ARTIKULO DIˈIB YAˈËXPËJKP 52
¿Ti mbäät nduˈunëm parë kyaj xymyëmadakëmë moˈon tujkën?
“Tuknijëduwë Jyobaa ja mtsëmy mgëˈëy, ets yëˈë mbudëkëdëp” (SAL. 55:22).
ËY 33 Tuknijëduwë Jyobaa ja mtsëmy mgëˈëy
DIˈIB YAJNIMAYTYÄˈÄGÄÄMP *
1. ¿Wiˈix xyˈaxëktuˈunëm ko mon tuk nnayjyäˈäwëm?
NIˈAMUKË nbatëmë amay jotmay, ets tuˈuk tuˈugë xëëw nduˈunëmë mëjääw parë nmëmadakëm. Per mas tsip nwinguwäˈkëm pën yajpatëm mon tuk. Pes mbäät kyaj nekynyaytyukjotkujkˈäjtëm, xypyëjkxëm ja xondakën ets ja jotmëkˈäjtën diˈib nyajtëgoyˈäjtëm parë nwinguwäˈkëm ja amay jotmay. Proverbios 24:10 jyënaˈany: “Pën mˈëxtëkëwäˈkp ja xëëw mä mjotmaybyaaty, ta kyaj nëgoo xynyekymyëdatäˈänyë mëjääw”.
2. 1) ¿Tijaty mbäät xyyajnayjyäˈäwëm moˈon tuk? 2) ¿Ti nˈixäˈänëm mä tyäˈädë artikulo?
2 Taaˈäjtp kanäk pëky diˈib mbäät xyyajnayjyäˈäwëm mon tuk. Ta diˈib yaˈijxp ets ta diˈib kyaj yajpëkyë kuentë. Extëm ko xyyajtëgoˈoyëm ja pokyjyaˈayˈäjtën, ko nyajpatëm yuumëët päˈämmëët, ko ngayajmoˈoyëm tuˈugë tuunk diˈib njatsojkënyëˈäjtëm mä Diosë kyäjpn ets ko jäˈäy tkamëdowäˈändë mä nˈëwäˈkx ngäjpxwäˈkxëm. Mä tyäˈädë artikulo, nimaytyäˈägäˈänëm ti mbäät nduˈunëm parë kyaj xymyëmadakëm ja moˈon tujkën.
KO XYYAJTËGOˈOYËM JA POKYJYAˈAYˈÄJTËN
3. ¿Ti xypyudëkëyäˈänëm ko axëëk njantsy nnayjyäˈäwëm ko xyyajtëgoˈoyëm ja pokyjyaˈayˈäjtën?
3 Mbäät axëëk njantsy nyayjyäˈäwëm ko xyyajtëgoˈoyëm ja pokyjyaˈayˈäjtën, ets mbäät axtë nwinmäˈäyëm ko Jyobaa ninäˈä xykyayajnaxäˈänëm mä ja jembyë jukyˈäjtën. Ko duˈun nwinmäˈäyëm, mbäät mëjwiin kajaa xyˈaxëktuˈunëm. ¿Wiˈix mbäät nˈijxëm ko xyyajtëgoˈoyëm ja pokyjyaˈayˈäjtën? Biiblyë jyënaˈany ko niˈamukë naxwinyëdë jäˈäy ak pokyjyaˈay nyajpatëm (Rom. 3:23). Perë Jyobaa kyaj yëˈë tˈixy ttuny mäjaty ndëgoˈoyëm ets kyaj ttimtsoky parë ak oy tijaty nduˈundäˈäyëm. Pes yëˈë duˈun extëm tuˈugë uˈunkteety diˈib xytsyojkëm ets xymyëmaˈkxtujkëm. Jyobaa nyijäˈäwëp ko nyajnimëjääwdakëm parë nduˈunëm diˈib oy ets ko ëtsäjtëm këˈëm nan axëëk njanayjyäˈäwëm, per listë yˈity parë xypyudëkëyäˈänëm (Rom. 7:18, 19).
