1. მუჭო მოქმედენს ჩქინდა გურიშგოტახუა?

ჩქი ირდღას შეფხვადუთ პრობლემეფს დო ირნერო ვოცადუთ, გივორჯგინათ თინეფს. მარა, მუჟამსით გურ მაფნა გოტახილ, სირთულეეფიშ მორიება უმოს ძნელ რე. თაშ ნამდა, გურიშგოტახუას ჩქი ოკო ვუჯინათ, მუჭოთ უდუპატიჟებელ სტუმარს, ნამდგას შეულებ მიმოხირან რწმენა, გაბედულება დო ხიოლ. იგავეფიშ 24:10 იჩიებ: „გაჭირებაშ დროს გურქ გოიტირხ-და, ძალა ქეშგელიებ“. გურიშგოტახუაქ შილებე მიდამღან თი ძალა, ნამუთ მოსაჭირნა, გივორჯგინათ ცხოვრებისეულ პრობლემეფს.

2. მუქ შილებე გურ გომტახან დო მუს გუვარჩიენთ თე სტატიას?

² ბრელ მუდგარენქ შილებე გურ გომტახან, მაგალთო, ჩქინ დუდშე უარყოფით ფიქრეფქ, ჩქინ შეცდომეფქ ვარდა ლახალაქ. თეს გეძინელ, გურ შილებე გომტახან თიქ, ნამდა ვემიბღათ დანიშნულება, ნამუთ მანგარო მოკოდეს ვარდა თიცალ ტერიტორიას მსახურებაქ, სოდეთ ხალხ ნაკლებო ირჩქილე სამეფოშ ცნობას. თე სტატიას გუვარჩიენთ ნამთინე საშვალებას, ნამუთ მიმეხვარებნა, გივორჯგინათ გურიშგოტახუას.

3. მუ მიმეხვარებნა, სწორ დამოკიდებულება მიღდან ჩქინ არასრულყოფილებაშ მიმართ?

³ ადვილ რე, არასწორ დამოკიდებულებაქ მაშუან ჩქინ არასრულყოფილება დო სისუსტეეფიშ მიმართ. შედეგო, შილებე იფიფქრათ, ნამდა ჩქინ შეცდომეფიშ გურშენ იეჰოვა ვა მუჩანა უფლებას, იფცხოვრათ ახალ ქვეყნიერებას. თეცალ დამოკიდებულებაქ შილებე გლახა შედეგ ქუმომღან. მუჭო ოკო ვუჯინედათ ჩქინ არასრულყოფილებას? ბიბლია იჩიებ, ნამდა იესოშ გარდა „ირკოჩიქ შეცოდ“ (რომ. 3:23). მარა ბიბლიაშ ავტორს მთავარ ყურადღება ჩქინ შეცდომეფშა  ვეგნუღ დო ვართ სრულყოფილებას ელჷ ჩქინდე. თეშ მანგიორო, თინა მოჸოროფე მუმა რე, ნამდგას ჩქინ მოხვარა ოკო. თინა მომთმენ ხოლო რე. იეჰოვა ორწყე, მუჭო ვობრძოლუთ სისუსტეეფს, მუჭო გივორჯგინანთ ჩქინ დუდიშ მიმართ არასწორ დამოკიდებულებას დო თინა მზათ რე ჩქინ მახვარებელო (რომ. 7:18, 19).

4, 5. მუ ჭარ პირველ იოანეშ 3:19, 20-ის, მუდგაქ მეხვარ დალეფს, გიორჯგინესკო გურიშგოტახუას?

⁴ გუვარჩუათ დებორაშ დო მარიაშ * მაგალითეფ. ბაღანობას დებორას ოჯახიშ წევრეფ მანგარ გლახათ ოქცუდეს დო დუდის დამცირებულო ოგინებაფუანდეს. თის იშვიათო ოცქვანდეს. ათეშენ დებორას მუშ დუდშე უარყოფით დამოკიდებულებაქ ქაშუ. ჭიჭე შეცდომას ქუდუშვენდუნ, ფიქრენდჷ, ნამდა სწორას დღას ვა მაქციებედ. მარიას ხოლო თეცალ პრობლემა უღუდ. თის მუშ ნათესეეფ ამცირენდეს. ათეშ გურშენ, თინა უღირსობაშ გრძნობას ობრძოლუდ. ჭეშმარიტებაშ გაგებაშ უკულ ხოლო ფიქრენდჷ, ნამდა ვა რდუ ღირს, ართ-ართ იეჰოვაშ მოწმე ჸოფედკო.

