1. Ngera sebechel duubech sel bo el mechitechut a rengud?

NGBEK el sils el bo dechelebangel a mondai e melasem er a tkurrebab el sebeched el outekangel. Engdi kau ke mo kongei el kmo ngmeringel a doutekangel a mondai sel lemechitechut a rengud? Ngkired el omes er a mechitechut el reng el ua merechorech el sebechel rucherechii a ulterekokl el reng, blekeurreng, me a deurreng er kid. A Osisechakl 24:10, NW me a footnote a kmo: “A lsekum ngmo mechitechut a rengum sel bo el chetituokel a tekoi, e ngmo diak a klisichem.” Nguaisei sel bo el mechitechut a rengud, e ngdirrek el locha mo diak a klisiched e lmuut el mo meringel er kid el outekangel a mondai er kid.

2. Ngera sebechel rullid el mo mechitechut a rengud, e ngera kede mo mesaod er tia el suobel?

² Ngsebechel mo mechitechut a rengud er a betok el tekoi el duubech. Aika uldimukl er a cheleuid el omerelled, chelitechetud, me a sechered. Ngdirrek el uldimukl er a soad el ngerachel er a omesiou el dimlak denguu me a lechub e ngberkel a klumech er a basio el diak a kmal chad el sorir lorrenges. Ngar tia el suobel e kede mo mesaod a bebil tekoi el sebeched el meruul sel bo el mechitechut a rengud.

3. Ngera sebechel ngosukid el mo tabesul a uldesued el kirel a cheleuid el omerelled?

³ Ngbeot er kid el mo diak letabesul osenged el kirel a cheleuid el omerelled me a chelitechetud. Sei a uchul, me kede locha mo omdasu el kmo a Jehovah a kmal diak bo lekengei er kid el mo soiseb er a beches el beluulechad. Engdi a chouaitia el uldasu a kengaol. Me ngkirel mo uangera osenged el bedul a cheleuid el omerelled? A Biblia a ochotii el kmo ngdi ta el Jesus a cherrungel,  e kid el rokui a “[ngar] a klengit.” (Rom 3:23) Ngike el Milluches er a Biblia a diak di lomes a cheleuid el doruul me a lechub e ngkmo ngdiak el sebeched el rullii a cheleuid. Ngbai betik a rengul Chedam el soal lolengeseu er kid. Ngdirrek el klou a rengul. Ngmesa el kmo kede meringel loldechelakl a chelitechetud me a uldesued el diak el tabesul, e kmal kltmokl el lolengeseu er kid.​—Rom 7:18, 19.

4-5. A doltirakl er a 1 Johanes 3:19, 20, BT, e ngera uchul me a reteru el odos a mle sebechir el mo mesisiich er a chelitechetul a rengrir?

⁴ Molatk er a tekoi el dilubech el mora Deborah me a Maria. * A Deborah er a lengalek e a telungalek er ngii a kmal mle mekngit omerellir el mo er ngii. Te dimlak lechat er ngii. Tia uchul me a be leklou e ngkmal mekngit a uldesuel kirel. Me sel lerellii a di kekerei el cheleuid el tekoi, e ngomdasu el kmo ngdiak a ngera el ungil sebechel rullii. A Maria me ngmle uaisei. A rechedal a rirellii el mo di ngii el merur er ngii. Tia uchul me ngmlo omdasu el kmo ngdiak a belkul. A uriul er a lemetecholb, e ngulemdasu el kmo ngdiak el rredemelel a okedongall el ta er a Sioning er a Jehovah!

⁵ Me nguaisei, engdi tirka el teru el odos a dimlak lemeterob el mesiou er a Jehovah. E ngera uchul? Te ngilai a berredir el msa Jehovah loeak a nglunguuch. (Psa. 55:22) Te mlo kongei el kmo a betik a rengul Demad a medengei el kmo aike el tekoi el dilubech el mei er kid er a ngar er a mong a uchul me ngmekngit a uldesued el kired. Me nguaisei engdi ngmes a ungil er kid, alta ngdiak el sebeched el mes.​—Monguiu er a 1 Johanes 3:19, 20, BT. *

6. Nglocha mo uangera uldesuel a chad a lluut el rullii a tekoi el lolasem el mo mesisiich er ngii?

⁶ A chad el melasem el mo mesisiich er a mekngit el tekoi loruul er ngii a locha lmuut el mo rullii tia el tekoi el luchul e ngmo mechitechut a rengul. Kid a uaisei el blechoel el mo mekngit a rengud sel derellii a klengit. (2 Ko. 7:10) Me nguaisei engdi ngdiak el kirel kmal mo mekngit a uldesued lomdasu el kmo: ‘Ngak a kmal diak a belkuk. A Jehovah a kmal diak bo lousubes er ngak.’ Tiang a diak leklemerang e sebechel rullid el mo diak dosiou er a Jehovah. Lak mobes a tekoi el dulenguiu er a Osisechakl 24:10, NW el kmo, ngmo diak a klisiched sel bo el mechitechut a rengud. Me ngbai soad el mo ‘dmedesii’ a delongeled kid me a Jehovah loeak sel doluluuch el mo er ngii e dolengit er ngii me lousubes er kid. (Isa. 1:18) Sel lesa el kmo kede mera el louuchel er a rengud, e ngmo ousubes er kid. Ngdirrek el sebeched el mengedecheduch er a remechuodel. Te mo oba kllourreng el  ngosukid el lmuut el mo mesisiich er a tekoi er a klereng.​—Jak. 5:14, 15.

