1. Man̈ano akory atsika izikoa fa kivy?

MIATRIKY raha sarotro isankarazany atsika isanandra, ke miezaka atsika mitady vahaolan̈a izikoa fa miboaka raha aby zen̈y. Fa ny raha hita, sarotro miatriky problemo izikoa anten̈a kivy. Sa akory hevitrinao? Hakivian̈a koa fa tafiditry, anten̈a tsisy korazy avio tsy ravoravo. Zen̈y mahavy atsika ndraikindraiky mahatsiaro ten̈a tsisy dikany foeky. Karaha ty koran̈iny Ohabolana 24:10: “Izikoa an̈atiny fotoan̈a sarotro anao kivy, hihen̈y edy angovonao.”

2. Ino aby raha mety hampakivy atsika, avio ino raha hidinihintsika ato?

² Maro raha mety hampakivy atsika. Mety baka amintsika tompiny avianizen̈y, na baka amy raha mandalo amy fiain̈anantsika. Karakory ma zen̈y? Nohony atsika tsy lavorary, mety han̈ano diso atsika; fa ny raha misy, mbala injehiny eritreritry fo atsika, ndray efa ela be afara atỳ. Mety hahavy atsika hahatsapa ten̈a tsisy dikany raha zen̈y. Mety ho kivy koa atsika izikoa fa marary na misy tombontsoampanompoan̈a tiantsika ho azo kanefa tsy mety azontsika. Mety efa mifen̈y mare atsika mitory fa olo itoriantsika tsy rototro foeky. Ino raha tokony hataontsika baka atsika tsy ho kivy? Zen̈y raha hidinihintsika amy lahatsoratra ty ato.

3. Ino raha mety han̈ampy atsika tsy han̈ameloten̈a dila loatra?

³ Mety hahatsapa ten̈a tsisy dikany atsika, fotony mifantoko be loatra aminy hadisovan̈a vitantsika taloha. Mety hieritreritry foeky atsika fa Jehovah tsy han̈aomba atsika hiditry amy donia vaovao zen̈y. Tsy mahatsara atsika mandiniky raha karaha zen̈y. Akory fo basy tokony fiheverantsika hadisovan̈a vitantsika  aby in̈y? Mivolan̈a Baiboly fa ‘samby efa nanota aby olo jiaby.’ Jesosy Kristy edy ny olo tsiary nanota. (Rom. 3:23). Kanefa Jehovah tsy mifantoko aminy hadisovan̈antsika, ary izy koa tsy man̈anten̈a atsika hanjary lavorary izikoa amy zioty edy. Baba be fitiavan̈a i Jehovah, ke izy tsy vitany tihan̈ampy atsika fa izy koa von̈ono han̈ano zen̈y. Maharidraha koa izy. Hainy fa, efa mifen̈y angovo jiaby atsika man̈ano raha manjary ndreky tsy han̈ameloten̈a dila loatra.​—Rom. 7:18, 19.

4-5. Izikoa zahan̈a 1 Jaona 3:19, 20, ino raha ten̈a nan̈ampy Maria ndreky Deborah?

⁴ Diniha baka raha niain̈any Maria ndreky Deborah. * Mahalan̈a olobeny Deborah mba nidera izy tamy raha tsara vitany. Ke izy koa fa nahaibe, matetiky izy mahatsapa ten̈a tsisy raha ilan̈a izy foeky. Miaraka izy man̈ano raha tsy mety hely, izy efa mieritreritry ain̈inany farany tsy manjary. Mitovitovy amy zen̈y koa raha tsapany Maria. Nan̈ambany izy fo ry havany, ke nahatsapa ten̈a tsisy fotiny foeky izy. Ndray fa vita batisa izy tafara tatỳ, mbala hitany tsy vain̈y mitondra an̈aran̈any Zan̈ahary fo izy.

⁵ Ndray izy man̈ano zen̈y, tsy voly nanompo Jehovah iro ranabavy aroe io. Fotony nan̈ino? Iro nivavaka; nikoran̈indro tamy Jehovah raha jiaby tan̈aty fondro. (Sal. 55:22) Nanjary nikeny sain̈indro fa hainy Jehovah, Babantsika be fitiavan̈a io, fa misy vokany amintsika raha ratsy niain̈antsika tsiaraikiaraiky. Atsika mety tsy hahita toetry tsarantsika, fa Jehovah ndraiky mahita.​—Vakia 1 Jaona 3:19, 20.

