1. Ku nga yentxeka yini loko hi hela ntamu?

HI KUMANA ni swikarhatu swa ku hambana hambana siku ni siku, naswona hi yentxa hinkwaswu hi nga swi kotaka swaku hi kota ku tiyisela, kambe swa karhata ku tiyisela loko hi heli ntamu. Hi mhaka leyo, hi fanele hi khumbuka swaku ku hela ntamu swi nga hi yentxa hi titwa na hi nga li va nchumu hi tlhela hi nga tsaki. Buku la Swivuriso 24:10 li li: “Loko u hela mbilu hi siku la swikarhatu, matimba ya wena ma ta va matsongo.” Loko hi hela ntamu, hi nga ha pimisa swaku swikarhatu swa hina i swinyingi hintamu funtshi a hi nge swi koti ku swi hlula.

2. I mpsini swi nga hi yentxaka hi hela ntamu naswona hi ta vona yini ka djondzo leyi?

² Ku ni swilo swa swinyingi leswi nga hi hetaka ntamu. Swin’wana swa kona i swihoxo swa hina, ku kala ku hetiseka kumbe mavabyi. Xin’wana xi nga ha hi hetaka ntamu hiloko hi nga wu kumi ntirho lowu a hi wu lava abandleni kumbe loko vanhu lava hi va chumayelaka ka teritoriyu la hina va nga swi lavi ku twa mahungu ya ku tsakisa. Ka djondzo leyi hi ta vona leswi hi nga swi yentxaka loko hi hela ntamu.

3. I mpsini leswi nga hi pfunaka loko hi titwa na hi nga pfuni nchumu hi mhaka swihoxo swa hina?

³ Minkama yin’wana loko hi yentxa swihoxo hi nga ha titwa na hi nga pfuni nchumu, hi mhaka leyo, hi nga ha pimisa swaku Yehovha a nga ta tshuka a hi yamukela paradesi. Mapimiselo lawo a hi manene. Se hi fanele hi titwisa ku yini loko hi yentxa swihoxo? Bibele li tlhamusela swaku hi Yesu ntsena lweyi a kalaka a nga na xidjoho, kambe “vanhu hinkwavu vajohile.” (Rhom. 3:23) Kambe Yehovha a nga languti swihoxo swa hina funtshi wa swi tiva swaku a hi hetisekanga. Ku hambana ni leswo,  Yehovha wa hi rhandza, a lava ku hi pfuna naswona a hi lehisela mbilu. Wa swi vona swaku swa hi karhatela ku yentxa swilo swa swinene funtshi a tinyimisele ku hi pfuna loko hi titwa na hi nga pfuni nchumu. — Rhom. 7:18, 19.

4-5. Hi ku ya 1 Yohane 3:19, 20, i mpsini leswi nga pfuna vamakwerhu vambirhi swaku va nga heli ntamu?

⁴ Vona leswi nga yentxekela Debora na Maria. * A nkama Debora na a li mutsongo a va mu hlupha funtshi a va mu yentxa a titwa na nga pfuni nchumu. A swi kala swaku va mu khensa hi swilo leswi a a swi yentxa, hi mhaka leyo, a kule na a tivona a nga li wa nchumu. Hambiloko a yentxa swihoxo swa switsongo, a a vona ingaku a ku na swa swinene leswi a swi yentxaka. Maria na yena a kumane ni swikarhatu swa ku fana ni swa Debora. Maxaka ya yena a ma tshamela ku mu danisa minkama hinkwayu, hi mhaka leyo a a titwa na a nga na lisima, hambi nkama a nga tsakamisiwa a a tivona na swi nga mu faneli kuva Mboni ya Yehovha.

⁵ Nambileswo, vamakwerhu lava a va tshikanga ku tirhela Yehovha. Hi mhaka muni? Hi mhaka va khongelile ka Yehovha, va mu byela leswi a va titwisa xiswona. (Pis. 55:22) Va game va swi vona swaku Papayi wa hina wa le matilweni wa swi tiva swaku swilo swa ku biha leswi nga hi yentxekela khale, swi nga hi yentxa hi titwa na hi nga pfuni nchumu, naswona a vona swilo swa swinene leswi nga ka timbilu ta hina leswi hi kalaka hi nga swi koti ku swi vona. — Lerha 1 Yohane 3:19, 20.

