1. Hadia lua-luania khöda na tarasoi waʼide-ide dödö?

OYA gabula dödö nitaögöda ero maʼökhö, ba taforege sibai ba wangasiwai abula dödöda andrö. Hizaʼi, tola itugu abua khöda ba wamalua daʼö na tarasoi waʼide-ide dödö. Börö daʼö, moguna tatörö tödöda wa tola taya waʼomuso dödöda ibeʼe faʼide-ide dödö, ba tawaʼö wa niha si lö eluaha ita. Imane ba Gamaedola 24:10, ”Na hulö zi lö döla-döla ndraʼugö, na baŵa wamakao, ba si lö boto waʼabölöu.” Na so khöda waʼide-ide dödö, tola ahori waʼabölöda irege abua khöda ba wangasiwai abula dödö salua ba waʼaurida.

2. Hadia manö mbörö wa tola tarasoi waʼide-ide dödö, ba hadia nitutunöda ba artikel daʼa?

² Oya mbörö wa tola tarasoi waʼide-ide dödö. Duma-dumania, tola ide-ide dödöda na taʼokhögö lala wangera-ngera si lö sökhi sanandrösa ba waʼaurida samösa börö me no irai tafalua zala mazui börö wökhö si göna yaʼita. Baero daʼö, tola göi ide-ide dödöda na lö tebeʼe khöda halöwö somasi ita ba organisasi, mazui börö me hulö lö adöni dödö niha ba duria nifaʼemada. Ba artikel daʼa, tatutunö hewisa enaʼö tola talawa waʼide-ide dödö.

3. Hadia zi tola manolo yaʼita na lö aetu itahi-tahigö ita tödöda ba taʼokhögö lala wangera-ngera si lö sökhi sanandrösa ba waʼaurida samösa?

³ Börö me niha si lö moʼahonoa ita, oya sibai zoʼamböta ba waʼaurida ba asese tafalua zala. Na lö khöda fangelama, tola manö lö aetu itahi-tahigö ita tödöda, ba tawaʼö wa si lö eluaha waʼaurida. Lua-luania, tola manö tawaʼö tödöda wa lö omasi Lowalangi Yehowa na auri ita ba gulidanö si bohou. Tola möi famaʼalada lala wangera-ngera simane daʼö. Börö daʼö, hadia lala wangera-ngera sinangea taʼokhögö? Iwaʼö Sura Niʼamoniʼö wa ”no dozi mamazökhi horö” fefu niha. (Rom. 3:23) Hizaʼi, lö iʼosambuaʼö  dödönia Lowalangi Yehowa ba zala nifaluada mazui itötöna enaʼö moʼahonoa ita. Yaʼia andrö no Ama sebua faʼomasi ba faʼahakhö dödö, somasi manolo yaʼita. Aboto ba dödönia wa taforege wamalua satulö, ba talawa lala wangera-ngera si lö sökhi sanandrösa ba waʼaurida samösa. Omasi itolo ita Yehowa ba wamalua fefu daʼö.​—Rom. 7:18, 19.

4-5. Simane nisura ba 1 Yohane 3:19, 20, hadia zanolo talifusöda ira alawe si darua andrö ba wolawa faʼide-ide dödö?

⁴ Nehegö zi no irai alua khö ndra talifusöda ira alawe sotöi Deborah hegöi Maria. * Me ide-ide nasa Deborah, asese laʼailasi ia ira ösi nomonia. Lö göi asese lasuno ia. Lua-luania, me no ebua-bua Deborah, iʼokhögö lala wangera-ngera si lö sökhi ba wamaigi faʼaurinia samösa. Ba ginötö ifalua zala side-ide, iʼanemaiʼö iwaʼö tödönia wa tebai ifalua fefu hadia ia ba lala si sökhi. Simane daʼö göi zalua khö Maria. Asese laʼailasi ia ira ösi nomonia irege irasoi wa si lö eluaha waʼaurinia. Hewaʼae na no aboto ba dödönia zindruhu, iwaʼö tödönia wa tenga sinangea tobali Samaduhuʼö Yehowa ia.

⁵ Hizaʼi, lö laböhöli wamosumange Yehowa ira talifusöda si darua andrö. Hadia zanolo yaʼira? Mangandrö ira khö Yehowa ba latouʼö khönia nösi dödöra. (Zin. 55:23) Aboto ba dödöra wa iʼila Amada sebua faʼomasi hadia nirasoi nono mbanuania. Iʼila Yehowa wa tola manö tarasoi wa si lö eluaha waʼaurida börö zi no irai alua khöda ba zilalö. Anehe göi ia mbua-bua si sökhi niʼokhögöda, hewaʼae na lö taʼila wa no taʼokhögö daʼö.​—Baso 1 Yohane 3:19, 20.