6. Ino raha tokony hataonolo araiky izikoa izy tafan̈ano raha ratsy nahazatra izy taloha?

⁶ Mety han̈ameloten̈a olo araiky izikoa fa niady mare tamy raha ratsy nahazatra izy kanefa mbala tafan̈ano izio ndraiky. Normaly izy koa kivy! (2 Kor. 7:10) Fa ndray zen̈y, atsika tsy tokony hasiaka loatra aminy ain̈intsika, ke hivolan̈a: ‘Tsy manjary foeky zaho ty. Jehovah tsy mety han̈ambela zaho.’ Tsy marin̈y zen̈y. Izikoa zen̈y fo raha dinihintsika, farany, atsika ho voly hanompo Jehovah foeky. Alaiva onon̈o raha nivakiantsika taminy Ohabolana 24:10 in̈y. Hihen̈y angovonao izikoa anao kivy. Sitrany ‘alamìna’ problemo io, ke mivavaha baka Jehovah han̈ambela hadisovan̈anao. (Isaia 1:18) Izikoa anao nanen̈iny mare taminy hadisovan̈anao in̈y ke mifen̈y angovo jiaby hiova, Jehovah hamela helokonao. Mitadiava fan̈ampian̈a aminy antipan̈ahy, fotony iro io maharidraha sady von̈ono han̈ampy anao hihavan̈a amy Jehovah ndraiky.​—Jak. 5:14, 15.

7. Mety ho sarotro amintsika man̈ano ny tsara, kanefa nan̈ino raha zen̈y tsy tokony hampakivy atsika?

 ⁷ Antipan̈ahy a France an̈y i Jean-Luc. Mifen̈y izy mampahery olo nan̈ano hadisovan̈a. Matetiky izy mivolan̈a amindro karaha ty: “Amy Jehovah, olo marin̈y zen̈y tsy olo tsy man̈ano diso foeky, fa olo manen̈iny mare amy raha ratsy vitany sady mifen̈y miala amy zen̈y.” (Rom. 7:21-25) Izikoa anao mbala miady amy fahalimian̈anao, aza man̈ameloten̈a. Tsaraova fa panota aby atsika jiaby io, ke samby mila ‘hatsarampan̈ahiny Jehovah tsisy ambaka izy’ aby. Zen̈y nahavy izy nan̈amia zanany natao vidipan̈avotan̈a.​—Efes. 1:7; 1 Jaona 4:10.

8. Atsika koa fa kivy, azovy aby mety han̈ampy atsika?

⁸ Han̈ampy atsika iro rahalahy ndreky ranabavintsika aby io. Lera atsika tihikoran̈a, iro von̈ono hitandren̈y atsika ndreky hampahery atsika. (Ohab. 12:25; 1 Tes. 5:14) Nijaly mare Joy, ranabavy araiky a Nizeria, fotony izy kivy mare. Ho izy: “Tsy haiko taia tany nisy zaho izikoa tsy tio iro ranadahy ndreky rahavavy aby io! Tsapako fa Jehovah ten̈a mitandren̈y vavakanaka ke iro io ampiasainy hankahery zaho. Maro raha nianarako tamindro, ke nanjary haiko karakory atao mampahery olo kivy.” Aza adin̈a fa tsy voatery ho haindro piaramanompo aby io fotoan̈a ilantsika fampahirezan̈a. Ke ndraikindraiky, atsika foeky mila von̈ono han̈aton̈o ke hikoran̈a amy naman̈a matotro fan̈ampian̈a tadiavintsika.

