1. Dahme kak wiawihong kitail ma kitail mworusala?

EHUEHU rahn kitail kin lelohng kahpwal kan oh song uwen atail kak en dadaur pahn kahpwal pwukat. Ahpw e apwal en dadaur pahn atail kahpwal kan ni ahnsou me kitail kin mworusala. Eri kitail anahne kilengwohng mworusala duwehte lipirap emen me kak pirapahsang atail koapworopwor, eimah, oh peren. Lepin Padahk 24:10 mahsanih: “Ma ke me luwet ni ahnsou apwal, ke me uhdahn lamalam luwet.” Eri ni ahnsou me kitail kin mworusala, kitail pil kin luwetala oh kin uhdahn apwal en dadaur pahn atail kahpwal kan.

2. Dahme kak kahrehiong kitail en mworusala, oh dahme kitail pahn koasoiapene nan iren onop wet?

² Kitail kak mworuskihla soahng tohto. Ekei soahng pwukat iei atail sapwung kan me kitail kin wiahda, soahng kan me kitail sohte kak wia, de soumwahu. De ele kitail kin mworusala pwehki kitail sohte alehdi pwukoa ehu me kitail men wia nan sapwellimen Siohwa doadoahk, de pwehki kitail anahne kalohk wasa me pali tohtohn aramas sohte kin rong dahme kitail kin kalohki. Nan iren onop wet, kitail pahn koasoiapene soahng kan me kitail kak wia ni atail kin dadaur pahn mworusala.

3. Dahme kak sewese kitail ahnsou me kitail kin nsensuwedkihla pein kitail oh atail sapwung kan?

³ E mengei ong kitail en nsensuwedkihla pein kitail oh sapwung kan me kitail kin wiahda. Eri kitail kakete medewe me pwehki kitail kin wiahda sapwung kan, Siohwa sohte pahn ketin kupwurki kitail en iang mi nan Paradais. E kak uhdahn keper en medewe met. Ia pahn atail pepehm ong atail sapwung kan? Paipel mahsanih me Sises sohte ketin dipada, ahpw aramas  koaros “dipadahr.” (Rom 3:23) Ahpw Siohwa sohte kin ketin kilangwohngete atail sapwung kan de kasik kitail en unsek. Ahpw, e kin ketin wia Sahm limpoak men me ketin kupwurki sewese kitail. E pil kin ketin kanengamah. E ketin mwahngih me pali tohto en kitail kin anahne nantihong wia dahme pwung oh en dehr nsensuwedkihla pein kitail. E pahn ahnsou koaros ketin sewese kitail.​—Rom 7:18, 19.

4-5. Dahme 1 Sohn 3:19, 20 mahsanih me sewese sister riemen en powehdi mworusala?

⁴ Tehk dahme wiawihong Deborah oh Maria. * Ni ahnsou me Deborah tikitik, eh peneineio sohte kin kadekohng ih oh kahrehda e kin nsensuwedkihla pein ih. Irail sohte kin kapinga ih. Eri, ni ahnsou me e laudla, e kin ahneki madamadau sapwung duwen pein ih. Ni ahnsou me e kin wiahdahte kisin sapwung ehu, e kin medewe me e sohte kak wia mehkot pwung. Maria ahneki soangen kahpwalohte. Kiseh kan kin kanamenekih. Pwehki met, e kin ahneki pepehm me sohte katepe. Pil mwurin eh papidaisla, e kin medewe me e sohte warohng en wia emen Sounkadehdehn Siohwa.

⁵ Ahpw, sister riemen pwukat sohte uhdihsang papah Siohwa. Dahme kahrehda? Ira kin kapakapohng Siohwa oh padahkihong duwen ara pepehm. (Mel. 55:22) Ira sukuhlkihdi me Samatailo me ketiket nanleng ketin mwahngih me soahng suwed kan me kin wiawihong kitail kak kahrehiong kitail en nsensuwedkihla pein kitail. Ahpw e pil kin ketin mwahngih irair mwahu kan me kitail ahneki, mehnda ma kitail sohte medewe me mie atail irair mwahu kan.​—Wadek 1 Sohn 3:19, 20.

