1. ¿Ambechi uá úkuarhinchani engachi chketakuarhitini jauaka?

PAUANI pauanchi jatsiasïnga uandanhiatechani ka jánguarhintasïngachi orhepani uérakuani. Joperu engachi chketakuarhitini jarhajka sánderu úkua jukasïndi orhepani uérakuani uandanhiatechani. Ísï jimbo, jatsiskachi para miáni eska engachi chketakuarhiska uáka eskachi ísï pʼikuarheraaka enajkichi no ma ambe jukaparha ka eskachi nóteru tsípini pʼikuarheraakia. Eska na arhijka Proverbios 24:10: “Engari chketakuarhiska jiáni engari no sési nitamani jauaka, nóri xáni uinhapiti jauaka”.

2. a) ¿Ambe úsïni eska ma chketakuarhiaka? b) ¿Ambechi exea ini jorhenguarhikua jimbo?

² Uánikua ambe jimbochi úpiringa chketakuarhini, komu engachi no sési újka ambe ma, engachi no újka jurajkuni ambe ma enga no sési jaka, pʼamenchakua ambe jimbo, engachi no intsïnhajka ánchikuarhita ma para Jeobani marhuakuni engachi jucha tsitipiringa o engachi jatsijka para aianhpini jimesï enga kʼuiripu no xáni sési kurhaajka. Ini jorhenguarhikua jimbochi exeaka máru ambe engachi uáka úni parachi úni orhepani uérani engachi chketakuarhitini jauaka.

3. ¿Ambejtsïni jarhuataa parachi no xáni imani ambe eratseni jarhani engachi kʼamanharhintskua jimbo újka?

³ Engachi jukari imani ambe eratseni jauaka engachi kʼamanharhintskua jimbo újka, uáti eskachi no sési pʼikuarheraaka ka niáranchi eratseni eska Jeoba no uékasïnga eskachi jauaka jimbanhi parhakpinirhu. I jásï eratsekuajtsïni uáti kánikua no sési úchini. ¿Ambejtsïni jarhuataa parachi no xáni no sési pʼikuarherani imani ambe jimbo engachi no újka sési úni? Biblia uandasïndi eska  tata Jesukristujkusï perfektueka ka eskachi iámindu kʼuiripuecha kʼamanharhintstiska (Rom. 3:23). Joperu Jeoba no imani ambejkusï exeni jarhajti engachi no sési újka nijtu erokuarhijki eskachi perfektueuaka. Sánderu sési, Táti máesti enga uékpitika ka tekaantstini. Exesïndi na engachi xáni jánguarhintajka imani ambe úni enga sési jaka ka na engachi jánguarhintajka parachi no no sési eratseni juchari ambe ka jingontku jarhasïndi parajtsïni jarhuatani (Rom. 7:18, 19).

4, 5. Eska na arhijka 1 Juanu 3:19, 20, ¿ambe jarhuataaspi ini pirenchichani paraksï no chketakuarhini?

⁴ Ju je Dianeri ka Marieri ejempluni exeni. * Enga Diana nanaka sapichuepka, imeri familia no xáni xénchasïrendi ka kasiksï no méni sési arhisïrendi. Ini ambe jimbo no sési pʼikuarherasïrendi ka enga na kʼépkia no sési ambe eratsesïrendi imeri ambe. Asta sapichitu ambe niárasïrendi ísï pʼikuastani enajki ima no ambe marhuaueni. Ka Mariajtu sáno májkueni ambe nitamakuarhispti. Imeri familia xáni no sési pʼikuastasïrendi enga niárapka ísï pʼikuarherani enajki no ma ambe marhuaueni. Asta jiáni enga na itsï atakuarhipkia, útasï ísï pʼikuarherasïrendi enajki no jukanchapi para arhinhani eska Jeobaeri testigu máespka.

⁵ Joperuksï i tsimani pirenchicha seguirispti Jeobani marhuakuni. ¿Ambe jarhuataaspi? Ma ambe engaksï úpka, jindeespti eskaksï Jeobani kómarhispka ka imani jurajkukuni imecheri uandanhiatechani (Sal. 55:22). Imaksï niáraspti kurhanguni eska juchari Táti auandarhu anapu engajtsïni xáni xénchajka, míteska eska iámindu ima ambe engachi ióntki no sési nitamakuarhika úsïnga eskachi juchajkumindu no sési pʼikuarheraaka. Joperu ístu exesïndi juchari ambakiti kualidadichani, nájkirukachi jucha no újka exeni indeni ambe (arhinta je 1 Juanu 3:19, 20).

