1. Mety hanao akory tsika laha kivy?

MISY raha manahira antsika avao sanandro, le manao ze azontsika atao tsika mba hiatreha ani-raha rey. Fe tsy ekenao va hoe vomaiky sarotsy amintsika ty miatriky ani-raha rey lafa tsika kivy? Tokony hotiarovintsika zany fa mety hahavy antsika tsy ho falifaly noho hahatiaro ho tsy misy ilà azy ty hakivia. Hoy ty Ohabolana 24:10: “Laha kivy iha amy fotoa sarotsy, le ho kelikely ty herinao.” Laha kivy zany tsika, le hihena ty herintsika ka tsy ho vitantsika ndre ty hiatriky ty raha manahira antsika.

2. Ino ty mety hahakivy antsika, le ino ty hodinihintsika amy lahatsoratsy toy ato?

² Maro ty raha mety hahakivy antsika, mety ho raha anatintsika any zay, na raha ivelany etoy. Mety hahakivy antsika, ohatsy, ty hadisoa nataontsika, ty handrantsika na ty tsy fahasalamà. Mety ho kivy koa tsika laha tsy mahazo ty andraikitsy irintsika amy fanompoa ani-Jehovah, na mitory amy faritsy tsy de maro olo mijanjy. Amy lahatsoratsy toy ato tsika, handiniky ty raha sisany azontsika atao mba hiatreha hakivia.

3. Ino ty hanampy antsika tsy hieritseritsy ty vatantsika ho raty lafa nisy raha tsy nety nataontsika?

³ Mora amintsika ty mieritseritsy ty vatantsika ho raty lafa nisy raha tsy nety nataontsika. Mety hanao ho zao amy zay tsika hoe tsy teani-Jehovah hilitsy amy tontolo vaovao ao tsika vokatsini-hadisoa nataontsika iny. Mety hanimba eritseritsy zay. Akory ty tokony ho fahitantsika ty tsy fahalavorariantsika? Mivola ty Baiboly hoe samby “fa nanota” ty olombelo iaby, laha tsy Jesosy Kristy avao. (Rom. 3:23) Fe tsy tea kinokino  na mitaky fahalavoraria azy nampanoratsy Baiboly iny. Baba be fitiava ie ka ta hanampy antsika. Manam-pahareta koa ie. Hitany hoe miezaky mafy hanao raha soa noho tsy ho kivy ty ankamaroantsika, le parè hanampy antsika ie.​—Rom. 7:18, 19.

4-5. Laha hentea ty 1 Jaona 3:19, 20, manino ranabavy roe reo ro tsy nikivy?

⁴ Diniho ty raha nahazo ani-Deborah noho Maria. * Nampalahelo ty nanaovani-longony reo ani-Deborah tamin’ie mbo nikely. Tsy de nahazo safà fiderà zao ie. Farany ie tsy nieritseritsy raha soa mikasiky azy. Ndre nanao hadisoa kelikely avao aza ie, le nanjary nieritseritsy hoe tsy afaky manao raha soa mihintsy. Mitovy amy zay koa ty raha nahazo ani-Maria. Nanafa baraka azy ty longony. Nanjary nahatiaro ho tsy nisy dikany amy zay ie. Ndre fa nivita batisa aza ie, le mbo nieritseritsy hoe tsy maeva manday ty anara-Ndranahary!

⁵ Fe ndre zay, le tsy nieny ranabavy roe reo fa nanompo ani-Jehovah avao. Ino ty antony? Nivavaky tamy Jehovah rozy, ka napetrakin-drozy taminy ze nanavesatsy an-drozy. (Sal. 55:22) Neken-drozy avao tamy farany fa haini-Babantsika be fitiava an-danitsy any iny ty raha nahazo antsika taloha. Hainy koa ty vokani-raha rey amintsika. Fe hitany koa ty toetsy soa am-pontsika ao ndre tsy hitantsika aza raha zay.​—Vakio 1 Jaona 3:19, 20.

6. Mety hanao akory ty olo raiky laha nahatafimpoly ndraiky ty raha tsy nety nataony?

⁶ Mety fa niezaky marè ty olo raiky mba hiala amy fahazaran-draty fa namahatsy taminy ao. Fe mety hanao ani-raha tsy nety iny ndraiky ie, ka manjary kivy. Ara-dalàna aloha laha meloky amy ty vatantsika tsika lafa nisy raha tsy nety nataontsika. (2 Kor. 7:10) Fe tsy tokony hanome tsiny marè ty vatantsika tsika, ka hieritseritsy hoe: ‘Tsy misy ilà ahy mihintsy. Akory moa ty hanengani-Jehovah ty hadisoako?’ Tsy soa eritseritsy zay sady mety hahavy antsika hijano tsy hanompo ani-Jehovah. Tiarovo raha nivakintsika tamy Ohabolana 24:10 iny hoe ho kelikely ty herintsika laha kivy tsika. Tokony “hifandamy” amy Jehovah zany tsika, ka hivavaky aminy noho hangataky azy mba hanenga ty hadisoantsika. (Isa. 1:18) Laha hitani-Jehovah hoe mibebaky vatany iha sady miezaky miova, le hanenga anao ie. Ankoatsini-zay, mamonjea anti-panahy. Hampean-drozy hifandramby soa amy Jehovah ndraiky iha.​—Jak. 5:14, 15.

