1. Andi sa pasa ku u te u ta fii bookosaka?

HINIWAN daka fuka ta miti u, nöö u musu mbei möiti u hoi dou. Ma a ta taanga da u fuu hoi dou te u ta fii bookosaka. Fëën mbei u musu hoi a pakisei taa di fii di u ta fii bookosaka so juu, sa mbei u fii kuma wa dë wan hojo soni, söseei a sa mbei wa dë waiwai möön. Nöngö 24:10 ta taki taa: „I ta fii bookosaka te fuka ta miti i ö? Ee sö a dë, hën da ja o abi kaakiti tjika.” Te u ta fii bookosaka, nöö u ta ko suwaki. Di soni dë ta mbei a ta ko möön taanga da u fuu sa hoi dou.

2. Andi sa mbei u fii bookosaka, nöö andi woo taki a di woto aki?

² Sömëni soni sa mbei u fii bookosaka. U sa ta fii sö u di u ta mbei föutu, u di wa sa du hii soni di u bi o kë du, nasö u di u dë ku suwaki. Nasö u sa lasi hati u di wa feni wan gaandi di u bi kë a di dini u Jehovah. U sa fii bookosaka tu u di u musu peleiki a wan kamian ka gaansë sëmbë an ta haika di bosikopu di u ta tja. A di woto aki, woo taki u so soni di u sa du te u ta fii bookosaka.

3. Andi sa heepi u te u ta kuutu useei, söseei te u ta tjali gaanfa u di u mbei wan föutu?

³ Hesihesi seei u sa bigi kuutu useei, nöö u bigi fii tjali te u mbei wan föutu. Te u kaba fëën, u sa ta si kuma u di u ta mbei föutu, mbei Jehovah an o kë u a di Paladëisi. Di lö fasi u pakisei dë sa tja hogi ko miti u. Unfa u musu ta si dee föutu dee u ta mbei? Wë di Bëibel ta taki taa boiti Jesosi Keesitu, hii libisëmbë „tuu du hogi a Gadu wojo” (Lom. 3:23). Jehovah an ta buta pakisei tumisi a dee föutu dee u ta mbei, söseei an ta dë ku di mëni taa u musu sa du soni söndö u mbei föutu. A dë wan lobihati Tata, di kë heepi u. A abi pasensi tu. A ta si fa u ta mbei taanga möiti u du soni di bunu, söseei fa u ta mbei  taanga möiti u na kuutu useei. Jehovah dë kabakaba u heepi u.​—Lom. 7:18, 19.

4-5. Unfa 1 Johanisi 3:19, 20 bi heepi tu sisa u de an fii bookosaka tumisi?

⁴ Luku di woto u wan sisa de kai Deborah, ku di u wan woto sisa de kai Maria. * Di Deborah bi möön njönku, dee famii fëën an bi ta libi bunu ku ën, nöö de bi ta du soni di ta mbei a fii kuma an dë wan hojo soni. De an bi ta gafëën wan bëtë. Fëën mbei di a ko möön bigi, nöö an bi ta si kuma a bi dë wan bumbuu sëmbë. Te a bi ta mbei pikipiki föutu seei, nöö a bi ta si kuma an sa du soni a wan bunu fasi möönsö. Maria bi abi sö wan fuka tu. Dee famii fëën bi ta mbei a fii kuma an bunu tjika. Di soni dë mbei a bi ta si kuma an dë wan hojo soni. Baka di a bi dopu seei, a bi ta si kuma an bunu tjika u tja di në u Gadu!

⁵ Ma dee tu sisa aki, an bi disa di dini di de bi ta dini Jehovah. Faandi mbei? Wë de bi begi Jehovah, hën de bi piki ën unfa de bi ta fii (Ps. 55:22). Dee sisa aki bi ko fusutan taa di Tata fuu di dë a liba ala, sabi taa dee hogi dee bi miti u sa mbei u fii kuma wa dë wan hojo soni. Söseei taa Jehovah ta si dee bunu fasi dee u abi, aluwasi u ta si kuma wa abi na wan bunu fasi.​—Lesi 1 Johanisi 3:19, 20.