9. Nan̈ino mankahery atsika raha koran̈iny Salamo 41:3 ndreky 94:19?

⁹ Mitadiava fan̈ampian̈a amy Jehovah. Mety tsy ho mora amintsika hieritreritry raha tsara na raha mampahery izikoa atsika fa marary, intsaka eky aretin̈intsika io koa mahadin̈y ela. Jehovah tsy han̈ano fahagagan̈a ke hampahivan̈a atsika iô ny iô. Kanefa mampahery atsika izy sady man̈amia atsika angovo baka ho vitantsika hiaritry izio. (Vakia Salamo 41:3; 94:19.) Akory an̈anaovany zen̈y? Mety hampiasa piaramanompo izy han̈ampy atsika aminy asa sasany antran̈o na han̈ano bazary. Hataony koa raha hahavy iro hivavaka hiaraka amintsika. Jehovah koa mety han̈ano raha hahavy atsika hahatsiaro hevitry mampahery baka amy Baiboly. An̈isanizen̈y fiain̈ana lavorary miambin̈y atsika amy donia vaovao. Amy leranizen̈y, tsy ho hisy aretin̈y ndreky hôtsokôtsoko eky.​—Rom. 15:4.

10. Ino raha nan̈ampy i Isang tsy ho kivy loatra ndray tio raha nahazo izy?

¹⁰ Mipetraka a Nizeria rahalahy Isang. Nisy raha navoa izy ke nanjary nalemy izy. Tsy hahavita handeha eky izy, ho dokotera. Karaha ty nambarany Isang: “Ten̈a nafy taminaka raha zen̈y.” Fa ndray zen̈y, izy mbala manompo Jehovah fo. Ino raha nan̈ampy izy? Ho izy: “Zahay roeny vadiko tsy voly nivavaka tamy Jehovah ndreky nianatra Volan̈anany. Tapakevitry zahay hifantoko aminy hatsaran̈a jiaby efa azonay baka amy Jehovah, an̈isanizen̈y fan̈antinan̈a fiain̈ana tsara handeha hataony amy donia vaovao.”

11. Akory nahitany Cindy haravoan̈a fo ndray izy narary fatatra mare?

¹¹ Baka a Meksiky ndraiky ranabavy Cindy. Avoany aretin̈y mety hamono izy ranabavy io. Akory nataony? Tan̈atiny izy nitsabo ten̈a, izy nan̈ano tanjon̈o hitory isanandra. Karaha ty nisoratiny: “Nitady fomba han̈ampian̈a olo fo zaho ke nanjary tsy nifantoko be loatra tamy fandidian̈a ndreky tehotehoko zaho. Iro dokotera ndreky ainfirmie aby io koa fa navy nizaha zaho, an̈ontaniako iro akory naniny fianakavian̈andro na nan̈ino iro nifidy asandro io kanefa izio sarotro. Ke noranora taminaka baka tio nahita fotokevitry mety ho tiandro. Nivolan̈a foeky sasany tamindro fa mahalan̈a iro maharen̈y olo tahandro  man̈ontany ‘akory nanindro’, ke iro ten̈a nankasitraka zaho. Sasany baka nan̈amia nimerony telefaonindro ndreky adiresindro foeky. Tan̈atiny zaho niaritry raha sarotro aby in̈y, tsapako fa ten̈a nan̈ampy zaho Jehovah. Tsy nampoiziko foeky zaho ho ravoravo be karaha zen̈y!”​—Ohab. 15:15.

12-13. Ino raha nataondro piaramanompo tsy mahavita mitory isaka tran̈o aby io, avio ino aby vokatranizen̈y?

¹² Mety ho kivy piaramanompo marary na aosa, fotony mety tsy be raha vitandro amy fanompoan̈a. Fa ndray zen̈y, maro amindro io mifen̈y fo hitady hevitry hitorian̈a. Karaha zen̈y iziô ranabavy araiky mipetraka a Etazonỳ an̈y. Laurel an̈arany. Tan̈atiny 37 taon̈o, izy tsy maintsy natao tan̈atiny masìny araiky nan̈ampy izy hahazo fahin̈ana tsarabe. Navoany kansera koa izy sady nididian̈a matetiky. Mbala navoany aretinkoditry koa izy. Kanefa izy tsy voly nitory foeky. Nifen̈y fo izy nitory tamy dokotera ndreky piasany lopitaly nitaha izy tantran̈o. Ino vokany? Ranabavintsika io nahavita nan̈ampy olo 17, farany hely, hahay ny mariny amy Baiboly ao. *