7. Manino tsika ro tsy tokony ho kivy laha sarotsy amintsika ty manao raha soa?

⁷ Zao ty nivolanini-Jean-Luc, anti-panahy a Fransy any, amy ze olo miezaky mialy amy ty  handrany: “Olo marina zao amy Jehovah, tsy hoe olo tsy manao hadisoa mihintsy, fa olo maneny amy ty hadisoany noho miezaky miova.” (Rom. 7:21-25) Dikani-zay, ka amea tsiny marè ty vatanao laha ohatsy iha ka miezaky mialy amy ty handranao. Samby manao hadisoa tsika iaby, ka samby mila ty hasoa fanahy tsy manam-paharoeni-Jehovah amy alalani-vilim-panavota.​—Efes. 1:7; 1 Jaona 4:10.

8. Amin’ia ty azontsika ilà fanampea lafa tsika kivy?

⁸ Hampahery antsika rahalahy noho anabavintsika amy fiangona eo reo! Afaky mijanjy antsika rozy lafa mila miresaky tsika sady afaky mampahery antsika. (Ohab. 12:25; 1 Tes. 5:14) Kivy Joy, ranabavy raiky a Nigeria any zay. Hoy ty asany: “Aia lahy ty tany hisy ahy laha tsy eo ranadahy noho rahavavy reo? Mampahery ahy rozy. Hita baka amy zay hoe mamaly ty vavaky ataoko Jehovah. Nianarako tamin-drozy mihintsy aza hoe akory ty atao mba hampahereza olo kivy marè.” Fe mila tiarovintsika fa tsy voatery ho haini-rahalahy noho anabavintsika reo hoe mila fampahereza tsika. Dikani-zay, tsika mihintsy ro tokony hamonjy ani-rahalahy na anabavy matotsy rey le mivola amin-drozy hoe mila fanampea.

9. Manino ty Salamo 41:3 noho 94:19 ro mampahery antsika?

⁹ Milà fanampea amy Jehovah. Mety ho sarotsy amintsika ty hieritseritsy raha soa lafa tsika mahatsapa ho tsy metimety, sirtò moa laha azon’arety miteza tsika. Tsy manao fahagagà aloha Jehovah henanizao mba hitahà antsika. Fe afaky mampionona noho manome ze hery ilàntsika ie mba hahafahantsika miaritsy. (Vakio Salamo 41:3; 94:19.) Mety ho azony atao, ohatsy, ty mandrisiky ani-rahalahy noho anabavintsika reo mba hanampy antsika lafa tsika mila fanampea amy fanaova raha sisany an-trano ao, na amy fanaova bazary. Mety ataony ze hahavy an-drozy hivavaky ho antsika. Na mety ampeany tsika mba hahatiaro ze hevitsy mampahery nihitantsika tamy Safàny ao, ohatsy hoe ty raha tamanintsika amy tontolo vaovao ao. Soasoa ty fiaina any satria tsy hisy arety noho fijalea.​—Rom. 15:4.

10. Ino ty nanampy ani-Isang tsy ho kivy marè tafarani-aksidà nahazo azy iny?

¹⁰ Niaksidà Isang, mipetraky a Nigeria any le nikombo. Nivola tamy Isang dokoterany iny hoe tsy afaky handeha sasy ie. “Nalahelo biby aho”, hoasany, “sady nikivy.” Fe nikivy teo avao va ie? Aha! Ino ty nanampy azy? Hoy ty asany: “Tsy nieny nivavaky tamy Jehovah noho nianatsy ty Safàny zahay morovaly. Nanapa-kevitsy koa zahay hoe hametsivetsy ze raha soa anananay, anatini-zay ty fiaina soa tamaninay amy tontolo vaovao hamea-Ndranahary iny ao.”

