1. Okwehurira kubi nikubaasa kutukwataho kuta?

BURI izooba nitutunga oburemeezi kandi tuteeraho kubusingura nk’oku turikubaasa. Kwonka shi torikwikiriza ngu nitushoboorora gye oburemeezi bwaitu twaba nitwehurira gye? N’ahabw’ekyo twine kureeba okwehurira kubi nk’omushuma orikuturemesa kweyikiririzamu, kugira obumanzi, n’okushemererwa. Enfumu 24:10 nihagira ngu waayehurira kubi okatamwa omu bwire bw’oburemeezi, amaani gaawe nigaija kutuuba. Eego, okwehurira kubi nikubaasa kutumaramu amaani goona agaakubaire nigatuhwera kusingura oburemeezi.

2. Niki ekirikubaasa kutureetera kwehurira kubi, kandi nituza kushwijuma ki omu kicweka eki?

² Hariho ebintu bingi ebirikubaasa kutureetera kwehurira kubi, kuruga omunda n’aheeru. Ebi nibibaasa kutwariramu obutahikiirira, obweremwa, n’amagara mabi. Kandi nibibaasa n’okutwariramu okutatunga obujunaanizibwa obu turikwenda omu buheereza nari okubuurira omu kicweka ekirikureebeka nk’ekitarikurugamu ebirungi. Omu kicweka eki, nituza kureeba ebi turikubaasa kukora kwemera okwehurira kubi.

3. Niki ekirikubaasa kutuhwera kugira emiteekateekyere eringaniire aha butahikiirira bwaitu?

³ Kyorobi kugira emiteekateekyere etaringaniire aha butahikiirira n’obweremwa bwaitu. N’ekirikurugamu, nitubaasa kuteekateeka ngu ahabw’enshobe zaitu, Yehova tarikwija kutwikiriza kuza omu ensi ensya. Emiteekateekyere nk’egyo neebaasa kuba ey’akabi. Obutahikiirira bwaitu tushemereire kubureeba tuta? Baibuli neeyoreka ngu, oyihireho Yesu Kristo abantu boona “bakashiisha.” (Rom. 3:23) Kwonka Owaahandiikiise Baibuli tarikuta omutima aha nshobe zonka nari kuteekateeka ngu tuhikiriire. Kureka, ni Tataitwe orikutukunda oyeteekateekire  kutuhwera. Kandi naagumisiriza. Naareeba oku turikurwana n’obweremwa bwaitu n’oku turikuteeraho kusingura emiteekateekyere etaringaniire, kandi naaba ayeteekateekire kutuhwera.​—Rom. 7:18, 19.

4-5. Okuhikaana n’ebiri omu 1 Yohaana 3:19, 20, ahabw’enki banyaanyazi-itwe babiri bataraikiriize okwehurira kubi kubasingura?

⁴ Teekateeka aha ky’okureeberaho kya Deborah na Maria. * Obu Deborah yaabaire akiri muto, akaba naakira kutwarizibwa omu muringo ogwabaire nigumureetera kuhemuka. Akaba atarikukira kusiimwa. N’ahabw’ekyo akatandika kwegiraho emiteekateekyere etahikire. Ku yaabaire akora enshobe nkye, akaba ayereeba nk’otarikubaasa kukora ekihikire. Maria nawe akaba aine oburemeezi nibwo bumwe. Abanyabuzaare be bakaba nibamuhemangura. N’ekyarugiremu, akeereeba nk’otaine mugasho. N’obu yaizire omu mazima, akaguma naateekateeka ngu tahikire kwetererwa eiziina rya Ruhanga!

⁵ Kwonka, banyaanyazi-itwe aba bombi tibararekyeire aho kuheereza Yehova. Ahabw’enki? Bakatambikira Yehova oburemeezi bwabo barikumushaba kandi bakamweshengyereza. (Zab. 55:22) Bakamanya ngu Tataitwe ow’omu iguru owa rukundo naayetegyereza gye ebi twarabiremu enyima, n’oku ekyo kirikukwata aha miteekateekyere yaitu. Kandi naareeba ekirungi ekiri omu mitima yaitu niyo mitwarize mirungi, obundi ei tutarikwereebamu.​—Shoma 1 Yohaana 3:19, 20.

