NẠ KALOGHOMA ika mem dị ogey oyaghirị anạ agẹ ḍinyạ okparamhị aruom nyinhạ? APọl agẹ ni ḍidọ aḍinyạ phọ aḍiẹn phọ aghiọm onyọ amatuạn phọ Timoti. Aḍinyạ phọ aḍiẹn phọ kụ edị nyiidiphọ oghol bọ mọ 2 Timoti. Iikia i/lo, r’ikpukpụ aTimoti awạ ni esi dị koo/ḅaghamhị nyodị orọl aạl omhiịn iyaạr phọ ooḅi oyaghirị phọ odị agẹ bọ aruom nyodị. Eeni aTimoti aatughiạn ni siphẹ olhoghi phọ odị mọ: ‘APọl akạr odi ika? Odị amoọgh ni oroma dị kulhoghonhaạn imhị ḍighaạgh oḍighi oḍighi phọ ungọ bọ imhị ḍughụm? Aḍinyạ phọ aḍiẹn phọ ketue ni ilhoghonhaạn imhị ḍighaạgh ogbạ ikpo onhụ phọ r’omhaạr itughemhị ḅilhẹ r’orue olhoghonhaạn aḍighaạgh bunhọn ḍughụm?’ Idiphọ yira komiịn bọ ni, aTimoti amhiịn ni ophanyanhaạn asipuru phọ iphẹn phọ r’idị epelhom siphẹ siẹn aḍinyạ phọ ogẹ bọ oruom nyodị emhạn bọ maạr. Kuolọ nyiidiphọ, ophụr ooḅeghiọn iphurukpu ikpanhạ ikpo oroma dị edi siẹn aḍinyạ phọ, dị ketue ilhoghonhaạn aani iyira ḍighaạgh.

Mem mọ aTimoti amhiigh bọ aạl emhiighom aḍinyạ phọ, odị amhiịn mọ aPọl akạr kụ amoọgh ogbolhomaam odị. R’eenyuụm ni, aPọl amhạgh nyodị mọ, “ooḅi oọny phọ amị.” (2 Tim. 1:2 NWT.) Ii, eeni aTimoti mapel li 30 asiạ mem mọ ogẹ bọ ḍinyạ phọ oruom nyodị lhạ phọ 65 C.E., odị maḍighi ni okumor oye ookpomoghan dị masilor ri. Odị makumuan ni r’aPọl esi asiạ dị repel li 10 asiạ, kụ matuughạ ni ibadị araraạr.

Ikparamhị ni Timoti olhegheri mọ aPọl rakparạm ni imhinhimhiịn eten dị ekpẹ oḍuomolhoghi. APọl odi ikoli epẹ Rom, kụ moọny amem kokiigh nyodị. (2 Tim. 1:15, 16; 4:6-8) ATimoti amhiịn ni akpọ oḅio phọ aPọl amhoọgh bọ loor esi iphẹn aPọl aḅẹm bọ mọ, mị akiọm ni ghisigh “rakparạm oomo phọ iminimiịn phọ.” (2 Tim. 2:8-13) Idiphọ aTimoti, eḍeenhaan ookiạ okparạm mọ aPọl ketue ni ikparamhị aani iyira.

APọl aroma Timoti mọ odị asighẹ oḍighi phọ Enhaạn angọ bọ nyodị idiphọ iyaạr dị emhạn maạr. APọl awạ dị aTimoti ‘katiitieni niạn aruunmo [uwaloor] phọ Enaạn engọ bọ’ nyodị. (2 Tim. 1:6) APọl aḍighinhom ekpo onhụ aGrik phọ khaʹri·sma mọ “aruunmo.” Ekpo onhụ aGrik phọ ephẹn phọ remạ ghan inmo dị i/si oye phọ omhoọgh. ATimoti amhoọgh inmo phọ iphẹn phọ mem mọ osaḅạr bọ  nyodị okumuan eten dị egbatanhaạn siphẹ ookpomhoghan phọ.—1 Tim. 4:14.

ATimoti kaḍighinhom eeghe inmo phọ iphẹn phọ? Idiphọ odị rabạl bọ ikpo onhụ phọ iphẹn eḅẹm bọ mọ “tiitieni niạn” phọ, eeni odị aatughiạn ni ipẹ eeni amem rootieni ghan bọ iiḅu aniạn. Oḍighi idị iiḅu phọ kemaạr eda eḅilhẹ ekologhọl pọ kewạ dị kootieni ghan. Oniin onyọ amisonarị aḅẹm mọ ekpo onhụ aGrik phọ (a·na·zo·py·reʹo) aPọl aḍighinhom bọ remạ ghan “okpoonhị, oomhanhamhi, ophulha aniạn,” iduọn phọ pọ “omhoọgh oophugh oḍighi iyaạr.” Esi iduọn phọ, aPọl aroma ghan Timoti mọ: ‘kumuanham r’oophugh oḍighi phọ ongọ bọ nyinhạ!’ Ḍio arodon ewạ kẹn dị yira kokumuanham r’oophugh oḍighi phọ Enhaạn.

