1. Mai te aha to tatou huru ia toaruaru tatou?

 I TE mau mahana atoa, te faaitoito nei tatou i te faaruru i te fifi. E ere râ i te mea ohie ia na reira a toaruaru ai tatou. E nehenehe tatou e manaˈo mea faufaa ore tatou e e ere i to tatou oaoa. Te na ô ra te Maseli 24:10: “Ia paupau to aho i te mahana e ati ai ra, te iti hua ra to oe itoito.” A toaruaru ai, e nehenehe to tatou puai no te faaruru i te mau fifi o te oraraa e iti mai.

2. No te aha paha tatou e toaruaru ai e eaha te hiˈopoahia i roto i teie tumu parau?

² E nehenehe tatou e toaruaru no te tumu e rave rau, no to tatou paha huru tia ore, paruparu e maˈi. Aore ra, aita paha te hopoia ta tatou e hinaaro i horoahia mai aore ra aita te feia i roto i te tuhaa fenua e tâuˈa i ta tatou poroi. I roto i teie tumu parau, e horoahia mai te tahi mau manaˈo o te tauturu mai a toaruaru ai tatou.

3. Eaha te tauturu mai a hapa ˈi tatou?

³ Mea ohie ia faahapa ia tatou iho no to tatou huru tia ore e te paruparu a manaˈo atu ai eita Iehova e farii ia tatou i roto i te ao apî. Mea atatâ roa ia feruri mai tera. Eaha te titauhia ia haamanaˈo a hapa ˈi tatou? Te faataa ra te Bibilia, “ua hara . . . te taata atoa,” o Iesu Mesia anaˈe tei ore i na reira. (Roma 3:23) Aita Iehova e moemoe ra i ta tatou mau hapa atoa e aita atoa o ˈna e titau  ra ia tia roa tatou. Ei Metua î i te here e te faaoromai, te hinaaro ra Iehova e tauturu ia tatou. Te ite ra o ˈna e ere i te mea ohie no tatou ia rave i te mea maitai e ia faaea i te faahapa ia tatou, ua ineine râ o ˈna i te tauturu mai.—Roma 7:18, 19.

4-5. Ia au i te Ioane 1, 3:19, 20, eaha tei tauturu e piti tuahine ia faaea i te toaruaru?

⁴ A feruri na i te hiˈoraa o Deborah e o Maria. * I to ˈna tamariiraa, pinepine Deborah i te faahaamahia, mea varavara o ˈna i te haapopouhia. Ua tae roa o ˈna i te haafaufaa ore ia ˈna iho. Noa ˈtu e hape rii noa ta ˈna i rave, e faahapa rahi o ˈna ia ˈna. Hoê â huru fifi to Maria. Ua faahaama to ˈna fetii ia ˈna, pinepine o ˈna i te manaˈo mea faufaa ore o ˈna. Noa ˈtu tei roto o ˈna i te parau mau, hopea ore o ˈna i te manaˈo eita e au ia amo o ˈna i te iˈoa o Iehova.

⁵ Aita râ teie na tuahine i faaea i te tavini ia Iehova. Eaha te tumu? A tahi, ua huri raua i to raua hepohepo i nia ia Iehova na roto i te pure. (Sal. 55:22) Ua haapii raua ua ite to tatou Metua î i te here e nehenehe tatou e toaruaru no te mau mea ino i ravehia i nia ia tatou. E hiˈo atoa râ Iehova i te maitai e vai ra i roto i to tatou aau noa ˈtu aita tatou iho e ite ra i te reira.—A taio i te Ioane 1, 3:19, 20.

6. Ia topa faahou te hoê taata i roto i te peu ino, eaha te titauhia ia ˈna ia rave?

⁶ E nehenehe te hoê taata e faahapa ia ˈna iho a topa faahou ai o ˈna i roto i te peu ino ta ˈna i faarue. A hara ˈi, e oto, aore ra, e faahapa iho â tatou ia tatou iho. (Kor. 2, 7:10) Eiaha râ tatou ia faahapa rahi roa a manaˈo atu aita to tatou e faufaaraa e eita Iehova e faaore i ta tatou hara. Mea hape tera manaˈo e e turai tera huru feruriraa ia faaea i te tavini ia Iehova. A haamanaˈo i ta te Maseli 24:10 e parau ra, ia toaruaru outou e iti to outou puai. A pure râ ia Iehova no te faatupu i te hau e o ˈna e ia faaore mai o ˈna i ta outou hara. (Isa. 1:18) A ite ai ua tatarahapa mau outou, e faaore Iehova i ta outou hara. A faafatata ˈtu i te mau matahiapo, e tauturu atu ratou ia piri faahou outou ia Iehova.—Iak. 5:14, 15.