Mbäät axëëk xyyajnayjyäˈäwëm wiˈix të njäjt të ngëbajtëm mä tiempë të nyaxy, perë Jyobaa yajtsobatypy tijaty tyam nduˈunëm. (Ixë parrafo 5). *
4, 5. Extëm jyënaˈanyë 1 Fwank 3:19, 20, ¿ti pudëjkëdë Deborah mëdë María parë kyaj axëëk nyekynyayjyäˈäwëdë?
4 Min nˈokˈijxëmë yˈijxpajtënë Deborah mëdë María. * Ko Deborah myutskˈäjty, kyaj nëgoo fyamilyë tsyojkë ets ninäˈä ojts kyamëjkuˈëw kyamëjkugäjpxëty. Pääty ko ojts yaˈknë, nayjyäämˈijx naynyääxˈijxë këˈëm. Ets ko ijty muum yiˈin waanë ti oy tkatuny, ta wyinmääygyojy ko tëdën ti oy tkatuny. Etsë María naduˈundëkë nyayjyäˈäwë. Ja fyamilyë jäämˈijx nääxˈijxë, pääty nyayjyäˈäwë ko kyaj ti ttsoowëty. Axtë mä nety të nyëbajnë, nyayjyäˈäwë ko kyaj pyaaty nyitëkëty yajtijët Jyobaa tyestiigë.
5 Per oy duˈun nyayjyäˈäwëdë Deborah mëdë María, duˈunyëm tmëduunˈadëtstë Jyobaa. ¿Ti pudëjkëdë? Ko ttukmëtmaytyaktë wiˈixë nety nyayjyawëdë ets duˈun ttuknijëduuwdë ja tsyemy kyëˈëy (Sal. 55:22). Deborah mëdë María, jyaygyujkëdë ko Jyobaa nyijäˈäwëp wiˈix të nyaˈk të nbajtëm ets ko pääty myiny mä jot winmäˈäny diˈib axëëk xyyajnayjyäˈäwëm. Ets ko nan yëˈë yˈijxypyë oybyë jäˈäyˈäjtën diˈib ëtsäjtëm kyaj nbëjkëmë kuentë (käjpxë 1 Fwank 3:19, 20).
6. ¿Wiˈix mbäät nyayjyawëty tuˈugë jäˈäy ko jatëgok yajkäˈäyëty diˈibë nety të tˈokmastutpë?
6 Nan mbäät tuˈugë jäˈäy yajnayjyawëty mon tuk ko jatëgok yajkäˈäyëty diˈibë nety të tˈokmastutpë (2 Kor. 7:10). Ets kyaj wyiˈixëty ko yajpokyjyawë ti të nduˈundëgoˈoyëm, per kyaj tiko net axëëk ndimnayjyäˈäwëm ets njënäˈänëm: “Kyajts ti ntsoowëty; Jyobaa ninäˈäts xykyapokymyaˈkxäˈäny”. Kyaj yˈoyëty ko duˈun nwinmäˈäyëm, pes mbäädë Jyobaa xytyukmastutëm. Nˈokjamyajtsëm extëm jyënaˈanyë Proverbios 24:10: pën ëxtëkëwäˈkëm, ta kyaj nekymyëdatäˈänëm ja jot mëjääw. Nik oy ko nyaˈoˈoyëm ja jotmay mëdë Jyobaa ko nmënuˈkxtakëm parë xypyokymyaˈkxëm (Is. 1:18). Ets ko tˈixët ko të njantsy jyodëmbijtëm, ta xypyokymyaˈkxäˈänëm. Nan oy ko ndukmëtmaytyakëm pënaty tuundëp mëjjäˈäy, pes xypyudëkëyäˈänëm maˈkxtujkën myëët parë jatëgok oy nˈijtëm mëdë Jyobaa (Sant. 5:14, 15).