6. Omuntu naabaasa kwehurira ata yaagaruka enyima akakora enshobe?

⁶ Omuntu orikuteeraho kusingura omuze mubi naabaasa kugaruka enyima, kandi ahurire yaayetamwa. Nangwa n’ekya butoosha kweshinja bwanyima y’okukora enshobe. (2 Kor. 7:10) Kwonka, titushemereire kurengyesereza tukeecwera orubanja, tukateekateeka ngu turemirwe. Kandi ngu Yehova tarikubaasa kutusaasira. Emiteekateekyere nk’egyo egwire terikwegamira aha mazima, kandi neebaasa kutureetera kurekyera aho kuheereza Yehova. Ijuka ekiri omu Enfumu 24:10, ngu amaani gaawe nigaija kutuuba waayehurira kubi okatamwa omu bwire bw’oburemeezi. Eki orikubaasa kukora, n’okutereeza enshonga na Yehova, orikumushaba kukugirira embabazi. (Isa. 1:18) Yaareeba ngu oyeteisiize kimwe, naija kukusaasira. Okwongyera ahari ekyo, noobaasa kugaaniiraho n’abareeberezi. Nibaija kukuhwera kugaruka kuba gye omu by’omwoyo.​—Yak. 5:14, 15.

7. Ahabw’enki tutaine kwehurira kubi twaba nitugumirwa kukora ekihikire?

⁷ Jean-Luc, omureeberezi omuri France, naagambira abarikuteganisibwa obweremwa  ati: “Omuntu oshemeire omu maisho ga Yehova, t’ogwo otarikushobya, kureka n’ogwo orikwikiriza enshobe ze, kandi akeeteisa.” (Rom. 7:21-25) N’ahabw’ekyo otakayecwera orubanja waaremwa kukora ekihikire. Ijuka ngu tihaine n’omwe ahariitwe orikubaasa kukoreerera okuhikiirira omu maisho ga Ruhanga. Twena Ruhanga naatugirira embabazi ezitatushemereire, kurabira omu kitambo.​—Efe. 1:7; 1 Yoh. 4:10.

8. Twaba nitwehurira kubi, ni baahi abu turikubaasa kugambira kutuhwera?

⁸ Nitubaasa kushaba ab’eka yaitu ey’eby’omwoyo kutugumya nibo ab’eishe-emwe na banyaanyazi-itwe! Nibabaasa kutuhurikiza twaba nitubagambira oku turikwehurira kandi batugumye barikukoresa ebigambo ebirikutureetera obunanukye. (Enf. 12:25; 1 Tes. 5:14) Munyaanyazi-itwe Joy omuri Nigeria otwire naateganisibwa okwehurira kubi naagira ati: “Nkaabaire ndi nkahi ku hatariho eishe-emwe? Ab’eishe-emwe na banyaanyazi-itwe n’obuhame ngu Yehova naagarukamu okushaba kwangye. Mbegiireho oku ndikubaasa kugumya abandi ab’emitima ecuramiriirwe.” Twine kwijuka ngu obumwe ab’eishe-emwe na banyaanyazi-itwe tibarikumanya obu turikuba nitwenda ngu batugumye. N’ahabw’ekyo nikibaasa kutwetengyesa kuba niitwe twabanza kugambira Omukristaayo mugyenzi waitu ngu nitwenda atuhwere.