7. Ngera uchul me ngdiak el kirel mo mechitechut a rengud a lsekum ngmeringel er kid el meruul a melemalt?

⁷ A Jean-Luc, el ta er a remechuodel er a France a melekoi el mo er tirke el meringel loldechelakl a chelitecheterir el kmo: “Ngar er a osengel a Jehovah, e a melemalt el chad a diak el ngike el chad el diak a ta el cheleuid el lerellii, e ngbai chad el ouuchel er a rengul e obult er a omerellel.” (Rom 7:21-25) A lsekum e kau a meringel loldechelakl a chelitechetum e lak momdasu el kmo ngdiak a ultutelem. Lak mobes el kmo ngdiak el sebeched el di kid e mo melemalt er medal a Dios. Kede rokui el ousbech er a krasia er a Dios lokiu a olubet.​—Efe. 1:7; 1 Jn. 4:10.

8. Ngtecha sebeched el mo er ngii el kirel a ngeso sel bo el mechitechut a rengud?

⁸ Ngsebeched el mora rudam me a rudos el tir a telungalek er kid er a klereng el kirel a omelisiich! Ngsebechir el lorrenges er kid sel soad el mengedecheduch e meskid a tekoi er a omelisiich. (Osi. 12:25; 1 Th. 5:14) A Joy el odos el ngar er a Nigeria el mle blechoel mo mechitechut a rengul a kmo: “Ak mo kirel ker a lak a klodam er kid? A rudam me a rudos er ngak a ochotii el kmo a Jehovah a onger a nglunguchek. Ak dirrek el mla suubii er tir a rolel e ngsebechek el melisiich er tirke el mechitechut a rengrir.” Engdi lak dobes el kmo a rudam me a rudos er kid a diak leblechoel medengei a taem el dousbech a omelisiich. Me nglocha mo kired el ouchais er a ta er a ungil kerebai el kldemed el kmo kede ousbech a omelisiich.

9. Ngmekera Psalm 41:3 me a 94:19 e melisiich er kid?

⁹ Bo er a Jehovah el kirel a ngeso. Sel lak lemesisiich a bedenged e ileakl sel ngar ngii a sechered, e ngmeringel er kid el moba ungil el uldasu. Me alta Jehovah diak bo lomekungil er kid er chelechang engdi ngmeskid a ongelaod me a klisiich el dousbech er ngii el mo outekangel. (Monguiu er a Psalm 41:3; 94:19.) El ua tiang, ngsebechel mekroleterir a rekldemed el mo olengeseu er kid el meruul a tekoi er a blid me a lechub e ngmo shopping. Ngsebechel mekroleterir el mo meluluuch lobengked. Me a lechub e ngngosukid el lmatk a ungil tekoi el ngar er a Tekingel el mengelaod er kid, el ua klebokel el omelatk er a cherrungel el klengar el ngar er a beches el blekeradel el diak a secher me a ringel er ngii.​—Rom 15:4.

10. Ngera uchul me a Isang a dimlak lolemolem el mechitechut a rengul er a uriul er a le accident?

¹⁰ A Isang el kiei er a Nigeria a mle accident e mlo chitechut. A toktang a dilu er ngii el kmo ngdiak el lluut el mo merael. Me ngdmu el kmo: “Ngmilecham a renguk e mlo diak a omeltkek.” Me ngdi millemolem el uaisei? Ngdiak! Ngera ngilsuir? Ngmelekoi el kmo: “Ngak me a bechik a dimlak ki meterob el meluluuch el mora Jehovah e mesuub a Tekingel. Aki dirrek el riruul a rengmam el mo blechoel melatk a klengeltengat el ki bla mngai, el uldimukl er a omelatk el mo kiei er a beches el blekeradel.”

