ЈУУК најыгардаҥ самара алган болзоор, слер нени сезедеер? Андый ла самараны апостол Павелдеҥ Тимофей деп христианин алган. Агару Бичикте бу самара 2 Тимофейге деп адалган. Тимофей бу самараны алып, оны кычырарга, капшай ла амыр јер бедиреген болор. Ол байла мынайып сананган: «Павел меге нени бичиди не? Ол бойыныҥ керектери керегинде бичиген болор. Айса молјуларымды бӱдӱрерге јакшы јӧптӧр берген болор. Эмезе канайып јакшы јарлаарын ла ӧскӧ улусты канайып ӱредерин бичиген болор». Бу самарадаҥ Тимофей бойыныҥ сурактарыныҥ карууларын алган ла кӧп баалу шӱӱлтелер тапкан. Је эмди бу шӱӱлтелердиҥ кезиктерин кӧрӱп ийектер.

Бу самараныҥ баштапкы ла сӧстӧринеҥ Павелдиҥ Тимофейге сӱреен каруу болгоны кӧрӱнет. Павел Тимофейди «сӱӱген уулым» деп, эрке айдып јат (2 Тим. 1:2, ЈК 2003). Тимофей бу самараны б. э. 65-чи јылы кирезинде алган. Ол тушта ол 30 јашты ажып калган ченемелдӱ аксагал болгон болор. Тимофей Павелле 10 кире јылдыҥ туркунына кожо болгонынаҥ улам, кӧп немеге ӱренген.

Тимофей Павелдиҥ ченелтелерде чындык болгонын билип, сӱреен тыҥ сӱӱнген. Не дезе, бу самараны бичиген тушта Павел тӱрмеде болгон ло ӧлтӱртерин сакыган (2 Тим. 1:15, 16; 4:6—8). Је андый да болзо, оныҥ сӧстӧринеҥ бек кӱӱн-санаазы кӧрӱнген. «Ончо немеге чыдажып јадым» — деп, ол бичиген (2 Тим. 2:8—13). Павелдиҥ бу сӧстӧри ол ӧйдӧ Тимофейдиҥ кӱӱн-санаазын кӧдӱрген, бӱгӱнги де кӱнде бу сӧстӧр бистиҥ кӱӱн-санаабысты кӧдӱрет.

Павел Тимофейди Кудайдаҥ алган ижин тыҥ баалазын деп кӱӱнзеткен. Ол бойыныҥ најызын Кудайдаҥ берилген јайалтазын «бойыҥда ӧскӱр [«от чылап кӱйдӱрзин», ЈТ]» деп сураган (2 Тим. 1:6). Павел мында ха́рисма деп грек сӧс тузаланып јат. Бу сӧс «јалы јок тегин сыйды» темдектеп јат. Айдарда бу сый кижиниҥ ижи учун алган кайралын кӧргӱспей јат. Тимофей бу сыйды христиан јуунда аҥылу ишке кӧстӧлӧрдӧ алган (1 Тим. 4:14).

 Тимофейге бу сыйла канайып тузаланар керек болгон? Павелдиҥ Тимофейге «от чылап кӱйдӱр» деген сӧстӧри ого айылдагы ӧчӱп бараткан косторды эске алындырган болор. От кӱйӱп, айылдыҥ ичи јылый берзин деп, ӧчӱп бараткан косторды кӱйдӱрер керек. Бир сӧзлик аайынча, Павелдиҥ тузаланган аназопире́о деп глагол, грек тилдеҥ кӧчӱрзе, «кӱйдӱрерин, кӱйбӱредерин эмезе јалбыштандырарын» темдектейт. Анайда ок бу глаголдо ишти «кӧдӱриҥилӱ ле эрчимдӱ» эдер деп учуры бар. Ӧскӧртӧ айтса, Павел Тимофейге: «Сеге берилген јакылтаны акту јӱрегиҥнеҥ бӱдӱр!» — деп айткан. Биске де андый ок болор керек — јарлаар иште кӱйӱп турар керек.