7. No te aha eiaha tatou ia toaruaru e ere anaˈe i te mea ohie ia rave i te mea maitai?

⁷ Teie ta Jean-Luc, te hoê matahiapo no Farani, e parau i te feia e tutava ra i te haavî i to ratou huru paruparu: “Te hoê taata parau-tia i te aro o Iehova, e ere ïa te hoê taata o te ore roa e hape, o te hoê  râ taata o te tatarahapa i ta ˈna hara e o te tutava i te taui.” (Roma 7:21-25) A hapa ˈi, eiaha e manaˈo mea faufaa ore outou! E rave tatou paatoa i te hara, e hinaaro pauroa ïa tatou i te aroha hamani maitai o Iehova ta ˈna i horoa mai na roto i te tusia taraehara o Iesu Mesia.—Eph. 1:7; Ioa. 1, 4:10.

8. A toaruaru ai, e imi tatou i te tauturu a vai ma?

⁸ E imi anaˈe i te faaitoitoraa a to tatou fetii taeae. Ua ineine ratou i te faaroo e i te tamahanahana ia tatou. (Mas. 12:25; Tes. 1, 5:14) Te na ô ra Joy, te hoê tuahine i Nigéria tei toaruaru na: “Aita vau i ite teihea vau i teie nei ahani aita te mau taeae! Ua pahono Iehova i ta ˈu mau pure na roto i te faaitoitoraa a te mau taeae. Na roto i to ratou hiˈoraa, ua haapii atoa vau e nafea ia faaitoito i te feia aau paruparu.” E haamanaˈo anaˈe râ, i te tahi taime, eita te mau taeae e tuahine e taa te hinaaro ra tatou i te faaitoitoraa, na tatou ïa e faafatata ˈtu i te tahi Kerisetiano feruriraa paari no te ani i te tauturu.

9. E nafea te Salamo 41:3 e te 94:19 e faaitoito ai ia tatou?

⁹ E taparu anaˈe i ta Iehova tauturu. E ere anaˈe tatou i te mea maitai, no te tahi iho â râ maˈi tamau, e ere i te mea ohie ia tapea i te hoê feruriraa maitai. Eita Iehova e faaora i to tatou maˈi i teie nei, e tamahanahana e e horoa mai râ o ˈna i te puai no te faaoromai tamau. (A taio i te Salamo 41:3; 94:19.) E faatupu paha Iehova i te hinaaro i roto i te hoê hoa Kerisetiano no te tauturu ia tatou i te fare, no te haere i te fare toa aore ra no te pure e o tatou. E haamanaˈo atoa mai paha o ˈna i te mau parau tamahanahana i roto i ta ˈna Parau mai te mau irava Bibilia o te faahiti ra i te ao apî i reira tatou e ora ˈi ma te tia roa aita e maˈi e e mauiui faahou.—Roma 15:4.

10. Eaha tei tauturu ia Isang ia faaea i te toaruaru i muri aˈe i te hoê ati?

¹⁰ Ua roohia Isang e ora ra i Nigéria i te hoê ati tei haaparuparu roa i to ˈna tino. Ua parau te taote eita oia e nehenehe faahou e haere. Te na ô ra Isang: “Ua hepohepo roa to ˈu aau e feruriraa.” Ua tamau anei râ o ˈna i te toaruaru? Aita! Eaha tei tauturu ia ˈna? Te faataa ra Isang: “Aita mâua ta ˈu vahine i faaea i te pure ia Iehova e i te haapii i ta ˈna Parau. Ua faaoti papu mâua i te mauruuru noa no te mau haamaitairaa ta mâua e fanaˈo ra i teie mahana, e oia atoa to a muri aˈe.”

11. Mea nafea Cindy i te oaoaraa i roto i to ˈna maˈi?

¹¹ Te ora ra Cindy i Mehiko, ua itehia e te mau taote e nehenehe o ˈna e pohe no te hoê maˈi ino mau. Eaha tei tauturu ia ˈna? A rapaauhia ˈi o ˈna, ua haamau Cindy i te fa ia poro i te mau mahana atoa. Ua papai oia: “Ua tauturu mai te reira ia ore e feruri noa i te tâpûraa, i te mauiui e i to ˈu maˈi. Mai teie ta ˈu raveraa: A paraparau ai e te mau taote e tuati, e aniani au no nia i to ratou utuafare. I muri mai, e ani au no te aha ratou i maiti ai i tera toroa o te titau rahi i to ratou taime. Mea ohie aˈe ïa no ˈu ia ite eaha te tumu parau e haaputapû i to ratou aau. E rave rahi o ratou tei parau mai mea varavara te feia maˈi i te ani i te mau taote eaha to ratou huru. E haamauruuru mai ratou ua tâˈua vau ia ratou, ua faaite atoa mai vetahi i ta ratou numera niuniu aore ra vahi nohoraa. Aita vau i manaˈo  noa ˈˈe e faaoaoa Iehova ia ˈu i roto i to ˈu maˈi!”—Mas. 15:15.

