LONGO DIA 52
Luholo Wajiya Guheta Ngolo Gula Waleba Muila
‘Hana ginemo giaye gudi Yehowa, muene mbawugukuatesa.’—NGI. 55:22.
LUNGIMBO 33 “ Jette ton fardeau sur Jéhovah ”
NDAGA JIDI MU LONGO EDI *
1. Itshi yajiya gutubuila gula tualeba muila?
LUSUGU nu lusugu tuana gutagana nu malamba, nu tuana gutshita yagasue ha gukolesela nu malamba ene. Uvi yana khala lamba ha gulua nu malamba etu gula tudi muila wa guleba. Hene, tudi naye gujiya egi guleba gua muila gudi gifua nzangi yajiya gutukuiya gikhesa nu gusuanguluga guetu. Mukanda wa Ishima 24:10 udi muzuela egi: ‘Gula waleba muila gutuama dia ndaga ya lamba, ngolo jiaye mbajidi muleba.’ Idi yadiago egi guleba gua muila guajiya gutukatula ngolo ha gulua nu malamba tudi mutagana nawo.
2. Itshi yajiya gutulebesa muila, nu itshi tuza mumona mu longo edi?
2 Gudi nu ndaga jiavula jiajiya gutulebesa muila: Ndaga jiene jiajiya gukatuga gudi esue hakhetu nga gudi athu ako. Mukatshi dia ndaga jiene tuajiya gutanga: luholo tushigo athu atagana, ndaga jiabola tuana tshita, nga ukhashi. Tuajiya guleba muila gula tushigo muheta inemo tuana gutshigina mu ulondegi wa Yehowa, nga ndo gula athu tudi mulongesa mu terituare yetu ashigo mutshigina giamatshidia. Mu longo edi, tuza mumona ndaga tuajiya gutshita ha guheta ngolo gula muila watuleba.
GULUA NU GUBOLA TUANA GUKALAGALA NU LUHOLO TUSHIGO ATHU ATAGANA
3. Itshi yajiya gutukuatesa gula tudi gudimona gifua tushigo nu ndando?
3 Yakhala yaleba gudi esue ha gudimona gifua tushigo nu ndando luholo tushigo athu atagana nga mukunda nu gubola tuana kalagala. Ngenyi, tuajiya gusendesa gutangiza egi luholo tuana gutshita gubola, Yehowa mbagashigo mutshigina nga hazonda egi tungine mu phaladiso. Matangi a luholo elu ashigo abonga. Luholo lutshi tuajiya gudivua mukunda nu ndaga jiabola tuana gutshita? Biblia yana gumonesa egi “athu agasue atshitshile gubola” phamba Yesu Klisto. (Lomo 3:23) Yehowa ganago gutala gubola tuana gutshita nu ganago gutoga egi tukhale athu atagana. Uvi muene wakhala Tata wa guzumba, nu wana khala hehi ha gutukuatesa. Wana khala nji nu mutshima wa huiminyina. Wana mona luholo tuana tshita ngolo ha gukalagala ndaga jiabonga, wana jiya nji egi athu ako ana gudimona gifua ashigo nu ndando; hene wana khala hehi ha gutukuatesa.—Lomo 7:18, 19.
Yehowa wana gujiya ndaga jiagasue jiabonga tuamukalegele mu masugu abalega nu jinyi tudi mukalagala muanyo (Tala paragrafe 5) *
4-5. Luholo lutshi 1 Yone 3:19, 20 yakuatesele aphangi etu a akhetu mbadi hagula alebigo muila?
4 Tutadilenu gifezegeselo gia phangi Deborah nu Maria. * Hakhalele Deborah mona wazonda, enya fami yenji akhalele gumusegulula. Akhalelego gumushimana. Gishina giene wasendesele gutangiza egi gashigo nu ndando. Gula Deborah watshita ndaga imoshi yabola, wakhalele gudimona gifua ajiyilego gutshita nga ndaga imoshi yabonga. Maria nji watagenele nu ndaga ya luholo lumoshi. Enya fami yenji akhalele nji gumusegulula. Hene, wakhalele mutangiza egi gashigo nu ndando. Ikhale tangua diajiyile muene giamatshidia, wakhalele mutangiza egi gashigo watagana ha gukhala Temue wa Yehowa!
