1. ¿Xi rizaaca ora rireʼnu gana?

GUIRANU nápanu guendanagana, ne guiráʼ dxi rudxíʼlunu cani. Ne pa maʼ bireʼnu gana, jma peʼ nagana raca ni para laanu. Purtiʼ pa guireʼnu gana, maʼ qué zápanu confianza, zadxíbinu ne qué ziuʼnu nayecheʼ para gudxíʼlunu ca guendanagana stinu. Casi ná Proverbios 24:10: «Pa guireeluʼ gana ora cadíʼdiluʼ ra nagana la? zará stipa stiluʼ».

2. a) ¿Gunáʼ nga caadxi cosa ni zanda cuee gana laanu? b) ¿Xi zazíʼdinu lu artículo riʼ?

² Nuu stale cosa ni zanda cuee gana laanu. Nuu de laacani rihuinni ne nuu ni coʼ. Zanda guireʼnu gana purtiʼ imperfectu laanu, rucheʼnu, raca huaranu, caʼruʼ guicaanu privilegiu ni racaláʼdxinu o purtiʼ runi predicarnu ti territorio ra qué riná binni gucaadiaga laanu. Lu artículo riʼ zazíʼdinu xi zanda gúninu ora careʼnu gana.

3. ¿Xi zacané laanu para cadi guiníʼ ique xhaatanu binni ruchee laanu?

³ Pa guiníʼ ique xhaatanu imperfectu laanu ne rucheʼnu stale biaje, zanda chuʼnu triste ne dede guiníʼ íquenu qué zudii Jehová lugar chuʼnu ndaaniʼ guidxilayú cubi. Pa guiníʼ íquenu sicaríʼ zanda gacananu. ¿Xi zacané laanu para cadi guiníʼ íquenu zacá yaʼ? Ni dxandíʼ nga binni ruchee de guiranu, ne Jesús si nga perfectu (Rom. 3:23). Cadi cayuuyaʼ Jehová puru ra cucheʼnu ne qué ribézabe gácanu perfectu. Nadxiibe laanu ne nápabe paciencia laanu. Nánnabe pabiáʼ stipa rúninu para gúninu ni jneza, riénebe laanu, ne nuube listu para gacanebe laanu (Rom. 7:18, 19).

4, 5. Casi ná 1 Juan 3:19, 20, ¿xi gucané chupa hermana para cadi guireecaʼ gana?

 ⁴ Guidúʼyanu ni bizaaca Deborah ne María. * Dxi nahuiiniʼ Deborah, huaxiéʼ gunnaxhii familia stiʼ laa ne huaxiéʼ guluucaʼ gana laabe. Ngue runi guníʼ íquebe qué risácabe ne huaxiéʼ gunnaxhiibe laca laabe. Ora rúnibe xiixa ne qué guireeni jneza, riníʼ íquebe qué ziuu dxi gúnibe ti cosa galán. Ngaca nga bizaaca María. Bisituí familia stibe lube ne dede gúdxicaʼ laabe qué iquiiñebe. Ne despué de guyuunísabe, guníʼ íquebe huaxiéʼ risácabe para gácabe ti testigu stiʼ Jehová.

⁵ Neca gudiʼdiʼ ca hermana riʼ ra nagana, qué nusaana de ñúnicaʼ ni ná Jehová. ¿Xi gucané laacabe yaʼ? Biʼniʼ orárcabe Jehová ne bilaacabe ni nuácabe luguiáʼ (Sal. 55:22). Biénecabe nanna Bixhózenu ni nuu guibáʼ pa guiníʼ ique xhaatanu ca ni bizaacanu dxiqué zanda cueecani gana laanu. Laaca ruuyaʼ Jehová ca cualidad ni nápanu, neca laanu nuu biaje qué ridúʼyanu cani (biindaʼ 1 Juan 3:19, 20).

6. ¿Ximodo zándaca guni sentir tuuxa ni cayuni stipa gusaana ti viciu ne guiaba luni sti biaje?

