1. Etthu xeeni eniiraneya vaavo ninkhulumuwa ahu?

KHULA nihiku ninnikumana mixankiho ni ninnipaka sotheene ninwerya ahu wira nivilele mixankiho iyo. Masi niireke nyuwo khamunikupali wira vannivila ovilela mixankiho vaavo ninkhulumuwa ahu? Nto mukupaliki wira okhulumuwa ori ntoko nawiiye, maana onniniiyerya ororomela wahu, olipa murima ni ohakalala wahu. Eliivuru ya Miruku 24:10 enihimya so: “Mojeyá movelavelani, ikuru sanyu ti sivukunwe”. Tthiri vaavo ninkhulumuwa ahu, hiyo khaniinkhalana ikuru wira niwanane ni ovilela mixankiho.

2. Itthu xeeni sikhanle oonikhulumula? Mwaha ola, ninrowa othokorerya exeeni?

² Sookhala itthu sinceene sinnikhulumula, itthu sikina nniikumiherya mmansihu sikina ninkumiheriwa ni atthu akina. Itthu iyo sinihela muhina, ohimalela, otteettheya wahu ni owereyasiwa. Nave hiyo pooti okhulumuwa akhala wira naanilipelela ovahiwa iparakha mmutthenkesoni mwa Yehova aahiiso atthu nnaalaleerya ahu muttetthe ahu khaniphavela oniwiriyana. Mwaha ola, ninrowa othokorerya itthu vakhaani nikhanle ahu oopaka wira niwanane ni oxintta okhulumuwa.

3. Etthu xeeni enrowa onikhaliherya vaavo ninkhalana ahu moonelo woohiloka?

³ Vannikhweya wuupuwela wira khanirina efaita mwaha wa ohimalela wahu ni sootteettheya sahu. Nto eyo, pooti oniiriha wuupuwelaka wira Yehova khonrowa oneemererya okela elapo esya. Moonelo owo ti wootakhala. Nto nooneleke sai soovonya sahu? Biibiliya onihimya wira omuhiya Yesu paahi, apinaatamu “othene aya attheka”. (aRom. 3:23) Masi hata vari siiso, Yehova khoniwehexexa soovonya sahu ni khonuupuwela wira nihaana okhala atthu oomalela. Ohiya-vo, Tiithi ahu oophenta a wiirimu oniphavela onikhaliherya. Nave toopixa murima. Nave-tho, owo onnisuwela wira anamunceene a hiyo  annimananiha opaka itthu sooloka, nto owo onniimananiha onikhaliherya.—aRom. 7:18, 19.

4-5. Ele onihimya awe 1 Yohani 3:19, 20, yaakhalihenrye sai arokora anli owanana okhulumuwa?

⁴ Nkahaya nwehe ntakiheryo na Deborah ni Maria. * Okathi aari awe mwaana, Deborah khaathokoreriwa mwa enamuna yooloka. Nto eyo yaanimwiiriha wuupuwelaka wira khaarina efaita. Owo khaatonko ottottopeliwa. Nuumala wunnuwa owo aahikhalana moonelo woohiloka. Nto vaavo aapaka awe etthu yoohiloka hata etthu eyo eri ene yaamukhaani, Deborah uupuwela wira khaakhala-khala opakaka etthu yooloka. Maria aahikhalana muxankiho ntoko wa Deborah. Amusi awe yaanimuramusa vanceene. Nto eyo yaahimwiiriha wuupuwela wira khaarina efaita. Nuumala wiixutta ekeekhai, Maria uupuwela wira khaaphwanela okhala Namoona a Yehova.

⁵ Hata vaari siiso, arokora awo anli khahiyale omurumeela Yehova. Mwaha wa xeeni? Mwaha woowi, awo yaahinvekela Yehova ni yaahimuleela mixankiho saya sotheene. (Esal. 55:23) Nave awo yaahoona wira Tiithi ihu a wiirimu oophenta onnisuwela wira itthu soohiloka sinikhumelenle khalai pooti oniiriha wuupuwelaka wira khanrina efaita. Nave awo yaahoona wira Yehova onniweha mikhalelo sooloka nrina ahu, hata hiyo nuupuwela wira khanrina mikhalelo iyo.—Mmusome 1 Yohani 3:19, 20.

