1. Ñe jej ebbweer, ewi wãween an men in maroñ jelõt kõj?

KAJJOJO raan jej jelm̦ae apañ ko im jej kate kõj kijenmej ium̦win wãween kein joñan wõt ad maroñ. Meñe ãindein, ak kwõj ke errã bwe ñe jejjab ebbweer em̦m̦anl̦o̦k ad kijoñ kõm̦adm̦õdi apañ ko ad? Kõn men in, jej aikuj in watõk eñjake in ebbweer ãinwõt juon ri-ko̦o̦t me ilo kõkkar ej bũki eñjake ko rem̦m̦an jãn kõj, ãinwõt, peran im lañlõñ, bareinwõt ej kõm̦m̦an bwe jen pere kõj make. Jabõn Kõnnaan 24:10 (UBS) ej ba: “El̦aññe kwõj ebbweer ilo iien ko reppen, innem [kwõnaaj] juon armej eo em̦õjn̦o̦.” Aet, ñe jej ebbweer men in emaroñ kam̦õjn̦o̦ik kõj im kõm̦m̦an bwe en pen ad kijenmej ium̦win apañ ko ilo mour.

2. Ta jet iaan un ko unin ad maroñ ebbweer, im ta ko jenaaj etali ilo katak in?

² Elõñ men ko remaroñ kõm̦m̦an ad ebbweer, ãinwõt l̦õmn̦ak ko rebõd kõn kõj make, bõd ko jaar kõm̦m̦ani, ak kõn an wõr ad nañinmej. Emaroñ bar kitibuj ad jab bõk juon eddo jaar kõn̦aan bõke ilo jerbal eo ad ñan Jeova ak kõn ad jerbal ilo teretore ko me jel̦ak lale armej ro ie rejjab kõn̦aan roñjake. Ilo katak in, jenaaj kõnono kõn jet men ko jemaroñ kõm̦m̦ani ñan jipañ kõj ñe jej ebbweer.

3. Ta eo emaroñ jipañ kõj ñan bõk l̦õmn̦ak eo ejim̦we kõn likjab ko ad?

³ Epidodo ad jino bõk l̦õmn̦ak ko rejjab jim̦we kõn likjab im m̦õjn̦o̦ ko ad. Kõn men in, jemaroñ jino tõmak bwe kõnke jej kõm̦m̦an bõd ak likjab, Jeova ejjãmin kadel̦o̦ñ kõj ñan lal̦ eo an ekããl. L̦õmn̦ak rot in emaroñ kauwõtata. En kar ewi wãween ad watõke likjab ko ad? Baibõl̦ eo ej kwal̦o̦k bwe aolep armej rej “rijjerawiwi,” ijello̦kun wõt Jesus Christ. (Rom 3:23) Meñe ãindein, ak Eo ear je Baibõl̦ ejjab juon eo me ej kalimjek bõd ko ad ak kõtmãne bwe jen weeppãn. Ijoke, ej juon Jemãn el̦ap yokwe ippãn im ekõn̦aan jipañ kõj. Im ebar jel̦ã kijenmej. Ej lo joñan  ad aikuj kate kõj ñan anjo̦ ioon m̦õjn̦o̦ ko ad im l̦õmn̦ak ko rejjab jim̦we kõn kõj make, im epojak in jipañ kõj.​—Rom 7:18, 19.

4-5. Ekkejell̦o̦k ippãn 1 Jon 3:19, 20, etke ruo jeid im jatid kõrã rar jab kõtl̦o̦k bwe aer eñjake in ebbweer en anjo̦ ioer?

⁴ L̦õmn̦ak kõn bwebwenato ko an Deborah im Maria. * Ke Deborah ear juon ajri, ekkã an ro jet kõm̦m̦an ñane ilo wãween ko me rej kõm̦m̦an menin an jook. Ejeja an kar bõk naanin nõbar. Kõn men in, ear jino bõk l̦õmn̦ak ko renana kõn e make. Ñe ej kõm̦m̦an juon bõd jidikdik, ej l̦õmn̦ak bwe ejjel̦o̦k men en̦ ejim̦we emaroñ kõm̦m̦ane. Wãween in Deborah ear iioone ej ãinl̦o̦kwõt bar wãween eo Maria ear iioone. Armej ro nukũn Maria rekõn kajooke. Im jãn aer kar ãindein, ekkã an bõk l̦õmn̦ak eo bwe ejjel̦o̦k tokjãn. Joñan, ãlikin an kar del̦o̦ñtok ñan m̦ool eo, ear bar l̦õmn̦ak bwe ejjab tõllo̦kũn bwe en juon iaan Ri-Kõnnaan ro an Jeova!

