1. Сар шај о обесхрабрување те влијајнел упри аменде?

СЕКОВА диве соочинаја амен проблеменцар хем трудинаја амен те икљова ленцар ко крајо. Ама, бут попхаро тано те соочина амен е проблеменцар кеда сием обесхрабриме. Адалеске, ко обесхрабрување ваљани те дикха сар чор со шај те чорел амендар амари доверба, и храброст хем о бахталипе. Ко Изреки 24:10 пишинела: „Ако обесхрабринеа тут ко диве кеда иси тут неволја, тли сила ка слабонел“. Значи, о обесхрабрување шај те лел амари сила, хем адава керела те овел аменге попхаро те икљова ко крајо е проблеменцар.

2. Кола буќа шај те обесхрабринен амен, хем со ка дикха ки акаја статија?

² Иси бут буќа со шај те обесхрабринен амен. Несаве лендар тане амаре негативна мисле баши аменде, амаре грешке или о насвалипе. Исто аѓаар, шај те ова обесхрабриме ако на добинаја и задача со мангаја ла ки служба е Јеховаске или ако проповединаја ко подрачје коте со о мануша на мангена те шунен. Ки акаја статија ка дикха со шај те кера те на ачхова обесхрабриме.

3. Со шај те поможинел аменге те овел амен исправно стави баши амари несовршеност?

³ Бут тано локхо те овел амен погрешно стави баши амари несовршеност хем башо амаре грешке. Тегани шај те мислина кај адалеске со грешинаја, о Јехова нане те мангел те живина ко рај. Асавко размислибе шај те овел бут опасно. Сар ваљани те дикха ки амари несовршеност?  И Библија вакерела кај освен о Исус Христос, са о мануша грешинѓе (Рим. 3:23). Ама, о Јехова на концентриринела пе ко амаре грешке хем на очекујнела амендар те ова совршена. Наместо адава, ов тано Дад пхердо мангипаја со мангела те поможинел аменге. Исто аѓаар, ов тано стрпливо. Ов дикхела сар бут џене амендар трудинена пе те постапинен исправно хем те овел лен исправно стави баши песте, адалеске мангела те поможинел аменге (Рим. 7:18, 19).

4-5. Спрема 1. Јованово 3:19, 20, со поможинѓа е дује пхењенге те на ачховен обесхрабриме?

⁴ Те дикха о пример е Деборакоро хем е Маријакоро. * Кеда сине тикни е Деборакири фамилија бут пути понашинела пе сине лаја лошно хем адава керѓа те осетинел пе понижими. Ретко пофалинена ла сине. Адалеске кеда барили дикхела сине бут негативно ки песте. Кеда керела сине тикне грешке, мислинела сине кај ништо шукар нашти те керел. Е Марија да сине ла слично проблеми. Лакири фамилија понижинела ла сине. Адалеске почминѓа те мислинел кај на врединела ништо. Откеда крстинѓа пе да, мислинела сине кај нане доволно шукар те пхиравел е Девлескоро анав!

⁵ Сепак акала дуј пхења на чхинавѓе те служинен е Јеховаске. Соске? Јекх бути со керѓе тани молинѓе пе е Јеховаске хем вакерѓе леске сар осетинена пе (Пс. 55:22). Ола халиле кај амаро небесно Дад со мангела амен џанела кај о лошна буќа со случинѓе пе аменге шај те керен те дикха негативно ки аменде. Ама, исто аѓаар, ов дикхела о шукар особине ки аменде, чак ако амен мислинаја кај нане амен. (Читин 1. Јованово 3:19, 20.)

6. Сар шај некој те реагиринел ако палем керела исто грешка?

⁶ Некој со трудинела пе те чхинавел те керел нешто сој погрешно шај те обесхрабринел пе ако керела и исто грешка. Нормално тано те осетина амен џи негде крива кеда грешинаја (2. Кор. 7:10). Ама, на ваљани те џа ки крајност хем те осудина амен, аѓаар со ка мислина: „На овела ман ништоске. О Јехова никогаш нане те простинел манге“. Ама, адава нане чаче. Асавко негативно размислибе шај те керел те чхинава те служина е Јеховаске. Ма бистре адава со читинѓем ко Изреки 24:10 — амари сила ка слабонел кеда сием обесхрабриме. Наместо адава, роде е Јехова ки молитва хем роде лестар те простинел туке (Иса. 1:18). Кеда ка дикхел кај искрено каинеа тут, ов ка простинел туке. Исто аѓаар, кер лафи е старешиненцар. Ола стрпливо ка поможинен туке палем те ове духовно зорало (Јак. 5:14, 15).