5 Uvi, aphangi etu awa mbadi a akhetu abembelego gukombelela Yehowa. Mukunda natshi? Handaga ahanele inemo yawo gudi Yehowa mu njila ya gisambu. (Ngi. 55:22) Gungima atshiginyile egi Tata wetu wa mu dilu wana gujiya ndaga tuatagenele najio nu luholo jiatusagesele. Uvi wana gumona nji ndaga jiabonga jidi mu mutshima wetu, nu makalegelo abonga anyi esue hakhetu tuajiyilego gumona.—Tanga 1 Yone 3:19, 20.
6. Luholo lutshi muthu wana gudivua gula wavutugila luko khadilo diabola adi mutshigina gutuna?
6 Yajiya gukhala egi muthu mumoshi udi mutshita ngolo ha gubemba khadilo dimoshi diabola, uvi gula wavutugila luko khadilo diene, wajiya guleba muila. Hene, idi yadiago egi tuana gudisagesa muavula gula tuakalagala gubola. (2 Kol. 7:10) Uvi tushigo naye gudisagesa muavula gubalega, nga gutangiza egi: ‘Ngajiyilego gutshita nga ndaga imoshi yabonga. Yehowa gajiyilego gungutotesela nga hazonda.’ Matangi a luholo elu adi abola, ajiya nji gututuma ha gubemba gukombelela Yehowa. Ujimbilago mbimbi jidi mu Ishima 24:10—gula tualeba muila, ngolo jietu mbajileba. Uvi “divuisenu” nu Yehowa mu njila ya gisambu, nu kamba khenda jienji. (Yesh. 1:18) Gula wabalumuna diago mutshima, Yehowa mbawugutotesela. Udi naye nji gukamba ukuateshi wa akulu. Ene mbaagukuatesa nu guhuiminyina guagasue hagula ulondege ufuta waye nu Yehowa.—Yak. 5:14, 15.
7. Mukunda natshi tushigo naye guleba muila gula tuatshita ndaga yabola?
7 Mukulu mumoshi gu France mu jina dia Jean-Luc, wana wambela athu anyi ana gudisagesa gula atshita gubola egi: “Muthu wabonga gu meso a Yehowa ishigo muthu yonu khenji gatshitshilego gubola, uvi idi muthu munu wana gudisagesa gula watshita gubola nu wana gubalumuna mutshima.” (Lomo 7:21-25) Hene, gula watshita gubola, utangizago egi ushigo nu ndando. Jiya egi mukut’etu agasue, gu meso a Nzambi tuana tshita gubola. Tuana khala nu funu ya khenda jiakoma jia Nzambi mu njila ya gibawu.—Ef. 1:7; 1 Yone 4:10.
8. Gula tualeba muila, gudi nanyi tuajiya gukamba ukuateshi?
8 Aphangi etu a mala nu a akhetu a mu hungu mbaatuhana gikhesa! Aphangi ene mbakhala hehi ha gututegelela tangua tudi guatela lumene, nu mbaatuhana gikhesa. (Ish. 12:25; 1 Tes. 5:14) Phangi mumoshi wa mukhetu gu Nigéria mu jina dia Joy, walebele muila mu tangua dimoshi ngenyi, udi muzuela egi: “Ngajiyilego gujinga muabonga gula aphangi a mala nu a akhetu ashigo guene. Ukuateshi aphangi ana gunguhana wana gumonesa egi Yehowa wana hana mvutu gu isambu yami. Angukuatesele ha gujiya luholo lua guhana athu ako gikhesa gula aleba muila.” Tudi naye gujiya egi aphangi etu a mala nu a akhetu ashigo Nzambi hagula ajiye egi tudi nu funu ya gikhesa. Hene tudi naye guya mumona aphangi a gukula mu nyuma ha guawambela malamba etu hagula atuhane gikhesa.
GULA TUDI MULUA NU UKHASHI
9. Luholo lutshi Ngimbo 41:3 nu 94:19 yajiya gutuhana gikhesa?
9 Kamba ukuateshi gudi Yehowa. Gula tushigo gudivua muabonga, nga gula tudi mulua nu ukhashi wakola, yajiya gukhala lamba ha gukhala nu matangi abonga. Ngatshima Yehowa gajiyilego gutusaga mu luholo lua gushimana mangino, uvi mbawutuhana gikhesa nu ngolo jia gukolesela mu malamba ene. (Tanga Ngimbo 41:3; 94:19.) Ha gufezegesa, Yehowa wajiya gukuata mitshima ya aphangi Aklisto hagula aze atukuatese gu inzo, nga ha guya gutusumbila ima. Wajiya nji gutuma aphangi etu ha gukombelela mukunda nu esue. Nga ndo, wajiya nji gutukuatesa ha guwunguluga verse idi muhana gikhesa, gifua verse jidi muzuelela felela dia monyo watagana mbatuheta mu mavu ahe-ahe, tangua misongo nu malamba mbaahua.—Lomo 15:4.
