1. Hao nao maet wei for discourage hem affectim iumi?

EVRIDAY iumi feisim olketa problem and iumi traem best for deal witim. Bat hem no isi for deal witim olketa problem taem iumi feel discourage? So iumi need for ting lo wei for discourage olsem man for steal wea tekem from iumi feeling for no fraet, trust, and hapi wea iumi garem. Proverbs 24:10 hem sei: “Sapos iu feel wikdaon taem iu kasem trabol, bae iu no garem inaf strong.” Yes, wei for discourage savve mekem iumi wikdaon, and datwan bae mekem hem hard for iumi deal witim olketa problem wea kamap lo laef.

2. Wanem nao savve mekem iumi feel discourage, and wanem nao bae iumi storyim lo disfala article?

² Staka samting nao savve mekem iumi discourage. Samfala samting hem from iumiseleva, or maet from olketa samting wea happen raonem iumi. Insaed diswan hem wei wea iumi no perfect, olketa wik point blo iumi, and olketa health problem wea savve affectim iumi. Nara samting tu, iumi maet discourage bikos iumi no kasem wanfala assignment lo service blo Jehovah wea iumi laekem or maet territory wea iumi preach lo hem pipol no laek for lisin. Lo disfala article, iumi bae storyim samfala samting wea iumi savve duim for deal witim wei for discourage.

3. Wanem nao savve helpem iumi for garem stretfala tingting abaotem wei wea iumi no perfect?

³ Hem isi tumas for iumi no garem stretfala tingting abaotem olketa wik point blo iumi and wei wea iumi no perfect. From datwan, iumi maet tingse from iumi mistek staka taem, Jehovah bae no laekem iumi for go insaed lo niu world blo hem. Datkaen tingting savve spoelem iumi. Hao nao iumi shud ting lo  wei wea iumi no perfect? Bible talem hao only Jesus Christ nomoa hem perfect, “evriwan sin.” (Rome 3:23) Bat Man wea givim kam Bible hem no Man wea lukluk nomoa for olketa mistek blo iumi, or expectim for iumi mas perfect. Hem wanfala Dadi wea lovem iumi and laek for helpem iumi. Hem patient tu. Hem lukim wei wea iumi stragol for winim olketa wik point blo iumi and for garem stretfala tingting abaotem iumiseleva, and hem redi for helpem iumi.—Rome 7:18, 19.

4-5. Olsem 1 John 3:19, 20 talem, wanem nao helpem tufala sista hia for winim wei for discourage?

⁴ Tingim example blo Deborah and Maria. * Taem Deborah hem pikinini, staka taem olketa savve treatim hem nogud and datwan mekem hem feel iusles. Staka taem olketa no praisem hem. Gogo, datwan mekem hem garem negative tingting abaotem hemseleva. Taem hem mekem eni smol mistek, hem savve feel olsem hem no fit nao. Maria tu garem sem kaen problem. Olketa relative blo hem savve treatim hem lo wei wea mekem hem feel olsem hem no fit. From datwan, hem stragol witim disfala feeling dat hem iusles nomoa. Nomata bihaen hem kam insaed lo truth, hem feel olsem hem no fit for garem nem blo God!

⁵ Nomata olsem, tufala sista hia no stop for worshipim Jehovah. Why nao olsem? Wei for prea hem helpem tufala and tufala givim go evri wari blo tufala lo Jehovah. (Sams 55:22) Tufala luksavve hao Dadi blo iumi lo heven wea lovem iumi hem savve lo olketa samting wea iumi bin feisim bifor, and olketa negative tingting wea savve affectim iumi. Bat hem lukim tu gud samting wea stap lo heart blo iumi, nomata sapos iumi tingse iumi no garem datwan.—Readim 1 John 3:19, 20.