6. Hadia zi tola manö tarasoi na ifuli tafalua gamuata si lö sökhi si toʼölö tafalua ba zilalö?

⁶ Niha samorege ba wamöhöli amuata si lö sökhi sasese ifalua, tola manö irasoi waʼide-ide dödö na ifuli ifalua gamuata daʼö. Sindruhu sa wa itegu-tegu ita tödöda na no aefa tafalua zala. (2 Kor. 7:10) Hizaʼi, lö moguna itahi-tahigö manö ita tödöda, ba tamane wangumaʼö: ’Si lö eluaha saʼae waʼaurigu andre. Hasambalö wa lö iʼefaʼö zalagu Yehowa.’ Lö tefaudu lala wangera-ngera simane daʼö, ba tola möi fangawuwuda irege taböhöli wamosumange Yehowa. Törö tödöu wehede nisura ba Gamaedola 24:10, wa lö khöda faʼabölö na tarasoi waʼide-ide dödö. Börö daʼö, na ifuli zui öfalua gamuata si lö sökhi, tutunö gabula dödömö andrö khö Yehowa. Angandrö khönia ba andrö enaʼö iʼefaʼö zalamö. (Yes. 1:18) Na sindruhu-ndruhu mangesa dödömö ba öforege ba wombulöʼö amuatamö, hasambalö iʼefaʼö zalamö Yehowa. Baero daʼö, andrö wanolo moroi khö ndra satua sokubaloi. Si fao faʼebolo dödö, hasambalö latolo ndraʼugö enaʼö ifuli aro ba wamati.​—Yak. 5:14, 15.

7. Hana wa lö moguna ide-ide dödöda na abua khöda wamalua satulö?

 ⁷ Si toʼölönia, imane si samösa satua sokubaloi si toröi ba Prancis sotöi Jean-Luc, ba niha samorege ba wolawa falömoʼahonoara samösa, ”Tola atulö zi samösa niha föna Yehowa, tenga börö me lö irai ifalua zala, hizaʼi börö me mangesa ia ba zala si no ifalua ba iforege ba wombulöʼö amuatania.” (Rom. 7:21-25) Börö daʼö, na öforege iadaʼa ba wolawa falömoʼahonoamö samösa, böi irai öwaʼö tödömö wa lö eluaha waʼaurimö. Törö tödömö wa niha si lö moʼahonoa fefu ita ba asese tafalua zala. Moguna khöda fefu waʼasökhi dödö Yehowa sahöli-höli dödö niforomaʼönia me ibeʼe Yesu tobali höli.​—Ef. 1:7; 1 Yoh. 4:10.

8. Haniha zi tola mamarou tödöda na tarasoi waʼide-ide dödö?

⁸ Tola lafarou dödöda ira talifusöda ba mbanua niha Keriso! Lafondrondrongo ita na omasi ita tatutunö nösi dödöda, ba lafaʼema khöda wehede si möi famarou dödöda. (Gamd. 12:25; 1 Tes. 5:14) No irai irasoi waʼide-ide dödö talifusöda ira alawe sotöi Joy si toröi ba Nigeria. Imane wangumaʼö, ”Te lö khögu faʼanau gölö na lö fanolo moroi khö ndra talifusöda. Fanolo moroi khöra zangoromaʼö wa ifondrondrongo wangandrögu Yehowa. Tola göi ufahaʼö ndraʼo khöra ba wangabölöʼö niha tanö böʼö sorasoi faʼide-ide dödö.” Hizaʼi, moguna tatörö tödöda wa itaria lö laʼila ira talifusöda wa so khöda waʼide-ide dödö. Börö daʼö, te yaʼita zinangea mangondrasi talifusöda saro ba wamati, ba tafatunö khönia wa moguna khöda wanolo.

9. Hewisa wa tola möi fangabölöʼöda ngawua wehede si so ba Zinunö 41:4 hegöi 94:19?

⁹ Andrö wanolo moroi khö Yehowa. Tola manö abua khöda ba wangokhögö lala wangera-ngera si sökhi na tataögö waʼatebai mboto mazui no ara göna ita fökhö. Sindruhu sa, lö iʼogunaʼö dandra sahöli-höli dödö Yehowa ba wamadöhö yaʼita iadaʼa. Hizaʼi, tola irara dödöda ba ibeʼe khöda waʼabölö enaʼö anau gölöda. (Baso Zinunö 41:4; 94:19.) Duma-dumania, te ifarou dödö zi samösa talifusöda ba wamati ba wanolo yaʼita ba wamalua halöwö ba nomo mazui ba wowöli soguna. Te göi ifarou dödö dalifusöda ba wamati enaʼö fao ira khöda ba wangandrö. Mazui, tola manö itolo ita enaʼö ifuli itörö tödöda ngawalö zi möi fondrara dödö si so ba Daromalinia. Duma-dumania, tötönafö sanandrösa ba waʼauri soʼahonoa hegöi si lö fökhö ba gulidanö si bohou.​—Rom. 15:4.