7. Pën nduˈunëmë mëjääw parë kyaj xymyëmadakëm diˈib xyyajtëgoyäˈänëm, ¿tiko kyaj mbäät axëëk nnayjyäˈäwëm?
7 Jean-Luc diˈib tuump mëjjäˈäy jap Francia, duˈun tˈanëëmë pënaty tyuundëbë mëjääw parë kyaj myëmadäˈägëdët diˈib yajtëgoyanëdëp: “Jyobaa kyaj yëˈë dyajnaxy oyjyaˈay ja diˈib ninäˈä kyatëgoy; yëˈëjën yajnäjxypy oyjyaˈay ja diˈib myëkjäˈäwëp ets ttunyë mëjääw parë nyayajtëgatsyëty” (Rom. 7:21-25). Pääty, këdii mwinmay ko ninuˈun mgatsobääty ets jamyats ko niˈamukë ndëgoˈoyëm, perë Jyobaa xykyupëjkëm mët ko jyantsy yˈoyjyaˈayëty ets mët ko Jesus ojts xyjyuuybyëtsëˈëmëm (Éfes. 1:7; 1 Fwank 4:10).
8. ¿Pën mbäät nˈamdoˈowëmë naybyudëkë ko nyajpatëm mon tuk?
8 Nmëguˈukˈäjtëm diˈib mëët nˈëxpëjkëm, mbäät xyjyotkujkmoˈoyëm. Xëmë yajpäädäˈändë mët ëtsäjtëm ko nety nyajtëgoyˈäjtëm parë xyjyotkujkmoˈoyäˈänëm ets myëdoowˈitandëp ti nety ndukmëtmaytyakëm (Prov. 12:25; 1 Tes. 5:14). Joy, diˈib tsënaapy Nigeria, yëˈë tuˈugë nmëguˈukˈäjtëm diˈib tyuumbë mëjääw parë kyaj nyaytyukmëmadaˈagyëtyë moˈon tujkën, jyënaˈany: “Kyajts nmadäˈägët pën kyajtsë nmëguˈuktëjk xypyudëkëdë. Kots xyjyotkujkmoˈoytyë, yëˈëts xytyukˈijxp ko Jyobaa yˈatsoowëmbijtypyëtsë nuˈkxtakën. Nan tëts njaty parëts njotkujkmoˈoyët pënaty mon tuk yajpattëp”. Perë nmëguˈukˈäjtëm kyaj xëmë tpëkäˈändë kuentë ko yajjotkujkmoˈoyäˈänëm. Pääty, tsojkëp këˈëm ndukmëtmaytyakëm diˈib japë jyot wyinmäˈäny parë nˈamdoˈowëmë naybyudëkë.
KO NYAJPATËM YUUMËËT PÄˈÄMMËËT
9. ¿Wiˈix xyjyotkujkmoˈoyëmë Salmo 41:3 etsë 94:19?
9 Nˈokˈëxtäˈäyëmë Jyobaa nyaybyudëkë. Ko tuˈugë jäˈäy pyekyëty, minäämp mä jyot wyinmäˈäny diˈib mbäät axëëk yajnayjyawëty, ets mas niˈigyë pën päˈämˈijnëp. Tëyˈäjtën ko Jyobaa kyaj tyam xyyaˈˈagëdäˈägäˈänëm mëjˈäjtëngyëjxm, per xyjyotkujkmoˈoyäˈänëm ets xymyoˈoyäˈänëm ja jot mëjääw diˈib nyajtëgoyˈäjtëm parë mbäät nmëmadakëm (käjpxë Salmo 41:3; * 94:19). * ¿Wiˈix ttuny? Yëˈë yˈadëjk tyuktëjkëbë nmëguˈukˈäjtëm parë mbäät xypyudëjkëm jënoty tëgoty o nyëjkxtët juuy këbajtpë. Nan mbäät dyajtuny parë nyuˈkxtäˈäktët mët ëtsäjtëm. Jyobaa nan mbäät xytyukjamyajtsëmë ääw ayuk diˈib yajpatp mä Biiblyë diˈib mbäät xyjyotkujkmoˈoyëm, extëm mä yajmaytyaˈaky ja jembyë jukyˈäjtën mä kyaj nyekyjyamˈatäˈäny ja pëjk adoˈonën etsë jäj jëmuˈumën (Rom. 15:4).
