1. Wetin fit happen to us if life tire us?

EVERYDAY, we de face problem and we de do our best to endure. But if we allow life to tire us, this one go make-am hard for us to endure. No be so? So make we see this feeling like thief wey fit take our joy, wey fit make us no get strong heart, and make us lose hope. Proverbs 24:10 and footnote talk say: “If you tire when problem dey, you no go too get power.” Na true, when life tire us, this one fit make us dey weak and make-am hard for us to endure our problem.

2. Wetin fit make life tire us, and wetin we go talk about for this topic?

² Many things fit make life tire us. For example, e fit be our own mistake, the sin wey dey our body, or even sickness. Another reason fit still be say we never get the assignment wey we de expect for Jehovah’s organization, or people no de gree listen to our message for the area wey we dey. For this topic, we go talk about some things wey fit help us if life tire us.

3. Wetin fit help us when we de feel bad about ourself and our mistakes?

³ E dey easy to feel bad about ourself because of the mistake wey we de make and the sin wey dey our body. So because of this one, we fit feel say Jehovah no go want make we enter Paradise. This kind feeling fit cause trouble for us. How we suppose feel about our own mistake? Bible talk say, apart from Jesus Christ, “everybody don sin.” (Rom. 3:23) Jehovah no de put mind for our mistake or expect make we dey perfect. Instead, Jehovah na Papa wey get love for us and e want help us. E still dey patient. E know how we de struggle reach make we no de feel bad about ourself again and de try to do wetin dey correct. Jehovah dey ready to help us.​—Rom. 7:18, 19.

4-5 How 1 John 3:19, 20, help two sisters stop to feel bad about theirself?

 ⁴ Make we talk about the example of Deborah and Maria. * When Deborah dey small, the way e family de always treat-am make-am de really feel bad about e self. They no de like to praise-am for anything. So this one make-am de feel bad about e self even as e don grow. When e make small mistake, e de feel say e no fit ever do wetin correct. Maria get that kind problem too. E family people de make shame catch-am. This one make-am de feel say e no reach anything at all. After Maria become servant of Jehovah, e even still de feel say e no reach the kind person wey fit answer the name of God!

⁵ Even with this one, this two sisters no stop to serve Jehovah. Why? They pray to Jehovah, and tell Jehovah how them de feel. (Ps. 55:22) So they come accept say our Papa for heaven know say the things wey don happen to us fit really make us feel bad about ourself. But Jehovah still de see the fine-fine character wey we get, even if we de think say we no good at all.​—Read 1 John 3:​19, 20.

6. When person don try e best to stop something and e do the thing again, how this one fit make the person feel?

⁶ If person de really struggle to stop one bad character wey e get and e do the bad thing again, this one fit make the person tire for e self. But na normal thing to feel bad when we sin. (2 Cor. 7:10) But, make we no feel bad sotey we condemn ourself and think say we dey useless, and say Jehovah no fit ever forgive us. This kind thinking no be true, and e fit make us stop to serve Jehovah. No forget wetin dey for Proverbs 24:10. E talk say we no go too get power when we allow our problem make us tire. Instead, “settle the matter” with Jehovah. How you go do this one? Na when you pray to Jehovah and beg-am to forgive you. (Isa. 1:18) When Jehovah see say you really dey sorry and you de try your best to change, e go forgive you. Another thing be say, make you meet elders to help you. They go really dey patient with you and help you to near Jehovah again.​—Jas. 5:14, 15.

7. If we de struggle with our own mistakes, why we no need to feel bad sotey life tire us?

⁷ One elder for France wey e name na Jean-Luc, tell people wey de struggle with bad character wey they get say: “For Jehovah eye, righteous person no be person wey no de make mistake, but na person wey de really dey sorry for e mistakes and de always try hard to change.” (Rom. 7:21-25) So, if you de struggle with any bad character, make you no condemn yourself. Remember say all of us de make mistake, and  all of us need the special favor wey Jehovah de give us through the sacrifice of Jesus.​—Eph. 1:7; 1 John 4:10.

