1. ¿Tlen techpanoua ijkuak timoyolkokouaj?

TINOCHTIN titlajyouiaj uan timochijchikauaj para titlaxikoskej. Uan okachi oui titlaxikoskej tla timoyolkokouaj. Ijkuak ikaj moyolkokoua uelis kimachilis amitlaj ipati. Proverbios 24:10 kijtoua: “Tla timoyolkokoua ijkuak timotekipachoua, amo tiyolchikajtos”.

2. (1) ¿Tlen uelis kichiuas ma timoyolkokokan? (2) ¿Tlen timomachtiskej axkan?

² Onka miak tlamantli tlen uelis kichiuas ma timoyolkokokan. Xamo porque itlaj amo kuali otikchijkej, itlaj amo ueli tikchiuaj noso timokokouaj. Xamo timoyolkokouaj porque amo okachi ueli titlapaleuiaj itech ialtepe Jehová noso porque titetlapouiaj kanin amo kinekij techkakiskej. Axkan timomachtiskej tlen uelis techpaleuis ijkuak timoyolkokouaj.

3. ¿Tlen techpaleuis amo san ma tikitakan tlen amo kuali tikchiuaj?

³ Tla san tikilnamiktokej ijkuak timotlapololtiaj uan tlen amo kuali tikchiuaj, san timoyolkokojtoskej. Uan xamo timokuayejyekoskej sapanoua titlajtlakolejkej, ik non, Jehová amo kinekis ma tiyetokan itech xochitlali. Pero tla ijkon timokuayejyekouaj okachi titlajyouiskej. ¿Tlen techpaleuis amo san ma tikitakan tlen amo kuali tikchiuaj? San ye Jesucristo amo okatka tlajtlakole pero tejuan kema (Rom. 3:23). Jehová amo san kita  tlen amo kuali tikchiuaj nion techiluia amo keman ma timotlapololtikan. Ye sapanoua techtlasojtla uan amo san niman kualani. Ye kita ken timochijchikauaj para tiktlakamatiskej uan noijki kimati oui tikitaj tikchiuaskej tlen moneki uan ualeua noijki timoyolkokouaj uan kineki techpaleuis (Rom. 7:18, 19).

4, 5. Ijkon ken kijtoua 1 Juan 3:19, 20, TNM, ¿tlen okinpaleui ome tokniuan tlen sapanoua omoyolkokouayaj?

⁴ Ma tikitakan tlen okinpanok Deborah uan María. * Ijkuak Deborah okatka tsikitsin ifamilia amo okitlasojtlayaj nion okiyolchikauayaj, ik non, amo kuali omomachiliaya uan omokuayejyekouaya sepa amitlaj ipati. Noijki ijkon okipanok María. Ifamilia san tlen tlamantli okiluiaya uan sapanoua okiyolkokouayaj. Uan maski satepan omoapolakti, okimachiliaya amo kinamiki ma kiluikan iTlaixpantijka Jehová.

⁵ Maski tokniuan ijkon omomachiliayaj, ok okitekichiuilijkej Jehová. ¿Tlen okinpaleui? Okitlatlaujtijkej Jehová ika nochi inyolo (Sal. 55:22). Okajsikamatkej toTajtsin Dios kimati tlen techpanoua uelis kichiuas ma timoyolkokokan. Ye noijki kita tlen kuali tikchiuaj maski tejuan amo tikitaj (xiktlajtolti 1 Juan 3:19, 20, TNM).

6. ¿Tlen uelis kichiuas akin oksepa kichiua tlen amo kuali?

⁶ Tla ikaj mochijchikaua para ayakmo kichiuas tlen amo kuali pero oksepa kichiua, xamo moyolkokoua. Timoyolkokouaj ijkuak titlajtlakolchiuaj (2 Cor. 7:10). Pero amo ma timokuayejyekokan nochipa san timotlapololtiaj uan Jehová amo keman techtlapojpoluis. Amo kuali ijkon ma timokuayejyekokan tlamo ayakmo tiktekichiuiliskej Jehová. Ma tikilnamiktokan tlen kijtoua Proverbios 24:10: tla timoyolkokouaj amitlaj tikchiuaskej. Okachi kuali ma tiktlatlaujtikan Jehová uan ma tikiluikan ma techtlapojpolui (Is. 1:18). Ye techtlapojpoluis porque kitas melauak otimoyolkopkej. Noijki ma timotlapouikan iuan tlayekankej uan yejuan uelis techpaleuiskej oksepa ma timouikakan iuan Jehová (Sant. 5:14, 15).