⁵ Meñe ãindein, ak kõrã rein jeid im jatid rar jab bõjrak jãn aer karejar ñan Jeova. Etke? Kõnke rar jol̦o̦k aer eddo ioon Jeova ikijjeen aer kar jar ñane jãn bũrueer. (Sam 55:22) Rar jino tõmak bwe Jemãdwõj ilañ eo el̦ap yokwe ippãn, ejel̦ã kõn ewi wãween an men ko me jaar iiooni ilo kar mour eo ad im l̦õmn̦ak ko rebõd jej bũki kõn kõj make, jelõt kõj. Ej bareinwõt lo men ko rem̦m̦an ilo bũruod​—kadkad ko me jemaroñ jab loi ippãd.​—Riit 1 Jon 3:19, 20.

6. Ta eñjake eo juon emaroñ bõke ñe ebar kõm̦m̦ane ejja bõd eo wõt ear kõm̦m̦ane m̦oktal̦o̦k?

⁶ Juon eo me ej lukkuun kate ñan anjo̦ ioon juon m̦anit enana me epen an jol̦o̦ke, emaroñ bar kõm̦m̦ane ejja bõd eo wõt im nana an mour kake. Aet, ekkã an nana bõklõkõt eo ad ñe jej jerawiwi. (2 Kor. 7:10) Bõtab, en jab tarjen joñan an nana ad mour ñan joñan eo me jej kajeik kõj make, im l̦õmn̦ak: ‘Ejjel̦o̦k men en̦ ejim̦we imaroñ kõm̦m̦ane. Jeova ejjãmin jol̦o̦k aõ bõd.’ Kain l̦õmn̦ak rot kein rebõd rejjab pedped ioon m̦ool eo im remaroñ kõm̦m̦an bwe jen bõjrak jãn ad karejar ñan Jeova. Keememej ta eo jaar riiti ilo Jabõn Kõnnaan 24:10 (UBS)​—jenaaj juon eo em̦õjn̦o̦ ñe jej ebbweer. Kõn men in, jen kepaake Jeova ilo jar im kajjitõk bwe en jol̦o̦k ad bõd. (Ais. 1:18) Ñe Jeova ej loe bwe kwõj lukkuun bũrom̦õj im kwõj kate eok ñan kõm̦m̦an oktak, enaaj jol̦o̦k am̦ bõd. Kobal̦o̦k ippãn men in, kepaake em̦m̦aan ro rej lale eklejia. Renaaj kijenmej wõt ilo aer jipañ eok bwe en bar em̦m̦an kõtaan eo am̦ ippãn Jeova.​—Jem. 5:14, 15.

7. Etke jejjab aikuj ebbweer ñe epen ad kõm̦m̦ane men eo ejim̦we?

⁷ Jean-Luc, juon em̦m̦aan ej lale eklejia ilo France, ej ba ñan ro me epen aer anjo̦ ioon  m̦õjn̦o̦ ko aer: “Juon armej ewãnõk im̦aan mejãn Jeova, ejjab juon eo me ejjab kõm̦m̦an bõd ñan jidik, ijoke ej juon eo me ebũrom̦õj kõn bõd ko an im aolep iien ej ukel̦o̦k.” (Rom 7:21-25) Kõn men in, jab l̦õmn̦ak bwe ejjel̦o̦k tokjam̦ el̦aññe epen am̦ anjo̦ ioon m̦õjn̦o̦ eo am̦. Keememej bwe ejjel̦o̦k juon iaad emaroñ wãnõk im̦aan mejãn Anij. Kõj aolep im aikuji jouj eo an Anij el̦ap, ikijjeen katok in mour eo an Nejin.​—Eps. 1:7; 1 Jon 4:10.

8. Ñe jej ebbweer, wõn ro jemaroñ kepaake er?