6. ¿Ambe úpirini úni ima enga ménderu uénajka imani ambe úni enga no sési jaka?

⁶ Enga nema kánikua jánguarhintani jaka jurajkuni imani ambe enga no sési jaka, joperu ménderu ueentani úni ini ambe, kánikua no sési pʼikuarherasïndi. Ísïsti, no no sési jarhasti engachi no sési pʼikuarherajka engachi kʼamanharhintskua ambe újka (2 Kor. 7:10). Joperuchi no jatsipiringa para xáni no sési pʼikuarherani ka niárani ísï eratseni eskachi “no ma ambe jukaparhaska ka eskajtsïni Jeoba no méni niáraaka puáchintani”. No sési jarhasti ísï eratseni ka uáti eskachi jurajkuaka Jeobani. Ístu, ju je miáni ambe enga arhijka Proverbios 24:10: engachi chketakuarhiska nóchi xáni uinhapiti jauaka. Sánderu sési, ju je sési peentani ambe ma Jeobani jingoni kómarhiparini eskajtsïni puáchintaaka (Is. 1:18). Ima exeati eskachi mintsita jingoni móantasïnga ka puáchintaatijtsïni. Ístu, ju je orhejtsïkuticha jingoni uandontskuarheni ka imajtsïni tekaantskua jingoni jarhuataati parachi ménderu sési jarhani Tata Diosï jingoni (Sant. 5:14, 15).

7. Engachi úkua jukanchani jaka jurajkuni ambe ma enga no sési jaka, ¿andichisï no jatsi para chketakuarhini?

 ⁷ Francia anapu orhejtsïkuti ma enga arhinhajka Juanu arhiasïndi imechani engaksï úkua jukanchani jaka jurajkuni imani ambe enga no sési jaka: “Para Jeoba, ambakiti kʼuiripu ma no imeesti enga méntkisï sési újka ambe ma sino ima enga niárajka no sési pʼikuarherani imani ambe jimbo enga no sési újka ka enga jánguarhintajka mójtakukuarhini” (Rom. 7:21-25). Ísï jimbo, ju je no eratseni eskachi no méni uáka mójtakurhini. Jimbokachi iáminduecha niárasïnga no sési ambe úni, uétarhinchasïngachi Jeobaeri kóntperatani engajtsïni íntskuka Jesusiri uarhikua jimbo (Efes. 1:7; 1 Juanu 4:10).

8. Jiáni engachi uétarhinchaaka eskajtsïni nema uinhapentaaka, ¿nécha jingonchi uá nirani?

⁸ Engachi uétarhinchajka parachi uinhaperanhantani, uákachi kúnguarhikuarhu anapu erachicha ka pirenchicha jingoni nirani. Imajtsïni kurhajchaati ka uinhaperantani jiáni engachi uétarhinchaaka (Prov. 12:25; 1 Tes. 5:14). Nigeria anapu pirenchi ma enga Julia arhinhajka ka enga jánguarhintani jaka para no chketakuarhini, uandasïndi: “Enga no erachicha jimboepiringa, no úpiringa jandiajku orhepani uérani. Inde ambe xarharasïndi eska Jeoba kurhauasïnga juchiti kómarhikuechani. Astajtsïni jorhendasti néna sési pʼikuastantaani imechani engaksï kómu pʼikuarherani jarhajka”. Ísïsti, erachichaksï no méntkisï kuenta íntskukuarhiati engachi uétarhinchani jauaka eskajtsïni uinhaperantaaka. Ísï jimbo, jatsiskachi para jucha uénani andarhieraani erachichani o pirenchichani engaksï eratsekua jukarika parajtsïni jarhuatani.

9. ¿Nénajtsïni uinhaperantasïni Salmo 41:3 ka 94:19?

⁹ Ju je Jeobaeri jarhuajperata jirinhani. Úkua jukasïndi eskachi sési pʼikuarheraaka jiáni engachi pʼamenchani jarhajka ka sánderia engachi ióni ísï jarhajkia. Ísïsti, Jeobajtsïni no milagru ma úchiati parachi ambakentani, joperujtsïni sési pʼikuastantaati ka uinhaperantani parachi úni tekaantani (arhinta je Salmo 41:3; 94:19). Por ejemplu, uáti úni eskajtsïni máru erachicha ka pirenchicha jarhuataaka ambe ma jingoni juchari kʼumanchikuarhu ojtsïni ánchperata ambe nirani úchini o eskajtsïni kómarhijpichiaka. Ístujtsïni Jeoba uáti miátantani ambe engajtsïni arhijka imeri Karakatarhu engajtsïni sési pʼikuastantajka, komu ima ambakiti tsípikua engachi jatsiaka jimbanhi parhakpinirhu nani engachi nóteru pʼamenchakia nijtu no sési pʼikuarherani (Rom. 15:4).