11. Ngmilekera Cindy e mlo sebechel el dmeu a rengul er sel taem er a meringel el secherel?

¹¹ A Cindy el kiei er a Mexico a dilubech a omekodall el rakt er ngii. Ngmilekera e outekangel? Sera lolai a treatment e ngrirellii a turrekong er ngii el mo merkii a klumech er a bek el sils. Ngmeluches el kmo: “Tia rirellak el mo sebechek el melatk er a rebebil er a bai kulatk er a botk el bo kulai er ngii, ringel el kngar ngii, me a chelitechetul a bedengek. Tiakid a kurruul er ngii: Sel kungedecheduch er a retoktang me a lechub e te nurse e ak kuker el kirel a telungalek er tir. E sola e oker er a uchul me te ngileltii a kmal meringel lureor. Seikid e ngmo beot er ngak el mesa el kmo ngera el tekoi a mo remutech a rengrir. Te betok er tir a millekoi el kmo a resmecher a diak leblechoel loker er tir el  kmo, ‘Ke uangerang?’ Me te mirreng a sulek el melatk el kirir. A rebebil er tir a milskak a address me a lechub e ngdengua er tir. Ak mle medengei el kmo a Jehovah a mo ngosukak el mtekengelii tia el meringel el taem. Engdi ngmlo mechas a renguk er a klungel a deurreng el bilskak!”​—Osi. 15:15.

12-13. Te milekera rebebil el smecher me a lechub e te mechudelang e mlo sebechir el omerk er a klumech, e ngera mlo rsel?

¹² A resmecher me a lechub e te mechudelang a locha mo mechitechut a rengrir e le ngdiak el sebechir el remuul a betok er a omesiungir. Me nguaisei engdi a rebetok er tir a mla metik a rolel e ngsebechir el omerk er a klumech. Ngar er a beluu er a Merikel e a odos el Laurel a di mle dengarech e seluk er a chelsel a mesil lullengeseu er ngii el outeliil el 37 el rak! Ngdirrek el mlo smecher el kasinoma, e mlora meklou el botk, e mla er ngii a secherel a bedengel. Engdi aika el kmal oberaod el tekoi a dimlak leterebengii me lak lomerk er a klumech. Ngulemerk el mora re nurse me a rechad er a osbitar el mlei er a blil. Me ngngera mlo rsel? Ngngilsuterir a rekesengil e te 17 el chad el mo medengelii a Jehovah! *

¹³ A Richard, el ta er a remechuodel er a France a ngar ngii a ungil uldasu el lomesterir tirke el diak el sebechir el tuobed er a blirir me a lechub e ng nursing home. “Ak milsterir a uldasu el kmo leberk a bebil er a babilenged er a basio el sebechir a rechad el mes. Me a rechad sel lengelakl, e te mes e oker el kirel. Tia sebechel mo melisiich er a rebetik er a rengud el rudam me a rudos el dikea el sebechir el oldingel a obliil.” Tirke el diak el sebechir el tuobed er a blirir a dirrek el sebechir el meluches a babier e omerk er a klumech lousbech er a dengua.

14. Ngmekera King David e kmal ungil kerebai el kired?

¹⁴ Nglocha kid el chudelang, smecher, me a lechub e ngkuk ta er a uchul e ngdiak el sebeched el ngmai a bebil ngerachel er a omesiou. A leuaisei, e ngsebeched el ngmai a klubeled er a King David. Sera bo lodengei el kmo ngdimlak lemengilt el mo omekedechor er a templo er a Dios, el tekoi el kmal uluureng el mo meruul er ngii, e ngmlora tkurrebab el sebechel el mo olengeseu er ngike el letiltkii a Jehovah el mo nguu tia el ngerachel. Ngdirrek el tilenget a betok el kirel tia el ureor. Ngkmal ungil kerebai el kired!​—2 Sa. 7:12, 13; 1 Kr. 29:1, 3-5.

15. Ngmilekera Hugues e mlo mesisiich er a chelitechetul a rengul?

¹⁵ A Hugues el odam er a France a mlo diak losiou el ta er a remechuodel e mlo diak el sebechel meruul a mekekerei el ureor er a blil el secherel a uchul. Ngmeluches el kmo: “Sera uchelel, e ak mlo omdasu el kmo ngdiak a belkuk e kmal mlo mechitechut a renguk. Engdi  cherengel a taem, e ak mlo mesa klungel a ultutelel a bo kkengei er a blekeradel el kngar ngii e bo lak el mekngit a renguk el kirel, e seikid e ngmlo sebechel mo dmeu a renguk el kirel aike el tekoi el sebechek el meruul. Ak mla rullii er a renguk el diak meterob. Ngsoak el mo ua Gideon me tirke el edei el dart el chad el alta te mlo mesaul engdi te di millemolem!”​—Men. 8:4.