7. Соске на ваљани те обесхрабрина амен ако аменге пхаро те кера адава сој исправно?

 ⁷ О Жан-Лук, јекх старешина тари Франција, вакерела околенге со иси лен слабост хем боринена пе лаја кај „о праведно мануш англо Јехова нане адава со никогаш на грешинела него окова каске сој жал башо пле грешке хем секогаш каинела пе“ (Рим. 7:21-25). Адалеске ма мислин кај на врединеа адалеске со иси тут слабост хем боринеа тут лаја. Ма бистре сарине грешинаја, хем адалеске ваљани аменге е Јеховаскоро шукарипе со на заслужинаја ле кова со дела ле преку и откупнина (Еф. 1:7; 1. Јов. 4:10).

8. Кастар шај те рода помош кеда сием обесхрабриме?

⁸ Кеда сием обесхрабриме шај те рода помош таро амаре пхраља хем пхења — амари духовно фамилија! Ола шај те шунен амен кеда иси амен потреба те кера лафи хем пумаре лафенцар шај те охрабринен амен (Изр. 12:25; 1. Сол. 5:14). И Џој, јекх пхен тари Нигерија која со сине обесхрабрими вакерела: „Со ка овел сине манцар те на овен сине о пхраља хем о пхења? Ола тане доказ кај о Јехова одговоринела ко мле молитве. Исто аѓаар, лендар сиклиљум те охрабринав е јаверен кеда тане обесхрабриме“. Адалеске на ваљани те бистра кај амаре пхраља хем пхења на џанена секогаш кеда ваљани аменге охрабрување. Адалеске амен ваљани те џа ко јекх зрело пхрал или пхен хем те вакера леске или лаке кај ваљани аменге помош.

9. Сар о Псалм 41:3 хем 94:19 охрабринена амен?

⁹ Роде помош таро Јехова. Кеда иси амен насвалипе колестар со нашти те сасљова, шај те овел аменге пхаро те мислина позитивно. Иако о Јехова на сасљарела амен чудоја, ов утешинела амен хем дела амен сила со ваљани аменге те шај те издржина. (Читин Псалм 41:3; 94:19.) На пример, шај те поттикнинел јекхе пхрале или пхења те поможинел амен ко кхерутне буќа или те пазаринел аменге. Ов шај те поттикнинел амаре пхрален те молинен пе аменцар. Или, шај те сетинкерел амен ко несаве утешна мисле тари Библија, сар сој амари бут шужи надеж башо совршено живото бизо насвалипе хем дукх ко нево свето со ка авел (Рим. 15:4).

10. Соске о Исанг иако сине ле несреќа на ачхило обесхрабримо?

¹⁰ О Исанг тари Нигерија, сине ле јекх несреќа хем ачхило инвалиди. О доктори вакерѓа леске кај никогаш више нане те пхирел. Ов вакерѓа: „Сиум сине бут разочаримо“. Ама, дали ачхило разочаримо? На. Со поможинѓа леске? О Исанг објаснинела: „Ме хем мли ромни никогаш на чхинавѓем те молина амен е Јеховаске хем те проучина лескоро Лафи. Исто аѓаар, благодарна сием башо са о берекетија со иси амен сар сој и надеж башо живото ко е Девлескоро нево свето“.

11. Сар шај сине и Синди те овел бахтали иако сине бут насвали?