9. Ebiri omuri Zaaburi 41:3 na 94:19 nibitugumya bita?

⁹ Shaba Yehova kukuhwera. Twaba tutarikwehurira gye na munonga twaba twine endwara ezitarikukira juba, nikibaasa kutugumira kugira emiteekateekyere mirungi. N’obu Yehova araabe atarikutukiza omu muringo gw’eky’okutangaaza hati, naatuhuumuriza kandi naabaasa n’okutuha amaani g’okugumisiriza. (Shoma Zaaburi 41:3; 94:19.) Nk’eky’okureeberaho, naabaasa kuhiga Abakristaayo bagyenzi baitu kutuhwera aha mirimo nari omu kugura ebintu. Naabaasa kuhiga ab’eishe-emwe kutushabira. Nari naabaasa kutwijutsya ebintu birikuhuumuriza ebiri omu Kigambo kye, nk’amatsiko g’omuhendo ag’okugira amagara agahikiriire omu nsi ensya hatarimu kurwara n’obusaasi.​—Rom. 15:4.

10. Ahabw’enki Isang ataragumire naayehurira kubi bwanyima y’okutunga butandu?

¹⁰ Isang, orikutuura omuri Nigeria, akatunga butandu reero yaasharara omubiri. Omushaho akamugira ngu tarikwija kugaruka kugyenda. Isang naagira ati: “Ekyo kikampenda omutima naahwamu amaani.” Kwonka shi akaguma atyo? Ngaaha! Niki ekyamuhwereire? Naashoboorora ati: “Nyowe n’omukazi wangye titurarekyeire aho kushaba Yehova n’okwega Ekigambo kye. Kandi tumariirira kuguma nitubara emigisha ei twine, otwariiremu amatsiko g’okutuura omu nsi ya Ruhanga ensya.”

11. Cindy akatunga ata okushemererwa obu yaabaire naateganisibwa endwara?

¹¹ Cindy, orikutuura omuri Mexico, bakamucebera baashanga aine endwara y’akabi munonga. Mbwenu shi akagumisiriza ata? Obu yaabaire naatunga obujanjabi, akataho ekigyendererwa ky’okubuurira buri izooba. Akahandiika ati: “Okukora ekyo kikambaasisa kuta omutima aha bandi, omu mwanya gw’okuguta aha kushemezibwa kwangye, obusaasi, n’okwehurira kubi. Eki nikyo naabaire ninkora: Omu kugaaniira n’abashaho, nkaba mbabuuza oku ab’omu maka gaabo bari. Reero mbabuuza ahabw’enki baacwiremu kukora omurimo gugumire ogu. Bwanyima y’ekyo, kikaba kyoroba kumanya ebirikubaasa kubahika aha mutima. Baingi bakaba nibangira ngu ti kya butoosha omurwaire kubabuuza ebirikubakwataho. Kandi baingi bakaba nibansiima ahabw’okufayo.  Nangwa n’abamwe bakampa endagiriro zaabo. N’ahabw’ekyo omu mbeera zigumire ezi naabaire ndimu, Yehova akampa okushemererwa kw’omu mutima, nangwa naanye kikaantangaaza!”​—Enf. 15:15.

12-13. Abarwaire abamwe nari abataine maani babaasize bata kwejumba omu buheereza, kandi harugiremu ki?

¹² Abarwaire nari abataine maani nibabaasa kwehurira kubi ahabw’okugira ngu tibarikubaasa kukora kihango omu buheereza. Kwonka, baingi nk’abo babaasize kwejumba omu kubuurira. Omuri United States, munyaanyazi-itwe Laurel akamara emyaka 37 ari omu kyoma ky’okwikizamu! Akeemera ekookoro, okushemezibwa kw’amaani, n’ezindi ndwara z’omubiri. Kwonka embeera egi ei yaabaire arimu teramuremeise kubuurira. Akabaasa kubuurira abashaho n’abajaanjabi abaabaire nibaija owe. Niki ekyarugiremu? Akahwera abantu nka 17 kumanya amazima ga Baibuli! *

¹³ Richard, omureeberezi omuri France, aine obuhabuzi oburikuhwera abo abatarikubaasa kuruga omu maka gaabo nari omu myanya y’okureebereramu abakaikwire. “Nimbahabura kugira eky’okutandarikaho ebitabo. Eky’okutandarikaho ebitabo nikireetera abantu kwenda kumanya, reero ohendera ogaaniire nabo. Eki nikibaasa kuhiga ab’eishe-emwe na banyaanyazi-itwe abakundwa abatakibaasa kubuurira enju aha nju.” Abatarikubaasa kuruga omu maka gaabo, nabo nibabaasa kwejumba omu kubuurira barikuhandiika amabaruha nari barikuteerera abantu amasimu.