⁸ Jemaroñ kepaake ro jeid im jatid​—ro nukũd ilo tõmak—​bwe ren kõkajoore kõj! Remaroñ roñjake ad kõnnaan ñe jej aikuji juon ñan kõnono ippãn im remaroñ letok naanin kaenõm̦m̦an ko me remaroñ kõkajoor kõj. (JK. 12:25; 1 Tes. 5:14) Joy, juon jeid im jatid kõrã ilo Nigeria me ear kate ñan anjo̦ ioon an ebbweer, ej ba: “In kar pãd ia ñe en kar jab ro jeiũ im jatũ? Ro jeiũ im jatũ rej kein kam̦ool bwe Jeova ej uwaaki jar ko aõ. Ij bareinwõt katak jãn er kilen bar kõkajoore ro rebbweer.” Bõtab, jej aikuj keememej bwe ejjab aolep iien ro jeid im jatid rejel̦ã el̦aññe jej aikuj bõk kõkajoor. Kõn men in, jej aikuj make kepaake juon eo erũtto ilo tõmak im kwal̦o̦k ñane bwe jej aikuj jipañ.

9. Ewi wãween an Sam 41:3 im 94:19 kõkajoore kõj?

⁹ Reilo̦k ñan Jeova bwe en kõkajoore eok. Ñe ejjab em̦m̦an ad mour, el̦aptata ñe eto ad nañinmej, jemaroñ lo bwe epen ad bõk l̦õmn̦ak ko rejim̦we. Meñe Jeova ejjab kãjmour kõj kiiõ jãn nañinmej ko ad ilo juon wãween ekabwilõñlõñ, ak ej kaenõm̦m̦an kõj im letok kajoor eo jej aikuji bwe jen kijenmej wõt. (Riit Sam 41:3; 94:19, UBS.) Ñan waanjoñak, emaroñ kõm̦akũt juon iaan rũttõmak ro m̦õttad ñan jipañ kõj ilo iien ko jej aikuj jipañ ñan kõm̦m̦ani jerbal ko ilo m̦weo im̦õd, ak ñan kaikujkuj. Emaroñ bar kõm̦akũt ro jeid im jatid ñan jar ippãd. Ak emaroñ kõm̦m̦an bwe jen keememej naanin kaenõm̦m̦an ko jãn Naan eo an, ãinwõt, kõjatdikdik eo em̦m̦an kõn ad naaj bõk juon mour eweeppãn me ejjel̦o̦k nañinmej im metak, ilo naaj lal̦ eo ekããl me ej itok wõt.​—Rom 15:4.

10. Etke Isang ear jab wõnm̦aanl̦o̦k wõt im ebbweer ãlikin kar ãkjitõn eo an?

¹⁰ Isang, eo ej jokwe ilo Nigeria, ekar jorrããn jãn juon ãkjitõn. Taktõ eo ear ba ñane bwe eban bar etetal. Isang ej ba: “Ear lukkuun rup bũruõ im iar ebbweer.” Bõtab ekar ke wõnm̦aanl̦o̦k wõt im ebbweer? Jaab! Ta eo ekar jipañe? Isang ej kõmel̦el̦e im ba: “Kõm̦ro kõrã eo pãleõ kar jab bõjrak jãn am̦ro jar ñan Jeova im katak kõn Naan eo an. Kõm̦ro ar jek ippemro make ñan l̦õmn̦ak wõt kõn jeraam̦m̦an ko ewõr ippemro, ekoba kõjatdikdik eo ñan mour ilo lal̦ eo ekããl an Anij.”

11. Ewi wãween an kar Cindy lañlõñ wõt meñe ekar bõk juon nañinmej ekauwõtata?

¹¹ Cindy, eo ej jokwe ilo Mexico, ear bõk juon nañinmej ekauwõtata. Ta eo ekar kõm̦m̦ane ñan jipañe kijenmej wõt? Ilo tõre ko me ekõn etal ñan aujpitõl̦ im lol̦o̦k taktõ kõn nañinmej eo an, ekar kõm̦m̦an an mejãnkajjik ñan kwal̦o̦k naan ñan juon armej kajjojo raan. Ej je im ba: “Ilo aõ kar ãindein, men in ekar jipañ eõ ñan l̦õmn̦ak kõn ro jet, ijello̦kun aõ l̦õmn̦ak wõt kõn aõ naaj m̦wijm̦wij, aõ metak, im an jab em̦m̦an aõ mour. Eñin men eo ikõn kõm̦m̦ane: Ñe ij bwebwenato ippãn taktõ ro ak nõõj ro, ekkã aõ kajjitõk ippãer kõn baam̦le ko aer. Innem, ij kajjitõk etke rar kããlõt juon jerbal elukkuun pen. Ilo aõ kõm̦m̦ane men in, epidodo aõ jel̦ã ta eo imaroñ kõnono ippãer kake me emaroñ tõpar bũrueer. Jet rar ba bwe ejeja an juon ri-nañinmej kajjitõk ippãer, ‘Ejet am̦ mour?’ Im elõñ rar kam̦m̦oolol eõ kõn aõ kwal̦o̦k aõ  kea. Jet rar bar letok atõrej im nõm̦ba ko aer. Ilo kar iien in me ekar pen ñan ña, Jeova ear kõm̦m̦an bwe in lañlõñ, joñan, iar bar bwilõñ kõn joñan aõ kar lañlõñ!”​—JK. 15:15.