⁶ Pa tuuxa cayuni stipa gusaana ti viciu ne guiaba luni sti biaje la? zándaca guiree gana. Ora runi cometer tuuxa ti pecadu, napa razón para guni sentir napa donda (2 Cor. 7:10). Peru cadi ugaʼninu donda íquenu ne guininu: «Maʼ qué gapaʼ remediu; qué ziuu dxi guni perdonar Jehová naa». Cadi jneza guiníʼ íquenu sicaríʼ purtiʼ zanda guixélenu de Jehová. Ne cadi guiaandaʼ laanu ni ná Proverbios 24:10: pa guireʼnu gana, zará stipa stinu (Is. 1:18). Nanna Jehová ora maʼ guca arrepentirnu de guidubi ladxidoʼno ne runi perdonar laanu. Laaca zanda guinínenu ca ancianu, zápacaʼ paciencia ne zacanecaʼ laanu para guibiguétanu ra nuu Jehová (Sant. 5:14, 15).

7. Pa cayúninu stipa gusaananu xiixa viciu, ¿xiñee cadi naquiiñeʼ guireʼnu gana?

⁷ Ti ancianu de Francia ni láʼ Jean-Luc sicaríʼ rabi ca hermanu ni cayuni stipa gusaana xiixa viciu: «Nanna Jehová ruchee ca binni ni runi ni jneza, peru ni riuuláʼdxibe de laacaʼ nga raca arrepentircaʼ ne rúnicaʼ stipa pur guchaacaʼ» (Rom. 7:21-25). Nga runi, cadi guiníʼ íquenu maʼ qué gápanu remediu. Cadi guiaandaʼ laanu guiranu rucheʼnu, peru riuulaʼdxiʼ Jehová ni  rúninu purtiʼ nachaʼhuiʼ ne pur bidii Xiiñiʼ para gatiʼ pur laanu (Efes. 1:7; 1 Juan 4:10).

8. Ora caquiiñenu tu cuʼ gana laanu, ¿tu ra nuu zanda guidxíñanu?

⁸ Ora caquiiñenu tu cuʼ gana laanu, zanda guidxíñanu ca hermanu stinu, ni zeeda gaca familia stinu. Siempre zaguixhedxícabe ladxidoʼno ne zucaadiágacabe laanu ora caquiiñenu ni (Prov. 12:25; 1 Tes. 5:14). Ti hermana de Nigeria ni láʼ Joy, ni runi stipa para cadi guiree gana guníʼ: «¿Xi nizaaca de naa pa qué ñuu ca hermanu stinneʼ? Cumu qué rusaanacabe naa la? nga rusihuinni rucaadiaga Jehová ca oración stinneʼ. Ne maʼ bisiidicabe naa uguaaʼ gana ca hermanu ni nuu triste». Cadi guiráʼ ora zudii ca hermanu cuenta caquiiñenu tu cuʼ gana laanu. Nga runi, zándaca caquiiñeʼ gábinu tuuxa hermanu o hermana gacané laanu.

9. ¿Ximodo racané Salmo 41:3 ne 94:19 laanu?

⁹ Guyúbinu gacané Jehová laanu. Nagana nga guiníʼ ique binni cosa ni galán ora huará, jmaruʼ si pa maʼ xadxí huará. Qué zuni Jehová ti milagru para gusianda laanu tiempu riʼ, peru riguixhedxibe ladxidoʼno ne rudiibe stipa laanu para guni huantarnu (biindaʼ Salmo 41:3; 94:19). ¿Ximodo rúnibe ni yaʼ? Zándaca iquiiñebe caadxi hermanu para chisicaʼ cosa stinu o gúnicaʼ xiixa dxiiñaʼ ra lídxinu. Laaca zanda iquiiñebe ca hermanu stinu para guni orarnecaʼ laanu. Ne zanda gucaabe laanu guietenaláʼdxinu parte de textu ni zeeda lu Biblia para gatadxí ladxidoʼno, tobi de laacani nga guietenaláʼdxinu zabáninu ndaaniʼ ti guidxilayú cubi ra guirutiʼ zaca huará ne zácanu perfectu (Rom. 15:4).

