NƆ AO xlɔ vevi ɖe ŋwlɛ ŋsɛndoamu lɛta ɖaɖa eo ɖe, lé ewanɔ nɔ eo doɔ? Kristotɔ nukplavi Timɔte xɔ lɛta cɛ han so apotru Pɔlu gbɔ, lɛta cɛ wovayɔnɔ le Bibla mɛ gbɛ mɔ 2 Timɔte. Kankandojitɔɔ, Timɔte aji veviɖe mɔ yeanɔ texwe ci yí eɖa ɖo le keŋ ahlɛn enyɔ ci ye xlɔ vevi lɔ nu ɖaɖa ye. Taŋfuin Timɔte abu tamɛ kpɔ mɔ: ‘Lé Pɔlu le doɔ? Éɖo nukplamu ɖe anaŋ yí akpedo ŋnu le anyi dɔdoashi lɔwo mɛa? Nukplamu lɔ atɛnŋ akpedo ŋnu yí lé ŋwanɔ sumɔsumɔdɔ lɔ do koɖo lé ŋkpenɔdo mɛbuwo nu do anyɔ dojia?’ Shigbe lé mìakpɔɛ nɛɔ, Timɔte kpɔ ɖoŋci nɔ nyɔbiɔse cɛwo koɖo sugbɔ buwo le wema vevi ci woŋwlɛ ɖaɖɛ mɛ. Le nyɔta cɛ mɛɔ, mìakpɔ nukplamu nywi ɖewo ciwo yí atɛnŋ akpedo mì nu le wema cɛ mɛ.

Ci Timɔte tɔ tɔtɔmɛ hlɛnhlɛn nɔ wema lɔɔ, étɛnŋ kpɔɛ zeɖeka mɔ, Pɔlu sɔ ɖe le ji nɔ ye nyao. Pɔlu sɔ lɔnlɔn yɔɛ mɔ “Evinyɛ lɔnlɔntɔ.” (2 Tim. 1:2) Exwe 65 han mɛ K.H. yí Timɔte xɔ wema cɛ. Ényi Kristotɔ hamɛmɛshinshin kpɔnutɔxu vɔ, yí kankandoji li mɔ, áɖo exwe 30 han hwenɔnu. Ewu exwe 10 yí ewakɔ dɔ koɖo Pɔlu, ékpla nu sugbɔ so gbɔ.

Ci Timɔte se mɔ Pɔlu dokɔ ji le funkpekpewo mɛ le egbejinɔnɔ mɛɔ, ado ŋsɛn yi sugbɔ. Wolé Pɔlu do ga le Rɔma yí dajinjin o, woawui. (2 Tim. 1:15, 16; 4:6-8) Timɔte tɛnŋ kpɔɛ mɔ Pɔlu nyi dɔngbetɔ, ɖo énu mɔ: “Ŋkpɔtɔ dokɔ ji le nushianu mɛ.” (2 Tim. 2:8-13, NWT) Shigbe Timɔte nɛɔ, mìaxɔ ŋsɛndoamu so Pɔlu jidodo kpɔwɛ nywi lɔ mɛ.

Pɔlu do ŋsɛn Timɔte mɔ, yɛ le sɔ dɔdoashi ci eɖo le Mawu sɛnsɛn mɛ mɔ yɛnyi enuvevi ŋtɔŋtɔ. Pɔlu ji mɔ Timɔte le “do zo Mawu nunana ci yí le” mɛ. (2 Tim. 1:6, NWT) Pɔlu zan Grɛki nyɔgbe ci yí nyi khaʹri·sma nɔ “nunana.” Grɛki nyɔgbe lɔ gɔnmɛ yí nyi nunana faa ci wodeje nɔ o, enyi enu ci wodecu fɛn do ta nɔ o. Timɔte xɔ nunana cɛ hwenu wosɔɛ nɔ awa sumɔsumɔdɔ vevi ɖeka le hamɛ lɔ mɛ.—1 Tim. 4:14.

Nyi Timɔte asɔ nunana lɔ waɔ? Nɔ éhlɛnkɔ nyɔgbe ci yí nyi ‘do zo yi mɛɔ,’ étɛnŋ bu tamɛ kpɔ so ezo ci amɛwo bɔnɔ le axomɛ yí evatrɔnɔ zokan hweɖewonu.  Woɖo atran zo lɔ do nɔ aje keŋ abi doji. Enyɔgɔnmɛɖewema ɖeka nu mɔ Grɛki dɔwanyɔ (a·na·zo·py·reʹo) ci Pɔlu zan gɔnmɛ yí nyi “fla zo, tran zo do.” Le kpɔwɛnyɔnunu mɛɔ, yi gɔnmɛ yí nyi mɔ “woado zo amɛɖeki do edɔ ɖe wawa nu.” Le nyɔnɔnwi mɛɔ, Pɔlu nakɔ nukplamu Timɔte mɔ: “Sɔ zo do ao dɔdoashi lɔ nu!” Egbɛɔ, mìwo can, mìɖo awɛ ahan; mìɖo awa mìwo sumɔsumɔdɔ lɔ koɖo ezolelanmɛ.