8. When we need encouragement, who we fit go meet to help us?

⁸ Our brothers and sisters go fit encourage us​—they be our family! They fit listen to us when we need person to talk to, and they fit tell us sweet word wey go encourage us. (Prov. 12:25; 1 Thess. 5:14) One sister for Nigeria wey e name na Joy, really dey sad for sometime. But e talk say: “Wetin I for do without my brothers and sisters? They really encourage me, and na this one show me say Jehovah de answer my prayer. I don even learn from them how to encourage people wey de feel bad.” But we need to know say, our brothers and sisters fit no always know when we need encouragement. So, na our hand e dey to go meet mature brother or sister and tell-am say we need help.

9. How wetin dey for Psalm 41:3 and 94:19 de encourage us?

⁹ Beg Jehovah for support. When we no well and especially when we don de sick for long time, e fit hard for us to think say our future go better. Even though say Jehovah no de do miracle to cure our sickness now, e de comfort us and give us the strength wey we need to endure. (Read Psalm 41:3; 94:19.) For example, Jehovah fit touch the heart of our brothers and sisters make they come help us do some house work or even help us buy the things wey we need. E fit move our brothers to pray with us. Or e fit make us remember better-better things for Bible wey de comfort us. Things like, the wonderful hope wey we get say we go enjoy better life wey sickness and pain no go dey for Paradise.​—Rom. 15:4.

10. Why Brother Isang no continue to feel bad and dey sad after the accident?

¹⁰ One brother for Nigeria wey e name na Isang get accident, and this accident make the brother no fit de waka. When doctor tell the brother say e no go fit waka again, the brother talk say: “I tire and I be feel say my own don finish.” But e continue to feel bad? No! Wetin help-am? E talk say: “Me and my wife continue to pray and study Bible.” E still talk say, “We make up our mind say we go always de thank Jehovah for the good things wey we get now, and the hope wey we get to enjoy better life for Paradise.”

11. Wetin make Cindy continue to get joy when a face one serious sickness for e life?

¹¹ For Mexico, doctor tell our sister wey e name na Cindy say e get one serious sickness wey fit kill-am. Wetin help the sister to cope? When the sister de receive treatment, e make up e mind say e must preach to person everyday. The sister talk say: “As I continue to do like that, that one really help me to put mind for how I fit help other people instead of to put mind for the operation, for the pain wey I de suffer, or for the sickness wey de worry me. The style wey I use na: When I de talk with the doctors or nurse them, I de ask them about their family. After that one, I go ask them why they choose this work even as e hard. Then, I go come really know the topic wey fit touch their heart. Many of them talk say, e de really hard for person wey come receive treatment to ask them how them dey, or ask about their family. And many of them thank me say I care about them. Some of them even give me their address and phone number. So for this period wey really hard for my life, I know say Jehovah help me endure my condition, but I surprise to see the kind joy wey Jehovah give me!”​—Prov. 15:15.

12-13. How some sick people, or people wey their body no too strong again don continue to preach, and wetin be the result?

 ¹² People wey de sick or people wey their body no too strong again no fit de go preaching as them de do before. But, many of them don succeed to preach for other way. For America, one sister wey e name na Laurel stay inside one machine wey de help-am breath for 37 years! This sister suffer from cancer, e do some operation, and get other different-different sickness for e body. But even with this serious condition wey e dey, e continue to preach. E preach to doctors, nurse them, and people wey de come greet-am for house. Wetin be the result? The sister help 17 people to learn about Jehovah! *

¹³ One elder for France wey e name na Richard get one better advice for people wey their condition make them no fit comot for house, or de live for nursing home. The brother talk say: “I go advice them say make they get small table or magazine-stand wey they fit put our magazine for people to see. This kind thing de catch people eye when them de pass, and e fit make them want know more. This one fit encourage our dear brothers and sisters wey no fit join preach from house to house again.” Our brothers and sisters wey no fit comot for house again fit still preach to people with letter and telephone.

14. Which better example King David show us?

¹⁴ Many reason dey why we fit no get the assignment wey we de expect for Jehovah’s organization. For example, e fit be say we don too old or maybe we get some sickness wey fit make us no do the work, or other reasons. So if we dey this kind condition, example of King David fit help us. E don de really hungry David to build temple for God. But God choose another person to build-am. So wetin David come do? E use all e heart support the person wey God choose. David even contribute plenty gold and silver for the work. True-true, David na really better example wey we go follow!​—2 Sam. 7:12, 13; 1 Chron. 29:1, 3-5.