7. Tla oui tikitaj tikkauaskej itlaj tlen amo kuali, ¿tleka amo moneki timoyolkokoskej?

⁷ Se tokni tlayekanki tlen chanti Francia itoka Jean-Luc. Ye kinmiluia akinmej kinekij kikauaskej itlaj tlen amo kuali: “Jehová amo kita yolmelauak akin amo keman motlapololtia, ye kita  akin mochijchikaua kichiuas tlen kuali” (Rom. 7:21-25). Ik non, amo ma timokuayejyekokan amitlaj topati. Ma tikilnamiktokan tinochtin itlaj amo kuali tikchiuaj. Pero techpaleuia iuan ma timouikakan porque techtlasojtla uan noijki omotemakak topatka iKone (Efes. 1:7; 1 Juan 4:10).

8. Ijkuak monekis ikaj ma techpaleui, ¿akin uelis iuan timotlapouiskej?

⁸ Tokniuan uelis techyolchikauaskej. Yejuan techkakiskej ijkuak tiknekiskej itlaj tikijtoskej uan techyolseuiskej (Prov. 12:25; 1 Tes. 5:14). Se tokni tlen chanti Nigeria uan itoka Joy, sapanoua omoyolkokouaya, ye okijto: “Amo nitlaxikoskia tla amo nechpaleuiskiaj tokniuan. Ijkon nikita Jehová nechkaki. Non nechpaleuia noijki ma nikinyolchikaua akinmej moyolkokouaj”. Xamo tokniuan amo nochipa kitaskej kox moneki ikaj ma techyolchikaua. Ik non, moneki tikiluiskej se tokni tlen kipia chikauak itlaneltokilis ma techpaleui.

9. ¿Ken techyolchikaua tlen kijtoua Salmo 41:3 uan 94:19?

⁹ Ma tikiluikan Jehová ma techpaleui. Ijkuak timokokouaj oui tikitaj timoyolchikauaskej, okachi tla techiluiaj sapanoua timokokouaj. Axkan Jehová amo san niman techpajtis pero kema techyolseuis uan techyolchikauas para ma titlaxikokan (xiktlajtolti Salmo 41:3; 94:19). ¿Ken techpaleuia? Xamo kinyolinis sekimej tokniuan ma techtlakouitij noso ma techtlachipauitij. Noijki uelis kinyolinis touan ma motlatlaujtikan. Xamo techilnamiktiskej textos tlen techyolchikauaj, ken kanin kijtouaj ajsis tonal ijkuak ayakmo timokokoskej itech xochitlali (Rom. 15:4).

10. ¿TIen okipaleui tokni Isang ma tlaxiko?

¹⁰ Se tokni tlen itoka Isang uan chanti Nigeria, ayakmo ueli nejnemi porque okipanok se accidente. Akin tlapajtia okilui ayakmo keman nejnemis. Tokni okijto: “Sapanoua onimoyolkoko”. ¿Tlen okipaleui ma tlaxiko? Ye noijki okijto: “Nosiua uan ne nochipa tiktlatlaujtiaj Jehová uan timomachtiaj iTlajtol. Noijki otikijtojkej nochipa tiktlasojkamatiliskej porque tikpiaj miak tlamantli uan noijki tiktlasojkamatiliaj porque yokijto tiyetoskej itech xochitlali”.

11. ¿Tlen okipaleui Cindy ma yolpaki?

¹¹ Se tokni tlen itoka Cindy uan chanti México okiluijkej sapanoua omokokouaya uan uelis ixpoliuiskia. ¿Ken otlaxiko? Ijkuak omopajtijtoka noijki okijto mojmostla tetlapouiskia. Tokni okijto: “Non onechpaleui ma nikita ken nikinpaleuis oksekimej uan amo san ma nimokuayejyeko ken sapanoua onechkokouaya kanin onechchiuilijkej operación. Onikintlapouiaya akinmej tlapajtiaj uan enfermeros uan noijki onikintlajtlaniaya ken okatkaj infamilias. Noijki onikintlajtlaniaya tleka okipejpenkej non tekitl sapanoua oui. Ijkon onikmatiaya tlen kinpaktiskia kikakiskej. Miakej onechiluijkej ompa hospital amikaj okintlajtlaniaya ken okatkaj. Miakej onechtlasojkamatilijkej ijkuak onikintlajtlaniaya ken okatkaj. Sekimej onechmakakej innúmero para ma nikinnotsa. Onikmatiaya Jehová nechpaleuiskia ma nitlaxiko pero onimotlajtlachialti ijkuak onikitak noijki oniyolpakiaya” (Prov. 15:15).