14. Omugabe Daudi akatuteeraho ky’okureeberaho ki eky’omutaano?

¹⁴ Ahabwa bukuru, amagara mabi, nari ezindi nshonga, nitubaasa kutaza omu buheereza obumwe, nari kuheebwa obujunaanizibwa omu kibiina nari obw’okutaayaayira ebibiina. Kyaba kiri kityo, nitubaasa kwegyera aha Mugabe Daudi. Ku yaagambiirwe ngu tatoorainwe kwombeka hekalu ya Ruhanga, ekintu eki yaabaire aine amatsiko g’okukora, akashagika ou Yehova yaabaire atooraine. Kandi Daudi akaba efura yaahayo ahabw’okwombeka oku. Ka n’eky’okureeberaho kirungi ky’okutooreza!​—2 Sam. 7:12, 13; 1 Bus. 29:1, 3-5.

15. Ow’eishe-emwe Hugues akasingura ata okwehurira kubi?

¹⁵ Ow’eishe-emwe Hugues, kuruga France, ahabw’okugira amagara mabi, taragumiizemu ari omureeberezi, nangwa akaba atarikubaasa n’okukora oburimo bukye aha ka. Naahandiika ati: “Omu kubanza, nkeereeba nk’otaine mugasho, kandi naayetamwa ekirenga. Bwanyima,  nkareeba obukuru bw’okumanya obugarukiro bwangye, kandi nkatunga okushemererwa ahabw’okuheereza Yehova nk’oku ndikubaasa. Mmaririire kutaruha nkabirugaho. Nka Gideoni n’abashaija be magana ashatu abaabaire baruhire, ninyija kugumizamu niindwana mashaija!”​—Bir. 8:4.

16. Nitubaasa kwegyera ki ahari baamaraika?

¹⁶ Baamaraika abeesigwa n’eky’okureeberaho kirungi. Obu Omugabe Ahabu yaabaire naategyeka, Yehova akashaba baamaraika kugamba emiringo ei baraakorese kubuzabuza omugabe mubi ogwo. Baamaraika baingi bakahayo ebitenso byabo. Kwonka Ruhanga akatoorana maraika omwe kandi yaamugira ngu ekitenso kye nikiza kukora gye. (1 Bag. 22:19-22) Mbwenu shi baamaraika abandi abeesigwa bakeehurira kubi, obundi barikuteekateeka ngu ‘ahabw’enki twashiisha obwire bwaitu?’ Tihariho buhame oburikworeka ngu ekyo kikabaho. Baamaraika buzima n’abacureezi kandi nibenda ngu ekitiinisa kyona kiheebwe Yehova.​—Bir. 13:16-18; Kush. 19:10.

17. Twine kukora ki twaba nitwehurira kubi ahabw’okutatunga obujunaanizibwa obumwe omu buheereza?

¹⁷ Ijuka ngu omugisha ogu twine ogw’okwetererwa eiziina rya Ruhanga n’okuranga Obukama bwe. Obujunaanizibwa nibwija kandi buhwaho, kwonka tibwo burikutureetera kuba ab’omuhendo ahari Ruhanga. Twaba turi abarikwetwara kandi abacureezi nibwo Yehova n’ab’eishe-emwe barikutukunda. N’ahabw’ekyo yeshengyereze Yehova kukuhwera kuguma ori orikwetwara kandi omucureezi. Teekateeka aha bantu abaabaire nibeetwara kandi bari abacureezi abarikugambwaho omu Kigambo kye. Heereza ab’eishe-emwe oyekundiire nk’oku orikubaasa.​—Zab. 138:6; 1 Pet. 5:5.