6. Taem samwan duim moa sem mistek, wanem nao bae hem duim?

⁶ Samwan maet traem best for stop for duim rong samting, bat hem maet foldaon moa lo datfala sem mistek and datwan mekem hem discourage. Hem tru, hem normal nomoa for feel guilty taem iumi sin. (2 Cor. 7:10) Bat iumi shud no ova tumas and feel nogud lo iumiseleva and sei: ‘Mi no fit nao. Hao, bae Jehovah savve forgivim mi tu?’ Olketa kaen negative tingting olsem hem no tru, and hem savve mekem iumi stop for servem Jehovah. Tingim wanem Proverbs 24:10 hem storyim dat taem iumi discourage, bae iumi no strong. Winim wei for duim datwan, hem gud for iumi stretem evri samting lo wei for prea lo hem and askem hem for forgivim iumi. (Aesaea 1:18) Taem Jehovah lukim hao iu barava repent and trae for change, hem bae forgivim iu. And tu, go lo olketa elder, olketa bae barava patient for  helpem iu for kamap gud moa lo spiritual wei.—Jas. 5:14, 15.

7. Why nao iumi shud no feel discourage taem iumi stragol for duim stret samting?

⁷ Jean-Luc, wanfala elder lo France, sei olsem abaotem olketa wea stragol witim wik point blo olketa: “Lo eye blo Jehovah, man wea raeteous hem no samwan wea no enitaem mekem mistek, bat hem samwan wea hem sorre for olketa mistek wea hem duim and evritaem repent.” (Rome 7:21-25) So no feel iusles taem iu stragol witim wanfala wik point. Remember, for kamap raeteous lo eye blo God hem no samting wea iumi kasem from wanem iumi duim, bat iumi kasem datwan bikos God hem kaen tumas and hem givim ransom.—Eph. 1:7; 1 John 4:10.

8. Taem iumi feel discourage, hu nao savve helpem iumi?

⁸ Olketa brata and sista blo iumi lo kongregeson savve encouragem iumi! Olketa maet lisin taem iumi need for story and talem olketa toktok wea savve encouragem iumi. (Provebs 12:25; 1 Thess. 5:14) Joy, wanfala sista lo Nigeria wea stragol witim wei for discourage, hem sei: “Sapos mi no garem olketa brata and sista, mi no savve nao hu nao bae encouragem mi. Olketa brata and sista blo mi nao pruv wea showimaot Jehovah ansarem olketa prea blo mi. Hao olketa encouragem mi hem helpem mi for encouragem olketa narawan tu.” Bat, iumi need for tingim hao olketa brata and sista blo iumi maet no evritaem savve wanem taem nao iumi needim encouragement. So maet iumi need for go and story lo wanfala mature brata or sista and talem olketa abaotem problem blo iumi.

9. Hao nao Sams 41:3 and 94:19 hem encouragem iumi?

⁹ Askem Jehovah for sapotim iumi. Taem iumi feel sik and especially taem iumi deal witim wanfala sik wea no savve finis, iumi maet faendem hem hard for garem positive tingting. Jehovah bae no stretawe kiurim iumi, bat hem bae comfortim and givim iumi strong wea iumi needim for winim datwan. (Readim Sams 41:3; 94:19.) Olsem example, hem maet muvim olketa nara brata and sista for kam helpem iumi lo taem wea iumi needim, olsem for duim samfala waka lo haos or for duim shopping. Hem maet muvim tu olketa brata for kam prea witim iumi. Or hem maet helpem iumi for tingim moa olketa toktok lo Bible wea savve comfortim iumi, olsem datfala hope for perfect laef wea no eniwan bae sik or kasem pain lo niu world wea bae kam.—Rome 15:4.

10. Why nao Isang no gohed feel sorre bihaen accident blo hem?

¹⁰ Isang, wea stap lo Nigeria, hem kasem wanfala accident, and bihaen datwan hem paralyze. Doctor blo Isang talem hem hao bae hem no fit for wakabaot moa. Hem sei: “Mi barava feel sorre tumas.” Bat waswe, Isang gohed for feel sorre olowe? Nomoa! Wanem nao helpem hem? Hem sei: “Mi and waef blo mi gohed for prea lo Jehovah and studyim Bible. And tu, mifala disaed strong for ting raonem olketa blessing blo mifala wea insaed diswan hem hope for laef lo niu world blo God.”

