—2 Samwe 7:12, 13; 1 Mizi 29:1, 3-5.
15. Bika byakwasele Hugues apwe wa kubwahelela?
15 Ndolome Hugues wa ku France wecelele kupwa mukulunu mu cikungulukilo, co lalo kasele kulinga byuma bimo bya ha njubo mwafwa ya kubinja. Wasonekele ngwendi: “Ha kulibanga, njazeyele na kuliziba ngwe nji wa ngoco. Oloni mu kwita kwa simbu, njanangukile ngwange kunjapandele kulibeyela byuma bije kunjasa kulinga. Co njabwahelelele na byuma binjasele kulinga mu munga ya Yehova. Njalyangwila kutwalelelaho kupangela Yehova ngwe mwalingile Ngilyone na banalume ba kupwa 300 bakele nabo. Boshe bajukile, oloni batwaleleleho kulwa.”—Maako 8:4.
16. Bika bitulilongesa ku tungelo?
16 Tungelo ba kulongwa nabo banatumwesa mwanja waubwa. Ha simbu yakele na kuyula Mwene Ahave, Yehova wehwile tungelo bamuleke byuma bibapandele kulinga mangana bakwise mwene. Tungelo babangi bendekele biyongola byabo. Oloni Njambi watambwile biyongola bya kangelo umo, co wamulekele ngwendi biyongola byendi bipanga. (1 Vimye 22:19-22) Kuma tungelo bakwabo bazeyele nambe kusinganyeka ngwabo banalisinine lika ndi? Embwe. Tungelo bapwa ba kulikehesa, co bashaka ngwabo Yehova lika atambule bumpau na kasingimiko.—Maako 13:16-18; Kujo 19:10.
17. Tunapande kulinga bika nga tunazeye mwafwa ya kujeneka kutwana cipangi cimo mu munga ya Yehova?
17 Anukeni ngweni twabezika kupwa Bakaleho ba Yehova na kwambulula muzimbu waubwa wa Bumwene bwendi. Banasa kutwana cipangi nambe kutunyekaco, oloni ebi keti bikebyo bitulingisa tupwe ba seho kuli Njambi. Kulikehesa kukekwo kulingisa Yehova na bandolome na bandokazi betu batuzeme. Ngeci, lombeni Yehova amikwase kutwalelelaho kupwa ba kulikehesa. Singanyekeseseni ha banu ba mu Mbimbiliya baje bapwile ba kulikehesa. Co pangeleni bandolome beni mu ngila yoshe-yoshe kutundilila kwisi ya mbunge.—Myaso 138:6; 1 Petu 5:5.
NGA BANU BA MU CITINGITINGI CENI KUBATAMBULA MUZIMBU WAUBWA
18-19. Mwasa kupwa bati ba kubwahelela nga banu ba mu citingitingi ceni kubesi na kutambula muzimbu waubwa?
18 Kuma simbu imo mukazeye banu ba mu citingitingi ceni mubakabyana kutambula muzimbu waubwa nambe nga muwana banu babandondo lika ha binjubo ndi? Nga mukemwo, co munapande kulinga bika mangana mutwaleleho kupwa ba kubwahelela? Byuma bimo bimwasa kulinga banabisimutwiya mu cipalo ca “ Bimunapande Kulinga Mangana Mulikuwe Cipangi ca Kwambulula.” Co lalo munapande kukala na biyongola byabibwa ha cipangi ca kwambulula. Mwasa kulinga bati ngoco?
19 Anukeni ngweni tukambulwila bakwetu mangana tubaleke bya lizina lya Njambi na Bumwene bwendi. Yesu wendekele ngwendi banu babandondo lika bakawana ngila iya ku mwonyo. (Mateo 7:13, 14) Omwo twambulula, tuli na kupangela hamo na Yehova na Yesu na tungelo. (Mateo 28:19, 20; 1 Koli 3:9; Kujo 14:6, 7) Yehova ikeye akakoko banu baje bashaka kumupangela. (Yowa 6:44) Ngeci, nga munu katolilila ku muzimbu waubwa ha simbu ino, nasa kutolilila simbu ikwabo mutukasimutwiya nendi.
20. Mukanda wa Njelemiya 20:8, 9 utukwasa bati nga tunazeye?
20 Twasa kulilongesako bimo kuli kapolofweto Njelemiya. Banu bakele na kwambulwila kubakele na kumutolilila. Bakele na kumushendumu na kumujola “simbu yoshe.” (Tandeni Njelemiya 20:8, 9.) Simbu imo wazeyele manene, co washakele kulikela kwambulula. Oloni kalikelele. Mwafwa bika? Mwafwa “lijwi” lya Yehova lyapwile ngwe tuhya mu mbunge yendi, co kasele kwoloka lika kuluu. Netu twasa kutembwinina Njelemiya nga tutanda Mbimbiliya ha litangwa na litangwa na kusinganyekesesa bitutanda. Nga tulinga ngoco, co tupwa ba kubwahelela, co lalo banu babangi banasa kutambula muzimbu waubwa.—Njele 15:16.
21. Bika bitukwasa tukolese nga tunazeye?
21 Deborah itunabanga kusimutwiya wendekele ngwendi: “Satana nasa kutuzeyesa mangana tulikele kupangela Yehova.” Oloni Yehova wakala na nzili kutubakana Satana. Ngeci, nga kuli byuma bimo binamizeyesa, co lombeni Yehova amikwase. Asa kumikwasa mwecele tulingolingo twatubi. Amikwasa lalo mukolese nga mubinja na kumikwasa kumona bipangi bya mu munga ya Njambi, kwambateselela na cipangi ca kwambulula mu ngila yaibwa. Ngeci, lombeleni kuli Tate yeni wa mwilu na kumuleka mumuli na kulizibila. Co amikwasa mukolese nga munazeye.
MWASO 41 Ziba Lilombelo Lyange
^ par. 5 Bisimbu bimo tubaboshe tukazeye. Muno mu cilongesa, tusimutwiya byuma bimo bitwasa kulinga nga tunazeye. Ngwe mutumwena, Yehova asa kutukwasa tukolese nga tunazeye.
^ par. 4 Mazina amo banawatengulula.
^ par. 12 Tandeni muzimbu wa mu kuyoya wa Laurel Nisbet mu Toneni! ya Ingilishi ya January 22, 1993.
^ par. 69 KULUMBUNUNA CIKUPULO: Ndokazi uje nazeye, ali na kwanuka byuma byabibwa byalingile kunima, co alombela kuli Yehova. Nakulahela ngwendi Njambi ali na kwanuka byuma byabibwa byalingile kunima nebi byali na kulinga ha simbu ino.