Павелдиҥ најызына берген база бир јӧби: «Сеге ижемјилеген јакшыны бойыбыста јӱрген Агару Тынла чеберле» (2 Тим. 1:14). Тимофейге не ижемјилелген? Павел он ӱчинчи ӱлгерде, «кемжикпеген [«ойгор», ЈТ] сӧстӧр» деп айдат (2 Тим. 1:13). Бу Агару Бичиктеги чындык. Тимофейге бу чындыкка јуундагы ака-эјелерди ӱредип, ӧскӧ дӧ улуска јарлаар керек болгон (2 Тим. 4:1—5). Анайда ок Тимофей јуунда аксагал болуп иштеген ле Иегованыҥ койлорын кичееген (1 Петр 5:2). Ого «ижемјилеген јакшыны» эмезе чындыкты кичеерге, Иегованыҥ агару тынына ла оныҥ Сӧзине иженер керек болгон (2 Тим. 3:14—17).

Бӱгӱн бистиҥ ончобыска чындыкты база бӱдӱмјилеп салган. Бу чындыкка бис ӧскӧ улусты ӱредип јадыс (Матф. 28:19, 20). Бу чындыктыҥ баалу болгонын биске качан да ундыбас керек. Је мыны ундыбай јӱрерге, биске Иеговага јаантайын мӱргӱп, оныҥ Сӧзин шиҥдеер керек (Рим. 12:11, 12; 1 Тим. 4:13, 15, 16). Биске башка-башка молјулар берилген. Кем де аксагал болуп иштейт, а та кем де ӧйин толо берип иштейт. Биске чындыкты бӱдӱмјилегени бисти јобош болорго ло бу ишти Иегова јогынаҥ бӱдӱрип болбозыс деп ундыбаска кӱӱнзедет. Оныҥ учун биске бӱдӱмјилеп салган баалу чындык јӱректеристе ӧчпӧзин деп, јаантайын Иегованыҥ болужына иженип јӱректер!

Тимофейге бойыныҥ билгирлериле, ченемелиле ӧскӧ ака-карындаштарла ӱлежер керек болгон. Павел ого айткан: «Ӧскӧ дӧ улусты ӱредип койор аргалу болзын деп... менеҥ укканыҥды чындык улуска јетир» (2 Тим. 2:2). Павел Тимофейге алган билгирлериле ӧскӧ ака-карындаштарла ӱлежери јаан учурлу деп эске алындырган. Бӱгӱнги кӱнде бу јӧпти христиан јуунныҥ кажы ла аксагалына тузаланар керек. Јакшы аксагал бойыныҥ билгирлериле ӱлежерге кысканбай јат. Оныҥ ордына ол ӧскӧ ака-карындаштар бойыныҥ ижин јакшы бӱдӱрзин деп, бойыныҥ јаан ченемелиле ӱлежип јат. Аксагал оныҥ ӱредип турган ӱренчиги, ого кӧрӧ оноҥ артык болуп калар деп санааркабас учурлу. Оныҥ учун оныҥ амадузы — јӱк ле ишти канайып бӱдӱрерине ӱредип салары эмес, је бӱдӱмјизи бек, кӧгӱзи тереҥ ле бойыныҥ молјузын јакшы бӱдӱрерине ӱредип салары. Ол тушта ӱредип салган «чындык улузыс» јуунга сӱреен јаан туза экелер.

Тимофей Павелдиҥ бу јылу самаразын тыҥ баалаган деп алаҥзыбай јадыс. Ол андагы баалу јӧптӧрди канча катап кычырып, оны канай јакшы тузаланар деп шӱӱп сананган болор.

Бис Павелдиҥ самаразыныҥ бу јӧптӧрин база тузаланарга кӱӱнзейдис. Биске бӱдӱмјилеген бу сыйды «от чылап кӱйдӱрип», оны баалап, бойыстыҥ билгирлерисле, ченемелисле ӧскӧ ака-карындаштарла ӱлежерге албаданарыс. Анайып бис «бойыҥныҥ ижиҥди [«толо кеминде», ЈТ] бӱдӱр» деп, Павелдиҥ Тимофейге берген јӧбин бӱдӱрип саларыс (2 Тим. 4:5).