18-19. Noobaasa kutunga ota okushemererwa omu buheereza bwawe n’obu ekicweka kyanyu kyakuba nikireebeka nk’ekitarikurugamu ebirungi?

¹⁸ Obume nooyehurira kubi ahabw’okugira ngu ekicweka kyanyu nikireebeka nk’ekitarikurugamu ebirungi nari abantu bakye nibo barikushangwa omuka? Omu mbeera nk’egyo, noobaasa kukora ki kuguma oshemereirwe nari kwongyera aha kushemererwa kwawe? Obuhabuzi obumwe buri omu kabokusi, “ Emiringo y’Okwongyera Kushemererwa omu Buheereza Bwawe.” Kandi ni kikuru kugira emiteekateekyere mirungi aha buheereza. Ekyo nikitwariramu ki?

¹⁹ Ta omutima aha kumanyisa abandi eiziina rya Ruhanga n’Obukama bwe. Yesu akooreka  gye ngu bakye nibo baabaire nibaija kuzoora omuhanda ogurikuhitsya gw’amagara. (Mat. 7:13, 14) Twaba nitubuurira, nituba nitukora hamwe na Yehova, Yesu, na baamaraika. (Mat. 28:19, 20; 1 Kor. 3:9; Kush. 14:6, 7) Yehova naayeyiriza haihi abashemeire. (Yoh. 6:44) N’ahabw’ekyo omuntu yaaba atakunzire obutumwa bwaitu omurundi gw’okubanza, naabaasa kuhurikiriza omurundi ogundi.

20. Ebiri omu Yeremia 20:8, 9 nibibaasa kutuhwera bita kurwanisa okwehurira kubi?

²⁰ Nabi Yeremia nitubaasa kumwegyeraho bingi. Akaba naabuurira omu kicweka kigumire munonga. Abantu bakaba nibamujuma kandi barikumugaaniiza “eizooba ryona.” (Shoma Yeremia 20:8, 9.) Akeehurira kubi yaahika n’aha kwenda kuhanika akabirugaho. Kwonka tarahanikire. Ahabw’enki? “Ekigambo kya” Yehova kikaba kiri nk’omuriro omunda ya Yeremia, kandi akaba atarikubaasa kukyemera! Nikyo kimwe naitwe ebiteekateeko byaitu n’emitima yaitu twaijuzamu ebiri omu Ekigambo kya Ruhanga. Egi niyo nshonga endiijo ahabw’enki twine kweyegyesa Baibuli buri izooba, kandi tukagiteekateekaho. Ekiraarugyemu, okushemererwa kwaitu nikwija kweyongyera, n’obuheereza bwaitu nibubaasa kwongyera kurugamu ebirungi.​—Yer. 15:16.

21. Okwehurira kubi n’obu kwakuba nikureetwaho ki, nitubaasa kukusingura tuta?

²¹ “Okwehurira kubi nikibaasa kuba eky’okurwanisa ky’akabi eki Sitaane arikukoresa,” Deborah owaaba yaagambirweho, nikwo arikugira. Kwonka amaani ga Yehova Ruhanga nigakirira kimwe ebi Sitaane arikukoresa kuturwanisa. N’ahabw’ekyo haagira ekyakureetera kwehurira kubi kyona, yeshengyereze Yehova kukuhwera. Naija kukuhwera kumanya oku oine kutwaza omu butahikiirira n’obweremwa bwawe. Naija kukushagika waaba orwaire. Naija kukuhwera kugira emiteekateekyere eringaniire aha bujunaanizibwa bwawe omu buheereza. Kandi naija kukuhwera kureeba buheereza bwawe omu muringo oguhikire. Kandi, gambira Sho ow’omu iguru ebirikukwerarikiriza. Ahabw’obuhwezi bwe, noobaasa kusingura okwehurira kubi.