10. ¿Néna úspi Isaac orhepani uérani enga no sési úkuarhinchapka?

¹⁰ Isaac enga Nigeria irekaka, aksidenti ma jimbo nóteru ústia xanharani ísï eska doktori na arhipka. Ima uandasïndi: “Kánikua no sési pʼikuarheraspka ka uinhamu chketakuarhispka”. ¿Ambe jarhuataspi orhepani uérani? Undantasïndi: “Juchiti uarhiiti jingonchi méntkisï kómarhispka Jeobani ka jorhenguarhini imeri Karakatani. Ístuchi, eratsetixapkia agradesidu jarhani ima ambe jimbo engachi jatsika ka ima tsípikuani jimbo engachi jatsiaka jimbanhi parhakpinirhu engajtsïni Tata Diosï íntskuaka”.

11. ¿Ambe úspi eska Cindy tsípini pʼikuarherapiringa nájkiruka kánikua pʼamenchani japka?

¹¹ Cindy enga México irekaka, pʼamenchakua ma exeminhantaspti enga úpiringa uandikuni. ¿Ambe jarhuataspi para úni orhepani uérani? Aiakukuarhespti eska pauani pauani aianhpepiringa iámu imani tiempuni enga tratamientu intsïnhani japiringa. Ima karasti: “Inde amberini jarhuataspti parani no xáni uandanhiani jarhani operasioni jimbo, na engani xáni pʼamerenga o no sési pʼikuarherani. Arini ambe úsïrenga: engani doktoricha ka enfermeruecha jingoni uandontskuarhenga, kurhanguarhiasïrenga imecheri familiarichani. Tátsekua kurhamarhiasïrenga andiksïsï indeni ánchikuarhitani erakupi enga xáni tiempu euajpijka. Ísï úsïrenga  míteni ambe engaksï tsitipiringa kurhaani. Uánikuechajtsïni arhispti eskaksï no uánikua pʼamenchaticha kurhamarhiasïrenga indeni ambe ka uánikuechajtsïni diosmaiamukua arhispti. Márujtsïni asta aianguspti nani engaksï irekaka ka íntskuntsïni imecheri númeru telefonueri. Engani xáni no sési nitamakuarhini japka indeni tiempu jimbo, ískurini pakatasti na enga Jeoba úpka eskani méntkisï tsípini pʼikuarherapiringa” (Prov. 15:15).

12, 13. ¿Ambeksï úsïni máru erachicha paraksï seguirini jarhani aianhpini nájkirukaksï pʼamenchakua ambe kámajka o jimbokaksï jatiriskia, ka néna nikuasïni?

¹² Jarhastiksï erachicha engaksï no sési pʼikuarherajka jimbokaksï no úsïnga xáni aianhpini eskaksï xáni uékapiringa jimbokaksï pʼamenchakua ambe kánguarhisïnga o jimboksï jatiriskia. Joperuksï jirinhakuntasïndi néna engaksï uáka aianhpini. Jini Estados Unidos, pirenchi ma enga arhinhajka Laurel, 37 uéxurhini jarhaspti mákinarhu ma inchanhikurhitini enga jarhuatenga para jirejtani. Ístu, kánseri pʼiraspti, uánikua operasionichani úminhaaspti ka uánikua pʼamenchakuechani jatsiaspti pieliru. Nájkiruka xáni kʼérati uandanhiatechani jatsiapka no méni jurajkuspti aianhpini. Uandontskuarhekuasïrendi enfermeruechani ka imechani engaksï nirenga exeni. Jarhuataaspti ma 17 kʼuiripuechanisï Jeobaeri ambe jorhenguarhini. *

¹³ Francia anapu orhejtsïkuti ma enga Ricardo arhinhajka, ambakiti konseju ma jatsisti para imecha engaksï no újka uérani imecheri kʼumanchikuarhu o engaksï jima irekaka engaksï jatiricha exenhajka. Ima uandasïndi: “Uákajtsï máru publikasionichani jimesïsï peeraani nani engaksï máteru kʼuiripuecha uáka exeani. Engaksï kʼuiripuecha jimesïsï nitamaaka, uékaatiksï míteni inderi ambe. Ini ambe úparini erachichaksï úsïndi uandontskuarheni kʼuiripuecha jingoni ka uinhaperantaasïndi nájkirukaksï no újka aianhpini kʼumanchikuecha jimbo”. Imecha engaksï no újka uérani imeecho ístuksï uáti karta ka telefonu jimbo aianhpini.