6. Dahme emen kakete wia ma e pwurehng wiahda sapwung me e wiahda mwoweo?

⁶ Emen me ele kin songosong laud pwehn uhdihsang wia mehkot sapwung kak pwurehng wiahda sapwungohte oh mworuskihla. Kitail kin kalapw nsensuwedla ni atail wiahda dihp. (2 Kor. 7:10) Ahpw kitail en dehr nohn nsensuwedkihla sapwung me kitail wiahda oh medewe, ‘Sohte katepei. Siohwa sohte pahn kak ketin mahkohng ie.’ Met sohte mehlel, oh kak kahrehiong kitail en uhdihsang papah Siohwa. Tamataman dahme kitail wadek nan Lepin Padahk 24:10​—kitail kin luwetala ni ahnsou me kitail kin mworusala. Ahpw, “kapwungala mahs ire pwukat” rehn Siohwa sang ni omw kapakap oh peki sapwellime mahk. (Ais. 1:18) Ni ahnsou me Siohwa ketin mwahngih me ke uhdahn koluhla oh nantihong en wekila, e pahn ketin mahkohng uhk. Patehng met, koasoiong elder kan. Ni kanengamah, re pahn sewese iuk en pwurehng kehlailda.​—Seims 5:14, 15.

7. Dahme kahrehda kitail en dehr mworusala ma e apwal ong kitail en wia dahme pwung?

 ⁷ Jean-Luc, emen elder nan France, kangoangehkin irail kan me kin dadaur pahn ar luwet kan: “Aramas pwung men ong Siohwa kin koluhla oh song en wekila, ahpw kaidehn aramas men me sohte douluhl kin wiahda sapwung.” (Rom 7:21-25) Eri ke dehr medewe me sohte katepomw ma ke kin dadaur pahn luwet ehu. Pwehki kitail koaros kin wiahda sapwung, kitail koaros anahne sapwellimen Siohwa kadek sapan, me e ketikihda sang ni meirong en pweinen pweipwei sapahlo.​—Ep. 1:7; 1 Sohn 4:10.

8. Ni ahnsou me kitail kin mworusala, ihs me kitail kak peki reh sawas?

⁸ Riatail kan nan mwomwohdiso pahn kangoange kitail! Irail kak rong kitail ni atail pahn koasoiong irail, oh pahn kangoange kitail. (Lep. Pad. 12:25; 1 Des. 5:14) Joy, emen sister nan Nigeria me kin lokolok pwehki mworusala, koasoia: “Dahme I pahn wia ma sohte riei Kristian kan? Kangoang me riei Kristian kan kin kihong ie iei kasalepen sapwellimen Siohwa pasapeng ong ei kapakap kan. I pil sukuhlkihsang irail ia duwen en kangoange meteikan me mworusala.” Ahpw, kitail anahne tamataman me riatail Kristian kan ele sohte pahn ahnsou koaros ese iahd me kitail anahne kangoang. Eri kitail anahne kohla tuhwong riatail Kristian me koahiek oh ndaiong me kitail anahne sawas.

9. Ia duwen Melkahka 41:3 oh 94:19 eh kangoange kitail?

⁹ Kilenglahng Siohwa pwehn ale sawas. Ni ahnsou me kitail kin soumwahuda ahpw mehlel ma kitail kohwahki soumwahu ehu, ele kitail kin diarada me e apwal en ahneki madamadau pwung. Mendahki Siohwa sohte kin ketin kamwahwihala atail soumwahu ni ahnsou wet, e kin ketin kamweitkitailla oh kak ketikihong kitail kehl me kitail anahne pwehn dadaur. (Wadek Melkahka 41:3; 94:19.) Karasepe, e kak ketin kamwakid riatail Kristian kan en sewesehkin kitail ekei doadoahk nan imwatail de sewese kitail ong netinet. E kak ketin doadoahngki riatail kan en iang kitail kapakap. De ele e kak ketin sewese kitail en tamanda sapwellime Mahsen kansenamwahu kan, me duwehte koapworopwor kaselel en mour unsek me sohte soumwahu oh medek nan sampah kapwo.​—Rom 15:4.

10. Dahme kahrehda Isang sohte kolokolete mworusala mwurin eh lelohng aksident?

¹⁰ Isang, me kin mi Nigeria, lelohng aksident ehu me kahrehiong en mwoatorala. Eh toahkteo ndaiong me e sohla pahn kak pwurehng alu. Isang nda: “I nan kapehd tikitikla oh sohla ahi koapworopwor.” Ahpw e ahneki tohr pepehmo? Soh! Dahme sewese ih? Isang koasoia: “Ngehi oh ei pwoudo sohte kin uhdihsang kapakap ong Siohwa oh onopki sapwellime Mahsen. Se pil koasoanehdi en kalahnganki soahng mwahu kan me se ahneki, iangahki aht koapworopwor en mour nan sapwellimen Koht sampah kapwo.”