12, 13. (1) ¿Ken tetlapouiaj tokniuan tlen mokokouaj noso yikipiaj miak xiuitl? (2) ¿Ken yokinpaleui ijkon kichiuaskej?

 ¹² Miakej tokniuan moyolkokouaj porque maski kinekiskiaj okachi kitekichiuiliskej Jehová, amo uelij porque mokokouaj noso yikipiaj miak xiuitl. Pero kitemouaj ken tetlapouiskej. Ompa Estados Unidos se tokni tlen itoka Laurel, okatka 37 xiuitl itech se máquina tlen okipaleui ma mijyoti. Noijki okipiaya cáncer uan okichiuiliayaj operaciones. Noijki okipiaya okseki kokolistli. Nochipa otetlapoui maski sapanoua omokokouaya. Okintlapouiaya enfermeros uan oksekimej tlen oyayaj ikalijtik uan okipaleuiayaj. Okinpaleui 17 ma mochiuakan iTlaixpantijkauan Jehová. *

¹³ Se tokni tlayekanki tlen itoka Richard uan chanti Francia, kijtoua tlen uelis kichiuaskej akinmej amo uelij kisaj noso katej kanin kinmaluiaj akinmej yikipiaj miak xiuitl. Tokni okijto: “Nikinmiluia tokniuan uelis kintlaliskej amatlajkuilolmej kanin uelis kinmitaskej oksekimej. Ijkuak sekimej ompa panouaj, kinekij kimatiskej tlen kijtouaj amatlajkuilolmej. Ijkon tokniuan tetlapouiaj uan moyolchikauaj maski amo ueli tetlapouitiuij tekalijtik”. Akinmej amo ueli kisaj uelis ompa tetlapouiskej ika cartas noso ika teléfono.

14. ¿Ken uelis tikchiuaskej ken tekiua David?

¹⁴ Xamo tiknekiskiaj okachi titlapaleuiskej itech tlanechikol noso itech circuito. Pero xamo amo ueli ijkon tikchiuaj porque yitikpiaj miak xiuitl, timokokouaj noso techpanoua okseki tlamantli. Tla ijkon techpanoua, uelis techyolchikauas tlen okipanok tekiua David. Ye okinekiaya kichijchiuas iteokal Jehová pero ijkuak okimatki amo ye okipejpenki ma kichijchiua, okipaleui akin kichijchiuaskia. Okitemakak miak oro uan plata. ¡Tejuan noijki uelis titlapaleuiskej! (2 Sam. 7:12, 13; 1 Crón. 29:1, 3-5).

15. ¿Tlen okipaleui se tokni amo ma mosotlaua?

¹⁵ Se tokni tlen itoka Hugues uan chanti ompa Francia, ayakmo ueli otlapaleuiaya ken tlayekanki porque omokoko, nion ueli okichiuaya seki tlamantli tlen amo oui ompa ikalijtik. Ye okijto: “Achto sapanoua onimoyolkokouaya uan onikmachiliaya amitlaj nopati. Pero satepan oniyolpakik uan onikitak tlen uelis  nikchiuaskia para ok niktekichiuilijtoskia Jehová. Yonikijto amo nimosotlauas. Nikchiuas ken Gedeón uan 300 tlakamej: maski nimokokoua, nochipa nimochijchikajtos” (Juec. 8:4).

16. ¿Tlen techmachtia tlen okichijkej ángeles?

¹⁶ Ángeles noijki techmachtiaj seki tlamantli. Se tonal Jehová okinmilui ángeles ma kijtokan ken uelis kikajkayauaskiaj tekiua Acab. Miakej okiluijkej tlen kichiuaskiaj pero Jehová san se okipejpenki uan okilui ma kichiua tlen omokuayejyeko (1 Rey. 22:19-22). ¿Kox omoyolkokojkej uan okijtojkej: “San nenka tlen otikijtojkej?” Biblia amo kanaj kijtoua kox ijkon okijtojkej. Ángeles yolyamankej uan kinekij san Jehová ma kiueyichiuakan (Juec. 13:16-18; Apoc. 19:10).