12-13. Ewi wãween an kar jet me renañinmej ak em̦õjn̦o̦ ãnbwinnier kar maroñ bõk kun̦aaer ilo jerbalin kwal̦o̦k naan, im ta tõprak ko rar loi?

¹² Ro me renañinmej ak em̦õjn̦o̦ ãnbwinnier remaroñ ebbweer kõnke ewõr joñan men ko remaroñ kõm̦m̦ani ilo aer kwal̦o̦k naan. Meñe ãindein, ak elõñ rar lo wãween ko jet me remaroñ kõm̦m̦ani ñan kwal̦o̦k naan. Ilo Amedka, juon jeid im jatid kõrã etan Laurel ear aikuj in babu wõt ilowaan juon machine me ej jipañe ñan menono, ium̦win 37 iiõ ko! Ekar wõr an nañinmej in kããnjer, ear m̦wijm̦wij jejjo alen, im ekar wõr jet an nañinmej ilo kilin. Meñe ekar iioon wãween kein rekanooj in pen, ak ear jab ikõñ wõt. Ear kwal̦o̦k naan ñan nõõj ro im ri-jerbal ro me rekõn etal ñan m̦weo im̦õn im jipañe. Ta eo ekar wal̦o̦k itok jãn an kar kõm̦m̦ane men in? Ear jipañ enañin 17 armej ro ñan katak im bõk jel̦ãl̦o̦kjen̦ eo ejim̦we kõn Baibõl̦ eo! *

¹³ Richard, juon em̦m̦aan ej lale eklejia ilo France, ewõr juon an l̦õmn̦ak me enaaj jipañ ro rejjab maroñ etal jãn m̦õko im̦weer, ak rej jokwe ilo im̦õn ri-nañinmej, ej ba: “Em̦m̦an ñe ej wõr juon jikin aer likũti bok ko ad n̦a ie bwe armej ro ren maroñ loi. Kein illik bok kein, renaaj kõm̦m̦an an armej ro kõn̦aan jel̦ã im kõm̦m̦an aer jino bwebwenato ippãer. Men in emaroñ kõketak rein jeid im jatid rejitõnbõro me rejjab maroñ kiiõ kwal̦o̦k naan jãn em̦ ñan em̦.” Ro me rejjab maroñ etal jãn m̦õko im̦weer remaroñ bar bõk kun̦aaer ilo jerbalin kwal̦o̦k naan ikijjeen aer jeje lõta im call ilo talboon.

14. Ta joñak eo elukkuun em̦m̦an me Kiiñ Devid ear likũt ñan kõj?

¹⁴ Kõnke ewõr joñan maroñ ko ippãd itok jãn ad rũttol̦o̦k, nana ad ãjmour, ak men ko jet, men in emaroñ kõm̦m̦an bwe jen jab maroñ bõk juon eddo ak jeraam̦m̦an ilo eklejia eo ak doulul in. Ñe jej iioon wãween in, jemaroñ katak jãn joñak eo an Kiiñ Devid. Ke kar ba ñane bwe kar jab kããlõte ñan kalõke tampel̦ eo an Anij​—juon men me Devid ear lukkuun kõn̦aan kõm̦m̦ane—​ear kwal̦o̦k an lukkuun rejetake eo me Anij ear jitõñe bwe en kõm̦m̦ane jerbal in. Joñan, ear lukkuun l̦ap an Devid jabawõt ñan jerbal eo. Eñin ej juon joñak elukkuun em̦m̦an bwe jen anõke!​—2 Sa. 7:12, 13; 1 Kro. 29:1, 3-5, UBS.