⁵ მარა თე ჟირ დას ვემუტებ იეჰოვაშ მსახურება. მუშენ? თინეფქ ლოცვათ იეჰოვას მიანდეს მუნეფიშ ოღალ (ფსალმ. 55:22). ქიმეხვადეს, ნამდა ჩქინ მოჸოროფე ზეციერ მუმას უჩქჷ, მუ მაფნა გინნაღელ დო უარყოფით ფიქრეფ მუჭო მოქმედენს ჩქინდა. მარა თინა ჩქინ გურს თი ჯგირ თვისებეფს ხოლო ორწყე, ნამდგას შილებე ჩქი ვა ვორწყედათ (წეკითხით 1 იოანეშ 3:19, 20).

6. მუშ კეთება შეულებნა თინეფს, მით თიცალ შეცდომას უშვენა, მუთ თეიშახ ჩვევათ უღდეს?

⁶ ნამთინე, შილებე ოცადდას, გეგნიჸოთას გლახა ჩვევა, მარა მინშა შილებე კინ ორთუდას თის დო თეშ გურშენ გურ უტირხუდას. მუშო ოკო რაგად, გასაკვირ ვა რე, დაშებაშ უკულ დუდის დამნაშავეთ ბგინაფლენდათ (2 კორ. 7:10). მარა უკიდურესობაშა ოკო ვეგნობლათ დო ვეფიფქრათ: „ურგებელ ვორექ. შილებე იეჰოვაქ დღას ვა მაპატუას“. თეცალ უარყოფით ფიქრეფ სიმართლეშე ვა მოურს დო შილებე იეჰოვაშ მსახურება მიმოტებაფუან. რშუდან, მუ ენოჭარ იგავეფიშ 24:10-ის, გურ გომტირხუნან, ძალა ხოლო ქეშმელიებნა. თეშ მანგიორო, „მუვაგვარათ საქმეეფ“ იეჰოვაწკუმა ლოცვათ დო პატიებაშ თხუალათ (ეს. 1:18). მუჟამსით იეჰოვა ქოძირუნს, ნამდა მთელ გურით ნარღენთ დო ოცადუთ, დითირათ, თინა გაპატიენა. თეს გეძინელ, ქუდურაგადეთ უხუცესეფს. თინეფ მოთვინებათ ქიმგეხვარებნა, სულიერო გეგშიჯგირათ (იაკ. 5:14, 15).

7. მუშენ ოკო ვა გომტირხან გურქ, მუჟამსით მიჭირა, გუვაკეთათ თინა, მუთ სწორ რე?

⁷ ჟან-ლუკი, უხუცეს საფრანგეთშე, სისუსტეეფს ობრძოლნან თინეფს, თეცალ მუდგარენს  ურაგად: „იეჰოვაშ თოლს მართალ დღას ვაშენსინ თინა ვარინ, თინა რე, მით ნარღენს დაშებულს დო ოცად გიშასწორებას“ (რომ. 7:21—25). ათეშენ, მუთუნ სისუსტეს ქაბრძოლუთ-და, დუდ უღირსო ვემირჩქინათ. ჩქი არძა ვაშენთ, ათეშენ მოსაჭირნა, ღორონთიშ ვა დამსახურებნან ფერ ჭყოლოფა, ნამდგას გიშაიდირალიშ საშვალებათ მარზენა (ეფეს. 1:7; 1 იოან. 4:10).

8. მის შემლებნა ფთხუათ მოხვარა, მუჟამსით გურგოტახილეფ ვორეთ?