11. Akory ty nahavy ani-Cindy ho falifaly ndre narary marè ie?

¹¹ Mipetraky a Meksiky any Cindy. Nivola taminy ty dokotera hoe voani-arety mahafaty ie. Ino ty nataony mba hiareta ani-raha iny? Lafa nitsabo ie, le nataony raha kendrè ty hitory sanandro. Zao ty nisoratiny: “Lafa nanao ani-zay aho, le nanjary nifantoky amy ty hafa fa tsy amy fandrasà ahy iny na ty raha maharary ahy. Ho zao ty fataoko: Lafa miresaky amiko dokotera rey, le anontaneako ty mikasiky ty fianakavian-drozy. Bakeo aho manontany hoe nanino rozy ro nifily hanao ani-asa sarotsy io. Moramora amiko amy zay ty mifily foto-kevitsy mety hidosiky ty fon-drozy. Maro amin-drozy ty nivola hoe amy ankapobeny, tsy de misy marary manontany hoe mba manao akory rozy. Maro ty nisaotsy ahy satria hoe nidary an-drozy aho. Ty sisany  aza nanome ty adiresiny na ty nimero telefoniny. Fa nihaiko avao hoe hanampy ahy hiaritsy ani-fotoa sarotsy toy Jehovah. Fe tsy nampoiziko hoe hataony falifaly biby aho!”​—Ohab. 15:15.

12-13. Ino ty nataon’olo sisany marary na be tao mba hahafahany mandramby anjara amy fanompoa, le ino ty vokany?

¹² Mety ho kivy ty olo marary na fa antitsy satria voafetra avao ty raha azon-drozy atao amy fanompoa. Fe maro ty mila fomba mba hitoria. Mipetraky a Etazinỳ any ranabavy Laurel. Fa tsy afaky niay soa ie, farany nahily anaty masìny mampiay zay, le tao tanatini-37 tao. Nivoani-kansera koa ie sady nisy aretin-koditsy, le maromaro ty fandrasà natao taminy. Fe ndre teo aza raha sarotsy reo, le tsy nampijano azy. Nitory tamy mpikarakara azy rey noho tamy ze olo hafa niavy tan-tranony ao ie. Ino ty vokany? Folo fito amby fara fahakeliny ty olo nampeany ho lasa Vavolombeloni-Jehovah! *

¹³ Nanoro hevitsy olo tsy afaky miboaky an-trano na mipetraky amy trano fitezà antitsy rey Richard, anti-panahy a Fransy any zay. Hoy ty asany: “Soa laha asiany boky noho gazety amy ze pilasy mora hitan’olo aminy ao. Lafa mahita an’iny ty olo le mety hanontany, ka ho vano ty resakin-drozy. Mety hampahery ani-rahalahy noho anabavy fa tsy afaky manao fitoria santrano rey raha zay.” Afaky mitory an-taratasy na an-telefony koa ty olo tsy afaky miboaky an-trano.

14. Ino ty modely soa nameani-Davida Mpanjaka?

¹⁴ Maro ty antony mety hahavy antsika tsy hahazo ty andraikitsy irintsika amy fanompoa ani-Jehovah. Mety fa be tao, ohatsy, tsika na tsy salama, na mety ho nisy raha hafa. Afaky mianatsy baka amy ty modelini-Davida Mpanjaka tsika laha tratsini-raha manahaky ani-zay. Tena naniry hamboatsy tempoly ho ahi-Ndranahary Davida, fe olo hafa ro nifilini-Jehovah hanao ani-zay. Fe ndre zay, le nanoha tanteraky ani-olo nitendreni-Jehovah iny Davida, ka nanome volamena noho volafoty maro biby. Modely soa ho antsika vatany Davida!​—2 Sam. 7:12, 13; 1 Tan. 29:1, 3-5.

15. Ino ty nataoni-Hugues mba tsy ho kivy?

¹⁵ Tsy nisalama rahalahy Hugues a Fransy any, farany najano tsy ho anti-panahy. Ndre manao asa tsotsotra an-trano ao aza tsy vitany. Zao ty nisoratiny: “Nikivy marè aho tamy voalohany. Fe lafa nandeha ty fotoa, le hitako hoe mila mieky aho hoe fa tsy vitako sasy ty  raha sisany ka tsy tokony hampalahelo ahy raha zay. Nanjary falifaly tamy fanompoa ani-Jehovah aho. Tapa-kevitsy hiaritsy avao aho fa tsy ho kivy. Manahaky ani-Gideona noho 300 lahy niaraky aminy rey, le mbo hanohy hialy avao aho ndre fa vozaky!”​—Mpits. 8:4.