15. Ewi wãween an kar Hugues anjo̦ ioon an ebbweer?

¹⁵ Kõn an kar juon jeid im jatid em̦m̦aan jãn France me etan in Hugues nañinmej, ear aikuj bõjrak jãn an jerbal ãinwõt juon eo ej lale  eklejia, joñan, ear jab maroñ bar kõm̦m̦ani jerbal dikdik ko ilowaan m̦weo im̦õn. Ej je im ba: “Ilo jinoin, iar l̦õmn̦ak bwe ejjel̦o̦k tokja im iar lukkuun ebbweer . Bõtab ãlikin jet iien, iar maroñ lo aorõkin aõ aikuj kile joñan maroñ ko ippa, im iar lo m̦õn̦õn̦õ ilo aõ karejar ñan Jeova ekkar ñan joñan maroñ ko aõ. Em̦õj aõ jek ippa make ñan jab ebbweer ak bõjrak. Im ãinwõt Gideon im em̦m̦aan ro doon me kar jilubukwi uwaaer​—me er aolep im kar lukkuun m̦õk—​ña bareinwõt, iban bõjrak jãn aõ kate wõt eõ!”​—Eka. 8:4, UBS.

16. Ta eo jemaroñ katak jãn joñak eo an enjel̦ ro?

¹⁶ Enjel̦ ro retiljek rej juon joñak em̦m̦an ñan kõj. Ilo kar iien eo Kiiñ Ehab ear tõl, Jeova ear kajjitõk ippãn enjel̦ ro bwe ren kwal̦o̦k l̦õmn̦ak ko aer kõn kilen aer naaj m̦on̦e kiiñ in enana. Jet iaan enjel̦ ro rar uwaak im kwal̦o̦k l̦õmn̦ak ko aer. Bõtab, Anij ear kããlõt juon enjel̦ im ba ñane bwe enaaj tõprak l̦õmn̦ak eo an me ear kwal̦o̦ke. (1 Kñ. 22:19-22) Enjel̦ ro jet me retiljek rar ke oktak im ebbweer, ak bõlen l̦õmn̦ak im ba, ‘Etke iar tõn kwal̦o̦k l̦õmn̦ak ko aõ?’ Ejjel̦o̦k unin ad naaj tõmak bwe eñin men eo rar l̦õmn̦ake. El̦ap an ettã bũruon enjel̦ ro im rekõn̦aan bwe aolep nõbar ren etal ñan Jeova.​—Eka. 13:16-18; Rev. 19:10.

17. Ta eo jej aikuj in kõm̦m̦ane ñe enana ad mour kõnke ewõr jet eddo ko ilo jerbal eo ad ñan Jeova me jejjab maroñ bõke?

¹⁷ Jen keememej wõt jeraam̦m̦an eo ewõr ippãd ñan jutak kõn etan Anij im kwal̦o̦k kõn Aelõñ eo an. Emaroñ wõr juon ad eddo ak jemaroñ luuji juon eddo, bõtab eddo in ejjab men eo in me ej kõm̦m̦an bwe jen aorõk ippãn Anij. Ijoke, ñe jej kwal̦o̦k etta bõro im jel̦ã joñan maroñ ko ad, eñin ej men eo me enaaj kõm̦m̦an an Jeova im ro jeid im jatid lukkuun yokwe kõj. Kõn men in, akwel̦ap ñan Jeova bwe en jipañ eok ñan dãpij wõt am̦ ettã bõro im jel̦ã joñan maroñ ko am̦. Kõl̦mãnl̦o̦kjen̦ kõn elõñ iaan joñak ko rem̦m̦an an ro me rar kwal̦o̦k kadkad kein ilo Naan eo an. M̦õn̦õn̦õ in jipañ ro jeim im jatim ilo jabdewõt wãween ko.​—Sam 138:6; 1 Pit. 5:5.

18-19. Ewi wãween am̦ maroñ lañlõñ wõt ilo jerbalin kwal̦o̦k naan meñe kwõl̦ak lale armej ro ilo teretore eo am̦ rejjab kõn̦aan roñjake?