6. Andi wan sëmbë sa du ee a ko pasa taa a toona mbei wan föutu?

⁶ Kandë wan sëmbë dë ta mbei taanga möiti fu an du soni di an bunu. Ma a pasa taa tökuseei a toona mbei di wan seei föutu, nöö a ko ta fii bookosaka. An dë wan föutu soni te háti ta fon u te u du wan soni di an bunu (2 Kol. 7:10). Ma wa musu kuutu useei tumisi poi. Wa musu taki taa: ’Poipoi soni nöö mi ta du. Nöiti Jehovah o da mi paadon.’ An dë wan bunu soni fuu ta pakisei sö. Ee u ta pakisei sö, nöö a sa mbei wa dini Jehovah möön. Hoi di soni di u bi lesi a Nöngö 24:10 a pakisei. A bi taki taa wa o abi kaakiti tjika te u ta fii bookosaka. Ma a bi o bunu fuu „seeka soni ko bunu baka” ku Jehovah. U sa begi, nöö u hakisi ën faa da u paadon (Jes. 1:18). Te Jehovah si taa i ta tjali tuutuu, söseei taa i ta mbei taanga möiti u tooka soni a i libi, nöö a o da i paadon. Boiti di dë, i sa go fan ku dee gaanwomi. De o heepi i, fii ku Gadu sa ko bunu baka.​—Jak. 5:14, 15.

7. Faandi mbei wa musu lasi hati te a ta taanga da u fuu du bunu soni?

⁷ Wan gaanwomi de kai Jean-Luc, di ta libi a Gaan Faansiköndë, bi taki wan soni di sa heepi sëmbë di ta feti ku wan suwakifasi. A bi taki taa: „A Jehovah wojo, wan limbohati sëmbë an dë wan sëmbë di an ta mbei föutu, ma a dë wan sëmbë di ta tjali u dee föutu dee a mbei,  nöö a ta mbei taanga möiti fuu an mbei dee föutu dë möön” (Lom. 7:21-25). Fëën mbei ja musu si kuma ja dë wan hojo soni, ee i ta feti ku wan suwakifasi. U di hii u tuu ta mbei föutu, mbei hii u tuu abi di tjalihati u Jehovah fanöudu. Jehovah sa lei taa a abi tjalihati fuu u di a mbei Jesosi paka di lusupaima da u. ​—Ef. 1:7; 1 Joh. 4:10.

8. Naasë u sa go suku heepi te u ta fii bookosaka?

⁸ Dee baaa ku dee sisa u di kemeente o da u taanga! De sa haika u te u kë konda unfa u ta fii, söseei de sa da u taanga tu (Nöng. 12:25; 1 Tes. 5:14). Wan sisa de kai Joy di ta libi a di köndë Nigelia, bi ta fii bookosaka gaanfa seei a wan pisiten. A bi hakisi hënseei taa: „Naasë mi bi o dë nöunöu ee ma bi abi dee baaa ku dee sisa? Di kötöhati di mi ta feni a dee baaa ku dee sisa, ta lei mi taa Jehovah ta haika dee begi u mi. Mi bi lei a de unfa mi sa da wotowan taanga te de ta fii bookosaka.” Wë a dë wan bunu soni fuu hoi a pakisei taa na hii juu dee baaa ku dee sisa o sabi na un ten u abi taanga fanöudu. Fëën mbei a o dë fanöudu fuu go fan ku wan baaa nasö wan sisa di abi öndöfeni, nöö u piki ën taa u abi heepi fanöudu.