10. ¿Xi gucané Isang para maʼ cadi guiree gana?

¹⁰ Isang, ti hermanu de Nigeria, gupa ti accidente ne gudxi doctor laabe maʼ qué zásabe. Sicaríʼ guniʼbe: «Gucadé ladxiduáʼ ne bireeʼ gana». ¿Xi gucané laabe para maʼ cadi guireebe gana yaʼ? Isang guníʼ: «Naa ne xheelaʼ qué nusaana de ñuni orardu Jehová ne biʼniʼ estudiardu Stiidxabe. Laaca gudixhe íquedu gudídidu xquixe peʼ Dios pur ca cosa galán ni nápadu, tobi de laacani nga guibánidu ndaaniʼ guidxilayú cubi ni cayuni prometerbe».

11. ¿Xi biʼniʼ Cindy para chuʼ nayecheʼ neca napa ti guendahuará malu?

¹¹ Cindy, ti hermana de México, gudxi doctor laa napa ti guendahuará malu ne zanda guutini laa. ¿Xi biʼniʼ hermana riʼ yaʼ? Ca dxi cacaabe tratamientu, gudixhe íquebe guiníʼnebe binni de Jehová guiráʼ dxi. Sicaríʼ guniʼbe: «Ngue gucané naa guicá iqueʼ gacaniáʼ xcaadxi lugar de guicá iqueʼ operación ni chigúnicabe naa ne yuubaʼ ni napaʼ. Ndiʼ nga ni runeʼ: ora rinieniáʼ ca doctor ne ca enfermero, rinabadiidxacaʼ laacaʼ ximodo nuu familia sticaʼ. De raqué rinabadiidxaʼ laacabe xiñee gulícabe dxiiñaʼ que. Zaqué rinieniáʼ laacabe de ni riuuláʼdxicabe. Stale doctor gudxi naa huaxiéʼ si binni rinabadiidxaʼ laacaʼ ximodo nuucaʼ, ne stale de laacabe bidiicabe xquixe peʼ naa purtiʼ rizaaladxeʼ laacabe. Ne nuu tu laa bidii naa ca datu stiʼ. Neca nagana ra cadideʼ que, gucané Jehová naa chuaaʼ nayecheʼ, dede guizáʼ bidxagayaaʼ» (Prov. 15:15).

12, 13. ¿Xi huayuni caadxi hermanu ni maʼ huará o maʼ huaniisi para guni predicarcaʼ, ne xi huabeenducaʼ?

 ¹² Ca hermanu ni maʼ huará o maʼ huaniisi, rireecaʼ gana purtiʼ maʼ qué randa rúnicaʼ jma lu xhiiñaʼ Dios biaʼ ñuuláʼdxicaʼ. Peru neca zacá, stale de laacaʼ rúnicaʼ stipa para guni predicarcaʼ. Laurel, ti hermana de Estados Unidos, guyuu ndaaniʼ ti aparatu de guiibaʼ 37 iza para ganda guicaa bi. Laaca gúpabe cáncer ne biʼniʼ operárcabe laabe stale biaje, ne xadxí gúpabe xcaadxi guendahuará ládibe. Neca nagana ra gudíʼdibe, qué nusaana de ñuni predicarbe. Biʼniʼ predicarbe ca enfermero ne ca binni ni rigacané laabe ra lídxibe. Gucanebe biaʼ 17 binni para gácacaʼ testigu stiʼ Jehová. *

¹³ Richar, ti ancianu de Francia cudii sugerencia riʼ ca binni ni qué zanda guiree de ra lidxi o ca ni nuu ra ti asilo: «Zanda quíxhetu revista o libru ti lugar ra guʼyaʼ binni. Ora ridiʼdiʼ binni ne ruuyaʼ cani, stale de laacaʼ racaláʼdxicaʼ gánnacaʼ jma. Ndiʼ riguu gana ca hermanu stinu purtiʼ runi predicarcaʼ binni neca maʼ qué randa rúnicani de yoo pur yoo». Ca hermanu ni qué zanda guiree de ra lidxi laaca zanda guni predicarcaʼ pur carta o pur teléfono.

