1. Cossa che pol suceder se restemo desanimadi?

TUTI noantri infrontemo problemi tuti i giorni e femo el meio che podemo par dàrghene fora con lori. Ma se restemo desanimadi sarà pi fadiga de infrontarli. Come un ladro che el porta via le robe, el desànimo el porta via la confiansa, el coraio e la alegria. Proverbi 24:10 dise: “Se te sì desanimà quando te infronti dificoltà, no te gavarè pi forsa.” Alora, quando noantri semo desanimadi, no gavaremo pi la forsa che ghemo de bisogno par infrontar le dificoltà.

2. (a) Che robe che le pol assarne desanimadi? (b) Cossa che ndaremo veder in questo stùdio?

² Ghen’è tante robe che le pol assarne desanimadi. Ghemo problemi rento de noantri, come par esémpio: semo imperfeti, no semo boni de far tuto polito o ghemo problemi de salute. Fursi anca restemo desanimadi parché no ghemo ricevesto una designassion nel servìssio a Geovà che noantri voléino. Fursi noantri predichemo nte un posto che quasi tute le persone no le vol scoltarne. In questo stùdio, ndaremo veder arquante robe che le pol giutarne a dàrghene fora col desànimo.

3. Cossa che ghemo de pensar sora i nostri sbali?

³ L’è fàcile pensar che mai saremo boni de far quel che l’è giusto, che mai gavaremo la aprovassion de Geovà e che no meritemo la vita eterna. Cossa che ghemo de pensar sora i  nostri sbali? La Bìblia la dise che sol Gesù l’è stato un omo perfeto e che tuti i altri i fà pecati. (Rom. 3:23) Ma Geovà no’l va in serca dei nostri sbali e gnanca el speta che femo tute le robe de maniera perfeta. Pitosto, Geovà l’è un Pare amoroso, che el ga passiensa e el vol sempre giutarne. Geovà el vede che semo drio far sforso par far quel che l’è giusto e anca par pensar che semo boni de farlo. — Rom. 7:18, 19.

4-5. De acordo con 1 Gioani 3:19, 20, cossa che ga giutà due sorele?

⁴ Adesso, ndaremo veder el esémpio de due sorele. Una la ze la Deborah * che, quando la era picinina, la so fameia la ghe disea su e mai la ghe lodea. Alora, la ga scominsià a pensar che no la saria mai bona de far qualcossa giusta e quando la fea pìcoli sbali la pensea che no la gavea valor. Nantra sorela la ga nome Maria e anca la so fameia la ghe disea su. Alora, la pensea che no la valea gnente. E ancora dopo del so batésimo, ela la sentia che no la meritea esser una Testimònia de Geovà.

⁵ Parché che queste due sorele no le se ga fermà de servir a Geovà? Parché lore le fea tante orassion a Geovà e lore le assea i so problemi nela so man! (Sal. 55:22) Lore le ga anca capio che el amoroso Pare Geovà el sa quel che noantri infrontemo nela vita e el capisse quando noantri se sentimo sensa valor. E Geovà anca el cognosse le nostre qualità, fin quele che no semo boni de veder. — Ledi 1 Gioani 3:19, 20. *

6. Come che la se sente una persona che la torna a far qualcossa sbaliada?

⁶ Imagina una persona che la ze drio far tanto sforso par fermarse de far qualcossa sbaliada. L’è sicuro che la resta tanto desanimada se la torna a farla. Qualche persona la ndaria sentirse cossita. (2 Cor. 7:10) Ma no ghemo de pensar che noantri mai saremo boni de far le robe giuste e che Geovà mai el ndarà perdonarne. Pensar de questa maniera no l’è mia giusto e podemo fin fermarse de servir a Geovà. Ghemo anca de pensarse dele parole de Proverbi 24:10 che dise, che se semo desanimadi, no gavaremo pi forsa. Alora, cossa che podemo far? Ghemo de pregar a Geovà e domandar el so perdon. (Isa. 1:18) L’è sicuro che, se noantri se ghemo ciamà grami, Geovà el ndarà  perdonarne. Ghemo anca de parlar coi ansiani e lori i ndarà giutarne con passiensa a esser nantra volta amighi de Geovà. — Tiago 5:14, 15.

7. Parché che no bisogna restar desanimà se ancora te sì drio far sforso par no far qualcossa sbaliada?

⁷ Jean-Luc, un ansiano dela Frància, sempre el dise a quei che i ze drio far sforso par no far i medèsime sbali: “Par Geovà, la persona giusta no la ze quela che mai la fà un sbàlio, ma quela che la ghe despiase de farlo e la se ciama grama.” (Rom. 7:21-25) No stà sentir che te ghè mia valor se ancora te sì drio far sforso par no far qualcossa sbaliada. Ricòrdate che tuti noantri sbaliemo e ghemo bisogno dela bontà che no la meritemo, che Geovà el ga mostrà par meso del risgate. — Efe. 1:7; 1 Gio. 4:10.