6. Mutthu oniimananiha ohiya yoolema yoohiloka ohinawerya, etthu xeeni ekhanle oomwiiraneela?

⁶ Mutthu oniimananiha ohiya yoolema yoohiloka masi ohinawerya, owo pooti onyoonyiheya ni oxanka. Ekeekhai wira okathi nimpaka ahu etampi hiyo ninniivaha nthowa. (2 aKor. 7:10) Masi ti voohiloka omakela wuupuwela ni otepexa wiivaha nthowa mwaha wa itthu soohiloka naapanke ahu khalai. Moonelo owo pooti oniiriha wuupuwela so: ‘Miyo nkirina efaita. Kinoona wira Yehova khonrowa okilevelela’. Muupuwelo owo khonivarihana ni ekeekhai ni pooti oniiriha ohiya omurumeela Yehova. Muupuweleke wira eliivuru ya Miruku 24:10 nisomme ahu, ehooniherya wira ikuru sahu sinnivukuwa vaavo ninkhulumuwa ahu. Ohiya-vo, ‘nvaneleke’ ni Yehova, munvekelaka wira oomoreleni ikharari ni ooleveleleni. (Yes. 1:18) Nto vaavo Yehova onoona awe wira moottharuwa ni murima wotheene ni munnimananiha ohitthikela opaka etthu emosaru, owo onimoolevelelani. Nave mulavule ni axitokweene, maana moopixa murima awo animookhaliheryani otthikela okhalana waataana wooloka ni Yehova.—Yak. 5:14, 15.

7. Xeeni vahinreerela aya okhulumuwa akhala wira ninniimananiha opaka itthu sooloka?

⁷ Aahimyaka atthu ale aniwanana soovonya, mutokweene a oFrança oniihaniwa Jean-Luc ohimmye so: “Mutthu a xariya vamaithoni va Yehova, khahiyo mutthu ohinavonye, masi mutthu yoole oniira avonya vale oniimananiha ottharuwa ni  ohitthikela yoovonya eyo”. (aRom. 7:21-25) Nto muhuupuweleke wira khamurina efaita akhala wira munniimananiha oxintta soovonya sanyu. Muhiliyale wira khuuvo pinaatamu ori oomalela ohoolo wa Muluku. Maana otheene ahu ninniphavela omoreliwa ikharari ni Muluku orumeelaka mukuttho wa Mwanawe.—aÉf. 1:7; 1 Yoh. 4:10.

8. Vaavo ninkhulumuwa ahu tani anrowa onikhaliherya?

⁸ Anna ni arokora anoowerya onilipiha! Awo anooniwiriyana oratteene vaavo nimphavela ahu ovaanela ni olavula moolumo oolipiha. (Mir. 12:25; 1 aTes. 5:14) Murokora a oNigeria oniihaniwa Joy aahiwanana okhulumuwa, owo onihimya so: “Kiireke kanwerya ovilela kihikhaliheriwe ni anna ni arokora? Tthiri anna ni arokora aakooniherya wira Yehova onnaakhula mavekelo aka. Awo aakiixuttiha moota wowaalipiha atthu akina akhulumunwe”. Muhiliyale wira okathi mukina anna ni arokora pooti ohisuwela wira ninniphavela olipihiwa. Nto vaavo ninkhalana ahu muxankiho nihaana waaleela anna ni arokora oolipa momunepani wira anikhaliherye.

9. Esalimo 41:4; 94:19, ennilipiha sai?

⁹ Munvekeleke Yehova nikhaliheryo. Hiyo ninnixanka vaavo ninwereiwa ahu otepexa wene akhala wira oretta onniwerya khonivoniwa. Nto eyo pooti oniiriha okhalana moonelo woohiloka. Nnaamwi Yehova ohirowaka onipenuxa mwa mwiiriirya, owo pooti onimaaliha ni onivaha ikuru wira niwerye ovilela muxankiho ahu. (Musome Esalimo 41:4; 94:19.) Mwa ntakiheryo, Yehova pooti omwiiriha munna wala murokora orwa onikhaliherya ovara miteko sa vate wala orowa othuma mireerelo sahu omerkaatu. Nave pooti owiiriha anna ni arokora akina onivekelela. Aahiiso pooti onikhaliherya wuupuwela moolumo wala yoolepa ya mBiibiliyani yoomaaliha aahiiso nlipelelo na okhala mahiku otheene nihiwereiwaka nnaakhala woona owereya elapo esya.—aRom. 15:4.