Iduọn odị rabạl bọ kaghiọm ghisigh ḍinyạ phọ ooḅi oyaghirị phọ odị agẹ bọ aruom nyodị, aTimoti aḅilhẹ ni amhiịn inhọn ikpo onhụ dị keloghonhaạn nyodị ḍighaạgh siphẹ arukumuan phọ odị. APọl agẹ mọ: “Maạr aphạm igey phọ ipẹ uwaloor iigbia phọ odi bọ loor phọ ayira maḅọgh bọ alọgh ḍighaạgh phọ anạ.” (2 Tim. 1:14) Eeghe kụ iyaạr phọ oḅọgh bọ ongọ? Eeghe kụ iyaạr phọ oḅọgh bọ olhọgh ḍighaạgh aTimoti? Siphẹ ekpịgh phọ 13, aPọl aghaạph aghol “igey ikpo onhụ phọ,” edi bọ siphẹ aḍinyạ iigbia phọ. (2 Tim. 1:13) Idiphọ onyọ aKristẹn, iwạ mọ aTimoti atughemhị igey phọ buphẹ odi bọ siphẹ ookpomhoghan phọ r’abuphẹ odi bọ siphẹ ekool phọ abidị. (2 Tim. 4:1-5) Ḅilhẹ kẹn, umạ ni Timoti oḍighi oniin okumor oye ookpomhoghan dị kapogh iyool phọ Enhaạn. (1 Pit. 5:2) ATimoti kamaạr apạm ipẹ oḅọgh bọ ongọ nyodị—iduọn phọ pọ igey phọ ipẹ odị katughemhị bọ bunhọn—esi obeḍenhọm uwaloor iigbia phọ aZihova r’Ekpo Onhụ phọ Odị.—2 Tim. 3:14-17.

Ḍio arodon, moḅọgh ungọ aani iyira kẹn igey phọ iphẹn phọ yira rotughemhị ghan bọ bunhọn. (Mat. 28:19, 20) Yira kotue ni opamanhạm r’osereghiạn ipẹ moḅọgh bọ ungọ iyira esi ooḅereghị ghan r’ogbor ghan otuughạ Ekpo Onhụ phọ Enhaạn. (Rom 12:11, 12; 1 Tim. 4:13, 15, 16) Yira kotue kẹn omoọgh eepoogh okumuan idiphọ okumor oye ookpomhoghan obobọ idiphọ oniin odị rakumuan aani rukumuan oomo amem mọ. Idọ aroopoogh phọ iphẹn phọ inyu iyira osooromhi aloor, ḅilhẹ r’obeḍenhọm Enhaạn ilọ olhoghonhaạn aḍighaạgh. Esi iduọn phọ, yira kotue ni omaạr opạm, obobọ okoph, ipẹ oḅọgh bọ ungọ iyira esi osereghiạn kụ obeḍenhọm aZihova ilọ olhoghonhaạn aḍighaạgh.

Oḍighi phọ ophọn phọ oḅọgh bọ ongọ Timoti o/gbolhomaam nyodị bịn. Kuolọ iḅarạm ni bunhọn kẹn. Pọ kụ iyaạr phọ aPọl aḅenhị bọ Timoti mọ: “Sighẹ ni ikpo onhụ phọ ipẹ nạ anaghạn ghan bọ dị mị aghaạph bọ . . . aḅọgh alọgh ḍighaạgh awe lọ nạ aḍuom ologhi, bulọ kotue ni otughemị aani bunọn.” (2 Tim. 2:2) Ii, iwạ mọ aTimoti atughemhị aani bunhọn ipẹ motughemhị bọ nyodị. Kụ iḍighi kụ, emạn maạr agey ḍio arodon dị abupoghom siẹn ookpomhoghan phọ kokparaghạ oḍighi aani igina phọ. Ogey opoghom ra/booghinhaạn ghan olhegheri iyaạr odị bunhọn. Kparipẹ ghụn, ratughemhị aani ghan bunhọn ilọ oḍighi aani iyaạr phọ. Odị ra/kiilhaan ghan mọ komaạr obobọ oḍighi opu nyodị. Odị ra/tughemhị ghan bidị ilọ oḍighi bịn. Odị raloghonhaạn ghan ḍighaạgh buphẹ odị ratughemhị bọ olhegheri ghan ilọ oḍighi ḅilhẹ r’oḍighi onyọ aKristẹn—dị masilor. Eḍighi iduọn phọ, bịn awe phọ ‘oduọm bọ olhoghi” phọ, odị matughemhị bọ koḍighi ni iyaạr asuọ engọ ookpomhoghan phọ.

Iikia i/lo, aTimoti asereghiạn ni ḍinyạ okparamhị phọ aPọl agẹ bọ aruom nyodị. Gbiom olhoghi idị aTimoti aạl kụ aḅilhẹ aạl oroma phọ ophọn phọ kụ aḅilhẹ ghan agbirima ilọ ipẹ odị katue bọ asighẹ aḍighinhom siphẹ oḍighi phọ ongọ bọ nyodị.

Ewạ mọ yira osighẹ oroma phọ ophọn phọ oḍighinhom aani. Ika? Yira kolọgh inyaạm ootieni niạn aruunmo phọ ayira, omaạr opạm ipẹ oḅọgh bọ ungọ iyira, ḅilhẹ otughemhị aani bunhọn ipẹ yira molhegheri bọ. Yira oḍighi iphẹn aPọl aḅenhị bọ Timoti, yira kotue ni oḍighi “k’ikparạ k’ikpuru oḍighi phọ [ayira].”—2 Tim. 4:5.