10. Mukunda natshi phangi Isang galanduilego gudisagesa mukunda nu aksida atshitshile muene?
10 Phangi mumoshi gu Nigéria mu jina dia Isang, watshitshile aksida nu wabuile gikata. Munganga wamuwambelele egi mbagashigo muwenda luko. Phangi Isang udi muzuela egi: “Ngavuile diago lamba gu mutshima, muila wangulebele.” Yowu genji wana gudisagesa uu nu mangino ba? Ndo sha! Itshi yamukuatesele? Phangi Isang udi muzuela egi: “Ame nu mukaji’ami tuabembelego gukombelela Yehowa, nu tualanduile gulonguga Mbimbi yenji. Tuazudile nji desizio dia gumuhana mersi mukunda nu ndaga jiabonga jiana gututshitshila muene, nu felela dia monyo mbatuheta mu mavu ahe-ahe.”
Ikhale athu anyi adi nu ukhashi mu muila, ajiya gukhala nu gusuanguluga ha gulongesa lukuma luabonga (Tala paragrafe 11-13)
11. Luholo lutshi phangi Cindy ahetele gusuanguluga tangua akhalele nu ukhashi wakola?
11 Phangi mumoshi gu dimbo dia Mexico mu jina dia Cindy, wakatele misongo yakola, munganga wamuwambelele egi mbaashigo mujinga luko muavula. Itshi atshitshile ha gukolesela mu lamba diene? Lusugu luagasue akhalele gumusaga, yakhalele okazio wabonga gudi muene ha gulongesa minganga lukuma luabonga. Udi muzuela egi: “Gutshita ngenyi guangukuatesele ha gukuatesa athu ako, ha fundo dia gutangiza phamba luholo mbanguphandewa, nga lamba dia misongo ngakhalele muvua. Tala ndaga ngakhalele mutshita: Tangua ngakhalele muta maga nu minganga, ngakhalele guahula gula enya fami yawo adi gikuatshi. Gungima ngakhalele guahula egi mukunda natshi muatombele mudimo owu wakola? Gutshita ngenyi guakhalele gungukuatesa ha gujiya ndaga ngudi naye guawambela ha gukuata mitshima yawo. Avula mukatshi diawo akhalele gunguwambela egi akhashi ana guahula ndo lumene ha gujiya ‘gula adi gikuatshi.’ Akhalele gunguhana mersi avula. Ako akhalele gunguhana ba nimero awo a telefone. Mu sungi yene ya malamba ami, Yehowa wanguhanele gusuanguluga guavula, ndaga yene yana gungutuma ha gudihula muavula!”—Ish. 15:15.
12-13. Luholo lutshi aphangi anyi adi nu ukhashi ana longesa lukuma luabonga, nu mbuto jitshi ana guheta?
12 Muthu udi nu ukhashi mu muila wajiya guleba muila handaga ashigo luko mutshita mudimo wa gulongesa gifua luholo akhalele mutshita thomo. Ikhale ngenyi, aphangi avula ana heta luendu lua gulongesa lukuma luabonga. Gu États-Unis, phangi mumoshi wa mukhetu mu jina dia Laurel wabalegesele ivo 37 moshi’a mashinyi amoshi ana kuatesa athu ha guhuima (Poumon d’acier)! Wakhalele nu cancer, amuphandele iphungu yavula, wakhalele nji nu misongo holu dia gilema gienji. Uvi malamba awa agasue amukangelego njila ha gulongesa lukuma luabonga. Wakhalele mulongesa minganga nu athu akhalele muza gumutala gu inzo yenji. Mbuto itshi ahetele? Wakuatesele athu 17 ha gujiya giamatshidia gia Biblia! *
13 Phangi mumoshi mu jina dia Richard udi mukulu gu France. Wana kuatesa athu anyi ashigo nu luholo lua guwenda nga anyi adi mukata gu hôpital. Udi muzuela egi: “Ngana guawambela egi adi naye gukhala nu ndambo ya mikanda yetu hehi nawo. Gula athu ayimona, yajiya guakuatesa ha gusendesa guta nawo maga a Biblia. Ndaga eyi yana hana gikhesa gudi aphangi etu a mala nu a akhetu anyi ashigo nu luholo lua gulongesa inzo nu inzo.” Aphangi anyi ashigo nu luholo lua gulongesa inzo nu inzo ajiya gusonega mikanda nga gukalegela telefone ha gulongesa.