¹¹ И Синди која со живинела ко Мексико, сине ла насвалипе колестар со шај те мерел пе. Со поможинѓа лаке те издржинел? Ој одлучинѓа секова диве кеда ка џал ки терапија те сведочинел некаске. Ој вакерела: „Адава поможинѓа манге те концентриринав ман ко јавера наместо ки мли операција, ки дукх хем ко адава кобор сиум сине насвали. Адава керава ле сине аѓаар со џикоте керава сине лафи е докторенцар хем е сестренцар, пучава лен сине башо ленгере фамилие. Пало адава, пучава лен сине соске биринѓе добором пхари бути. Аѓаар, џанава сине која тема интересинела лен сине. Несаве лендар вакерѓе манге кај тано ретко некој таро пациентија те  пучен лен сар тане. Хем бут џене сине благодарна башо интерес со сикавѓум ленге. Несаве лендар чак денѓе ман пли адреса хем пумаро телефонско број. Џанљум кај о Јехова ка поможинел манге те издржинав акава пхаро време. Ама сиум сине изненадими кобор бут бахталипе денѓа ман!“ (Изр. 15:15).

12-13. Сар сведочинѓе несаве сој тане насвале или со нане лен сила, хем саво сине о резултати?

¹² Окола сој тане насвале или нане лен сила шај те обесхрабринен пе соске нашти те проповединен добором кобор со ола мангена. Сепак, бут џене аракхле начин сар те сведочинен. И Лорел, јекх пхен тари Америка, 37 берш сине ки машина дишибаске! Исто аѓаар, сине ла рако некобор операцие хем проблемија е кожаја. Чак ко акала пхаре околностија ој на чхинавѓа те проповединел. Ој сведочинела сине е сестренге хем јаверенге со авена сине ки лате кхере. Аѓаар, ој поможинѓа 17 манушенге те запознајнен о чачипе тари Библија! *

¹³ О Ришар, јекх старешина тари Франција, иси ле бут шукар предлог башо окола со нашти те икљовен таро пумаре кхера или сој тане ки болница. Ов вакерела: „Мло предлог тано те чхивен литература ко тхана коте со шај те дикхен о јавера. Кеда о мануша ка накхен ка дикхен и литература хем ка пучен сој адава. Хем аѓаар шај те сведочинен. Акава шај бут те охрабринел амаре пхрален хем пхењен со нашти те проповедине таро кхер ко кхер“. Окола со нашти те икљовен таро пумаре кхера шај исто аѓаар те проповединен аѓаар со ка пишинен писмија хем ка сведочинен преку телефони.

14. Саво шужо пример денѓа амен о Давид?

¹⁴ Иси бут причине соске шај нане амен несаве задаче со мангаја лен ки е Јеховаскири организација. На пример, шај сием бут пхуре, иси амен проблемија састипаја или таро јавера околностија. Ако сием ки асавки ситуација шај бут те сикљова таро цари о Давид. Ов бут мангља те керел е Девлеске храми, ама о Јехова вакерѓа леске кај некој јавер ка керел адава. О Давид цело вилеа поддржинѓа адале каске со сине денди и задача аѓаар со денѓа бут злато хем сребро башо храми. Кобор шужо пример мукхља аменге о Давид! (2. Сам. 7:12, 13; 1. Лет. 29:1, 3-5).

15. Со поможинѓа е Аленеске те на ачховел обесхрабримо?

¹⁵ О Ален, јекх пхрал тари Франција, чхинавѓа те служинел сар старешина адалеске со сине ле проблемија састипаја, чак нашти сине те керел несаве тикне буќа ко  кхер. Ов пишинела: „Ко почеток, осетинава ман сине кај на врединава хем сиум сине бут разочаримо. Ама, сар со накхела сине о време халиљум кобор тано важно те прифатинав мли ситуација, хем бахтало сиум со шај ки асавки да ситуација те служинав е Јеховаске. Одлучно сиум те на откажинав ман. Исто сар о Гедеон хем лескере 300 мануша кола со сине бут уморна, понадари да ка боринав ман!“ (Суд. 8:4).

16. Со шај те сикљова таро ангелија?