16. Ino ty azontsika ianara baka amy ty modely soani-anjely?

¹⁶ Modely tena soa anjely tsy mivaliky rey. Tamy fotoa nanjakani-Ahaza Mpanjaka, ohatsy, le nivola tamy anjely reo Jehovah mba hanome soso-kevitsy mikasiky ty fomba hamitaha ani-mpanjaka raty fanahy io. Samby niresaky ty hevitsiny iaby anjely reo. Fe anjely raiky avao ro nifili-Ndranahary sady nivolanany hoe mety ty soso-kevitsy nameany. (1 Mpanj. 22:19-22) Nikivy va anjely hafa tsy mivaliky rey, ka nieritseritsy hoe: ‘Laha nihaiko aho tsy nisahira nila hevitsy!’ Tsy nanao ani-zay rozy. Tena miambany ty anjely ka tean-drozy ho ani-Jehovah ty voninahitsy iaby.​—Mpits. 13:16-18; Apok. 19:10.

17. Ino ty tokony hataontsika laha kivy tsika satria tsy mana ty tombontsoa sisany amy fanompoa ani-Jehovah?

¹⁷ Tiarovo hoe tombontsoa ho antsika ty manday ty anara-Ndranahary noho manambara ty Fanjakàny. Mety hahazo andraikitsy tsika sady mety hamoy andraikitsy koa, fe tsy zay ro mahavy antsika ho lafovily amy Ndranahary. Laha miambany tsika, le ho tea antsika marè Jehovah. Ho tea antsika koa rahalahy noho anabavintsika reo. Ka angataho Jehovah mba hanampy anao hiambany avao. Vetsevetseo modely soani-mpanomponi-Jehovah niambany resahy amy Baiboly ao rey. Ka misalasala manompo ani-rahalahinao reo.​—Sal. 138:6; 1 Pet. 5:5.

18-19. Akory ty hahavy anao ho falifaly amy fanompoa, ndre atao raha tsy ahità vokatsy aza ty faritaninareo?

¹⁸ Fa nisy fotoa va iha kivy satria atao raha tsy ahità vokatsy ty faritaninareo na olo vitsivitsy avao ro tratsy an-trano? Amy raha manahaky ani-zay, ino ty azontsika atao mba ho falifaly avao? Miresaky soso-kevitsy vitsivitsy azo orihy ty efajoro hoe “ Fomba Hanasoavanao ty Fanompoanao.” Tena ilà koa ty mana fomba fanenty soa ty fanompoa. Manao akory zao?

¹⁹ Mifantoha amy fanambarà ty anara-Ndranahary noho ty Fanjakàny. Fa nivola Jesosy  hoe ho vitsivitsy avao ty olo handeha amy lala mana amy fiaina iny. (Mat. 7:13, 14) Lafa manompo tsika, le mana tombontsoa hiaraky miasa amy Jehovah noho Jesosy voho ty anjely. (Mat. 28:19, 20; 1 Kor. 3:9; Apok. 14:6, 7) Mitao ty olo maeva Jehovah. (Jaona 6:44) Ka laha tsy nandramby soa ty hafatsy andesintsika ty olo raiky amy fotoa iny, le mety hijanjy soa ie lafa miresaky aminy tsika amy manaraky.

20. Ino ty ampianarini-​Jeremia 20:8, 9 antsika mikasiky ty raha tokony hatao mba tsy ho kivy?

²⁰ Maro ty raha azontsika ianara baka amy Jeremia mpaminany. Tena sarotsy ty faritany nanendrea azy. Nandratiraty noho nikizakizaky azy avao ty olo “sanandro.” (Vakio Jeremia 20:8, 9.) Nisy fotoa ie nikivy marè, ka tsy ta ho nitory sasy. Fe tsy nijano ie. Fa nanino? Sahala amy afo mirehitsy anaty foni-Jeremia ao “ty safàni-Jehovah”, ka tsy voatanjakiny! Manahaky ani-zay koa tsika laha mianatsy Baiboly sanandro noho mametsivetsy. Vomaiky ho falifaly tsika sady mety hahita vokatsy amy fanompoa ataontsika.​—Jer. 15:16.

21. Akory ty hahavy antsika tsy ho kivy sasy ndre ino ino ty antony?

²¹ Hoy Deborah, azy niresahy taloha teny iny: “Ty hakivia ro fitaovam-pialia tena mahery ampiasani-Satana.” Fe mbo mahery mandilatsy ani-Satana noho ty fitaovam-pialiany Jehovah Ndranahary. Ka le mangataha fanampea amy Jehovah lafa kivy, ndre ino ino ty antony mahakivy anao. Hampeany iha soa ho afaky hiatriky ty tsy fahalavorarianao noho ty handranao. Hanoha anao ie lafa iha marary. Hampeany iha mba hana fomba fanenty voalanjalanja mikasiky ty andraikitsy amy fanompoa ani-Jehovah. Hampeany koa iha mba hahita ty mahasoa ty fanompoanao. Mivavaha amy Babanao be fitiava iny, le volano aminy ze tena tsapanao. Afaky tsy ho kivy sasy iha satria hanampy anao ie.