1. Zvinyi zvingaitika katiri kana takaora mwoyo?

ZUWA no zuwa tinosongana no matambudziko uye tinoita zvese zvatinokwanisa kuti tiashingirire. Asi amutenderi here kuti tingashingirira matambudziko edu zviri nani kana tisikazi kuora mwoyo? Hino, tinodikana kuona kuora mwoyo hingana muvhakaciri watisikagondi uyo ungakwanisa kutibira rugondo, ushingi uye mupfaro. Zvierengo 24:10 uye masoko e pasi anoti: “Kana ukaora mwoyo pa zuwa rekushupika, simba rako ricagara padoko.” Ndizvona kamare, kuora mwoyo kungakwanisa kutipedza simba ratinoda kuti tikwanise kurarama no matambudziko e upenyu.

2. Zvinyi zvingaita kuti tiore mwoyo, uye ticaonei mu fundo ino?

² Tingakwanisa kudzirhya mwoyo nge zviro zvakawanda—zvimweni zvemukati, zvimweni zvekunza. Izvona zvingaitika nge ndaa ye kutama kukwana, zvatisikakwanisi kuita uye uthongo usikazi kunaka. Izvona zvinobatanidzawo kutama kutambira makomborero atinoda pa kuseenzera Djehovha kana kuti kuparidzira ku mbuto dzisikabudiriri. Mu fundo ino, ticaona zviro zvatingaita kuti tikunde kuora mwoyo.

3. Zvinyi zvingatibetsera kuti tione kutama kukwana kedu pakati no pakati?

³ Zviri nyore katiri kuona zviro nge maonero asikazi kunaka nge ndaa ye kutama kukwana kedu uye nge ndaa ye zviro zvatisikakwanisi kuita. Zvinozopedzesera nge kutendera kuti, nge ndaa ye zvishaishi zvedu, Djehovha aazombotitambiri mu nyika yake ipsva. Marangariro aya angatikuwadza. Tinodikana kuitei kuti tione kutama kukwana kedu pakati no pakati? Bhaibheri rinotipangidza kuti, kusiya Djesu basi, anhu ese “akashaisha.” (Aro. 3:23) Asi Djehovha aanangiri pa zvishaishi zvedu kuti tigare  anhu akakwana. Pano kuita izvi, ayena anoona kupeta masimba katiri kuita kuti tibudirire pakurhwisa maonero edu ekutama kukwana uye akagadzirira kutibetsera.—Aro. 7:18, 19.

4-5. Maererano na 1 Juau 3:19, 20, Ngei hanzvadzi mbiri idzi adzizi kuwira mu miyedzo ye kuora mwoyo?

⁴ Rangarirai nge zve miezaniso ya Dhebhora na Mariya. * Paainga ari mwana Dhebhora waibatwa zvisikazi kunaka. Iyena wainga asikabambiswiwo. Iyena wakatanga kugara no marangariro asikazi kunaka nge zvake. Kunyazi paakaita zvishaishi zvisikazi kukura, iyena wakadziona hingana asikabetseri. Mariya wakasonganawo no dambudzo rakaita hingana ra Dhebhora. Hama dzake dzaimubata zvisikazi kunaka. Migumisiro yakhona, iyena waidziona hingana asikabetseri. Mumasure mekuziya cokwadi, iyena wakazwa asikasisiri kuthwara zina ra Mwari!

⁵ Asi, hanzvadzi idzi adzizi kusiya kuseenzera Djehovha. Ngei? Cakaita kuti adaro, nge cekuti akakhandira mutoro wawo kuna Djehovha eciseenzesa minamato no mwoyo wese. (Pis. 55:22) Akaguma pa kutendera kuti Baba edu ano rudo e kudenga anoziya kuti zvatakasongana nazvo kare uye kurangarira kedu kakashata kakatipingaidza kudini. Djehovha anoonawo zvakanaka zviri mu mwoyo medu—unhu watisingakwanisi kuona uri mukati medu.—Erengai 1 Juau 3:19, 20.

6. Cinyi cingaitwa no munhu kana akawhirira kuita cishaishi caakamboita kare?

⁶ Munhu umweni ungaseenza no simba kuti asiye kuita zviro zvakashata. Asi iyena ungahwirira kuitazve ciro cimwe-cimweco uye ungaora mwoyo ndizvona. Zvezvirokwazvo, atinyasi kuzwa zvakanaka kana tikaita ciro cakashata. (2Ako. 7:10) Nge kudaro, atidikani kunyanya kuenda kure tecirangarira kuti: Inini andibetseri ciro. Djehovha angandirekerera kudini? Kurangarira kakadaro akuzi kuwakirhwa mu cokwadi uye kungaita kuti tisiye kuseenzera Djehovha. Rangarirai zvatinoerenga pana Zvierengo 24:10—simba redu rinogara padoko kana takaora mwoyo. Pane kudaro, “natsai zviro zvenyu” na Djehovha nge kuenda kaari meciseenzesa minamato uye mecipsvaka nyasha dzake. (Isa. 1:18) Kurangarira nge zve kucinyuka kenyu, ayena acakurekererai. Pa kutunhudzira, endai kune akuru. Anozomubetsera no mwoyo unononoka kutsamwa kuti mugarezve no mwiya.—Tg. 5:14, 15.