⁸ შემლებნა მოხვარა ფთხუათ და დო ჯიმალეფს, ჩქინ სულიერ ოჯახის, დო თინეფ გურშა ელამკინანა! თინეფს შეულებნა მომრჩქილუან, მუჟამსით ჩიება მოკონა დო გურიშ ემაკინალ სიტყვეფ მიწუან (იგავ. 12:25; 1 თეს. 5:14). ართ ნიგერიელ და, ჯოი, ნამუთ გურიშ გოტახუას ობრძოლუდ, იჩიებ: „მუ მაღოლნედ და დო ჯიმალეფიშ უმშო? თინეფიშ ელარნაქ დუმარწმუნ, ნამდა იეჰოვა ირჩქილე ჩქიმ ლოცვეფს. თინა ხოლო ქიდიბგურე, მუჭო ელუკინე გურშა შურაკოჭირებულეფს“. ირიათო ოკო ფშუდან, ნამდა ჩქინ და დო ჯიმალეფს ირო ვა უჩქნა, მუჟამ მოსაჭირნა გურიშ ელაკინა. ათეშენ, შილებე იშო მაჸუან გამოცდილ თანამორწმუნეშა მიოჸულარქ, ნამდა მოხვარა ქოფთხუათ.

9. მუჭო ელამკინანა გურშა ფსალმუნიშ 41:3 დო 94:19?

⁹ იეჰოვას ქოთხით მოხვარა. მუჟამსით გლახათ ვორეთ, განსაკუთრებულო ქრონიკულ ლახალა მიღნან თიმწკუმა, ძნელ რე, დადებით განწყობა ვა ვოდინუათ. იეჰოვა ამდღა სასწაულებრივო ვა მოსქილიდუანა, მარა თინა გურშა ემქექუანა დო მარზენა საჭირო ძალას, ნამდა გავურზათ (წეკითხით ფსალმუნიშ 41:3; 94:19). მაგალთო, თიქ შილებე აღძრას თანაქრისტიან, ქუმორთას მახვარებშა, მუჟამსით ჸუდეშ საქმეეფს მოსაჭირნა მოხვარა ვარდა მუდგარენ მაფნა ოჸიდე. იეჰოვაქ შილებე აღძრას ჯიმალეფ ილოცან ჩქინწკუმა ართო. ვარდა შილებე ქუგმოშინან თი გურიშემაკინალ აზრეფ მუშ სიტყვაშე, მუნერით რე ახალ ქვეყნიერებას სრულყოფილ სიცოცხლეშ სარკო იმენდ ლახალა დო ჭუაშ უმშო (რომ. 15:4).

10. მუშენ ვა დოსქიდ ესანიქ გურგოტახილო უბედურ შემთხვევაშ უკულ?

¹⁰ ესანიქ, ნამუთ ნიგერიას ცხოვრენს, უბედურ შემთხვევაშ უკულ პარალიზებურო ქუდოსქიდ. ექიმქ თის უწუ, ნამდა დღას ვეშიალებედ გილულა. ესანი იჩიებ: „გურგოტახილ დო შურაკოჭირებულ ვორდჷ“. მარა დოსქიდუო თიქ თეცალ მდგომარეობას? ვარ! მუქ მეხვარ თის? „მა დო ჩქიმ ოსურს დღას ვემემტებნა ლოცვა დო იეჰოვაშ სიტყვაშ გურაფა“ — ენწყუნს თინა. „ჩქი გინოჭყვიდილ მაფდეს, ნამდა მარდულობა გეგმოფხანტითკო თი კურთხევეფშენ, ნამდგას იეჰოვა მარზენა, მაგალთო, ახალ ქვეყნიერებას ცხოვრებაშ იმენდიშ გურშენ“.

11. მუჭო შეიალებუ და სინდის სერიოზულ ლახალაშ დროს ხიოლ უღუდკო?