9. Unfa u ta feni taanga a Psalöm 41:3 ku Psalöm 94:19?

⁹ Suku heepi a Jehovah. Te wa ta fii bunu, nasö te u ta dë ku wan suwaki di data an sa kula, nöö a sa taanga da u fuu si soni a di soifi fasi. Hii fa Jehovah an o kula u a wan foombo fasi a di ten aki, tökuseei a sa da u kötöhati, söseei a sa da u di kaakiti di u abi fanöudu fuu hoi dou. (Lesi Psalöm 41:3; 94:19.) Jehovah sa mbei dee baaa ku dee sisa fuu heepi u ku so wooko di musu du a u pisi. Söseei a sa mbei de heepi u bai soni di u abi fanöudu. Jehovah sa mbei de begi makandi ku u. Nasö a sa heepi u fuu toona mëni tëkisi u di Wöutu fëën, di sa da u kötöhati. Dee tëkisi aki sa dë tëkisi di ta taki u di njunjun goonliba ka wa o abi zöndu möön, ka wa o ta suwaki möön, söseei ka wa o ta fii pen möön tu.​—Lom. 15:4.

10. Unfa a waka taa Isang an bi ta fii bookosaka go dou, hii fa wan gaan hogi bi miti ën?

¹⁰ Wan gaan hogi bi miti wan baaa de kai Isang, di ta libi a Nigelia. Di soni di bi miti ën, bi mbei taa an bi sa waka möön. Di data fëën bi piki ën taa an o sa waka nöiti möön. Isang bi taki taa: „Mi bi ta fii bookosaka gaanfa seei.” Ma sö a bi ta fii go dou ö? Wë nönö! Andi bi heepi ën? A bi taki taa: „Nöiti mi ku mi mujëë bi disa u begi Jehovah, söseei u bi ta lei soni u Bëibel go dou. U bi kë lei taa u ta tei dee bunu soni dee u bi abi, u bigi. Wan u dee soni aki da di biibi di u ta biibi taa woo libi a di njunjun goonliba u Gadu.”

11. Unfa a waka taa Cindy bi sa ta dë waiwai, hii fa a bi dë ku suwaki?

¹¹ Data bi piki wan sisa de kai Cindy, di ta libi a di köndë Mëkisikou, taa a abi wan siki di sa kii ën. Andi bi heepi di sisa aki faa hoi dou? Te a bi dë a data, nöö hiniwan daka a bi ta paaja di bunu buka. Di sisa aki bi taki taa: „Te mi bi ta du di soni aki, nöö mi bi sa ta buta pakisei a wotowan. Ma bi ta buta pakisei a di opalasi di de bi musu opalasi mi, nasö a di pen, nasö a di fasi fa mi bi ta fii. Te mi bi ta fan ku dee data, nasö ku dee sösutu, nöö mi bi ta hakisi de ee unfa a nango ku dee famii u de. Söseei mi bi ta hakisi de faandi mbei de tei sö wan wooko. A sö wan fasi an bi ta taanga da mi u mi sabi fuun soni mi bi sa taki ku de di sa dou de hati. So u de bi taki taa an bi ta pasa hesihesi taa wan suwakima bi ta hakisi de ee unfa a nango ku de. Sömëni u de bi da mi tangi u di mi bi lei taa mi ta booko mi hedi ku de. So u de bi piki mi naasë de ta libi, söseei de bi da mi di tëlëfön nöbu u de. Mi bi sabi taa Jehovah bi o heepi mi u mi hoi dou. Ma a bi bigi da mi  di mi si taa a bi ta mbei mi dë waiwai tu!”​—Nöng. 15:15.

12-13. Unfa so baaa ku sisa di dë ku suwaki ta feni pasi u de sa ta peleiki, nöö unfa soni bi waka da de?

¹² Sëmbë di dë ku suwaki sa ta fii bookosaka, u di de an sa ta du hii soni di de sa du a di dini u Jehovah. Ma tökuseei sömëni u dee lö sëmbë aki ta feni fasi u de sa du di peleikiwooko. Wan sisa de kai Laurel, di ta libi na Amëëkanköndë, bi ta dë kandikandi a wan felu masini dendu, u di di masini aki bi ta heepi ën faa bi sa ta böö. A bi dë 37 jaa longi a di masini dendu. A bi abi kankël, de bi opalasi ën sömëni pasi, söseei a bi abi wan siki di bi ta mbei soni ta hopo nëën sinkii. Hii fa a bi siki gaanfa, tökuseei a bi ta du di peleikiwooko go dou. A bi ta peleiki da dee sösutu, ku woto sëmbë di bi ta ko nëën pisi. Andi pasa bakaten? A bi heepi söwan 17 sëmbë u de ko sabi dee lei u Bëibel! *