7. Ngei tisikadikani kuora mwoyo patinonga teciita zviri zvese kuti tiite zvakanaka?

⁷ Jean-Luc, mukuru umweni we ku França, unoti kune aya ari kudzipasa ndaa nge kukonerhwa simba: “Munhu unoita zvakanaka  pamberi pa Djehovha,  aamunhupi usikamboshaishi, asi munhu unogunu’na nge zve zvishaishi zvake unogara ecicunyuka.” (Aro. 7:21-25) Hino, musadzipase ndaa nge kukonerhwa simba. Rangarirai kuti akuna kana umwe wedu unokwanisa kugara munatsi pamberi pa Mwari. Tese hedu tinoda nyasha dza Mwari peciseenzeswa rusudzunuro.—Aef. 1:7; 1Ju. 4:10.

8. Ndikupi katingakumbira rubetso, kana takaora mwoyo?

⁸ Tingaenda kuno hama uye hanzvadzi dzedu—mhuri dzedu dze ku mwiya—kuti dzitibambise! Aona angatipurutana kana tecida kucedza uye angatibambisa. (Zvie. 12:25; 1 Ate. 5:14) Joy, hanzvadzi imweni ye ku Nigéria, yaineseka nge kuora mwoyo, yakati: “Ndaizonga ndiri kupi kudai pasina hama dzangu? Hama no hanzvadzi dzangu ndiwona anopangidzira kuti Djehovha unodaira minamato yangu. Ndakatofundira nawo kuti tingabetsera kudini anhu amweni akaora mwoyo.” Nge kudaro, tinodikana kuedzurira kuti anguwa dzesepi hama uye hanzvadzi dzedu dzinonga dzeciziya kuti tinoda kubambiswa. Hino, tingatangisa hedu kuenda kune munhu umwe wakakura pa kunamata kuti ticedze nge zve zviro zviri kutinesa kuitira kuti atibetsere.

9. Pisarema 41:3 na 94:19 inotibambisa kudini?

⁹ Whirirai kuna Djehovha kuti amutsigire. Patinonga tisikaripi kuzwa zvakanaka nyanye-nyanye patinonga tecirhwara nhenda isikaperi, tingakonerhwa kurangarira zviro zvakanaka. Kunyazi hazvo Djehovha asikatirapi zvinoshamisa zvinoku, ayena anotinyaradza uye anokwanisa kutipasa simba ratinoda kuti tikwanise kushingirira. (Erengai Pisarema 41:3; 94:19.) Ngo muezaniso, ayena anokwanisa kuita kuti anhu atinonamata nawo auye kuzotibetsera kana tecida rubetso pa mabasa e pa nyumba kana kuenda kotenga zviro zvatinonga tecida. Ayena angaita kuti hama dzedu dziite minamato na isusu. Kana kuti angakwanisa kuwhirinza mu ndangariro dzedu marangariro anonyaradza ari mu Soko rake, akaita hingana kariro ye upenyu wakakwana, isina ma tenda, kana kurhwadziwa mu nyika ipsva.—Aro. 15:4.

10. Cinyi cakaita kuti Isang asaore mwoyo paakasongana no tsaona?

¹⁰ Isang, unogara ku Nigéria, uye wakasongana no tsaona uye wakaoma ku dii re muoko boswe. Medhiko wake wakareketa kuti wainga asikazohambizve. Isang unoti “Ndakaora mwoyo uye ndainga ndisina simba”. Iyena wakarumbwa akadaroko here? Haiwa! Cinyi cakamubetsera? “Mukadzi wangu na inini atisati takambosiya kuita minamato kuna Djehovha uye kufunda Soko rake,” iyena unopanganidza kuti. “Tainga takashinga kuerenga makomborero edu, kubatanidza kariro yedu ye upenyu mu nyika ipsva ya Mwari.”