11. Ia duwen Cindy eh diar peren erein eh soumwahu?

¹¹ Cindy, me kin mi Mexico, ahnekihda soumwahu ehu me e kakete mehkihla. Dahme e wia pwehn kak dadaurete? Ni ahnsou me e kin aliale sawaspen wini, e wiahda eh mehn akadei en kalohk rahn koaros. E ntingihedi: “Ei wia met sewese ie en medewe meteikan a kaidehn ahi pahn ale pwalo, uwen medek de soumwahu me I ahneki. Eri ih met me I kin wia: Erein ei koasoakoasoiong toahkteo de nurse kan, I kin idek duwen ar peneinei kan. Mwuhr, I kin idek dahme kahrehda re pilada doadoahk apwalo. Mwurin mwo, e kin mengei en pilada dahme ien koasoia me re pahn perenki. Tohtohn irail kin nda me malaulau me soumwahu me kin  idek rehrail, ‘Ia iromw?’ Oh me tohto kalahnganki ei nsenohkin irail. Ekei pil kihong ie neirail adres de neirail nempehn delepwohn. I ese me Siohwa pahn ketin sewese ie pwehn dadaur nan ahnsou apwal wet. Ahpw I pwuriamweiki uwen peren me e ketikihong ie.”​—Lep. Pad. 15:15.

12-13. Ia duwen ekei me soumwahu kan ar kak iang kalohk, oh ia imwilahn met?

¹² Irail kan me soumwahu ele kin mworusala pwehki re sohte kak kalohk ni uwen me re men wia. Ahpw, me tohto diarada ahl kei pwehn iang kalohk. Nan Wehin Amerika, emen sister me adaneki Laurel anahne wonohn nan misihn ehu sounpar 37 pwehn sewese ih en kak esingek. E pil ahneki soumwahu en kanser, ale ekei pwal, oh soumwahu ehu ni kilio. Ahpw soumwahu laud pwukat sohte kauhdihsang eh kalohk. E kin kalohk ong nurse kan oh tohndoadoahk teikan me kin kohla ni imweo. Ia imwilahn met? E sewese aramas 17 en esehla duwen Siohwa! *

¹³ Richard, elder men nan France, kihda pilipil mwahu ehu ong irail kan me sohte kak kohkohsang imwarail kan. “I kangoange irail en kasalehda pwuhk oh makasihn kan pwe aramas akan en kilang. Ni ahnsou me aramas alu daulih, irail pahn kilang oh idek duwen met. Met kak kangoange riatail Kristian kan me sohla kak iang kalohk ihmw lel ihmw.” Irail kan me sohte kak kohkohsang imwarail kan pil kak iang doadoahk en kalohk sang ni ar doadoahngki delepwohn oh ntingihada kisinlikou kan.

14. Mehn kahlemeng mwahu dah me Nanmwarki Depit kasalehda?

¹⁴ Mie kahrepe tohto me kitail sohte alehdi pwukoa me kitail mwahuki nan sapwellimen Siohwa doadoahk. Karasepe, ele kitail mahla de ahneki kahpwal kan en paliwar, de mie ekei irair teikan. Ma ke mi nan irair wet, kitail kak sukuhlkihsang mehn kahlemeng en Nanmwarki Depit. Depit uhdahn men kauwada sapwellimen Koht tehnpas sarawio, ahpw Siohwa ketin pilada emen tohrohr en wia met. Depit utungada laud me alehdi pwukoa en wia met, oh kihda kohl oh silper tohto ong koasoandio. Ia uwen Depit eh wia mehn kahlemeng mwahu ong kitail!​—2 Sam. 7:12, 13; 1 Kron. 29:1, 3-5.

15. Ia duwen Hugues eh powehdi mworusala?

¹⁵ Pwehki soumwahu en paliwar, Hugues, brother men nan France, uhdihsang papah nin duwen emen elder, oh e pil sohte kak apwalih pwukoa tikitik kan ni imweo. E ntingihedi: “Nin tapio, I pehm me sohte katepei oh uhdahn mworusala. Ahpw ahnsou kis mwuhr, I kilang me e uhdahn kesempwal ong ie en  uhdihsang nsensuwedki soahng kan me I sohla kak wia. Eri I kakehr perenki dahme I kakete wia nan sapwellimen Siohwa doadoahk. I koasoanehdi teng en dehr uhdi. Duwehte Kidion oh nah ohl silipwukio me pwangadahr, I sohte pahn uhdihsang pei!”​—Sounkopwung 8:4.

16. Dahme kitail kak sukuhlkihsang mehn kahlemeng en tohnleng ko?

¹⁶ Tohnleng lelepek kan wia mehn kahlemeng mwahu. Karasepe, pak ehu Siohwa ketin mahsanihong tohnleng ko en pilada ia duwen ar kak pitihedi Nanmwarki suwed Eihap. Ekei tohnleng ko wiahda pilipil kei. Ahpw Koht ketin pilada emen tohnleng ko oh mahsanihong me eh pilipilo pahn pweida. (1 Nan. 22:19-22) Ia duwe, ekei tohnleng lelepek ko mworusala, oh medewe, ‘Ia katepen ei kawehkihla mwahl ahnsou kihda ahi pilipil?’ Uhdahn soh. Tohnleng ko uhdahn aktikitik oh men kaping koaros en kowohng Siohwa.​—Sounkopwung 13:16-18; Kaud. 19:10.