14. ¿Náki ambakiti ejemplujtsïni íntskuski rei Dabidi?

¹⁴ Jamberichi uékapiringa jatsini ánchikuarhita ma parachi sánderu marhuakuni Jeobani. Joperu jati uánikua ambe engachi jimbo no intsïnhajka, komu na engachi xáni jatirikia, pʼamenchakua ambe jimbo o máteru ambe jimbo. Engachi indeni ambe nitamakuarhini jauaka, rei Dabidiri ejemplujtsïni uáti kánikua jarhuatani. Ambe enga ima sánderu uékenga, jindeespti Tata Diosïri templuni úni; joperu enga mítepka eska no imasï erakunhapka para indeni ambakiti ánchikuarhitani úni, kánikua jarhuataspti imani enga erakunhapka para ísï úni, íntskuspti kánikua oru ka plata para templuni úni. ¡Xáni  ambakiti ejemplu engajtsïni íntskuka! (2 Sam. 7:12, 13; 1 Crón. 29:1, 3-5).

15. ¿Ambe úspi erachi ma para nóteru no sési pʼikuarherania?

¹⁵ Francia anapu erachi ma enga Hugo arhinhajka, nóteru orhejtsïkutistia pʼamenchakua ma jimbo. Nóteru úsïrendi ni sapichitu ambe úni imeri kʼumanchikuarhu. Ima karasti: “Uénakuarhu kánikua no sési pʼikuarheraspka, enajkini para no ma ambe marhuaueni. Joperu ísï tátsekua, kurhanguspka eskani no no sési pʼikuarherapiringa imani ambe jimbo engani nóteru uéngia úni ka tsípini imani ambe jimbo engani uénga úni parani Jeobani marhuakuni. Eratsetixaka seguirini orhepani uérani. Ísïska eska Gedeoni ka imeri 300 kʼuiripuecha engaksï imani jingoni jámenga: nájkirukani kuatarakia, seguiriuaka orhepani uérani” (Juec. 8:4).

16. ¿Ambejtsïni jorhendasïni ánjelicheri ejemplu?

¹⁶ Ánjelicha engaksï no méni jurajkujka Tata Diosïni, ístuksï ambakiti ejemplu máesti. Ma xanhari, Jeoba kurhakuaspti ánjelichani eskaksï arhipiringa nénaksï úpirini támisï jánhastani rei Akabini. Uánikuechaksï uandaspti ambe ma, joperu Jeoba ma ánjelirkusï erakupti ka uandaspti eska sési uérapiringa ima ambe enga i ánjeli uandapka (1 Rey. 22:19-22). ¿No sésiksï pʼikuarheraspi máteru ánjelicha ka eratsenksï: “¿Andisïni uandani japi?”? No ma ambe xarhatasïndi eskaksï ísï uandaspka. Ánjelichaksï kaxumbitiisti ka uékasïndiksï eska Jeobajkusï kʼéri ambe arhinhaaka (Juec. 13:16-18; Jaŋ. 19:10).

17. ¿Ambechi jatsiski para úni engachi no sési pʼikuarheraaka jimbokachi no intsïnhaska ánchikuarhita ma kúnguarhikuarhu?

¹⁷ Ju je no méni mirikurhini eska sánderu kʼéri kóntperata engachi uáka jatsini jindeesti Jeobaeri testigueni ka aianhpini Reinueri ambe. Uákachi jatsini o nóteria ánchikuarhita ma kúnguarhikuarhu. Joperu no indeni ambe jimbojtsïnisï jukaparharajti Jeoba ka erachicha, sánderu sési kaxumbikua jimboesïndi. Ísï jimbo, ju je mintsita jingoni kómarhini Jeobani eskajtsïni jarhuataaka parachi méntkisï kaxumbitiini. Ju je ambakiti ejempluechani eratseantani engaksï xarhatapka kaxumbikua engaksï Bibliarhu jaka ka tsípikua jingoni marhuakuani juchari erachichani imani ambe jingoni engachi uáka úni (Sal. 138:6; 1 Ped. 5:5).