17. ¿Tleka amo moneki timoyolkokoskej tla amo tikchiuaj seki tekitl itech ialtepe Jehová?

¹⁷ Ma tikilnamiktokan se ueyi tlateochiualistli tiyetoskej tiiTlaixpantijkauan Jehová uan titetlapouiskej tlen kichiuas iTekiuajkayo. Tekitl tlen tikchiuaj itech ialtepe Jehová amo nochipa tikpiaskej. Pero Jehová uan tokniuan okachi kipatioitaj ma tiyetokan tiyolyamankej. Ik non, ma tiktlatlaujtikan Jehová ma techpaleui para ijkon tikpiaskej toyelis. Ma timokuayejyekokan ken yiuejkika itekipanojkauan Jehová okatkaj yolyamankej uan ma tikitakan ken tikinpaleuiskej tokniuan (Sal. 138:6; 1 Ped. 5:5).

18, 19. ¿Tlen techpaleuis ma titetlapouikan ika pakilistli maski sekimej amo kinekiskej techkakiskej?

¹⁸ ¿Titetlapouiaj kanin miakej amo katej inkalijtik noso amo kinekij techkakiskej? Tla non techyolkokouaj, ¿tlen uelis tikchiuaskej para tiyolpakiskej? Ma tikitakan recuadro “ ¿Tlen techpaleuis okachi ma tiyolpakikan ijkuak titetlapouiaj?”. Ma tikilnamiktokan amo nochtin kinekiskej techkakiskej.

¹⁹ Ma tikilnamiktokan moneki tiktematiltiskej itoka toTajtsin Dios uan tlen kichiuas iTekiuajkayo. Jesús okijto amo miakej kichiuaskiaj ken ye (Mat. 7:13, 14). Ma tikilnamiktokan ijkuak titetlapouiaj tikpaleuiaj Jehová, Jesús uan ángeles (Mat. 28:19, 20; 1 Cor. 3:9; Apoc. 14:6, 7). Noijki ma tikilnamiktokan Jehová kinyoltilana akinmej kinekij kitekichiuiliskej (Juan 6:44). Ik non, xamo ikaj  amo kinekis techkakis pero xamo satepan kinekis.

20. Ijkon ken kijtoua Jeremías 20:8, 9, ¿tlen techpaleuis amo ma timosotlauakan?

²⁰ Uelis tikchiuaskej ken okichi profeta Jeremías. Ye otetlapoui kanin amo okinekiayaj kikakiskej. Miakej nochipa okipinauiayaj uan okiuijuikaltiayaj (xiktlajtolti Jeremías 20:8, 9). Sapanoua omoyolkoko uan ayakmo okinekiaya tetlapouis. Pero ok otetlapoui, ¿tleka? Ye okijto iTlajtol toTajtsin Dios yetoskia ken se tlitl tlen amo uelis kitlatiskia. Noijki ijkon techpanos tla timomachtiaj iTlajtol toTajtsin Dios. Ik non, mojmostla ma timomachtikan uan itech ma timokuayejyekokan. Ijkon okachi tiyolpakiskej ijkuak titetlapouiskej uan xamo miakej kinekiskej techkakiskej (Jer. 15:16).

21. ¿Tlen techpaleuis ma timoyolchikauakan?

²¹ Tokni tlen itoka Deborah noijki okijto: “Satanás kineki ma timoyolkokojtokan”. Pero Jehová okachi chikauak amo ken Satanás uan nochi tlen kitekitiltia. Ik non, ijkuak timoyolkokouaj ma tikiluikan Jehová ken timomachiliaj uan ma tikiluikan ma techpaleui. Ye techpaleuis ma titlaxikokan uan ma tikkauakan tlen amo kuali otikchiuayaj. Techpaleuis ijkuak timokokoskej, noijki techpaleuis ma tikitakan tekitl ken moneki itech tlanechikol uan techpaleuis amo ma timoyolkokokan ijkuak oksekimej amo kinekiskej techkakiskej. Jehová nochipa techpaleuis para ma timoyolchikauakan.