¹¹ ჩქინ ართ დას, სინდის, ნამუთ მექსიკას ცხოვრენს, სიცოცხლეშო საშიშ ლახალაშ დიაგნოზ გეუშქვეს. მუჭო გინიღ თიქ თენა? მკურნალობაშ დროს თიქ გინოჭყვიდ, ირდღას დაუმოწმებუდკო. თინა ჭარუნს: „თაშ მოქციებაქ მიმეხვარ ყურადღება ჩქიმ ლახალა დო ჭუაშა ვარინ, შხვეფშა გეგნომღალუდკო. ჩქიმ გეგმა თეცალ რდუ: ექიმეფ დო ექთანეფწკუმა რაგადიშ დროს მუნეფიშ ოჯახეფიშ გურშენ ოკო მიკითხირუდკო. თეშ უკულ ვოკითხუდ, მუშენ გიშეგორეს თეცალ რთულ პროფესია. შედეგო, მარტივ გაგებელ რდუ, მუ თემა შეხებუდ თინეფიშ გურს. თინეფშე ნამთინე იჩიებუდ, ნამდა პაციენტ იშვიათო ოკითხუდ თინეფს, მუჭო რეთია. ბრელ მარდულ მაფუდ ყურადღებაშ გურშენ. ნამთინექ მუშ საკონტაქტო ინფორმაცია ხოლო ქომუჩ. ჩქიმ ცხოვრებაშ თეცალ რთულ დროს იეჰოვაქ ვეველუდინ თიშმადიდა ხიოლ მუჩ! “ (იგავ. 15:15).

12, 13. მუჭო შეიალებუ ნამთინე ფიზიკურო დასუსტებულს ქადაგებაქ დო მუ შედეგიქ მაჸუნ თეს?

 ¹² მიდგას ლახალა აწუხენს ვარდა ფიზიკურო რე დასუსტებულ, შილებე გურ აფდას გოტახილ, მუშენდა მსახურებას ოკონ, თიზმა ვაკეთებე. მარა ბრელქ დოგორ საშვალება ოქადაგებელო. შეერთებულ შტატეფს მახორუ ართ დაქ, ლაურელქ, ხელოვნურ აპარატის ოკო ინინჯირკო, ნამუთ ოხვარუდ სუნთქვას. თე აპარატის თინა 37 წანას ირინუანდჷ. ლაურელქ გინიღ კიბო, მუსხირენ ოპერაცია დო კანიშ ლახალა. მარა თეცალ სერიოზულ პრობლემეფიშ უმკუჯინუო, თის ვემუტებ ქადაგება. ლაურელი უქადაგუდ მუშ მიკმალუაფარეფს დო შხვეფს, მით თიშ ჸუდეშა მიშეს. მუქ მაჸუნ თეს შედეგო? თიქ 17 პიროვნებას მეხვარ ბიბლიურ ჭეშმარიტებაშ გაგებას! *

¹³ რიჩარდიქ, ნამუთ უხუცესო მსახურენს საფრანგეთის, ჯგირ რჩევა მეჩჷ თინეფს, მიდგას ლახალაშ გურშენ ჸუდეშე ვეგმართე ვარდა მიკმალუაფარწკუმა ცხოვრენს: „ელვუჩანქ, ნამდა ლიტერატურა თიცალ ადგილს ქიგედვან, სოდეთ ხალხ ძირუნს. თის ქოძირნან, ინტერეს გურჩქინდუნა დო თეს ჩიება გეიაჸუნუ. თენა გურშა ელუკინანს ჩქინ ძვირფას და დო ჯიმალეფს, მიდგას ვეშულებ კარდოკარ მსახურება“. თინეფს, მიდგას ჸუდეშე ვაგმართე, წერილეფიშ ჭარუათ დო ტელეფონით შეულებნა მსახურებას მონაწილებაშ მეღება.

14. მუ ჯგირ მაგალით მუჩეს მეფე დავითიქ?

¹⁴ ხანიშ, ჯამრთელობაშ ვარდა შხვა მიზეზეფიშ გურშენ შილებე კრებას ვარდა რაიონს ვემიბღათ, მოკონან თი დანიშნულება. თეცალ სიტუაციას ქუვორეთ-და, შემლებნა მეფე დავითიშ მაგალითშე დიბგურუათ. მუჟამსით უწის, ნამდა თინა ვარდჷ გიშაგორილ ტაძარიშ მაშენებელო, მუდგაშ დიდ იმენდ უღუდ, დავითიქ ირნერო ქუდუკინ ხუჯ თის, მიდგა ღორონთიქ გიშეგორ. თიქ გურხვე შესაწირ ხოლო გაკეთ თე საქმეშო. მუშმაჯგირა მაგალით რე თენა ჩქინო! (2 სამ. 7:12, 13; 1 მატ. 29:1, 3—5).