GULA TUSHIGO MUHETA INEMO MU ULONDEGI WA YEHOWA
14. Gifezegeselo gitshi kiawaha Fumu Davidi atubembele?
14 Gudi nu ndaga jiavula jiajiya gutshita egi ikhale lamba mukunda nu esue ha guheta inemo mu ulondegi wa Yehowa: Yajiya gukhala egi tuabua athu a gukola, tudi nu ukhashi mu muila nga ndaga jiko. Gula idi ngenyi tuajiya gulandula gifezegeselo gia Fumu Davidi. Davidi wakhalele gudifelela egi muene mbawutunga tempelo ya Nzambi. Uvi tangua amuwambelele egi ishigo muene watogewe ha guyitunga, wahanele ukuateshi gudi muthu Yehowa watombele ha gukalagala mudimo wene. Wahanele nji ima yavula yakuatesele ha gutunga tempelo yene. Davidi udi diago gifezegeselo kiawaha tudi naye gulandula!—2 Sam. 7:12, 13; 1 Gudi. 29:1, 3-5.
15. Luholo lutshi phangi Hugues ahetele luko ngolo tangua alebele muila?
15 Phangi mumoshi gu France mu jina dia Hugues, wakhalele mukata, hene akhalelego luko nu luholo lua gukhala mukulu mu hungu nga gutshita midimo yazonda-zonda gu inzo. Udi muzuela egi: “Thomo muila wangulebele, ngakhalele gudimona gifua ngushigo nu ndando. Uvi gungima, ngakotelesele egi ngudi naye gutshigina ndaga eji jiangubuila, ngasendesele nji gusuanguluga gukalegela Yehowa ngatshima ngudi nu ukhashi mu muila. Ngazudile desizio dia gukolesela. Mbangukhala gifua Gideona nu athu enji 300, ngatshima akhalele aguhuila uvi alanduile gulua!”—Manz. 8:4.
16. Longo ditshi tuajiya guzula mu gifezegeselo gia anjelo?
16 Anjelo a Yehowa akhala nji gifezegeselo giabonga mukunda nu esue. Mu sungi ya uhinyinyi wa Fumu Ahaba, Yehowa watogele anjelo ha guhana matangi awo ha gujiya luholo adi naye guhuiga fumu muene. Anjelo avula ahanele matangi awo. Uvi Yehowa watombele matangi a muanjelo phamba mumoshi nu wamuwambelele egi matangi aye adi abonga. (1 Maf. 22:19-22) Anjelo ako alebele muila ba? Nga ndo yajiya gukhala egi adihudile egi, ‘Mukunda natshi azudilego matangi ami?’ Tushigo nga nu gima gimoshi gidi mumonesa egi atshitshile ngenyi. Anjelo ana khala diago nu khadilo dia gudibulumuisa nu ana gutshigina egi lutumbu luagasue luye gudi Yehowa.—Manz. 13:16-18; Yat. 19:10.
17. Itshi tudi naye gutshita gula tualeba muila luholo tushigo muheta inemo mu ulondegi wa Yehowa?
17 Jiya egi tudi nu ginemo gia gutumbuisa jina dia Nzambi nu gulongesa Ufumu wenji. Ajiya gutuhana inemo mangino, hamene itambudiwa. Uvi ishigo inemo yana gutubuisa athu a ndando gu meso a Nzambi. Ndaga yana gutshita egi Yehowa nu aphangi etu atuzule nu ndando idi khadilo dietu dia gudibulumuisa. Hene, toga Yehowa agukuatese hagula ukhale muthu wa gudibulumuisa. Landula ifezegeselo idi mu Biblia ya athu akhalele nu khadilo dia gudibulumuisa. Khala hehi ha gukalegela aphangi ako gula luholo ludi guene.—Ngi. 138:6; 1 Phet. 5:5.
GULA ENYA MU TERITUARE YAYE ASHIGO MUTSHIGINA GIAMATSHIDIA
18-19. Luholo lutshi wajiya gukhala nu gusuanguluga ngatshima athu a mu terituare yaye ashigo mutshigina giamatshidia?