10. ¿Ti pudëjkë Isang parë jatëgok ojts kyujkë yˈääw jyot ko yˈayoˈonbaty?
10 Isang, diˈib tsënaapy Nigeria, ayoˈonbat ets ta xyujxtääyë nyiniˈkx. Ja doktoor, ta yˈanmääyë ko ninäˈä jatëgok kyanekyyoˈoyaˈany. Isang jyënaˈany: “Amäˈäts tukmäˈätsëts ja ngorasoon njäˈäwë ets mëk mon mëk tukëts nnayjyäˈäwë”. ¿Ti pudëjkë? Yëˈë jyënaˈany: “Xëmëtsë Jyobaa nmënuˈkxtaktë mëdëtsë ngudëjk ets nan xëmëts nˈëxpëjktë Biiblyë. Nan nbëjtaktëtsë nwinmäˈäny kots nguˈëwëyäˈän ngukäjpxëyäˈändë tukëˈëyë diˈibëts nmëdäjttëp, extëm kots nˈawix njëjpˈixtë ja jembyë jukyˈäjtën”.
Pënaty kyaj oy mëk yajpäättë, nan mbäät ttukˈit ttukxondë mä yˈëwäˈkx kyäjpxwäˈkxtë ets tpäättë jäˈäy diˈib myëdoowˈitaampy. (Ixë parrafo 11 axtë 13).
11. ¿Ti Cindy agujk jotkujk yajnayjyäˈäwë oyë nety mëk jyantsy pyekyëty?
11 Cindy, diˈib tsënaapy Nëwinm, anmääyë doktoor ko myëdäjtypyë nety tuˈugë päˈäm diˈib mbäät yaˈoogyëty. ¿Ti net tyuun? Pyëjtakë wyinmäˈäny ko bom bom yˈëwäˈkxäˈäny kyäjpxwäˈkxäˈäny mientrës yajmoˈoy ja tryatamientë. Yëˈë jyënaˈany: “Tyäˈädë yëˈëjëts xypyudëjkë parëts nmëmay nmëdäjët ja wiink jäˈäy, en lugäärëts yëˈë nmëmay nmëdäjët wiˈixëtsë nety nyajtsukäˈäny, o wiˈixëts ja pëjk adoˈonën nyajnaxy. Ets diˈibëts nduun, yëˈëjëts nmëtmaytyak ja doktoortëjk ets ja enfermeerëty, nyajtëëyëts wiˈix yaˈix yajpäättë ja fyamilyë ets tiko tniˈëxpëjkëdë tuˈugë tuunk diˈib nëgoo nyimëjääwˈäjnë. Duˈuntsoowëts, nnijäˈäwë tijatyëts mbäät ndukmëtmaytyäˈäktë diˈib yˈoymyëdowdëp. Niganäägëts xyˈanmääytyë ko kyaj nëgoo päˈämjäˈäy yajtëwëdë wiˈix yaˈix yajpäättë, ets nimay ojts tkuˈëw tkugäjpxëdë kots naytyukjotmaytyuunë mët yëˈëjëty. Axtë nääk xymyooyëts ja dyireksion etsë nyumero. Nnijäˈäwëbëtsë nety ko Jyobaa yëˈëts diˈib xypyudëkëyäämp mäts nyajnaxy nyajkëxyë tyäˈädë yuu päˈäm. Per kyajtsë nety duˈun ndimˈawixy ndimjëjpˈixy xyyaˈˈagujkˈat xyyajjotkujkˈatët” (Prov. 15:15).