¹³ Ino koa raha mety hataondro rahalahy ndreky ranabavy marary tsy afaka miboaka tran̈o na iro amy tany fitarimian̈a olo matoe? Misy sosokevitry tsara namiany Richard, antipan̈ahy araiky mipetraka a France. Ho izy: “Iro mety man̈apetraka boky ndreky gazety amy tany mora hita, amy zen̈y moramora aminolo lian̈a man̈aton̈o iro. Maro piaramanompo nahita olo von̈ono hikoran̈a izikoa fa nan̈ano zen̈y. Ten̈a nampahery iro raha zen̈y, fotony iro efa tsy afaka mitory isaka tran̈o.” Iro koa mety man̈ano fitorian̈a amy taratasy na amy telefaony.

14. Nan̈ino atsika mivolan̈a fa ten̈a modely tsara arehantsika Panjaka Davida?

¹⁴ Maro antony mety hahavy atsika tsy hahazo tombontsoampanompoan̈a na fanendrena sasany. Ohatra, mety efa mahazoazo taon̈o na tsy dia salama atsika, na mety misy antony hafa. Izikoa zen̈y raha mahazo anao, tsaraova Panjaka Davida. Izy tihan̈orin̈y tempoly niny Jehovah, kanefa tsy izy olo nifidiny Jehovah han̈ano izio. Ndray zen̈y, nifen̈y fo izy nanohan̈a lay olo nifidiny Jehovah, ke nan̈amia volamena marobe ndreky volafotsy izy hiasan̈a tempoly io. Ten̈a modely tsara arehantsika izy!​—2 Sam. 7:12, 13; 1 Tan. 29:1, 3-5.

15. Akory nataony Hugues nandresy hakivian̈a?

¹⁵ Karaha zen̈y Hugues, rahalahy araiky mipetraka a France an̈y. Nanjary tsy vitany eky andraikitrinany amy maha antipan̈ahy ndreky amy maha lohany fianakavian̈a izy, fotony izy narary fatatra. Volan̈iny: “Rivan̈a mare zaho  tamy voanalohany, sady nahatsapa ten̈a tsy nilain̈a foeky. Koa fa nandeha fotoan̈a, namboariko jerinaka. Mila nikeko fa voafetra fo raha mety ho vitako ke tsy nila nifantoko be loatra tamy raha tsy ho vitako zaho. Nanjary ravoravo tamy fanompoan̈a ndraiky zaho izikoa fa nan̈ano zen̈y. Tapakevitry zaho tsy hivadiky, karaha nataony Gideona ndreky iro telonjato lahy aby in̈y. Iro ndray kajo, iro tsy voly niady.”​—Mpits. 8:4.

16. Ino ma raha ianarantsika baka amindro anjely tsy mivadiky aby io?

¹⁶ Modely tsara arehantsika iro anjely tsy mivadiky aby io. Tamy fotoan̈a nanjakany Ahaba, panjaka ratsy fan̈ahy, Jehovah nan̈ontany iro anjely aby io azovy tamindro nahita fomba hamitahan̈a panjaka ratsy fan̈ahy io. Samby nan̈amia hevitry iro anjely aby io, fa araiky tamindro fo nikeny Jehovah fotony zen̈y ny hevitry hitany fa hahômby. (1 Mpanj. 22:19-22) Kivy ma iro anjely hafa aby io fotony tsy narehan̈a hevitrindro? Nieritreritry ma iro fa ‘tsisy varany iro nan̈amia hevitry.’ Tsy zen̈y foeky. Nanetry ten̈a iro, ke Jehovah fo tiandro hamian̈a voninahitry.​—Mpits. 13:16-18; Apok. 19:10.

17. Ino raha tokony hataontsika izikoa atsika kivy fotony misy tombontsoampanompoan̈a tiantsika ho azo kanefa tsy mety azontsika?

