?BAMBAE yu filim olsem wanem sipos wan gudfala fren blong yu i raetem wan leta we i enkarejem yu bigwan? Disaepol ya Timoti i kasem wan kaen leta olsem we i kam long aposol Pol, wan leta we tede yumi kolem se buk blong 2 Timoti long Baebol. I sua se Timoti i wantem tumas blong go long wan kwaet ples, blong i ridim ol tok we i kam long gudfala fren blong hem. Maet Timoti i stap tingting se: ‘?Pol i oraet nomo? ?Hem i gat sam advaes we i save halpem mi long asaenmen blong mi? ?Leta ya i save halpem mi blong mi mekem gud minista wok blong mi, mo blong mi halpem ol narafala?’ Olsem we bambae yumi luk, Timoti i faenem ansa blong ol kwestin ya mo blong plante moa long impoten leta ya. Be naoia, i gud yumi tokbaot sam gudfala advaes long leta ya.

Taem Timoti i stat blong ridim ol tok long stat blong leta ya, hem i haremsave kwiktaem se Pol i kea bigwan long hem. Wetem lav, Pol i singaot hem se: “Pikinini blong mi mo mi lavem yu tumas.” (2 Tim. 1:2) Timoti i kasem leta ya long yia 65 K.T. Maet hem i gat bitim 30 yia mo hem i wan elda we i gat plante ekspiriens finis. Hem i bin wok wetem Pol blong bitim ten yia finis, mo i lanem plante samting.

I sua se taem Timoti i harem we Pol i stap gohed blong stanap strong long ol trabol, hemia i enkarejem hem bigwan. Pol i stap kalabus long Rom, mo klosap nao bambae oli kilim hem i ded. (2 Tim. 1:15, 16; 4:6-8) Timoti i save luk strong tingting blong Pol, long ol toktok ya blong hem, we i se: “Mi mi stanap strong long olgeta samting.” (2 Tim. 2:8-13) Olsem Timoti, yumi save kasem paoa from nambawan eksampol blong Pol blong stanap strong.

Pol i pulum Timoti blong luk asaenmen blong hem long wok blong God, olsem wan samting we i sas tumas. Pol i wantem se Timoti i mekem “presen ya we [hem i] kasem, i kam bigwan moa, olsem we man i mekem faea i laet strong moa.” (2 Tim. 1:6) Pol i yusum Grik tok ya khaʹri·sma blong talem “presen.” Grik tok ya i givim tingting blong wan presen we i fri, we man i kasem be i no wok from, mo samtaem i no stret tu blong i kasem presen ya. Timoti i kasem presen ya taem oli jusum hem blong i mekem wan spesel wok we i joen wetem kongregesen.—1 Tim. 4:14.

?Timoti i mas mekem wanem wetem presen ya? Taem hem i ridim tok ya ‘mekem presen ya i  kam bigwan moa, olsem faea i laet strong moa,’ maet hem i tingbaot faea long ol hom, we samtaem oli laet gogo oli kam ol red sakol nomo. Sipos man i wantem se ol sakol ya oli laet bigwan mo oli hotem olgeta, oli mas mekem faea ya i kam strong moa. Wan diksonari i talem se Grik veb ya (a·na·zo·py·reʹo) we Pol i yusum, i minim “mekem faea i laet bakegen mo fanem faea blong i laet strong,” taswe veb ya i save minim tu se “man i glad tumas long wan wok nao i wok strong bakegen long hem.” From samting ya, i olsem we Pol i talem long Timoti se: ‘!Putum hat blong yu i stap long asaenmen blong yu!’ Tede, yumi tu yumi mas mekem sem mak, yumi mekem bes blong yumi long wok we yumi stap mekem.

Taem Timoti i gohed blong ridim leta blong gudfala fren blong hem, hem i luk wan narafala tok we i save halpem hem blong mekem gud minista wok blong hem. Pol i raetem se: “Yu protektem gudfala samting ya we yu kasem wetem help blong tabu spirit we i stap insaed long yumi.” (2 Tim. 1:14) ?Wanem ya gudfala samting we Timoti i kasem? Long vas bifo, Pol i tokbaot “ol gudfala tok,” hemia trutok we hem i kasem tru long Tok blong God. (2 Tim. 1:13) Timoti i wan Kristin minista, taswe hem i mas talemaot trutok insaed mo aotsaed long kongregesen tu. (2 Tim. 4:1-5) Mo tu, oli putumap Timoti blong i kam wan elda we i mas lukaot long ol sipsip blong God. (1 Pita 5:2) Timoti i save protektem gudfala samting we hem i kasem, hemia trutok we hem i mas tijim long ol man, taem i dipen long tabu spirit blong Jehova mo Tok blong Hem.—2 Tim. 3:14-17.

Tede, yumi tu yumi gat trutok ya we yumi kasem, we yumi serem long wok blong prij. (Mat. 28:19, 20) Taem yumi gohed blong prea mo wokem gudfala fasin ya blong stadi Baebol, yumi save holemtaet glad we yumi gat long nambawan trutok ya we yumi kasem. (Rom 12:11, 12; 1 Tim. 4:13, 15, 16) Mo tu, maet yumi gat sam narafala asaenmen blong wok olsem wan elda o long fultaem minista wok. Ol gudfala trutok olsem i sud mekem yumi gat tingting daon, mo mekem yumi dipen long God. So yumi save gad gud, o protektem, gudfala samting we yumi kasem, taem yumi tinghae long hem mo yumi dipen long Jehova blong i halpem yumi blong lukaot long hem.

Ol asaenmen we Timoti i kasem, oli no blong hem nomo. Ol narafala tu oli mas mekem. Taswe Pol i talem long Timoti se: “Ol tok we yu harem long mi . . . Yu putum ol samting ya long han blong ol man we oli holemstrong long God, nao bambae olgeta oli kam naf blong tij, nao oli save tijim ol narafala.” (2 Tim. 2:2) Yes, Timoti i mas lanem mo serem ol samting long ol Kristin brata blong hem. I impoten we evri elda long ol kongregesen tede oli traehad blong mekem sem mak. Wan gudfala ovasia i no jalus nao i holemtaet save blong hem long wan wok. Be hem i tijim ol narafala blong oli save mekem wok ya. Hem i no fraet se maet bambae oli save moa o mekem i gud moa long hem. Taswe, ovasia i no jes tijim olgeta nomo blong mekem wok. Hem i wantem halpem olgeta we hem i trenem, blong oli naf blong yusum tingting blong olgeta, mo skelemgud samting, blong oli kam bigman long spirit. Long rod ya, “ol man we oli holemstrong long God” we hem i tijim olgeta, bambae oli givhan moa long kongregesen.

I sua se Timoti i tinghae long gudfala leta ya we hem i kasem long Pol. Ating i isi blong tingbaot se hem i stap gotru long ol gudfala advaes ya oltaem, mo i tingting dip blong luk olsem wanem hem i save folem long ol asaenmen blong hem.

Yumi tu yumi wantem folemgud advaes ya. ?Olsem wanem? Yumi save traehad blong mekem presen ya i kam bigwan moa, olsem faea i laet strong moa, blong protektem gudfala samting ya, mo blong putum ekspiriens mo save blong yumi long han blong ol narafala. Long rod ya, olsem we Pol i talem long Timoti, yumi save “finisim gud minista wok blong [yumi].”—2 Tim. 4:5.