Ci Timɔte kpɔtɔ le wema ci yi xlɔ vevi sɔ ɖaɖɛ hlɛnkɔɔ, évakpɔ nyɔgbe ɖekawo ciwo yí akpedo nu nɔ yi sumɔsumɔdɔ lɔ azɔn ni nywiɖe. Pɔlu ŋwlɛ mɔ: “Glɔn ta nɔ enu nɔnui cɛ ci mìsɔ do ashi nɔ eo to gbɔngbɔn kɔkɔɛ ci yí le mì mɛ ji.” (2 Tim. 1:14, NWT) Nyi yí nyi enu nɔnui cɛɔ? Enuvevi ci wosɔ do ashi nɔ Timɔteɔ? Le kpukpui ci yí do ŋkɔ mɛɔ, Pɔlu xo nuxu so “nukplamu nywi” ci yí nyi nyɔnɔnwi ci yí le Enuŋwlɛŋwlɛ lɔwo mɛ nu. (2 Tim. 1:13) Ci Timɔte nyi Kristotɔ sumɔsumɔdɔwatɔɔ, éɖo adra nyɔnɔnwi lɔ nɔ mɛ ciwo yí le hamɛ lɔ mɛ koɖo mɛ ciwo yí le yi nyigbanmama mɛ. (2 Tim. 4:1-5) Gbesɔ kpe niɔ, woɖo Timɔte yí enyi hamɛmɛshinshin keŋ akplɔ Mawu lɛngbɔ ha lɔ. (1 Piɛ 5:2) Timɔte atɛnŋ aglɔn ta nɔ yi nu nɔnui lɔ ci yí nyi nyɔnɔnwi ci ekplanɔ amɛwo nɔ éɖoŋ do Yehowa gbɔngbɔn kɔkɔɛ lɔ koɖo Yi Nyɔ lɔ nu.—2 Tim. 3:14-17.

Egbɛɔ, wosɔ nyɔnɔnwi ci mìkplanɔ mɛbuwo do ashi nɔ mìwo can. (Mt. 28:19, 20) Mìatɛnŋ akpɔtɔ alenɔ bu nɔ nyɔnɔnwi vevi cɛ nɔ mìdonɔ gbe ɖaɖa mamimami yí kplanɔ Mawu Nyɔ lɔ gashiagamɛ. (Rɔm. 12:11, 12; 1 Tim. 4:13, 15, 16) Dɔdoashi buwo tɛnŋ le mì shi yí mìasumɔkɔ shigbe hamɛmɛshinshin alo gashiagamɛ sumɔsumɔdɔwatɔ nɛ. Enu nɔnui cɛ han ɖo ana mìasɔ mìwoɖekiwo hwenɔ yí aɖoŋ do Mawu nu mɔ yɛakpedo mì nu. Eyi taɖo mìatɛnŋ aglɔn ta nɔ mìwo nu nɔnui lɔ nɔ mìsɔɛ mɔ yɛnyi enuvevi yí ɖoŋ do Yehowa nu mɔ yɛakpedo mì nu mìale bu ni.

Akpaxwe bu nɔ edɔ ci wosɔ do ashi nɔ Timɔte yí nyi mɔ ana kpla mɛbuwo nɔ woawa edɔ ci ewakɔ hɛnnɛ. Eyi taɖo Pɔlu do ŋsɛn Timɔte mɔ: “Enyɔ ciwo yí ese so ŋgbɔɔ, . . . sɔ wo do ashi nɔ egbejinɔtɔwo, nɔ wowo can, woaje nywiɖe yí akpla nu mɛbuwo.” (2 Tim. 2:2, NWT) Ɛɛ, enu ciwo pleŋ wokpla Timɔteɔ, yɛ can ɖo akpla wo nɔvi buwo. Ele veviɖe mɔ enujikpɔtɔ ɖeshiaɖe awɛni ahan le Kristo hamɛ lɔ mɛ le egbɛmɛ hɛnnɛ. Enujikpɔtɔ nywi dehwannɔŋ yí asɔ edɔ ci enya wawa ɖɛ wla do amɛwo o. Ewaɖeɔ, ékplanɔ dɔ lɔ mɛbuwo nɔ woatɛnŋ awɛ. Devɔnnɔ mɔ amɛwo avanya dɔ lɔ wu ye alo aɖo nujikpekpe wu ye o. Eyi taɖo enujikpɔtɔ dekplanɔ tɔtɔmɛ nɔ dɔ ɖe amɛwo kpoŋ o. Éjinɔ mɔ yeakpedo mɛ ciwo yenakɔ kpla nu nɔ woasɔnɔ gbeta nywi yí aɖo nugɔnmɛsese, yi gɔnmɛ yi mɔ woashin le gbɔngbɔnmɛ. To mɔ cɛ jiɔ, “egbejinɔtɔ” ciwo yí ekpla nu atɛnŋ avanyi nyɔna gangan nɔ hamɛ lɔ.

Kankandojitɔɔ, ŋsɛndoamu lɛta cɛ ci Timɔte xɔ so Pɔlu gbɔ ale veviɖe ni sugbɔ. Mìatɛnŋ akpɔ lé atrɔ ahlɛnkɔ nukplamu vevi lɔwo yí abukɔ tamɛ kpɔ so wo nu yí amɔ lé yeawɛ azan wo nywiɖe le ye dɔdoashiwo mɛ ma.

Mìwo can, mìji mɔ mìawa do nukplamu cɛwo ji. Lé mìawɛ doɔ? Mìatɛnŋ aje agbla ado zo mìwo nunana lɔ mɛ, aglɔn ta nɔ mìwo nu nɔnui lɔ yí asɔ mìwo nutɔxukpɔkpɔwo koɖo enu ciwo mìnya do ashi nɔ nɔvi buwo. Eyi shigbe lé Pɔlu nui nɔ Timɔte nɛɔ, mìatɛnŋ ‘awa Mawu dɔwavi dɔwo pleŋ.’—2 Tim. 4:5.