10. Hewisa wa tola ilawa waʼide-ide dödönia Isang me no aefa göna ia sikho?

¹⁰ No irai göna sikho Isang si toröi ba Nigeria, irege tebai saʼae ifaliwa gahenia. Iwaʼö khönia doto wa tebai saʼae ilau mowaö-waö. Imane Isang, ”Abu sibai dödögu ba urasoi waʼafatö dödö.” Hizaʼi, tola ilawa waʼide-ide dödönia andrö. Hadia zanolo yaʼia? Imane wanutunö, ”Yaʼo hegöi foʼomogu, lö irai maböhöli wangandrö khö Yehowa ba mafahaʼö ndraʼaga ba Daromalinia. Maʼangerönusi göi ngawalö howu-howu si no matema, tefarahu ba daʼö dötönafö faʼauri ba gulidanö si bohou si no ifabuʼu Lowalangi.”

11. Hadia zanolo Cindy irege lö aetu irasoi waʼomuso dödö sagötö feʼasonia ba ruma saki?

¹¹ Lafatunö khö Cindy si toröi ba Meksiko wa so wökhö ba mbotonia si tola mamaʼala faʼaurinia. Hadia zanolo yaʼia enaʼö lö aetu iʼokhögö lala wangera-ngera si sökhi? Sagötö feʼasonia ba ruma saki, ihalö gangetula ba wamalua fanuriaigö ero maʼökhö. Imane Cindy, ”Börö me ufalua daʼö, tola uʼosambuaʼö dödögu ba wanolo niha tanö böʼö, ba lö uʼangeragö operasi sedöna mufalua khögu, mazui faʼafökhö hegöi falöʼahono dödö nirasoigu. Si toʼölönia, daʼa nifaluagu: Na fahuhuo ndraʼo khö doto mazui khö perawat, usofu hewisa duria nösi nomora. Aefa daʼö, usofu khöra hadia mbörö wa lafili halöwö sabua simane daʼa. Daʼö zanolo yaʼo ba wangalui tuho si tefaudu  khöra. So ösa doto hegöi perawat sangumaʼö khögu wa ha fawaraö so niha sofökhö sanofu hewisa duriara. Ato zangandrö saohagölö börö me uʼameʼegö tödö ira. So göi ösa zamatunö khögu hezo nahia waʼatoröira ba labeʼe khögu numero HP-ra. Sindruhu sa, no aboto ba dödögu iʼotarai ba wamobörö wa hasambalö itolo ndraʼo Yehowa ba wanaögö inötö si basaki andre. Hizaʼi, lö utötöna wa tola ibeʼe khögu waʼomuso dödö sebua simane daʼa!”​—Gamd. 15:15.

12-13. Hadia nifalua ndra talifusöda sofökhö mazui si no alawa döfi enaʼö tola manuriaigö ira, ba hadia mbuania?

¹² Tola manö larasoi waʼide-ide dödö ira talifusöda sofökhö mazui salawa döfi börö me tebai manuriaigö ira simane faʼoya zomasi dödöra. Hewaʼae simanö, ato ba gotaluara zanöndra lala si tefaudu ba wamalua fanuriaigö. Ba Amerika Serikat, so samösa dalifusöda ira alawe sotöi Laurel sangogunaʼö mesin sanolo yaʼia ba wohanu-hanu. No tefadölö ia bakha ba mesin daʼö ba zi 37 fakhe faʼara! Baero daʼö, no göi irai göna ia fökhö kanker, itörö ngawalö operasi sebua, ba itaögö wökhö guli si tebai mufadöhö. Hewaʼae na alua khönia fefu daʼö, lö irai iböhöli wanuriaigö. Manuriaigö ia khö ndra perawat hegöi ba niha sangondrasi omonia. Buania, so mato 17 waʼato niha si no itolo ba wangokhögö faʼaboto ba dödö sanandrösa khö Yehowa! *