11. Hao nao Cindy gohed hapi nomata hem barava sik?

¹¹ Cindy, wea stap lo Mexico, hem kasem wanfala sik wea doctor sei datwan bae killim hem dae. Hao nao hem deal witim datwan? Taem hem gohed for kasem treatment, goal blo hem for mas preach evriday. Hem raet olsem: “Taem mi duim datwan, mi gohed tingim olketa narawan and mi no tingim tumas operation blo mi, pain wea mi kasem and wei wea mi sik tumas. Wanem mi duim nao: Taem mi story witim olketa doctor or nurse, mi savve ask abaotem famili blo olketa. Then mi savve askem olketa, why nao olketa laekem disfala  waka wea no isi. Bihaen datwan, mi luksavve lo topic wea olketa bae laekem, so mi storyim datwan. Staka lo olketa doctor or nurse hia sei, no staka pipol savve interest for ask, ‘Hao nao iufala?’ And staka olketa thankiu lo mi from wei wea mi tingim olketa. Samfala givim address and namba blo olketa for mi. Nomata mi feisim disfala barava hard taem lo laef blo mi, hapi wea mi kasem from Jehovah, miseleva bat sapraes lo hem!”—Provebs 15:15.

12-13. Hao nao samfala wea sik or olo savve fit for share lo ministry, and wanem nao savve kamaot from datwan?

¹² Olketa wea sik and olo maet feel discourage bikos olketa no fit nao for duim wanem olketa laek for duim lo ministry. Nomata olsem, staka lo olketa faendem wei for preach. For 37 years, wanfala sista lo United States wea nem blo hem Laurel hem mas leidaon insaed wanfala machine wea helpem hem for brith! Hem garem tu cancer, hem mas go thru lo olketa operation, and hem garem sik wea affectim skin blo hem. Bat nomata hem kasem olketa bigfala challenge olsem, datwan no stopem hem for preach. Hem preach lo olketa nurse and olketa narawan wea waka for medical wea kam for helpem hem. Wanem nao kamaot from datwan? Hem helpem samting olsem 17 pipol for lane abaotem Jehovah! *

¹³ Richard, wanfala elder lo France, hem garem wanfala gud idea for olketa wea no savve lusim haos, or wea stap lo ples for lukaftarem olketa olo. Hem sei: “Hem bae gud sapos olketa garem wanfala ples wea pipol savve lukim for putim olketa literature blo iumi. Taem pipol lukim, bae olketa laek for savve and ask abaotem. Datwan bae encouragem olketa brata and sista blo iumi wea no savve duim haos tu haos.” Olketa wea no savve lusim haos savve share tu lo ministry lo wei for raetem olketa leta and telephone witnessing.

14. Wanem nambawan example nao King David showimaot?

¹⁴ Bikos lo age blo iumi, health problem, or olketa nara samting, iumi maet no fit for kasem wanfala assignment or privilege lo kongregeson or circuit. Sapos olsem, example blo King David savve helpem iumi. Taem olketa talem hem hao Jehovah no chusim hem for buildim temple blo God, wea datwan hem samting wea David barava laek for duim, David barava sapotim man wea God chusim for duim datfala assignment. And tu, David hem givim staka contribution for sapotim datfala project. Datwan hem nambawan example for followim!—Mektu Samuel 7:12, 13; Fas Kronikols 29:1, 3-5.

15. Hao nao Hugues winim wei for discourage?

¹⁵ Bikos lo olketa health problem, Hugues,  wanfala brata lo France, hem stop for serve olsem wanfala elder, and tu, nomata olketa smol waka lo haos hem no fit for duim nao. Hem sei: “Lo firstaem mi barava feel discourage and mi feel iusles. Bat, gogo mi luksavve hao mi mas acceptim dat samfala samting mi no fit for duim nao. Mi hapi for gohed servem Jehovah and duim nomoa wanem mi fit for duim. Mi disaed for no givap. Olsem Gideon and thri handred man blo hem, nomata olketa taed olketa gohed for faet nomoa. Mi bae duim olsem tu!”—Jajis 8:4.