15. Wetin help Brother Hugues start to get joy again?

¹⁵ Because of sickness, one brother for France wey e name na Hugues stop to serve as elder. E no fit even do some small-small work for house. The brother write say: “I first feel say my own don finish and I no be anything again. But as time de go, I see why e dey important to accept say e get some  things wey I no go fit do again. And this one make me start to get joy again as I still de do some things for Jehovah the way my power reach. I make up my mind say I no go ever stop! Just like Gideon and e 300 men wey don tire but still continue, I go continue to struggle!”​—Judg. 8:4.

16. Wetin the example of angels fit teach us?

¹⁶ Another fine example na the faithful angels. For example, for the time wey wicked King Ahab de rule, Jehovah tell the angels make they talk how to fool the wicked king. Some of the angels give different-different idea. But God choose only one angel, and tell-am say e idea go work. (1 Ki. 22:19-22) You think say other angels feel bad and begin talk for their mind say, ‘Why I even disturb myself to give this idea self?’ No! Nothing for Bible show say they think like that. The angels really dey humble and they want make all the praise be Jehovah own.​—Judg. 13:16-18; Rev. 19:10.

17. Wetin we go do if we de feel bad because we no get the assignment wey we for like to get for Jehovah’s organization?

¹⁷ Remember say the number one honor wey we fit get na to answer Jehovah name and to preach about e Kingdom. Assignment fit come and go, but that one no be the reason why God love us. Na when we know where we suppose do reach and dey humble, Jehovah go really love us and our brothers and sisters go love us too. So beg Jehovah make e help you continue to dey humble and know where you suppose do reach. Think of the plenty fine example of servants of Jehovah for Bible wey dey humble and know where they suppose do reach. Dey ready to serve your brothers and sisters from your heart the way your power reach.​—Ps. 138:6; 1 Pet. 5:5.

18-19. Wetin fit help you get joy even when e be like say people for your territory no de listen to the good news?

¹⁸ Sometimes, you don ever feel bad because people for your territory no de listen or because you no de too meet people for house? Wetin fit help you no lose your joy or even help you get more joy? Some better advice dey the box wey the topic na “ Things Wey Fit Help You to Get More Joy for Your Preaching Work.” E still dey important make we see our preaching work for the correct way. Why we talk so?

 ¹⁹ Remember say the number one reason why we de preach na to tell people about Jehovah and e Kingdom. Jesus talk-am clear say na only small number of people go dey the road to life. (Matt. 7:13, 14) When we dey for preaching we get the honor to work with Jehovah, Jesus, and the angels. (Matt. 28:19, 20; 1 Cor. 3:9; Rev. 14:6, 7) Jehovah de draw the people wey get better heart to serve-am. (John 6:44) So if person no want listen to our message this time, e fit listen another time when we go e place.

20. How Jeremiah 20:8, 9 fit help us if we tire?

²⁰ We fit learn many things from prophet Jeremiah. The territory wey Jeremiah preach no dey easy at all. The people for there de insult and laugh Jeremiah “from morning till night.” (Read Jeremiah 20:8, 9.) Jeremiah feel bad sotey, one time, e even want stop to preach. But e no stop. Why e no stop? Na because “the word of Jehovah” be like fire inside Jeremiah, and e no fit hold-am make e no talk-am. We fit be like Jeremiah too when we de study Bible everyday and think deep about wetin we learn. This one go make us continue to get joy, and more people fit even listen to our message.​—Jer. 15:16.

21. Wetin fit help us to fight and win anything wey de make us feel bad?

²¹ Sister Deborah wey we don talk about before talk say: “When our condition make us tire, Satan fit use-am as better chance to get us.” But Jehovah get power pass Satan by far. So, when anything at all de make you feel bad, make you pray to Jehovah for help. E go help you fight your mistakes and the sin wey dey your body. E go support you when you de sick. E go help you see assignment for the correct way. And e go help you continue to get joy for your preaching work. Make you no forget to always pour your heart to Jehovah and tell-am how you de feel. With the help wey Jehovah de give, you go fit fight and win anything wey fit make you tire!