¹³ So mene-mene si sökhi nibeʼe zi samösa satua sokubaloi sotöi Richard si toröi ba Prancis, khö ndra niha si tebai mondröi omora mazui si toröi ba panti jompo. Imane wangumaʼö, ”Ufarou ira enaʼö lafaʼoli ösa majalah hegöi bukuda ba nahia salio laʼila niha. Na lafalua daʼö, tola labörögö wahuhuosa ba niha sangila publikasida andrö. Börö me lafalua lala wanuriaigö simane daʼa, tola teʼabölöʼö ndra talifusöda si tebai möi manuriaigö misa ba nomo-omo.” Baero daʼö, ira sanuriaigö si tebai mondröi omora, tola göi lafalua wanuriaigö faoma sura mazui telefo.

14. Hadia duma-duma si sökhi si no iröi khöda Razo Dawido?

¹⁴ Tola manö lö tebeʼe khöda halöwö somasi ita ba organisasi börö waʼalawa ndröfida, fökhö, mazui tanö böʼönia. Na daʼö zalua khöda, tola tafahaʼö ita moroi ba duma-duma Razo Dawido. Omasi sibai ia wamazökhi osali Lowalangi. Hizaʼi, mufatunö khönia wa tenga yaʼia nifili ba wamalua halöwö daʼö. Hewaʼae simanö, sindruhu-ndruhu ituhini niha nifili Lowalangi ba wamalua halöwö andrö. Oya sibai ganaʼa hegöi firö nibeʼenia ba wolului halöwö famazökhi osali Lowalangi. Sindruhu-ndruhu wa no iröi khöda duma-duma si sökhi Dawido!​—2 Zam. 7:12, 13; 1 Nga. 29:1, 3-5.

15. Hadia nifalua Hugues ba wolawa faʼide-ide dödönia?

 ¹⁵ Börö me so wökhö nitaögö dalifusöda ira matua sotöi Hugues si toröi ba Prancis, tebai saʼae mangai halöwö ia tobali satua sokubaloi. Tebai göi ifalua halöwö sigide-ide ba nomo. Imane Hugues, ”Ba wamobörö, urasoi wa si lö eluaha waʼaurigu ba ide-ide sibai dödögu. Hizaʼi ba gafuriata, aboto ba dödögu wa lö moguna uʼangera-ngeragö manö ngawalö zi tebai ufalua. Me no ubulöʼö lala wangera-ngeragu, awena tola uʼosambuaʼö dödögu ba halöwö si tola ufalua khö Yehowa irege tola urasoi waʼomuso dödö. Uhalö gangetula enaʼö lö awuwu ndraʼo. Omasido uʼoʼö duma-duma Gideono hegöi saradadunia si-300, si lö mamöhöli fasuwö hewaʼae na marase ira.”​—Zangu. 8:4.

16. Hadia wamahaʼö si tola tahalö moroi ba duma-duma nibeʼe ndra malaʼika?

¹⁶ No labeʼe khöda duma-duma si sökhi ira malaʼika si lö faröi. No irai iʼandrö mbua gera-era ndra malaʼika Yehowa sanandrösa ba wolimo Razo Ahabi si lö sökhi. So ösa ndra malaʼika sameʼe bua gera-erara. Aefa daʼö, ifili Yehowa mbua gera-era nibeʼe zi samösa malaʼika, ba iwaʼö wa hasambalö mofozu mbua gera-era nibeʼenia andrö. (1 Raz. 22:19-22) Hadia ide-ide dödö ndra malaʼika tanö böʼö, ba lawaʼö tödöra, ’Hana wa uhori-horigö ginötögu ba wameʼe bua gera-eragu?’ Tatu manö löʼö. Laʼokhögö wangide-ngideʼö ira malaʼika andrö fefu, ba omasi ira na Yehowa nifosumange.​—Zangu. 13:16-18; Fam. 19:10.

17. Hadia zinangea tafalua na tarasoi waʼide-ide dödö börö me lö tebeʼe khöda halöwö somasi ita?

¹⁷ Törö tödöu wa töi si sökhi fondrege zi tohude niʼokhögöda, yaʼia daʼö tobali Samaduhuʼö Yehowa hegöi ba wanuriaigö turia sanandrösa ba Wamatörö Lowalangi. Tola manö tebeʼe mazui aheta khöda halöwö ba wamati. Ba törö tödöu wa tenga daʼö zotatugöi hawaʼebua waʼomasi Yehowa khöda. Iʼomasiʼö ita Yehowa hegöi ira talifusöda börö me taʼokhögö wangide-ngideʼö. Börö daʼö, andrö wanolo moroi khö Yehowa enaʼö lö tebulö öʼokhögö wangide-ngideʼö. Angerönusi duma-duma nono mbanua Yehowa sangokhögö fangide-ngideʼö, si no musura ba Zura Niʼamoniʼö. Baero daʼö, forege ba wamalua halöwö soguna khö ndra talifusöda, ba lala si tola öfalua.​—Zin. 138:6; 1 Fet. 5:5.