8. Chi che pol giutarne quando semo desanimadi?

⁸ Nostri fradei e sorele i pol giutarne. Lori i pol scoltarne quando ghemo de bisogno e parlar robe che le ne giuta. (Pro. 12:25; 1 Tes. 5:14) Joy, che la ze una sorela dela Nigèria, dele volte la resta desanimada. Ela la ga dito: “Mi no saria gnente sensa el aiuto dei me fradei e sorele. Lori i ze una risposta de Geovà ale me orassion. Mi go imparà a incoraiar anca ai altri quando i ze desanimadi.” Ma dele volte, semo noantri che ghemo de domandar el aiuto ai nostri fradei sperienti, parché lori no i se nicorde de tute le volte che ghemo bisogno del so aiuto.

9. Come i testi de Salmo 41:3 e 94:19 i ne giuta?

⁹ Domanda el aiuto de Geovà. Noantri restemo desanimadi quando semo maladi o ghemo una bruta malatia. Geovà no’l ndarà guarir le nostre malatie ancoi, ma el ne consola e el ne dà forsa. (Ledi Salmo 41:3; * 94:19. *) Par esémpio, Geovà el pol doperar i fradei par giutarne nei mistieri casa, comprar qualcossa o anca pregar insieme. Geovà el pol anca giutarne a ricordarse dele promesse maraveiose, come dela speransa dela vita perfeta sensa malatie. — Rom. 15:4.

10. Cossa che ga giutà Isang?

¹⁰ Par causa de una desgràssia, Isang, che l’è de star nela Nigèria, no’l saria pi bon de caminar. Lu el ga dito che lu l’è restà tanto triste e desanimà. Cossa che lo ga giutà? Lu el ga dito: “Mi e la me dona ghemo seità pregar a Geovà e studiar la Bìblia. Ghemo scominsià a pensar de pi nele benedission che gavaremo, come viver par sempre nel paradiso.”

11. Cossa che ga giutà Cindy a infrontar la so malatia con alegria?

¹¹ Cindy, che la ze del Mèssico, la ga savesto che la gavea una bruta malatia. Come che la ga infrontà quela dificoltà? Ela la ga fato sforso par predicar tuti i giorni nel ospedal. Ela la ga dito: “Cossita, mi son stata bona de pensar manco nela me operassion, nel mal che mi gavea e nela me malatia e pensar de pi nei altri. Alora, quando mi parlea coi dotori e con quei che i laorea nel ospedal, mi ghe domandea come che stea le so fameie. Mi anca ghe domandea parché che i gavea scoliesto quel laoro. Cossita, l’era pi fàcile de saver cossa che ghe piaseria a lori de parlar. Lori i me ringrassiea e i disea che l’era fadiga le persone gaver interesse par lori o domandarghe come che i stea. Arquanti anca i me ga dato el so indirisso o el so telèfono.  L’è sicuro che no l’è stato mia fàcile infrontar quela malatia, ma Geovà el me ga dato tanta alegria, de pi che mi spetea!” — Pro. 15:15.

12-13. Come che arquanti che no i ga una bona salute i fà par predicar, e parché che l’è stato bon par lori far questo?

¹² Le persone malade o che no le ga una bona salute, le pol restar desanimade parché no le ze bone de far tanto nela predicassion. Ancora cossita, lore le proa predicar nele oportunità che lore le ga. La sorela che la ga nome Laurel, dei Stati Unidi, la ze restada 37 ani rento de una màchina che la ghe giutea a tirar el fià. Ela la ga bio càncaro, la ga fato grande operassion e la ga bio anca malatie nela pel. Ancora cossita, ela la ga seità a predicar par i dotori e par quei che i la ghe tendea. Cossita, ela la ga giutà al manco 17 persone a imparar la verità! *

¹³ Richard, un ansiano nela Frància, el dise par quei che i ze de star in posti par esser tendesti o che no i pol ndar via de casa: “L’è tanto bon assar le publicassion ndove i altri i pol veder. Cossita, le persone le pol domandarghe qualcossa e i pol scominsiar a discorer. Alora, quando questi cari fradei i vede che i pol ancora predicar, lori i resta incoraiadi.” Nantra roba che quei che no i pol ndar via de casa i pol far l’è predicar par meso de carte e telèfono.

14. Parché che el rè Davi l’è un bel esémpio par noantri?

¹⁴ Fursi no ghemo ricevesto una designassion, o un privilègio nel servìssio de Geovà parché ghemo una bona età, parché ghemo qualche malatia o par causa de altre robe. El rè Davi l’è un bel esémpio par noantri parché lu el volea tanto far su un témpio par Geovà, ma lu no’l ga bio questo privilègio. Ma pi tardi, quando nantra persona la ga bio el privilègio de tirar su el témpio, lu el ga fato tuto quel che el podea par giutar e el ga dato tante contribussion. — 2 Sam. 7:12, 13; 1 Cró. 29:1, 3-5.