15. მუჭო გიორჯგინ უეჯიქ გურიშგოტახუას?

¹⁵ ჯამრთელობაშ პრობლემეფიშ გურშენ ართ ჯიმაქ, უეჯიქ, ნამუთ საფრანგეთის ცხოვრენს, მიოტუ უხუცესო მსახურება. თის ჸუდეს ჭიჭე საქმეეფიშ კეთება ხოლო ვეშულებუდ. თინა ჭარუნს: „დუდშე უღირსო ბგინაფლენდჷ დუდის დო მანგარ გურგოტახილ ვორდჷ. მარა ჭიჭე ხანიშ უკულ ქიმეფხვად, ნამდა თი მუდგარენეფშე ოკო ვამწუხებუდკო, მუდგაშ კეთება უკვე ვეშემლებუდ. შედეგო უმოს ბედნერ ვორდჷ თით, მუდგაშ კეთება დიო ხოლო შემლებუდ იეჰოვაშ მსახურებას. გეგნობჭყვიდ, მტკიცაშო ქიგებდირთკო. გედეონი დო თიშ სუმოშ  ჯარიშკოჩცალო, მით შულადირეფ რდეს, მა ხოლო გუვაგრძელენქ ბრძოლას“ (მსაჯ. 8:4).

16. მუშ გურაფა შემლებნა ანგელოზეფიშ მაგალითშე?

¹⁶ ართგურ ანგელოზეფ ჯგირ მაგალით რენა. მეფე ახაბიშ დროს იეჰოვაქ ანგელოზეფ იჭანუ, ნამდა ქიგეგკო თინეფიშ აზრ, მუჭო შილებედ შეცდომაშა მიშეჸუნესკო უბადო მეფე. ნამთინე ანგელოზიქ მუშ იდეა ქუწუ იეჰოვას, მარა ღორონთიქ ართ ანგელოზ გიშეგორ დო უწუ, ნამდა თიშ აზრ გამართლენდჷ (1 მეფ. 22:19—22). გუტირხესო გურქ შხვა ართგურ ანგელოზეფს დო იფიქრესო, ნამდა ტყურათ ახარჯეს დრო დო გიმოხანტეს მუნეფიშ აზრ? მუთუნნერ მიზეზ ვა მიღნა, ნამდა თაშ იფიფქრათ. ანგელოზეფ ნამდვილო თანდაბლეფ რენა დო ოკონა, არძა პატი იეჰოვაშ რდას (მსაჯ. 13:16—18; გამოცხ. 19:10).

17. მუ ოკო ვაკეთათ, მუდგარენ დანიშნულება ვა მიღნან თიშენ, დუდის გლახათ ქობგინაფლენთ-და?

¹⁷ რშუდან, ნამდა დიდ პატი რე, ღორონთიშ სახელ გებძუნა დო თიშ სამეფოშ გურშენ ვაცხადენთინ. დანიშნულებეფ შილებე მიბღათ დო მივოდინუათ, მარა თენა ვეგნმოშქვანა ღორონთიშ თოლს ძვირფასეფო. თანდაბლეფ დო მოკრძალებურეფ ქუვორეთ-და, თიმწკუმა იპჸით ძვირფასეფ ღორონთშო დო და დო ჯიმალეფშო. ათეშენ, ქოთხით იეჰოვას, ქიმგეხვარან, რდათ თანდაბლეფ დო მოკრძალებურეფ. მიაჸუნით ბიბლიას მოჩამილ იეჰოვაშ თანდაბალ მსახურეფიშ მაგალითეფს. ნამ შეილებნან, ხიოლით მემსახურით და დო ჯიმალეფს (ფსალმ. 138:6; 1 პეტ. 5:5).

18, 19. მუჭო შეილებნა გიღდან ხიოლ, თიშ უმკუჯინუო, ნამდა თქვან სამქადაგებლო ტერიტორია უნაყოფოთ იძირე?