10. Exeeni yaamukhalihenrye Isang ohikhulumuwa nuumala ompaka asitenti?

¹⁰ Munna oniihaniwa Isang, yoowo onikhala oNigeria aahimpaka asitenti khurakala. Nto meediku awe aahimuleela wira khaarowa otthikela olavula. Isang onihimya so: “Eyo yaahikiriipiha murima vanceene ni kaahooceya”. Niireke eyo yaahimukhulumula? Nnaari. Etthu xeeni yaamukhalihenrye? Owo onitthokiherya so: “Miyo ni mwaaraka khaninhiya onvekela Yehova ni osoma Nuulumo nawe. Nave ninnuupuwelela mareeliho otheene Yehova onnivaha awe ohela muhina okhala mahiku otheene elapo esya ya Muluku”.

11. Murokora oniihaniwa Cindy, awenrye sai ohihiya ohakalala okathi ahaareere awe owereiwa?

¹¹ Murokora oniihaniwa Cindy onikhala oMéxico aahileeliwa ni meediku wira aahikhala oretta waarowa omwiiva. Etthu xeeni yaamukhalihenrye ovilela? Okathi aarowa awe olooliwa, murokora ole aaniimananiha vanceene olaleerya khula nihiku. Owo olempe so: “Opaka eyo yookiiriha waakhaliherya atthu akina ohiya omakela omuupuwela operasau kampanke aka, owereya koonale aka ni moota oretta aka waakiwereya aya. Yoolakela aka yaari ela: Okathi wotheene kaavaanela aka ni matotoro wala mameediku, kaahaana waakoha makhalelo aya ni imusi saya. Nuumala-vo, kaanaakoha etthu yaawiirinhe othanla ovara muteko ole wooxankiha. Eyo yaanikikhaliherya woona mwaha waarowa waavara murima. Mameediku manceene ahimmye wira khivanikhweya aretta waakoha ‘Ihalai saya wala makhalelo a emusi aya’. Nto anamunceene annikixukhurela mwaha wowaathokorerya saana. Akina annikivaha nummuru naya na telefoni. Tthiri okathi ola wootepexa oxankiha wa okumi aka, kihoona wira Yehova onnikikhaliherya ovilela. Nave ookivaha ohakalala wekeekhai”.—Mir. 15:15.

12-13. Anna akina aniwereiwa anilaleerya sai ni etthu xeeni enikhumelela?

¹² Anna ni arokora aniwereiwa pooti okhulumuwa mwaha woowi khaniwerya olaleerya ntoko yaalaleerya aya khalai. Hata vari siiso, awo anoowerya ophwanya inamuna sikina sa olaleerya, Murokora  iihaniwa Laurel a wEstados Unidos aahiviriha iyaakha 37 orumeelaka maakina animukhaliherya mutthu omumula aniihaniwa, Pulmão de aço. Owo aahikhalana Kanser, aahooperariwa ikwaha sinceene ni aahikhalana iretta sikina sa erutthu. Nnaamwi murokora ole aarina mixankiho sinceene, owo khaahiyale olaleerya. Owo aanaalaleerya mameediku, manfirimeero ni atthu akina yaarwa omuxukurya owannyawe. Etthu xeeni yaakhumelenle? Laurel ohaakhaliherya atthu 17 wiixutta ekeekhai ya mBiibiliya voohimya sa Yehova! *

¹³ Mutokweene a oFrança oniihaniwa Richard oovaha malakiheryo anrowa waakhaliherya ale ahiniwerya okhuma owaani mwaha woowereiwa aahiiso yaapaxanri oxiripitali. Owo ohimmye so: “Kinoona wira anna ni arokora awo, ahaana opweha iliivuru ni irevista sahu nipuro atthu otheene aniwerya aya oweha. Eyo enimwaakhaliherya vanceene anna ni arokora awo ahiniwerya olaleerya empa ni empa”. Nave ale ahinwerya okhuma owaani anoowerya olaleerya alepaka ikarta wala ni telefoni.