15. Cossa che ga giutà Hugues?

¹⁵ Hugues, che l’è un fradel dela Frància, el ga assà de esser ansiano par causa dele so malatie. Lu no l’era gnanca pi bon de far i laori casa. Lu el ga dito: “Nel scomìnsio, me parea che mi no era pi bon de far gnente e son restà tanto desanimà. Ma me ga tocà acetar che mi no podea pi far le robe come prima e restar contento con quel che mi ancora podea far par Geovà. La Bìblia  la mostra che Gideon e i so 300 òmini i era belche strachi, ma lori no i ga desistio de lotar e l’è cossita che anca mi vui far!” — Giuisi 8:4.

16. Cossa che imparemo col esémpio dei àngeli?

¹⁶ Podemo anca imparar coi àngeli. Una volta, Geovà el ga domandà ai àngeli cossa che lori podea far par imbroiar el rugno rè Acabe. Arquanti àngeli i ga parlà quel che lori i pensea, ma Geovà el ga scoliesto la idea de un de lori e el ga dito che la ndaria ben. (1 Rè 22:19-22) I altri àngeli no i ze restadi desanimadi parché Geovà no’l ga scoliesto le so idee e no i ga pensà che i ga perso tempo de parlar quel che i pensea. Alora, i àngeli i ze un bel esémpio par noantri, parché lori i ze ùmili e i vol dar el onor a Geovà. — Giuisi 13:16-18; Apo. 19:10.

17. Cossa che ghemo de far se no ghemo ricevesto un privilègio che voléino?

¹⁷ El meio privilègio che ghen’è l’è esser una Testimònia de Geovà e parlar del Regno. Geovà e i fradei i ghe vol ben a una persona se la ze ùmile e nò par causa dei privilegi che la ga. Ghemo de ricordarse che podemo ricever un privilègio e anca pèrderlo. Alora, prega a Geovà che el te giute a seitar a esser ùmile. Pensa nei bei esempi de umiltà che ghen’è nela Bìblia e sfòrsate de far tuto quel che te pol par giutar ai to fradei. — Sal. 138:6; 1 Pie. 5:5.

18-19. Cossa che podemo far se le persone no le vol scoltarne nela predicassion?

¹⁸ Noantri podemo restar desanimadi col nostro laoro de predicassion parché le persone no le vol scoltarne o parché no le catemo casa. Alora, cossa che podarìano far par seitar a esser contenti? Nel quadro “ Come podemo esser cada volta pi contenti nela predicassion?”, ghen’è arquanti consili che i pol giutarne.

¹⁹ Noantri ghemo de ricordarse che predichemo par parlar del nome de Dio e del so Regno. Nela predicassion, ghemo el privilègio de laorar con Geovà, Gesù e i àngeli. (Mat. 28:19, 20; 1 Cor. 3:9; Apo. 14:6, 7) Geovà el giuta a quei che i mèrita a rivarse pi darente de lu. (Gioani 6:44) Anca ghemo de ricordarse che Gesù el gavea belche dito che pochi  i scoltaria e che se una persona no la vol scoltarne adesso, nantra volta fursi la volerà. — Mat. 7:13, 14.

20. Come che Geremia 20:8, 9 ne giuta a dàrghene fora col desànimo?

²⁰ Podemo imparar tanto col esémpio del profeta Geremia. Lu l’è stato mandà par un posto che l’era tanto difìcile de predicar. Le persone le ghe ridea drio e ghe disea su “tuto el giorno”. (Ledi Geremia 20:8, 9. *) Geremia l’è restà tanto desanimà e el ga pensà de nò parlar pi sora Geovà. Ma parché che lu no’l ga desistio? Parché “la parola de Geovà” la era come un fogo rento de lu e lu no l’era pi bon de taser. Ndarà suceder la medèsima roba con noantri se seitemo a studiar la Bìblia, a pensar sora e a meter nel nostro cuor quel che imparemo. Cossita, restaremo cada volta pi contenti e faremo ancora meio el nostro laoro de predicassion. — Ger. 15:16.

21. Come che te pol dàrghene fora col desànimo?

²¹ Deborah, che ghemo parlà prima, la dise: “El desànimo l’è come una roba poderosa che Sàtana el pol doperar contra noantri.” Ma Geovà l’è pi poderoso che qualche roba che Sàtana el dopere. Alora, domanda el aiuto de Geovà se te sì desanimà e pàrlaghe sora tuti i to pensieri. Sicuro che Geovà el ndarà giutarte quando te senti che no te ghè mia valor, quando te sì drio far sforso par no far i medèsimi sbali e quando te sì malà. Geovà el ndarà anca giutarte a ricordar che la roba pi importante la ze esser una Testimònia de Geovà e nò i privilegi che te ghè. E lu el ndarà anca giutarte quando le persone no le vol scoltarte nela predicassion. Alora, col aiuto de Geovà, te sarè bon de dàrghene fora el desànimo!