14. ¿Xi ejemplu galán bisaana rey David para laanu?

¹⁴ Zándaca racaláʼdxinu guicaanu xiixa privilegiu ndaaniʼ congregación o lu circuito stinu. Peru zándaca nuu caadxi razón xi pur caʼruʼ guicaanu cani, zándaca pur iza stinu, pa huaranu o pur xcaadxi cosa. Pa cazaacanu ni bizéʼtenu riʼ, zanda gacané ejemplu stiʼ rey David laanu. Ni jma gucaláʼdxibe nga gucuibe templu stiʼ Dios; peru dxi gúnnabe cadi laabe zápabe privilegiu que, gucanebe binni ni gulí Dios para guni dxiiñaʼ que. Bidiibe stale oro ne plata. ¡Guizáʼ galán ejemplu bisaanabe para laanu! (2 Sam. 7:12, 13; 1 Crón. 29:1, 3-5).

15. ¿Xi biʼniʼ ti hermanu para maʼ cadi guiree gana?

¹⁵ Hugues, ti hermanu de Francia bisaana de gaca ancianu purtiʼ guca huará. Nin ca dxiiñaʼ jma nahuiiniʼ ni rúnibe ra lídxibe maʼ qué ñanda ñúnibe. Sicaríʼ guniʼbe: «Bineʼ sentir qué iquiiñeʼ ne bireeʼ gana. Peru ra gudiʼdiʼ tiempu bieneʼ maʼ qué zanda guneʼ stale cosa ne guyuaaʼ nayecheʼ né biaʼ zanda guneʼ lu xhiiñaʼ Jehová. Maʼ guníʼ iqueʼ qué zareeʼ  gana. Nacaʼ casi Gedeón ne 300 soldadu stiʼ: neca maʼ bidxagaʼ, qué zareeʼ gana» (Juec. 8:4).

16. ¿Xi rusiidiʼ ejemplu stiʼ ca ángel laanu?

¹⁶ Laaca galán ejemplu stiʼ ca ángel. Ti biaje gunabaʼ Jehová ca ángel guiniʼcaʼ ximodo zanda quítecaʼ rey Acab. Chupa chonna de laacaʼ guniʼcaʼ ximodo zanda gúnicaʼ ni, peru guyuulaʼdxiʼ Jehová ni guníʼ tobi de laacabe ne gúdxibe laa zaree ni modo maʼ guníʼ (1 Rey. 22:19-22). ¿Ñee biree xcaadxi ángel que gana ne guniʼcaʼ: «¿Xi para gunieeʼ?»? Qué niníʼ íquecabe zacá. Guizáʼ humilde ca ángel ne racaláʼdxicaʼ guisaca Jehová (Juec. 13:16-18; Apoc. 19:10).

17. ¿Xi caquiiñeʼ gúninu pa careʼnu gana purtiʼ caʼruʼ guicaanu ti privilegiu ni cabézanu?

¹⁷ Privilegiu jma galán nápanu nga nácanu testigu stiʼ Jehová ne runi predicarnu Reinu stiʼ Dios. Zanda guicaanu ti privilegiu o gunítinu ni, peru cadi ca privilegiu ca nga ni runi laanu ti binni risaca nezalú Jehová ne ca hermanu stinu, sínuque pa humilde laanu ne nánnanu nuu cosa ni qué zanda gúninu. Nga runi guinábanu Jehová gacané laanu para cadi gunítinu ca cualidad riʼ. Lu Biblia zeeda ejemplu stiʼ binni ni guca humilde ne gunna nuu cosa ni qué zanda guni, nga runi guidúʼndanu ne guiníʼ íquenu ejemplu stícabe. Laaca zanda gacanenu ca hermanu stinu dede ra ganda gúninu ni (Sal. 138:6; 1 Ped. 5:5).