16. Wanem nao iumi lanem from example blo olketa angel?

¹⁶ Olketa faithful angel showimaot nambawan example. Olsem example, wantaem Jehovah askem olketa angel for givim olketa idea lo hao for olketa trikim datfala nogud King Ahab, staka angel nao givim olketa idea. Bat God chusim wanfala angel and talem hem hao idea blo hem bae waka. (Fas Kings 22:19-22) Waswe, olketa nara faithful angel discourage and ting, ‘Why nao mi weistim taem blo mi for givim idea?’ No eni samting showimaot hao olketa angel ting olsem. Olketa angel barava hambol and laekem for evri praise and glory for hem go lo Jehovah.—Jajis 13:16-18; Rev. 19:10.

17. Wanem nao iumi savve duim sapos iumi discourage bikos iumi no kasem wanfala privilege lo service blo Jehovah?

¹⁷ Iumi mas tingim datfala privilege wea iumi garem for talemaot nem blo God and Kingdom blo hem. Olketa assignment savve change, bat datwan hem no samting wea mekem iumi spesol lo God. Samting wea mekem Jehovah and olketa brata and sista blo iumi for lovem iumi, hem taem wea iumi hambol and luksavve lo wanem iumi fit for duim. So askem Jehovah for helpem iu for hambol and for luksavve lo wanem iu fit for duim. Tingim staka gudfala example lo Bible abaotem olketa wea hambol and luksavve lo wanem olketa fit for duim. Willing for helpem olketa brata blo iu lo eni samting wea iu fit for duim.—Sams 138:6; 1 Pet. 5:5.

18-19. Hao nao iu savve gohed hapi lo ministry blo iu nomata sapos pipol lo territory blo iu no laek lisin?

¹⁸ Waswe, samfala taem iu maet discourage bikos pipol lo territory blo iu no interest or tu-thri pipol nomoa iu savve meetim lo haos? Taem olsem, wanem nao iu savve duim for gohed hapi or for enjoyim ministry? Samfala idea stap lo list wea insaed lo box “ Hao for Iumi Enjoyim Ministry blo Iumi.” And tu, hem barava important for garem stretfala tingting abaotem ministry. Wanem nao datwan minim?

 ¹⁹ Iumi evritaem tingim hao waka blo iumi hem for talemaot nem blo God and Kingdom. Jesus talem finis hao tu-thri nomoa bae followim disfala road for laef. (Matt. 7:13, 14) Taem iumi duim ministry, iumi garem privilege for waka tugeta witim Jehovah, Jesus, and olketa angel. (Matt. 28:19, 20; 1 Cor. 3:9; Rev. 14:6, 7) Jehovah nao leadim kam pipol wea laek for servem hem. (John 6:44) So sapos samwan hem no lisin lo message blo iumi distaem, maet next taem hem bae lisin.

20. Olsem Jeremaea 20:8, 9 storyim, wanem nao iumi savve duim for winim wei for discourage?

²⁰ Iumi savve lanem staka samting from profet Jeremiah. Hem kasem assignment for waka lo territory wea barava hard. Pipol lo there, evriday mekfani and tok spoelem hem. (Readim Jeremaea 20:8, 9.) Gogo wantaem hem barava discourage and laek for givap. Bat hem no duim datwan. Why nao olsem? Toktok blo Jehovah hem olsem fire insaed lo Jeremiah, and hem hard for holem bak datwan! Datwan semsem tu witim iumi distaem, sapos iumi fulimap mind and heart blo iumi witim toktok blo God. Datwan hem wanfala reason why iumi mas studyim Bible evriday and ting raonem datwan. Taem iumi duim olsem, iumi bae gohed hapi and bae iumi barava duim gud lo ministry blo iumi.—Jeremaea 15:16.

21. Nomata wanem nao mekem iumi discourage, hao nao iumi savve winim datwan?

²¹ Deborah wea iumi storyim bifor, hem sei “Satan iusim wei for discourage olsem wanfala weapon for againstim iumi.” Bat weapon blo Satan bae no winim Jehovah God. So prea lo Jehovah for sapotim iu taem iu feel discourage. Hem bae helpem iu for deal witim olketa wik point blo iu, and wei wea iu no perfect. Hem bae sapotim iu taem iu sik. Hem bae helpem iu for garem stretfala tingting abaotem olketa assignment lo waka blo hem. And hem bae helpem iu for garem positive tingting abaotem ministry blo iu. And talemaot evri wari blo iu lo Dadi blo iu lo heven. Hem bae helpem iu for winim wei for discourage.