12, 13. ¿Wiˈix näägë nmëguˈukˈäjtëm kyäjpxwäˈkxtë diˈib pëjk ijxëdëp o diˈib të myëjjäˈäyëndë, ets wiˈix wyimbëtsëmy?
12 Ta näägë nmëguˈukˈäjtëm diˈib nayjyäˈäwëp mon tuk mët ko kyaj nëgoo mbäät yˈokˈëwäˈkx yˈokkäjpxwäˈkxnë mët ko pyëk yˈixëdë o ko të nyitëjkëndë mëjjäˈäyˈat. Per yˈëxtääytyëbë winmäˈäny wixaty mbäät yˈëwäˈkx kyäjpxwäˈkxtë. Laurel, tuˈugë nmëguˈukˈäjtëm diˈib Estados Unidos, ja yˈijty 37 jëmëjt mä tuˈugë makinë diˈib pudëjkë parë mbäät xyejy. Myëdäjtë kanser ets yajtsujk kanäkˈok, nan myëdäjt kanäk naxë päˈäm mä nyiniˈkx. Per duˈunyëm ojts yˈëwaˈkxy kyäjpxwaˈkxy oy duˈun yaˈijxy yajpaty. Myëtmaytyak ja enfermeerëty ets pënaty ijxˈijt kuentˈäjtë mä jyëën tyëjk. Laurel, jaa tpudëjkë naa 17 jäˈäy diˈib tyam Testiigëty. *
13 Richard, tuˈugë nmëguˈukˈäjtëm diˈib tuump mëjjäˈäy ets tsyëënë Francia, duˈun twinmäˈänymyoˈoy pënaty kyaj mbäät muum nyëjkxtë o tsyëënëdë mä tsip pyëtsëmdët: “Oy ko tpëjtäˈäktëdë ëxpëjkpajn mä mbäädë jäˈäy tˈixtë. Net ko nyaxtët mbäät tnijawëyäˈändë ets dyajtëwdë. Duˈuntsoo, mbäädë net mët ja jäˈäy tyëkëdë käjpx maytyakpë, ets yëˈë diˈib mëjääwmoˈoyanëdëp ja nmëguˈukˈäjtëm diˈib kyaj mbäät nyekynyëjkxtë ëwäˈkx käjpxwäˈkxpë tëjkmdëjkm”. Pënaty kyaj mbäät jyënbëtsëm tyëjkpëtsëmdë, mbäät nanduˈun kyäjpxwäˈkxtë ko tjäˈäytyëdë neky ets ko jäˈäy tmëgäjpxtët mä telefënë.
KO NGAYAJMOˈOYËM JA TUUNK DIˈIB NJATSOJKËNYËˈÄJTËM
14. ¿Ti oybyë ijxpajtën ojts xymyoˈoyëmë rey David?
14 Taaˈäjtp kanäk pëky tiko kyaj mbäät nyajmoˈoyëm tuˈugë tuunk diˈib njatsojkënyëˈäjtëm mä Diosë kyäjpn. Waˈan mët ko të nmëjjäˈäyënë, ko yuumëët päˈämmëët nyajpatëm o jam ti wiinkpë jotmay. Ko duˈun njäjtëm, mbäät mëjwiin kajaa xypyudëjkëm ja yˈijxpajtënë rey David. Pes yëˈë jyantsy kyojan ja templë, per ko tnijäˈäwë ko kyaj yëˈë të yajwinˈixy, ta tpudëjkë ja diˈibë netyë Dios të twinˈixy. David yäjk mayë oorë etsë platë. ¡Jantsy oyë ijxpajtën diˈib xymyoˈoyëm! (2 Sam. 7:12, 13; 1 Crón. 29:1, 3-5).
15. ¿Ti pudëjkë tuˈugë nmëguˈukˈäjtëm parë kyaj myëmadakë moˈon tujkën?