18-19. Na lö omasi niha ba wamondrondrongo turia nifaʼemada, hadia zanolo yaʼita enaʼö lö tebulö taʼokhögö waʼomuso dödö?

¹⁸ Hadia örasoi waʼide-ide dödö na lö adöni dödö niha si so ba nahiamö wanuriaigö ba  wamondrondrongo turia nifaʼemamö mazui asese lö hadöi yaʼira ba nomo? Na alua khöda zimane daʼö, hadia zi tola tafalua enaʼö lö tebulö tarasoi waʼomuso dödö mazui itugu tedou waʼomuso dödöda? So ösa mene-mene si sökhi ba kotak ” Lala Enaʼö Itugu Omuso Dödöda ba Wamalua Fanuriaigö”. Moguna göi taʼokhögö lala wangera-ngera si tefaudu sanandrösa ba halöwö fanuriaigö. Hadia geluahania?

¹⁹ Törö tödöu wa ohitö dödöda si oföna yaʼia daʼö ba wanuriaigö töi Lowalangi hegöi Famatörönia. No ihaogö itutunö Yesu wa ha maʼifu niha si tobali soloʼö khönia. (Mat. 7:13, 14) Baero daʼö, na tafalua halöwö fanuriaigö, no taʼokhögö döi si sökhi me tola falulu fohalöwö ita khö Yehowa, Yesu, hegöi ira malaʼika. (Mat. 28:19, 20; 1 Kor. 3:9; Fam. 14:6, 7) Yehowa zondröni niha somasi mamosumange yaʼia soroi ba dödö. (Yoh. 6:44) Börö daʼö, hewaʼae na lö adöni dödö zi samösa niha ba duria nifaʼemada ba wamobörö, tola manö omasi ia ba wamondrondrongo yaʼita na tafuli talau manuriaigö khönia.

20. Simane nitutunö ba Yeremia 20:8, 9, hewisa lalada ba wolawa faʼide-ide dödö?

²⁰ Oya wamahaʼö si tola tahalö moroi ba duma-duma zamaʼeleʼö sotöi Yeremia. Lö omasi niha nifalukhaisi Yeremia ba wanemaʼö turia nifaʼemania. Laʼailasi ba laʼoʼaya ia ”maʼö-maʼökhö”. (Baso Yeremia 20:8, 9.) No irai ide-ide sibai dödö Yeremia irege arakhagö awuwu ia. Hizaʼi, lö iböhöli wamalua halöwönia, ba itohugö wanuriaigö. Hadia mbörö? Börö me hulö hola-hola galitö ba mbotonia ”Daromali Yehowa”, tebai itaha wamaʼema yaʼia. Na tafahaʼö ita ba Zura Niʼamoniʼö ba taʼangerönusi nösinia ero maʼökhö, tola tobali ita simane Yeremia. Buania, itugu owua-wua dödöda ba wamalua halöwö fanuriaigö, ba tola itugu ato niha nitoloda ba wangokhögö faʼaboto ba dödö sanandrösa ba zindruhu.​—Yer. 15:16.

21. Hewisa wolawada faʼide-ide dödö?

²¹ Imane Deborah si no mututunö moroi yawa, ”Faʼide-ide dödö andrö, no fakake niʼogunaʼö Zatana ba wamaʼala yaʼita.” Hizaʼi, abölö nasa Yehowa moroi khö Zatana hegöi fakake niʼogunaʼönia. Börö daʼö, andrö wanolo moroi khö Yehowa na örasoi waʼide-ide dödö. Hasambalö itolo ndraʼugö ba wolawa falömoʼahonoamö. Hasambalö ibeʼe khöu waʼabölö ba wanaögö fökhö si göna yaʼugö. Hasambalö itolo ndraʼugö ba wangokhögö lala wangera-ngera si tefaudu sanandrösa ba halöwö nönö-nönö ba organisasinia. Ba hasambalö itolo ndraʼugö enaʼö lö tebulö örasoi waʼomuso dödö ba wamalua halöwö fanuriaigö. Tola göi ötouʼö nösi dödöu khö Namada si so ba zorugo. Börö wanolonia, hasambalö mofozu ndraʼugö ba wolawa faʼide-ide dödö.