6. I mpsini leswi munhu a faneleke a swi yentxa loko a tshuka a phinda xihoxo lexi a nga tshama a xi yentxa?

⁶ Swi nga yentxeka munhu a zama ku tshika swilo swa ku biha leswi a a swi yentxa kambe siku lin’wana a phazama a tlhela a swi yentxa. Swoleswo swi nga ha mu heta ntamu. Swi tolovelekile swaku munhu a titwa nandzu loko a yentxe xidjoho. (2 Kor. 7:10) Kambe a hi fanelanga hi titwa nandzu ku tlula mpimu, hi pimisa swaku a ku na swilo swa swinene leswi hi swi yentxaka ni swaku Yehovha a nge hi rivaleli. Mapimiselo lawo a hi manene, funtshi ma nga hi yentxa hi tshika ku tirhela Yehovha. Khumbuka leswi buku la Swivuriso 24:10 li swi hlayaka. Matimba ya hina ma va matsongo loko hi kumana ni swikarhatu, hi mhaka leyo, hi fanele hi lunghisa timhaka ta hina na Yehovha hi ku khongela ka yena hi kombela swaku a hi rivalela. (Esa. 1:18) Loko Yehovha a vona swaku wa tisola ka swidjoho swa wena funtshi u yentxa hinkwaswu swaku u txintxa, a ta ku rivalela. Xin’wana lexi u nga xi yentxaka i ku kombela madoda ya bandla swaku ma ku pfuna. Ma ta ku pfuna swaku u tlhela u va munghanu wa Yehovha. — Yak. 5:14, 15.

7. Hi mhaka muni hi nga fanelanga hi hela ntamu loko swi hi karhatela ku yentxa swilo swa swinene?

 ⁷ Doda lin’wana la França leli vitaniwaka Jean-Luc, li pfuna vanhu lava titwaka nandzu hi mhaka swihoxo swa vona. Li li: “Munhu wa munene ka Yehovha a hi lweyi a kalaka a nga yentxi swihoxo kambe hi lweyi a tivaka ku tisola loko a hoxile, a tlhela a zama ku txintxa.” (Rhom. 7:21-25) Hi mhaka leyo, loko u hoxile u nga titwi na u nga li wa lisima. Khumbuka swaku hinkwerhu ha djoha, funtshi hi lava ku ponisiwa hi lifu la Yesu Kreste. — Efe. 1:7; 1 Yoh. 4:10.

8. Hi vamani lava nga hi pfunaka loko hi hela ntamu?

⁸ Vamakwerhu abandleni va nga hi pfuna! Va nga hi yingisela loko hi vulavula va tlhela va hi tiyisa hi marito ya vona. (Swi. 12:25; 1 Tes. 5:14) Makwerhu Joyce wa Nigéria, a a tshamela ku titwa na heli ntamu. A li: “A ni ta va mani loko a ni nga pfuniwi hi vamakwerhu! Yehovha a tirhise vamakwerhu leswaku a hlamula swikhongelo swa mina. Leswo swi ni djondzise ku pfuna van’wana loko va hela ntamu.” Hi fanele hi khumbuka swaku vamakwerhu a va nge tivi hinkwaswu leswi swi hi yentxekelaka, hi mhaka leyo, hi fanele hi va byela loko hi lava ku pfuniwa.