15 Hugues, tuˈugë nmëguˈukˈäjtëm diˈib tsënaapy Francia, mëjjäˈäyë nety tyuny, per myastut ko ja päˈäm nyitëjkë. Yëˈë ni jeˈeyë nety mbäät ti tkatuny jyënoty tyëgoty. ¿Wiˈix nyayjyäˈäwë? Yëˈë jyënaˈany: “Tim ogäˈän, mëk mon mëk tukëts nnayjyäˈäwë ets nwinmääyëts ko kyajts ti ntsoowëty. Per ko tiempë nyajxy, tats ngupëjky extëmtsë nety nyaˈixy nyajpääty ets agujk jotkujkëts xyyajnayjyäˈäwë titsë nety mbäät ndukmëdunyë Jyobaa. Kyajts nˈëxtëkëwäˈägäˈäny. Duˈunëts extëmë Gedeón mët ja 300 jyaˈay, oyë nety të jyaˈˈanuˈkxëtyaˈaytyë, tsiptuunˈadëtstë” (Juec. 8:4).
16. ¿Ti xytyukniˈˈijxëmë yˈijxpajtën anklëstëjk?
16 Anklëstëjk diˈib jam tsäjpotm, nan xymyoˈoyëmë oybyë ijxpajtën. Tëgokë Jyobaa dyajtëëyë anklëstëjk parë tnigäjpxtët wiˈix mbäät yajwinˈëënyë rey Acab, diˈibë nety nëgooyë yˈaxëkjäˈäyˈäjnë. Niganääk ojts tnigäjpxtë wiˈixë nety wyinmaytyë, perë Jyobaa, jeˈeyë twinˈijxy niduˈuk ja anklës ets tˈanmääy ko extëmë nety të jyënaˈany oybyëtsëmäämp (1 Rey. 22:19-22). ¿Ojtsëdaa axëëk nyayjyawëdë ja diˈib kyaj tyuundë yˈääw yˈayuk? ¿Ojtsëdaa jyënäˈändë: “Kyajxyëbëts wiˈix të mdimjënäˈäny?”. Kyaj. Pesë anklëstëjk jantsy yujy jantsy tudaˈagyëty ets tsyojktëp parë Jyobaa yëˈëyë yajmëjkumayët (Juec. 13:16-18; Diˈibʉ Jat. 19:10).
17. ¿Ti mbäät nduˈunëm pën mon tuk nnayjyäˈäwëm mët ko kyaj nikëjxmˈäjtëm tuˈugë tuunk mä Diosë kyäjpn?
17 Nˈokjamyajtsëm ko ja tuungë mas oybyë, yëˈë ko xytyestiigëˈäjtëmë Jyobaa ets ko ngäjpxwäˈkxëm ja yˈAnaˈam Kyutujkën. Ja tuunk diˈib tyam nikëjxmˈäjtëm mä Diosë kyäjpn, mbäät nyajtëgoˈoyëm ets mbäät jatëgok nbatëm. Perë Jyobaa mëdë nmëguˈukˈäjtëm kyaj xyyajtsobatëm mët ko nikëjxmˈäjtëmë tyäˈädë tuunk, netën xyyajtsobäädäˈänëm pën ijtëm yujy tudaˈaky. Pääty, nˈokˈamdoˈow nˈokpëjktsoˈowëmë Jyobaa parë duˈunyëm njäˈäyˈäjtëm. Nˈokpawinmäˈäyëm niˈamukë pënaty yajmaytyaktëp mä Biiblyë diˈib yajnigëxëˈktë yujyˈat tudaˈakyˈat, ets nˈoktukmëduˈunëm tijatyë nmëguˈukˈäjtëm xondaˈakyˈääw xondaˈakyjyot nuˈun nmadakëm (Sal. 138:6; 1 Peed. 5:5).
KO JÄˈÄY TKAMËDOWÄˈÄNDË DIOSË YˈAYUK MÄ NGÄJPXWÄˈKXËM
18, 19. Ko nˈëwäˈkx ngäjpxwäˈkxëm mä jäˈäy kyaj tmëdowäˈändë, ¿ti xypyudëkëyäˈänëm parë duˈunyëm ndukxondakëm?