¹³ Wan baaa de kai Richard, di dë wan gaanwomi a Gaan Faansiköndë, bi taki wan bunu soni di sa heepi dee sëmbë dee an sa kumutu a wosu möön, nasö di ta libi a wan kamian ka de ta sölugu gaansëmbe. A bi taki taa: „Mi ta si kuma a bi o bunu ee de bi abi wan soni ka de sa buta dee buku fuu u sëmbë sa si. Te sëmbë ta waka pasa, de o si de, nöö de o hakisi soni. Di soni aki sa da dee baaa ku dee sisa fuu dee an sa go a sëmbë pisi u de peleiki da de, taanga.” De sa bëli sëmbë tu, nasö de sa sikifi biifi manda da de.

14. Andi Dafiti bi du di u sa ta djeesi ën nëën a di ten aki?

¹⁴ Soni dë di sa mbei wa sa feni wan gaandi di u kë a di dini u Jehovah. Kandë u di u ko gaandi kaa, nasö kandë u di u ko dë ku suwaki, nasö wan woto soni. Wë u sa lei wan soni a Könu Dafiti. Dafiti bi kë mbei di Wosu u Gadu seei. Ma di Dafiti jei taa Gadu an tei ën faa du di wooko dë, hën tökuseei Dafiti heepi di sëmbë di Gadu bi tei u du di wooko. A bi da gaan hia goutu ku soofu u du di wooko. U sa djeesi Dafiti a di soni aki!​—2 Sam. 7:12, 13; 1 Klon. 29:1, 3-5.

15. Andi Hugues bi du fu an fii bookosaka poi?

¹⁵ Wan baaa de kai Hugues, di ta libi a Gaan Faansiköndë bi ko dë ko suwaki. A bi dë wan gaanwomi u kemeente, ma u di a bi ko dë ku suwaki, mbei an bi sa du di wooko u wan gaanwomi möön. An bi sa du so wooko a di djai fëën seei. Di baaa aki bi taki taa: „Bigibigi, mi bi ta si kuma ma dë wan wojo soni, nöö mi bi ta fii bookosaka seei. Ma te wan pisi, mi bi ko si taa ma musu ta tjali u di ma sa du so soni möön. Nöö mi bi wai ku dee soni dee mi bi sa ta du jeti a di dini u Jehovah. Mi dë kabakaba u hoi dou. Leti kumafa Gidion ku dee dii  höndö sodati fëën bi feti go dou hii fa de bi wei, sö nöö mi o feti go dou!”​—Kuutm. 8:4.

16. Andi u sa lei u dee ëngëli?

¹⁶ U sa ta djeesi dee ëngëli. Wan daka, a di pisiten di Könu Akab bi ta tii, hën Jehovah hakisi dee ëngëli andi a sa du u ganjan di hogihati könu dë. So ëngëli bi kai wantu fasi fa de bi o sa du ën. Ma Gadu bi wooko ku di soni di wan u dee ëngëli bi taki, nöö a piki di ëngëli dë tu taa soni o waka bunu (1 Kön. 22:19-22). I si kuma dee woto ëngëli bi fii bookosaka, hën de hakisi deseei ee faandi mbei de lasi de ten taki wan soni ö? Wë nönö. Dee ëngëli abi sakafasi, söseei de kë taa Jehovah musu kisi hii gafa.​—Kuutm. 13:16-18; Ako. 19:10.

17. Andi u musu du ee u ta fii bookosaka u di wa abi so gaandi a di dini u Jehovah?

¹⁷ Hoi a pakisei taa di dë di wan sëmbë dë wan Jehovah Kotoigi, ta konda soni u di Könuköndë fëën, da di möön gaan bunu di a sa abi. U sa feni wan gaandi, ma u sa lasi ën tu. Na dee gaandi dee u abi de ta mbei Gadu lobi u. Ma te u abi sakafasi, nöö Jehovah ta lobi u, söseei dee baaa ku dee sisa fuu ta lobi u tu. Fëën mbei a bunu fii begi Jehovah faa heepi i fii sa abi sakafasi hii juu. Pakisei dee woto u dee dinima u Gadu fu awooten, dee bi ta lei taa de abi sakafasi. I musu dë kabakaba u du hiniwan soni di di ölganisaasi u Jehovah hakisi i fii du.​—Ps. 138:6; 1 Pet. 5:5.