18, 19. ¿Xi zanda gacané laanu chuʼnu nayecheʼ ora guni predicarnu ti territorio ra huaxiéʼ rucaadiaga binni?

¹⁸ ¿Ñee runi predicarnu ti territorio ra huaxiéʼ ridxélanu binni ra lidxi ne qué riná gucaadiaga laanu la? Pa ribee ca ni bizéʼtenu riʼ gana laanu, ¿xi zanda gúninu para cadi guireʼnu gana ne chuʼnu jma nayecheʼ? Lu recuadru ni láʼ «Ximodo chuʼnu jma nayecheʼ ora guni predicarnu» zeeda xcaadxi sugerencia ni zanda gacané laanu. Cadi guiaandaʼ laanu runi predicarnu purtiʼ racaláʼdxinu gunibiáʼ binni lá Dios ne gánnacaʼ jma de laabe.

¹⁹ Cadi guiaandaʼ laanu ni jma risaca para laanu nga gusíʼdinu binni lá Dios ne guininu de Reinu stiʼ. Jesús guníʼ huaxiéʼ si binni zadxelaʼ neza ni riné laacaʼ lu  guendanabani (Mat. 7:13, 14). Ora runi predicarnu rúninenu Jehová, Jesús ne ca ángel dxiiñaʼ tobi si (Mat. 28:19, 20; 1 Cor. 3:9; Apoc. 14:6, 7). Cadi guiaandaʼ laanu Jehová nga ruchiña binni ra nuu para gúnicaʼ ni nabe (Juan 6:44). Ne zándaca qué zucaadiaga binni laanu ora guni predicarnu laacaʼ primé biaje, peru zanda gucaadiágacaʼ laanu sti biaje guinínenu laacaʼ.

20. Casi ná Jeremías 20:8, 9, ¿xi zacané laanu para cadi guireʼnu gana?

²⁰ Bisaana profeta Jeremías ti ejemplu galán para laanu. Biʼniʼ predicarbe ti territorio nabé nagana. Dede ridindené ne runi burla binni laabe «guidubi dxi» (biindaʼ Jeremías 20:8, 9). Bireebe gana ne guníʼ íquebe maʼ qué zuni predicarbe, peru qué nusaana de ñuni predicarbe. ¿Xiñee yaʼ? Jeremías guníʼ beeda gaca «ca diidxaʼ ni guníʼ Jehová» casi ti bele dentru de laa ne qué ñanda nucueeza ni. Ngaca zazaacanu pa gudiʼnu lugar chindá Stiidxaʼ Dios ndaaniʼ ladxidoʼno. Nga runi naquiiñeʼ guidúʼndanu Biblia guiráʼ dxi ne guiníʼ íquenu ni zeeda luni. Oracaruʼ ziuʼnu nayecheʼ ora guni predicarnu ne zabeendunu ni galán (Jer. 15:16).

21. ¿Xi zanda gúninu para cadi guireʼnu gana?

²¹ Sicaríʼ guníʼ Deborah, hermana ni bizéʼtenu lu párrafo tapa: «Ora rireʼnu gana, zanda iquiiñeʼ Binidxabaʼ ni para guxheleʼ laanu de Dios». Peru jma napa Jehová poder que Binidxabaʼ. Nga runi, intiica cosa cuee gana laanu, gábinu Jehová xi peʼ cayuni sentirnu ne guinábanu laa gacané laanu. Zacanebe laanu ora guireʼnu gana purtiʼ imperfectu laanu ne rucheʼnu. Qué zusaanabe laanu ora gaca huaranu. Laaca zacanebe laanu guidúʼyanu ca privilegiu ca casi modo ruuyabe cani ne chuʼnu nayecheʼ ora guni predicarnu. Ne cadi guiaandaʼ laanu qué zusaana de gacané Jehová laanu para cadi guireʼnu gana.