PASTI las do rohatta mandapot surat na patoguhon sian donganta. Hea do si Timoteus najolo mandapot surat sian Apostel Paulus. Saonari dibahen do surat i di Bibel, goarna bukku 2 Timoteus. Pasti dilului si Timoteus do inganan na sepi tikki naeng manjaha surat i. Olo do ra sukkun-sukkun roha ni si Timoteus, ‘Boha do nuaeng kabar ni si Paulus? Adong do nuaeng poda ni si Paulus asa lam denggan au mangulahon tugasson? Saran aha do nuaeng na dilehon si Paulus asa marhasil au di ulaon marbarita dohot mangurupi akka dongan di huria?’ Dialusi do sude sukkun-sukkun i disurat ni si Paulus i. Saonari taida ma piga-piga poda ni si Paulus na adong disurat i.

Tikki dijaha si Timoteus surat i, boi do dirasahon ibana na jonok hubungan ni nasida. Alana dijou si Paulus do ibana, “anak na huhaholongi”. (2 Tim. 1:2) Taon 65 M do ra dibahen si Paulus surat i. Hira-hira marumur 30 taon ma si Timoteus tikki i jala nungnga gabe sintua na berpengalaman ibana. Nungnga lobi sian 10 taon ibana marale-ale dohot si Paulus jala nungnga godang ibana marsiajar sian si Paulus.

Dipatogu do si Timoteus ala toktong setia si Paulus nang pe godang sitaononna. Tikki dipenjara si Paulus di Rom, diratte do ibana jala naeng dihukum mate nama ibana. (2 Tim. 1:15, 16; 4:6-8) Boi do diida si Timoteus na toktong togu si Paulus, ala didok do di suratna i, “Sabar do ahu manaon hasusaan.” (2 Tim. 2:8-13) Songon si Timoteus, hita pe saonari boi do dipatogu sian pengalaman ni si Paulus on.

Dipaingot si Paulus do si Timoteus molo tugas sian Jahowa, i ma tugas na massai arga. Didok si Paulus do tu si Timoteus, ‘Bahen ma marsigorgor di roham silehon-lehon ni Debata na adong di ho.’ (2 Tim. 1:6; surat na di toru) Hata Junani “silehon-lehon” na dipakke si Paulus dison, i ma kharisma. Lapatan ni hata on, i ma gratis jala dang alani upaya ni halak na manjalo boi dapotna i alai alani asi ni roha ni na mangalehon do. Nungnga dijalo si Timoteus silehon-lehon on tikki dipillit ibana gabe pengawas.​—1 Tim. 4:14.

 Aha do na didok si Paulus tu si Timoteus taringot silehon-lehon on? Tikki didok si Paulus ‘bahen ma marsigorgor di roham’, olo do ra na diingot ibana gara ni api. Boi do marsigorgor api sian gara on jala lam mohop. Hata Junani na dipakke si Paulus di ayat on, i ma anazopyreo. Lapatanna marsigorgor muse, manang lam semangat jala marlas ni roha mangulahon sada tugas. Jadi na didok si Paulus tu si Timoteus, i ma ‘Bahen ma na dumenggan mangulahon tugasmi.’ Hita pe saonari porlu do semangat mangulahon tugasta.

Dilanjutton si Timoteus ma muse manjaha surat i. Dijaha ibana ma poda na denggan asa marhasil ibana di ulaon marbarita. Didok si Paulus do, “Jaga ma arta na arga na pinasahatna tu ho marhite tondi parbadia na adong di hita.” (2 Tim. 1:14) Arta aha do na dipasahat tu si Timoteus? Di ayat 13 didok si Paulus do asa diihutton si Timoteus “poda na sintong”, i ma hasittongan na adong di Surat na Badia. (2 Tim. 1:13) Jadi porlu do paboaon ni si Timoteus hasittongan di huria dohot tu akka halak na so manomba Jahowa dope. (2 Tim. 4:1-5) Jala si Timoteus pe nungnga dipillit gabe sintua di huria lao marmahan biru-biru ni Debata. (1 Ptr. 5:2) Asa boi dijaga si Timoteus arta naung dipasahat tu ibana, ikkon diasahon ibana do Jahowa jala ikkon torus do diparsiajari ibana Surat na Badia.​—2 Tim. 3:14-17.

Hita pe saonari adong do tugasta, i ma mangajarhon hasittongan tu akka halak. (Mat. 28:19, 20) Asa torus taargai tugasta on, ikkon tatangiakkon do i jala ikkon torus do hita marsiajar Bibel. (Rom 12:11, 12; 1 Tim. 4:13, 15, 16) Adong do ra sian hita na mandapot tugas tambahan, misalna gabe sintua manang gabe pelayan sepenuh waktu. Molo dapotta tugas sisongon i, ikkon serep do rohatta jala taasahon ma Jahowa. Jadi ikkon mangasahon Jahowa do hita tikki mangulahon tugasta jala ikkon taargai do i, asa boi tajaga arta naung dipasahat tu hita.

Dang tolap ni si Timoteus molo holan sahalakna mangulahon tugasna i. Porlu do ibana diurupi na asing. Alani i ma didok si Paulus tu ibana, “Angka na binegem sian ahu . . . pasahat ma i tu angka baoa na marsihohot jala na malo mangajari na asing.” (2 Tim. 2:2) Aha naung diparsiajari si Timoteus sian na asing, ikkon ajarhononna do i muse. Saonari denggan do molo ditiru akka sintua si Timoteus. Unang ma ditahan-tahan sintua lao mangalatik akka dongan na asing. Alai ikkon olo do halak i mangajari na asing asa boi mandalatton tugas i. Dang mabiar ibana gabe unjago manang ummalo dongan na dilatikna i. Tikki mangalatik sasahalak, ajarhon ma sude na boi mangurupi ibana marhasil mangulahon tugasna i. Jala urupi ma ibana asa lam togu parale-aleonna tu Jahowa. Molo dibahen akka sintua songon i, boi ma akka “baoa na marsihohot” on mangurupi di huria.

Pasti disippan-sippan si Timoteus do surat ni si Paulus on. Dijaha ibana ma i muse jala dirimangi, asa boi ibana lam denggan mangulahon tugasna.

Hita pe lomo do rohatta mangihutton poda on. Songon dia carana? Tabahen ma marsigorgor di rohatta silehon-lehon i, tajaga ma arta naung dipasahat tu hita, jala talatik ma na asing. Molo taulahon i boi ma hita marhobas tu Debata sian nasa gogotta.​—2 Tim. 4:5.