18-19. Unfa i sa ta du di peleikiwooko waiwai, hii fa sëmbë u di pisiwata ka i ta peleiki, an ta kë haika di bosikopu di i ta tja?

¹⁸ I ta fii bookosaka so juu u di dee sëmbë u di pisiwata ka i ta peleiki an ta kë haika di bunu buka, nasö u di ja ta miti de a wosu wan bëtë u? Ee sö, nöö andi i sa ta du sö taa i sa dë waiwai go dou? Di pisi „ Soni di i sa du fii sa ta möön dë waiwai a di peleikiwooko”, ta taki u so soni di u sa du. A dë fanöudu tu fuu si dee sëmbë u di pisiwata ka u ta peleiki, a di soifi fasi. Andi di soni dë kë taki?

¹⁹ Hoi a pakisei taa di möön gaan soni mbei u ta du di peleikiwooko, hën da u heepi sëmbë u de ko sabi di në u Gadu, söseei u de ko sabi soni u di Könuköndë fëën. Jesosi bi taki gbelingbelin taa biti sëmbë bi o waka nëën baka (Mat. 7:13, 14). Te u dë a di peleikiwooko, nöö u ta wooko makandi ku Jehovah, Jesosi ku dee ëngëli (Mat. 28:19, 20; 1 Kol. 3:9;  Ako. 14:6, 7). Jehovah ta suku sëmbë di kë dini ën (Joh. 6:44). Fëën mbei ee u go wan fosu pasi a wan sëmbë ma an kë haika di bosikopu di u ta tja, nöö kandë wan woto pasi a o kë haika te u toona go baka.

20. Andi u sa lei a Jelemia 20:8, 9 u di mbei di u musu mbei möiti fu wa fii bookosaka tumisi?

²⁰ U sa lei hia soni a di tjabukama de kai Jelemia. Dee sëmbë u di pisiwata ka a bi ta peleiki an bi ta haikëën. „Hii daka” dee sëmbë bi ta mbei ën fa. (Lesi Jelemia 20:8, 9.) A bi fii bookosaka sö gaanfa taa an bi kë peleiki möön. Ma an bi disa. Faandi mbei? Wë u di „di bosikopu u Jehovah” bi dë kuma wan faja a Jelemia dendu, nöö an bi sa hoi ën! Di wan seei soni ta pasa ku u te u ta mbei di Wöutu u Gadu dë a u hati ku u fusutan. Di soni dë da wan woto soni di musu mbei u ta lei soni u Bëibel hiniwan daka, ta pakisei fundu fëën. Te u ta du dee soni aki, nöö woo ta möön dë waiwai a di peleikiwooko, söseei möön hia sëmbë o sa kë haika u.​—Jel. 15:16.

21. Andi u sa du fu wa fii bookosaka tumisi?

²¹ Di sisa de kai Deborah, di u bi taki soni fëën kaa, bi taki taa: „Wan u dee fetilai di Saatan ta tei u feti ku u, da di fii di u ta fii bookosaka.” Ma Jehovah Gadu taanga möön Saatan ku dee fetilai fëën. Fëën mbei te i ta fii bookosaka, nöö begi Jehovah faa heepi i. A o heepi i ku dee suwakifasi fii. A o heepi i ee i dë ku suwaki. A o heepi i fii si dee gaandi dee i abi a di dini fëën a di soifi fasi. Nöö a o heepi i fii si dee sëmbë u di pisiwata ka i ta peleiki, a di soifi fasi tu. Begi di Tata fii di dë a liba ala, nöö i piki ën unfa i ta fii tuutuu. Jehovah sa heepi i fu ja fii bookosaka poi.