12-13. Noa ˈtu te tino paruparu e te maˈi, mea nafea vetahi i te tamauraa i te poro e eaha te mau maitai i itehia?

¹² E toaruaru paha te mau taeae e tuahine e tino paruparu to ratou e tei roohia i te maˈi no te mea eita ratou e nehenehe e rave mai na mua ˈˈe i roto i te taviniraa. Ua nehenehe e rave rahi e tamau i te poro. I Marite, ua vai noa te tuahine Laurel 37 matahiti te maoro i roto i te hoê matini o tei tauturu ia ˈna ia huti i te aho. Ua faaoromai tamau o ˈna noa ˈtu te mariri ai taata, e rave rau tâpûraa rahi e te hoê maˈi tamau o te iri. Aita râ te reira i haamamû ia ˈna, ua poro oia i te mau tuati maˈi e te feia atoa i haere mai i to ˈna fare. Eaha te haamaitairaa? Ua tauturu Laurel 17 taata ia riro mai ei Ite no Iehova! *

¹³ Teie ta Richard, te hoê matahiapo no Farani, i matau i te parau i te feia o te ore e nehenehe e haere i rapae i to ratou fare aore ra i te pu e haapao ra ia ratou: “E faaitoito vau ia ratou ia tuu i te mau buka e vea i te vahi e itehia e te taata. E faaara te reira i te anaanatae o te taata e e faatupu atoa i te aparauraa. E faaitoito te reira i to tatou mau taeae e tuahine here o te ore e maraa faahou no te poro i tera e tera fare.” E nehenehe atoa ratou e poro ma te papai i te rata e na roto i te niuniu paraparau.

14. Eaha te hiˈoraa maitai ta te arii Davida i horoa?

¹⁴ No te matahiti rahi, te maˈi aore ra te tahi atu fifi, eita paha tatou e fanaˈo i te hoê haamaitairaa i roto i te amuiraa aore ra te faanahonahoraa a Iehova. E nehenehe tatou e haapii mai i te hiˈoraa o te arii Davida. Ua hinaaro mau Davida e hamani i te hiero o te Atua, ua parauhia ˈtu râ e ere na ˈna e rave i tera ohipa. Ua nafea Davida? Ua turu taatoa o ˈna i te taata ta Iehova i maiti no tera hopoia e ua horoa ˈtu i te auro e te ario no te paturaa. E ere anei i te hiˈoraa maitai?—Sam. 2, 7:12, 13; Par. 1, 29:1, 3-5.

15. A toaruaru ai, mea nafea Hugues i te tamauraa i te tavini ia Iehova?

¹⁵ No te maˈi, aita te taeae Hugues i nehenehe faahou e tavini ei matahiapo, eita atoa ta ˈna e nehenehe e raverave i te ohipa i to ˈna fare. Ua papai oia: “I te haamataraa, ua toaruaru roa vau e ua manaˈo atoa mea faufaa ore au. I muri  mai râ, ua farii au i to ˈu mau taotiaraa e ua oaoa faahou i te tavini ia Iehova ia au i tei maraa ia ˈu. Ua faaoti papu vau i te faaoromai tamau! Mai ia Gideona e ta ˈna na 300 taata, noa ˈtu te rohirohi e tamau vau i te tavini ia Iehova!”—Tav. 8:4.

16. Eaha te haapiiraa e huti mai i te hiˈoraa o te mau melahi haapao maitai?

¹⁶ E hiˈoraa maitai atoa te mau melahi haapao maitai no tatou. A faatere ai te arii Ahaba, ua ani Iehova i te mau melahi eaha te ravea ia ore ta Ahaba opuaraa ia manuïa. Mea rahi te melahi tei horoa i to ratou manaˈo, ua maiti râ te Atua hoê e ua parau e ravea maitai ta tera melahi. (Arii 1, 22:19-22) Ua toaruaru anei te tahi atu mau melahi a manaˈo atu ai, ‘Mâuˈa noa to ˈu taime i te horoaraa i to ˈu manaˈo!’ Papu, aita ratou i na reira! Mea haehaa teie mau melahi e te mea faufaa no ratou, ia hanahana ïa Iehova.—Tav. 13:16-18; Apo. 19:10.