14. Ntakiheryo xeeni nooloka Mwene Davidi onivanhe awe?

¹⁴ Sookhala itthu sinceene sikhanle ooniiriha ohivahiwa iparakha mmulokoni wala esirkwiitu ahu. Mwa ntakiheryo, pooti wira nihuuluvala, nnoowereyasiwa wala nookhalana mixankiho sikina sinniiriha ohivahiwa iparakha iyo. Akhala wira ti siiso, ntakiheryo na Mwene Davidi nnooniixuttiha etthu yuulupale. Davidi aaniphavela vanceene oteka etemplo wala empa ya Muluku. Masi Yehova aahimuleela wira khaamuthanlale yena masi aahimuthanla mutthu mukina. Hata vaari siiso, Davidi aahimukhaliherya ni murima wotheene ole aathanliwe ni Muluku wira oteke etemplo. Owo aahithukumanya itthu sinceene ntoko eparatha, eweero ni itthu sikina wira etekiwe empa ya Muluku. Tthiri ntakiheryo na Davidi ninniniixuttiha etthu yuulupale ni nihaana otthara!—2 Sam. 7:12, 13; 1 Wah. 29:1, 3-5.

15. Munna oniihaniwa Hugues aawenrye sai owanana okhulumuwa?

¹⁵ Okhala wira aaniwereyasiwa ni khaawerya ovara miteko sikina sa vate, munna oniihaniwa Hugues a oFrança aahihiya orumeela ntoko mutokweene. Owo olempe so: “Wanipacerya miyo kaahikhulumuwa vanceene ni kuupuwela wira nkaarina efaita. Masi nuuvira okathi kaahoona wira kaahaana weemererya mixankiho ni ohakalala vaavo kinimurumeela aka Yehova moovarihana ni makhalelo aka. Kinniimananiha ohitthikela ottuli. Kimutakihaka Gedeyoni ni alopwana 300 aarina awe, nnaamwi yaakhulumunwe awo khiyaahiyale owana. Ni miyo nkinrowa ohiya owana!”—Makh. 8:4.

16. Ntakiheryo na malaikha oororomeleya ninniixuttiha exeeni?

¹⁶ Malaikha oororomeleya anninivaha ntakiheryo nooloka. Okathi wa olamulelo wa Mwene  Akhabi, Yehova aahivekela malaikha enamuna ya onwoka mwene ole ootakhala. Nto malaikha manceene yaahihimya moonelo aya. Masi Yehova aathanlale nlaikha nimosa paahi ni aahimmye wira moonelo wa nlaikha nne waamukhumela saana. (1 Mam. 22:19-22) Niireke malaikha makina yaahikhulumuwa yuupuwelaka so ‘xeeni moonelo aka ohithanliwe aya?’ Khekhanle etthu mBiibiliyani ekhanle oonikupaliha wira yaahikhalana moonelo owo. Maana malaikha toowiiyeviha ni murima wotheene ni aniphavela wira ovuwa wotheene ovahiweke Yehova.—Makh. 13:16-18; Wis. 19:10.

17. Nihaana opaka exeeni akhala wira ninnikhulumuwa mwaha wa iparakha naalipelela ahu ovahiwa mmutthenkesoni?

¹⁷ Nivarexexeke eparakha nrina ahu ya okhala Namoona a Yehova ni olaleya Omwene awe. Musuweleke wira hiyo pooti ophwanya ni onipweteya iparakha sahu. Nave iparakha khasinniiriha okhala atthu a faita vamaithoni va Muluku. Masi akhala wira naatthu oowiiyeviha ni oowiisumaaliha nnoophentiwaka vanceene ni Yehova vamosa ni anna ni arokora. Nto mmuxontteleke Yehova wira ookhaliheryeni ohihiya okhala mutthu oowiisuumaaliha ni oowiiyeviha. Nave mwiimananiheke wuupuwela matakiheryo ooloka a arumeyi a Yehova yaari oowiisumaaliha ni oowiiyeviha aalempwale mBiibiliyani. Mwiira siiso, eyo enimookhaliheryani waarumeela anna ni arokora mpakha vaniwerya anyu ni moohikhanyereriwa.—Esal. 138:6; 1 Ped. 5:5.