9. Buku la Tipisalema 41:3 ni 94:19, li nga hi pfunisa ku yini?

⁹ Kombela Yehovha swaku a ku pfuna. Loko hi ni nkama wa wunyingi na hi vabya kumbe hi ni mavabyi ya ku kala ma nga daheki, swi nga hi karhatela ku pimisa minchumu ya yinene hi hina. Hambileswi Yehovha a kalaka a nga dahi vanhu hi ku tirhisa singita swoswi, kambe a nga hi nyika ntamu wa ku kota ku tiyisela. (Lerha Tipisalema 41:3; 94:19.) Hi xikombiso, a nga ha tirhisa vamakwerhu swaku va hi pfuna hi ku hi yentxela mintirho yin’wana a kaya va tlhela va hi yela bazara. Xin’wana lexi vamakwerhu va nga hi pfunaka ha xona i ku khongela na hina. Yehovha a nga hi pfuna ku khumbuka tindzimana ta Bibele leti nga hi tiyisaka ta ku fana ni leti vulavulaka hi ku helisiwa ka mavabyi ni wutomi la kahle leli hi nga ta va na lona a paradesi.  — Rhom. 15:4.

10. I mpsini leswi nga pfuna Izaki swaku a nga heli ntamu a nkama a nga humeleliwa hi nghozi?

¹⁰ Izaki wa Nigéria a kumane ni nghozi leyi nga mu yentxa a va xilima. Médico wa yena a mu byele swaku a a nga ha ta tlhela a famba. Izaki a li: “Ni twe mbilu ku vava funtshi a ni nga swi tivi swaku ni ta yentxa yini.” I mpsini leswi nga pfuna Izaki? Yena a li: “Mina ni nsati wa mina a hi tshikanga ku khongela ka Yehovha ni ku djondza Bibele, naswona a hi khensa swilo hinkwaswu swa swinene leswi a hi li na swona, ku patsa ni ku tiva swaku hi ta hanya paradesi.”

11. Sintia a swi kotise ku yini ku tshama na a tsakile hambileswi a a vabya?

¹¹ Sintia wa le México a byeliwe hi médico wa yena swaku a ni mavabyi lawa ma dlayaka. Se i mpsini swi nga mu tiyisa? A a tinyimisele ku chumayela siku ni siku a nkama na a dahiwa ka mavabyi ya yena. A hlaye leswi: “Ku yentxa leswo swi ni pfunile ku kala ni nga tshameli ku pimisa hi mavabyi ya mina kumbe ku vava loku a ni ku twa. Loko ni bula ni va médico ni vadotori a ni va vutisa swaku mindjangu ya vona yi kahle, ni gama ni va vutisa swaku hi mhaka muni va lange ntirho lowu wa ku karhata. Leswo a swi ni pfuna ku vona swaku hi tini timhaka leti ti nga va tsakisaka loko hi bula ha tona. Vanyingi va vona, a va ni byela swaku a swi kala kuva munhu lweyi a vabyaka a va vutisa swaku vo yini ku pfuka, naswona a va ni khensa hi leswi a ni ni mhaka na vona. Van’wana va ni nyike tinumeru ta vona ta telefoni va tlhela va ni byela lomu va tshamaka kona. Hambileswi a ni ni swikarhatu ka wutomi  la mina, Yehovha a ni pfune ku tiyisela ni tlhela ni tshama na ni tsakile. Leswo a swi ni hlamalisa hintamu!” — Swi. 15:15.

12-13. Vamakwerhu van’wana lava va vabyaka va swi kotise ku yini ku tama va chumayela naswona leswo swi va pfunise ku yini?

¹² Vanhu lava va vabyaka va nga ha hela ntamu hi mhaka leswi va kalaka va nga swi koti ku chumayela ku fana ni khale. Kambe ku tala ka vona va ha tama va chumayela. Laurel, makwerhu wansati wa le Estados Unidos a hete 37 wa malembe na a li ka muchini lowu a wu mu pfuna ku hefemula. Makwerhu lweyi, a a vabya hi kankru, funtshi a hambe ma operação ya manyingi naswona a a ni mavabyi ya xikhumba ya ku kala ma nga daheki. Kambe hambileswi a a ni swikarhatu leswi hinkwaswu a a tama a chumayela. A a chumayela va infermeiru ni va serventi lava a va ta kaya ka yena. Ku humeleli yini? A pfune 17 wa vanhu swaku va djondza ntiyiso. *