¹⁸ მინშა გურგოტახილო ხომ ვაიგინაფნა დუდ თიშ გურშენ, ნამდა თქვან სამქადაგებლო ტერიტორია უნაყოფოთ იძირე ვარდა ხვალე მუსხირენ კოჩ რხვადნა ჸუდეს? თეცალ სიტუაციას მუშ კეთება შეილებნა, ნამდა ხიოლ ვადინუათ ვარდა უმოსო გემანგარათ? მუსხირენ პრაქტიკულ რჩევა მოჩამილ რე ჩარჩოს: „საშვალებეფ თქვან მსახურებაშ გამდიდრებელო“. თინა ხოლო მნიშვნელოვან რე, ნამდა მსახურებაშენ სწორ შეხედულება გიღდან. მუს ნიშნენს თენა?

¹⁹ ყურადღება ღორონთიშ სახელიშ დო თიშ სამეფოშ გურშენ გაცხადებაშა გეგნიღით. იესოქ გასაგებო თქუ, ნამდა ბრელ ვეკაჸუნუდ თის (მათ. 7:13, 14). მუჟამსით მსახურებას ვორეთ, ჩქი დიდ პატი მიღნა, ნამდა იეჰოვა, იესო დო ანგელოზეფწკუმა  ართო იფხანდათ (მათ. 28:19, 20; 1 კორ. 3:9; გამოცხ. 14:6, 7). იეჰოვას მუშა მოჸუნს თინეფ, მიდგას თიშ მსახურება ოკო (იოან. 6:44). ათეშენ პიროვნება ასე ვამრჩქილენან-და, შილებე თიქ შხვა დროს ქუმომრჩქილუან.

20. მუს მოგურუანა იერემიაშ 20:8, 9 გურიშგოტახუაშა ბრძოლაშ გურშენ?

²⁰ ჩქი ბრელ მუდგარენიშ გურაფა შემლებნა წინასწარმეტყველ იერემიაშე. თის ოკო უქადაგებუდკო თიცალ ტერიტორიას, სოდეთ ხალხ ვა ურჩქილედ თიშ ცნობას. თინეფ „მთელ დღას“ ამცირენდეს დო გაძიცანდეს თის (წეკითხით იერემიაშ 20:8, 9). ართშა თის თეშ გუტირხჷ გურქ, ნამდა ქადაგებაშ მეტება ოკოდ. მარა თაშ ვა მუქციებინ. მუშენ? იეჰოვაშ სიტყვა დაჩხირცალო რდუ თიშ გურს დო ვა გარზინ! ჩქინწკუმა ხოლო თაშ რე, მუჟამსით ჩქინ გურ დო გონებას ღორონთიშ სიტყვა რე. თენა ხოლო ართ მიზეზ რე ჩქინო, ნამდა ირდღას იბგურუათ ბიბლია დო იფიფქრათ თიშო. შედეგო ხიოლ ვემიოტენს რდუალას დო ჩქინ მსახურება უმოს ნაყოფიერ იჸუაფ (იერ. 15:16).

21. მუდგაშ გურშენ ვა მაფდან გურ გოტახილინ, მუჭო შემლებნა გივორჯგინათ თის?

²¹ „გურიშგოტახუა შილებე სატანაშ გიმორნაფილ ძალიერ იარაღ რდას“ — იჩიებ დებორა, ნამუთ ჟიშე მიფშინეთ. მარა სატანაშ იარაღეფს მუთუნ ვაღოლნე იეჰოვაშ ძალაშა. ათეშენ, მუდგაშ გურშენ ვა გინაფლენდე დუდის გურგოტახილო, ქოთხი იეჰოვას მოხვარა. თინა მიგეხვარებ, გიორჯგინე სქან არასრულყოფილება დო სისუსტეეფს. მიგეხვარებ ლახალაშ დროს. მიგეხვარებ, გაწონასწორებულ შეხედულება ვადინუე მსახურებაშ დანიშნულებეფშენ. მიგეხვარებ, დადებით განწყობა გიღდას სქან მსახურებაშენ. თეს გეძინელ, ქილოც დო კონკრეტულო ქუწი სქან ზეციერ მუმას, მუს გინაფლენქინ. თიშ მოხვარათ შეილებ მიგე გურიშგოტახუაწკუმა ბრძოლა.