18 Walebele gale muila luholo athu a mu terituare yaye ana gutuna giamatshidia nga luholo wanago gusanga athu avula gu jinzo jiawo? Gula idi ngenyi, itshi wajiya gutshita ha gubamba nga ha gukhala nu gusuanguluga guavula? Galuanda “ Ndaga Wajiya Gukalagala ha Gulongesa Muavula” gadi mumonesa ndaga wajiya gutshita. Ndaga iko ya ndando idi egi, tudi naye gutadila mudimo wa gulongesa mu luholo luabonga. Idi mukotelesa itshi?
19 Landula gulongesa jina dia Nzambi nu Ufumu wenji. Yesu wayimonesele haphelo egi athu phamba azonda mbaaheta njila yana bata gu monyo. (Mat. 7:13, 14) Tangua tuana khala mu mudimo wa gulongesa, tuana khala nu luendu lua gukalagala hamoshi nu Yehowa, nu Yesu nu anjelo. (Mat. 28:19, 20; 1 Kol. 3:9; Yat. 14:6, 7) Yehowa wana gunana athu ana tshigina gumukombelela. (Yone 6:44) Hene, gula muthu gashigo mutshigina giamatshidia mangino, wajiya gutshigina mu masugu adi muza.
20. Luholo lutshi mukanda wa Yelemiya 20:8, 9 wajiya gutukuatesa gula tualeba muila?
20 Tuajiya guzula malongo avula mu lumene lua profete Yelemiya. Yehowa wamutumine ha guya mulongesa mu terituare imoshi ya lamba. Athu akhalele gumushinga nu gumulela ‘masugu agasue.’ (Tanga Yelemiya 20:8, 9.) Mu tangua dimoshi ngenyi, walebele muila nu watshiginyile gubemba. Uvi gabembelego. Mukunda natshi? Handaga ‘Mbimbi ya Yehowa’ yakhalele gifua tshuya mukatshi dia Yelemiya, gakhalelego nu luholo lua guyibamba! Esue nji tuajiya gudivua ngenyi gula tuazalesa matangi etu nu mutshima wetu nu ndaga jidi mu Mbimbi ya Nzambi. Gishina giene tudi naye gulonguga nu gutangigiza Biblia lusugu nu lusugu. Gutshita ngenyi, mbagutukuatesa ha gulandula gukhala nu gusuanguluga guavula, athu mbaatshigina nji giamatshidia.—Yel. 15:16.
21. Luholo lutshi tuajiya guheta ngolo gula ndaga imoshi ngenyi yatulebesa muila?
21 Phangi Deborah yonu tuazuelela gu gisendeselo udi muzuela egi: “Guleba muila gudi muheto wakola Satana wana kalegela.” Uvi miheto ya Satana ishigo yakola gubalega Yehowa. Hene, gula ndaga imoshi ngenyi yagulebesa muila, toga Yehowa ukuateshi. Muene mbawugukuatesa ha gulua nu ndaga jiabola tuana gutshita nga luholo tushigo athu atagana. Mbawugukuatesa ha gukolesela gula udi nu ukhashi. Mbawugukuatesa nji ha gukhala nu matangi abonga gu ndaga yatadila inemo ya mu ulondegi wenji. Luko, mbawugukuatesa ha gutadila mudimo wa gulongesa mu luholo luabonga. Hene, wambela Sh’etu wa mu dilu ndaga jiagasue jidi gugusagesa. Muene mbawugukuatesa ha guheta ngolo gula waleba muila.
LUNGIMBO 41 “ Ô Dieu, entends ma prière ”
^ par. 5 Mukut’etu agasue tuana guleba muila matangua ako. Mu longo edi, tuza muzuelela ndaga tuajiya gutshita tangua muila watuleba. Gifua luholo tuza guyimona, Yehowa wajiya gutukuatesa ha guheta ngolo gula muila watuleba.
^ par. 4 Mu longo edi, majina ako asombegesewe.
^ par. 12 Tanga lumene lua Laurel Nisbet mu Réveillez-vous ! ya 22 Janvier 1993.
^ par. 69 UKOTELESHI WA GIFUANESA: Phangi mumoshi wa mukhetu walebele muila mu tangua dimoshi ngenyi, uvi gungima udi mutangiza luholo akalegele Yehowa mu masugu abalega, nu udi musamba. Udi mujiya diago egi Yehowa wana jiya ndaga jiakalegele muene mu mudimo wenji.