18 Mä nˈëwäˈkx ngäjpxwäˈkxëm, ¿tsipë jäˈäy nbatëm mä jyëën tyëjk o ko net njapatëm kyaj tmëdowäˈändë? Ko duˈun njäjtëm, mbäät xyyajnayjyäˈäwëm mon tuk. ¿Ti mbäät nduˈunëm parë mas niˈigyë ndukxondakëmë tyäˈädë tuunk? Mä rekuäädrë, “ Wiˈix mbäät mas niˈigyë ndukxondakëmë Diosë tyuunk”, myëmiimpy tuˈuk majtskë käjpxwijën diˈib mbäät xypyudëjkëm. Nan jëjpˈam nyaˈijtëm winmäˈänyoty tiko nˈëwäˈkx ngäjpxwäˈkxëm. ¿Ti tyäˈädë yˈandijpy?
19 Nˈokˈyaˈijtëm winmäˈänyoty ko diˈib mas jëjpˈam, yëˈë ko ngäjpxwäˈkxëmë Diosë xyëëw ets ja yˈAnaˈam Kyutujkën. Jesus ojts yajxon tnigajpxy ko niwaanë jäˈäy diˈib tëkëyandëp mä ja tuˈu diˈib yajnëjkxp mä jukyˈäjtënë winë xëëbë (Mat. 7:13, 14). Ko nˈëwäˈkx ngäjpxwäˈkxëm, nan yëˈë mëdë Jyobaa nduunmujkëm, Jesus etsë anklëstëjk (Mat. 28:19, 20; 1 Cor. 3:9, TNM; Diˈibʉ Jat. 14:6, 7). Etsë Jyobaa nan yëˈë myëjwoobyë jäˈäy mä nyax kyäjpn diˈib mëdunanëp (Fwank 6:44). Pääty, ko tim jawyiin nmëtmaytyakëm tuˈugë jäˈäy mbäät kyaj tmëdowäˈänët, per myëdoowˈijtypy ko jatëgok ninëjkxëm.
20. Extëm jyënaˈanyë Jeremías 20:8, 9, ¿ti xypyudëkëyäˈänëm parë kyaj xymyëmadakëmë moˈon tujkën?
20 Yˈijxpajtënë kugajpxy Jeremías, mbäät mëjwiin kajaa xypyudëjkëm. Yëˈë ëwäˈkx käjpxwäˈkx mä kyaj pën tmëdowanyë Diosë yˈayuk, axtë yajwinˈëbajt yajwingäjpxpajt ets “xëmë” yajnëxiky yajtukxiky (käjpxë Jeremías 20:8, 9, TY). * Ko duˈunë Jeremías jyajty, mëk mon mëk tuk nyayjyäˈäwë axtë jënan ko kyaj nyekykyäjpxwäˈkxäˈäny. Per ¿tiko kyaj tˈëxmäjty? Yëˈë jyënany ko ja yˈääw yˈayukë Jyobaa, duˈun tjäˈäwë jëënën mä jyot kyorasoon ets kyaj tnekymyëmadäˈägany. Ëtsäjtëm, nanduˈun njawëyäˈänëm ja jot winmäˈäny etsë jot korasoon, pën nyajtuktujkëm mëdë Diosë yˈAyuk. Päätyën tsyokyëty bom bom nˈëxpëjkëm ets nbawinmäˈäyëm. Ko duˈun nduˈunëm, ta mas niˈigyë ndukxondäˈägäˈänëm mä nˈëwäˈkx ngäjpxwäˈkxëm ets mbäät niˈigyë jäˈäy tmëdoowˈity (Jer. 15:16).
21. ¿Ti mbäät xytyuny parë kyaj mmëmadäˈägëdët ja moˈon tujkën?