¹⁷ Tsaraova fa tombontsoa maventy mitondra an̈aran̈any Zan̈ahary ndreky mitory momba Fanjakan̈anany zen̈y. Tombontsoampanompoan̈a ndreky fanendrena zen̈y mielan̈a fo. Tsy baka amy raha aby zen̈y mahavy anao valera amy Jehovah. Baka aminino fo basy? Fanetrenten̈a. Izikoa atsika manetry ten̈a, ho hisy valera amy Jehovah ndreky amindro rahalahy ndreky ranabavintsika aby io. Ke iangavia Jehovah han̈ampy anao hanetry ten̈a fo. Saintsain̈a koa modely tsara nambelandro panompony Jehovah tsy nivadiky taloha tan̈y. Mitadiava fomba fo anao han̈ampian̈a piaramanompo.​—Sal. 138:6; 1 Pet. 5:5.

18-19. Akory mety hahitanao haravoan̈a fo ndray karaha tsy lian̈a olo itorianao?

¹⁸ Asa anao mba kivy ndraikindraiky fotony olo tsy rototro aminy hafatra indesinao na tsy hita antran̈o foeky? Akory hataontsika baka atsika hahita haravoan̈a fo? Misy sosokevitry tsara aminy efajoro “ Fomba Mety Hankatsaran̈a  Fanompoan̈a.” Mila manan̈a toetsain̈y tsara koa atsika. Karakory ma zen̈y?

¹⁹ Aza adin̈a fa han̈ambara momba an̈aran̈a Zan̈ahary ndreky Fanjakan̈anany antony voanalohany mahavy atsika mitory. Efa nambarany Jesosy fa ho vitsy fo olo hahita lalan̈a mengo amy fiain̈ana io. (Mat. 7:13, 14) Miaraka miasa amy Jehovah ndreky Jesosy avio iro anjely aby io atsika izikoa fa mitory. Ke tsisy raha bebenizen̈y eky! (Mat. 28:19, 20; 1 Kor. 3:9; Apok. 14:6, 7) Aza adin̈a fa Jehovah mitaon̈o olo hanompo izy. (Jaona 6:44) Ke izikoa olo ikoran̈antsika tsendriky von̈ono hitandren̈y hafatra indesintsika, mety mbala hiova hevitry fo izy lera atsika mandalo amy man̈araka.

20. Izikoa zahan̈a Jeremia 20:8, 9, ino raha tokony hataontsika izikoa tiantsika ho resy hakivian̈a io?

²⁰ Modely tsara arehantsika koa paminan̈y Jeremia. Nan̈ino ma? Sarotro taminany koa nitory taminolo man̈odidin̈y izy, fotony iro olo aby io tsy vitany tsy tihitandren̈y hafatra nindesiny fa nanihitihy ndreky nan̈adroadro izy fo isanandra. (Vakia Jeremia 20:8, 9.) Nisy fotoan̈a izy efa tseky voly nitory fotony izy kivy mare. Fa baka tio, nitohizany fo asa io. Ino antony? Fotony “volan̈any Jehovah” nanjary mira motro mizelazela tan̈aty fonany tao, ke tsy din̈iny foeky tsy han̈ambara hafatra io. Hahavita karaha nataony io koa atsika izikoa mazoto mianatra Volan̈a Zan̈ahary isanandra ndreky misaintsain̈y izio. Izikoa atsika man̈ano zen̈y, hameno fontsika ndreky jerintsika Volan̈a Zan̈ahary. Hahaihitombo fo koa haravoan̈antsika, avio ho maro olo von̈ono hitandren̈y atsika.​—Jer. 15:16.

21. Ino raha mila ataonao baka ho resinao hakivian̈anao?

²¹ Karaha ty nambarany Deborah, araiky nikoran̈intsika in̈y: “Hakivian̈a io an̈isany fitaovan̈a mahômby ampiasainy Satana.” Fa zen̈y tsisy kontiny izikoa ampiran̈iny aminy angovony Jehovah. Ke ndray anao tsy lavorary, ndray anao manan̈a fahalimian̈a, ndray anao marary fatatra, ndray anao kivy fotony misy tombontsoampanompoan̈a na fanendrena tsy azonao, tsaraova fa Jehovah han̈ampy anao. Iangavia Babantsika be fitiavan̈a io han̈ampy anao hanan̈a toetsain̈y tsara ndreky han̈ano tsara fanompoan̈anao. Koràn̈a aminany zay raha an̈aty fonao, fa izy han̈ampy anao tsy ho kivy eky.