17. Dahme kitail en wia ma kitail nsensuwedla pwehki mie pwukoa kan nan sapwellimen Siohwa doadoahk me kitail sohte ahneki?

¹⁷ Tamataman me pwais keieu kaselel me kitail ahneki iei en wia emen Sounkadehdehn Siohwa oh kalohki duwen Wehio. Ele kitail kin alehdi pwukoa ehu de sohla ahneki pwukoa, ahpw kaidehn mepwukat me pahn kahrehiong kitail en kesempwal ong Koht. Ma kitail kin aktikitik, kitail pahn kesempwal ong Siohwa oh riatail Kristian kan. Eri peki Siohwa en ketin sewese iuk en kolokolete aktikitik. Medewehla mehn kahlemeng mwahu koaros en sapwellimen Siohwa ladu lelepek kan me kileldi nan Paipel. Perenki papah riomw Kristian kan ni ahl sohte lipilipil me ke kak.​—Mel. 138:6; 1 Pit. 5:5.

18-19. Ia duwen omw kak ahneki peren nan kalohk mendahki aramas akan nan omw wasahn kalohk mwomwen sohte men rong?

¹⁸ Mie pak ke kin mworusala pwehki aramas akan nan omw wasahn kalohk mwomwen sohte men rong de aramas malaulaute me ke kin tuhwong ni imwarail kan? Nan soangen irair wet, ia duwen atail kak kolokol oh pil kalaudehla atail peren? Ekei kahk kan kileldi nan koakono “ Ahl kan en Perenki Omw Doadoahk en Kalohk.” E pil kesempwal en ahneki madamadau pwung ong doadoahk en kalohk. Ia wehwehn met?

¹⁹ Tamataman me kahrepen atail kin kalohk iei pwehn kadehdehda mwaren Koht oh padahkihong  meteikan duwen Wehio. Sises ketin kasalehda ni sansal me me malaulaute me pahn idawehn ih. (Mad. 7:13, 14) Ni ahnsou me kitail kin kalohk, kitail ahneki pwais kaselel en iangih Siohwa, Sises, oh tohnleng kan doadoahk. (Mad. 28:19, 20; 1 Kor. 3:9; Kaud. 14:6, 7) Siohwa kin ketin raparapahki aramas akan me men papah ih. (Sohn 6:44) Eri ma aramas emen sohte men rong dahme kitail kin kalohki ni ahnsou wet, ele e pahn rong ahnsou me kitail pwurehng koasoiong ih.

20. Dahme Seremaia 20:8, 9 padahkihong kitail duwen en powehdi mworusala?

²⁰ Kitail kak sukuhlki soahng tohto sang soukohp Seremaia. Wasa me e pekederla ie pwehn kalohk uhdahn apwal. Aramas akan kin kasarowe oh kamwamwahlih “ahnsou koaros.” (Wadek Seremaia 20:8, 9.) Ehu ahnsowo, e uhdahn mworusala me kahrehda e men uhdihsang kalohk. Ahpw e sohte wia met. Dahme kahrehda? ‘Sapwellimen Siohwa mahsen’ rasehng kisiniei me lullul nan kapehden Seremaia, oh e sohla kak kolokol loale! Kitail kak duwehte ih ma kitail kin onopki Paipel ehuehu rahn oh doudouloale. Eri kitail pahn ahneki peren laud nan kalohk oh aramas tohto pahn men rong kitail.​—Ser. 15:16.

21. Ia duwen atail kak kana ni atail powehdi mworusala, sohte lipilipil kahrepe dah?

²¹ Deborah, me kitail koasoiapene mwoweo, nda: “Sehdan kin doadoahngki mworusala rasehng mehn mahwen kehlail ehu ong kitail.” Ahpw Siohwa Koht uhdahn ketin kehlailsang Sehdan oh nah mehn mahwen kan koaros. Eri sohte lipilipil kahrepe dah me ke kin mworuskihla, peki sapwellimen Siohwa sawas. E pahn ketin sewese iuk en dadaur pahn omw soh unsek oh luwet kan. E pahn ketin sewese iuk ni omw soumwahu. E pahn ketin sewese iuk en kolokol madamadau toupahrek nan omw pwukoa kan. Oh e pahn ketin sewese iuk en ahneki madamadau pwung nan omw doadoahk en kalohk. Patehng met, kapakap ong Semomw limpoako oh padahkihong ia uhdahn omw pepehm. Sang ni sapwellime sawas, ke kak kana ni omw powehdi mworusala.