18, 19. ¿Ambejtsïni jarhuataa seguirini tsípikua jingoni aianhpini jimesïsï enga kʼuiripu no xáni uéjka kurhaani?

¹⁸ ¿Jimesïsïchi aianhpisïni nani engaksï no káni jarhajka kʼuiripuecha imeecho o engajtsïni  no uéjka kurhajchani? Engajtsïni inde ambe no sési pʼikuastajka, ¿ambechi uá parachi sánderu tsípikua jingoni aianhpini? Rekuadrurhu “Néna sánderu tsípikua jingoni aianhpini” jarhastiksï máru konsejuecha engajtsïni uáka jarhuatani. Ístu, uétarhisïndi eskachi exeaka andisï uétarhijki aianhpini. ¿Ambe arhikuekasïni i ambe?

¹⁹ Ju je miáni eska ambe enga sánderu jukaparhakueka jindeeska Tata Diosïri nombrini aianhpini ka Reinuni. Jesusi uandaspti eskaksï no uánikua kʼuiripuecha exentapiringa xanharuni enga tsípikuarhu pájpijka (Mat. 7:13, 14). Ístu, engachi aianhpijka kʼéri kóntperatachi ma jatsisïnga jimbokachi ánchikuarhini jarhasïnga Jeoba, Jesusi ka ánjelicha jingoni (Mat. 28:19, 20; 1 Kor. 3:9; Jaŋ. 14:6, 7). Ka ístu, Jeobasï újti eskaksï niáraaka imeri kúnguarhikuarhu jarhani ima kʼuiripuecha engaksï uéjka marhuakuani (Juanu 6:44). Ísï jimbo, úpirindi jarhani nema engajtsïni iásï no uékaka kurhajchani, joperujtsïni máteru jimbo kurhajchani engachi uandontskuarhekuaka.

20. Eska na arhijka Jeremías 20:8, 9, ¿ambejtsïni jarhuataa parachi úni orhepani uérani engachi chketakuarhitini jauaka?

²⁰ Uánikua ambechi uáka jorhenguarhini profeta Jeramiasiri. Jimesïsï enga ima aianhpipka kʼuiripuechaksï no uékaspti kurhajchani. Asta jamberiksï chúskutasïrendi no sési arhini ka teresmarhuni (arhinta je Jeremías 20:8, 9). Niáraspti xáni no sési pʼikuarherani enga jamberi nóteru uékengia aianhpini. Joperu no ísï úspti. ¿Andi? Ima mismu uandaspti eskaksï Jeobaeri uandakuecha ísïspka eska chpiri imeri mintsitarhu enga jimbo no úpiringa pʼimukukuarhini. Juchajtuchi uáka májkueni úni eska Jeremiasi engachi pauani pauani jorhenguarhiska Bibliaeri ambe ka engachi eratsentaska ini ambe. Jiájkanchi sánderu tsípikua jingoni aianhpiaka ka sánderujtsïni sési nicheati aianhpikuarhu (Jer. 15:16).

21. ¿Nénachi uá orhepani uérani engachi chketakuarhitini jauaka?

²¹ Diana engachi párrafu 4 jimbo uandaka, uandasïndi: “Engachi chketakuarhitini jarhajka, inde ambesï sánderu marhuakujti Noambakitini parajtsïni no sési úchini”. Joperu Jeoba sánderu uinhapitisti eska Noambakiti ka ima ambe enga úrajka parajtsïni no sési úchini. Ísï jimbo, ambe uéjkijtsïni no sési pʼikuastani, ju je aianguni Jeobani na engachi pʼikuarherajka ka kurhakuni eskajtsïni jarhuataaka. Imajtsïni jarhuataati imani ambe jingoni engachi kʼamanharhintskua jimbo újka ka parachi jurajkuni imani ambe enga no sési jaka, ístujtsïni jarhuataati jiáni engachi pʼamenchani jauaka ka parachi no no sési pʼikuarherani engachi no intsïnhaaka ánchikuarhita ma imeri kúnguarhikuarhu ka jarhuataatijtsïni parachi tsípikua jingoni aianhpini. Imeri jarhuajperata jimbo, uákachi orhepani uérani jiáni engachi chketakuarhitini jauaka.