¹⁸ Ewõr ke iien kwõj jino ebbweer kõnke kwõl̦ak lale armej ro ilo teretore eo am̦ rejjab kõn̦aan roñjake ak kõnke jejjo wõt armej kwõj lo er ilo m̦õko im̦weer? Ñe men in ej wal̦o̦k, ta  eo jej aikuj in kõm̦m̦ane ñan dãpij wõt ak kal̦apl̦o̦k ad lañlõñ? Em̦õj kõllaajrak jet wãween ko remaroñ jipañ kõj ilo bo̦o̦k eo etan “ Wãween ko ñan Jipañ Eok Kal̦apl̦o̦k Am̦ Lañlõñ ilo Jerbalin Kwal̦o̦k Naan.” Ebar aorõk ñan bõk l̦õmn̦ak eo ejim̦we kõn jerbalin kwal̦o̦k naan. Men in ej kitibuj ta?

¹⁹ L̦õmn̦ake wõt am̦ kwal̦o̦k kõn ãt eo etan Anij im kõn Aelõñ eo an. Jesus ear kaalikkar bwe ewõr jejjo wõt armej renaaj lo ial̦ eo me ej tõll̦o̦k ñan mour. (Matu 7:13, 14) Ñe jej kwal̦o̦k naan, ewõr ippãd jeraam̦m̦an eo ñan jerbal ippãn Jeova, Jesus, im enjel̦ ro. (Matu 28:19, 20; 1 Kor. 3:9; Rev. 14:6, 7) Jeova ej karuwaakl̦o̦k ñan ippãn ro me rekõn̦aan karejar ñane. (Jon 6:44) Innem ñe juon armej ejjab kõn̦aan roñjake ennaan eo jej kwal̦o̦k ñane ilo jinoin, eokwe emaroñ naaj m̦õn̦õn̦õ in roñjake ilo bar juon iien jej jepl̦aak.

20. Ta eo Jeremaia 20:8, 9 ej katakin kõj ikijjeen ad anjo̦ ioon ebbweer?

²⁰ Elõñ men ko jemaroñ katak jãn ri-kanaan eo Jeremaia. Kar lel̦o̦k ñane juon teretore me ekanooj in kar pen jerbale. Armej ro rar kajjirere kake im ettõñ kake “raan otemjej.” (Riit Jeremaia 20:8, 9.) Ekar oktak im l̦ap an ebbweer, joñan, ear kõn̦aan bõjrak jãn an kwal̦o̦k naan. Bõtab ear jab bõjrak. Etke? Kõnke ‘Naan eo an Jeova’ ear ãinwõt juon kijeek me ej pãd ilowaan Jeremaia, im ear jab maroñ dãpiji! Eñin men eo ej bar wal̦o̦k ñan kõj ñe jej koobrak l̦õmn̦ak ko ad im bũruod kõn Naanin Anij. Im eñin ej bar juon un unin ad aikuj katak Baibõl̦ kajjojo raan im kõl̦mãnl̦o̦kjen̦ kake. Ilo ad ãindein, enaaj l̦apl̦o̦k wõt ad maroñ lañlõñ, im enaaj l̦apl̦o̦k ad maroñ lo tõprak ilo jerbalin kwal̦o̦k naan.​—Jrm. 15:16.

21. Ewi wãween ad maroñ anjo̦ ioon jabdewõt men me ej kabbweer kõj?

²¹ Deborah, eo me kar kwal̦o̦k kake m̦oktal̦o̦k, ej ba: “Ebbweer ej juon iaan kein jerbal ko rekajoor an Setan me emaroñ kõjerbale.” Meñe ãindein, ak Jeova Anij el̦apl̦o̦k an kajoor jãn Setan im aolep kein jerbal ko an. Kõn men in, ñe kwõj ebbweer kõn jabdewõt men, akwel̦ap ñan Jeova bwe en jipañ eok. Enaaj jipañ eok kijenmej kõn likjab im m̦õjn̦o̦ ko am̦. Enaaj jipañ eok ilo am̦ iioon nañinmej. Enaaj jipañ eok ñan bõk wõt l̦õmn̦ak eo ejim̦we ikijjeen eddo ak jerbal ko ilo doulul eo an. Im enaaj jipañ eok ñan bõk wõt l̦õmn̦ak eo ejim̦we kõn jerbalin kwal̦o̦k naan eo am̦. Kõn men in, kwõn lutõkl̦o̦k bũruom̦ ñan Jemãdwõj ilañ kõn men ko kwõj inepata kaki. Im ikijjeen jipañ eo an, kwõmaroñ anjo̦ ioon am̦ ebbweer.