¹⁶ О верна ангелија тане шукар пример. На пример, јекх пути о Јехова пучља е ангелен те вакерен предлогија башо адава сар те ховавен е лошно царе е Ахаве. Несаве ангелија денѓе предлогија. Ама, о Јехова биринѓа јекхе ангелескоро предлог хем вакерѓа леске кај адава ка успејнел (1. Цар. 22:19-22). Дали о јавера верна ангелија обесхрабринѓе пе хем дали мислинѓе: „Со џабе трошинѓум мло време те дав предлог?“ Нане амен нисаво доказ кај аѓаар размислинѓе. О ангелија тане чаче понизна, хем мангена те ден цело слава е Јеховаске (Суд. 13:16-18; Отк. 19:10).

17. Со шај те кера ако осетинаја амен разочариме адалеске со на добинѓем несави задача?

¹⁷ Ма бистре кај и најбари предност со шај те овел амен тани те пхирава е Девлескоро анав хем те проповедина башо лескоро Царство. О задаче шај те добина лен хем те нашава лен, ама ола на керена амен поскапоцена англо Девел. О Јехова хем амаре пхраља хем пхења ка манген амен ако сием понизна хем скромна. Адалеске молин е Јехова те поможинел туке те ачхове понизно хем скромно. Размислин башо са о шукар примерија таро е Јеховаскере понизна слуге сој пишиме ки Библија. Спремно служин тле пхраленге најшукар со шај (Пс. 138:6; 1. Пет. 5:5).

18-19. Сар шај те ова бахтале иако о мануша ко амаро подрачје на мангена те шунен?

¹⁸ Дали понекогаш сиан обесхрабримо адалеске со о мануша ко тло подрачје на мангена те шунен о шукар хабери или нашти те аракхе лен кхере? Сар шај ко асавке да ситуацие те ачхова бахтале? Несаве практична предлогија шај те аракха ки рамка „ Сар те кере пошукар тли служба“. Исто аѓаар,  бут тано важно те овел амен исправно стави баши служба. Со значинела адава?

¹⁹ Ма бистре кај и главно причина соске проповединаја тани те вакера е манушенге е Девлескоро анав хем те вакера ленге башо лескоро Царство. О Исус вакерѓа кај хари џене ка овен лескере следбеникија (Мат. 7:13, 14). Кеда сием ки служба иси амен и чест те соработина е Јеховаја, е Исусеа хем е ангеленцар (Мат. 28:19, 20; 1. Кор. 3:9; Отк. 14:6, 7). О Јехова привлечинела ки песте е искрена манушен со мангена те служинен леске (Јован 6:44). Адалеске, ако некој на мангела те шунел о хабери акана, шај ка мангел те шунел јавер пути.

20. Со шај те сикљова таро Еремија 20:8, 9 кеда сием обесхрабриме?

²⁰ Шај бут те сикљова таро о пророко о Еремија. Ваљани сине те проповединел ко подрачје коте со никој на мангела сине те шунел ле. О мануша вреџинена ле сине хем асана леске сине „по цело диве“. (Читин Еремија 20:8, 9.) Ов сине добором разочаримо со мангела сине те откажинел пе. Ама на керѓа адава. Соске? „Е Јеховаскоро лафи“ сине сар јаг андре ки лесте хем нашти сине те икерел ла ки песте! Амен да шај те ова сар лесте ако пхераја амаре мисле хем амаро вило адалеа со вакерела е Девлескоро Лафи. Акаја тани панда јекх причина соске ваљани секова диве те проучина и Библија хем хор те размислина баши лате. Аѓаар ка ова побахтале хем ка ова поуспешна ки служба (Ерем. 15:16).

21. Сар шај те борина амен кеда сием обесхрабриме тари било кој причина?

²¹ И Дебора сој спомними англедер вакерела: „О обесхрабрување тано јекх бут моќно оружје со користинела ле о Сатана“. Ама, о Јехова тано бут помоќно таро Сатана хем таро лескоро оружје. Адалеске, кеда сиан обесхрабримо тари било која причина, молин тут е Јеховаске. Ов ка поможинел те дикхе исправно ко тле грешке хем ки тли несовршеност. Ов ка дел тут сила кеда сиан насвало, ка поможинел туке те овел тут исправно стави спрема тле задаче хем ка поможинел туке позитивно те дикхе ки служба. Хем сој најважно пхрав тло вило тле небесно Дадеске. Ов ка поможинел туке те борине тут кеда сиан обесхрабримо.