18-19. Ninrowa ohihiya sai ohakalala vaavo ninlaleerya ahu hata atthu akina ahiphavelaka oniwiriyana?

¹⁸ Niireke mootoko okhulumuwa mwaha woowi atthu a muttetthe anyu khaniphavela owiriyana ihapari sooreera aahiiso munaaphwanya atthu vakhaani okathi munilaleerya anyu? Akhala wira ti siiso, muhaana opaka exeeni wira muhihiye ohakalala? Malakiheryo makina anrowa wookhaliheryani pooti ophwanya ekaaxa eni: “ Inamuna Sowuncererya Muteko Anyu Woolaleerya”. Nave ti vooloka okhalana moonelo wooloka voohimya sa muteko woolaleerya. Eyo enitaphulela exeeni?

¹⁹ Mwiimananiheke olaleya nsina na Muluku ni Omwene. Yesu aahooniherya oratteene wira atthu vakhaani paahi ti yaarowa ophwanya ephiro eniphwanyiha ekumi. (Math. 7:13, 14) Vaavo hiyo ninlaleerya ahu ninnikhalana eparakha ya ovara vamosa ni Yehova, Yesu ni malaikha. (Math. 28:19, 20; 1 aKor. 3:9; Wis. 14:6, 7) Musuweleke wira Yehova onnaaphavela ale aniphavela ni murima wotheene omurumeela. (Yoh. 6:44) Nto akhala wira mutthu owo khoniphavela owiriyana muhupi nimmulaleerya ahu olelo, woonasa wene muhoolo onimweemererya.

20. Yeremiya 20:8, 9, onniixuttiha exeeni enrowa onikhaliherya owanana okhulumuwa?

 ²⁰ Ntakiheryo na profeta Yeremiya ninniniixuttiha etthu yuulupale. Owo aathanleliwe olaleerya muttetthe wooxankiha vanceene. Atthu aalaleerya awe yaanimuramusa ni omuruwana “mahiku othene”. (Mmusome Yeremiya 20:8, 9.) Okathi omosa aahikhulumuwa vanceene mpakha wuupuwela ohiya olaleerya. Masi khaapanke eyo. Mwaha wa xeeni? Mwaha woowi “masu Àpwiya” Yehova yaari ntoko mooro wooviha vanceene mmurimani mwa Yeremiya, nto owo khaawerya omaala! Etthu emosaru pooti oniiraneela akhala wira ninnisariha vamurimani ni mmuupuweloni mwahu Nuulumo na Muluku. Tthiri eyo enimwiiraneya akhala wira ninnimusoma Biibiliya khula nihiku ni wuupuwelela ele ninsoma ahu. Niira siiso, ohakalala wahu onimuncerereya ni woonasa wene atthu anceene anoophavelaka oniwiriyana naalaleeryaka.—Yer. 15:16.

21. Ninrowa owerya sai oxintta okhulumuwa moohicikha etthu ene ennikhulumula?

²¹ Murokora oniihaniwa Deborah, nimulavunle wanipacerya ohimmye so: “Okhulumuwa kapwitthi muulupale onirumeeliwa ni Satana”. Masi Yehova Muluku ookhalana ikuru sinceene ovikana ikapwitthi sinirumeeliwa ni Satana. Nto okathi munikhulumuwa anyu, moohicikha etthu ene enookhulumulani, mmuxontteleke Yehova wira ookhaliheryeni. Owo onimookhaliheryani owanana soovonya ni sootteettheya sanyu. Nave onimookhaliheryani ovilela oretta onoowereyani. Ohiya-vo, Yehova onimookhaliheryani okhalana moonelo wooloka voohimya sa iparakha. Nave onimookhaliheryani okhalana moonelo wooloka voohimya sa muteko woolaleerya. Nto munvekeleke Tiithi anyu oophenta a wiirimu ni mmuleeleke itthu sotheene sinooxankihani. Mukhaliheriwaka ni Yehova, nyuwo munoowerya owanana ni oxintta okhulumuwa.