¹³ Doda lin’wana la França leli vitaniwaka Ricardo li hlaye leswi nga pfunaka lava kalaka va nga swi koti ku huma kaya hi mhaka mavabyi kumbe lava nga baxara a xipiritani. Li te: “Swi nga va kahle loko vamakwerhu lava va vabyaka va veka mabuku ya vona ka ndhawu leyi ma nga ta voniwa hi vanhu. Loko vanhu va ma vona, va nga ha lava ku tiva swa swinyingi ha wona, mi tlhela mi sungula mabulu.” Leswi swi nga pfuna vamakwerhu lava tsandzekaka ku famba hi munti ni munti va chumayela, funtshi hambi lava swi va karhatelaka ku suka kaya va nga swi kota ku chumayela hi ku tirhisa makarta ni hi telefoni.

14. Hi xini xikombiso lexi Hosi Davhida a nga hi vekela xona?

¹⁴ Ku ni swivangelo swa swinyingi leswi nga yentxaka hi nga wu kumi ntirho lowu hi wu lavaka abandleni. Hi xikombiso, swi nga ha yentxeka hi gugile, hi vabya kumbe swiyimu swin’wana. Loko hi li ka xiyimu lexo, hi fanele hi tekelela Hosi Davhida. Phela Davhida a a swi lava hi mbilu hinkwayu ku yakela Yehovha a tempele, kambe Yehovha a lange munhu mun’wana swaku a yentxa ntirho lowo. Hambileswo, Davhida a mu pfunile lweyi Yehovha a nga mu langa hi ku mu nyika a woru la linyingi ni prata swaku a ta swi tirhisa ka ku yaka. Hikakunene Davhida i xikombiso xa kahle lexi hi nga xi tekelelaka! — 2 Sam. 7:12, 13; 1 Tikro. 29:1, 3-5.

15. I mpsini leswi nga pfuna Hugu swaku a nga heli ntamu?

¹⁵ Makwerhu wa França lweyi a vitaniwaka Hugu, a tshike ku va doda hi mhaka mavabyi funtshi a a nga ha swi koti ku yentxa mintirho yin’wana a kaya ka yena. A te: “Ni heli ntamu  ni tlhela ni titwa na ni nga pfuni nchumu. Kambe hi ku famba ka nkama ni swi vone swi yampsa ku kala ni nga karhateki hi leswi ni kalaka ni nga swi koti ku swi yentxa. Hi mhaka leyo, ni sungule ku tsaka hi leswi a na ha swi kota ku swi yentxela Yehovha. Ni tinyimiseli ku kala ni nga tlheleli ndzhaku, ku fana na Gidiyoni ni 300 wa vavanuna lava nga tama va lwa hambileswi a va karhalile, na mina ni ta tama ni lwa!” — Vaava. 8:4.

16. Hi nga djondza yini ka xikombiso xa tintsumi?

¹⁶ Tintsumi ta ku tshembeka ti hi vekela xikombiso xa kahle. Hi xikombiso, Yehovha a tshama a byela tintsumi swaku ti nyikela mavonelo ya leswi ti nga mu xengisaka xiswona Hosi Akabu. Tintsumi ta tinyingi tinyikele mavonelo ya tona, kambe ku yo tirhisiwa mavonelo ya ntsumi yin’we ntsena. (1 Tiho. 22:19-22) Tintsumi tin’wana a ti zanga ti hela ntamu hileswi mavonelo ya tona ma kalaka ma nga tirhisiwanga. Phela tintsumi titiveka hansi naswona ti lava swaku minkama hinkwayu ku khensiwa Yehovha. — Vaava. 13:16-18; Nhla. 19:10.

17. I mpsini hi nga swi yentxaka loko hi hela ntamu hi mhaka leswi hi kalaka hi nga nyikiwanga ntirho lowu a hi wu lava abandleni?