17. Ia toaruaru tatou no te mea aita tatou i fanaˈo i te tahi haamaitairaa taa maitai, eaha te titauhia ia tatou ia rave?

¹⁷ E haafaufaa anaˈe i te fanaˈoraa taa ê ia amo i te iˈoa o te Atua e ia poro i ta ˈna Faatereraa arii. E ere no te mea e haamaitairaa tei horoahia mai, mea faufaa aˈe ïa tatou i te aro o Iehova. E here mau râ Iehova e te mau taeae e tuahine ia tatou no to tatou haehaa e aau faahaihai. No reira a ani i te tauturu a Iehova no te faatupu noa i tera na huru maitatai e piti. A feruri i te hiˈoraa maitai o te feia haehaa i roto i ta ˈna Parau. A farii i te tavini i te mau taeae ma te ravea huru rau.—Sal. 138:6; Pet. 1, 5:5.

18-19. Eaha te tauturu mai ia oaoa noa ˈtu te tâˈua ore o te taata i roto i te tuhaa fenua?

¹⁸ Ua toaruaru aˈenei outou no te tâˈua ore o te taata i roto i te tuhaa fenua aore ra no te mea mea iti roa te taata i te fare? Eaha te tauturu mai ia oaoa noa? Te horoahia ra te tahi mau manaˈo tauturu i roto i te tumu parau “ No te oaoa ˈtu â i roto i te taviniraa.” Mea faufaa atoa ia tapea i te hoê feruriraa maitai i roto i te taviniraa. E nafea ïa?

¹⁹ A tamau i te faaite i te iˈoa o te Atua e i te poro i ta ˈna Faatereraa arii. Ua haapapu Iesu mea iti te ite i te eˈa e aratai i  te ora. (Mat. 7:13, 14) A poro ai, te ohipa ra tatou e o Iehova, Iesu e te mau melahi e e fanaˈoraa taa ê mau tera! (Mat. 28:19, 20; Kor. 1, 3:9; Apo. 14:6, 7) Te imi ra Iehova i te feia e hinaaro e tavini ia ˈna no te faafatata mai ia ratou ia ˈna. (Ioa. 6:44) Mai te peu eita te hoê taata e faaroo i ta tatou poroi i teie mahana, e faaroo paha ïa o ˈna i te tahi atu taime.

20. A toaruaru ai, e nafea te Ieremia 20:8, 9 e tauturu ai ia tatou?

²⁰ E rave rahi haapiiraa ta tatou e huti mai i te hiˈoraa o te peropheta Ieremia. Ua tonohia oia i te hoê tuhaa fenua aita te taata e hinaaro e faaroo ia ˈna. Aita te taata i faaea i te faaino e i te vahavaha ia ˈna. (A taio i te Ieremia 20:8, 9.) Ua toaruaru oia e ua hinaaro roa e faaea i te poro. Aita râ o ˈna i na reira. No te aha? Ua riro “te parau a Iehova” mai te auahi ama i roto ia Ieremia, aita i tia ia ˈna ia tapea i te reira. Hoê â atoa huru ua î anaˈe to tatou feruriraa e aau i te Parau a te Atua. Mea faufaa roa ïa ia haapii i te Bibilia e ia feruri maite i ta tatou i taio i te mau mahana atoa. E rahi noa ˈtu â ïa to tatou oaoa, e e rahi atoa paha te taata e faaroo ia tatou.—Ier. 15:16.

21. Noa ˈtu eaha te tupuraa, e nafea tatou e faaea ˈi i te toaruaru?

²¹ Te parau ra Deborah tei faahitihia i te omuaraa: “Mea au roa na Satani ia toaruaru tatou, i tera hoi taime tatou e hinaaro ai e faaea i te tavini ia Iehova.” Maoti râ te puai o Iehova, eita Satani e manuïa! Noa ˈtu to outou huru tia ore e te paruparu, te maˈi, e noa ˈtu aita te hopoia ta outou e hinaaro i horoahia mai aore ra mea tâuˈa ore te taata i roto i te tuhaa fenua, e turu noa mai iho â Iehova! No reira, a toaruaru ai, a taparu i ta Iehova tauturu e a haamahora i to outou aau i to tatou Metua i te raˈi na roto i te pure. Maoti ta ˈna tauturu, e faaea outou i te toaruaru!