21 Deborah, diˈib të yˈokˈyajmaytyakpë mä parrafo 4, jyënaˈany: “Ko mon tuk nnayjyäˈäwëm, yëˈë diˈibë Satanás yajtuumpy parë xymyëmadakëm”. Perë Jyobaa yëˈë diˈib mas kumëjääw ets kyaj dyuˈunëtyë Satanás mët tijaty yajtuumpy. Pääty ko ti myajnayjyawëdët mon tuk, tukmëtmaytyäˈägë Jyobaa wiˈixën meerë mnayjyawëty ets amdow pëjktsowë nyaybyudëkë. Yëˈë mbudëkëyanëp ko nety axëëk mjantsy nyayjyawëty mët ko myajtëgoyëty ja pokyjyaˈayˈäjtën, ko myajpäädët yuumëët päˈämmëët, nan mbudëkëyanëp parë kyaj wiˈix mnayjyawëdët ko mgayajmoˈoyët tuˈugë tuunk diˈib mjatsojkënyëˈajtypy ets parë kyaj mon tuk mnayjyawëdët ko jäˈäy tkamëdowäˈändët ja Diosë yˈayuk mä mˈëwaˈkxy mgäjpxwaˈkxy. Mëdë Jyobaa nyaybyudëkë, mbäät kyaj mnekynyayjyawëty mon tuk.
ËY 41 Tunë mayˈäjtën mmëdoowˈitëtsë nuˈkxtakën
^ parr. 5 Seguurë ko niˈamukë të nnayjyäˈäwëm mon tuk. Mä tyäˈädë artikulo nnijawëyäˈänëm ti mbäät nduˈunëm ko duˈun nnayjyäˈäwëm, ets nˈixäˈänëm ko mëdë Jyobaa nyaybyudëkë mbäät kyaj xymyëmadakëm ja moˈon tujkën.
^ parr. 4 Të näägë xyëëw tyëgatstë.
^ parr. 9 Salmo 41:3: “Jyobaa pudëkëyanëp ko nety yajpääty yuumëët päˈämmëët myabajngëjxy; yajtëgatsanëp ja wyëëty myabajn mä nety yˈity yuumëët päˈämmëët”.
^ parr. 9 Salmo 94:19: “Kots ojts xyyaˈayoownë tijatyëts nmëmaapy nmëdajpy, mijtsëts xyjyotkujkmooy etsëts xyyajnayjyäˈäwë oy”.
^ parr. 12 Yˈeksperiensyë Laurel Nisbet jap myiny mä ¡Despertad! 22 äämbë eneerë 1993.
^ parr. 20 Jeremías 20:8, 9, TY: ‘Koots ngajpxy, tsipëts xëmë nigajpxypy etsë oˈk tëgoˈoyën; jeˈeyëts xëmë nyajˈojy nyajˈyaˈaxy ets nyajnëxiˈiky nyajtukxiˈiky, pääty jyëduˈunyëty jaˈats ko nnigajpxy mijts yëˈë mˈääw mˈayuk. 9 Kots nˈënäˈäny: Ëjts käˈäbëts yëˈë Wintsën nˈëkjamyatsanë ets käˈäbëts yëˈë xyëëw nˈëknigäjpxanë; kots jëduˈun nˈënäˈäny ënet jap njodotyëts njawë yëˈë mˈääw mˈayuk tyooypyiky jëënën ets duˈunëts ndimjyawë tim tsaapy tim noˈkp yowë, tyimtuktëjkëp njawëts nwääy nbäjk. Kots njaakumaˈkxëjäˈäny, nijënuˈun tkajëkyepy’.
^ parr. 72 YAJNIMAYTYAˈAGYË DIBUJË: Tuˈugë nmëguˈukˈäjtëm diˈib nayjyäˈäwëp mon tuk, tjamyetsy tijaty oyˈäjtën tyuun ets tmënuˈkxtaˈagyë Jyobaa. Ijtp seguurë ko Jyobaa jyamyejtsypy tijaty të ttuny ets ti tyam tyuumpy.