16. Ngera sebeched el suub er a rechanghel?

¹⁶ A reblak a rengrir el anghel a dirrek el ungil kerebai. Sera longedereder a King Ahab, e a Jehovah a ulengit er a rechanghel me louchais a uldesuir el kirel a rolel a bo longeblad er ngika el mekngit el king. A rebebil er tir a uluuchais a uldesuir. Engdi a Dios a ngileltii a ta el anghel e dilu er ngii el kmo a uldesuel a mo tmaut. (1 Ki. 22:19-22) Me tirke el bebil er a rechanghel ngmlo mechitechut a rengrir e omdasu el kmo, ‘Ngera uchul me ak millasem?’ Ngkmal diak. A rechanghel a kmal ngariou a rengrir e sorir a rokui el chetengakl a lebo er a Jehovah.​—Men. 13:16-18; Och. 19:10.

17. Ngera kired el meruul a lsekum e ngmekngit a rengud e le ngdiak a bebil ngerecheled er a omesiou?

¹⁷ Lak dobes er a ileakl el techall el dobang el ta er a Sioning er a Jehovah e omerk el kirel a Rengedel. Ngsebechel mo er ngii e mo diak a ngerecheled er a omesiou, engdi aikang a diak luchul e kede mekreos er a osengel a Dios. Ngbai sel lengariou a rengud e kid a mo mekreos er a osengel a Jehovah me a rudam me a rudos er kid. Me molengit er a Jehovah me lengesukau me di lolemolem el ngariou a rengum. Molatk aike el betok el ungil kerebai er a klengariourreng el ngar er a Tekingel. E mkengei el mesiou er a rudam er kau er a ngii di el rolel el sebechem.​—Psa. 138:6; 1 Pe. 5:5.

18-19. Ngmekera mo dmeu a rengum el omerk er a klumech alta te diak a kmal sorir lorrenges?

¹⁸ Ngmla ta el bo lemechitechut a rengum e le ke omerk er a klumech er a basio el diak a kmal sorir lorrenges me a lechub e te di kesai el chad a ngar er a blai? A leuaisei, e ngera sebechem el meruul me lolemolem me a lechub e bo el klou a deurreng er kau? A bebil el rolel a ngar sel baks el “ Rolel e Ngmo Klou a Deurreng er Kau el Omerk er a Klumech.” Ngdirrek el klou a ultutelel a bo moba melemalt el uldasu el kirel a berkel a klumech. Tia ngera belkul?

¹⁹ Lak mobes el kmo a klou a ultutelel el uchul me kede omerk er a klumech a ouchais el kirel a  ngklel a Dios me a Rengedel. A Jesus a mileketeklii el kmo te di kesai el chad a mo merael er a rael el mora klengar. (Mt. 7:13, 14) E sel domerk er a klumech, e ngngar ngii a ileakl el techelled el oureor el obengkel a Jehovah, Jesus, me a rechanghel. (Mt. 28:19, 20; 1 Ko. 3:9; Och. 14:6, 7) E a Jehovah a osiik er tirke el rredemelel. (Jn. 6:44) Me a lsekum a chad a diak el soal lorrenges er a klumech el domerk er ngii, e alta ngmo orrenges er a kuk ta er a taem.

20. Ngmekera Jeremia 20:8, 9 e osisecheklid er a rolel a doldechelakl er a chelitechetul a reng?

²⁰ Ngbetok a desuub er a profet Jeremia. Ngmlukngerachel el mo omerk er a klumech er a basio el dimlak a orrenges er ngii. A rechad a mle “blechoel” el oltuub e mededenguul er ngii. (Monguiu er a Jeremia 20:8, 9.) A ta el taem, e ngkmal mlo mechitechut a rengul me ngmlo soal mo diak lomerk er a klumech. Engdi ngdimlak loruul uaisei. E ngera uchul? A ‘klmechel’ a Jehovah a mle ua ngau el ngar er a chelsel el dimlak el sebechel morreked! Me kid me ngsebeched el mo ua Jeremia sel dosuub er a Biblia er a bek el sils e dolebedebek er ngii. Seikid e ngmengal mo klou a deurreng er kid e a urered er a berkel a klumech a mo bekerredechel.​—Jer. 15:16.

21. Ngmekera e sebeched el mo mesisiich sel bo el mechitechut a rengud?

²¹ A Deborah el dulsaod er ngii er a uchei a kmo: “A mechitechut el reng a mesisiich el bedikl el lousbech er ngii a Satan.” Me nguaisei, engdi a Jehovah a lmuut el mesisiich er a Satan. Me sel bo lemechitechut a rengum, e moluluuch el olengit a ngelsuil a Jehovah. Ngmo ngosukau el outekangel a cheleuid el omerellem me a chelitechetum. Ngmo ngosukau er a secherem. Ngmo ngosukau el mo tabesul a uldesuem el kirel a ngerachel er a omesiou. E mo ngosukau el mo ungil a uldesuem el kirel a omesiungem. Me a lmuut kung, mouchais er a Demam el ngar er a eanged aike el ngar er a rengum. Ngoeak a ngelsuil, e ngsebechem el mo mesisiich sel bo el mechitechut a rengum.