?SƐ E le e janvuɛ kpa kun naan ɔ klɛ lɛtri blɛ e’n, wafa sɛ yɛ e wun yó e-ɔ? E si kɛ i sɔ’n yó e fɛ. Kɛ Pɔlu klɛli Timote i fluwa’n, kɛ i wun yoli i sɔ wie-ɔ. Lɛtri sɔ’n yɛle Timote fluwa nɲɔn su’n. E si kɛ, kɛ Timote ɲannin fluwa’n ɔ kunndɛli lika koun kun m’ɔ kwla tran lɛ kɛnngɛn i janvuɛ kpa sɔ’n i fluwa’n nun-ɔn. Atrɛkpa’n Timote usɛli i wun kɛ: ‘?Pɔlu i wun ti kpa? ?Afɔtuɛ benin yɛ ɔ́ wá mán min naan m’an kwla di min junman’n i kpa-ɔ? ?Lɛtri’n i nun ndɛ’n úka min naan m’an bo jasin fɛ’n i kpa naan m’an kle sran’m be like kpa wie kusu?’ Timote wunnin kosan kwlaa sɔ’m be su tɛlɛ’n kpɛkun ɔ wunnin afɔtuɛ kpakpa wie mun ekun lɛtri’n nun. Ndɛ akpasua nga nun’n, é wá kán afɔtuɛ wie mɔ be o lɛtri sɔ’n nun’n, be ndɛ.

Kɛ Timote boli fluwa’n i nun kannganlɛ bo’n, ɔ ka lɛ wunnin i wlɛ kɛ i ndɛ lo Pɔlu sakpa. Afin Pɔlu flɛli i kɛ i “awlɛn su ba.” (2 Tim. 1:2) Afuɛ 65 nun yɛ Pɔlu klɛli fluwa sɔ’n ko mannin Timote-ɔ. Kɛ ɔ́ yó sɔ’n, nn Timote le afuɛ 30 tra su yɛ i sa w’a tɔ asɔnun kpɛnngbɛn junman’n nun kpa. Afin ɔ nin Pɔlu be dili junman afuɛ 10 tra su. Blɛ sɔ’n nun’n ɔ suannin ninnge kpanngban.

Kɛ Timote tili i kɛ Pɔlu jran yalɛ kwlaa nga be kle i’n i ɲrun kekle’n, e si kɛ i sɔ’n wlɛli i fanngan. Afin blɛ sɔ’n nun’n, nn Pɔlu o bisua Rɔmun lɔ, yɛ ɔ́ ká kan bé kún i. (2 Tim. 1:15, 16; 4:6-8) Timote wunnin i wlɛ kɛ Pɔlu ti yakpafuɛ. Afin Pɔlu seli kɛ: ‘N jran kekle sa’n kwlaa nun.’ (2 Tim. 2:8-13) Kɛ Timote sa’n, Pɔlu i ajalɛ’n kwla wla e fanngan wie.

Pɔlu seli Timote kɛ ɔ bu junman nga Ɲanmiɛn fa mɛnnin i’n i like cinnjin. Pɔlu kunndɛ kɛ ‘like mɔ Ɲanmiɛn fa cɛli Timote’n ɔ yo naan ɔ jue kɛ sin sa.’ (2 Tim. 1:6) Kɛ Pɔlu kán like nga Ɲanmiɛn fa cɛli Timote’n i ndɛ’n ɔ fali Glɛki nun ndɛ mma Karisima’n yɛ ɔ fa kannin ndɛ’n niɔn. Ndɛ mma sɔ’n be fa kan like nga be fa cɛ sran kun kusu nn ɔ fataman kɛ sran sɔ’n ɲan like sɔ’n i ndɛ. Kɛ be fali junman cinnjin kpa kun wlali Timote i sa nun’n, i lɛ nun yɛ Ɲanmiɛn fali like sɔ’n cɛli i-ɔ.—1 Tim. 4:14.

 ?Ngue yɛ Pɔlu wlali Timote fanngan kɛ ɔ fa like nga Ɲanmiɛn fa cɛli i’n ɔ yo-ɔ? Fluwa’n nun’n, Pɔlu seli Timote kɛ ɔ “yo naan ɔ jue kɛ sin sa.” Atrɛkpa’n, kɛ Timote kánngan ndɛ mma sɔ’n nun’n, ɔ buli gbo nun sin’n i akunndan. Kɛ sran kun trɔ sin m’ɔ kunndɛman kɛ sin sɔ’n nuan’n, ɔ wlawla nun. Fluwa kun seli kɛ Glɛki nun ndɛ mma nga Pɔlu fa kannin ndɛ sɔ’n, be fa kan junman kun mɔ sran kun tu i klun di’n i ndɛ. Ɔ maan sɛ é kwlá sé’n Pɔlu seli Timote kɛ: “Tu ɔ klun di junman nga be fa man wɔ’n.” Andɛ’n ɔ fata kɛ e kusu e yo like kunngba’n wie. Yɛle kɛ e tu e klun e di junman nga be fa mannin e’n.