¹⁷ Khumbuka swaku a xa lisima hintamu lexi hi nga na xona i kuva Timboni ta Yehovha ni ku chumayela hi Mfumu wa yena. A lexi xi hi yentxaka hi va va lisima ka Yehovha a hi mintirho leyi hi nga na yona abandleni. Kambe Yehovha ni vamakwerhu va ta hi vona na hi li va lisima loko hi tiveka hansi. Hi mhaka leyo, kombela Yehovha a ku pfuna swaku u va munhu wa ku tiveka hansi. Pimisa hi swikombiso swa swinyingi leswi nga kona ka Bibele swa vanhu lava a va tiveka hansi, naswona yentxa leswi u nga swi kotaka swaku u tirhela vamakwerhu funtshi u swi yentxa hi mbilu hinkwayu. — Pis. 138:6; 1 Pet. 5:5.

18-19. U nga swi kotisa ku yini ku tsaka hambiloko vanhu va nga lavi ku yingisa ka teritoriyu la wena?

¹⁸ U tshama u godola hi mhaka leswi vanhu va teritoriyu la wena va kalaka va nga lavi ku ku yingisa kumbe hi mhaka leswi u kalaka u nga kumi vanhu va vanyingi makaya? Ka xiyimu lexi, u nga yentxa yini swaku u tama u tsaka? Vona leswi u nga swi yentxaka ka kwadru leli nge: “ U Nga Yentxa Yini Swaku Ntirho Wa Wena Wa Ku Chumayela Wu Tsakisa?” I swa lisima kuva ni mavonelo ya kahle hi ntirho wa ku chumayela. Se swi vula yini leswo?

 ¹⁹ Lexi hi yentxaka hi chumayela i ku byela vanhu vito la Xikwembu ni ku chumayela hi Mfumu wa xona. Yesu a vule swaku i vatsongo lava a va ta mu landzela. (Mat. 7:13, 14) Loko hi li nsin’wini, hi fanele hi tsaka hi ku tiva swaku hi tirha na Yehovha, Yesu ni tintsumi. (Mat. 28:19, 20; 1 Kor. 3:9; Nhla. 14:6, 7) Yehovha a lavetela vanhu lava lavaka ku mu tirhela. (Yoh. 6:44) Loko munhu a nga lavi ku twa leswi hi mu byelaka swona, swi nga ha yentxeka a swi lava hi nkama wun’wana.

20. Buku la Yeremiya 20:8, 9, li nga hi pfunisa ku yini swaku hi nga heli ntamu?

²⁰ A hi voneni leswi hi nga swi djondzaka ka muprofeta Yeremiya. A a chumayela ka ndhawu leyi a swi karhata ku chumayela ka yona hikusa vanhu va kona a va tshamela ku mu poyila funtshi a va nga lavi ku mu yingisa. (Lerha Yeremiya 20:8, 9.) Leswo swi mu yentxe a hela ntamu a za a lava ku tshika ni ku chumayela. Se hi mhaka muni a nga tshikanga? Hikusa marito ya Yehovha a ma pfurha ku fana ni ndzilu a ndzeni ka yena, naswona a a nga swi koti ku miyela a nga chumayeli. Phela na hina hi nga fana na Yeremiya, hi ku lerha Bibele siku ni siku hi tlhela hi pimisa hi leswi hi swi djondzaka. Leswo swi ta hi yentxa hi tsaka naswona hi ta kota ku chumayela vanhu va vanyingi. — Yer. 15:16.

21. Hi nga yentxa yini swaku hi nga heli ntamu?

²¹ Debora lweyi hi nga vulavula ha yena ku sunguleni, a te: “Sathana a lava hi hela ntamu swaku hi ta tshika ku tirhela Yehovha.” Kambe Yehovha a ni ntamu ku tlula Sathana ni hinkwaswu leswi a swi tirhisaka. Hi mhaka leyo, loko u hela ntamu kombela Yehovha swaku a ku pfuna. Yehovha a ta ku pfuna leswaku u sekeleka swaku u lwisana ni swihoxo swa wena ni loko u vabya. Yehovha a ta ku pfuna swaku u nga karhateki loko u nga yi kumi mintirho leyi a wu yi lava abandleni a tlhela a ku pfuna swaku u tama u chumayela na wu tsakile. Khongela ka Yehovha u mu byela swikarhatu hinkwaswu. Phela Yehovha a ta ku pfuna swaku u nga heli ntamu.