11. Cindy wakagumira kudini mupfaro paaibatana no dambudziko re uthongo?

¹¹ Cindy, uyo unogara ku México, wakaonekwa kuti wainga ano nhenda inouraiya. Cinyi cakamupasa simba rekuti ashingirire? Paairaphwa, iyena wakakanda nzero dzake pa basa rekuparidzira ma zuwa ese. Iyena wakati: “Pandaiita izvi, ndakakwanisa kuzwira usisi amweni pano kurangarira basi nge zve operasau, kurhwadziwa uye kutya kandaaiita. Maitiro angu ainga ari aya: Pandaicedza no ma medhiko uye ma efermeiro, inini ndaiyabvunzisa nge zve mhuri dzawo. Hino, ndaiyabvunzisa kuti, ngei makasanangura kuita basa rakaoma kudai. Mu masure mekuita izvi, zvakagara nyore kuti ndione kuti i nyaya ipi yaikwanisa kubaya mwoyo yawo. Akawanda akati aanhu esepi atenda anobvunzisa ma medhiko kana ma efermeiro awo kuti: ‘Makadini?’ Ese akanditenda nge kuwapangidza kuti ndinoda kucengeteka kawo. Amweni  akatondipasa numero yawo ye thurufunu. Hino, pa nguwa yese ii yaishupha mu upenyu wangu, Djehovha akandipasa mupfaro mukuru wakandishamisa!”—Zvie. 15:15.

12-13. Atenda amweni akakwanisa kudini kuparidzira, uye ngeipi migumisiro yakhona?

¹² Anhu anorhwara angakwanisa kuora mwoyo nge kuti aacakwanisi kuita zvakawanda mu basa rekuparidzira. Kunyazi zvakadaro, ajinji akaona mishobo yakawanda ye kuparidzira. Ku Estados Unidos hanzvadzi inozwi Laurel wakavharirhwa mu mucini ye simbi ke makore anokwana kuita 37! Iyena wainga ano câncer, wakaizwa operação dzakawanda uye wainga no nhenda ye ganda. Asi kunyazi no matambudziko aya anoshamisa iyena aazi kusiya kuparidzira. Iyena wakaparidzira ma enfermeiro uye anarume no anakadzi aienda kumba kake komuvhakacira. Migumisiro yakhona? Iyena wakabetsera anhu anokwana kuita 17 pa kuziya cokwadi ce Bhaibheri! *

¹³ Richard, mukuru we ku França, uno zano rinoseenza kuno aya asikaiti ku buda pa nyumba, kana kuti akabhashari ku shipitari. “Ndinorangarira kuti angakanda ma bhuku no ma broshura edu pa cipangidziro kuitira kuti anhu aone. Anhu angadarika ndipona acaona uye acamabvunzisa. Izvi zvicabambisa hama uye hanzvadzi dzedu, dzisingakwanisizve kuenda pa nyumba no nyumba.” Aya asikacakwanisi kubuda pa nyumba, angaparidzirawo eciseenzesa ma karta uye eciseenzesa ma thurufunu.

14. Ngaupi muezaniso wakanaka wakasiiwa na Mambo Dhavhidhi?

¹⁴ Nge ndaa ye kukura, dambudziko re uthongo kana kuti zvimweniwo, zvingaita kuti tisatambire ma basa kana kuti makomborero mu ungano kana kuti munharaunda. Tingafundira no muezaniso wa Mambo Dhavhidhi. Paakabvunzwa kuti iyena wainga asikazi kusanangurhwa kuti awake tempro ya Mwari—ciro caaida kuita maningi—iyena wakatsigira no mwoyo wese uya wainga asanangurhwa na Mwari kuti aite basa iri. Dhavhidhi wakatobetsera no zvakawanda pa basa iri. Uyu muezaniso wakanaka wekuteedzera!—2Sa. 7:12, 13; 1 Mak. 29:1, 3-5.

15. Hugues wakakunda kudini kuora mwoyo?

¹⁵ Nge ndaa ye matambudziko e uthongo, Hugues, hama imweni ye ku França, yakamira kuseenza hingana mukuru, uye yakasiyawo kuita ma basa amweni akareruka e pa nyumba. Iyona yakatara kuti: “Pakutanga ndaizwa ndakaora mwoyo uye ndisikabeteri. Asi ngo kuhamba ke nguwa, ndakaona kukosha ke kutendera zviro zvandainga ndisikakwanisi kuita, uye ndakaona mupfaro pa kuseenzera Djehovha nge kutendera kandakaita zvandainga tisikakoni kuita. Ndakashinga kurumbwa  ndeciseenzera Djehovha. Hingana Gidhiyoni no anarume anokwana kuita 300—ese ainga akaremba—Ndicarumbwa ndecirhwa!”—Ato. 8:4.

16. Cinyi catinofunda kubva pa muezaniso we ngirozi?

¹⁶ Ngirozi dzakagondeka muezaniso wakanaka. Mu nguwa ye kutonga ka Mambo Aabhi, Djehovha akapika ngirozi kuti dzirekete no gwanza re kucengedzera mambo wakashata. Ngirozi dzakawanda dzakadaira ecipasa mazano. Asi Mwari akasanangura ngirozi imwe uye akati kairi zano rako ricabudirira. (1Mad. 22:19-22) Ngirozi dzimweni dzakagondeka dzakazoora mwoyo, pamweni dzakarangarira kuti, ‘Ndaineseka ngei’? Atina cikonzero cekutendera kuti idzona dzakadaro. Zvezvirokwazvo, ngirozi dzinodzidodosa maningi uye dzinoda kuti kukudzwa kese kuende kuna Djehovha.—Ato. 13:16-18; Zva. 19:10.