Kɛ Timote kánngan Lɛtri’n nun’n, ɔ wunnin ndɛ uflɛ m’ɔ kwla ukɛ i naan w’a di i junman’n i kpa-ɔ. Pɔlu seli kɛ: “Like kpa sɔ mɔ be fa mannin wɔ m’ɔ o e nun’n, maan Ɲanmiɛn wawɛ’n uka ɔ naan a nian su kpa.” (2 Tim. 1:14) ?Like cinnjin benin yɛ be fa mannin Timote-ɔ? Timote fluwa nɲɔn su’n i ndɛ tre 1 i mma 13 nun’n, Pɔlu kannin “ndɛ kpakpa” ndɛ. Ndɛ kpakpa sɔ mun yɛle ndɛ nanwlɛ m’ɔ o Ɲanmiɛn Ndɛ’n nun. Ɔ fata kɛ Timote kan ndɛ nanwlɛ sɔ’n kle be nga be o asɔnun’n nun’n, ɔ nin be nga be o gua su lɔ’n be wie. (2 Tim. 4:1-5) Asa ekun’n, Timote ti asɔnun kpɛnngbɛn. Ɔ maan ɔ fata kɛ ɔ nian Ɲanmiɛn i bua fa’n su kpa wie. (1 Piɛ. 5:2) Sɛ Timote waan ɔ́ nían like nga be fa mɛnnin i’n i su kpa’n, ɔ fata kɛ ɔ lafi Zoova i wawɛ’n nin i nuan Ndɛ’n be su kpa.—2 Tim. 3:14-17.

E kusu be fali like kpa kun mannin e. Like sɔ’n yɛle ndɛ nanwlɛ m’ɔ fata kɛ e kan kle sran mun’n. (Mat. 28:19, 20) Sɛ e srɛ Ɲanmiɛn kpɛkun e suɛn i nuan Ndɛ’n i nun like titi’n, é klé kɛ like nga be fa mannin e’n ti e cinnjin. (Rɔm. 12:11, 12; 1 Tim. 4:13, 15, 16) Sɛ e yo ninnge sɔ mun’n, é kwlá dí junman uflɛ asɔnun’n nun. Yɛle kɛ be kwla sie e asɔnun kpɛnngbɛn annzɛ e kwla di Zoova i junman’n blɛ kwlaa nun. Sanngɛ sɛ be fɛ i sɔ junman’n be man e’n, maan e yo wun ase kanfuɛ yɛ e fa e wla e guɛ i Zoova su. I liɛ’n ɔ́ úka e naan y’a kwla di junman sɔ’n i kpa titi.

Junman nga be fa mannin Timote’n i wie yɛle kɛ ɔ kle aniaan yasua’m be like naan be kusu be si junman ng’ɔ di’n i di wie. I sɔ’n ti’n, Pɔlu seli Timote kɛ: ‘Ndɛ nga n kannin be n kleli wɔ’n [...] fa wlɛ i be nga be ti nanwlɛfuɛ’n be sa nun naan be kusu be sa tɔ i klelɛ’n nun naan be kwla fa kle sran uflɛ.’ (2 Tim. 2:2) Pɔlu kpɛnnin Timote i wla kɛ like kwlaa ng’ɔ kleli i’n, maan ɔ fa kle aniaan yasua mun. Andɛ kusu’n, ɔ fata kɛ asɔnun kpɛnngbɛn’m be mian be ɲin be nian ajalɛ sɔ’n su wie. Asɔnun kpɛnngbɛn ng’ɔ si i junman’n i di kpa’n yɛle asɔnun kpɛnngbɛn ng’ɔ fiaman like ng’ɔ si i’n su’n. Sanngɛ like ng’ɔ si i’n ɔ fa kle i wiengu mun naan be kusu be si i wie. Srɛ kunmɛn i kɛ sɛ ɔ kle i wiengu’m be like’n bé sí junman ng’ɔ di’n i dí bé trɛ́ i ti’n ɔ kleman be like. Asa ekun’n, sɛ i waan ɔ́ klé sran kun i like’n ɔ miɛn i ɲin kle i kpa naan ɔ si i kpa. I liɛ’n bé sú Ɲanmiɛn kpa. Kpɛkun “sran nga be ti nanwlɛfuɛ” sɔ m’ɔ kleli be like’n bé kwlá úka asɔnunfuɛ’m be kpa.

E si kɛ lɛtri nga Pɔlu klɛli Timote’n i nun ndɛ’n yoli Timote i fɛ kpa. Asa’n e si kɛ ɔ kanngannin nun kpɛ sunman yɛ ɔ buli su akunndan naan w’a wun wafa ng’ɔ kwla nanti afɔtuɛ nga be o nun’n be su’n.

E kunndɛ kɛ é nánti afɔtuɛ sɔ’m be su wie. ?Wafa sɛ yɛ e kwla yo sɔ-ɔ? Ɔ fata kɛ e di junman kekle kpa naan like nga be fa mannin e’n ɔ jue kɛ sin sa. Asa’n ɔ fata kɛ e nian like nga be fa mannin e’n i su kpa kpɛkun ninnge kwlaa nga e si be’n, e fa kle e wiengu mun. Sɛ e yo ninnge sɔ mun’n, kɛ nga Pɔlu seli Timote kɛ ɔ yo’n sa’n é dí “Ɲanmiɛn junman’n guɛguɛ i bo.”—2 Tim. 4:5.