17. Tinodikana kuitei kana takaora mwoyo nge ndaa yekutama kutambira makomborero amweni e basa?

¹⁷ Edzurirai makomborero atinawo e kuthwara zina ra Mwari uye e kuziisa Umambo wake. Mabasa angakwanisa kuuya uye kuenda, asi andizvopi zvinoita kuti tikoshe kuna Mwari. Patinoita zviro pakati no pakati uye kana tikadzidodosa, ticagara anhu anodiwa na Djehovha uye no hama ne hanzvadzi dzedu. Nge kudaro, kumbirai Djehovha kuti amubetsere kurumbwa meciita zviro zviri pakati no pakati uye kuti murumbwe mecidzidodosa. Rangarirai nge miezaniso dzakanaka dzekuita zviro pakati no pakati uye nge zve kudzidodosa dzakatarhwa mu Soko rake. Kuseenzera hama dzenyu nge mushobo wamunokwanisa musikabambidzirhwi.—Pis. 138:6; 1Pe. 5:5.

18-19. Mungaita kudini kuti mupfare kunyazi ndima yenyu yeciita hingana isikabudiriri?

¹⁸ Munozwa makaora mwoyo nguwa dzimweni nge ndaa yekuti ndima yenyu inoita hingana isikabudiriri, kana kuti nge ndaa yekugumira anhu padoko here? Tingarumbwa kudini takapfara kana kuti kutunhudzira mupfaro wedu? Mazano amweni anoseenza ari mu bhokisi “ Mungapfara Kudini mu Basa Rekuparidzira.” Zvinokoshawo kugara no maonero akanaka e basa rekuparidzira. Izvi zvinobatanidzei?

¹⁹ Garai mune cinangwa ce kuziisa zina uye Umambo wa Mwari. Djesu akadjekesa kuti anhu padoko ndiwona acaona gwanza rinoenda ku upenyu. (Mt. 7:13, 14) Patinonga tiri mu basa rekuparidzira tinonga tinorukudzo re  kuseenza na Djehovha, Djesu uye ngirozi. (Mt. 28:19, 20; 1Ako. 3:9; Zva. 14:6, 7) Djehovha ari kupsvaka anhu anoda kumuseenzera. (Ju. 6:44) Hino, kana munhu akatama kupfarira zvakanaka masoko edu pa nguwa iyona, hwirirai zuwa rimweni.

20. Djeremiya 20:8, 9 inotifundisei patinonga takaora mwoyo?

²⁰ Tinokwanisa kufunda zvakawanda kubva ku mu phorofita Djeremiya. Iyena wakaendeswa ku ndima yaishupha kuparidzira. Anhu aimutuka uye aimuseka “zuwa rese.” (Erengai Djeremiya 20:8, 9.) Iyena wakaora mwoyo zvekuti wakarangarira kusiya basa iri rekuparidzira. Asi iyena aazi kusiya. Ngei? “Soko ra Djehovha” rainga rakaita hingana muriro mukati ma Djeremiya, uye wakakonerhwa kuubata! Izvi zvinoitikawo katiri patinodzadza ndangariro uye mwoyo wedu no Soko ra Mwari. Izvi ndizvona zvinoita kuti tifunde Bhaibheri zuwa no zuwa uye tecinyasa kurangarira zvatinonga taerenga. Migumisiro yakhona, mupfaro wedu ungatunhudzirika uye basa redu rekuparidzira ringabudirira. *—Dje. 15:16.

21. Tingakunda kudini kuora mwoyo?

²¹ “Kuora mwoyo murau unoseenzeswa ndi Sathani,” undaro Dhebhora, amboreketwa nge zvake. Asi Djehovha Mwari ano simba kudarika Sathani no murau dzake dzese. Hino, pamunozwa kuora mwoyo nge ciro cipi haco, deketerai kuna Djehovha kuti amutsigire. Ayena acamubetsera kushingirira, kutama kukwana kenyu uye zvamusikakwanisi kuita. Ayena acamutsigira. Acamubetsera kuti mugare no maonero akanaka ari pakati no pakati ano cokuita no mabasa amunopaswa. Uye ayena acamubetsera kuti mugare no maonero akanaka nge zve basa rekuparidzira. Kupinda izvi, dururai zviri kumunesa kuna Baba enyu e kudenga. No rubetso rake, mungakwanisa kukunda kuora mwoyo.